PEKSANGA CHAPTER 17

Episode kal lai dah luhna

Moderator: writers

Sbk Pachuau
Posts: 127
Joined: August 9th, 2018, 8:19 pm

PEKSANGA CHAPTER 17

Unread post by Sbk Pachuau » April 10th, 2021, 10:50 pm

PEKSANGA 17
Sbk Pachuau


Kut vawt thlerin ka hmaia a rawn khawih chuan peih lo zetin ka meng a, tharlam sara ka nupui hmel lo lang chu ka hmu hmasa ber a, mit men ruala hmuh hmasak ber atan chu tluka thlanawm a awm thei hauh lo ang.

A kutah vuanin ka pawt mu ve a, ka taksa nghenga muttirin a rim tui tak chu ka hip vang vang a, a biangah ka fawhsak zauh bawk.

"Tho ve tawh la. Ka nu-in khawiah emaw kal lawk a ngai a tia."

"Min thawhsan daih a!" ka lo ti thung.

"I mu tui lutuk a, ka ti harh duh lo che a nih kha."

"Nang i mu tui em?"

"Umm... Mu tui lutuk! Thawh ka hai țep alawm."

"Thawh hma kher a ngai hleinem," a bianga chulsak pahin ka ti a.

"Mo thar tuka thawh tlai te chu a!"

"Tihtur hmanhmawhthlak a awm chuang hleinem."

"Awm lo mah se thawh tlai chu thil mawi a ni lo a."

"Nangmah i mawi tho alawm."

"I ho!"

*****

Inhnuai lama kan chhuk thlak chuan ka nu'n min rawn pan vat a, a hnungah ka pa'n a rawn zui bawk.

"Mama, tukțhuan ei turin i nu ka sawm a, in va hruai lawk mai dâwn em ni ang?"

Ka beisei loh lam daih a sawi avang chuan ka chhang mai lo.

"I duh loh chuan va hruai a ngai kher lo," ka pa'n a lo ti nghut a.

"Va hruai ngei la a țha ang. Azuali tan pawh kawm chianna hun a la awm miah lo a, Aizawla a awm chhung chu a tam thei ang ber inhmu thei ula ka duh a ni," ka pa țawng haiderin ka nu chuan a ti ve hmak a.

Kei pawhin ka pa sawi ang khan va hruai chu țul ka ti lo hle a, inthiam lohna nei lo leh tih sual nei miah lo emaw tih mai tura chapo lutuka a la țawng vel ham ham te khan a bula awm min ti chak lo a, ka nu mah ni se a hnaiha awm thlakhlelhna ka nei hauh lo.

"Amah pawhin a lo kal ve thei reng ang chu!" ka pa bawkin a lo ti leh a.

"Pa-a, lo insum lawk la," ka pa banah vuanin a chul zui heuh heuh a. "Mama te'n an hruai dawn tiin ka hrilh tawh a, a lo nghakhlel tawh ang che u. Va kal phawt mai teh u."

Ka nu(hrawn) thu ni lo se ka hnial chiang khawp ang. Ka pa pawhin kan ina ka nu lo kal leh tur chu țul a ti lovin lo kal lo tawp mah se pawi a ti hauh lo tih a hriat mai a, keimah ang bawkin ka nu(hrawn) thu chu a hnial bur hreh niin a lang bawk.

Phur lo zetin motor ka khalh a, Azuali'n ka nu chanchin min zawh pawh chu ka chhang mumal lo hle.

"En teh, a bulah i awmin i chenpui dawn pawh a ni lo a, mahni hringtunu ngei laka i rilru put hmang hi thlak deuh a țha lo maw?" eng emaw chen kan ngawih vang vang hnuah a rawn ti chhuak hlawl a.

"Ka haw hran lo. Mahse, a hmel hmuh leh a bula awm hi ka phur hlawl lo."

"Phur lo mah la a fapa i ni a, a bula i awm hunah pawh a tana awm ti nuam lo thei tur anga awm loh hram tum rawh aw."

"Ka pa nena an ințhen chhan i hria em?"

"Ka tan chuan an ințhen chhan kha a pawimawh ber rih lo. Ka pasal duhtak min hrinsaktu a nih angin ka tan a hlu hle tih chiah ka ngaihtuah."

Eng mah sawi tawh lovin ka nupui kut chu ka vawnsak a, amah vang tal pawha insum hle ka ngai dawn a ni.

Ka pute(ka nu pa) in kan thlen chuan thei leh thei lovin ka pu chu min lawm turin a lo tho chhuak ve a, ka piin kumhnih kal ta khan a lo boralsan tawh a, ka pu pawh hian a zui ve har tawh vakin a rinawm loh.

"Bawihpuia chu ka hmuh loh karin i lo lianin i lo puitling ve tawh hle mai. I hmel lah chu a țha tawlh tawlh emaw tih mai tur lah ni! Nupui pawh i neih țhat khawp hi," tiin ka nupui nen min chibai a.

Ka nu chu inpeih sa apin a lo awm a, ka nupui chu ka pu-in a la biak khawmuan rih avangin tum aia rei kan țhu a, ka nu-in kal a rawt tàkah chuan thaw huai chungin ka ding a. He inchhungah hian ka thisen zawmpuite cheng mah se ka thla a ngam lovin ka pik mup ni berin ka hria a, ka nu ka huatna ațanga hetianga awm ka nih erawh ka ngaihtuah duh lo lui tlat thung.

Kan in kan thleng a, ka ute nupa, Sangpuii leh Freddy bakah Lalhriata te nupa pawh an lo thleng ve tawh bawk. Ka u-in ka nu a hmuh chuan a be nghal bawrh bawrh a, a chanchin sawi takngial pawh duh lo khawpa haw țhin siin chutia țha deuha a lo dawngsawng chu mak ka ti viau dawn a, ka nu(hrawn) nen an lo titi dun tawh a nih ringin mak ka ti leh ta lem lo.

Chaw ei kham hnuah Sangpuii leh Azuali kan room lamah thawmhnaw rem felin an awm a, ka nu(hrawn)-in ka nu chu thlah tura min tih tlat avangin kan unauvin kan va thlah a.

"A la danglam tam lo hle mai," kan haw lamin ka u chuan a rawn ti chhuak hlawl a.

"Ni e," ka lo ti ve mai a.

"A kumte a lo tam ve deuh tawh si a, tlem tala a danglamna hmuh ka lo inring kha a ni a, ka lo ring sual khawp mai."

"Ka tan a pawimawh lo bawk a, a pawina ka hre lem lo."

"Kan nu a ni tho asin!"

"A hming mai chauhin," ka ti nghut a.

"Kan huat viau hian awmzia a nei chuang lo a, eng ang mize pu pawh ni se kan ngaihsak ve hi țha ka ti!"

"I duh chuan i ngaihsak thei reng alawm."

"Keimah chauh ni lovin, kan unau hian a nia ka tih. A landanah khan chapo leh induh tawk tak angin lang mah se a mitmeng kha uluk takin en la chuan a chhungril nun ruakzia i hriatsak ve ngei ang."

"I lo chik bik hle mai," ka ti el deuh a.

"Kei chuan chik nachang pawh ka hre lo; ka nu min hrilh a nia. Ka han en chiana a bula ka awm rei tàk hnu khan ka nu sawi kha a dik tih ka hre ve chauh zawk a ni."

"Sum leh nawmchenna umin a duh zawng a pan a, eng vangin nge a nun chhungril chu a khawhar ngawt ang?"

"Mama, i huatna kha dah bovin heti zawng hian han ngaihtuah ve teh aw. A thil lo tih tawhah inchhirin, let leh thei tawh si lo rilru pik deuhin a awm pawh a ni thei; a ziaa chapona bet reng vangin a ti lang duh lo pawh a ni ve thei tlat a ni."

"Inchhir tak tak ni se a hmel leh nungchangah a lang ang chu!"

Ka luhlulzia hre chiangtu a ni a, chuti maiin ka rilru a hneh dawn lo tih a hria a ni mahna, eng mah sawi zui lovin a ngawi ta daih a.

Chawhnu lamah țhiante nen thla la turin kan chhuak a, Azuali chuan hmun danga thla la tura chhuah leh chu țul a ti lo viau naa Sangpuii leh Freddy phur zawng tak mai a lo ni si a, min nawr chhuak a ni ber e. Lalhriata pawh chawlh tawp aiah reilote a hna lamah kalin kan ruala chhuak turin a lo thleng leh hman a, Sangtei erawh naute a la buchip deuh avangin tukțhuan a ei ve bak kha chu a rawn tel ve thei ta lo thung.

Ina kan let leh chuan khua a thim titih der tawh a, boruak a lum deuh bawk nen hmeichhe pahnih chu an chauh hmel viau a. Sangpuii takngial pawh a phûl peih ngang lo a, ani leh ni loh ang takin a țhu zawi ngiai mai a ni.


******

"Bawihi, inbual phawt la," khuma Azuali lo muhil sêk sêk chu ka kaitho a.

Ka inbual chhungin khumah a lo muhil hman a, a chau ve hle dawn tih ka hriat avangin inbuala lo muhil leh mai turin ka hrilh a, ka pa-in min koh avangin inhnuai lamah ka chhuk thlaksan kha a ni a. Ka kaihthawh khan tho lovin a lo muhil leh daih ni ngei tur a ni, ka chhoh leh chuan a mut dan ngai ngaiin a lo la mu a.

Peih loh hmel zetin a rawn meng a, "Tihian ka mu tlang mai ang," a ti niah niah a.

"I thawmhnaw tal kha thlak la."

"Umm..."

A țhu chhuak tur chu ka lo pui vat a.

"Ka inbual loh chuan ka mu tui thei ngai lo a," tiin a ding a, towel la-in bathroom lam a pan zui a.

"I va muthlu leh ang e aw," fiamthu-in ka au zui a.

Bathroom kawngkhar bulah a ding dat a, lo hawi letin mitmeng lerh lam hian min rawn melh a.

"Ka mutthluk i hlauh chuan min lo bual la."

"Min fiam miah suh aw," ka lo ti nghut a.

"Ka fiam miah lo che," thutak zetin a rawn ti a.

Muang changin a dinna lam panin ka pen phei a, a mitah ka en ran bawk. A bul ka thlen chuan a kawngah kuahin hnai zetah a hmel ka bih a.

"Ka bual che a nih chuan thil thleng tur i hria tiraw?"

"Umm..."

"Chuan, ka bual che chu i duh chiang maw?"

"E... Ngawi lawk... Min la bual ngai si lo a, min bual fai lo palh ang," tiin ka kuahna ațanga tal pitin hmanhmawh zetin bathroom chhûngah a lut nghal a.

A nui har har ri ngaithla chung chuan ka khi ve suk a, "Chimawm reuh lutuk!" tia phun supin khum lam pan chuan ka phei a.

Ka bula a rawn mut chuan ka lo kuah vat a, a chauh êm avangin chet lak ka tum rih lem lo. Zing lamah erawh zan lama ka chet ai chet ngei a ngai thung ang.. Haha.

A exam zawh ve theih tàk loh avang khan a graduate ta si lo a, hrehawm a tih thu leh BA tal zawh ve theih a duh thu a sawi leh zauh țhin. Correspondence-a BA a zir theihna tur ka ngaihtuahsak a, a țhiante aiin graduate tlai deuh dawn mah se pawi a ti lo a, graduate theihna hrim hrim a nih chuan a lawm tawk rih viau a ni. A duh a nih phawt chuan MA pawh a zir chho leh zel ang chu!

Hna lama ka buai țhin êm avangin in lamah ka awm tam lo hle a, ka nupui chu ka ngai thei viau mai. A châng chuan chhun lama eitur min pek chhuanlama hmangin ka ko leh zauh țhin a, a lo kal tawh hi chuan kaltir leh mai phal lovin ka chelh khawtlai ziah bawk.

Ruatpuia pawhin electronics lam dawr siamin a buai ve thei hle a, a buai zual chânga Azuali rawn ko mai țhin tura ka tih lahin a tlawmngai tlat a. Tlangval pahnih chhawrin an indaih loh țum chuan buai ve thei rem rem tak an ni.

Azuali'n a nunhluia a kir leh mai a hlau kha a ni a, a hlauhthawn anga awm lovin patling takin a khawsa a, a eizawnnaah insawrbingin theihtawpin hma lam panin a tlan tak meuh meuh a ni a, a hma khan a ring miah lo tihna ni lovin tunah chuan a u chungah nasa takin rinna a nghat ve thei tawh a ni.

Pi Siami te nufa khan bungraw changkang leh man to tak tak te lei țhin mah se a building chu chei țhatna chang an hre lo a, an che fel lutuk lo bawk nen Ruatpuia chuan chei țhat hna a thawk nasa hle a, rawng te hnawih țha-in inchhung lam thawm ngai te pawh a theih ang angin a thawm țha a, tunah chuan a lang thar vuk tawh a ni.

Kan innei rei tial tial a, ka nupui duhawmzia leh rilru țhatzia ka hre chiang telh telh a, ka chhungte lakah pawh a tlatlumin ka pa takngial pawh a bulah chuan a țawng duh ve viau țhin. Ka naute lahin an ngaiin hun an neih phawt chuan a bula awm reng mai chu an duh dan a ni a, ka nu pawh a bang chuang lo.

Nikhat ka office bang in ka thleng chu nidang ang lo riauvin ka hria a. Min be tho siin a awmdan chu dik lo tlata hriatna ka nei a, ka zawh lahin engmah a ni lo tiin min chhang zel bawk si, mak ka ti ru viau a.

Ka inbual zawh chuan khuma ka inthlakna tur a dah chu ka inbel mawlh mawlh a, ni dangah chuan ka inthlakna bulah lo awmin ka hna lamah buaina ka nei em tihte min zawt țhin kha a ni a, tunah chuan ka nei lo ang hmiaha ngawi rengin, tukverh bulah dingin pawn lam a thlir daih a.

A hnungah dingin a kawngah ka kuah a, a taksa lo insangmar nghal țeuh chu ka hre thei a.

"Thil dik lo a awm em ni?" tiin ka zawt a.

"Awm lo," a ti bul hmak a.

"A awm lo tak tak maw?"

"Aw," a ti tawi tàk a.

"A nih leh i lungawi lo em ni?"

"Lungawi lohna tur a awm em ni?" tiin min zawt let khauh a.

"Kei chuan ka hre lo a. I awmdanah hian lungawi lo i ang êm a, ka zawt che a nih chu."

"I lung a awi chuan a tawk mai alawm."

"Tawk mai lo e. I lung a awi loh chuan a tawk lo."

"Keia lungawi leh awi loh i tan awmzia a awm lo."

"Awm tehreng e," tiin a țang țeuh chung chu ka lamah ka kuai her a.

"Le... Min hrilh tawh rawh le," thlem titihin ka nawr a.

"Hrilh tur che ka nei lo."

"Nih leh vawiin lama ka pa check-up result a țha êm?"

A lo bu nghat a.

"Ka nu nen em ni in kalpui?"

"Aw..."

"Chuan..."

"Eng mah!" a ti tawi tàk a, ka nui chhuak hawk thung.

Kan inneih hnu pawh hian naupangchhia deuha a awm zauh țhin ang kha a la bansan thei lo a, tunah pawh a lungawi lohna sawi duh si lovin a ti tau ve chu a ni a, a awmdan chuan ka mang a tih an rualin ka nuih a ti za hle a.

"I sawi loh chuan ka hre dawn miah lo a nia," a benga tuaisak pahin ka ti a, duh lo zetin a thle sawn vat a.

"I hriat duh leh i bialnu Baby-i zawt la ni mai alawm!"

"Ani ka zawh ngai lovin nangman min hrilh mai la."

"I la thlah phal lohte chuan keimah min nei lo hian amah zawk kha nei mai ta che!" a aw chu a vin deuh naa a khur titih a.

"Ani duh ila nang ka nei lo ang che," kuah nghet sauh chungin ka lo ti thung.

"I la thlah phal chuang si lo alawm." Țah chhuak insum aw-in a ti leh a.

"Thlah turin ka vuan ngai reng reng lo. Nang ka tawn hnuah che phei chuan tawh pawh ka tawk hauh lo."

"Nih leh tinge i office-ah a lo kal țhin?

"A lo kal chhan dik tak a ni em chu ka hre lo a, ka office bulah a țhiante an awm a, chuta a kal pah chuan a remchan avanga lo lêng lut angin a insawi."

Thla hmasa khan Baby-i chu ka office-ah vawikhat a lo kal a, nimin khan a lo kal leh ngei bawk. Mahse, engtin nge ka nupui hian a hriat ka hre lo thung.

"Vawiin khan damdawi inah Baby-i țhiannu kha kan hmu a, ka pa in-check-up-naah khan a lo thawk ve reng a."

"Chuan?"

"Ka pa test result vel kan nghah laiin ka bulah a lo kal a, ka zawt pawh ni miah si lo khan Baby-i nen in la inkawp thu leh i office-a leng tura i koh țhin thu min hrilh a."

"I lo awih a maw!"

"A tirah chuan ka awih lo a. Mahse, i office chhunga Baby-i nena in thlalak ka hmuh khan ka rilru a na lutuk a..."

Ka awmah a hmai phumin a inhnit hlap hlap a, duat zeta kuahin a hnungah ka chulsak heuh heuh bawk.

"Thlalakah chuan kan ding dun em?"

"Aih, ding dun lo. Mahse, i office chhung ngei a nia."

"A lo kal ngei a, ka kut hmawr pawhin ka tawk lo thung. Thla a la tih pawh ka hre lo a, ka ngaihven hek lo. Ka thinlung hi nangmah chauh hian i luah."

A khabe-ah khai dakin ka hmel en turin ka ti a.

"Midang kawp tura min ngai chu ka lawm lo viau naa i thik tih hriat hi nuam ka ti riau!" ka ti a.

"Kha nu khan a sawi nasa êm alawm. Ka ring tho che a; mahse..."

"Min ring tho a, min ring bawk si lo a!"

"Nang pawh ni la, i lawm bik miah lo ang," lungawi lo deuh hian a ti hmak a.

"I nunah mipa dang an awm ve a nih chuan ka lawm lo satliah lo ang. A lo piang ve kha inchhir rum rum tur khawpin ka siam ang," ka ti hmiah a.

"Kei pawhin Baby-i saw ka pasal nena kan inkarah lo inrawlh lo turin leh a inrawlh lui a nih chuan a piang ve hi inchhir ngawih ngawih tura siam ve mai ka duh!"

Ka nui chhuak hawk a, rum fê-in min melh râm râm a.

"Ka ti hreh dawn miah lo a nia," a tih leh chuan za lutukin ka nui a, a tawpah chuan ani pawh a rawn nui ve ta hak hak a.

A lung la awi lutuk lo chu ka fawp lui a, min dan a tum nasat poh leh ka fawp uar ting mai si a, a tawpah chuan min chhang let ve ta nge nge a.

Pawm kang lawpin khumah ka muttir a, a chungah ka bawk nghal thlap bawk. Duhthawh zeta fawpin a kawr chhungah ka zen lut a, ani pawh a lo insiam rem ve sat sat a.

A kekawr haklai ka pawh thlaksak a, a kumkar lam ka khawih chiah chuan min lo dang a, ka chu manbetin thaw hlawp hlawp chungin min en a.

"Ka rawngbawl lai ka rawn tlansan daih a, ka nu a lo buai lutuk ang. Ka chhuk thlak vat a ngai!"

Ka kut a manna chu lak sawnsakin ka duhna lai chu ka chul kual a, min dan a tum pawhin a kutah man betin ka chhunzawm zel a.

"Ka chhuk..."

"Thil dang ngaihtuah lovin keimah chiah min ngaihtuah rawh."

"Ka nu-in..."

"Shhh... Keimah chauh," lo ti lehin a hmuiah ka fawp leh nghal zat a.

A thawmhnaw ka hlihsak vek a, kei pawhin eng mah ka inbel tawh lo.

A chungah lawnin ka insiam rem a, ka nupuiin min mamawh tih hriat ngawih ngawiha mitmeng si sap chunga min enlai chuan khawvel dangah ka thlawhpui ta delh delh a.


(Ninawm! A sexy leh tawh🙈)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)