JOEL LALREMSIAMA 5

Episode kal lai dah luhna

Moderator: writers

Hluhlu-i Khiangte
Posts: 93
Joined: April 7th, 2021, 10:04 am

JOEL LALREMSIAMA 5

Unread post by Hluhlu-i Khiangte » April 11th, 2021, 2:54 pm

JOEL LALREMSIAMA



CHAPTER-5


By-Hluhlu-i Khiangte





Min fawhna a thlah rual in "Ka hmangaih che", a ti sap a, kei erawh ka kimki nghal chaih chaih thung!




Ka in la hrang a, ka ṭap ka bang chiah a ni a, ka mittui in lo chhuah a chak leh nghal, ma in pet ruh a, kal sawn ka tum chu ka ban rèk ah min lo vuan chat!




'Ih, ih, ka ek a chhuak a', bah niai in ka ti sap, a nui hawk hawk! "Va e ta poh che", min tih chuan ka kal dawr dawr a, min la nuih zui reng. Ka chal ka kuk lawlh! Che khir lutuk mai, ka lài ve vel anih chu! Annie Lalruatdiki a lái tih sawi ila tu pa fa in nge awih ang? Ka nui var var a, ka va zung ta ngawt! Ek chhuak lo pui ek thu awm suh. Ka nui tawp riai riai a, Joel chu ka hmangaih alawm, mahse, ka bawlhhlawh zia te, hmeichhe neih hlu ber ka thianghlimna sum a ka hralh tawh si zia te ka ngaihtuah a, ka in sit ngawih ngawih, rei awm chi ni hek lo le pangngai tak ang a lan tum chuan ka kal ve bawk a min man rang kher mai.




"Enginnge ti lungngai che", min ti ta mai rèng a, a kiang a ṭhu in hnuai lam ka bih ngar a, ka zah takzet zet, 'englo ania, kei chu heti mai hi ka ni a, hmangaih tak a sawngbawl tlak loh khawp in hun ka hmang tawh a', ka ti dek dek chu a ban a vai vut. 





"Shhh, ka hria, ka hria, a ṭha em? Ka hmangaih tho tho che, hlat phah che ka tum lo a, ka tan i sim dawn bawk tiraw? Pathian kan au anga,kan au eih em em ang, fight dun ang aw", a tih chuan ka bu nghat, hmel hlim zet min hmuh in min fawp dek dek a, a nuam ngawih ngawih, thlà lo in ka thlawk nimai in ka hria.




Eng nge ka tawn anga, ka hma hun ah eng in nge min hmuak tih lam rèng ka ngaihtuah lo, ka hlim ngawih ngawih ani mai, ka flat ah kan riak dun a, ka zawng zawng a hre fai kelh chung pawh in min khawih zu tum miah lo a! Hetiang hi em ni hmangaihna diktak chu ni ang le.





Ka hmai za mer mer ah chuan ka harh a, ka meng diar diar, chiang kel kawl in Joela'n minlo en reng anih chu! Ka nuih sen sen a, "duhawm lutuk mai", min ti chungin min rawn fawp zauh, ka lo ṭeu hlar thung, ha pawh nawh hma hma a in fawh te chu a! Awm ang lo lutuk mai, phun hlak hlak chung in ka tho a, ka in phih fai mawlh mawlh, lungawi hmel lutuk in min en vawng vawng a, ka lài ru viau a chu ka ti lang duh lem lo thung.




Breakfast pawh ei hman lo in kan hna lam kan pan dun a, ka huphurh ru angreng phian mai, kan thawhna hmun a in an miau loh avang in kan in ṭhen ta a, ka hna pan a ka kal mek lai chuan ka message tone a ri tleng a, la hawng vat ,"Thufingte 16:8  Fel lo taka deh chhuah tam tak ai chuan Fel taka deh chhuah tlemte a tha zawk.", tih hi a lo ni a, Joel hnen aṭang a ni, ka thaw hawk a, ka tum ve hrim hrim tur ani, harsa dawn pawh ni mahse, Joel-a sawi ang deuh in Pathian kan au dun anga, keimah chauh a ka auh eih zawh loh kha pahnih a kan auh chuan min chhang duh maithei asin!





Beiseina nen ni kan chhiar liam ve bek bek zel a, Sanjay-a pawh Joela'n kut a thlak chungchang ah ngaihdam dil in kan chanchin te kan hrilh a, kan in kawp thu kan sawi lai a Sanjay na hmel kha ka theihnghilh tawh in ka ring lo.




Min lo hrethiam in duhsakna min hlan mawlh mawlh a, hlim hmel a pu lui tlat a hriatna ka nei, ka hriatsual a nih ka ring lo bawk, mamawh na kan neih phawt chuan be turin min ti a, ka chanchin ka hrilh lo chu a lawm loh thu min hrilh, "Baby, min hrilh in i harsatna min share la chuan nawmchen pui kher lo che pawh in ka pui thei tur che ania, i nawmsakna i um luat ah ka ngaih sak che a, i ṭhian ṭha a min ngai a i chanchin hrilh na tlak ah min ngai lo in min rin ngam turin ka awm lo ani mahna", a ti vei sup, ka harh chhuak zawk mai.




Puih dil in vawikhat pawh ka be lo a, a offer ka pawm nghal hmiah anih kha! Kawng dap nasa ka in ti a, ka tihsual ka hre fiah kuar(h). Ka mizo nuṭa takngial pawh in min ṭanpui chu sawiloh an nawmchen nan a in phalrai turin offer min siam sak a, hnamdang lak ah chuan beiseina kha a them takngial pawh beisei nachang ka hre lo, ka à takzet ani, kawng dang thlang thei reng ka nih laiin kawng awlsam zawk leh nuam zawk ah ka pèng alo ni, ka nawmna ka um avang in!






In chhir in awmzia nei tawh lo teh mahse ka in chhir thar leh hnuhnawh a, Joela zawk in min hnem char char, Sanjay-a'n min ṭanpui nan nuai khat lawih min pe a, hnar tum viau mahila, "ka hmangaih che ka tih kha dawt a ni lo baby, mahse, i mizo pui ngei i hmangaih leh hmangaih tu che i nei a, ka lawm lutuk tho, hei hi ka hmangaih tan ka tih sak tlem te ah min ngaihsak ta che", ti a min nawr khan Joel zawk in hnar tawh lo mai turin min ti tawp, "a rilru dam nan tih tir rawh", min ti anih kha, lawm tak leh zak ru tak chungin ka la ta hram a ,a lo sual loh zia ka hre fiah kuar mai.







Joel nen chuan hlim tak in kan in zui chho a, a thikthu chhe tawpkhawk mah se ka nunhlui min sawi chhuah sak ngailo, keipawh in dik lo tak a sum hai luh lam chu ka hnar ve ṭang ṭang ṭhin, off day te la rual in park nuam zet ah te kan leng dun rial rial ṭhin a, kan hlim dun takzet a ni.




Vawiin kan off day pawh Lal Bagh park a len tum in kan in ruahman a, in ngaizawng tan chuan a tluk a nuam a awm bik kher lo ang le. In kuah rial in park ah kan ṭhu dun a, ka hming lam ri ka hriat chuan ka hawi phei a, Ate-i ani, hlim hmel zet in min rawn pan a, mak ka ti ru viau, min haw hle khan ka hre si a.





Ka bul a rawn thlen chuan min kuah nawk nawk a, "dam loh chhuanlam in hna ka kal lo ve hmiah, an buai ve teh ang chu", tiin a nui har har, za lo zet in ka nui tawi tak ringawt, thum dut a, "Baby", rawn ti tu chu ka en a, nasa lutuk in ka phu, ka lung hi a sawt chhuak dawn emaw tih mai turin a phu dawt dawt thei, Ate-i kawng ah kuah in Ate-i pawn a kuah let vat a, kan hma ah an in fawp ngawng ngawng, Abhishek a ni!





Duhthawh lutuk a an in fawp chu ka thlir mawl tawp, Abhishek chuan Ate-i mawng a a ṭham tawk hnu ah an in thlah hram, ka lam rawn hawi in, "kan in hmu leh ta maw, i dam ṭha em?", a rawn ti sup a, Joel leh Atei'n phawk fe in min melh dun haw!






'Ahh, ah, aw, dam ṭha e', ka ti bah nawk nawk a, a nui vei huk anih chu, mak ti zet in kan pathum in Abhishek chu kan en rual ṭhap a, "Innocent hmel lutuk", ngeiawm lutuk a a rawn tih chuan Joela a ter at, 'aih, ti suh', ka ti ṭhat a, a hnek tum na kut la thla riai riai in hriatthiam har fe hian min en a, 'ih, Jo, ka haw duh tawh', ka tih chuan min kai lawp in min kal pui dawr dawr, ka ban a vawnna chu a na lutuk ringawt, ka ṭawng ngam der silo a, a thikthu chhiat zia ka hre chiang ngang mai si, ani nen khan nuam kan tawl dun tawh tih sawi lang phei ila chuan min ṭhet darh duh ang chu!





Ka flat pan lo in a flat min pan pui a ,ṭìk pawh ti ngam lo in ṭi dêk in ka awm ràn, a flat kan luh hnu pawh in ṭawngkam khat pawh in min be eih lo anih chu, ka be hmasa ngam der mai si lo a, hrehawm ka va'n ti tak èm, ka nun ka uluk loh luat tuk vang vek.




Rei fe kan ngawih hnu ah, "Kha pa phiangsen kha tu tehhrep nge ni a", thinrim tih hriat lutuk in a rawn ti tuar. ka phu dawrh a, ka ṭawng thei miah lo, min sawi nawk in "Mawh,min chhang ta che, tu tehhrep nge? Tham lo lutuk che a ṭawngkhum tu che kha ka khawih pawh phal lo in i chhan a, a hma ah i ding a", za lo lutuk in a nui hawk, 'Ih, Abhi, Abhishek', ka ti khur dar dar, Abhishek hming ka lam ri chiah chu min thlah hlawk a, a thinrim hmel dur khup kha na lutuk tuar hmel in a thlak chawpchilh nghal.




"Chhuak rawh", a ti sup a, zawi te, zawi te tak tak in a ni a sawi. A dar a vuan in "Jo, Joel",ka ti chiah chu, "chhuak rawh ka ti che ani lo'm ni? Ka in aṭang hian chhuak rawh, kut ka thlak palh ang che", a ti ṭhawt anih chu!




Hlau lutuk in ka tlan chhuak dawr dawr, a mitmeng mawlh kha! Ka hlau lutuk, pai nawk nawk chung in ka in ka 
tlan thleng zak! Ka flat ka lut chiah chu tui bottle la in ka hawng a, ka in nghal khawlh khawlh, ka thaw kawk kawk a, ka hah lutuk, ka mittui ka biang ah a rawn luang lum pap a, chhuat ah ṭhu sawp niai(h) in ka ṭap khur dar dar, ka nunhlui hian kei chauh ni lo min hmangaihtu a ti na tel ve zel anih hi! Nun fimkhur a ngaih zia ka hre chiang ta kher mai, ka chhungte phei chuan hria se an va na dawn èm, Joel ringawt pawh tiang khawp hian ka mangan pui ani si a.



Ka mobile ri ah ka harh a, ka thaw pik lutuk whiskey ka in leh ngawt kha ania, ka ruih hnu ah ka ṭap leh nghek tho, ka lo ṭap muhil a ni mahna, en chiang mang lo in lu na bur a tho chhuak a pick-up in "hello" aw hnawk zet in ka ti ṭuau, lehlam rawn ţawng ri ka hriat chuan ka phu zuk a, ka hamhaih bawk, ka mobile ka thlauh tawp a, ka melh ngai ka melh tlawk tlawk! Ka bawp tawm chial in ka ṭhu reng ringawt.






Min sawi nawk nawk tu an awm a, meng à riai chung in min sawi tu chu ka en chho a, Joel mit a min lainat na leh min thlamuan duhna ka hmuh chuan ka baw hawk! "Jo,dawt tiraw?", tiin ka in sut hlawp hlawp a, nghet zet in min kuah hle hle.




"Ka nu chu a ṭha tiraw? Ka nau te hi an nghal ve tawh lutuk a, min prank aniang tiraw? Min ti mangang lutuk, nangman hau hrep rawh aw, ka thu ai i thu an awih zawk ṭhin kha", ka ti ṭiau a, na lutuk in thawk a la hawk hawk a, ka bek a fawp leh tawk ṭhin.





Ka pa kan chan tawh a,ka nu lehzel maw? A ni thei lo ang,dawt min hrilh chiang lutuk, hetiang zawng a in fiam hi mal in a zawng mawh asin mawle, ka nau te pawh hi hauh an ngai nasa a ni, ka nu damlo chau rau nen zilhhau tu ṭha an awm lo a, thil chin ṭha lo lo an ching dawn tlat, ka phun hlak hlak a, Joela lak aṭang in la hrang in ka an chhunzawm hlak hlak, khawngaih hmel lutuk in min en ngawt ngawt te chu ka duh lo.





Ka lam a rawn pan a, "ka lal fanu, mizoram ah haw ang aw", a ti sap, ka lu ka thing nawk nawk a, 'Aih,haw kan ngai hleinem, kan chhungte pawh an dam ṭha a, hetah hna thawk zawk ila, pawisa tam tawk kan thawn thei zawk dawn alawm', beisei nei zet in ka en a, ka nuih ver ver, ka nui tawp chawt a, a bu nghat.





'Nilo, ka nu in min kal san tur a ni lo, Lalpa, kan la mamawh, i duh loh zawng ka tih ah kha chuan hremna na thei ang ber min pe rawh, nilo, ka hremna tawrh tur let sawm pawh min pe mai rawh, mahse khawngaihin ka nu hi min chhuh sak lo hram rawh', tiin ka ṭap rawng rawng.





Lungawi har ka ti ngawih ngawih, mizoram kan haw vat a, ka nu ruang kan hmu hman chuang lo, ava lungawi thlak loh lehzual teh lul êm. Ka nau te pahnih kum naupang tè in an pahnih in baihvai leh hamhaih lutuk in ka nu ruang an lo thlah liam si maw! Ka na ngawih ngawih a, ka nau te hnem tur zawk hi ka lè lo ber lawi si! Ka theihtawp tak meuh meuh ka lo chhuah ve na chhan leh hum sual ka dai chhan ngawih ngawih ka nu chu ka chhan thei chuang lo, Joel te chhungkua in min buaipui fai vek a, ka nu leh pa hi chhung leh khat ngah lo tak an ni a, an sawi dan phei chuan ka pa hi mi hausa fa niin ka nu a  hmangaih tlat vang in a chhungte rem ti lo chung a nei lui a, rethei bakberh tè in kan awm phah ta a ni awm e.





Ka nu hi chu fahrah alo ni lehzel nen pi leh pu ti a auh tur kan nei ngailo, Pathian dem ka tum hial a, fahrah a min siam vangin, mahse Joel-a leh a chhungten min fuih ṭang ṭang a, Bible a Joba chanchin te min hrilh in min fuih nan tak an hmang a, Joba tuarna te ka ngaihtuah in kan tawrh ve na te chu a lo nasat loh zia ka hre fiah kuar(h) kuar(h) a,ka dem ngam ta hlawl lo. Lungvar veng a ka ṭhian kawm ve ṭhin Lalchhanhimi, Tete ti a kan koh ṭhin pawh in min thlah thlam ngai lo, min rawn riah pui deuh chawt a, Ate-i leh Tetei te nen hian in kawm deuh bik kan ni ṭhin a, Atei erawh a rawn haw ve thei ta lo.





Lungngai a in dawmkun reng thei ka ni silo, ka nau te ka enkawl a ngai a, kei hi an in nghahna ber ka ni ta, ka nu kha chuan hna rim thawk theilo in damlo mai mah nise min uap lum a, kan kiang a a awm ngawt pawh khan thlamuanna nasa tak min pe si a, ka nau te hi ka enkawl puitling thei dawn em ni? Huphurh eng ang mah ila ka ko a tla ani miau mai si a, ka huphurh vang ngawt in midang ka hnawn thei ngawt silo, huaisen tak a hmachhawn pawp bak thlan tur dang ka nei chuang lo.


Keimah ka ni reng ang.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)