PEKSANGA 18

Episode kal lai dah luhna

Moderator: writers

Sbk Pachuau
Posts: 127
Joined: August 9th, 2018, 8:19 pm

PEKSANGA 18

Unread post by Sbk Pachuau » April 12th, 2021, 10:20 pm

PEKSANGA 18
Sbk Pachuau



Ka hna kaihhnawih thilah Lalhriata biak ka duh avangin chawhnu lam ka indah awl a, Vaivakawn P/S ka thlen chuan a lo buai lem lo bawk a ka kal chhan chu sawiin muk takin kan titi a, office lama let leh ka tum tawh loh avangin thu pawimawh kan sawi zawh hnuah pawh eng emaw mai mai sawiin kan la inkawm chhunzawm zel a.

Chutia hunawl neia kan inkawm dun tàk rengah chuan Freddy bia-in hna lama a laklawh lem loh chuan station lama lo kal ve turin Lalhriata chuan a hrilh a, ani pawh rei lo teah a lo thleng ve mai bawk a.

Buai êm êm lo mah se a duty hun chhunga office chhuahsan chu Lalhriata te department angah chuan thil tih chi a nih ve loh avangin a duty zawh hun nghakin kan inkawm a, constable pakhatin nula pakhat a rawn luhpui chuan haw a hun hnai thuak tawh a ni.

Lalhriata'n nula chu țhu tura a hrilh hnu chuan constable chu a chhuak leh nghal mai a; chu nula, zin bag lian lutuk lo nena rawn lut chu a hmel a pawr deuh naa a ngovin a hmelțha reuh viau mai.

"Eng thil nge ni ta le?" Lalhriata'n nelawm zetin a ti a.

Nula chuan zam hmel zetin aw a țhian kharh a, a țhut dan chu siam remin ngaihngam loh hmel deuh hian kei leh Freddy chu min rawn melh pah zauh a.

"Ka țhian te an nih hi, eng mah sawi hreh suh aw," Lalhriata'n a lo ti thuai a.

"Ih... Eng lo... Nizana in man kha ka u a nia, rawn bail chhuah ka duh a," a aw chu a khur deuh a, mangang hmel a pu bawkin ka lo hria a.

"A tu ber kha nge ni le aw?"

"Hmeichhia, zu rui in man kha a nia."

A aw-ah chuan a inthlahrung takzet a ni tih a lang reng a, a zak a ni tih hriat takin a sen deuh țân țân bawk.

"A nih tak chu maw le! Mahse, tunah mai chuan i bail chhuak thei lovang tih ka hlau khawp mai!"

"Eng vangin?"

"Court-ah bail dilna thehluh phawt a ngai țhin a, tunah court hawn hun a ni tawh bawk si lo, naktuk kan nghah mai a ngai dawn a ni," Lalhriata'n a ti charh charh a.

"A ruala in mante kha an chhuak tawh si a, enga ti nge ka u saw a la chhuah ve loh?" lungchhe aw lek lekin nula chuan a ti a.

"Damdawi a lo kawl tel a, case siamsak a ngai tlat alawm maw le! Midang te kha chu zurui case-a man mai an ni a, zankhat an riah hi chuan an harhfim hnuah an chhuak leh mai zel a."

"Damdawi maw!"

Mak a ti lutuk tih a hriat mai a, a hmelah awih lohna a lo lang a, țah chhuak insum tak chungin a lu a thing nar nar bawk.

"Ka u chuan damdawi a kawl ngei a maw?" aw tham deuh hian a ti leh țiak a, a hmel lan dan chu a lainatawm takzet a ni.

"Aw, kawl e. Chuti ni lo se ani pawh a chhuak daih tawh tur a nia."

Rilru hah tih hriat ngawih ngawihin, mita mittui tling pam chungin en ngai enin a țhu ngawi ta tlawk tlawk a.

"I u chuan damdawi a khawih țhin rêng em?" tiin Lalhriata'n a zawt a, a lu a lo thing tawp a.

"A khawih tih i hre lo nge?"

"Aih, a khawih ngai lo. Khawih ni se ka hre lutuk ang. Mahse, damdawi nen in man bawk si; a va'n mak tak!"

"Zu a in țhin tih i hria em?"

"Aw, zu chu a in fo tih ka hria. Mahse, damdawi kher chu..."

A țhu kun lap a, a kutah mittui a rawn far kauh bawk. A awmdan tê chuan khawngaih thla a la reuh riau a, amah lah zin haw hlim ni awm takin a pawr fap lehnghal.

"Khawi vengah nge in awm?" Freddy chuan a lo ti ve boh a.

"Kulikawnah..."

"Tunah tih theih a awm rih chuang lo a, i chauh hmel viau bawk si; ka va thlah phawt dawn che em ni ang?"

Freddy hi a ri huau huau țhin tak naa hmeichhe lam hi a ngaihsak lem lo a, tleirawl lai ațanga a lo kawp ve tawh a bialnu-in a boralsan hnu khan mumalin hmeichhia hi a kawp leh ta miah lo a ni.

"Thlah ka ngai lo ang, keimahin ka haw thei alawm," a lo ti sep a.

"A nih leh thlah lovin ka rualin lo kal ve la, in veng lamah ka kal dawn tho a," Freddy'n a lo ti ve thung a.

"Ih... Dik tak chuan ka zin ka lo thleng chiah a, kawng a khu lutuk a, ka bal angreng si a, mi motor-a chuang ve chi pawh ka ni chiah lo. Taxi ka la mai ang."

"Taxi pawh mi motor tho alawm. Lo kal rawh, intih fai thuai thuai te pawh i duh ang," tih leh a țhutna ațanga thawh a rual a.

"Țhianpa, naktukah chuan bail phalna chu court-ah maw dil tur?" Lalhriata chu a zawt leh hnuhnawh a.

Lalhriata chu a lo bu nghat a, nula hnenah chuan kan țhianpa chu zui mai turin a hrilh ve nghal zat bawk.

Hreh hmel zetin nula chu a tho chhuak a, pen thum vel a pen hman chauh tihah Lalhriata lam chu a hawi leh a.

"Ka u tan ai saw ka tang thei mai lo em ni?"

"Theih loh tlat! Tunah chuan va haw phawt la, naktukah tha tharin i lo kal leh dawn nia. Theihtawp kan lo chhuahpui ang che," Lalhriata chuan a khawngaih ve hle ni tur a ni, a țawngkam a dam thlup reng mai.

"A nih leh tunah hian ka va hmu lawk thei ang em?"

A ngawih deuh vang vang hnuah Lalhriata chuan constable pakhat chu a kovin nula chu mitang an dahna lama hruai turin a hrilh a, Freddy chuan nula bag khai chu laksakin an rual chuan a chhuak ve ta nghal a.

Khua a thim deuh titih tawh avangin keini pawh haw turin kan chhuak zui ve mai a, in ka thlen chuan khua a thim chiang viau tawh nghe nghe.

Lalhriata office-a thil thleng Azuali ka hrilh chuan kha nula tê kha a khawngaih hle a, amah ang bawka vanduaina eng emaw tak nei a nih a ring tlat a, a chanchin ngaihven zui zel turin min chah zui hial a ni.

Chumi kar tawpah chuan țhian hovin hawi thawven paha chaw eikhawm turin Sangpuii te huan lamah kan liam thla hlawm a, Freddy hmeichhe rawn hruai ka hmuh chuan hmanni a Lalhriata rawn betu kha a ni tih ka hre mai a. Ka hna lamah ka insawr bing țhin avang hian thil dangin ka rilru an luah vak țhin lo a, ani pawh a chanchin ngaihven zui turin ka nupuiin min chah tak naa ka lo mangnghilh leh daih tawh a ni.

Khatia Freddy nen an inthlah ta kha nula remti vak lo chung an in thlengin a thlah lui a, inah chuan a nu leh pa(hrawn) an lo awm a. An lo dawnsawn dan leh an hmelah a nu leh pate chuan an lawm vak lo tih a hriat mai a, tlangvalin thlahin inchhungah a zui lut ve zel bawk nen a pahrawn phei chu a meng rum nasa mai a ni awm e.

Freddy chuan thil awmdan tur awm ang a chhui dawn thiam ve deuh avangin an mitmeng nelawm loh tak chu a haider lui hmiah a, a tum aia rei daih a țhut phah nghe nghe. A chhuah hnua nu berin anhlaa an unau lepchiahzia leh anmahni vanga mualpho taka an awm thu a chhamte chu a hre vek a, nula erawhin țawngkam khat pawhin a chhang lo thung.

A tuk lamah pawh a u bail dan tur buaipuiin a vir buai leh zak zak a, chawhnu lamah inla chhuak fel theiin tlaiah reilote office-ah a lang hman hram a, hna lama an buai loh lai tak a ni hlauh zawk a, chuti ni lo se a buai a zual ve viau ngei ang.

Maziri te unau chu Azuali lo rindan ang ngeiin an van a duai khawp mai. A pa-in a boralsan hnu lawkah tuna a pa hian a nu rawn luhkhungin an nun chu zawi zawiin hremhmunah a châng chho a. A tirah pa țha tak anga langin an unau chuan a duatin a ngaihsak der viau a, a ni pawhin an ngaina ve hman hle. Mahse, choak âr-awn chang tawn mai mai chu a rawng pangngai lan hun a awm lo thei lo a, an pa ze dik tak an hriat meuh chuan an tan hlim taka awm a har chho ta hle a.

A pa ai kha a nu hian a thawh chhunzawm avangin inah a awm tlem viau a, an pahrawn erawh voluntary pension-a a chhuah tawh avangin a hman khawp a, ina a awm loh leh a leng a. A len chhuah hian an unau tan a engthawlthlak zawk avangin leng deuh reng mah se pawi an ti lem lo; mahse, a len chhuah aiin ina a awm a tam mah zawk a, an tan rilru hahdam taka awm a har chho ta viau bawk.

Eng emaw lai ațang khan an pahrawn chuan an unau lakah țhat a chhuah thar hle a, chhuanlam fahrah deuh deuh siamin an room chhûngah a tei lut nawlh nawlh fo ta mai bawk. A mitmeng leh che ziaah an unau ngaih chu a țha thei ngang lo a, room hrangah pawh mu ngam lovin a u room-ah Maziri pawh a insuan lut ta ngawt a.

A nu a pension a, in lamah a awm tam ve deuh tawh ang tiin an lo hlim hman viau a. Mahse, a pahrawn chuan a ti lungawi hneh khawp a, an unau chu dawta a hek reng bakah mipa laka sihhnip lutuk ang tein a chhuah a, a nu lakah an tlatlum lo tial tial a, titipui hleihtheih loh khawpin an thu a inhmu rem lo chho zel ta mai bawk si, an unau tan chuan a thawpikthlak zual zel a ni ber mai.

Nikhat chu, an chhungte lungphunnaah an nupa-in an kal a, Maziri chu college kalin a u-in in a nghak thung a. Nilenga lungphunna lama awm tura an ngaih kha chhun chawfak hun velah a lo let leh ta mai a, Maziri u chu amah chauhin a awm bawk nen a pahrawn lo haw a hmuh chuan room lamah a lut vat a, kalh a tum erawh a tlai ta hlauh mai.

Chumi țum chuan a pahrawn chuan sual luiin a hmalam hun a tih chhiatsak vek a, a nu hnena sawi miah lo turin a vau bawk. Chuta țang chuan a nun chu a inthlak thleng dawrh a, pawnah chhuak lovin inah a tawm tlat a, inkhawm tur takngial pawhin a chhuak ngai lo. Maziri'n a u nungchang inthlak ta lutuk chu mak a tiin a chhan a zawt fo a, eng mah a a hrilh duh si lo; chutiang chuan hun an hmang chho zel a. A vawihnihna a thleng a, chutiang zelin a vawithumna pawh.

A nunna lak tumin vawi tam a bei a, a nau a ngaihtuah avangin a țhulh leh țhin. Nun beidawng ngawih ngawihin a awm a, nau a pai tih a hriat phei chuan eng mah pawisak nei tawh lovin hrui valhah a inkhai hman a, Maziri'n a hmu hlauh a, an inchhan hman ta hram a ni.

A nu-in nau a pai tih a hriatin thinrim êm êma hau chungin tu fa nge a pai tih a zawt a, a tirah sawi duh lo mah se a pahrawn a huatna a nasat tawh êm avangin a tawpah chuan a sawi ta. Mahse, chu a thil sawi chuan an inchhungah zalenna hmuh ahnekin hnehchhiahna leh na tak taka an khumna a dawn nasat phah ta zawk a. Hmeichhe lepchiah leh mahni nute pasal ngei pawh beisei duh khawpa leplerh angah an chhuah a, a pahrawn lahin a duh lo chung a sawm luih avanga hnar thei ta lo angin a lo insawi thiam zut zut bawk si, a tan chuan khua a var hlawl lo a ni.

Maziri'n thil awm dan a hriat tàkah chuan a thin a rim hle a, a pahrawn thu sawi chu themte pawhin a awih hek lo. A nu lahin a fanu aiin a pasal a țan zawk a, chungte hlei hlei chuan a thin a ti rim a, hlau hauh lovin a nu chu a ankhum ve ta piap piap a. Mahse, a pahrawnin a bual a hneh tawh lutuk a, a fanute thusawi chu engah mah a ngaih sak lo. Hetiang nu, mahni fahrinte harsatna leh manganna hmuhsak tum lova mipa mamawh lutuk ang ho vang hian chhungkaw keh darh mai bakah sual kawng zawh duhna a lo piang fo țhin. Chutiang chiah chu Maziri te chungah pawh a thleng a ni.

A u nau pai an tih tlaksak a, a nunin chhiat lam a pan tial tial bawk. Zu a in nasa-in pawn lamah hun a hmang tam telh telh a, a nun a uluk lo chhovin zankhuaa a lo haw loh châng lah a awm ta fo mai bawk. A tan chuan a u chu a neih chhun tak meuh meuh a ni tawh a, a nu nen lah an inmil tawh ngang si lo, a u chuan a nundan thlakin țha chhuak leh se a ti takzet a ni.

A pahrawnin a khawih chhiat ve a hlauh avangin a u chuan a veng țhin tih a hria a, amah a khawih ai chuan tiin a pahrawn nawmsip bawlna atan a inpe fo a, rui thle mai maiin mipa hrang hrang kawp țhin mah se a tan chuan a u Faki chu vengtu vantirhkoh țha ber ang mai a la ni fan a ni.

Zu a in fo mai chu sim turin a theih ang tawkin a kar ve reng a, Faki tan lah a lo kal thui tawh bakah a ruih chhung tala a chunga thil thleng a theihnghilh chu thlakhlelhawm a lo ni ve bawk nen a nundan sim tumna a la nei rih lo a ni ber a.

Ruihhlo dang a khawih tel a hlauh avangin zu ni lo ruih chi dang rêng rêng khawih tel lo turin a chah fo a, Faki pawhin chu thil chu a hlauh ber a nih ve tho avangin a nau chu chutiang lamah chuan hlauthawng miah lo turin a hrilh a. Damdawi leh a kaihhnawih lam chi rêng rêng chu tih chhin chakna a neih loh mai bakah a duh lo bawk a, chuvangin, a fihlim thei ngeiin a ring a ni.

A u-in damdawi khawih a hlauhzia leh a duh lohzia a hre chiang a, Lalhriata'n damdawi an man tel tih a sawi pawh khan mak a ti hle rêng kha a ni a. A u nen an inhmuh hnuah erawh thil felhlel a awm a ni tih a ring thiam mai a, a u hian dawt a la hrilh ngai loh avangin damdawi chu a ta a nih loh thu leh eng tianga a bag-a lo awm ngawt nge tih a hriat bik loh thu a sawi kha a ringhlel chhin hauh lo a ni.

Khatia a nauvin a bail chhuah hnu khan a tawmim ta deuh a, Maziri'n amah vang tal pawha a nundan sim tura a ngen avang leh amah phiar rua a bag-a damdawi dahtu kha hriat chhuah ngei a tum avangin harsa ti hle mah se harhfima a awm a ngai tih a hria a, a nun hluia let tawh lo tura a nau ngenna chu zahawm a ti bawk nen a nu leh pate ankhumna țawngkam chhe tak takte chu paidam rih hram hram a tum ve a ni.

A chanchin tam zawk chiang lehzuala kan han hre ta chu ka nupui chuan a lainat zual êm êm a, chumi nia kan hun hman ho chhung zawng chuan a ngaihsakin inthlahrung deuhin a awm ang tih te a hlau a, Freddy bulah ngaihven țha turin a hrilh ngun hle bawk.

Zanriah kan ei kham a, pawn lama vak chhuak tawh lovin kan titi laih laih hlawm a. Maziri awm nuam lo hmel ta riau chu ka nupui hnenah ka hrilh vat a, Freddy lah a dan pangngaiin a titi tui nasa mai bawk si; Azuali chuan a va bekbawr sar sar a.

"Freddy, Maziri hi a hmanhmawh deuh tawh a nih hi. Va thlah haw hma deuh la a țha lo maw?"

"A khai, hmanhmawh a ngai lo kan ti emaw ka lo tia!" Freddy chuan a lo ti vut a.

"Nia... Mahse, ka u-in haw hma turin min rawn ti leh sia," inthlahrun hmel deuhin Maziri chuan a ti a.

"Aw le, a pawi lo a nia aw. Ka tan harsatna a awm hleinem," tiin a tho thurh a, Maziri chu a kaitho ve nghal zat bawk.

Maziri hmel chu a dik loh êm avangin in lamah thil eng emaw tak a thleng a nih kan ring hlawm a, Sangpuii phei chuan zui haw ve maite a rawt deuh titih hial a. Mahse, Freddy a awm a, buaina a awm a nih pawhin chanchin a rawn sawi turah kan ngai a, kan zui ta êm lo a.

"Kei zawng ka ngaihtuah reuh êm mai! A chungah thil țha lo thleng ve palh ta se a khawngaihthlak dawn lutuk a, ka ngaihtuah ngam lo zawk. Amah lah kha a inthlahrun hmel ropui si," naute puak țhat pah chuan a ti hluai a, hmeichhe dang chuan an lo thlâwp hle.

"Tunah chuan an unau chauh ni lovin keniho kan awm tawh alawm. An hrehawm lutuk tur vengin eng emaw tak kan ti thei ang chu! Freddy hian a duh tak tak a nih phei chuan a pahrawnin a tih chhiat ve hma-in nei vat se a țha ang," Lalhriata'n a lo ti a.

"An la inhre rei lo e, innei tur chuan," Sangtei chuan a lo ti lawi a.

"An induh tawn phawt te chuan U Freddy pawhin neih nghal mai pawi ti lo se a ni mai alawm," Sangpuii'n a lo ti ve thung.

Ka nupui min ngenna angin Sangpuii u case chu ka la a, a dikna hailang tura hma lakna erawh ka la nei hman rih ngang lo thung. Freddy pawhin kan beisei bakin a buaipui peih a, Faki bag-a damdawi dahtu chhui chhuah kawngah pawh a țangkai viauvin a rinawm. Maziri laka a rilru a pe viau mai chu a tirah chuan a khawngaih vangah kan lo ngai a, chuvang chauh lo deuh chu a ni tih a ngaihven zui tàk viauah chuan kan hrethiam leh thuai a.

Sangpuii te huan ațanga kan haw hma-in Freddy kan bia a, boruak țha falua lo mah se a awm lai êm êm chuan an sawisel hreh a ni mahna ngaihtuahawm an nih loh thu a rawn sawi a, rilru nuam viau lo mah se tih theih dang awm hek lo rilrua vei ru țeuh chungin kan haw ta hlawm a.

Ka nupui bula ka mut ve chuan thil ngaihtuah ding hnek zetin ka biak pawhin min chhang lo a, a kawngah kuahin ka taksa si chetin ka pawt hnai a, a bianga ka fawhsak zeuh pawh chu hre awmin a awm lo.

"Fa hi i awt ve tawh viau em?" a rawn ti chhuak hlawl a.

Ka rin loh lam daih a rawn sawi avang chuan ka bangbo deuh a, a inngaihtuah muk viau kha Maziri vang a nih ka ring kha a ni a, fa neih lam a rawn sawi tàk daihah chuan chhan mai ngaihna pawh ka hre lo a.

"Nau hi ka pai har tawh i ti ve êm?" a rawn ti leh sap a.

"A hunah chuan i la pai mai dâwn alawm. A hmanhmawhthlak vak hleinem," ka lo ti sam then a.

Kei pawhin a ruk tak chuan fa neih ve chu ka chak tawh a, ka beisei aia Azuali a rai har tàkah chuan kan pahniha in-check-up maite ka duh rum rum tawh a, ka la sawi chhuak lo mai chauh a ni. Chutia hrehawm tih hmel deuha a rawn sawi tàkah chuan a rilru hah hlauvin fa awt lutuk anga awm rih loh mai chu țha ka ti a, ka rilru nena inpersan zetin ka chhang a ni.

"Sangtei naute i pawmlai khan ka en reng che alawm. Fa neih ve i châk tawh tih ka hria, ka pai har danah keimah hi ka dik lo a nih ka ring tlat!"

"Bawihi, kum êm pawh kan la inneih loh hi! Mite pawh kum hnih hnua nau pai chauh te an ni ve tho a, Pathianin țul a tih hunah i la pai ve mai dâwn alawm. Chutiangah i rilru ti hah duh suh," kuah ngheh sauh pahin ka ti a.

"Mahse, ka ngaihtuah..."

A phone rawn ri avangin sawi zawm lovin a phone chu a la kang a, Maziri a lo ni. Speaker on-in a bia a.

"U Azual, u Freddy hi haw turin lo hrilh teh. Kan chhungkaw buainaa a lo tel ve hi ka duh lo!"

Mangan hmel zeta Maziri rawn țawng thawmah chuan kan inen rual țhawt a.

"Mazir, eng thil nge thleng a?"

"U Freddy-a'n ka pa hnar a hnek thi! Khawngaihin lo hruai haw hram teh u," țah aw țiauvin a rawn ti a.


(Hma hi a va'n har țhin tak! Ka fate'n zanin ațanga online exam an neih avangin hma ka tum pawh ka țhulh leh phah😥 Min lo nghak țang țang țhintu te khan ka lawmzia leh inthlahrun sizia hi min lo hriatsak leh phawt mai r'u aw.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)