Lalhruaisanga Episode-4

Episode kal lai dah luhna

Moderator: writers

Lal Rinsangi Bee
Posts: 59
Joined: October 30th, 2020, 11:16 am

Lalhruaisanga Episode-4

Unread post by Lal Rinsangi Bee » April 12th, 2021, 10:30 pm

LALHRUAISANGA
Episode-4
By; Lalrinsangi Bee






Ka phone rawn ri chuan min ti harh chiang hle.
"Hello" ka ti ban charh.

"I la mu mi?" Lalhruaisanga maw,ka thu chhuak chiang lutuk.
Engtin nge ka phone number a neih theih.

"Ka tho chiah" ka lai bawk sia,nizan thil thleng ka ngaihtuah pawn ka la zak chem chem thei.

"Vawiin eng nge i tih dawn?"
"Ka hre lo,in ka nghak ang" ka ham bui bui mai.

"Leng ila" a tawngkam bung thei lutuk hi chuhh...
"Kan tum dawn nia"

"Lo in peih vat rawh,ka lo sawm dawn che"
"Aw le..." Ka sawi zo chiah a,line a cut daih zui,ngeiawm lutuk mai.

Nizan kan chhuah hnu khan Kima kha engtin nge a awm ang le?ka khawngaih reuh e...va biak chu ka zak bawk sia,min rawn la call miah lo zui.

"Chaw kan ei dawn rawn chhuk rawh" Laltetea mood chuhhh...a fuh vak loh hmel khawp.

Ka hmai ka phih sawk sawk a,siam sa ei tur bawk chuan choka lam chu ka pan leh ta hna hna a.

Chaw ei lai chuan ka pa in "Hna neih lam te hi i ngaihtuah ve tawh em?" A ti chhuak hlawl.

"Ngaihtuah ve thin e,mahse eng line-ah hian nge ka kal ang ka hrethiam lo"
"I rilru chak loh dan ngaihtuah chuan hna sang tak chu beisei lo phawt mai ila" ka pa in a tih chuan ka run tawk a tling em em,Tetea lah chuan min la nuih khanglang.

"Zirtirtu hna hi ka dil ve tawp mai dawn mi le ka tia,private school pakhatin zirtirtu an zawn lai ania" ka tih chuan ka nu nen chuan dil turin min ti a,diktak chuan thawh chhuah neih loh te hi ka zak ve thin tho,Jenny chuan lehkha thiam thei lo mahse thiam thil a ngah tal a,kei ve chu,lehkha thiam bawk si lo,talent nei bawk si lo.

Huizz...mi nêp tak ka ni.

Thleng ka sil mawlh mawlh lai chuan ka chhungte chu an chhuak bo diak tawh.

Ka thleng sil zo sitting room ka thleng chiah tih chuan door bell a rawn ri a,Hruaia anih ngei ringin ka va hawng vat,a ni reng bawk.

Ngawi rengin a ding a,lut tur a ka sawm chuan rawn lutin sitting room-ah chuan ngawi reng siin a thu fel at a.

"Ka rin aiin i rawn kal hma,ka va inthlak ve lawk ang" ka tih chuan min en reng ringawt.

Ka inthlak sawk sawk a,ka hmaiah chuan cream leh powder te chu ka inhnawih ve thuak thuak a.

Ka phone leh bag chu ka la a,room a tang chuan ka chhuak hmak.

"Ka hman e" ka tih chuan min en vung vung chungin a rawn ding chhuak a,kan inzui chhuak ta.

Miin min hmu ang tih hlau zetin ka hawi kual reng a,miin min hmuh chuan min sawi duh leh dawn lutuk tih ka hriat vang a ni ber.

A bike-ah chuan ka thu vang a,kan tlan chhuak leh nghal vang vang.

Bike a din dat chuan ka chhuk vat a,kan chuan chhung zawng khan kan inbe lo hrim hrim.

Ka hawi kual chuan hman ni a min kal puina lek kha lo niin.

Nui vur vur a ka va en chuan min nuih suk a.
"Hetiang hmun hi nuam i tiin ka hria" a tih chuan lu ka bu nghat a,a bul a va tlan vang vangin a kutah chuan ka vuan a,an thutna siam lam pan chuan tlan pui ka tum a,a ni pawh chuan alo duh ve mai lehnghal.

Ka thu thla chiah a,ka biangah a rawm fawp zeuh.
"Nizan khan a nuam lo e,cake zai lai tal pawn kan awm lo a" ka ti tak tak,sawm loh mikhual,chutah programme an tan tak tak hma a haw leh nghal daih nih kha chu ka zak ve det.

"Ho em mai" ava han tawi tip tap tak.
"Chutiang ringawt ani lo,ka tan a nuam lo alawm"
"Lawmkima nen in awm dun lai hmuh reng kha a nuam bik lo"

"Hmp...Kima te chu ka thianpa alawm"
"Chu pawh ni se" a la ti hram.

"Nang pawh hman zanah hmeichhe pakhat i rawn hruai ve tho kha"
"Ka hruai pawh a ni lo,min rawn zui anih kha"

"Hmp...i nau nen khan in inang e" amah nghengin ka thu a, a kut chu ka khalh niap niap reng a.
A ni chuan ka darah a khabe a nghat thung.

"Ang lo em mai"
"In inang aw...i nu leh pa te ka hmu chhin chak"
"Eng atan?"
"Tu zawk nge in chhun ka hre chak alawm" ka tih chuan a nui nghawr dat a,ka hlim veng veng mai.

"Hruaia"
"Im..."
"Hmeichhia engzat nge i mut pui tawh" ka hriat chak hi chu zah pawh dawn lovin ka zawt tawp zel.

"Ka hre seng lo" sawi tur ka hre tawh lo chu ka ngawi reng ringawt.

"Bialpa eng zat nge i neih tawh?" Amah zawkin zawhna min zawt ve ta.

"Ka la nei lo"
"I bialpa ka ni lo mi?"
"Kan in ngaizawng ami?" Ka han en ha a,a nui leh suk tawh.

"Anih chuan tun atang chuan i bialpa ka ni tawh" hmpp...tiang lek te chu a...

"Ka duh ringawt che mi?" Ka chhaih chak takzet.
"Min duh lo mah la,i bialpa ka ni tawh a,ka ta chauh i ni tawh"

"I ta chauh ka ni duh bik lo"
"Tu ta nge nih i duh a?" A tawngkam chu a chang tha hle.

"I ta ka nih angin ka ta i nih ve hma loh chu i ta nih ka duh lo"
"Anih chuan ka naute i ta chauh ka ni e" nui suk a kun hniamin dam dapin min rawn fawp vawng vawng.
Min fawhna chu ka feel tih hian a sawi fiah zo lo zawk ang.

"Hruaia"
"Imm..."
"Keichu i hmeichhe kawp thin ang ka ni dawn hauh lo ania" ka sawi lo thei lo.

"Ti maw?"
"Kei chuan ka virginity hi ka pasal lo chu pek ka tum lo,khaw lo tak a nun ka duh ve lo"

"Ka tiam a che,i thianghlimna lak saktu che chu ka ni ngei ang,mahse kan inneih zanah chauh" a tih chuan ka nui suk,vawiinah kan in ngaizawng chauh a,inneih hun lo sawi nghal te chu a,awm ang lo lutuk.

Thil ho deuh deuh ka sawi pui leh a,a nui ve leh suk thin,min kuah reng bawk a,ka mipa duh hmasak ber chu ka ta a ni tawh a,a ta ka ni tawh bawk.

Khawvelah hian kei aia hmeichhe hlim hi an awm bik ka ring lo.
Ka hlim zia chu 'hlim' tih hian a sawifiah zo lo zawk.

Mahse ka chhungte ngaihdan tur ka ngaihtuah chuan ka hlimna hi a ral tial tial hian ka hria.

"Kal ang" a che hrut a.
"Khawiah maw" mak ti deuhin ka en ha.

"Burger ei ila"
"I ei ve thin maw?" Ka mawl hmel ngawt ang.

"Im...a tui ka ti" tih chauhin min chhang.
Kei pawh chu ka tho sawk sawk a,a bike chuan kan in phur leh ta.

H Cafe tih nalh zet a lo in tarah chuan kan lut a,a changkang nangin simple tak a ni.

"Sir,eng nge in ei duh ang?" Waiter pakhat chu kan bulah chuan a rawn kal vat a.

"Burger pahnih leh coffee no hnih" a sawi zo chiah a "Sir chu,bialnu i nei chhelo hle mai" waiter chu a nui vur vur a,Hruaia erawh chuan rum alin "kan thil ei tur chu min pe dawn lo em ni?" A ti hmak thung,chu waiter chu a zah hmel kher mai,a let leh vang vang.

Kan thu thla chiah a,"Ngati nge khatia i tih a,i ti khawngaihthlak?" Ngei hmel deuhin ka en a.

"Khatia min chhaih tur a chhawr a ni lo"
"Aw...i chhawr a ni hleinem" ka tih chuan a nui hak ringawt.

"I nu leh pa ten eng nge an thawh?" Mit san ak a ka tih chuan "ka pa IAS ka nu chu Professor" an van hausa em em he pa te hi,a pa hlawh pawh chu an kham khawp dawn nen a nu hlawh a tang phei chuannn...ka chhut peih lo zawk.

"Nang?" A tih chuan zawhna mitmengin ka va melh.
"I nu ten eng nge an thawh?"
"Apa chu doctor ania,anu chuan thawmhnaw dawr a nei" burger an rawn dah chu ka thial tuam tuam a.

Min en reng a,ka lai leh deuh thin.
Melh rum pahin "min en reng suh,ei ve ta che" ka ti hrawk a,a ha var rual nalh zet lang chuan a nui hak a,hmuhnawm ti em emin keiin ka lo en ve thung.

Hetiang em em a mi hîpna a nei hi ka thik lek lek zawk.

Kan thil ei zawh veleh chuan kan chhuak vang vang a,dar zat ka en chuan 2:18pm alo ni der tawh.

Haw mai ka duh thu leh ei rawngbawl ka ngaih thu ka sawi chuan a bu nghut a,kan in lam panin kan in phur phei ta a.

Kan in thlen hma a pengah chuan ka din tir a,a lung a awi vak loh hmel,min hmutu an awm ang tih ka hlauh vang ania,kan thatna tur ka ngaihtuah vang zawk a ni.

In chhung ka lut chiah a,Tetea'n rum deuhin min lo en.

"Vawiin a i lenchhuah pui kha tu nge?" Engmah sawi lovin ka room-ah luh tlang ka tum.
Ka banrekah min vuan bet.

"Sawi rawh,hman zan a rawn leng kha a ni lo"
"Sawi tur ka nei lo" sawi tur ka hre lo miau a.

"Û,Hruaia a ni tih ka hria,a ni kha chu ngaizawng lo la ka ti,anu ten hria phei se chuan an thinrim ngawt ang" a aw chu a ti nem ve deuh.

"Ka rilru leh ngaihtuahna hi ka control zo lo" tih pahin min vawnna chu ka paih thla lawp a,room-ah tlan lutin kawngkhar ka kalh nghal.

Room kawngkhar a rawn chum ri dat dat chung pawn ka hawng duh lo.
Ka sawi pui zel chuan ka hnial hneh lo ang a ka thinrim lutuk ka tah mai ka hlau.

Ka thinrim lutuk apiang hian ka tap ve ziah lehnghal.

Ka inbual a,vawiin kan hun hman dan ka ngaihtuah te chuan ka nui leh vur vur thin.
A tawng tlem lutuk hi buaithlak viau mahse amah ti 'pa' tu ka ti lo thei lo.

Ka inbual zawh chuan choka lamah pheiin rawng ka bawl nghal ta char char.
Tetea chu inkhel turin a chhuak leh tawh anih ka ring.

Kima lah chu hman zan atang khan a reh ta hmak a.
Ka lawm rual rualin a nuam lo chu ka ti ve deuh.

"Bawihi,rawng i bawl em ni?" Ka pa aw ka hriat chuan ka phu zawk.

"Aw...i va rawn haw hma ve"
"Vawiin chu clinic-ah ka thu lo a,ka rawn haw hma phah a nih hi,ka va inbual ve lawk ang e" tih pahin room-ah a lut phei a.

Rawng ka bawl zawh chuan ka nu pawh a rawn haw thleng tawh.
Mahse Tetea a rawn la haw lo,phone call lahin a ring quit thak thak lehnghal.

Ka pa in an inkhel laklawh aniang a tih avangin chaw kan ei san ta ringawt.

Mahse zan dar 8:00pm a rik pawn a rawn haw thleng thei ta reng reng lo.
Ka hlauthawng takzet,hetiang ang a rei hi engmah min hrilh lovin a kal bo ngai si lo a.

Ka pa chuan hall-ah an badminton khelhna-ah han en tur a min tih chuan hmanhmawh deuhin ka han kal vang vang.

Hall chhungah chuan mi an la awm tih hriat takin thawm a awm nak nak bawk a.

Tetea a awm ve ngei ringin ka han en kual a mahse a hmel hmuh tur reng reng pawh a awm lo.

A thiante ho hnenah chuan an hmuh leh hmuh loh ka zawh lahin a haw tawh thu in min chhang vek lehnghal.

Tap pûrin in lam panin ka kal hnak hnak a.
Ka phone a rawn rik chuan ka la vat,Lalmama,Tetea thianpa chu niin.

"Aw..Hello Mam"
"Au Gi,Tetea ka bulah a awm,hmanhmawh deuhin hebron tlangah lo chho rawh" a sawi zawh rual rualin line a cut nghal,hmanhmawh deuhin ka tlan leh nghal chho vang vang.

Min hmu tu te chuan mak min tih hmel hlawm.
Mama tawng dan atang khan thil tha lam a nih ka ring lo hrim hrim.

Hebron tlang chu ka thleng ta,ka ke pen har ka ti tawh lutuk,chawl lo a ka tlan nasat lutuk avangin ka chawn tha chu a na a,ka ke pen pawh har ka ti tawh,ka tha a khur nasa lutuk tlat.

Ka hawi kual ruai a,mihring hmuh tur leh thawm hriat tur reng reng a awm lo.

Thingkung lian leh sang tak tak te bak hmuh tur a awm lo,hlauhna ka nei tan,in hmuh tur pakhat pawh a awm lo a,ka tah a chhuak tawh lutuk.

Hmanhmawh deuhin ka phone chu ka hmet nghal nuap nuap a,Mama chu ka call leh.

"Khaw nge in awm?hei ka rawn thleng tawh"
"A lai lamah khan rawn kal la min hmu mai ang" a tih chuan tlang lai tak lam chu ka pan phei a.

"He lamah" ti chung a Mama'n a phone flash light on chunga a lo vei va va na lamah chuan ka theih ang a chak chuan ka kal phei a,ka tha a khurh nasat lutuk a vangin ka kal hlei thei lo.

An bul ka thlen veleh chuan ka thu thla hnawk a,ka thutna bul chiah a na tuar rum ri ka hriat chuan ka phu zawk bawk.

Lei a mu chu tu dang ni lovin ka nau duat lai Tetea a ni.
A hmel chu en tlak a ni lo,thisen hlir hian a khat a,a lu chu ka va dawm vat.

Ka mittui a rawn far nghal zawih zawih bawk.

"Te...Tete..." Ka tawng chhuak thei hram a ni.
"Mam,damdawi inah hruai ang" ka tap pûr tawh.

"Johnny te ka phone a,an rawn thleng tep ang"
"Bawiha,tu in nge hetiang hian ti che a?" Ka mittui hi ka dang zo ngang lo a ni.
Ka unaupa neih chhun hetianga a awm mai hi rin harsa ka ti.

"Mam,tu ten nge hetiang a ti a?"
"Lawmkima an tih pa kha a niin ka hria" Lawmkima maw,Lallawmkima ka mi hriat hi ni lul suh se,a ni chu hetiang ti duh tur khawp hian a nunrawng lo.
Hruaisanga ti se chuan ka bialpa mah nise ka la ring zawk ang.

"Tete,a na viau em?" Aw pawh a chhuah thei tawh lo,a chau tawh tak zet a ni.

Motor ri kan hria a,a rawn hnai zel a,a hnu-ah chuan horn a rawn pe tuarh a,ka hlau ru hman lutuk.

"Au Gi,hlau suh,Johnny te an ni ang,ka va kal lawk ang" tih pahin min kalsan ta daih.

"Tete,Bawiha,ka tawng i hre thei ti raw?Ka nau ka van khawngaih tak che em"

Mama te chu kan bul an rawn thleng vat a,Johnny nen chuan Tetea chu an zawn phei a,car kawngkhar lo va hawng tur a min tih chuan ka phei vat a,kawngkhar chu ka va hawng a.

Tetea an rawn mut fel tir zawh chuan damdawi in kan pan vang vang.

Ka phone a rawn rik chuan ka pick vat.
"Aw..Hello Pa"
"Bawihi,i va rawn haw har ve,i nau chu i hmu em?"
"Imm...hmu e...damdawi in hnai ber kan pan pui mek,pa sawi duah tur pawh ka hre lo,anu nen khan lo phei ve vat mai ru" ka pa pawh chuan thil a hrethiam a niang call a cut ta daih.

Damdawi in kan thleng chiah a casualty-ah kan luh pui nghal.

Light engah phei chuan Tetea chu a rapawm lek lek zawk.
Hetiang em em a thisen chhuak nasa hi a takah ka la hmu ngai lo.

Mama lam ka va hawi chuan Mama pawh chu an sawisa ve tih ka hrethiam.
A hmai a pilh nual bakah a hnar a tang a thisen chhuak khar tawh chu a hnar bawr velah chuan a kai nuaih bawk.

"Mam,wash room-ah sawn va in phih fai rawh" ka tih chuan "Ka hnar a thi tih pawh ka lo hre tawh hleinem" tiin a nui suk a,wash room lam chu a pan nghal bawk.

"Au Gi,i pa te kha an lo thleng tep tawh ang em le?" Johnny chuan ka bul a rawn kal hnaih pahin a rawn ti zawi sap a.

"Rawn thleng tep ang" tih ringawtin ka chhang.
Pangngai tak a awm ka tum hram hram a ni.

Ka tap tawh lo,mahse ka la hlauthawng tho,doctor leh nurse ten Tetea an buaipui lai te chu ka en reng a,a serious tawh tehreng nen an che muang ka lo ti khawp a.
Ka thin a rim ru tun reng mai.

"Bawihi" ka pa te ka bul an rawn thleng chiah tih chuan ka nu chuan Tetea an mut tirna lam chu panin a tap nghal bawrh bawrh.

Ka pa pawh chuan ka nu chu a zui vat.
Kei chu ka che sawn thei tawh lo,ka tha a khur a,ka chawn tha hi chat mai tur angin a awm.

In zaina room a an hruai luh hnu chuan ka pa ten in a haw turin min ti a,ka duh lo lutuk chu ka tap pûr tawh.

"I zu inthlak ang a,i rawn kal leh dawn nia,Mama pawh inbual fai te a duh ang chu" ka pa chuan a ti zawi sap a.

"Nia...Au Gi,keipawh hetah ka kal lehnghal dawn tho alawm,zuk inbual fai ila,kan chho rual leh dawn nia" a tih chuan ka rem ti ve chauh.

Mama nen chuan kan car-ah chuan kan thu dun vang a,sawi tur pawh kan hre lo,kan hamhaih ve em a tin niang.

Ka phone rawn ri chu ka pick vat a.
"Hello"
"Khawnge in awm vek a?" Hruaia chu a mangan ve hmel lutuk.

"Tetea damdawi inah kan kal pui lawk a,hei ka rawn haw mek"
"Tu nen?"
"Mama,Tetea thianpa nen"

"Rawn haw dun hlen rawh u" ka tum loh deuhin ka nui chhuak huk,Mama pawh a phu ve aniang a rawn hawi zuk mai.

"Tiang khan lo awm rawh,hei kan rawn thleng tep" ka sawi zawh rualin line a cut daih zui.

A thik ve a ni maw...mahni nau te thianpa duh tur khawp chuan ka lerh lem lo.

"Thikthu pe chhe tur te i nei ve elaw?" Mama lah chu a la nui vur vur zui.

"Anu leh apa bulah sawi miah suh aw"
"Teuh nang...Tetea'n a hria mi?"
"Imm...hria ti turin vawiinah kan ni chauh a" ka tih chuan a la nui chhuak huk zui.

Kan in zawn ka thlen chuan ka chhuk vat a.
"I inbual zawhah min rawn sawm phei rawh aw" ka ti vat a,a lu bu nghat chuan an in lam panin a tlan phei vang vang.

"I va rei ve" tih pahin Hruaia chu kan garage thim kar a tang chuan a rawn chhuak.

"Rei loh theih hleihnem" tih pahin kan in lam ka pan a,ka hnungah min rawn zui bawk.

"Tetea chu engtin nge a awm a?" A tih chuan ka sawi dawn nge dawn lo pawh ka hrethiam lo.

Kan Lawmkima nge midang Lawmkima zawk pawh kan chiang si lo a.

"Miin an sawisa a" ka ti ta ringawt.
"Tu ten?" Tih pahin a ding dat.

"Kan la hre bik lo,tlai a inkhel tura a chhuak kha a rei lutuk a,zawng tur a ka han kal khan kha,tuna ka rawn haw pui Mama khan min rawn call a,an awmna min hrilh a,damdawi in kan pan pui nghal chu a ni deuh mai".

" Tetea chu a fel reuh tehreng nen" a tih chuan ka ding dawt.

"Tetea i hria maw?" Mak ti zetin ka en haw a.
"Hre ve e,in in pawh hi ka vawikhat rawn kalna a ni tawh lo" a tih chuan mak ka ti tawlh tawlh.

"Anih chuan hman a tang khan min lo hre tawh tihna mi?"

"Aa..ni chuang lo,ka rawn len thin lai chuan i awm ngai lo" e...tak a,delhi a lehkha zir a ka awm thin lai kha aniang.

"Hmun dang a ka awm lai aniang,kan inbual lawk ang min lo nghak rawh" tih pahin ka room-ah ka luh san daih.

Hmanhmawh deuhin ka inbual sawk sawk,ka inbual zawh veleh chuan inthlakin sitting room lam ka pan nghal.

"Thingpui i in duh em?" Mit san ak a ka tih chuan a duh thu in min chhang a,thingpui lum turin choka lam ka pan nghal.

Ka thingpui chhuan lai chuan thawm nei miah lo a rawn kalin ka hnung lam atang chuan min rawn kuah phut a,ka phu chiang lutuk takzet.

"Min ti phu alawm" ka darah a lu a rawn nghat a.
"Kum hi ral vat vat se" ka beng chu a seh ne ne a.

"Eng vang chuan?"
"Ka nei chak tawh che" ka lai ringawt zui.

Thingpui ka lum zawh chuan muangchangin a in a,a in zawh veleh no ka sil sawk sawk.

Door bell a rawn rik chuan kawngkhar ka va hawng vat.

"I hman tawh em?" Mama chu in bual zo hlim tih hriat takin a sam ala hnawng chap a,a lang fresh lutuk ringawt.

"Aw...lo lut rawh" ka tih chuan a rawn lut a,Hruaia a hmu chu a meng phawk chiang hle.

"Ehe!Lalhruai,Ehe!Au Gi,in inngaizawng maw" tih pahin phawk fe in min en dun a.

Hruaia nen chuan lo inhre tawh thin an ni bawk a an inbe ve nual a,Hruaia a tawng tlem tehreng nen,a bulah hian thil hi a van sawi peih mai mai tak.

"Mam,kan kal dawn mi?" Ka tih chuan an pahnihin an rawn tho rual a.

"Keiman ka thlah ang che" a tih chuan Mama ka en vat "inthlah tir rawh,indi rial a awm te a chak ve anih hi" tih pahin nui vur vurin a chhuak daih.

Keini pawh chhuakin kawngka ka kalh a,Hruaia bike chuan kan in phur leh ta vang vang a..

A hnungah chuan ka bei hle hle a,ka him bik riauin ka inhria.
Thli rawn thaw heuh heuh te chuan a ti romantic riau hian ka hria a,ka nui leh vur vur thin.

He pa hi,hetiang em em hian engtin nge ka duh theih?nnaa...Pa chauh lo chuan hriat va ni suh.







∆End_Of_Episode_4∆







Tetea sawisa tu hi Hruaia cousin Lawkima nge Lawmkima midang zawk kan nih tir ang?
Comment lamah lo sawi ru aw🥰

Ads kha in lo click hmaih hlauh ang e🥰



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)