ZOTHANTLUANGA CHAPTER - 35 by Amy Cck

Episode kal lai dah luhna

Moderator: writers

Amy
Posts: 432
Joined: May 15th, 2019, 8:49 pm

ZOTHANTLUANGA CHAPTER - 35 by Amy Cck

Unread post by Amy » April 13th, 2021, 1:16 am

CHAPTER - 35 💮 by Amy Cck




Tuk thuan kan ei zawh hnu chuan roomah in siam tur in kan chhoh hma thleng vel ka sengfel pui a. Emily in ' ti duh suh, kan nula in a ti vek mai ang. ' ti mahse midang lakah a in thlahrun awm ve a. Nui lui sak in ka tih zawh hun ah Puipuii chu ka siam hman tho ang ka ti ta zawk.



Zothana pa kha chuan biak khat pawh min be lo. An nula nen chuan dawhkan chu kan ti fel mawlh mawlh a. Zothana pawh a room lamah in siam tur in a kal a . Thleng ka sil laiin Sangpuii kha choka varanda atang in zawi muang in a rawn lut a. Dawhkan a tui chu a thli chhuak karh karh a.




" Tukin zing kha... Eng lo... Engmah ngaih kawih tur a awm lo a nia. Dik tak chuan i hmuh ang hian ka taksa hi ka duh ang in ka chet tha thei lo a. A bik in zing ka thawh hlim hian ka taksa dang chu thu hran, ka ban tha thleng hian a zawi vek zel a, Zothana hian min puih ka ngai thin a! " A rawn ti chuan a lam chu hawi in ka nui lui sak.




" A nih chu! I accident tih ka lo hria a. I dam vat vat ka beisei pui che! " Kei mi tawngkam thiam lo chuan ka ti let ve tawp. Ka rilru erawh a thu sawi vang khan a thawl phah lo. A pik deuh deuh thung.




" Ka lawm e. Mahse vanduaithlak tak in ka ke hi ka hmang thei tawh dawn lo a. Mahni a khawsa ka ni bawk sia. Ka nu leh pa hian min ngaihtuah bawk nen hetah min la lut tawp a. Ka tan pawh hian a in thlahrun awm tak zet. Zothanan nang a duh che tih hre reng chung a a bul a ka chen a ngai hi! " A rawn ti leh halh a. A aw chhuak chu a dam dap a. Mahse chhan let ngaihna ka hre hlawl lo.




" Bakah room kan in tawm ngai bawk nen! Ka nu leh pa te pawh hi i hrethiam hram dawn nia, an rilru hi a hah ve lutuk a. " A rawn ti leh chiah chu ka thleng sil lai tawp chawt in ka in hum ruh nghal nghek.sawi dawt lo mahse an fapa tan hian min duh lo tih ka hretiam mai.




" Kei mah zawk hi a lawm hriatthiam ngai zawk. Hetah ka awm ve ringawt sia. " Ka ti chhuak thei tawk. Nuih luih ngial ka tum a ka hlawh chham thak. An nula kha room a nawr phei tur in a hrilh zui nghal a. Choka atang a an chhuak chiah chu thawk ka la zui kawk mai. He inah hian ka hnawk tak zet tih hi tumai pawh hian kan hria a nih hi!




Roomah kan in siam a, kan zo fel Puipuii nen kan chhuak chiah chu step ah Zothana a kamis ban kilh mual mual in a rawn pen chho thauh thauh a. Emily room a kan lut tur chu min rawn nang ching hman hram.




" In hman tawh a mi? " A rawn ti zawi sup a. Nui lui sak in lu ka bu nghat. Mahse ka chhungril hi a hlim hlawl lo. Sangpuii nen hian room an in tawm tak tak em? Natna vang a awm chu ni tho mahse tukin zing ang khan ka hmu dun fo a nih chuan ka ngawi reng thei kher a ngem? Mahse nizanah kei nen kha tiang khan hun kan hmang dun bawk si a? Ka ngaihtuahnaah hian zawhna a rawn lang nghal zawt zawt.




" In be lawk teh ang! " Ka ban rek a a rawn vawn rual in ka tang deuh tung a, Puipuii ka vawnna lam chu ka hmer nghet vak thung.




" Bawihte! " Tang tung a ka awm chu a hrethiam nge a rawn ti zawi sup. Chutia min ko chu Puipuii lawmah a lo tla a, Emily in Puipuii hi Bawihte a tih thin vang in a lo in ti ta tu viau a niang.




" Duati... Atei room ah a in siam lo va pui la! " Zothana chuan Puipuii melh chhuk in a ti nghal sup a. Nui ver ver a Puipuii kal sawn a tum chu ka vuan bet tlat thung.




" Nakinah a ni mai! Puipuii hi a tlai palh ang! " Ka ti ve tlat. A rawn thaw chhuak hawk a, kei erawh a mah pawh en duh lo in a awm zawn ka melh ngar thung. Dik tak chuan tunah hian ka rilru hi a phir lutuk. Rilru fim tak a In ngaihtuah ka ngai tak zet.




" A nih chuan ka hman tep a, ka rual in kal zawk mai ru! ” a rawn ti let sup. A rual a kal pawh hi ka duh teuh lo.




" Ai... A ngai lo, Emily rual in kan kal thei a lawm. Damdawiinah te kal in ngaih kha! " Ka ti zawi sap.



" Kha chu chawhnu lamah zawk! " A rawn ti hmuk chu mit ka chhing sawk. A awah chuan a lawm vak lo niin ka hria.




" Nia... Ni tho a mahse Emily rual in kan kal zawk mai ang! " Ka la ti hram chu ka ban a hmer na kha a ti nghal zual hmuk.




" Anu... Papuia motorah kal zawk i la? " Puipuii lah chuan a lo ti zui. Hahthlak hian.




" A tha e, ka rual in kal ru aw, lo kal la ka in siam min lo nghak zawk rawh. Atei ai chuan ka hman hma zawk ang! " Zothana chuan tiin Puipuii pawm mai a tum chu ka taksa depah ka pawt let hmak. Zothana chu a rum nghal nghut.




" Emily rual in kan kal dawn! " Ka ti kha ta fak. Kei min hmin thei dawn lo tih hria in a awl sam zawk Puipuii a thlem a, Puipuii a hruai chuan kei chu loh theih loh in a kal ngei a ngai dawn tih a hre chiang miau.




" Anu chuu... Nang Atei rual in kal la kei chu Papuia rual in a ni mai! " Puipuiin a rawn tih rual in.




" Remruatpui ka sawi chu Atei rual in kan kal ve ve ang! " Ka ti chhuak ta nghek chu Puipuii a meng pual nghal pam. Tawngka vin chu sawi loh a hming pum hian ka ko mai mai ngai lo. Chuvang chuan a hming pum a koh hi a la na ve thei reuh viau.





" Pawi sawi lo hauh vak kha a tul miah lo! " Zothantluanga chuan a rawn ti chhuak hluk a. Ka melh nghal nghek.




" Ka fanu a nia ka thu a ni! " Ka ti ve ngat chu hahthlak min tih hmel zet in a thaw chhuak hrawi.




" Ka sawi awm zia i hria! Ka rual a kal tur a ka duh chhan che pawh i hman hmawh sia in biak pah ka duh... " A tih lai chuan ka lo pawt chat hmak.




" Enge kan sawi ang? " Ka ti ro halh chu ka hma a ding khawng luah in min melh ngur thung. Thil sawi tum in a ang zauh a, mahse ka bul mai a, ka taksa si chet a ding ve ka fanu chu melh leh zawk in a kareh mawi zet chu a chip leh hmak.




" Ehee... Ngati nge ka room pawnah in lo din khawm vek a? " Emily chu a rawn chhuak ve chiah a. Min en haw hlawm mai.




" In hman tawh mi? " A rawn ti zawm zat c min rawn melh chu thaw hak in lu ka bu nghat.




" Kal i la? " Tih leh pen sawn ka tum chu ka banrekah Zothantluangan a rawn vuan leh chawt.




" Ka rawn thlah mai ang! Lo va kal hmasa mai rawh! " A rawn ti bul hmuk. Emily chuan min en tawh zak zak.




" I thlah ka duh lo ka tih chu! Vawi engzat nge ka hrilh dawn che? " Ka in sum hman tawh lo chuan ka ti let ta nghek. A beng a chhet nge ka thu sawi a hre duh lo pawh ka hre tawh nek lo.




" U.... Kei man ka thlah kawi thei a lawm! Ka pa ten thawm an hria a nge. Tha deuh in nakinah in in be zawk dawn a nia! " Emily chuan a rawn ti zawi sap a. A mit meng chu a hlauthawng viau bawk. Zothantluanga erawh in min thlah tum hmel a pu lo reng reng. A mit meng thim dur khup chuan min melh a, min vawnna chu a nghet mah mah bawk.




" U... " A tih leh vak takah chuan min thlah hnawk a. Melh pawh melh tawh lo in step ah ka kal zui nghal hlak hlak . Emily chuan min rawn zui vat a. Pawn ka chhuah rual in ka thaw zui nghal hak.




" I tha em? " Emily chuan a rawn ti a. Chhan pawh ka chhang buai peih lo. Ka tha ti mah i la ka that loh zia chawp chilh in a hmu miau. A scooty chuan kan in khalh chhuak a. Engmah kan sawi lo, ngawi rengin kan chuang a. Puipuii ka vin chiam kha ka in thiam lo leh hnu hnawh bawk. School kan thleng a. Emily chu a tlan tlang nghal mai dawn emaw ka tia mahse Puipuii min thlah pui thlap a nih chu!




" In be lawk i la! " Scooty lam kan pan lai chuan a ti a. Kei pawn ka hnial bik lo. Nu ho in an fa te an nghah na tur a an siam thutna ah chuan ka thu thla a. Emily chuan a phone phawrh in tu emaw hi a bia a. A thawh pui a nih ka ring, a thlen tlai tur thu a report ni ber in ka hria.




" Ngati nge ka u nen khan in in hau a mi? " Min rawn in en a ti chhuak ve ta nge nge a. A nu pawn Puipuii awm lai a sawi a duh loh vang a Puipuii min thlah pui thlap a nih ka ring. Chhan mai dan tur ka hre lo chu ka ngawi vang vang a . Mahse Emily lo chu in bun thlawl na tur ka nei bawk si lo.




" Englo a nia! Dik tak chuan in in a awm hi nuam ka ti lo. Tunah phei chuan Sangpuii a lo awm ve tawh bawk nen. Ngaih loh lamah ngai lo a, Sangpuii ka ngai thei lo lam ni lo in ka din hmun chu i hre ve vek a. I nu leh pa hmel pawh ka hmu ngam tha lo a. Chu tah kei mah mai ni lo Puipuii a lo ni ve bawk a! " Ka ti chhuak halh. Ka ngaihtuah zawng zawng hi sawi ka chak a mahse ka sawi chhuahna tur hi an fanu leh an farnu a ni bawk si.




" I awm dan tur chu ka hrethiam a lawm. Mahse ka u hian a ngaihtuah lutuk che a. In nufa a han awm leh tur chuan , i chung a thil thleng zawng zawng nen khan ven him che hi a duh bawk si a. " A rawn ti ve hap.




" Chu chu ka hria a, Zothana ka zah vang leh a thu hnial ka hreh vang in ka rawn zui lut a. Mahse ka thla a muang thei hlawl lo. In luah hran ka sawi in Zothanan a rem time bawk si lo. Mahse ka rilru ka siam tawh a, a rang lam a in sawn chhuah chu ka tum ta tho. " Ka ti ve halh chu Emily chuan lu a thing nak nak.





" Ni lo.... Kan inah i awm a ngai a lawm. " A rawn tih chuan a ngaihna hre lo zet in ka melh tawp.




" Ka sawi tur a ni chiah em chu ka hre lo. Mahse ka nu te hian u Sangpuii hi ka u nen in kawp rem leh se tih an duh a. Mahse ka u chuan a pha char char. Mahse ka u hian duh thlan tur a nei bik lo a. I hre tawh em chu ka hre lo a mahse u Sangpuii hetiang a a awm chhanah hian ka u hi a in thiam lo ve bawk sia. Chuvang chuan loh theih loh in U Sangpuii a buaipui a ngai a. " A rawn tih chuan a sawi awm zia ka man lo.




" Enge Sangpuii hetia a awm chhanah Zothana thiam loh a nih daih a? Ka hre thiam lo! " Ka ti chhuak halh.




" Englo a nia.... Christmas lai khan i kal bo lai pawh a tih theih ang chu, ka u hian a zawng nasa lutuk che a, a tal buai hial. Zan tin zu a rawn rui haw a, tlai tak tak a a rawn haw thin a. Zan khat chu ka u in min rawn phone a, accident an tawh thu a rawn sawi a. U Sangpuii motor in a su tiin. Ka u rui buai a lo buai pui na lamah a ni tih kan hre chhun zawm a. Kan vanduai a siam in hetiang hian U Sangpuii a awm phah bawk a.




Hman a ka sawi tawh kha. U Sangpuii hi chu ka nu te hian ka u vang pawh ni lo in an lo fanu chei ve thin a. Hetia ram tui lei lo va a awm an hmuh hian kan lamah an la phei a. Che tha thei lo a nih vang hian han buaipui vel hi ka u kutah ka nu leh pa hian an dah bawk a. Bakah ka u hi a in thiam lo ve bawk a.




Ka sawi tum tak chu i chhuak a nih chuan ka u hian a zui chhuak ve duh hial dawn che a. Kan chhungkua kan keh chhe vek mai ang. Khaw ngaih in rei lo te han ngai chang hram la. A la tan tir em a, nakinah te chuan u Sangpuii pawh a mah in a in enkawl chho ve thei zel dawn a. Nghak ve hram rawh aw. Hetiang ka sawi chhan pawh rilru sual i pu lo tih ka hria a, kan chhungkaw mualpho hi ka hlau ve bawk nen. Bakah thla leh maiah pasal ka nei dawn a. Chu mi hma a boruak dang a chhuak a nih chuan.... " Sawi zo lo in a ngawi dat a.




" Chutiang thil chu engtin nge a thlen theih zawk? " Ka ti ta ringawt. A bul ber chu kei mah tho ka lo ni leh a. Fakawma kha ka zui vang in engkim a buai vek.




Puipuii chu ka nghak zui nghal a. Ka lo rilru dan chuan hotel a luh phawt a. In luah tur zawn leh kha a nia. Mahse Emily min ngen ngawih ngawih a. Chutah a bul ber ka thiam loh a ni leh zel nen. Dik tak chuan Zothana nu leh pa pawh hian min lo lawm em em tur an ni reng reng lo tih ka hre thar a. Sangpuii awm lo se an fapa zawk hi an chan ti tih mai thei a nia.




An tan chuan Sangpuii chu duat a enkawl a awm reng zawk a ni. Mahse chuvang ringawt chuan kei hian tukin zing a ka thil hmu ang te kha ka en liam reng thei dawn em ni!




Dar 11 velah Puipuii te an rawn bang a. A pawl a la hniam bawk a, an la kal rei lo. Nu ho in kan fa te kan lo nghak fur a. Naupang tih takah zing a a lawm lohna a theihnghilh leh vek tawh. In thlen vat ka chak loh em avanga in muang chang in ke in ka haw pui a. An school ho u Tetei te khan an veng lamah an lo kal tir lak lawh avangin a hla ve viau bawk.




Ka hnung lamah motor horn ri vang chuan sir zetah motor chu kawng kan kian a. Mahse kan sir zawnah a rawn ding chawt mai. Ka hawi phei chu Zothanan min lo en reng. Mak ka ti chu chet mai na chang pawh ka hre lo.




Motor atang chuan rawn chhuak in motor chu rawn kal hual in kan bulah chuan a rawn ding a. Hrilhhai zet in ka en thung. Hna a kal emaw tia.




" " Lut u la! " Motor kawngka chu pawt hawng in a ti sup.




" Enge i lo tih dawn! "" Ka ti haw thung.



" Ka lo hruai cheu! " Tih leh motor a lut tur a min tih a rual leh nghal a. Kawngpui lai tak a kan din deuh vang in motor dang ka dip leh thin chu nuam ma ti bawk lo nen kan thu lut ve leh ta nge nge.





" Duati chu a chau a ni maw? " Motor khalh reng chung chuan a rawn ti a. Puipuii ka en vat chu ka awm ngheng in a muhil der der mai.




" A nih ka ring! " Ka ti tha ve mai.




" Tukin zing a I thil hmuh kha ka sawi fiah thei! " A rawn ti leh sup chu ka tang leh tung tawh.




" A ngai lo. Ka hre thiam a lawm! " Ka ti sak talh. Emily in sawi tawh mahse ka mitthla let a piang in ka la pangai thei lo.




" Bawihte... " A rawn tih sup rual in ka thaw chhuak hak.




" I nuna chhan him tu a nia i buaipui chu a ngai a lawm. A ni lawm ni! " Ka ti let sap chu a thaw chhuak ve hawk.




" Hetiang reng hi a ni dawn lo. Rei lo te min en liam la, engkim a pangai leh hma chiah! " A ti sup chu ka tah a chhuak tun ringawt.




" Dik tak chuan harsa ka ti. Tukin zing a ka ngaihtuahna a rawn lut hmasa ber i hria em. Kei hi he inah hian ka hnawk a nih hi tih a sin. Dik tak chuan in luah hran chu ka la duh reng. Kan awm dan a ngai reng dawn a. In hrang ka chan vang in kan in kar a hla dawn tihna pawh a ni lo a . Chuvang chuan... " Ka tih lai chuan.




" A tha lawm. Ka hnial lo ang che. Mahse in hrang i chan rual rual in ka rawn luh khung ve nghal ang che! " A rawn ti hluk a nih chu. Emily lah in pasal a neih hma chiah tiin min ngen lawm lawm a. Ka tan hian khua a va han var lo tak em.




In chhung kan lut a, Zothanan Puipuii a muhil bawk nen a pawm a. Kei in Puipuii school bag ka keng thung.




" I lo let chiah a! " Sangpuii chu sitting room ah a lo thu a, Zothana a hmuh rual in a lo ti vat. An in entir dawn tak kha.




" Lo in siam rawh. Puipuii hi ka han mut lawk ang! " Tih leh step a pen a rual chu Sangpuii chuan a rawn chhang vat.




" Ihh... Ka kawr min thlak pui ka ngai dawn sia ka lo nghak ang che! " A rawn tih chuan ka thawk a pik leh tun tawh. Zothana chuan min rawn melh nghal vut a.




" Seni i lo in puih tir dawn nia. A harsat loh kha! " Tih leh ka kutah rawn vawn a rual a. Min kal chhoh pui nghal vut. Room ah lut in puipuii chu a mut a. Khua a lum bawk nen Puipuii bag chu dah in ka kawr chung chu ka phelh zui nghal a. Puipuii pawh nisa a rui a ni mai thei.




Bathroom a ka lut tur chu ka in ring hman lo ka hnung lam atang in min rawn bawh lut rawk ni mai hian ka hria. Thinrim lutuk a Zothana ka melh chu nuih in sum zet in min en a. Bathroom chhungah kan awm reng tawh.



" I la thinrim a mi? " A ti sup chu ka melh nghek. Tunah tih chuan engmah ka sawi buai lo ang Emily vang tal pawh in ka tuar mai ang. Thla khat chiah, bakah Emily a awm loh phei chuan he in hi a nawm loh dan tur ka ngaihtuah lawk sa.




" Chhuak teh, inbual ka duh a nia. In hnuaiah nghak Tu i neih kha! " Ka ti ram hmak chu a ner sawk.




" I thinrim reh hma chu ka kal sawn dawn lo. Zing atang in i mit mei tha pawh ka hmu lo a nia. " A rawn tih chuan ka ner ve nang.



" A mak e, chhuak teh! " Tih leh a awm a nem ka rual chu ka kut a lo man bet chawt a, a taksa si chet in min pawt hnai a. Ka in ring hman lo ka hmuiah a rawn fawp nghal ngawng ngawng a. Nem sawn tum in tan ka la a, ka hlawh chhan thak.




A kut leh lam in ka kawngah a vuan bet tlat a, leh lam in ka tukhum samah zen lut in ka chet theih loh nan min vuan bet tlat a nih chu.




Tan in awm zia a nei bawk si lo chu ka in thlah dul ve riai riai a, chu chu a hre rang lutuk, uar lutuk in min fawp chhun zawm a, ka chhan let rual in ka kawng a a kut chu a sawn thla ruai ruai a, ka mawng chu a rawn hrawm nawk a, ka rum chhuak hak chu a nui suk thung.




" Thinrim thlem dan tha tak a ni! " A ti sup chu ka ner nang a, ka melh nghek. A awmah ka beng ri thlawp chu a nui ri hawk a. A kut ka tukhum a a zen luh kha rawn sawn in ka hmui chu a tuai hauh hauh a. Kei in a che zia chu ka ngai chang reng a. A mit meng thuk ruih chuan min melh a. Ka rilru hi a phir tak zet. Zothana hi ka hmangaih a, mahse dik tak chuan a mah ang in ka awm ve thei lo. Kei chuan ka fanu hi ka ngaihtuah tel a ngai tawh a. Kei mah chiah min neih avang in.




Emily sawi ang khan thla khat chu ka tuar thei em em ang. Engtiang a hreawm emaq harsa pawh ni se. Mahse ka fanu hian harsat na a tawh phah a nih chuan nu ka nih ang zawk in ka awm reng thei bik kher lo ang.





Khum a ka fanu mu chu ka en reng a. A bul ah kal hnai in a hmel duhawm zet chu en in ka nui sak. " Ka neih chhun tak meuh meuh i nih hi, mal deuh in ka kal san ve ngai lo ang che " Ka ti chhuak sap.


*

*


" Atei chu mawi i va ti awm ve! " Ka fanu in mit khap lo lek a Emily a en chu ka nui chhuak hak. Vawin hi Emily leh Peka in neih ni a ni ve der a. Eng tin tin emaw in thla khat chu a liam ve der chu a nia.




" Anu kei pawh monu kawr ang ka ha ve! " Tih leh a kawr fual hak fual ve zet chu min hmuh tir a rual a, ka lo nui sak. Flower girl a a tan dawn avang in ka fanu pawh hi naupang dang zawng ai in a mawi ka ti tak zet.




Biak in lam pan tur in in hnuai lamah kan chhuk a. Emily te nu leh pa, bakah Sangpuii pawh an lo in peih thlap tawh. Kan nufa leh Emily, chuan mo thiannu nen chuan min lo en ve vat hlawm a. An fanu chu a mawi zia an lo sawi mawlh mawlh bawk.



Monu leh a thiannu chu in neihna tur a car mawi zet a an chei ah chuan an thu lut a. Chu mi rual in car hnungah chuan Zothana motor a rawn ding ve nghal chawt a. Kan en reng lai chuan driver seat atang chuan a rawn chhuak a, kan bul a a rawn din rual in min nui suk a.




" Rawn hruai tur cheu in ka rawn let lawk a. Duati chu i mawi hle mai! " A ti sup a. Mahse a mit chuan Puipuii ni lo in kei mah daih min melh thung.




" Motor pakhat in kan rawn kal thei tho a lawm. Biak in lamah an mamawh zawk lo che a mi? " Zothana nu chuan a lo ti vat a, a hawi sawn ve ta hram. Kamis var dak nalh zet chungah coat dum dak zuih, a pian rem lutuk in a hah a. Coat hi chu a hna vang hian a ha ngun mahse tun tum erawh a chhelo tih piah lam a ni.




Kei erawh in Emily min thlan sak, ti i la... A puan than min lei sak in kawr thar ka thui a . A senduk niin a ban a tluan a. Mahse hmuh ti nuam tur in a nghawng lam kan ti var deuh hret a. Kei chuan a zau mah mah ka ti a mahse Emily in a suh dan in a thui tir miau a. Ka sawi sel sak duh lem lo.




" Engkim a fel fai e. A nih chuan Adiki te nufa hi ka bulah kal se, nang ni pathum motor pakhatah rawn kal mai ru! " A ti zawm zat a. Zothana pa ngaihdan a nih hmel loh tak zet. Mahse engmah erawh a sawi chhuak chuang lo thung.




" A tha lawm. Sangpuii hi motor ah thut luh tir phawt la, kan chhuak dawn nia! " A nu zawk chuan a rawn ti leh a. Min rawn en vut chu ka lo nui lui sak. A mit meng in min rawn tih ka hria. Kei a phal leh phal loh in awm zia nei lo mahse hetia min rawn ringawt pawh hi ka tan a hahdam thlak.




Sangpuii chu a wheelchair atang in a pawm sawn a. Passenger seatah a thut tir a. A wheelchair chu thlep in motor hnungah a dah sak zui nghal a. A che zia chu ka lo en reng. Dik tak chuan a nupui hlui a lo nihna laiah hetia a buaipui hi hmuh hreawm tih chang chu ka nei ve thin. Ni lo... Engtik lai pawn hreawm ka ti a ni mah zawk.




Mahse chu mi let tam tak chuan kei min ngaihsakna a lan tir a. Chhunah hna a kal a. Kei pawh dawr pakhatah ka thawk ve tawh a. Puipuii te school atang a hla lo te a nih avangin Puipuii pawh a school banah dawrah a mah in a rawn kal mai thin a. Ka dawr nghahna neitupa hi a fel hlauh a, min en liam mai zel a. Puipuii lah naupang tih nuam tak a lo ni bawk nen dawr a thawk ve ho pawn an lawm hlawm phian a. A hahdam thlak.




Zingah Zothanan min thlah ziah a. Tlaiah ka bang tur min rawn nghak ziah bawk. Office a ban hmasak zawk thin avangin ka haw theih hma min lo nghak a. A rawn thlen chuan Puipuii a rawn lam hmasa ziah a. Chuan... An pahnih chuan a lo va lengkual a, an kalna erawh ka zawt ngai lem lo.




Kan pathum in kan haw leh ta thin a. In kan thlen chuan zanriah min lo en san hman tawh thin avang in kan pathum eitur chu kei man ka siam leh mai zel a. Nileng a dawr a thawh chuan a chauh thlak ve thei lutuk. Mahse he in a mahni a haw a. Min ngaina vak lo tu te bula zanriah kil ai chuan nuam ka ti zawk tho.




Kan in hmuh khat na na na chuan buaina kan pum pelh bawk a. Zothana pa phei hi chuan min hria ang pawn a awm duh lo. Biak pawh min be ngai lo. A nu erawh in mawi hnaiah min be ve thin ni in ka hria. Sangpuii erawh ka lakah a sual hran lo a. Tha tak in min bia a mahse kei mah zawk hian tha tak a chhan let har ka ti.




" Kal i la! " Rawn ti tu vang chuan ka phu zawk. Zothana chu a phun hluk thung. Motorah chuan kan lut a. Puipuiin ka puan a delh chuar ka hlauh avang in seat hnung lamah ka thut tir a. Kei Zothana bulah ka thu thung.




" I kawr chu i in hmeh hle mai! " A rawn ti sup chu ka melh vat a. Min lo en reng ka hmuh chuan ka nui nghal sak.




" Hma lam en rawh! " Ka ti ringawt chu nui suk in a hawi ve mai a. Mahse ka kut chu a kut lian zet chuan a rawn hum zui nghal hmak.




" Hemi dawtah chuan kei ni kan ni ve tawh ang! " A rawn ti sup chu ka en vat a. Mahse hma lam a lo melh ngur thung. Chhang lo in pawn lam ka hawi ta daih a. Kei nen hian kan in nei thei a ngem? Tunah in khatah kan awm a , a chhungten min ngaina lo mahse an sawi chhuak lem lo mahse inneih kher hi chu a nu leh pa hian min rem tih pui ka ring hlawl lo.



Biakin kan thleng a, Zothanan tih tur pawi mawh a neih nual avang in a kal hrang a. Puipuiin ' ka tui a hal! ' a tih avang in cooler la kan pan thung. Biakin kawtah chuan midang pawh an awm ve nual a. Tha la tawk lah bang lo.




" Ehe... Nang ni nufa chu! " Rawn ti tu lam chu ka hawi a. Ka meng buai nak. Enge hetah a tih ve ni.




" Pu Zuala chu! Enge i tih ve a? " Ka tih rual in ka zawhna atthlak zia ka hre zawm nghal a, ka ner zui nang.




" Hna thawhna pawn lamah chuan in pu lo hram i la! " A rawn tih chuan ka nui tawi tak. Kan dawr neitu pa a nia. Pu tih hlir in kan ko sia ka thiam lo a ni ber.




" Tihpalh! " Ka ti thla ngawt chu a nui leh suk.




" A mipa lam I ni lo tih ka chiang a. A hmeichhe lam I nih ka ring nghal ngawt a. " A tih chuan lu ka bu nghat.




" A nih chuan nang hi.. ” ka tih lai in.




" Mo neitu hi ka nau a nia! " A tih chuan ka nui leh sak. Kan bulah chuan a rawn dunga ve ta reng a. Peka nen hian in cousin an ni awm a. Mahse an in hnaih em em hran tawh lo thung a sawi dan in.




" He lai naupang hmeltha em em hi min hria em? " Ka fanu en chuan a ti sup a. Puipuii chuan melh kiau chung in lu a thing vat.




" Puipuii anu dawr nghahna neitu ber kha a nih hi! " Ka lo ti vat thung. Ni a sat tak deuh avang in daihlimah thutna awmah chuan kan in sawn a. Rin ai tak in biak a nuam. Pangai tak a kan in biakna hmasa ber a nia. A dawrah hian thla khat pawh ka la thawh pum loh avang in a mah tak hi chu ka hmu khat a. Mahse min lo hre fu thung a.




" In sawi lak lawh hmel viau a mahse min lo zui lawk dawn em ni! " Ti sup Tu vang chuan ka hawi chhuak a. Kan hmaah Zothana a lo ding ngur tawh. A lo kal lai reng ka hre lo. Ka din hma hma in ka kutah min rawn kai tho a. Puipuii chu a pawm zui nghal nawlh a. A kut leh lam in ka kawngah a rawn vuan a, a taksa si chet a min pawt hnaiin min kal pui nghal hmuk.



" Kha pa kha tu nge? " A rawn ti sup chu ka melh nghal ha.



" Kan dawr nghahna neitu pa kha a nia. Luh a hun tawh a mi? " Ka ti zui zat chu a ner sawk.



" Mipa maw dawr neitu? " A ti daih chu ka ner nang. A ni pui rauh hi a thik em ni?



" Apapui ... Nang mah aiin Anu boss kha a hausa zawk a mi? " Puipuiin a tih chuan a pen lai a ding chawt a. Kei pawh chu min kuah beh miau avang in ka ding ve chawt.



" Tu in nge ti? " A ti hmuk a nih chu.



" Anu boss kha. Ka hausa lutuk dawr a I lo kal leh hunah ka suh ber kawr maai min pek tur thu pawh a sawi a! " Puipuii lah chuan a la ti ang deuh deuh.



" Tak zet! Duati a ni pek i mamawh lo. I duh chu kei man ka lei sak mai ang che! " A ti hluk a. A banah ka pawt vak ringawt. A naupang chhia e mai tun a a awm dan hi.



Emily te in neih chu rin aiin mipui an tam. Zothanan biakin ah a rawn hruai lut a, unau in ang tak an ni. An chhelo a, an hmeltha a, an fel in an rilru a tha tel zui bawk a. Kei mahah chuan sawisel na pakhatmah an awm lo.




Thlalak hunah chuan mic in an puang dum dum a. Chhungkaw thlalak dawnah chu an chhungkua chu an kal sang sang a. Zothana nu kha Sangpuii a nawr ve bawk a. Zothana hawi kual swk chu camera man pawn a hrilh zing ngei mai. Mahse an hmeh dawn tep tihah chuan Zothana chuan kan dinna lam chu a rawn hmu fuh a. Engmah dang sawi lo in a rawn pen zui pawk pawk a. Ka kutah kaiin min kal pui a nih chu.




Mipu awm ve ho chu an phun zui sup sup a. Kei pawh chuan nuam ti fahran lo in ka lo tang thung bawk. Emily lah chuan min lo nuih ang ver ver a.




" I a a mi? Chhungkaw chauh tur a lawm? " Zothana chu melh in ka ti sap a. A hre lo der hmak. Mipui ho lah chuan min en duh ngang mai. An in hrilh ru ser ser a. Ka zak leh nuam ti chiah lo chu ka sa pup pup thei hial.




" Nuam i ti bawk em? " Ti tu vang chuan ka hawi let vat a. Biakin step a chhuk ka tum tawh chu ka lam rawn pan tu vang chuan ka ding leh lai lawk a.



" Ka sawi awmzia chu kha tia mi zawng zawng hmuh a chhungkaw member ang mai a a kai kual vel che kha a nia ka sawi! " Ka bul a rawn thlen rual in a ti leh nghal zat a. Wheelchair a a thut avang in ka melh chhuk nghal vat.



" Kha thil kha... " Ka tih rual in a rawn nui chhuak hak.



" I duh dan a ni lo tih sawi tum suh. Pawi sawi lo zet a lang si hial i lo mak reuh hi. Emily leh Zothana lah i bum kual vel mai mai bawk a. Mahse hre rawh Zothana hi chu engtikah mah i neih ka phal dawn lo. A hma kha chuan ka hrethiam che a, mahse tunah chuan nang hian Zothana hi i phu tawh lo! " A ti zui hmak chu ka in seh ruh nghek.




" Eng ang pawn ngai la, Chutiang saw na hmun a niin ka hre lo. Tih leh kal sawn ka tum chu eng emaw hi ka chhuih a, ka in ring hman lo. Sangpuii chu ka bawh rawk a. Step hmawr ve ve a ding kan nih avang in ka tum ni miah lo in a wheelchair nen chuan stepah ka nawr liam palh a nih chu! A ri thla rawp rawp a. Lo hmu ve tu te chu hlauthawng tih hriat zet hian an au chul bawk.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)