( BONUS CHAPTER)
KUM 7 HNU CHUAN :
RAMNUNSANGA'S POV :
Ka car chu traffic tawt tak kar ah chuan muangchang in ka khalh a , rilru hmanhmawh nen ka thin a rim deuh hlur tawh mai a . Tun ang hunah hi chuan car thlawk thei ka mamawh ta ber anih hi . Ka hman hmawh leh stress lutuk tur ven nan hmanlai hla hlui nalh ka tih tawp theih loh 'Hello Darling' Tracy Huang sak chu zawi te a play in ka chhing vang vang a . He hla ka ngaihthlak hi chuan ka dam huai hian ka in hre thin . Ka hnung lam a mi lah chuan hmanhmawh ber ni awm zia zang hian horn a rawn pe leh thawt thin a . Eng tin tin emaw tawlh hret hret in hospital chu ka thleng ve ta hram a .
" Good morning , doctor !"
Nui sang in nurse chu ka buk khum nghat a , " Morning !" ka ti zang vah a . Ward fan ka ngaih vang chuan hmanhmawh tak in ka doctor kawr fual var chu ka ha sawk sawk a . Nurse pahnih hian min rawn zui nghal vat bawk a . Damlo te tan hian doctor leh nurse te hmel hlim leh awka zaidam hi damdawi pakhat a tling ani tih ka chian em vang in ka damlo te kiang ah hian nelawm taka awm in ka nui lui thin __eng anga chau leh hah pawh ni ila .
Damlo na chhia leh ngaihtuahawm an awm lo bawk a ka thaw a veng huai a . Ward pawh ka fang zo ta thuai a . Corridor ka kal lai chuan min tawk zawng a hmeichhe naupang hmeltha tak pawm a Victor-a rawn kal ka hmuh chuan ka ding chawt a , ka awm ah chuan min hnawhtu lian tak awm ang mai hian thawk lak ka harsat ani.
A nau pawm chu a fanu a ni ngei ang tih hai rual ani lo ,an in ang em mai a . Ka han en chik leh deuh a naupang pawh chuan a mitmeng fiah kil kel danah Sangpuii kha a chhun deuh hian ka hria a .
Sangpuii ! Ni e..kha Sangpuii ka hmangaih hmasa ber leh hnuhnung ber tur ka chan tak si loh kha . A hming ka ngaihtuah chhuah ringawt pawh chuan ka thinphu chu a lo danglam in a la na vawng vawng thei ani . Kum kha chen kha ka hmu tawh lo a , kan in hmuh loh chhung zawng khan a hringnun hlim tak in a hman ngei ka beisei ani .
Ni e a hlim ngei ang. An fanu pawh saw a lo ber ah kum li vel chu ani tawh ngei ang . Victor nen an fa ni lovin kan pahnih a kan fa ni zawk se tihna chuan ka thinlung a rawn deng dawt a , thikna sual chuan ka rilru ah hmun a luah nghal a . Ka vui lo ang . Pathian hnenah lawmthu ka sawi zawk tur ani ..kan in hmuh loh chhung zawng a dam taka a lo awm vang in . A boral thu hriat a a thlan lung hmuh ai thlawt chuan mi dang fa kai bawr teuh a chhangchhenu nia hmuh pawh a thlakhlelhawm fe zawk a lawm le tia in ti paukhauh in Victor tawk tur chuan ka pen chhuak ta a .
" Hi! Victor .., min la hria em ? Sangpuii in luahpui thin Ramnunsanga kha ka nia .." tiin harsa ti tak chuan ka nui lui sang a .
Mit vun chuar nang hian min melh a , a mit ah chuan huatna hi ka hmu tel hian ka hria . " Ka hria che a lawm, Doctor Ramnunsang." a ti vawt raih a .
" I fanu a niang chu ti raw ? A chhun hle mai che ?"
" Aw, ka fanu ani e ."
Ka thaw huai a ," A hmeltha khawp mai." ka ti sap a . " Eng nge hospital ah hian in tih ve reng reng a ? " tiin ka zawt leh zat a .
" Bawihtei hian chhang a nei dawn a , a nu hi nau nei tur in a awm a kan tlawh dawn anih hi." a tih chuan ka thin chu a phu rang zaih zaih kher mai a .
Kum tam tak ka hmuh tawh loh , hmuh ka chak em em thin , eng tik lai pawh a ka rilru a cham reng thin kha ka hriat hauh loh in hmun khat ah kan lo awm reng anih chu . A hmel te kha a la tha reng ang em ? A la tawng duh em em reng ang em ? Ka lungphu chu a in thum rawn tlut tlut a . " A nih chu mawle..tih tur ka la nei bawk nen ka kalsan phawt mai ang che u. Bawihi, nau hmeltha tak , nangmah ang bawk a hmeltha i nei dawn nia aw ." tiin naute biang chu ka tawk zauh a .
" He tah ilo thawk reng ani maw ?"
" Nia, thla thum kal ta khan ka rawn in sawn a..A nih phawt mai." tiin ka kal san ta a . Kal san tih ai mah in tlanchhiat san ti ila a dik zawk ang .
Khawi danga peng kawi lo in washroom ah ka lut tlang nghal a , bang ngheng chuan ka ding sai dar dar a , a chhan ka hre lo ka mit atang chuan mittui a rawn luang zawih zawih a . Sangpuii aw ngei in , " Ka pa chuan puitling an tap ngai lo a ti a sin ." a tih ri chu ka beng ah a rawn ri nawn awn awn a . Mittui kar ah chuan ka khi sak a ,ka mittui chu ka hru hul in ka in phih fai ta nghal a .
Sangpuii hmu chak si hreh bawk si chuan ka tei ka tei a . Ka hmuh chakna leh ka hmuh hrehna chu buk ta ila a in buk tawk vel khawp in ka ring .
Nurse te tak te , hmel fel vang leh tawng siam siam reng mai Enkawli chuan min lo chik deuh ni tur ani , " Doctor, i nuam sam vak lo em ni ?" tiin min zawt hial a .
Ka nui lui sak a ," Ka tha a lawm." ka ti a .
Ka insum zo ta ngang lova maternity ward lam ah chuan pawh kal ang mai hian ka pen ta hlawk hlawk a . Victor leh a fanu ka hmuh chuan ka pan vat a ," Vawiin lam te chuan in nei hman em ang chu ti raw ?" ka va ti ri ngawt a .
" Kan in beisei."
Khum a mu chuan min rawn biak tak mai loh ah chuan ngam leh ngam lo in ka zuk melh ta hram a ..Ka phu chiang kher mai . Sangpuii ani hauh lo ! A nupui chu Sangpuii anih si loh chuan khawiah nge Sangpuii chu a awm tak ang ?? A boral chu a ni em lo ang chu ti raw ?? Ka thawk chu a tawp mai dawn emaw tih mai tur in boruak tlachham ang mai hian ka thaw kawk kawk a . " Hei...hi...in nu maw ?" ka ti thei ta hram a .
" Aw..ka nupui anih hi."
" A nih leh ___"
Victor chuan a nupui lo awmpui tu hnenah chuan a fanu chu a dah a , " Bawihte, anutei bulah hian lo awm lawk la , doctor nen hian thil kan va sawi lawk ang e aw. Didik, ka rei lo ang. Bawihtei hi lo awmpui lawk rawh." a ti a min kai chhuak ta dawr dawr a .
Kan awm fal hnu chuan , "Khawnge Sangpuii ?" ka ti ta a .
" An khua ah zirtirtu hna a thawk."
" In innei lo a maw ?? I rinawmloh san a rilru na tak in i thlauhthla tihna em ni ?" ka ti hriam hraih a .
A nui suk a , a mitmeng erawh a nui hauh lo. Huat hmel tak hian min melh a ,"Sangpuii kha ka hmangaih a ka rinawm loh san ngai lo. Amah zawk in min rinawm loh san ani." a ti ta a.
Sangpuii khan a rinawmloh san lul lo ang . Amah in thiam chawp nan dawt a sawi tih ka chian em avang in hnek bur mai chu ka chak et et a ." I daw chiang bal . Kha hmeichhia kha ka hre chiang tawk . Mi dang kawp lawr mai mai chi ani lo ." ka ti hriam hrak a .
Za lo zet hian a nui hul hak a , " Ka huat zia che hi hria la chuan ka hma ah i rawn in lan hauh lo ang mawle . Ka hmeichhe hmangaih em em chu nangmah vanga then ka ni a sin." a ti ta mai a .
" Huh? Keimah vang maw ? I dawt sawi hreh lo lutuk hian ka nuih i ti za zawk !"
" I duh leh nui ta che , Hmela !" tih pah chuan ka hmai ah tak chuan min rawn hnek ta bur mai a. Lo inrin lawkna ka neih loh vang chuan a mi hnekna chu ka lo bum hman ngang lo a , chhuat ah chuan ka hlawm nawk mai a. " Ka hnek ta bawk che a , ka dam huai mai. " tiin a kut chu rawn phar chhuak in min rawn kai tho a .
Ka ka chhungah chuan ka thisen chu a luang lut al pap pap a ,romal phawrh in ka hmui thi nuan mai chu ka hru fai a . Ka kuttum chu vai chhuak zawk in a hmui ah chuan ka hnek ta siah a , "Ka ba ka tlak e ! Sangpuii pa chuan ' Mi in i hmai lehlam a ben chuan a ai na in beng let ve rawh.' tiin Sangpuii a hrilh thin a sin." ka ti a . " I ha kha ka hnek bal anih chuan Mizoram dentist thiam ber ka rawih sak ang che ." ka tih khum ngat a .
Chhuatah chuan a thu kun tlat a , anchhia min lawh chung chuan thisen chu a chhak chhuak thawt a . A khabe leh a hmui bawr vel tuai noh noh pah chuan, " Ka ha chu i hnek bal em love." a ti hluk a .
A bula zuk thut thlak ve pah chuan , " A nih Sangpuii chu eng tin nge a awm tak zel ? A la dam maw ? Pasal fanau te pawh a nei ve tawh ang ti raw ?" ka ti sek sek a .
" Kha hmeichhe aa tak khan kei ni lovin nangmah a lawm a hmangaih, Zawnga ! Phai a i chhuk thla chiah kha i hmel a hmu pha tawh silo a lungleng in eng tik lai pawh hian a sawi reng che a ,i zirlai a tih buai a hlauh vang in a be ngam bawk silo che a . Mipa dang hmangaih nei reng chung chuan kan in kawp rem thei ta ngang lo ani ."
Sangpuii chuan kei hi min hmangaih a maw ? Ka thaw hawk a , aw Lalpa, ka va lawm em !! " Pasal nei lovin khang hun chhung zawng khan min lo la nghak a maw ? Dawt i sawi lo ang ti raw ?" ka ti chul a .
Ka hnekna vanga hmui kawh bur chung chuan harsa ti tak in Victor chu a nui suk a ," A rilru leh thinlung zawng zawng a mi pakhat hmangaih reng chung chuan khawi a pasal mah a nei lul lo ang . A nghah rei tawh em che hi kal vat rawh . Khawvel hmeichhe hlim ber ah siam in nupui ah nei rawh." a ti sup sup a .
Mi aa ang mai chuan ka nui hawk hawk a , ka lungphu rang lutuk thunun tum chuan ka awm chu ka chum dawt dawt a " Sangpui, hmeichhe aa tak i ni ! Min hmangaih anih chuan min rawn call ta che ." ka ti nawk nawk a .
" Lehkha a zir lai a biak buai a duh ngai lo tiin a call ngam lo che ani . Nang lah chuan chhete pawn i rawn ngaihven lova a chanchin hriat tum pawn i text ngai hek lo . I theihnghilh tawh ah ngai in i doctor zirpui duh i nei ah a ngai a ni ." a ti a .
Hmui vung kawh luk chuan CMO hmu tur in ka tlan nghal a , ka chanchin engkim chu ka hrilh ta vek a . Min lo hrethiam em em mai a , " Hun i lo khawhral thlawn hnem hle mai . Kal ta la i hmeichhe hmangaih ber chu han hmu mawlh rawh . In inneih hun ah i thian ah ka tan a ngai thung ang." tiin min nuih vur vur a. "I kal hma in i hmui kha enkawl hmasa rawh aw. Kha ti ber bur chung a i han hmuh chuan a lo hlau palh ang che . Kal rawh ..ni thum chhung chu ka lo hmui ang che ." min ti ta a .
" Ka lawm e, sir."
Hun ka khawhral hnem tawh lutuk minute khat lek pawh sen thlawn leh ka tum tawh lo . Hmanhmawh tak in ka in siam zung zung a ka nun a ka hmeichhe hmangaih awm chhun hmu tur chuan ka tlan ta nghal a . Motor khalh pah in ka hmui ah chuan damdawite ka hnawih nawk nawk a . A vung ti ziaawm tur in vur in ka dep pah reng bawk a .
Zan lai ah an khua thleng in ka hmu thei dawn chuang lo bawk a tiin an khaw thlen hma ah chuan riak in ka chawl hahdam a . Ka hlim lutuk helhhawlh nen chhin khat pawh ka chhing lo . A tukah chuan in ti fai in tukthuan te ka ei te te a nalh thei ang ber a inchei in ka hmangaih hmu tur chuan ka in khalh chhuak ta a .
An khua ka thlen meuh chuan dar 11:30 a pel fel awrh tawh a . Zirtirtu anih chuan sikul a kal tawh ngei ang a...dawr pakhat kawt ah chuan ding in kuhva leh cigarette ka lei a ,"Ka pi , in khua ah hian zirtirtu Sangpuii i hria em ?" tiin ka zawt a .
" Miss Sangpuii te chu hre lo an awm nang "
" A thawhna sikul hi khawi lai nge ni min hrilh thei ang em ?"
A thawhna high school hming leh awmna min hrilh hnu chuan ramhuai speed dik tak in ka vung ta a . Ka thlen chuan skul naupang chuan min lo en duh hlawm kher mai a . An skul office chu ka pan ding nghal a , an principal room ah lut in ka in hmel hriattir mai bak ah Sangpuii ka hmuh duh thu leh ka hmuh duh chhan chu ka hrilh nghal vek a .
Principal chuan min chibai lawp lawp a ," Ka hrethiam khawp mai che , doctor. Miss Sangpuii chu ka rawn tir chho anga lo nghak rawh aw. A class lak ai chu ka la mai ang." tiin in pe zo tak hian a chhuak a .
" Ka lawm lutuk ,sir." tiin ka au zui hram a .
Minute thum leh second sarih ka nghah hnu chuan ka hmeichhe hmangaih chu a rawn pen lut ta a . A hmel te chu tun hma ai khan lo tha leh zual in a nalh thlarh mai a . Ka lungphu chuan awm ngaihna pawh a hre lo , a suk hian a su dup dup mai a . Min hmu thut chu a phu nasa ngang mai a . Sawi tur hre lo in phawk hra chuan ka hau hian min en ta tlawk tlawk a .
" Eng mah sawi lova ngawih reng kha i in hmeh lo." ka ti ri ngawt a .
Harh chhuak ta thut ni awm tak hian a in thing nawk a , tlan a min rawn pan in min rawn kuah ta chawt a . Min chum nghal zawt zawt a, " 'Hna ka neih ve leh ei tur tui hnai chi tin reng ka lei sak ang che min ti a ni lawm ni ? Tunah hian hlawh i nei chauh em ni? Awi...Rome, ka haw lutuk che." a ti bawrh bawrh a.
Ka awm si chet chuan ka kuah bet thlawp a," Tunah chuan ka in zir chhuak tawh a . Thawh chhuah te nei ve tawh in ngaihzawng ka nei ve thei tawh a sin. I bialpa atan min la duh em ?" ka ti sa sa a.
Ka awm ah bei thlawp in a tap ta hlawp hlawp a. A sam ah chuan duat tak a chul hliau hliau in ," Sshh...i pa in 'hmeichhe puitling an tap ngai lo . Mittui chu chaklo entirna ani a tih kha ." ka ti a.
Mittui kar ah rawn hawi chhuak in a tah nuih hawk a ,"Mipa pakhat ka thinlunga awm reng in a sawi dan chuan ' tah hi chaklo entirna a ni lo . Thinlung na lutuk puak keh tur hi mittui tlak hian a zia awm thei thin . Chuvang in i tah a chhuah chuan tap mai thin rawh ." tiin min hrilh a sin ."
" Ka hmangaih che...ka ngai lutuk che .." ka ti tham tuak a , ka mittui chu tih tlak loh hram tum in ka khap fak fak a .
" Min hmangaih thu min hrilh tur hian kum ruk chhung nghah a ngai em ni ? Sawi a va har awm ve a ..mawh..mawh.." tiin min chum taih taih a .
" Victor nen khan in innei daih tawh tur ah ka ngai a ...khang kum chhung zawng khan eng tik lai pawn ka rilru ah i awm a , ka ngai ngawih ngawih reng che ani . Second khat pawh nangmah ngaihtuah lo a ka awm ka hre ngai lo .'' tiin duh thawh leh thlahlel em em chuan ka fawp ta vawng vawng a .
A TAWP TAK TAK TAWH AW..in la lungawilo cheu anih chuan BITTERSWEET REVENGE in in lo in ti lungawi chawp tawh mai dawn nia
Bittersweet Revenge lo chhuah hma chuan mangtha leh phawt ule. Bittersweet Revenge pawh hi type sa vek anih vang in rawn regu leh theih ka in beisei... Pathian in rem a tih chuan .
E...!! Chuan ka fanu RODINGLIANI VANCHHAWNG ziah ' SALVADOR' saw in la chhiar lo anih chuan lo va chhiar sak in lo va like ula duh leh lo va comment sak ve hram ula , duh leh lo hau in lo zilh ula ....
I PURPLE YOU ALL
AND I REALLY DO
TAMING OF THE BAD BOY : BONUS CHAPTER
Moderator: writers
-
- Posts: 164
- Joined: March 17th, 2021, 6:20 pm
ADVERTISEMENT (A hnuai a milem hi a nia hmeh zeuh tur chu)