HEY DADDY Chapter - 14 By : Mami pachuau

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

HEY DADDY Chapter - 14 By : Mami pachuau

Unread post by Msi Miluhlulnui » April 13th, 2021, 7:44 pm

HEY DADDY CHAPTER - 14

Ziaktu : Mami pachuau



Thin phu rang dup dup chunga message ka type mawlh mawlh lai chuan a message a rawn thleng leh a *hnaih suh ka tih che kha* tih zawng hi alo ni leh, chil ka lem khalh a message pawh ka type zawm theilo.



Ka message type tawh sa zawng zawng chu ka clear leh vek a *Hey... i ngaih ang kha a ni lo* tih ka va thawn ta zawk a a in tick rualin a pawl nghal kalh bawk a a rawn type leh mai ka ring ania mahse a reh vang vang, online a in ti tho bawk si.



Engtin nge thlalak kha alo neih theih dan ka hrelo min enthlatu an awm a nih loh chuan tu emaw in an hmu fuh palh anga an thawn a ni ngei ang. Mahse khatiang kha thil nihdan a ni lo tih hrethiam se ka duh takzet.



Ka hlauh ang ngeiin ka message a rawn reply tawh miah lo a khât tawk in whatsapp-ah ka lut deuh reng a mahse ka message reng reng a rawn chhang duh lo, a rawn chhang leh em em ang tih beiseina nen a dp te chu ka en a ka zoom a ka hriat hnu ang ka ti em em mai bawk si.



A chang leh a thlalak min lo thawn chu ka en leh thûl, a thil min rawn thawn te ka chhiar nawn ka chhiar nawn bawk a, message dang thawn leh tum in ka type vek tawh mahse ka ngam lohna avangin ka clear leh vek țhin.



Thaw hak in ka sam chu ka tuai chho a ka awm hle hle theilo, thil thleng avangin ka țhiante lo leng pawh duh ang in ka kawm theilo an ni chuan an hre ve kher lo ang Nghaki pawh hrilh ka tum lo mahse he pa hian ka message tal rawn reply ni se chuan ka awm a nuam mai tur ania.



Dinpuia leh Nghaki an haw tawh, ka pa in ka room-ah min pawm chho a light min off sak vek rualin ka phone ka ban nghal chat a a rang a rang in whatsapp-ah ka lut a mahse a message pawh alo awm lo reng reng, a chat-ah chuan ka lut a a last seen lah chu a rei tawh ropui.



"Ngatinge min chhan let miah lo a..." lukham a ka lu nghah pah hian ka ti sap, ka call tawp mai dawn mi mahse meeting an neih lai te lo ni ta se, nge ni a message ka thawn țha leh dawn zawk?.



Ka rilru a insual buai nuai nuai a ka call chuan meeting an neih lai a nih ka hlau si, message ka thawn chuan min chhan let leh loh ka hlau bawk si eng ber nge tih tur pawh ka hrethiam tawh lo.



Pawilo call chhin ila a nih nih a ni tawh mai, insawifiah țalh ka duh bawk si a a chhan pawh a thil hmuh ang kha a ni lo tih hrilh ka duh vang chauh a ni chhe takin min ring lo se ka duh.



A number chu ka dial a, a in ring char char. Ala tawh dawnlo amaw ka tih hnuah a rawn pick a mahse hmeichhia zawkin a rawn chhang daih ka off leh țep a mahse ni theiin ka hre ngang lo a "khawnge Eddie-a?" Ka ti ta ringawt.



A ruk chuan ka thin a rim a ka call lo chhang tura amah ka beisei ve ringawt kha â ka inti leh hnuhnawh, a bulah khatiang khawp a nâwk ngamtu an awm reng a ka lo beisei sang mah mah deuh chu ni.



"Intur la in a kal a a ri sia ka lo chhan sak tawp a nih hi" thawveng zet hian ala rawn ti zui a mizo a nih ka ring, Mizo țawng ka hmang ve nghal ringawt bawk sia Mizo in min lo la chhang let leh ta nghal.



Chhan leh ka tum chiah chu "tunge?" Eddie-a aw ri ka hria a ka thinrim țûn thei dah ka tum zet nâng in ka call chhan ka ti puitling tho ang ka ti rilru sauh sauh zawk a.



"Ka hrelo a number i save dan hi en la" hmeichhia zawk chuan a ti a, ava han țul ber lo tak! Hetih lai tak hian ka off daih dawn zawk amaw ni le a nghal khawp mai.



"Hello Jane..." a tawp a tawpah chuan aman min rawn chhang ve ta a, ka thaw leh huai ang bawk si a aw ka hriat khan ka chhunglam hi a fan rawih rawih a 'ka ngai che' tih tawp mai ka duh mahse ka sawi a rem bawk si lo.



"Englo..." ka ti a, sawi zawm theilo chuan ka thaw chhuak leh phawt ka zâm ru ang reng takzet.



"Sawi la" a rawn ti leh a, a bul velah chuan mipa leh hmeichhe țawng thawm a awm nak nak bawk.



"Nichina thlalak kha i neih dan chu ka hrelo a mahse i ngaih ang kha engmah a ni lo ania ka inrin hma in khatiang khan alo awm thut a ka awm hrang hman meuh lo a" ti a ka sawi zo chu ka maimichhing zui a! Ka tlawm ngawih ngawih in ka in hre tlat pek a nih chu....!.



"Ka țhian ania ka hnaih lo thei lo bawk a ka be chhe ngawt theilo bawk chuan ka lo call chhan che hi chu i ngaihdan ang kha a ni lo tih hrilh che ka tum mai chauh a ni" ka ti leh ka sawi chhung zawng chuan ka kekawr chu ka țhâm ngar ngar mai.



"Ka hria lawm" a rawn ti ve sup a, ka meng chhuak a țawng leh ka tum chiah "ka ngaihdan engmah ka rawn sawi lo mahse i sawi ang in ka ngaihdan ka rawn sawi a nih hmel a min hrilh hria la" a sawi tawp lamah chuan a nui deuh reuh a ka hriat.



"Ka sawi kher ngailo in i hre zawk ang chu nangman" ka ti let ve ngat, a nui ri suk pawh ka hria.



"Ka hre hauh lo Jane ka sawi âwm ka hre bawk si lo" a rawn ti leh, a sawi lo maw!? A message rawn thawn khan a tilang chiang viau a nih kha mahse ka sawi kher lovang e!.



"Ka sawi duh ka sawi zo tawh bawk a i ngaihdan lehzel sawi turin hun ka neilo ka dah dawn, a nih phawt le" ka ti zo chiah "la dah suh" rang zet hian a rawn ti leh ka phone chu ka bengah ka dah hnai leh a.



"Enge? Sawi tur engmah ka nei tawh lo ania ka mu duh tawh" ka ti nghat "keiman ka nei alawm" a rawn ti sup a saisir zawng chuan ka mu a phone chu ka delh bet bawk.



"Sawi vat rawh!" Ka ti hlak, mahse kei pawn a ruk chuan ka la be chak reng a mahse ka tilang hauh lo ang kha hmeichhia nena an țhu dun mawlh khan min luah ngut ngut mai a ka rin kha alo dik a nih dawn hi ka ti ta tawp. Khu lamah chuan hmeichhe chhelo an tam a min hre zui hauh lo ang ka tih kha.



"Enge vawiin i an?" Ti a min zawh te chu a tak nge dawt tih pawh ka thliar hrang thiam meuh lo chu a ni "a na tawh em em lo bakah chutianga serious a ni lo a a dam ve mai ang" ka ti țha ve mai a ka lungawi lo ngei alawm mahse dawt erawh ka sawi lul lo ang.



"Damdawi i hnawih leh tawh em?" A rawn ti leh, engemaw a hriat a ka ke pawh chu a ngaihven tak chiam mai le! "Mut hma in min hnawih sak tawh, a serious lo a ngaihtuah a ngailo nang pawn theihnghilh daih rawh" ka tih chuan a rûm ta nghut mai.



"Ka ngaihtuah lo ang maw Jane? Thil serious lutuk a nih kha....!" Sawi zawm lem lo chuan a thaw ta hrâwih! A engemaw mi rawn vin chiam mai le thil serious pawh a ni der si lo "a serious hleinem mawle thildang sawi tur ila nei em ka dah duh tawh ania" ka ti ve nghat! A duh hun hun a min vîn tur pawh a ni lo.



"La dah lo teh!" A rik chhuah dan chu a ngenngawl takzet!. Ka rilru chuan 'i bula hmeichhia kha buaipui zawk ta che' a ti mawlh mawlh.



"Enge sawi duh ila neih a?" Ka ti leh nghat!.



"Kha mihring kha hnaih tawh suh aw, kawm suh ka tilo che mahse hnaih tawh suh! Be tawh lo bawk la" hmmm... hnaih suh min tia kawm suh ka tilo che min ti leh a! Awmzia awm lo!.



"Engvangin?" Tiin ka lo chhang let vat! Dinpuia hnaih lo tura min duh em em chhan hi ka hre duh, a thîk a ni mai lo maw le.



"Hnaih suh ka tih chuan hnaih lo la ni mai" nin hmel fê hian ka zawhna chhang lo chuan a rawn ti nghek!.



"Ve ringawt a che, ka sawi tawh kha ka țhian ania chutiangin ka hnaih lo ngawt theilo a ka be lo ngawt theilo bawk Higher kan kal lai...." ka sawi zawh hma chuan thil a ri bur ka lo phu ve zawk thei.



"Chu tal chu min tihsak thei lo em ni? Mipa pakhat lek hnaih loh a biak loh chu?" A aw rik chhuah dan chu a zâwi a min ngen ngawih ngawih na ka hriat sak thei mahse a awmdan chuan min ti thinrim ve tawh.



"Enteh.... ka țhian ania ka sawi tawh kha ka hnaih lo ngawt theilo. Nang lah chuan hnaih tawh suh, be tawh suh min ti a a chhan ka zawh che lah in min chhang duh bawk si lo! I thîk chu a ni em lo maw?" Ka ti ve ta nghat, a duh duh min hnaih loh tira min biak loh tir theitu pawh a ni hrep lo.



"Ka thîk, ni e... ka thîk ngei alawm! Thîk tak ka ni! Khatiang khawp a i taksa a hnaih leh a nih chuan a ban ruh pawh herh tliah sak ka hreh lo!" Ka hriat sual amaw ka ti hman țep! A aw chu a chang țha in a thusawi ah chuan a ding nghet chiang tih a hriat ngawih ngawih!.



"Ka dah dawn..." ka ti ta tawp, hepa hi ka hlau ru deuh reuh! A thu rawn sawi danah khan tual thah pawh a hreh lo tih a lang reng.



"Aih la dah suh... min hlau ami?" A aia dam zawk chuan a rawn ti leh a, a sawi zawh ruala thaw ri zui ham ham pawh ka hre thei. Ka chhang tawh lo hrim hrim, a țawng leh hun tur chang chuan ka ngawi reng a.



"Min hlau suh aw, kha mihring khan a hnaih che ka duh lo mai chauh a ni. Mahse a hnaih lui zel che a nih chuan ka thusawi ang khan ka awm hreh miah lo ania" a ti ta hrâwk!.



Chhan ka tum a mahse hmeichhe aw ri kha ka hre leh a "mangțha" tih thut pah chuan phone chu off hmak in luhkham hnuaiah chuan ka rawlh lut a ka maimichhing nghal vang vang. Engtin nge khatiang thu kha awlsam deuh a a sawi chhuah theih zawk le! A rapthlak takzet!.



A hma pawh khan vaipa lapaw chini zawrh dawr kan tum țum khan ka u ei a phal loh avanga vaipa sumdawnna tih chhiat sak a hreh loh zia te kha ka ngaihtuah chhuak uar uar a ka țim uar uar thei.



Mahsela ka mihring hnaih tur leh biak tur hi ama thlan tur a ni lo a ka nun a ni a ka duh duh ka hnaih anga ka duh duh ka kawm ang. A ni pawn kha hmeichhia kha a nei alawm le ka sawi buai sak bik pawh ni hlei lo duh leh kha hmeichhe hnaih tur leh biak tur kha thlang se hmeichhe dang a hmuh avanga engah mah min ngai chhunzawm lo tu in min ta chei chu ka duh țhak lo.



Ka chek in a mil lo. Ka lo call kher kher kha ka inchhir leh hnuhnawh.



Zing lam dar 2 velah ka mu ve ta chauh a ka muhil theilo lutuk kha games-ah ka țuan ta vak ringawt a ka zing tho chu ka mit ana vek thei.



Ka tiang hawl tur ban in bathroom lam ka pan a ka inphih fai a ka phone chu ban in inhnuai lama chhuk thlak ka tum a ka nu ka room-ah a rawn lut fel hman chiah bawk.



"Tukin chu ka tlai deuh a ni maw... i ke enge a an?" A tih zawm a parda vel chu a hlip sawn mawlh mawlh a "a zia ve reuh lutuk tukin chu, hna i kal dawnlo mi dar 9 a rik tawh dawn hi" sana lam melh zeuh pah chuan ka ti a.



"I pa in engmah iti thei si lo a awmpui tur che in min ti deuh mawle i mu țha lo mi iva meng bui ve" a tih zawm a darthlalang lam hawi zawng chuan ka in her zeuh a ka meng bui tak tak.



"Umm.. ka mu thei vak lo a, i duh chuan hna chu kal rawh nu tiang nen chuan hei ka kal ve thei alawm inhnuai chhuk thlak hi ka la harsat dawn a ni mai a bak chu ka ngaihtuah awm loh" ka ti a, damlo na tak ang in min en lo se ka duh.



"Aw... kan sawi țha dawn nia i pa pawh vawiin chu kal hma a ngai dawn lo a chaw ei ka peih tawh a i pa in a rawn pawm thla leh mai ang che" a tih chuan bu nghat in khumah chuan ka țhu thla a.



Ka pa rawn chhoh chu nghak in ka țhiante message chu ka chhang kuala nizan a Eddie-a nen kan in biak hnu khan whatsapp-ah ka lut leh tawh lo a Dinpuia message pawh alo awm reng zing dar 7 vela mi nen.



*Morning... ka tho ve chiah😬* tih ka va thawn let ve thung.



Ka pa a rawn chho a inhnuai lamah min pawm thla a ka nu in chaw ei alo siam mek a chair-ah chuan min nghat in min nawr lut zui nghal bawk.



"Bawihi nizana i țhianpa lo leng kha ka va hmu ve ngai lo ve" ka pa chuan a rawn ti a, kan chu ka thlengah ka suak a.



"In la hmu vak lo maithei midang ang in a rawn leng lut ve em em lo a kan inkawmna chu a rei tawh... saw Pres biakin bulah sawn an awm" ka ti a.



"Pres biakin bulah maw a nih chuan... pu Hluna fapa kha a ni em? A u chu Y.M.A hruaitu kha?" A tih chuan ka bu nghat nghat a, hmuh loh kar in an lo tlangval tawh thu sawiin a upat tawh thu lamah a kai chho a a tui deuh nge ni kan vengah pawh țhalai hriat loh a ngah tawh thu lamah te a kai chho a ka nu pawn alo zawm ve leh zeuh zeuh bawk.



Ka theih ang tawkin chaw eina vel ka tihfel pui a mahse ke khat chiah ka rin avangin rei ka ding theilo puih ve ngei ka duh bawk si. Kan têt lai ațang tawhin leh tun hnu thlengin ala che char char a helamah min awm tir tam se ka chhawk ve thei ni mai tur ania min awm tir duh bawk si lo a mahse ka chhoh chang chuan ka tihpui ve ziah tho.



Hna thawk turin an chhuak ve ve tawh a kei erawh sofa ah muthlu deuh reuh chungin masterchef ka en a ka lo bu leh lâwp țhin ka meng hleithei lo chu a ni ber e.



Ka phone a rik avang chuan tunge a nih pawh en lo in meng mang hlei lo chuan ka pick a phone chu delh bet in ka maimichhing zui leh a "hello!?" Ka ti zâwi sep bawk.



"Ila tho na nge?" Nghaki chuan a rawn ti a "tho tawh e ka mu tlem lutuk a sofa ah ka lo muthlu pek a" ka ti a, intiharh turin min hrilh a mahse ka meng peih thlawt lo.



"Tikhan i sawi duh chu sawi mai rawh" ka ti thâm chhel.



"Eng zawk nge i hriat hmasak duh?" Ala rawn ti ta deuh deuh zui "ka hre nang, i duh duh sawi hmasa rawh. Hmanhmawh la ka mut a chhuak ania" ka ti a, a thusawi tur a pehhel kual rei thei lutuk hian ka mut chhuak a ti reh vek thei takngial dawn.



"Ok.. a nih chuan heihi ka hrilh hmasa ang che. Eddie-a'n min rawn bia a" a sawi zo chu ka meng chiang asin. Ka phone chu la in ka țhu chhuak a ka harh chiang mah mah "engvangin nge alo biak ngawt che?" Ka ti let nghal vat a, a chhan tur âwm ang ka ngaihtuah thiam lo.



"Sawi vat teh Ramnghak" a ngawih reng avang chuan ka ti ta chûl a a chhan ka hre chak ngawih ngawih.



"Ka hrilh lo ang che ka ti tak nâ in ka hrilh tho mai ang che. Dinpuia hnaih lo tur che in a duh che a" a rawn ti a ka thaw hak "a ngai bawk maw..." ka ti a, a buai rei peih ka ti hle bawk.



"Maw...!? Engtin nge a ngai bawk ti a i sawi theih?" A ngaihna hriat loh hmel zet hian a rawn ti a ka mu thla leh "nizanah kan inbia a a sawi tawh alawm. Khapa khan tunge ka hnaih anga tunge ka biak turah thu a neih pawh a ngai lo" ka ti ve hmak. Ramnghaki thlenga a lo biak chu ka beisei lo asin mawle.



"Chuvang a ni maw amah khan a thusawi i âwih duh loh thu a sawi ni, in inbiak pawh ka lo ring em em lo a enteh, kei thleng in min rawn bia a i hnaih a duh tak tak lo anih ka ring nghet bur" Ramnghaki chuan a rawn ti a ka thaw ham ham.



"A thik vang alawm hnaih lo tura min duh nachhan" ka tih chuan a rawn au nghek! A mak thei nia engtin nge maw Eddie-a pawh chuan Ramnghaki number alo neih theih ni.



"Nangpawh a thîk tih i hriat reng chuan hnaih lo ve mai la" ala rawn ti ta deuh deuh, a țan zawk a ni maw..!



"Mahse ka hnaih lo ngawt thei bik hleinem țhian kan nia chutianga hnaih lo a biak loh rik ngawt ka thei bik chuang lo a bakah a nuam hleinem țhian leh țhian inkara chutianga awm te chu nangpawh ni ka nuam iti bik miah lo ang" ka ti ve nghat!. Nangni pawh ni ula in thei bik miah lo ang.



"Mahse keima hnenah meuh a thlen chuan a mangang ve tawk tihna ah ka ngai hmak! Engpawh chu nise nangpawh a thu âwih phawt teh! Bakah in ninawm, in in duh ve ve sia nih ve hle hle mai tur che u in la in khêk dun amaw ni" ngaihsam fê hian a rawn ti leh.



"I mak..." ka ti hlar ringawt.



"Taka pakhat kha ka theihnghilh țep alawm, englo nizanah khan ka chhiar a news-ah Eddie-a hian a hna a bansan dawn thu tih vel a darh a i u nen inkawp ang in an thang țha leh a chuvang vel chuan a bang dawn an tih kha ka chhiar fuh a ka screenshot thlap" a rawn tih chuan pawh nawk ang vel ka ni.



"Ka lo thawn che a ka message i seen thei si lo a, ka lo call hma che in Eddie-a'n min rawn be bawk sia zawh ka tum ûk a mahse nuam ka ti leh chiah lo a" a rawn ti ve a.



"Dawt aniang" ka ti ta ringawt, ka âwih duh lo ngawih ngawih.



"Mahse dawt a nih chu ka ring chiah lo deuh a a darh nasa ve sia bakah ka hmuh tak kha chu TC News-a an post ania an thu post hi a dik thei sia i hriat ve ka rin rin nen" a rawn ti a, ka hlauhthawnna a zual sauh mai.



"Ka rawn be leh ang che ka u ka zawtfiah dawn" mangang zet hian ka ti chhuak a min chhan hma hma in ka off a ka u number chu ka hmet chhuak a ka call a mahse a la theilo, ka call nawn leh ngat a mahse ala la thei chuang lo.



Thaw vak in a tawp nan tiin ka call leh a rei fê a ring hnuah mutchhuah hmel zet hian a rawn la a "u... i buai em?" Ka ti nghal vat.



"Buai lo e... sawi la ka lo muhil a" a ti a, a ham zui bai bai pawh ka hria zawh tur a ni em ka chiang lo thudik lo ni ta se ngaihtuah ngam lo chuan ka thaw vak!.



"News kha ka lo hmu a" ka ti ve thawr.



"Eng news?" A rawn ti a, a landan chuan a hriat hmel loh.



"Ih... Eddie nen inkawp ang in in thang leh tawh tih vel kha... thudik a ni em tih ka hre duh a" ka ti a, min chhan hun nghak chuan ka kut ka hûm a ka hûm thlan vek thei.



"Ummm kan inkawp alawm" a rawn tih rual chuan ka zawi nghal hnawk thei "mahse a bang dawnlo ka remti lo" ala rawn ti ta deuh deuh zui lehnghal phone chu ka beng ațang ka la thla a ka thaw chhuak ham ham.



"Ka u nen maw?" Ka ti chhuak thei țâwk!.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)