29th APRIL - 20 BY PAPUII SAILO

Episode kal lai dah luhna

Moderator: writers

Ruatpuii Sailo
Posts: 100
Joined: November 22nd, 2020, 10:57 am

29th APRIL - 20 BY PAPUII SAILO

Unread post by Ruatpuii Sailo » April 13th, 2021, 10:47 pm

CHAPTER - 20 BY Pâpuii Sailo




"Ava mak bawrh bawrh ve, zing kar karah " Ti nuah nuah chungin Remruata'n ka hnung a rawn chum dat dat a, ka khuhna lamah ka hrawk a thip vek thei hial. Ka khuh reh deuh hnu chuan mittui tla phung chungin ka thu thla a, ka bulah Remruata a rawn thu thla ve nghal tharh bawk.



" Mampui, i insiam nghal mai dawn mi? " Pa Sangpuia'n a tih chuan ka bo deuh hu a, Remruata'n "kalna tur in nei mi? " A lo ti ve sup bawk. Hmahruaia ka va melh a, min lo mit mei zauh chu ka va hmu a, enge an lo sawi chu ka hre lo. Mahse Pa Sangpuia'n min zawh dan ki ah khan kan tum lawksa ang a sawi anih duh hmel bawk si.



" Ka hre biklo, a hmanhmawh thlak vak chuang a mi? " Hmahruaia en chung chuan ka ti thla ve rawk, kan kalna tur ka hre lo tih sawi kher ka tum lo. Amah Hmahruaia sawi danin a lo zir tawhlo bawk nen.



" Mo interview tur te chu point score nan hma deuh a kal tur, han insiam thuai rawh " Nui huah huah chung a, Pa Sangpuia'n a tih chuan Hmahruaia ka va melh rawm a, a hnar khawih zeuhin a nui suk chuan ka ngaih a ti tha lo. Mo interview maw?



" Khawiah nge min hruai dawn? Chuan Pa Sangpuia sawi kha enge awm zia? Mo interview te kha enge? " Kawt zawl atanga kan tlanchhuah rual chuan ka ti nghal zung zung a, min chhang lo in kawng lam en in a nui suk suk ringawt.



" Engmah ka hre lawk bawk silo, hrim hrimin tun angah te enge i rawn tih? Engtikin nge i lo phei? Tinge engmah min hrilh loh? " Zawhna hlir ka chhakchhuak zut zut a ni ber. A rawn phei tur ka hre lo a, zing karah ka hmu thut a, min la hruai chhuak zui bawk nen.



" Ka nu leh pa hmelhriattir tur che in kan In ah ka hruai dawn che, tukthuan i ei ve nghal bawkin ka ring. Pa Sangpuia ka dil thlap, i thlenna te an nih vangin, chuan Aizawl i awm lai hian inhmelhriattirna neih a rem berin ka hria a, chumi vang chuan nimin khan ka rawn phei, ka hrilh loh chhan che chu i duh ka rin loh vangin, i zawhna ka chhang kim em? " Ka lam a rawn thle zauh chung chuan a ti charh charh a, a thusawi apiang chu mak tih lutuk avangin amah chu ka en kawk kawk a ni ber.



" Mahse ka duh hlei nem " Ka tih chuan " Ka rindan chiah " A rawn ti zawi leh sup. Ka duh dawn lo tih a hriat reng te chuan ti nge a tih tho si.



" Kir leh zawk mai ang, ka duhlo, ka incheina te hi en ta che. " Ban phar hluai chung chuan ka ti ta thlawt,kan kalna tur ka hriatchian miau loh avangin shirt nghawng bial tawp leh mom jeans ka ha a,chapal rawlh thawih ka bun leh tawp ringawt kha ania, a chhungte hmuh nan chuan a smart lemlo khawp mai.



" A pawilo, inchei vak angailo " A ngaihsam lutuk chu ka thin a rim lek lek,hrim hrimin tiang tur te chu min hrilh lawk ve tur a lawm. Tukthuan i kil ve nghal ang te chu min la ti ang tak tak deuh a, vawikhat pawh ka la hmuh ngailoh te an ni dawn a. Engtin nge awm se min tih ni?



" Hahdam phawt teh " Ka chet sek avang chuan a rawn ti dam thluam a, ka hawichhuah chuan building lianpui hmaah kan lo ding reng tawh tih ka hre chiah. Nur nang chungin Hmahruaia ka va melh chuan a mit chuan engkim a that tur thu min hrilh ni maiin ka hria. Ka chhip samah rawn tuai zeuhin ka chalah a hmui lum vung vungin a rawn nawr zui zat.




" In lo thleng tluang maw? " Hmeichhe pakhat hian nui var var chungin min lo chhawn a, za lo lutukin ka nuih let ve seih.



" Mampui, hei ka u chiah anih hi U Nunthari, U khawnge ka nu leh ka pa? " Hmahruaia chuan a tih zawm zat a. A u chuan room lamah an awm thu-in a lo chhang vat thung.
Mipa naupang hmeltha zet mai hi a rawn tlan terh terh a, Hmahruaia chuan a lo pawm kang nghal lawp.Naupang pawm chung chuan a kut lehlamin ka kutah min rawn kai a, inchhung lam panin min phei pui a, an inchhung chu a changkang tih hian a hrilhfiah ber. A chei dan a mawl mang em em chungin a lang changkang em em lawi si. Sitting room-ah royal sofa nalh fahran mai an hung luah a, a rawng leh an inchhung rawng hnawih inchawih lutuk chuan a ti lang zahawm ruih.




Inchung chhohna step piah deuh hlek a room awm atang chuan Hmahruaia nu leh pa ni awm tak te chu an rawn inzui chhuak a, Hmahruaia kut ka hmer nghal vak ringawt.




Chaw ei hmain sitting room-ah chuan kan thu khaw muang a, Hmahruaia nu chuan eng eng e maw min zawt seuh seuh a, a pa erawh a khat tawkin a tawng ve leh zauh zauh a ni mai. Kan chhungkaw chung chang min zawh chuan tang ru tung chungin ka nu leh pa in min boral san tawh thu leh chhungte dang ka neih em em loh thu ka sawi a, min hnem tum ni awm takin Hmahruaia chuan ka kut chung chu a lo tuai heuh heuh a, a lam hawiin ka nuih seih a, engkim a tha tih nan ka lu ka bu nghat bawk.





" Mampui, ei teuh rawh aw " Tih pahin chaw hmeh chu ka hmaah U Nunthari chuan a rawn nawr hnai deuh a. Lai deuhin ka lo nui ringawt, Hmahruaia lah chuan ka thlengah sa hrang a la rawn suak tak ang deuh deuh. Min ngaihsak em em reng thin tih chu ka hria a, mahse a nu leh pa hmaah chuan hetia tih kher hi a tul ber lo a sin le, an mit kan tikham ang tih te pawh a hlauhawm.




Zingkar chu Hmahruaia te In ah eng tin tin a maw ni chuan ka tling tla ve mai a, ka huphurh ang aiin a pangngai ta phian. U Nunthari'n min biak siam siam reng vang leh Hmahruaia'n min ngaihsak zia a tih lan reng vang te pawh a ni mahna, anu leh pa te kha chu mi tawngtam mi lo nih loh bawk nen vawikhat hmuhna a ni bawk si a,han biak teh chiam dan tur ka hre lo. Anmahniin a thil min zawh ang kha chu tha tak chuan ka chhang ve mai tho.




" Khawnge i phone? " Min thlah haw leh mek a, nizanah ka phone khan hmeichhiain min lo chhang tih ka hriat leh hnuhnawh vang chuan ka zawt leh rih a. " Enga tan nge i tih? " Zawhna bawkin min chhang let daih.




" Ka hre biklo, ka ti bo daih a " Ka ngawih reng avang chuan a rawn ti zawi ta sup. " Daw heh lutuk " Ka hriat tawk lek chuan ka phun hlak a, a hre pha tho anih hmel.




" Dawt ka sawi lo, nimin atangin a awmna ka hre tawhlo " A rawn ti hmuk.




" Ohh... Nizanah kha chuan a In ah i phone i theihnghilh thuin anih kha min rawn chhan si " Kut zai zir meuhin ka sawi a. Nizan tluk zet khan ka thinrim thar leh a ni ber.



" Tu in maw chhang che ? "



" Ka awmloh hlan a i nula rim bak va ni suh " Lungawi lo lutuk chuan ka tichhuak hlak.



" I thikthu i pek chhiat poh leh i lawmawm " Min tih nuih tum ni awm hrimin ka mitah tak nui suk suk chungin min en reng a, ka nuih mai ka hlauh avangin pawn lam ka en ta ringawt.




" Hman zan kan inbiak zawh hnu khan Atlani'n min lo phone a, Sangkimi te in a a leng, a scooty a chhiat thu a sawi a, hruai turin min rawn ngen a, tah chuan ka lo ti tla palh aniang, a hnuah ka phone ka khawih zui tawh awm ka hre miah lo " A ti ta a, ka ngaihtuah a, nimin nileng khan kan inbe lo hrim hrim a, chumi vang a zanah pawh va phone ka ni. Chuan min lo chhangtu kha Sangkimi a ni ta ngei bawk a.




" Sangkimi pawn thlah ve mai ang hmiang " Ka la ti tal chu a rawn nui chhuak ta hawk hawk. Nuih na tur ka sawi tawp silo.



" Bawihte le... Zan a rei tawh a,hmeichhe tan chhuah a hlauhawm alawm,Sangkimi pawn lo thlah thei mah se,amah bawk a a let leh angai dawn a,chuvang a min rawn phone pawh chu ania.Tiang chuan kan inneih vat angai anih hi, chuan englai pawn kan awmdun reng a, midang thik tur i neih loh zia i hre mai ang " A ti ta duah a, Inneih a sawi rik leh avang chuan ka ngawi ta hmiah thung.



" Ka pa bulah khan ka neih duh thu che ka hrilh a " A rawn tih leh chuan a lam hawiin ka thut dan ka siam rem nghal vat. " Ti nge i sawi ve ringawt ? "Ka ti nghal


" Ka neih duh vang che a ni mai alawm, midang tan ka phallo che a, kumkhua a ka ta chauh ni turin ka duh che tihna te pawh ania nga "



" Mahse innei tur te chuan kan la inkawp rei loh em hi, bakah hmangaihna tello a pumkhat a insiam ringawt te chu kan daih rei awm ngut lo e mai " Ka ti niah niah a, motor a ti ding nghal dawt.




" Thla nga lai kan inzui tawh a, a rei tawk tawh viau a ni. Pasal nei rual ini tawh bawk. Chuan thil pakhat tunge hmangaihna a tello ti a? " A tih chuan ka ner nang ringawt. Tu nge sawi se a tih ni? Min hmangaih thu a la sawi miahlo a, min duh thu chauh a sawi a, chu chuan a ti chiangin ka hria, keipawh hian ka duh lutuk tawh tih chu ka hria ka hmangaih em ka hre lo.




" Ka hmangaih lutuk mah mah che hi ka â lo chauh anih hi, bialpa â neih i duh loh chuan min nei rawh " Ka chal a chal a rawn nawrh chilh chung chuan a ti sup a. A thusawi avang chuan ka khawng lah thung. Tawng mai ka tum a, sawitur hlawl ka hre chuang bawk silo. Min hmangaih tih chu ka chhunglamah hian a in thum rawn tlut tlut a ni ber.




*
*


" Mampui, naktuk chu haw ve lo in awm hlen daih mai la, dawrah min pui thin dawn lawm " Nu Ahruaii chuan a vawi enge maw zat na atan a sawi leh tawh. Zingkar atangin haw ve lo a cham turin min ti reng a, a chang leh " Bawihpuia aiin hlawh ka pe tha zawk daih ang che" Min ti thul, Teberi a la awm phei thei rih dawn silo nen. Pa Sangpuia nen chauh an awm tur chu a huphurh ni berin ka hria. Kan chhungte pangngai chu ni se ka awm hlen nghal daih duh tak tak ang, min duat ropui si.




Remruata pui tur a kal ve si hi ka tangkai lo thlawt, vawikhat pawh helam a an hotel-ah hian kan phei ni atang khan ka la kal ve lo. Nu Ahruaii'n min chang chawt a, amah Remruata lah chu a lawm ber berah ala zui emaw tih mai tur zawk a ni. Naktukah haw phei kan tum a, mahse kei chu Hmahruaia rualin ka phei ang.A ruala ka phei theihnan min la nghak ngat ngat.





Min dawr tu te ka lo dawngsawng vel te chu Nu Ahruaii chuan min lo en leh veng veng thin chu ka mitsirin ka va hmu leh zeuh zel. Naktuka kan haw dawn vang nge thil dang vang zawk vawiin chu nidang ang lo takin a zia a zawi ruih a, nu hlim thei leh tawng duh tak kha hmuh tur a awmlo.




" Enteh Mampui, In lamah thil thleng a awm nge? Ka ni saw avan nguai em em, a damlo zawk nge le? " Teberi chuan a rawn ti ve ta chiah reng a, thil thleng a awmloh thu ka lo hrilh vat.



" A damlo a ni hrim hrim? Ka va zawt teh ang, ka ngaih a ti tha lo riau,ka hriat tirh a ta sawtiang hmel pu sawn ka la hmu ngai miahlo a" Ti sep sep chungin Nu Ahruaii lam a pan phei a, customer an rawn lut bawk si nen ngaihtha zanlo chungin ka buaipui ta daih a.




" Kan inbe lawk dawn em ni ang? I hman em? " Nelawm lem loh tak a rawn titu chu Hmahruaia nu kha a ni. Keimah min be lo a maw tiin ka hawi kual a, mahse ka bul velah tumah an awmloh mai bakah keimah min melh ding ngar bawk si.




" Keimah hi maw? " Inkawk va chung chuan ka ti nawn leh ta kher a, mawl min tih hmel deuhin a meng kual ralh. Min biak a duhna tur awm ang ka ngaihtuah ngial pawn ka hre lo.



" Aw nangmah kha, in dawr piah a cafe-ah hian ka be lawk duh che " Hnial ngam rual loh hian a ti ram hmarh a, a ruk tak chuan ka hreh ru hle. An In a ka kallai nen kha chuan lei leh van ang velin a inthlau.



Nu Ahruaii te bulah pheiin Hmahruaia nu in min biak lawk a duh thu hrilh ka va hrilh a, a chhan min lo zawh chuan ka hriat bik loh thuin ka chhang a. Teberi'n a nghal a lo chhuah leh hmanhmawh.




" Hun ka neih loh avangin ka sawi tlang tawp mai ang. Ka fapa nen in inkawp tih ka hailo, mahse tun atang chuan lo hnaih tawhlo turin ka duh che. Ka thusawi hi zawm la itan a tha zawkin ka ring bawk. " A thusawi avang chuan ka hamhaih vek.




" Engtin maw? " Rei fe ka ngawih hnuin ka tichhuak thei tawk. A thusawi kha hre lo ka ni lo, ka hrechiang lutuk zawk.




" Ka fapa hi vawiin ni la la atang hian then ang che ka ti anih chu! A chiang em? Engtin nge kawp pawh ilo kawp ngam zawk ni? Inkawp tur a tan chuan in dinhmun a inthlau lutuk mah mah, nang ang chhungte pawh nei tha railo tan chuan ka fapa hi a sang lutuk i ti ve lo em ni? " Min hnuaichhiah tih hriat tak chuan a tawng fak fak a, sawi tur hre lo in ka melh mawl tawp ringawt.




" Ka fapa nen i chanchin hi ka hre kawp leh duh tawh dawn lo ania, hmeichhe fel hmel tak ini a ka thusawi hi i hriatthiam ngei pawh ka ring " A thutna atanga a kalsawn dawn chuan a ti leh a, hawichhuak lo in ka malah ka kut pahnih ka hum ngawt ngawt a, dawhkan chu ka melh reng ringawt. Cafe atanga a chhuahnu thlengin ka hawichhuak lo hrim hrim.




A hma khan hetiang hi ka lo hmachhawn tawh, Samuela nena kan inkawp lai khan Ruati leh a nu khan min duhlo tho anih kha, ngati nge hetiang hi ka chungah a thlen ziah bik tiin ka inzawt ta hial. Ka dinhmun hi ka duhthlanna ni lo in ka chung a thleng tur a ruat anih vangin vawikhat mah ka vui ngailo. Vui pawh ka tum ngai hek lo, mahse enga ti nge mi te hian inngaihzawnnaah hian dinhmun inthlau lutuk hi an ngai mawh tlat thin. Mi pahnih sum leh pai vang nilo a induhtawnna avanga inkawp tlat tluk a hlu hi kei chuan ka hre lo.



Hmahruaia nu tawng danah khan min ngaihnep zia a lang chiang hle, fahrah ka nih vangin min hmusit hle bawk. Ni e ,a fapa hi chu ka phu hlawllo a lawm, chu thil chu keipawh hian ka hai biklo. Mahse enge ka tih theih chuan ka duhna hian amah min hlat tir theilo a, ka thei ngai bawkin ka ringlo. Min pawm theih nan theihtawp ka chhuah zawk tur a ni.




♠︎ HMAHRUAIA POV ♠︎



" Ka nu... " Inchhung ka luh rualin ka nu ka au vak vak a, U Nunthari a rawn lang nghal vat.



" Ngati vak vak nge, thil thleng a awm a mi? " Hlauhthawn hmel tak hian a ti ruai a, chhanglo in ka nu bawk chu ka ko leh.



" Amak, enge awmzia sawi phawt teh bawihtea a muhil ania, iti harh ang " A rawn tih leh chuan ka in bengdaih deuh angai tih ka hria a, mahse ka nu thil tih tullo lutuk avangin ka la thinrim hle thung.



" Khawnge ka nu chu a awm? " Ka ti ta hluk a, pangpar tui a pek thu a sawi chuan inchung zawl lam panin ka tlan chho zui nghal vat.



" Ka nu eng thil tullo lutuk nge itih hi? Engvang a Mampuii lo va hmu nge i nih? " Ka tichhuak hrawk a, ka nu chu vin lo turin ka inthunun hram hram a ni.



" I bulah min lo hek vel a maw? Hmeichhe hlauhawm tak anih chu, hnaih tawh reng reng suh ang che " Atih chuan a ngaihdan leh thil in thlen dan in per san lutuk chu za lo lutukin ka nuih chhuah pui hawk.



" Tawngkam khat pawn a sawi chhe lo che, engvang a lo va hmu nge inih? "



" Ka hmu tih pawh a hrilh che chuan a chhan pawh a sawi tel lo em ni? "


" Ka nu... " Ka ti hmuk, a awmdan ngai rengin a awm a, a pangpar chu a siam tha mial mial.



Chawhnu lamah Mampuii hmu tur a ka va kalin Nu Ahruaii'n ka nu in Mampuii a hmuh thu leh an inhmu zo Mampuii let chu a zia dang sawt a a hriat thu min lo hrilh a, Mampuii ka zawh lahin 'engmah a ni lo, kan inhmu ve mai mai alawm' tiin a tang tlat a,ka zawh fe pawn min chhang tha duh der lo, min peh hel ngar ngar. A zia danglam ka tih thu ka sawi pawn a nu leh pa angaih thut vang mai mai anih thu a sawi a, chutah chiah chuan ka nu in thil sawi a nei ani tih ka ringhlel ta chiah. A chhan chu Mampuii hian ka bulah a nu leh pa a ngaih thu hi a sawi mai mai tawh ngailo.




" Min then turin iti tih sawi hlek suh ang che, a chhan chu keimah hian ka then ngai dawn lo" Ka ti nghet churh a,



" Then vang vang rawh, saw tiang hmeichhe hnuaihnung lutuk fahrah lenghal " A tih hlak hlak rual chuan ka bul a pot pakhat chu ka pet per lawp a, ka nu a rak nghal that bawk.



"Nu... I tha em? Lalhmahruai eng thil nge itih kha? " Ka nu kuah pahin U Nunthari chuan a rawn ti vin hlar a, ka ner nghal sawk thung.



" Mampuii fahrah anih thu kha sawi ri tawh hlek suh ang che, a duh vang reng a saw dinhmun a ding saw a ni bik hlei nem. Keini unau pawh hi fahrah dinhmun a ding ve thei reng kan ni tih hi hre ta che " Ka tichhuak nghek a, ka nu ka vin chu ka U in min melh kawk bawk. Ka nu hi hetiang hian zah lo takin ka la be ngailo, mahse tunah hi chuan ka hmeichhe hmangaih tan a ti ka nih mai bakah, ka nu thiamloh liau liau a ni. Mi fahrahna hre hlur siin a fa te hi chutiang dinhmunah chuan ding ve thei reng kan ni tih engvang a ngaihtuah lo nge anih?




" Ka rilru ka thlak dawn chuang lo, saw tiang hmeichhia saw ka mo atan ka pawm dawn chuang lo, vawikhat ka hmu dek dek a, i lakah vui vaina a lo thlen nghal der dan atang te hian hmeichhe tha a nilo tih hrethiam ta che " Luhlul tak chuan a ti hlawih hlawih a, ka tukhum ka tuai nghal puat.



" I duh emaw duhlo emaw i mo ala ni tho tho ang, a chhan chu ani lo saw chu neih ka tumlo. Ka hmeichhe hmangaih awm chhun leh tumahin an luahlan theih tawh loh tur a ni bawk tih i lo hre dawn nia, nakinah i phalna thlapin kan innei bawk ang " Ti dam thlupin inhnuai lam ka pan san a, min au zui lawng lawng ri pawh chu ka hre pha ruai ruai.




Ka regu loh reuh zia hi,Min lo hau bawrh2 rawh u.🤪 zan tin ka rawn dah thei tepp tawh e🤫 Buaina te hian min ngaihzawn mai bakah fanu duatlai a damlo a buaithlak😆


👇👇vawiin ah ads ila click loh chuan a hnuaia milem khu ilo click ve dawn nia🌼🌼👇👇



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)