Page 1 of 1

29th APRIL - 27 BY PAPUII SAILO

Posted: May 3rd, 2021, 10:07 pm
by Ruatpuii Sailo
CHAPTER -27 BY Pápuii Sailo



" Inthlahdul rawh " Zawi sup a a rawn tih chuan ka thaw chhuak hak a, ka tum ve lawm mahse ka tihnat ka hlauh avang hian ka hahdam theilo. Awm nuam pawn ka awm lo.




" Ka tho mai dawn " Ka tih hliai rual a a rawn meng siar siar chu ka lo en kal a, min melh zui nghal khui. " Thutphahah sawn ka mu mai ang,ti hi chuan thlamuangin ka mu theilo ang" Tim dai chung chuan ka ti leh a, a ngaihdan a nih loh hmel kher mai.




" Min ti na thamlo mu mai mai rawh " A ti nghut chu ka ner ta nang. " Nge thutphahah, hei aia chep a mut i duh zawk " A rawn tih zawm leh zat chuan ka sawi buai peih tawhlo. A luhlul zia ka hrechiang tawh a, a tih tawh chu tibur mi a ni bawk. Eng ang pawn sawi mah ila a hre lo der leh hmak ang.




Karhnih zet Damdawi Inah a awm tawh a, a hliam vel pawh a zia viau tawh. A ruh tliak vel avangin kal erawh a la kal theilo a, khumah a mu chawt chawt a, a nin tawh thu a sawi zauh zauh bawk. Rilru leh taksa harh tha vek si a kal theih loh chu ani ang pa zam tha tan chuan a ninawm duh khawp ang. Ka kalloh hlek a min rawn phone sek thin avangin ka In pakhat zawk a ni tawp rih, a chhungte mitmei pawh a ven hleih theih loh. A damloh rih vang nge a nu nen han inbakkaih kan nei ngailo a. Ka tan a nuamlo tur zawngin a khawsa ngai rihlo bawk.




Hotel atanga ka haw lam ka peng hawng a, rei fe ka awm hnuah ka haw tur min chelh bet tlat a, a chhungte bulah ka riahpui tur thu a sawi hmiah. Ka bulah 'min riahpui rawh' tih thu vawi khat pawh sawi silo a thutlukna a siam hmiah khan min thawnglo ka tih chuan dawt ka sawi ani ang, chu pawh a chhungte awm thap leh nghal laiin. U Nunthari'n a fiamthu leh thu loh a zawh lahin thutak zetin 'zanin chauh chu riak rawh se' a ti bur a, ka hnial tur min melh khui avangin a bulah zak deuhin ka thu ngawi char char ringawt. A chhungte'n a mawiloh thu an sawi pawn a hre lo der hmiah bawk si nen, an haw ta hram kha ania. Zantir phei kha chuan ka ngei lutukin ka be tha duhlo hrim hrim. Mahse amah ka ngaihsak theihna tur a awmdan a thiam lutuk, tunah pawh khum khatah insi chialin nih hi kan mut.





" Zothanpui, enge i ngaihtuah? " Lungawilo tih hriat zet hian a ti chhur chhur.





" Ka ngaihtuah maw? I luhlul zia leh patling pui si i naupan chhiat zia mawle " Ka tih chuan a hnar a tum dat.




" I awihlo mi? Tlaia i chet thin zia te kha, naktuk atang chuan ka lokal tawh miahlo ang i chhungte pawh ka hmu zak. Nupa pawh kan nih loh hi hetiang a inriahpui kual vel hi a mawilo lutuk " Ka ti hlak hlak.



" I rawn kalloh chuan Damdawi In atangin ka chhuak thei tawh tihna nimai lawm" A lo ti then chu a nakah ka piai vak, ala phu zuk zui leh nghal.



Ka tho tur chu " Thutphahah chuan mut i tum tak tak em ni? " A rawn ti ruai a , bathroom ka kal dawn thu ka hrilh chuan a thaw nghal huai.



A hliam ka khak fuh palh ka hlauh lutukna lamah ka na vekin ka hria,diktak chuan khum khata mut dun a rem thlawt lo. A dinglama mut dawnin a ban dinglam ruh a tliak a, veilamah lah a mal veilam ruh a lo ni bawk si. A dinglamah ka mu a a taksa si chetin min pawt bawk si nen a ban ka lu chungah a phar phei duai reng.





" Hmahruai, thil ka zawt ang che aw " Ka mut leh hnu chuan ka tisap a, ka sam khal neuh neuh rengin mi rawn melh chhuk vat a, a hmai zawnah ka inbeng kang nghal bawk.



" Ih... Kha thil... Ka tih awmzia chu... Ih.. Englo... Sangkimi nen... "




" I tan sawi a harsat tur zia ka hria, keimah pawh hian hreawm ka ti. Ka insum zo lo kha ka zak a, ka inten hle bawk. " A ti tawk a, a insehruh tawlh tawlh chu a biangah ka dawm sak a, a kut a lo vawn hnanin a hmuiah a nawr nghal vang vang.




" Lo va kal hmasa lo in ilo thlen hun kha lo nghak tur che ka nia. Chuan Khatiang kha kan pumpelh mai tur ... " A ti vawng vawng chu ka melh ngawt ngawt. Kha thil avang a a inchhir zia a aw ah ringawt pawh khan hai theih a ni lo.




" Mahse, engtin nge i inturah Damdawi pawlh a nih bik theih " Ka tizawi sap. He thu hi khang ni liamta chhung zawng khan zawh ka tum tawh. Mahse kan pahnih a ka duh ang hun thawl kan neih ngai loh avangin ka sawithei ngailo. Tunah hian engkim ka zawt chhuak ang a, a hnuah ri nawn leh tawhlo turin ka duh thung.




" Khami zan khan zu ka in duh loh avangin coke min pe a Sangkimi khan, mahse kha coke kha a thianpa in a lo pek ania damdawi pawlh sa in. Keiman ka in ta zawk sia, Zawng tuar ai Ngauin ka tuar anih ber chu " Nui ro hak chungin a ti a.




" Ka ruih ber lai pawhin min beisei hmasa anih loh chuan ka insumtheihna ka hloh ngailo. Khami zan kha chuan min sik hlek pawh khan ka tisa chakna a sosang lutuk kha a hnu daiah khan ka ringhlel ta a, Sangkimi kha min pe tu anih avangin a puihna in ka hrechhuak. Damdawi Inah pawh min hmuh dun kha "





"Min biak duh thu sawiin ka duhlo chung min pawt peng a, Sangkimi min pansan daih khan ka nat zia i hrethiam lo zawk ang " Min biak duh thu sawi si a Sangkimi min pansan lai kha ka mitthlaah chiang lutukin a rawn lang nawn leh a, a hunlai ang chiah khan ka na thar leh nimaiin ka hria.





" Ka tihpalh lutuk. A thleng leh tawh ngailo ang, ka hmeichhe hmangaih awm chhun ini tih hria la i natna ka thlen tir tawh ngailo ang" Thuk ruih a min melh chung in a ti ril ruih a. " Ka hmangaih che " Ka ti let ve sap chu a nui suk.




" Oppss.... Ka rawn lut hun chiahlo a ni maw " Khi sawng chunga rawn titu chu ka en vat a, Hmahruaia pawh a rawn luh hun tullo lutuk avang chuan a ner ve sak tho. Mahse kan lo awmdan erawh insiam rem a tulna ka hre chuang lo. Enge maw rawn tih a tum reng reng ni?




Inthlahrunna nei miahlo a a rawn pen phei chu ka lo en reng a. Lo lawm hluai pawh ka tum lemlo, lawmlo mah ila a rawn lut tho tho dawn. Ringtu hmasa kha a ni tawh miau a, zahna hi a dictionary-ah a awm ve tawhlo.






" Enge i an a? " A rawn ti hawr hawr chu " A tha tawh na a nei tawhlo a damdawi mumlian ka awm hi " Ka lo tih khalh hmiah. Kha thil thlengah khan Hmahruaia'n a thil hriat min hrilh mah se a hnu thleng a ka lak a inthlahrun a hnekin a intithei zawk a maw tih tur a a awm avang te khan ka la haw tho. Hmahruaia hi a la beisei reng tih ka hre ve kar bawk nen. Tu hmeichhia pawhin an ngaihzawngte lo hel ve sektu hi an be tha thei bikin ka ring lo. Chuan kha thil thlengah khan a tir ang bawk khan amah hi rinhlelhna ka la nei ru tho.




Hmahruaia be zawk mah se, Hmahruaia a tawng tha peihlo tiin keimah zelin ka chhang a, Hmahruaia lo nui ru leh suk suk thin chu ka sik vak zel. Rei pawh awmlo in a chhuak ta thuai.




" Zan tin a rawn kal ziah em khanu kha? " A chhuah rualin ka ti nghal hlar a, a nui ri hawk chu a nak nemah ka piai leh vak.




" A duty zan te chuan rawn kal zeuh zeuh e " A ti bui bui



" A rawn kal leh hunah pawh tun ang chiah khan be reng reng suh ang che "


" I thu vek alawm Habibi "


" Naupang fel lutuk, muhil tawh rawh le... " A lu chul sak zeuh pah a ka ti chu a nui chhuak leh hawk.



" Khatiang em em khan i ngeiawm thiam tih ka hre miahlo " La nui reng chung chuan a rawn ti a, ka nui ve ta hak.



Mi hi ka hua in ka ngei mai mai ngailo a, ka vawikhat huat tawh te chungah erawh ka sualthiam thei lutuk. Middle school kan kallai pawn kan junior ka tawngkam ringawt avangin a tap pur tawh.Khami hnuah khan tun hi a ni leh tawp mai.





*


A nitelin Hmahruaia pawhin hma a sawn ve zel a, apa leh u Nunthari te nufa phei chu an phei tawh. Anu erawh hringtu nge nge a ngaih a ngam thei nganglo a, a la awm ve thung. Damdawi In atangin a chhuak tawh a, inchhung dungah chuan zak dawm tiang nen chuan a kal ve thei sawlh sawlh tawh.




"Nge maw ka awmloh velah an tih le, ka kal ve chak tehreng nen " Dingpuii rawn vui nuah nuah chu ka nuih liam vel mai mai.



" An dinhmunin a zir tawhlo a lawm, zir se chuan tun su suah an ti bik tawp nang " Ka tih let chuan dik a ti ve leh tho sia.




Vawiin hian college kan kallai a kan batchmate te perfect couple ti hial a kan sawi thinte an innei dawn a,kan batch ho min sawm ngun ngawng ngawng hle bawk. Mipa ho in Dingpuii tel ve theilo chu whatsapp group lamah an intihtheih khum zuk zuk a, a rawn vui nuah nuah zel.




Kohhran dan thianghlim ngeia an inneih kan rin vek lai a dan thianghlim an tlin tawhloh thu an sawi khan mak kan ti em em vek. A chhan pawh Kohhrana inhmang lutuk ve ve an ni a, tamtakin an inngaihzawn dan kha a nawm hmel kan ti thin. Thian ang chiahin an inkawm a midang bulah inngaizawng riau ang chi khan an khawsa ngailo.





Palai an tirh vek tawh hnuah an lo che sual dun hlauh a, huaisen takin an chhungte bulah an sawi tlang a. Dan té a innei tur ni mah se mi tamtakin Dan thianghlima innei thenkhat aiin an ngaisang zawk. Keipawh hian an huaisenna chu ka ngaisang tak zet, a chhan chu lan mawi duh vang chauh a, Kohhran dan thianghlima innei hi an tam tawh lutuk tlat. Dan puitling a an inneih zawh hnu lawk a, nau thla thum mi a chhiat tih sawi tur an awm leh zauh zauh thin.






An inneih thu chham lai chuan ka ngaihtuahna a kal thui kher mai. Hreawm lai leh bawrhsawm lai pawh a tih tiam tel si a vawikhat inhauh hlek pawh mahni in lama haw tum nghal zung zung te, Mahni in ang a nuam a awm tum tlat avang a pasal te chhungte nen a inmil theilo te hian mo nihna in a ken tel hi an hrechianglo niin ka hre thin. Pasal kan nei ngam anih chuan hreawm kan tuar ngam tur a ni tih hi ka ngaihdan a ni ve tlat. Mahse a lutuk ang chi leh kut inthlak dawt a inpuh tih vel erawh a dan a dang leh daih thung.




" Zothanpui.. " Ka piah deuh atang a rawn ti lawng lawng tu chu Ramenga a ni tih a hmel hmu lo pawn ka hre nghal. Min hmuh apiang a a ram reh au pup pup zel hi a sim thei thlawt lo.



" Ramengmawi,hmeltha i hmuh hian kha tin au lung lung ziah suh " Ka bula lo thlen rualin ka ti hlak a, midang ho an lo nui dar dar.



" I hmelthat vang alawm hman atanga tun thleng a ka la át kal tluan zel ni "in la zei fahran chuan a rawn ti a, a nui duh miahlo leh nghal.





" Chocolate whole sale a pek tham a lei hman hrim hrim che " Hmingmawia'n a lo tih zauh chuan a ban a ri nghal tawlh. Ka nuih a za ta hle thung. College first year atangin min bem char char a, valentines day phei hi chuan rose hi min pe ngei ngei zel leh nghal. Mahse a mi ze thaw veng lutuk vang hian ngaihzawng tur atan ka ngaihtuah chhin ngai lo.




Tlaiah Mo neitu te in lamah chawhlui kil tur an tih avangin kan kal vek a,kan awm khawm deuh laih zel a, theme kan nei thlap bawk nen min en dauh dauh thin tawk an awm.





" Ramenga chu inthlah tir mai rawh, a rem ber " Fiona-i'n a tih chuan mipa ho an lo phul hlut a, ka nuih pui mai mai. Ramenga hi kan veng piah chiah a awm an nia, a rem ber tak tak a, ka hnial ta lem lo.





Bike ka lawn dawn tep tihin ka phone a ri leh a, Hmahruaia a ni tawh hrim hrim ang. Ka kal hma deuh a kan inbiak bak kha kan la inbe miahlo. Mahse ka beisei lo deuhin number hlang ringawt zawk a ni. Ramenga'n min nghak bawk si nen ka chhang ta lo law law.




" Rameng, venglaiah min drop mai rawh aw " A hnungah ka thut rualin ka ti a




" Iauuu boss i rim haw dawn mi? Enge a an tak zel ? "




" A zia chho tawh lutuk " Hmahruaia nen kan inzui tih a hriat dan zawh ka tum zet a chu tlangkam titi atangin a hre ve ah ka ngai hmiah. SP hial a ni bawk nen a chanchin hi mipui ngaih ven a ni a, kan inkawp tih te chu hre hneh tak an ni.




Pengah min drop mai dawn maw ka tih laiin a tlan chho zel a, quarter kawtah min drop ta thlap. Lawmthu ka hrilh luam hnuah a tlanlet leh nghal.




" Tunge rawn thlah tu che kha? " Ka lut chiah tihin sitting room a lo thu khar pa chuan a lo ti rum ul a.




" Ka ex anih kha " Ka tih fiam chuan pakhat chu a lo meng no lo hle.




Ka pheikhawk bun chu hlipin ka thu thla ve nghal zat a, ka ke ka tuai zui nghal hauh hauh. Nileng deuh thaw a pheikhawk sang bun chu mahni inhremna lian ber a ni ringawt. A heel sin kher ka lo bun bawk si nen.





Rei vaklo ka awmhnuah Remruata'n ka thlah pah ang che a tih avangin a rualin ka hawng ta nghal a. Ka tibuai ngun lutuk hi ka inthlahrung tawhlo zawkin ka hria.



" Ka zawng tawhlo mai dawn " Ro halh a a tih chuan ka en vat a, kawng lam a lo en ngur.



" Mahse... Phirte kha... "




" Ka fa ani tih hre reng chungin ka lakah a zep a, ka zawnchhuah theihloh turin a awm zui hmiah bawk a. A fate pa atan min duhlo tihnaah ka ngai mai. Chuvangin ka buaipui zawm tawh dawn biklo " A ti charh charh a, mipa a ni a beidawn san tum a a rilru a siam tawh anih chuan a beidawng hle tawhah ka ngai. Han puih vak ngaihna ka hre bik silo nen.



" I thutluknaah i inchhir loh ngei ka beisei " Tih zawng ka sawi.





♠︎ Hmahruaia Pov ♠︎




" Dawt ka sawilo,i fa ngei alawm ka pai, thil thleng te kha i hre tawh lo em ni? Nge hriatchhuah tir tur che in kan tinawn leh dawn zawk " Sangkimi au tawn tawn chu inhumruh teuhin ka melh a.




" Mama, enge ni vak vak a? " Ka room kawngkhar rawn hawn pahin ka nu in a rawn ti a, Sangkimi au ri kha a hre ve pawh a ni mahna.




" Nu Mathan ka ti harh che mi? " Felfai deuhin ka nu chu a be leh lawi si.



" Engthil nge thleng a tun ang zantlai tawhah leh nghal? " Ka nu chuan a ti a. Sangkimi nen chuan min melh tawn zak zak bawk.




" Nu Mathan i mo atan min duh kha, tunah hian thu lawmawm ka nei ania " Nui var var chung a ka nu hnena a sawi chu ka ner nawk.



" Enge i sawi awm zia? "



" Hmahruaia fa hi ka pai a" A tih rual chiahin ka thaw chhuak kawk a, ka nu a meng phawk nangiang bawk.




" Mama, engthil nge Sangkimi sawi hi awm zia ? Chuan fa pai maw...? Mahse Mampuii... Thil awmzia sawi chiang vat teh u " A ti buh nuai a. Ka ngawi reng thung. Sangkimi'n hotel a thil thleng vel te atangin a sawi zar zar a, a sawi ber erawh engmah ka hre lo. Ka hriat awm chhun chu Mampuii laka ka inthiamloh lutuk vang a ka kaw chhung na kual rawih rawih chu a ni.




" Mama, eng thil nge thleng hi? " Ka nu chuan a ti hap a, a thu hriat chuan a thawng hle a ni mahna, a hamhaih zia a aw ah a lang chhuak hial.




" Sangkim va haw phawt teh " A tih chuan Sangkimi chuan enge mawni hi a sawiin a phun nghal sup.




" Mama thil awmzia sawi teh, Sangkimi thusawi kha a dik em ? "



" Nu, ka chhuah lawk angai, Mampuii ka va hmu lawk ang " Ti phutin ka shirt khum sir a let reng chu ka ban nghal thak a.



" Mahse... Engtin chhuak chi pawh ila nih loh kha mawle? " A rawn ti ruai. Mahse Mampuii ka hmuh nghal ngei ngei angai, kha mihring zah pah neilo lutuk khan a lo va kal chilh duh mai ang. Zanin ngei ngeiah keiman hmaichhanah ngei ka sawipui angai.




" Nu, min ngaihtuah suh. " Ti supin ka room atangin a ka bai chhuak auh auh a, engpawh ka chungah thleng dawn se zaninah hian ka kal ngei ngei a ngai.




Bolero chahbi chhuar a mi chu ka ban vut a, pawn lam ka pan nghal a. Mahse kawngka ka hawng chiah tih a Sangkimi thusawi vang chuan ka ding chawt.




" Vansangkim, eng thu maw i sawi tunah khan ? " Ka tih hrawk rualin a vir nawk a, a phone lei charah a thlauh nghal bawl a. A mitmeng a tlanchhe nghal ruai.





Simeikhu ka ni ringawt a lawm le😂😂