His Love Chapter 6 by Elyseen

Episode kal lai dah luhna

Moderator: writers

Ely Seen
Posts: 13
Joined: May 6th, 2021, 5:03 pm

His Love Chapter 6 by Elyseen

Unread post by Ely Seen » May 14th, 2021, 3:57 pm

His Love
Chapter 6
by Elyseen








Mia POV

"Aiden, min ko em ni? " Closet-ah lutin Aiden insiam lai chu ka thlir reng a, ka thawmhnaw thlan sak a ha tih ka hmuh rual chuan ka chhungril thleng hian a hlim veng veng mai. A ha duh lo ang tih hlauh vanga pindan chhuahsan daih kha ka ni reng a.

"Dawhkana box kha hawng rawh. " A mitin a enna lam chu ka hawi a, darthlang bula dawhkan hniama box awm chu ka la kang nghal a.

"Tinge? " Tia Aiden ka en chuan a kekawra a kamis hnawh lut pahin a mitko a san ak duh chauh. Min chhan tak loah chuan box chu zawimuangin ka hawng a, box chhunga thil awm ka hmuh chuan mak ti deuh takin Aiden chu ka va melh leh a.

"I ta tur a nih kha. " A tih sup phei chuan box chhunga thil awm bawkah ka mit a fu lehnghal. Tunlaia phone chhuak thar ber min pe a, ka ta tur a ti lehnghal.

"Phone ka nei reng alawm.. "

"Mia, i nei lo ka ti hleinem. I ta a ni tawh a, hmang rawh. " Ti leh nghutin min rawn din hnaih a. A sam chu uluk taka khawih vel a ni lo tih a thur em em danah chuan a hriat mai. A chhem ro ringawt a nih dawn hi.

"Mahse.... "

"Necktie I suih thiam em? " Ka sawi zawh hma chuan a tie awrh tura ka lak chhuah chu ka hmaah a rawn lek kang a. Box chu dawhkana dah thlain a tie ken lai chu a kut atangin ka la.

"Ih... Rawn kun la. " Ka tih sap chuan a rawn kun ve mai. A nghawngah tie chu batin ka din hnaih a, ka suih lai chuan ka kut a khur der der mai. Min en reng avang chuan ka hawi chhuak ngam lo hrim hrim.

"Tet hi hrehawm i ti em? " A thusawi avang chuan ka en chho ha a. A hmel ka hmuh chuan ka nui nghal hak. Amah leh a thusawi chu a inhmeh hlawl lo.

"Nuihzatthlak ka sawi em ni? " Tia min melh run phei chuan ka nuih a za zual sawt. Insum zo lovin ka nui hak hak a, ka mittui a tling pur thei hial.

"Ih.. I thusawi leh nangmah i inhmeh lo em alawm. " Ti sapin a tie chu ka suih zo a, tawlh sawn ka tum rualin ka kawngah a rawn kuah nghal chawt.

"Ka zawhna i la chhang lo. " A tih leh nghut chuan chiang takin kan inen ran a.

"Aiden, ka te hran lo. Nangmah hi i sang mah mah zawk alawm... "

Ka thusawi avanga a mitko san akin a rawn kun hniam a, eng nge a tih dawn ka hriat avangin maimitchhingin ka lo dawh a.

"Mia, eng nge ti tura min duh. " A âw a nuihzatna ri tel avang chuan zak lutukin ka meng nghal a, ka tal ak a, min thlah duh bawk si lo. Ka zak lutuk chu a hmel pawh ka en ngam tawh lo. Tinge tihian min tih ziah? A va han sual mai mai tak.

"Min thlah rawh... "

"Nizanah min mut san a... " A tih chuan tal tawh lovin ka tawp chut a.

"Ilo haw har em alawm.. " Amah en duh lovin ka kun tlat a.

"Zanin chu min lo nghak ang tiraw...? " Tiin min kuai dak nghal a.

"Um..... " Ka tih sap rualin a rawn kun hniam a, ka hmui chu duhthaw takin a rawn fawp nghal. Keipaw'n a nghawngah kuah let vein ka fawp let ve ngar ngar a.

Kan inthlah rual chuan thaw deuh ham hamin a chal leh ka chal a insik tir a. "Zaninah min lo nghak rawh aw... " ti leh supin ka biangah a rawn fawp zawk a, ka kawnga a chelhna chu a thlah nghal a.

"Breakfast ei ila.... " Ka sam ka benga zep paha ka tih chuan ka kut a rawn vuan a, a kut lehlamin a tie chu a khawih a.

"Tie suih i thiam hle mai. "

"Home-ah khan kan zir thin alawm. "

Inhnuaiah kan inzui thla a, breakfast tuihnai tak kan kil dun a. Kan boruak chu a nuam dangdai takzet. A chhuak tur chu ka thlah leh thlap bawk a, a ngai te bawkin a rawn hawi let leh chuang miah lo.

Pi Emily thusawi kha ka hre reng a, Aiden hi ka duh vanga nei ni lo mah ila hun kan hman dun hnu hian a laka ka rilru put hmang ka thlak chho ve bek bek a. Ka ngaina tawh a, a bula awm nuam ka ti tawh viau bawk. Ka hriat reng chu a ni hi ka pasal a ni tih hi. Mad Swing-ah khan hlau mah se keimah vangin a chuang a nih kha. Ka ngaihtuah let pawh hian ka nuih a la za zawk. Ka nuam tih zawng min tihpui a, keipaw'n ka rul let ve ngei tur a ni tiin ka inngaihtuah a. Tukin khan a inbual hlanin a thawmhnaw hak tur ka lo thlan sak a, engmah sawi lo va a ha ve mai te kha ka lawm takzet. Nupui ka nihna angin ka pasal thawmhnaw hak tur thlan sak chu ka tih tur a ni a, ka ti zel bawk ang.



"Pi Emily, he inah hian engtia rei nge i thawh tawh? " Pi Emily chu thingpui in puiah ka sawm a. Inchung hall-ah kan thu dun a.

"Kum 20 ka thawk tawh. "

"Aiden naupan lai atangin maw...? "

"Aw, a nu hnuaiah ka thawk thin a... "

"Oh.. Aiden nu leh pa chanchin hi ka hre ngai miah lo. " Ti sapin ka thingpui chu ka in a, thingpui hi ka ngaina ngai miah lo va, mahse Pi Emily thingpui siam erawh tui ka ti viau thung. Nitin hian ka in ngei ngei thin.

"Aiden hian tuma hriat a duh lo. " Ka va en chuan a thingpui no keng kangin min en ve reng a. Engvanga mi hriat duh lo nge a nih le, a hma khan a chanchin hi social media velah ka zawng chiam tawh a, a hlawhtlinna, hmelthatna leh hauhsakna bak chu hmuh tur a awm meuh lo. A chhungkaw chanchin mai bakah an chhungkaw thlalak takngial pawh a awm lo.

"Tinge...? " Hre chak lutukin Pi Emily thusawi tur chu ka ngaithla kar a.

"A nu hi a thi tawh a. "

"A ni maw? Tinge engmah a sawi loh le? Engvanga thi nge a..? "

"Mia, min hrethiam la, Aiden hnen atang ngei hria la ka duh a ni. " Pi Emily-in min zah hmel taka a tih chuan zawh luih chi niin ka hre ta bik lo va.

"Awle, ka lawm lutuk e. " Tiin ka nuih seih a. Thingpui kan in zawh hnu chuan no chu sengin inhnuaiah a chhuk lehnghal a. Keimahin chu hall zau takah chuan ka thu ngawi ran a. Aiden nu chu a thi tawh a, mahse khawnge a pa hi a awm le? Kan inneih khan a nu leh pa an rawn lang bik miah lo va, a hun lai kha chuan ka rilru ka sen peih loh bakah Kaitlyn chauh ka ngaihtuah avangin ka lo ngaihven ngai lo va mahse tunah erawh ka rilru zawng zawng hi Aiden hian a luah khat ta emaw tih mai tur a ni.






"Mia, pangpar thar a rawn thleng a, a rem fel dan tur hi i rawn en dik duh ang em? " Jessy chu ka melh vang vang a.

"Mia...? " A rawn tih leh rual chuan harh chhuak thut ang mai hian ka awm.

"Aw.... " Mit khap fak fakin ka ding a, Jessy chu ka en a, a nuih sang chuan nichina a thusawi kha ka hrechhuak nghal.

"Aw, duh e. Ka lo en ang... " Ti zung zungin ka kal nghal a.



Aiden chu zanriah kil hunah a rawn thleng a, kan pahnihin kan kil dun a. Wine tui tak kan in dun bawk a, a nuam takzet.

"Aiden, phone hi ka mamawh lo takzet. " Box atang pawh chuan la chhuak duh lovin Aiden chu ka en a, couch ah hahdam taka thuin min en a.

"Mia, i duh loh chuan i paih thei alawm. " Nui suka a tih chuan ka ner sak thung.

"Ka paih phal teuh lo.. " Ti ve hmukin box chu ka hawng a.

"A nih chuan min hnial tawh lovin hmang rawh. Mahse.... " Tiin a bula couch-ah chuan thu tur in min mitmei a. Thuawih takin ka thu ve leh mai.

"Eng nge...? "

"Comics chhiar nana hman chu ka remti lo. "
"Engtinnge comics ka chhiar thin tih i hriat? Nilo, chu chu a pawimawh lo. Comics ka chhiar lohin nilengin eng nge ka tih ang a...? " A thusawi avanga beidawng lutuk chuan ka en reng a, comics chhiar leh zel min khap sak a nih chuan khawhar luatah ka thi thei hialin nia ka rin ni.

"Mia, phone a comics emaw thil dang pawh chhiar vak vak hi a hrisel lo. " A âwki dam thlup avang chuan ngenngawl takin ka va en a.

"Nangpawh nilengin computer hmaah i thu ve tho. " Titau âw taka ka tih chuan a rawn nui suk. Ka hlimna neihchhun hi chu ka tihtawp tir dawn lo a ni tawp mai...

"Keichuan pawisa ka thawk chhuak alawm.. " A ti awlsam et a.

"Khawhara thi turin min duh em ni? " Ka sawi zawh rual chuan ka inchhir nghal. A mitmeng nichina dam thlup kha a bo hmak a, hrehawmna emaw thinrimna nge a mitmeng chu ka chhiar thiam lo.

"Mia, vawikhat mah 'Thi' tih tawngkam hi i hmang tawh tur a ni lo. " A tih chan fak chuan ngawi rengin ka lu ka bu a, reiloteah a hmel chu rawn inthlak leh vatin nichina nelawm tak kha a ni leh der tawh. 'Thi' tih ka sawi avang khan khati khawp khan a danglam a maw...?

"Mia, engtikah mah nang hian min kalsan dawn lo, ka phal ngai dawn lo. I hrethiam tiraw...? " Ka kut nghet taka chelhin ka mitah chuan min en kal a.

Ka lu ka buk chuan a duhthu a sam lo a ni ngei ang "Tawngkain min chhang rawh. " a ti sup a.

"Aw..... " Hlim hmel taka min enin a ding a. Keipawh min pawt dingin kawngka lam chu min panpui ta mai..

"Eng nge kan tih dawn? " Tiin ka ding a.

"I khawhar loh nana tih tur ka hrilh dawn che. "

Pindan atang chuan min kai chhuak a, hall kal pelin pindan pakhat zawkah chuan min luh pui a, light a on rualin ka boruak hip luh chu ka thaw chhuak nghal hawk. He hmun hi library tihna em ni?

"Nilenga tih tur i hriat loh chuan in hi fang kual la tih tur i hre mai tur. " Mawl min tih hmel zeta min en chuan ka ner sak.

"Ka tuina lam a ni lo a ni mai. " Min kaihna kut chu la thlain ka kut ka kuangkuah a.

"In fan kual nge, lehkhabu chhiar zawk.. " Ka beng bula a rawn phun sap chuan ngei lutukin ka en a, nui sukin ka biang a rawn piai zawk.

"Tah hian i hun i hmang thei ang... " Pindan chhung lehkhabua khat chu thlek kualin lehkhabu chu lak mai ka tum a, ka kuta a rawn chelh rual chuan eng nge tih melhin ka melh a.

"Naktuk atangin le.. Zaninah chuan tihtur dang kan nei. " Ti nghutin pindan atang chuan min kai chhuak lehnghal a. Lehkhabu rim kha ka hnarah a cham veng veng mai.

Kan pindana kan luh rualin min fawp nghal tawn tawn a, ka thawmhnaw hak chu ning tih hriat takin a hlim chho kawk a, awlsam takin min phelh sak nghal. A thawmhnaw pawh hlipin khumah chuan min nam mu a, panty leh bra nen chauh chuan a ka mu ran a. Ka taksa chu a thlek vang vang phawt a, a mita a enna vang ringawt pawh chuan ka za mer mer thei hial.

Rawn kun hniamin ka hmuiah bawk a rawn bur leh chat a, min kuai herin ka bra kilh chu a phelh a, chhuatah a theh thla nghal. Ka hnute chu dim lo takin a tham nawk nawk a, na tih chu sawi loh nuam ti lutukin ka lo thaw ham ham thung. Ka hmui atanga a hmui la sawnin ka awm zawnah a hmui a chuktuah a, ka hnute hmur a rawn hmuam rual chuan ka ip nghal awk.

Duhtawka ka hnute a khalh hnuin hnuai lamah a insawn thla zel a, ka panty hak hlipin ka kap karah tak chuan a hmai a phum nghal a. A hmui leh lei hmanga ka hmeichhiatna a rawn deh meuh chuan khur deuh hlawkin bedsheet ka hmer ngar ngar a. Ka taksa chhunga a rawn luh chuan nuam ti lutukin a tana remchang turin ka lo mu vat a. Vanram tlafual ngei mai chu kan fang dun a.




__________________________________________

"Doctor, a kut a tiche chiang alawm. " Doctor in Kaitlyn-i a endik lai chuan a sirah zam takin ka ding reng a. Nichin lawk khan a kut zungtang a rawn tiche a nih kha.

"Hetiang hi chu thil thleng ve thin a ni alawm. A dinhmun erawh a la ngai reng e.. " Doctor in a tih chuan ka hnual nghal rawih. Beiseina sang tak ka nei kha a ni si a.

"Awle, ka hre thiam e. " Ka tih sap chuan Doctor leh Nurse chu an inzui chhuak a. Kaitlyn hmel dang bel chu ka en vang vang a, engtikah nge maw rawn harh a tum le? Tinge hetianga manganga min siam mai le.



"I thupek angin Doctor chuan a ti e. " Jose phone hmang thawm ka hriat chuan chhuak mai lovin kawngka bulah chuan ka ding a. Chhuak mai tur ka nih laiin eng emaw hian min mawlh a, a thusawi chu ngaihthlak ka chak tlat.

"Ka hre thiam e. Miss Mia chuan a hrechhuak lo vang. " Kawgkhar hawnna chu ka vuan nghet sauh a, eng thil nge ka hriat chhuah loh tur chu? Eng thupek nge a sawi? Jose hian tunge a biak??



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)