TOXIC_LIPS Chapter - 35 By : Msi (Hmeichhe Naupang Tereuhte)

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

TOXIC_LIPS Chapter - 35 By : Msi (Hmeichhe Naupang Tereuhte)

Unread post by Msi Miluhlulnui » May 14th, 2021, 9:13 pm

TOXIC_LIPS #CHAPTER -35

By : Msi (Hmeichhe naupang tereuhte)

rps20210514_211124.jpg
rps20210514_211124.jpg (28.71 KiB) Viewed 1455 times

Damdawiin ațang ka chhuak a Biakin hnai ber lam chu ka pan tawp, ngawi rengin ka kal a Biakin kawt ka thlen chuan ka ding tawp.



Mi an awm tih hriat zetin kawngkhar alo inhawng a gate awm chu vuanin Biakin chhip chu ka en chho vang vang a "eng nge ka sawi ang" tiin ka phun chhuak sap.



Gate chhungah chuan ka lut a step chu rap chho in kawngkhar lam chu ka pan a ka ke pên te chu an sak in kal harsa ka ti ngawih ngawih mai. Mahse ka pên lui hram hram a kawngka bul ka thleng chu ka thaw chhuak ham ham.



Ka chapal bun chu phelh in Biakin chhung chu ka rap a, kum tam tak hnuah tih chu ka rilru a thu rawn lang hmasa ber a ni. Ka kut chu suih tawm țât in hmalam pan chuan ka pên zela ka hawikuala mahse tumah reng hmuh tur an awm lo. Lamtual ka thleng a zâwi muang in ka țhingțhi thla a.



"Min laksak suh aw" tih zawng ka sawi thei a nih chu!.



Ka mamawh ka hria mahse dil dan erawh ka thiam lo a han sawi tur lah ka hre hek lo! Eng ațang nge bul ka țan ang ka hrelo a thu han phuh chhuah tur mai pawh ka van hrelo tak em!.



Ka dilna min ngaihthlak sak lo in Zorema hi min laksak tho ang em le. Khatiang khawp a amah hua a ka ngaihsak loh avangin ka lakah phuba a la ang em le?. A hming pawh ka kâ ațanga a kum a kum a chhuah tawh loh dilna chu min ngaihthlak sak lo ta se.



Amah ka hlat avangin ka țawngțaina chu lo chhang lo in a hremna atan Dr. Zorema hi min laksak ta se engtin nge ka tih ang?.



"I țha maw Bawihi" putar aw ri ka hriat chuan ka hawi chhuak a amah hrelo mah ila a hmel hmuh a nuam lutuk ringawt.



"Dil dan tur ka hrelo" ka lo ti ringawt, tun ang em em a ka rilru a mang a sawi tur engmah ka hriat loh hi ka la hrelo takzet, ka hlau a engtiang pawn dil ila hremna atan min laksak tho ta si se engtin nge ka tih ang?.



"Ka mamawh chu ka hria a mahse thu sawi tur ka hrelo thu thiam tak ka ni lo.. ka... ka tih awmzia chu sawi dan tur ka hrelo. Ka țawngțai lohna chen pawh ka hre tawh lo a.. ka.. sawi tur ka hrelo" ka tih chuan ka bulah a rawn țhingțhi thla ve a ka lo en reng.



"Amah be tur hian thu thiam tak nih a ngailo bawihi, thu thiam tak in ti te pawh hian an mamawh an thlen thiam lo fo țhin. Eng nge i chungah thleng a eng nge i tawn ka hriatpui lo che mahse amah ah rinna nghat la a lamah rilru pe la thu tam tak sawi a ngai lo asin" a rawn ti a, a enna lam chu ka en ve a.



"Ka... ka hrelo, ka thiltih pawh hi eng nge a nih ka hrelo takzet. Ka... lo dil ta pawh ni ilang ka thiltih avang te khan min lo ngaidam duh lo in min țanpui duh lo ta se min laksak tho si se engtin nge ka tih ang?" beidawng zet hian ka ti a, ka mangang ta lutuk hi sawi ngaihna pawh ka hrelo.



"Bawihi, Rinna nei rawh. Bible pawn ti hian a sawi kha I Johana 1 : 9-ah chuan *Kan sualte thupha kan chawi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni.* tiin" a rawn ti a.



Chhang lo in ka kûn ngal ringawt. Pathian thu hi ka hrelo, ka hrelo tak tak. Tuna a sawi te kha ka vawikhat hriatna, Bible pawh keu ngailo mihring hi min țanpui duh tho dawn em ni..?



"Ka pu... kei ang misual dilna te chu min chhansak ve dawn em ni?" ka ti leh ringawt. Ka hlau a ni, ka hlau ngawih ngawih ka dilna te min hriat sak lo in Zorema hi min laksak ka hlau.



Ka hria alawm, a hma khan amah hlat zawngin ka khawsa tih ka hria a duh loh zawng tam tak pawh ka ti ang a mahse chumi hremna chu ka thlen a nih ang in keiman dawng vek ila pawi ka ti lo. Mahse Zorema hi chu min laksak lo hram turin ka duh takzet a ni.



"Bawihi, a mite țawngțaina chu a ngaithla in a hre reng țhin. Rinna nei rawh kan Pathian hi a țha ania, i kut min lo pe rawh le" a tih chuan ka pe ve mai, alo vuan vat a.



"Kan pahnih in țawngțai ang aw. Maimichhing la ama lamah i rilru pe la" a rawn ti a, a maimichhing chu en in ka maimichhing ve a ka thaw chhuak ham ham.



A țawngțai a mahse kei erawh chuan engmah ka sawi ve theilo, țawng chhuah ka tum a mahse chhunglam ah hian eng emaw hian min hnawh ut ut a ka țah a rawn chhuak ringawt pek. Chupa kut chu nghet zetin ka vuan a ka kâ ka ân zuai rual chuan ka biangah ka mittui a rawn luang thla ringawt.



Ka țap khur ngar ngar a ka mittui ka dang theilo "khawngaihin" ka ti chhuak țiau.



Ka kut chu lah in ka âwm zawnah a pahnih in nghet zetin ka suih zawm a ka heh pet fan fan in ka inhrût leh hraih țhin.



"Khawngaihin, ka pasal hi min laksak lo hram rawh. Ka.. ka hria lawm ka sual in khawlo tak tak in ka nung țhin tih ka hria nangmah vang a ni tih sawiin dem pawh ka dem fo țhin che tih ka hria. Mah... mahse khang zawng zawng avanga hremna min pek tur chu keima chungah ngei min pe hram rawh khawngaih takin ka pasal hi min laksak lo hram rawh" zâwi takin ka phun chhuak sep sep.



"A tello chuan ka nung theilo ang. Aih... a nih loh pawn a nunna min zuah sak la ka nunna hi la zawk mai rawh. Kei ai chuan dam a phu zawk takzet asin..." engmah ka sawi zawm theilo ka țap khur ngawt ngawt a a bak engdang mah sawi tur ka hrelo.



"Engkim ti thei Pathian inih takzet chuan khawngaihin ka pasal nunna hi min zuah sak hram rawh ka ngen a che" ka hriat tawk lek chuan ka phun leh sap.





Ngawi rengin Damdawiin lam ka pan leh, kha putar nena kan titi dun lehna kha ka ngaihtuah phei neuh neuh a ka harsatna hrilh hre lo mahila a thu min hrilh te khan min hnêm ve em em a ka awm pawh a nuam ve em em ringawt.



'Ila tlai lo ania Bawihi, mi chak tak inih kha, engtik ai pawh in Lalpa chu i lamah a țang reng ania. Engtik lai mah in a theihnghilh ngai lo che a a kalsan ngai bawk hek lo che. A siam mihringte hian alawm kalsan zawk fo țhin' min ti a nih kha.


A Bible chang min hrilh pawh ka la hre reng.



*Philipi 4 : 13 - Min tichaktuah chuan engkim ka ti thei a ni.*



Damdawiin kawt a Zorema pa lo vai thauh thauh chu ka hmu a a thim lek lek tawh "pa" ka ti sap, ka aw hria in a rawn hawi a min rawn pan vat a ka chhuah ngawt vang khan min ngaihtuah a ni ngei ang.



"Ka lawm e Lalpa" ti a a phun sap chu ka hria a.



"Engmah sawi lovin i chhuak ngawt bawk si a ka ngaihtuah che alawm" tiin ka bulah chuan a rawn ding a "ka țha lawm" ka lo ti ve sap, ka kutah chuan a rawn vuan a "i kut te hi a hit lutuk ringawt Bawihi, inchhungah lut vat teh ang khai i nu pawn a ngaihtuah teh mai che ania" a tih chuan Damdawiin lam kan pan zui nghal a.



"Khawnge i kal a?" A rawn ti a.



"Biakinah" tih te maiin ka chhang a.



"Ka țawngțai a Pathian hnenah Zorema min laksak lo turin ka dil a. Nangpawn i sawi kha engkim tithei Pathian a ni tih, mahse pa kei ang misual lutuk amah ngaihsak lo leh a tello a hringnun hmang țhin in țawngțai a a dilna chu min ngaihthlak sak ve ang tiraw?" Ka ti sap.



"Ka inchhir takzet bawk" ka ti zui leh a ka thaw ham ham.



"Bawihi, a mite țawngțaina chu a ngaithla in a hre reng țhin" tiin kha putar sawi ang chiah kha a rawn sawi ve leh a.



"Lalpa chuan thinlung lungchhia te chu a hnaih țhin a, rilru a inchhir apiang te chu a chhandam țhin (Sam 34 : 18)" a rawn ti leh a, ka chhang tawh lo hrim hrim.



Cabin kan thlen chuan Zorema nu te chuan min ngaihtuah thu an lo sawi sap sap a mahse ka nuih ringawt thung. Zorema pawh a ngai ang chiah in alo awm leh a ka rilru a na thar leh ta ngawih ngawih a min kalsan mai ang tih hlauhna bawk in min rawn chenchilh leh ringawt tawh bawk.




Tunah chuan in lama in enkawl turin kan in la phei tawh a Doctor leh Nurse pawh an awm thlap a, hunâwl a neih chang apiangin Tc-a pawh alo kal țhin a a awmpui ve chawt țhin.



Khami hnu ațang khan a ngai ang bawk in hmasawnna a awm lo a kan nitin nun hmandan chu a ngai vek a han danglam eih pawh a awm lo reng reng.



Mahse kei hian țawngțai ka ching leh ta zeuh țhin, zanah rei tak ka men phei chuan Zorema kut vuan a țawngțai ka chîng a beiseina êng neih ve ka tum ta tlat bawk.



Amah ka va ring thut ka tihna a ni lo, ka țawngțai tamna zawk hian beiseina min pe zawk țhin ni maiin ka hria. Tam ka dil ngailo ka dil chu zan tin a ngai a a ngai reng a chhete pawn ka thlak danglam ngai eih lo hrim hrim.



In hria em? Ka hringnun ho lam ve tak țhin ah khan a tello a ka nung thei kha ka in fak țhin asin. A ngaihsakna tello khan ka nung ve reng țhin amaw ka ti a mahse kha putar thu min hrilh ka ngaihtuah chian poh leh min lo kalsan ngai loh zia ka hrechhuak fo țhin.



Ka damchhan pawh kha ka hre ngailo a, damchhan pawh neilo a min dam tir ve reng lo a ka nunna min laksak mai se tih chang pawh ka ngah a nih kha.



Mahse tun hun atan hian min lo la dam tir reng pawh a ni mahna.



"Naute in alo tlawh asin" tiin Zorema kut chu ka la kâng a ka dulah chuan ka nghat a naute chuan a pa kut chu alo hria a ni mahna, a rawn tlawh leh a ka nui chhuak hak.



"Ilo hria tiraw? Naute pawn a ngai tawh che ania amah duat turin lo tho vat vat rawh" tiin a kut chu ka tuai zeuh a.



"Doctor khan... November thlaah i nei dawn a ti kha ania tiraw? Tunah September a ni tawh asin, hun a kal chak iti ve em? I muhil rei tawh lutuk asin, lo harh tawh la, kum 1 a tling țep tawh ania" ka ti leh sap, a kut chu ka fawh sak vang vang a.



"Naute nen hian kan ngai tawh lutuk che" ka ti leh sep bawk.



Kawngkhar an rawn kik dat dat a lut turin ka hrilh vat a Tc-a chu in khai bawr lûk chung hian a rawn lut a.



"Vawiin chu hna in ngah vak na nge?" Ka lo ti sap.



"Vawiin chu ka âwl ve deuh a ka rawn haw hma a nih hi, eng nge in lo an a?" A rawn ti a, a thil khai vel chu dawhkan tê ah chuan a dah a.



"A ngai reng, hmasawnna hmuh tur reng reng a awm lo. Ka thil chah che chu min lo lei em?" Ka ti a, khum ațang chuan chhuk in ka ding chhuak a "lo awm rawh ka lo pe ang che" tiin a thil khai vel chu a en zui a.



"Chuan... hemi rual hian thilpek dang pek tur che ka nei a" a rawn ti a, hrethiam lo zetin amah chu ka en a.



"Eng thilpek dang maw?" Ka ti sap.



"Lo lut rawh le" a tih chuan room kawngkhar lam chu ka en vat a, mihring rawn lut ka hmuh rual chuan ka au țhat! A ni pawh a nui var var a "Siam" ka ti chhuak hap.



"Hey... mommy" tih pah chuan min rawn pan a min rawn kuah a kei pawh chuan ka lo kuah let ve nghal vat "iva rei ve, ka ngai tawh lutuk che" ka ti sap, nui hak in min kuahna chu a thlah a.



"Sorry.. hnaah kan buai lutuk a tin ni, mahse tunah chuan i nau neih awmpui tur che in ka lo chho alawm ka awm reng rih tawh dawn alawm" a rawn ti a, ka bu nghat.



"Ka lawm e aw" Tc-a en pah chuan ka ti a, kan lam chu alo hawi reng a nui suk in alo bu nghut.



"Awi.. ivan rai lian tawh tak, thlalak ah kha chuan a lan têt têt nen. Naute... ilo dam țha maw? I nutei ka lo thleng tawh ania" tiin ka dul zâwnah chuan a țawng a kei erawh ka lo nui hak.



"Chêtpui a harsa ve reuh tawh lutuk a" ka ti a, a rawn ding chhuak a.



"A ni dawn lutuk, i rai lian reuh bawk sia. Eng nge u Zorema chanchin? Hma a sâwn deuh em?" Zorema melh zeuh pah chuan a rawn ti a.



"Hmasawnna pakhat mah a awm lo" ka ti sap.



"Mahse beidawng lo la, Pathian zarah a dam leh em em ang" a rawn ti a "ka beisei alawm" ka ti ve bawk.



"Thil ei pah in inbia ula, kan naute nu hian engmah ala ei âwm tawp si lo a" Tc-a'n a rawn tih chuan ka nui hak a. Siami chuan ka țhu tur chu min rawn pui a.



"Engmah ila ei bik âwm tawp si lo a lo ei ve rawh" ka ti a, a lu a thing mai.



"Ei rawh u, ei pah khan lo inbia ula inhnuai lamah nutei te thil ka zu sawi pui lawk ang e lo che vak suh aw" a rawn ti a, thuâwih takin ka bu ve nghat nghat bawk.



"A ngaihsak tawp che" Tc-a chhuah hnu chuan a rawn ti sa sa a.



"Ummm... midang pawn min ngaihsak lutuk. Kan inneih hnu phei chuan min nau chei vek a Zorema hetiang dinhmun a ni leh ta sia engkimah min ngaihsak. An țhian thum a an bialnu te phei chuan min thîk vek nghe nghe asin" ka tih chuan a nui hak a.



"Thîk ang ka ring, tunah te khan a nupui chei che alawm. U Zorema chuan țhian țha tak leh chhungkaw țha tak a nei a ni, hetiang dinhmunah awm mahse a chhungte chuan an duat hlum lo chauh che ania" a rawn ti a, ka nui ve sêih bawk.



"Engtikah nge i rawn chhoh a?" Ka ti a, a rawn chhoh tur thu hi min hrilh lawk miah lo a buai thu hlir min hrilh țhin.



"Niminah tawh mawle, zanah kan rawn thleng a ka chau reuh lutuk a ka rawn peng kawi duh lo a nih kha. Rawn țhawn che ka tum hrim hrim a u Tc-a khan i nuih khât thu min hrilh khan hreawm ka ti tawp a" a rawn ti a, ka thaw ham ham a "nuih a harsa alawm" ka ti sep bawk.



"Hming.. Pathian hnenah dil la a hmaa i huatna te kha chu theihnghilh tawh rawh" a rawn ti a.



"Ka dil alawm, zanah pawh a kuta vuan chungin ka țawngțai țhin. Mahse tun thlengin a chhanna kan la dawng lo a ka la dil tam tawk lo ania nge a nih loh pawn dil dan ka thiamlo pawh ania nge" kûn chung chuan ka ti sap a, ka kut chu a rawn vuan a a hmer vang vang a.



"A dam leh em em ang a dam leh hi ka ring tlat a ni" a rawn ti a, ka chhang tawh lo.



Thla a ral a mahse kan dinhmun erawh a ngai reng, a hma ang tho in hmasawnna hmuh tur reng reng a awm lo a mahse țawngțai erawh ka thlah phah chuang lo ka țawngțai tam zawk hialin ka hria.



Ka nau neih a hnai tawh a mahse engtin mah ka awm lo a ka harh țha em em a ka chhungte ngaih a lo țhalo zawk takzet mahse kei erawh engtin mah ka awm lo hrim hrim.



Mahse tukin zing ka tho chu ka pum a nuamlo ru reng a mahse tumah bulah ka sawi chuang lo. Ngaihsak duh lo luiin thil ka tihpui ngar ngar a mahse a nat zual chang apiangin eng emaw vuan in ka ding leh ringawt țhin.



Bathroom-ah ka awm laiin ka pum a rawn na thut..! Bang chu vuan in ka ding ngar ngar a a nat êm avang chuan ka chesawn theilo.



"Hming... Zorema hi.." tih ri ka hriat rual chuan Tc-a chu ka bulah a rawn thleng chawpchilh nghal a.



"Ekhai! Engtin nge i awm a?" A rawn ti vat.



"Ka țha, Dr. Zorema chu engtin maw?" Thei leh thei lo hian ka ti chhuak a.



"I țha tawp lo, damdawiinah ka hruai ang che" tih pah chuan min rawn pawm nawlh a ka hnial lo.



"Nu... Mama hi a kut a rawn chêt in ka hria" bathroom ațanga min pawm chhuah ruala ka thil hriat hmasak ber a nih chu..!.

(Ava tawi tak! Mahse ka kut a kham tawh lutuk a ka peih tawh lo. Naktuk zanah a hmawr bâwk kan tum dawn nia aw☺)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)