MAKE YOU MINE CHAPTER-5 by NUTTY GIRL

Episode kal lai dah luhna

Moderator: writers

Nutty girl
Posts: 209
Joined: May 2nd, 2020, 11:28 pm

MAKE YOU MINE CHAPTER-5 by NUTTY GIRL

Unread post by Nutty girl » May 14th, 2021, 10:04 pm

MAKE YOU MINE


CHAPTER-5




Kum chan ve zet chu school kan kal tawh a, First Term Exam pawh kan zo fel tawh a, kar khat chawlh kan nei. Zing thawh hmat loh theih hunlai a ni a, kan exam zo chauh (chau) lai a lo ni bawk nen ka chhungten min kai tho hma ngai lo, tunah pawh khum aṭang ka la tho chhuak lo hrim hrim.


Ka phone lukham hnuaia ka dah chu ka ban rak rak, ka hmet eng a dar 8 a lo ri ṭep tawh tih chu ka hmu nghal zat. Data on leh te te in WhatsApp ah chuan ka lut a, message a lo thleng zut zut.


Kan ṭhianho group message a lo tam ber. A bul ṭang chuan ka en thla thuak thuak, an games khel an mengrei thei hlawm bawk a, zanreiah pawh hian an ri reng zel. Tukin zing ami ho chu ka birthday min wish na a ni. Lawmthu ka sawi zawh rual rual chuan ka thoh har vang chuan min rawn hau nghal. An thawhna a la rei awm bik tawp si lo a.BLhi private message a lo lut nghal a.



*Vawin chu ka rawn phei hma ang* tih zawng a ni.


Kum dangah ka piancham hi lawm ka ti ngai vak lo a, ka thil duh ber hi min lei mai ṭhin. Lawm ai chuan thil duh ber neih kha a hlawk hrim hrim a, ka bazar peih loh pawn ka khawl mai zel. Mahse kumin erawh kum dang ang mai mai kha chuan a theih tawh loh. Ka ṭhiante ho hian chawlh lai a ni bawk a tiin chaw eikhawm an phut tlat. 'Tun kar tluan kan in hmu dawn lo a, in hmuhna hun remchang a ni mai lawm,' tiin Lhin rem a ruat vek.


"In duh leh chaw chu lo ei ula," ka tih ṭum phei chuan an lungawi lo lutuk. 'In duh leh tih chauh te chu, chaw ei turin min sawm pangngai ta che,' tiin an phun nang nang hlawm kha ania. Chaw ei tura ka sawm hnuah 'Kan fiamthu,' an ti leh daih a mahse a vau a kan in vau hnuah an duh ve leh hram. Ka chhungte ka hrilh theihnghilh khanglang leh nghal a, nizanah ka hrilh chauh. Vawin lama bazar chawp chuk chuk kan ngaih phah.


Ka phone chu dahin ka va tho chhuak a, ka pa chu chanchinbu chhiarin sitting room-ah a lo ṭhu a. "Pa khawnge ka nu hi," choka a ka hmuh mai loh avang chuan ka ti a. "I u Sawmtei te inah a va phei lawk a nih kha, in ṭhianho a i piancham lawm in tum sia, cake kan tih sak ve loh chuan nangmah berin i ngaihsak vak si lo a a tia,a ve phei lawk a nih kha," a ti deuh duah a.


"Aw, bazarah a en theih mai ka ti deuh a mahse a pawi chuang lo ina an siam hi a tui zawk," ka ti ve nangin cake lam ka ngaihtuah tawh lo hrim hrim. Hei vang chiah hi ania ka chhungten min hauh ṭhin, chawp chilh bawk si hian thil ka ti ṭhin a. Ka lo ngaihtuah kim ve tawh ngai si lo a.


Choka lama luh leh ka tum chu ka pa chuan min auh let leh avang chuan sitting room lamah bawk ka phei leh a. "Kha vawiina in bazarna tur, vawksa kha chu nimin piaha i nuin a lei kha a awm sa a, lei tur dang chu nangman i hre zawk ang," tiin kan bazarna tur chu min pe a.


"I duh zawng lei nan i hmang dawn bawk nia, kumin chu ka bonus mai ang che," a tih chuan ka va lawm si em. Ka pa dulkiar luah hi pawm zo ngat i lang chuan ka pawm lawp anga ka vir pui duh hial ang.


Ka nu a lo let har deuh avang chuan ka pa chuan chaw a ei hmasa a, a hna kal a ngaih ṭhin avang hian a ei hma lo thei lo. School chawlh chang pawn ka pate an chawlh ve loh chuan chaw ei hma tho tho hi a ngai ṭhin.


Ka nu lo haw chuan U Dindina pawh a lo tho ve tawh. Chaw kan ei kham meuh chuan a tlai tawh hle a, Lhi rawn kal hma a tum bawk nen thleng ka sil sawk sawk. Thleng ka sil zo deuh chiah tihah chuan a rawn thleng a, ka insiam zawk zawk a, bazar tur chuan kan in zui chhuak a. Msa leh Zorinate nen bazarah inhmuhkhawm kan ti bawk.


Kan bazar chu kan chhuak hma bawk a, kan haw tlai lutuk lo. Mahse Lhi nen secondhand kan han thing tak tak a, kan mipa kalpui te an ṭhen chak chak reng. An ning tih an sawi hreh lutuk kha an khawngaihthlak zawk, a khat tawkin an rilṭam thu an in sawi chhawk reng ringawt. Nu pakhat khan a titlawm vak bawk a, Lhi nen chuan hlawk haw kan in ti ang reng khawp mai mahse kan kalpui te erawh hi chuan an tih ve hmel vak lo. Zorinan scooty a ken avangin Msa a phur a, kei leh Lhi rickshaw-in kan haw thung.


Zorina leh Msate pawh vawihnih thum vel an lo len ve tawh avangin an tlangnel ve tawh a, chuvang chu aniin ka hria chaw rawn ei mai pawh an hreh lo. Gideon-a erawh kan sawm ve tak nangin a zak a a lokal ve duh lo, tih luih ngam pawh a ni lo.


In kan thleng a, ka nu chuan ṭhenawm naupangte a lo kawi khawm nuk chu niin, an lo ri nuai nuai mai. "Zanlamah chuan kohhran inkhawm te a ni sia, cake kha zai nghal mai rawh . Ka rin aiin in rei a, "a ti nghal sawk sawk, haw hma kan intih tehreng nen. Artui a chhum sak chu min han sem tir ngei bawk a. An haw tak sap sap hnu chuan kan reh ta huai mai.


Lhi nen chuan ka nu eirawng bawl kan pui a, Msate pawh an awm mai mai duh bik si lo a, ka nuin sa a siam tir a. Ka nu chuan, "Eirawng bawl sak in ngai vak si lo a, in bawl sa kan ei vek dawn sia. Chaw lo ei reng mai ru," a ti fiamthu a, kan tet lai chanchin sawiin Msa chungchang te a sawi a, kan nui ham ham reng.


Eirawng kan bawl zo ta maw tihah chuan ka room-ah lutin kan in kawm khawm a. Ka room kan lut chu Msan "Hmeichhe room ava ang ve ve," thlek kualin a ti hram, a ngeiawm thei mai sia maw.


"Maimitchhing rawh," Lhi a rawn tih chuan thuawih takin ka maimitchhing ve mai a, ka men ruk hlau ni awm fahranin Zorinan ka mit a lo hup bawk. "I meng thei tawh e," Msan a tih chuan ka meng a, ka hmaah chuan bawm lian ve pangngai tak an lo dah.



"A ngai lo asin,"ka ti hap, ka phut lo hrim hrim. Kum dangah pawh ka chhungten ka duh ber min lei hi a ni mai a, a dang han dawn ka beisei lo hrim hrim.


"A, hawng mai mai teh. Lei sak tur che an hre lo a, min chah tir a. Ti hian hmun khatah ka lo ti tawp a.. E, e chuan an pawisa ngei a leisak che an duh a, an in hlawh ngei ania aw," Lhin a tih chuan phawk zetin Zorina leh Msate chu ka en, ka lawm hi a ni tawp mai. Zorinpuia phei chuan a tih duh loh hmel leh zual, chhungte pawisa ring a awm mai mai thei a ni chutiang bawkin Msa pawh anu pawisa a dil mai thei a mahse chutiang ti lo a, thil min lei sak na tura an lo inhlawh chu mak ka tih rualin ka lawm tak zet bawk.


"Ka lawm lutuk hi ka hnuk a ulh dawn a lawm," ka tih chuan Lhi chuan min ben chak hmel ngawih ngawih. "Ngawi mai mai rawh, a sawi chiah kha i thei," Muansangan a ti hluk, ka nui vur vur ringawt.


"I kum sawm pasarih thilpek hian thupui a nei a," Zorina chuan a tuamna ka phelh mawlh mawlh lai chuan a ti a, a va dangdai ṭhin tak.
"Engnge chu chu?" la phelh mawlh mawlh pah chuan ka ti a.


" 'Hmeichhia i lo an ve zel theihna' tih ania," Msan a ti sap, Lhi chu a nui hak hak. Zorina ka en chuan min lo nuih ṭha bawk. Ka ngaihtuah chian chuan keipawh ka nuih a za lek lek. A chhungah chuan lip tint(hmui hnawih), ṭhi leh kawrfual nalh deuh hi a lo awm. Kawrfual hnuaiah chuan diary a lo awm bawk.



"Lip tint hi chu Muansanga ngaihtuah chhuah liau liau a nih hi," Lhi chuan a ti zat a, lawmthu ka hrilh sap. Min fiam nan ber hian a hmang a, hmui hnawih tih vel te chu keipawn ka hmang ve ṭhin tho sia.


"I birthday gift a BIALPA pek che kan tum deuh a," Lhi chuan nui rah rah a a tih chuan ka nui nasa mai, chutiang in pek chi pawh ni nghal lo chuan. Ngaihzawng chung chang sawiin kan titi reng a. Lhi pawh tunah hian class 12 ami nen an in ngaizawng a, an chungchang pawh chu a sawi hlut a. Msa leh Zorina lah chuan u ang maiin thurawn an lo pe bawk a, fimkhur turin an chah ve ngei bawk.


A nu chauh a awm dawn avangin Msa a haw hma a ngai a, chaw pawh kan ei vat a. Lhi nen thleng kan sil a, Kohhran inkhawm zan a nih avangin ka nu leh pate an chhuak daih thung.
Thleng kan sil zawh chuan Zorina chuan Lhi a thlah hmasa a, Msa nen chuan kan lo nghak a, kan titi dun a, hmanlai chanchinte kan zirna chungchangte kan sawi dun a.


"Engnge nih i tum?" min tih chuan in ngaihtuah buai hauh lo in ,"Nurse, chuan lehkhazir paha zai," ka tih chuan a nui huk. "Nurse thinchhe deuh maw?" a ti leh kher.


"Mi hmusit viau suh aw,ka thinchhe kher lo. Bakah hmeichhia ve tho ka nih hi, ka duh hunah te chuan ka inti no ve thiam tho," ka ti hlak hlak, ka bula ṭhu chu a nuih a za ting leh nghal a.


"Chhaih thinrim hi i nuam em a," tia ka sam a lo khawih leh chuan ka melh ram ram. Ka sam a khawih hi chuan min hmuhsitna chi khatah ka ngai lo thei lo.


"Muansang, nang engnge nih i tum ve?" lungawi lo fe chuan ka ti ve z


"Ka nu duh angin doctor nih a, ka nu tan mo ṭha deuh neih a ni deuh mai," a tih chuan ka nui hak hak. A nu thuawih thei tak nih hi a in hmeh hnu hnu lutuk tlat. Muansanga hi bialnu nei tura ka mitthla chuan Apuii hlir ka mitthlaah a lo lang. Mahse Zorina min hrilh dan kha chuan Apuiin a lo kawp a Muansangan rei tak a lo duh ve kha ania, a rilru a nat viau a, an in kawp leh mai chu ka ring bik lo.


16-00-00-images.jpg



[CHHUNZAWMNA


"Nupui nei tur chuan bialnute pawh i neih hmasak a ngai ve ania aw, chutin i duh hun hunah nupui i nei ngawt thei lo," ka ti hlia a, ngaihzawng lam ngaihsak lo ber duhthusam a tan chuan a in hmeh hlawl lo."Ka nei reng maithei asin i hre ngawt lo," a tih chuan ka nui hak hak, min melh run run a mahse a ni pawh chu a nui ve tho.


"Hmeichhe pakhat hual ruk ka nei a lawm," reife ngawi reng a kan awm hnu chuan a rawn ti chhuak hlawl a, a fiamthu a nih ringin nui deuh chui chui chung chuan ka en a mahse a nui ve hauh lo. "Hei a va fair lo ve, min hrilh ve i tum nange," tiin ka ṭhut hnaih sauh, engmah pawh sawi lo chuan min en reng ringawt.


"Tunge chunu chu?" tia ka zawh leh chuan "Ka fiamthu mai mai a nih kha," a ti leh tho sia. Mahse dawt a sawi tlata hriatna ka nei, a neih tak tak chuan a chak lo khawp ang. A nih loh pawn Zorinan a hre em em ang, ka zawt mai ang. Ka zawh luih pawh chuan a fiamthu msi mai tih hlirin min chhang a, tih ngaihna vak ka hre tawh lo. Rei vak loh ah chuan Zorina a lo thleng a, haw nghal mai an tum. Msa a hmanhmawh tawh avang chuan ka chelh khawtlai lo.


~time skip~


School pawh kan ṭan leh tawh a, lehkha pawh kan zir ṭha leh nghal viau. Lhi leh a bialpa pawh an in kawp ngawrh viau, ka rin aiin an in duh daih . Lhi pawh hian a duh tak tak thu a sawi ve reng, a bialpa pawh hian a duh ve tak tak chuan ka hria.



"I rawn haw thei maw?" Lhi rawn lut chu ka fiam a, nui sun sun chung chuan lei min chhuah khum zeuh. Ti hian a bialpain a lo rim loh leh school hnungah an in date a, chhun chawlh hi chu kan bulah a awm hman lo hrim hrim.


"E, vawiin Valan bike a rawn keng a. Kan monthsary te a ni sia, ka rualin haw rawh a ti ania, Zorina a awm tho a, a pawi viau em?" inthlahrung deuh chuan a ti a, lu ka thing nar nar. "Pawi lo, bialpa ka neih hunah i hre viau ang," ka tih chuan a nui hawk hawk. "Nia, bialpa i neih ve vat a ngai a nia aw," a tih let ve chuan ka nuihsan vel mai mai, min chhaihnan tak a hmang leh nghal a.


Last period chu pratical class a ni a, Zorinan class tlanbo ang a ti zet a mahse vawiin Physics kan tih hun a ni a, kan Miss hian roll a call thlap zel a. Han tlan bo ngawt ngam a ni lo.


Miss chuan ,"In tana ṭha tur a ni a, hetia ka hrilhfiah zel loh che u chuan in hre rei lo ang," tiin explanation nen a ti dap dap mai a. Lhi chuan min kheuh min kheuh tawh. "A va over tak, ka ning tlat," thaw deuh hak chuan a rawn ti leh ṭhin, a ṭawng ring ngam bawk si lo. Dar a rik hnu phei chuan a sawi tui zual sauh leh nghal a, hetiang zirtirtu hi chu school tiin an kawl vek a nih dawn hi.


"Aw le, hetah hian kan duh tawk mai ang," a tih chuan kan ri hak hlawm a. Minute sawmpanga laiin kan ban hun a pel tawh. Miss chhuah hnu chuan an phun nang nang a, school bus pawh in min tlansan fel diam tawh.


"Awii, Miss hi chu ka ngei tlat a vawiin ber kher ah," Lhi chuan a lehkhabu a bag a khung mawlh mawlh pah chuan a ti a, ka lo thlir reng ringawt. "Ka kal nghal mai, min nghak rei tawh lutuk ang," tiin hmanhmawh deuhin a tlanchhuak nghal hlawk hlawk,a box a theihnghilh hram.leh nghal a. Ka auh zuina pawh chu a hre tawh lo.



"Tinge a va hmanhmawh ve a?" Zorina chuan Lhi tlanchhuak chiah chu en ve in a rawn ti a, ka bul a rawn thlen lai pawh ka lo hre reng reng lo a.


"Vala nen an monthsary ania, thil tih kawi tur an nei a," ka tih chuan a bu nghauh a.


"Chho ila rickshaw kan la mai dawn nia, ke a i haw peih loh chuan."


"Kein haw ila a laklawhah rickshaw kan la zawk dawn nia. Hetah chuan chan leh fe a ngai dawn sia, ka peih lo," tiin ka lehkhabu dahchhuah ho chu ka khung nghal sawk sawk, Lhi nen hi chuan kan in dah hnawk rum zel. Muansanga a nu damloh avangin school a rawn kal thei si lo a, Zorina nen chauh chuan kan haw dun hnak hnak.


"Eitur lei lawk ang, ka ril a ṭam," kawngpui kan thlen chhoh rual chuan ka ti a, kawngkanin dawr lo awm hmasa ber ah chuan ka lut a, Doritos leh in tur chu ka la a.


"I ril a ṭam ve lo ami?" ka bula ngawi reng a ding chu nghawk sawka ka tih chuan "Ṭam ve lo," a ti nghat, ka kiu a ka nghawkna chu a tuai vut vut. Ka tum loh deuh hian kut hi ka lo thlak palh leh ṭhin mahse ka duh reng vang a ni bik lo.


"La ve mai mai teh, ka thil lei hi chu i ei ve ka phal dawn lo ania," ka tih leh chuan dawr nghaktu nu chu a lo nui hak hak. "Ni e, vala la ve rawh, i ei sak ve a phal loh hmel emai," a tih ve chuan ei tur la lo chuan in tur chu a la ve ta hram a.


Ka thil lei ei mialmial pah chuan kan haw dun a, Zorina ngaihdan a nih loh hmel lutuk. "Khawlaia thil ei tuam tuam te chu i zak lo ami?" a rawn ti phawng,a van ho set sut tak. "Zak nang, khawvel a lawm," ka ti mai a, a nui deuh hawk.


"Rilṭam vanga hrehawm tawrh ai chuan a ṭha tho a lawm, i ti ve lo ami? Midang mitmei kan ven zel te chuan hrehawm kan ti mai mai a lawm," ka ti leh et, heihi chu ka ngaihdan tak tak a ni. Thil dangah pawh a ni tho midang mittlun tum lutuk na lamah mahni kan intihrehawm ṭhin a, thil mawi lo lutuk a ni te a nih loh chuan kei chuan pawi tihna ka nei lo.


"Umm ti ve mai zel e," tih zawngin min chhang a. "Kha ei ve la," ka tih chuan a lu a thing tho, a ei ve duh loh leh a ṭha hlauh a ni mai lawm.


"I van in ak rit peih em em, lehkhabu riah ṭhen ta che," ka bag ah lai reng chu a rawn chawi a, a dah thla leh hnawk. "Zorinpui i van a tak, ka dar i ti na vek a nga sin," ka ti hlar a, rum zeta ka hnunga kal ka en chuan nidang ang bawkin a nui hmel bak hmuh tur a awm lo. Min tihdan ang chiah chuan a bag chu ka chawi a, ka thla nghal vat a mahse a bag chu a zâng tawp.


"Khawnge i lehkhabu?"


"Lehkhabu ka ak haw ve ngai lo, school-ah ka riah vek,"a ti awlsam et, engmah enghelh nei ve ang pawh hian a lang lo, he mihring hi chu(h)."Khawi ka lo ah sak ang che, i in daih lo emai," a tih chuan lu ka thing nak nak. "A ngai lo, a rit lutuk chuang lo," ka tih pawh chuan min dil lui tlat.


"I duh loh chuan ti tal hian ka ti tho ang," tiin ka hnungah kalin ka bag ah lai reng chu a khai. "I van â tak Zorinpui, thlah mai mai teh," ka tih deuh hlak chung pawh chuan a la chawi reng. A tir chuan ka kal zawng zawng nen chuan a ti khaih lak vek. Kal kawng a ni tih pawh hre tawh lo chuan kan ri thla bawrh bawrh.



"Muansanga a awm si lo a, class a nuam lo i ti em?"



"Ti ve tho e mahse class a ka hmeichhe melh tur min daltu an awm lo a vawiin chu," tiin min chhang a nih chu. "Nahh, Zorinpui i van lerh tak," tiin ka ner nang a. "Ka lerh mai mai lo aw, hmeichhe pakhat chauh ka duh ka tih tawh kha," ka bag a chawi chu a rawn dah thla leh thut.


"Amak Zorinpui,"ka tih chuan "Oh, sorry sorry," tiin a rawn chawi leh, thinrim deuha ka en chuan min nuih tlawn vur vur. "Tunge chunu chu? Muansanga pawn a nei reng a, ka zawh in a sawi duh ṭhak lo leh nghal," hmanzana Muansangan a sawi zuai nen chuan ka sawi zawm a.


"A nei mai mai lo, nei se chuan ka hria ang chu," a tih chuan ka bu nghauh, nia Zorina pawn a hriatpui loh chuan a neih ka ring bik ta lo.


"Kei chu chunu chu ka hmuh hmsak ber aṭangin ka duh nghal a, hmeichhe dang aiin a mizia a danglam bik a. Hmeichhe dang ka hmuh ang hian ka hmu ve pawn ka hre lo," a ti vang vang, a hmel ka en chuan a thutak em em mai leh nghal a. "Kan class ami maw?" ka tih chuan a bu nghauh.


"A bulah chuan ka danglam daih ṭhin a, ka duhna te a bo ve mai ka ring a mahse ka hmuh hmasak ber ni ai khan ka duh daih tawh zawk. Mipa dang bula ka hmuh hi chuan," sawi zawm lo chuan a a nui suk a, lu a thing nghut. Chiang zetin ka en a hmeichhe sawi lai chu a duh ve ngang aniang, a chanchin a sawi zawng pawh chuan a hmelah a lang thei hial ania. Zorinpuia hi chu hmeichhia a care thiam dawn tih chiang sa ania, chunu pawh chuan a duh ngei ka ring.


"I duh tih a hre lo ami?" ka tih chuan "Umm," tih zawngin min chhang a.


"Aw hrilh mai la."


"Ani chu a danglam bik ka tih kha, min duh loh chuan tih ngaihna dang a awm tawh lo ang," a tih chuan a hmel chu chiang zetin ka en a, a zam tih a hriat reng. A pianphungah nise , a sang a, a ngo dan a tawk chiah bawk a, a pian a chhe bawk lo. A mizia tlema thawveng chi a ni tih loh chu sawiselna lai tur ka hre lo, hmeichhe duh chi tak a ni dawn tih ka chiang.


"A duh ang che, hrilh tawp rawh. Tunlaiah mifate an nghal a, i chang lo palh ang," ka tih chuan phur zetin "I ring tak tak maw?" a rawn ti a, ka bu nghauh nghauh.


Nizanah wifi a chhe leh sia, min lo hrethiam dawn nia aw💜🌜



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)