29th APRIL - 32 BY PAPUII SAILO

Episode kal lai dah luhna

Moderator: writers

Ruatpuii Sailo
Posts: 100
Joined: November 22nd, 2020, 10:57 am

29th APRIL - 32 BY PAPUII SAILO

Unread post by Ruatpuii Sailo » May 14th, 2021, 11:09 pm

CHAPTER - 32 BY Pápuii Sailo




Thla khat zet chu kan innei ve ta, krismas vuak vet chawlhin a nang zui bawk nen Aizawl lamah kan awm zui ta rih a, kumthar lamah erawh Lunglei lamah hna kan nei ve ve bawk nen kan phei ang a, a quarter a awm tawhlo in an chhungte In sak zawh hlim Serkawnah luah tur a awm dawn a, chutah chuan kan awm tawh thung ang. A lehlam takah chuan phei nghal mai chu ka inthlahrung ru ang reng, Hmahruaia chu loh theih loh a ni dawn a, kei erawh mi in engtin nge min sawi chhun zawm ang, pasal chhungte hrawn peih lo min ti ve mai ang em tih te ka ngaihtuah a, phei nghal lo a la awm ve rih chu ka duh, Remruata pawn ka tello in a thawk thei dawn lutuk tih ka hria, Hmahruaia erawh ka la sawipui lo thung.




A rualin phei ve nghal mah ila, a chhungte hian min sawisel dawnlo tih ka hre chiang,An fapa hi ka tello a a awm rei theihloh zia hrechiang ve tute an ni a, ka chungah an felin min en hranna an nei miahlo bawk nen, thil ho te teah pawh min rawn der ve thlap hlawm zel a, ka lawina tur chungkaw dik tak an ni. Kan thutlukna chu engpawh ni se min pawmpui vek ang, mahse enge maw chenah thenawm khaw veng leh chhung dangte mit mei ven ve angaihna chen a awm.




" I inpeih dawn tawh em? " Ti chung a kawngka a rawn lut chu darthlalang atang chuan ka lo en reng a, dressing table ka phone dah chu banin ka inpeih thuin ka lo chhang nghal vat a, a lam ka inher rualin mawi zetin a kiai zui nghal sukin " Perfect "a rawn ti thum dut.




" U Nunthari te an inpeih tawh mi? " Ka tih chuan Ronny-a a inthiar leh rih thu nui hawk chungin a sawi a,ka nuih pui ve hak. Naktuk mai hi Krismas a nih tawh avangin vah harh pahin bazar ve reng reng ang u an ti a, ka huphurh ru viau thung. Vawiin ni angah hi chuan tih tur em em neilo a chhuah ve chak hrim hrim an tam thin avang hian khawi lai pawh hi a tawt em em vek zel a,mi kara inhnawh tawng tawng ngai hi ka peih thin loh bakah boruak ka zo thinlo a ka chau nghulh zel.




Inhnuai lamah kan inzui thla a, an bul kan thlen ruala Ronny-a'n ka kut a a lo kai nghal tharh reuh chu, anu leh a putea ten an chhaih zauh a, lai deuhin a nui ri nghal hek hek. Chhun lamah Inchhung chet vel bak tih vak tur a awm silo nen kan in awm tam a, min ngaina ve viau. Zan khat ka bulah a riah a ngen tlat phei kha chuan Hmahruaia ngaih dan nilo lutuk kha a nuih zatthlak zawk, lungni chiahlo chungin kan mutpui a, chhungkua kan nih duh hmel e ti leh hluai thinin a hlim ber berah a tang zui leh ta tho.




U Nunthari te nufa nen kan pali chuan kan inzui chhuak a, a khawi lai hmun mai pawh chu a chep em em vek. Hmahruaian ka bo hlau ni awm takin ka darah a taksa si chetin min kuah bet reng a, u Nunthari te nufa kan bulah an kal ve bawk. Ronny chuan mipui zi nuai nuai chu a zo lo nge a khat tawkin " Nuamlo e " A ti nui nui reng mai.




" Mampui, saw saw Ronny pa anih saw " Min kheuh ru zeuhin ka beng bulah u Nunthari'n a rawn ti ru sa sa a, a en na lam ka en chuan pa sar veh vuah, ruakhau zet mai leh hmeichhe pakhat dingdun hi ka va hmu a, hmeichhia chu a nupui anih thu a sawi zui nghal zauh bawk. A pasal nena an inthenna a rei tawh thu leh nikum lawk khan nupui a neih leh thu a hma khan min hrilh tawh. A nupui thar ka hmuh saw chuan engkimah u Nunthari a tha fal nalh zawkin ka hria.




Tih tur em em a awmlo bawk nen chawhma chhung chiah kan chhuak a,an unau a min nawr chilh tlat avangin kawr pakhat ka lei a, ti ila Hmahruaia min lei a ni zawk mah ang chu. Ani pawh ka hlawh ka khawl ve in leather jacket ka lei sak a, amah a palian bawk nen a hak atan liau liau a an siam a maw tih mai turin a inhmeh, a lawm thiam lutuk chuan min ti hlim veng veng.





" I nu leh pa lung engtik nge kan phun ang " Zan mut naah chuan min rawn ni pah fawm hian a ti sup a, chutia a rawn sawichhuak teh phut chu ka hamhaih ang reng viau.




" Ka hrelo... Pawisa ka duh angin ka la ngah tawklo a, nakum kum tawp lamah te chuan a theih mahna " A awm a bei thlep chung chuan ka ti a.Thawklehkhatah min chawi kang nghal nawlh a, kan inmelh chiang ta kher mai.




" I pasal ka nih hi, engvanga nangmah chauh a insawi nge inih? I duh hun sawi tawp la keiman engkim ka buaipui vek ang " Lungawi chiahlo tih hriat tak hian a rawn ti hmuk a, za lo lutuk a ka then sak chu ka hmuiah a rawn seh avangin ka rak nghal that.





" Vawikhat mah 'ka' tih thumal kha hmang leh tawh suh, pumkhat kan ni tawha engkimah kan pahnih zel a ni tur a ni, a chiang em? " Ka chal a chal a rawn nawrh chilh run chung chuan a ti charh charh a, ka hmangaih ngawih ngawih chiang a ni hepa hi chu.




Lungphun ka rilruk avangin a tir phat atangin ka hlawh ka dah hrang thlap zel a, a awm ve nual tawh chungin duh angin ala tam lo thung. Hmahruaia'n a hian tiang rilru a pu hian min hneh tak zet, kei chauh nilo a he khawvela awm ve tawhlo ka nu leh pa te thleng puala hun tawp ber ang tur ang a ngaihtuah thleng hian tawngka mai nilo a min hmangaih zia a lantir ka tilo thei lo. Ani ang vek hi he khawvel a mipa te hi ni se tumah hian an pasal te an then phalin ka ringlo mai pawh nilo in an then lo ang tih ka chiang.




" Kha thupui kha chu kalsan ang, tunah chuan.... " Awmze nei fê hian min melh ralh a, a awmzia ka hriatthiam avangin ka nui chhuak nghal hawk. Nupa kar chauha thleng tur angel te dai ngai loh ram chu kan thlen leh tak kha!




*


Zing ka tho chu ka rit lúk a, ka lu a hai muai muai bawk nen Krismas tuk a awmdan a tan chuan nuamlo tak a ni. Ka vai ruai mai te hian ka hria. Ka awmdanah a hriat nge ka nu in min zawt ta chat reng a,ka awmdan ka sawi chuan " I rai a ni lo maw? " Nui deuh suk chung hian a tiliam puat a, ka inngaihtuah nghal roh roh chu tun thla ka hunbi ka pel tawh tih ka hre chhuak a, ka chhunglamah hian ka phur nghal sur'h.




" Nu, tun thla hi ka hun bi ka pel daih tawh a, ka rai a ni thei ang em? " Ka tih zawih sap rual chuan a che lai chawl meuhin ka melh vang vang hnuah a rawn phul hlut.




" A lo ni maithei asin, test kit leisa i nei em? " Ti a min zawh chuan ka lu ka lo thing nak a, chutiang lam ka la ngaihtuah thleng pha lo hrim hrim.




" Ava buaithlak ve aw, krismas tuk a ni sia dawr inhawng... Ngawi teh khilaiah khian mahni In a damdawi dawr nei nghal an awm in pa kan tir dawn nia " A ti ta chuk chuk a



" Nu, Hmahruaia chu hrilh rihlo law law ila, ka lo rai leh siloh chuan a beisei ve tawh ting tang si ang a, lunghnur deuha a awm ka hlau " Ka tih chuan a inngaihtuah vang vang hnuah min pawmpui ve nge amah a kal tur thu a sawi ta mai. Chu erawh ka beisei loh lam daih a ni.





" Nangmah i kal ang maw? Mahse a hla lo mi? Kan pahnih talin kal ila " Ka tih chuan a hlat vak loh thu leh ka kal ve chuan Hmahruaia'n min lo zawng si ang a, a hre vek zawk ang a ti ta tlat a. A fanu pawh nilo a mo tana pregnancy test kit a lei tur chu a lawmawm rualin inthlahrun na duh tak a ni. Tuna ka hun tawn mek ang hi hmeichhia te hian an tawng zen zenin ka ringlo.




Ka nu chu a chhuak nghal a, keiin eirawngbawl ka chhunzawm nghal char char thung. Ka chhunglamah hian ka phur lutuk hi ka awmthiamlo a ni ber. Ka awm mai mai te chu ka nui leh vur vur zel. Lo rai tak tak ila ka ti tak zet.




An rawn tho chuan ka nu choka mawitu ber ni thin a awmlo chu khawnge an rawn ti sap sap hlawm a, thenawm te inah a kal lawk tiin dawt var ka lo sawi hmiah. Ka finfiah thlap loh chuan sawilan loh ka duh zawk rih.




" Enge kan hmeh dawn? " Ka hnunglam atanga min rawn kuah hlun chungin a rawn ti a, tunlai a tho hma theilo leh a harh vanglo lutuk te hi a nu hah a ni ang em tih ka lo ngaihtuah thleng hmanhmawh.




Ka chhang lawklo chu " Nge i nuih vur vur a? " Ka biang a rawn piai zauh chungin a ti leh a, chawhmeh a rawn bih zui nghal du du bawk.




" Krismas chibai ka pasal duhtak " A bianga fawp zeuh chung a ka ti chu a kiai suk a, " Krismas chibai leh ka nupui duhtak " Zawi ril ruih hian a rawn ti let ve sup.




Ka nu lo thlen lai chuan Hmahruaia chokaah ala awm ve run bawk nen a hriatthiam hlau fe in kan in signal ru zauh zauh a, nuih te lam lam a za zawk kan awmdan chu, pa te hriatloh a chhuah ruk dan tur rel hi kan ang ka ti ber.




Hmahruaia a kalsawn lawk hlanin kan inpe ru zauh a, ka ak tha nghal vat. Chaw ei a ni zui nghal mai bawk nen inbual paha in test ka tum ta a,chaw eilai pawh chuan ka rai ang nge rai lo ang le tih mawlh ngaituahin ka rilru a in khap nasa hle.




Inkhawm kan ngaih dawn avangin inchunglamah insiam turin kan chho ta thuai a, inbual hmasak ka chuh zui tharh. Bathroom ka luh rualin ka test kit ah lai chu ka phawrh chhuak nghal vat a, ka test zawh hnu chuan ka en lawk ngamlo a,ka enchiah chu ka zuang tawr tawr lo chauh, ka au chhuah ka hlauh lutuk avangin ka kut ka seh bet hmiah.




" Krismas present pek tur che ka nei ania " Kan insiam peih vek hnu chuan ka ti a, present pangngai anih a ring nge room a melh kual nghal vat.




" Niminah min pek tawh kha a tul tawhlo " A ti hluk, present pangngai ang tur a angaih vang ani tih ka hria. Angaih danah chuan thil pek pe tu tur chu hmeichhia nilo in mipa zawk a ni tur a ni tih a ni bur tlat.



" Oh.. I duhlo tak zet "



" Ka duhlo a nilo, mahse thil tullo a ni "




Ka dul thep zai mai ka kut a dawmin ka en thla a " Naute, I pa hian thil tullo a ti che ania , i rilru ana em? " Lungawi lo pangchang aw zet a ka tih chuan Hmahruaia a ner nak, mahse a reilo a rawn phawk nghal zui nghal hra " Tunah khan eng maw i sawi kha? " A rawn ti ta hlut a. Min rawn din chilh nghal hmiah bawk.




" Engmah ka sawilo reng reng " Ka tih chuan " Nghal lo teh Zothanpui " Dawhthei lo fe hian a rawn ti nghal hluk chu ka chek tlak tlak.



Thutak zet a ka rai thu ka hrilh nawn leh chuan a hmel a dang hlawk a, awihlohna leh phurna , mak tihna a mitmengah chuan a inlanchhawk nghal zut zut. Ka hriattirh a ka lawm ai daih khan a lawm zawk hialin ka hria.




Krismas tuk kher a lo ni bawk nen kan lawmna a thuahhnih a ni ringawt. Pa Sangpuia te chhung leh Dingpuii te chhung kan hrilh ve thuai a,lawmpuina min rawn hlan mawlh mawlh a, Pa Sangpuia te pawhin an rawn len tur thu an rawn sawi nghal.



Dahloh ai tak meuh2 naktukah link ngaiah hian ka lo zawm leh ang



Link:
BBcode:
HTML:
Hide post links
Show post links

Ruatpuii Sailo
Posts: 100
Joined: November 22nd, 2020, 10:57 am

Unread post by Ruatpuii Sailo » May 15th, 2021, 10:19 pm

** Zawmna**




Chawhnu lamah an rawn thleng phei a, kan lawm tlang hlawm bawk a ni Kan then thaw reng hlawm mai.Doctor bula in check up ve reng reng a that thu an sawi a,buai duah ngailo zawngin Hmahruaia hmelhriat hmeichhe lam doctor tha deuh a lo awm hlauh bawk nen pan buai ngailo in tlai lamah a rawn kal thei dawn leh zel zui.





Pa Sangpuia te chhung chaw ei turin Hmahruaia'n a sawm nghal a, ar lei tur te an zawng chawp leh ang chuk chuk a, krismas ka hman tawh zawng zawng a nuam ber a la ni. Chutih rualin ka nu leh pa ka hrechhuak lo theilo, la dam ve se an lawm dawn tehlul nen,ka nu phei kha chu nau lawm mi a ni a, kei chiah fa min nei bawk nen, thenawm naute te ho hi a la kawi reng zel a, kan thenawm hnai naupang hi chu a chawi tlei loh tak tak an awm manglo tih theih a ni.





" I ngaihtuah ka hria nia? " Ka beng bula a rawn tih thawp sup rualin ka mittui ka hru nghal vat a,alamah inherin ka nui lui nghal sang a, mit ti hnum khui a min en chung a " I pasal lakah hi chuan inthup i mamawh lo ka tih fo kha " A tih chuan ka nui tawp leh nghal riai riai.




" Ka nu leh pa ten ka rai tih hi an hriat ve i ring em? " Nui ro halh chung a ka tih chuan a awmah min kuah bet nghal hmiah a, a pangtilumin min ur ham ham rual chuan ka him bik hliah hliah hian ka in hria.




" Tu nge sawi thei? Nang aiin an hre hmasa zawklo ang tih hi? " Ti a min chhan chuan ka ngaihtuah chiang a anih duh hmel riau, anni chu khawvel piah lamah an awm tawh a an lo hre daih tawh mai thei a sin ! An fanu hi nakin lawkah nu ka ni ve tawh dawn tih a hriat rualin ka nu chu lawm avangin a mittui a tla ngei ang a, duat zetin ka pa in a lo hnem leh bawk ang a. Ka zeldinna thu chuan nichin lawk a lungngai hmel kha hlimna in a rawn thlak a ka nuih pui nghal seih.




" I tap zo chiah a maw tia, i va hlim leh tawh si ve ? " Nghal zet a a rawn tih chuan ka lei ka chhuah khum vak a,naupang chhia min tih hmel zetin a nui nghal hawk hawk.




Tawngtam duah nilo mah se, a tawng chhunah ka natna tur nilo a ka tana tha leh min tichaktu a chhakchhuak thin hi lawm ka tan a hlut zual em em nachhan.




*

Kum a thar a, Lunglei lamah Hmahruaia a phei dawn a kei erawh helamah ka awm rih dawn ta thung.A phei dawn zan chuan a huphurh lawk lutuk chu zui phei ve mai ka duh rum rum zawk hial, mahse ka sawilang duhlo, sawi lang ila chuan min hruai phei ve leh phet a tum dawn tih ka chiang. A phei ang a, hna lamah a buai ang a zanin ang hian a awm reng dawnlo tih ka chiang.





" A mak Enge maw i hriat le! Ka zun a chhuak a lawm " Ka tho tur min kherh beh tlat avang chuan ka ti hlak hlak a, ka zun lah chu a chhuak tawh em em mai leh nghal.




" Ka zung ve duh tho " A rawn ti hluk chu a hnungah ka beng ri nghal thlawrh.




" Anih te chuan tho la, ka cheh tep tawh ania, zun khum i duh mi? "




" Zan dang zawng zawng a i zun chhuahin ka kalpui i ngai ziah a, ka mutthilh tawh pawn min kaitho ziah a, zaninah kalpui i ngai ta lo a! " Deu rawngkai deuh taka a rawn tih chuan thinrim lamah pawh kal theilo. Zanreiah ka zun a chhuak ziah a,bathroom hi kan room chhung a awm reng ni mah se ka kaitho tel ve ziah a, phunnawi miahlo in min kalpui thin. Zantirah lah ni se ka zun dawn chuan ka zawt ve ziah zel tho, zanin pawh hian zawh tumlo ka ni miahlo. Nghak hlek se la chuan ka zawt hman mai tur hi a nia.




" Ka pasal hi naktukah a Lungleiah a phei daih dawn sia, a tello a awmdan zir ka ngai tan alawm " Nuih insum zet a ka tih chuan phun nghal hluk a, min melh dur nghal khui chu nui lo tur a ka insum na lamah ka kut ka hum ngar ngar tawh.




" Khatin min melh khui khui suh, i mak hmen hmun lutuk " Ner nang chungin ka ti a, rawn che phut a ka tai a rawn nem chu ka ke ka leng nghal awt awt




" Thlah rawh " Ka ti tawk a, nui suk chungin a rawn nem leh deuh salh chu ka che ngam tawhlo , ka cheh thei mai dawnin ka hria, ka ke tang ka tawm ngawt ngawt a, ka mit na zetin chhing tlat bawk.





" Min ngai dawn em? " A rawn tih nghut chuan rang zetin ka lu ka bu nghal vat a, nui ri nghal sukin ka mawngah a rawn beng ri thlawp a, min thlah zui rualin rang lutukin khum atangin ka chhuk nghal a, bathroom ah a tlan a ka tlan lut chu a nui ri in room chhung a luah khat vek. Sualthiam lutuk mai!





In atangin zing dar 10 velah a chhuak a, a kal chiah chu ka ruak nghal huai hian ka inhria, kan inneih atangin kan awmdun chawt ti mai ang zanah a chhuak ngailo a,chawhmeh lei a bazar angaih lahin kan pahnih zelin kan kal bawk a, thla hnih pawh tlinglo chhung khan kan inawm hlat san ngai meuhlo a ni bawk a a awmlo hran lemlo viau.




" Zanin atang chuan phone i be deuh chawt reng dawn a ni maw? " U Nunthari min fiamna avang chuan ka nui ta hak hak a, ani pawh a nui ve tho. " Inpa a awm tawhlo bawk a,Dawrah i lo thu ve daih thin ang a, a nuam viau ang" A tih zawm leh zat.




Cosmetic dawr hlun deuh a nei a,direct dealer a ni bawk nen dawr dang aiin a tlawm zawk a, a product a tha tho si a, mi hausa ho hian bawm viau. Aizawl mi hlun deuh fa te ho hi chu hriatloh a mang pawh a nei lo.





A khat tawkin a thlen chin min rawn hrilh reng a, kar kawng hla bawk nen a hma lahin a lo accident tawh avang khan awm nuamin ka awm meuhlo a ni ber, chawhnu dar 2 velah a thlen thu min rawn hrilh chuan hah a dam deuh huai. Amahin rawng a va bawl chawp rak rak dawn chu a ni sia, mahse chu lam erawh a hnehsawh zawng tak a ni thung. A tih that duh phei chuan kei ai pawn chawhmeh a siam tui thei daih zawk.





Zan a kan in video call chuan U Nunthari'n dawrah lokal ve la min tih vek chu ka hrilh chhin mai mai a, ka duh chuan kal ve turin min rawn ti hlauh,kan nula an khaw lam a a haw a lo let leh tawh bawk a, engmah tih vak tur a awmlo bawk nen, In a awm chawt chawt ai chuan ka chak ve zawk.




" Kan fanu nen khan ka ngai tawh che u " Kiai suk chung a a rawn tih chuan ka ner nang a. Dul pawh ala puar lian eihlo ania fanu nih tih nghal ngawt a tum tlat hi ka nuih a za deuh tlat zel. Tunah hian ka bulah awm phei se chuan ka dul a chul a chul leh tawh ang.




" Fanu a ni ngawt dawn mi? Fapa sual luhlul deuh lukawlh mil mel a ni maithei a sin " Nui duh miahlo a ka tih chuan a nui chhuak hawk a, a chek zui tlak tlak ri pawh chu ka hre thei.




Khumah a bawk duai a,a lunglen thu a rawn sawi chuan ka khawngaih ru ang reng.Zan dangah te kha chuan ka dul zawnah a hmai dahin, ka dul a fawh loh leh a be sup sup reng a, 'thi hlawm chauh alawm ala nih, i thusawi a hre theilo' ka tih pawn a thulh chuanglo, a hnuah phei kha chuan ngaiah ka nei chho tawh zawk, zanin erawh ka bula mu a, thum deuh taka tawng dut dut ri a awmlo chu keipawh ka khua a har tak zet.




*

" Nizan chu i muhil thei em? I muhil pawn ka ringlo zawk " U Nunthari'n a tih chuan ka nui tawi tak ringawt. Kan inbe rei lutuk, ka lo mutthluk san daih leh nghal. Zinga min lo biak khan rei tawk tak ka muhil a thlir hnuah call a titawp chauh tih a la sawi zui leh nghal.





" In inneihna a la rei silo a, lo mu theilo pawh nila ka demlo che, inngaih hi ana duh te mai ania.... Keipawh " Atih lai tak chuan an rawn koh avangin a a kal phei nghal a, a dawr a lun ka tih tawh kha, hnathawk a chhawr chu nula pathum chu a nei. Mahse amah rawn ko kher pawl hi an awm leh zauh zauh thin.




Dawr lamah ka nu leh pa phalna thlapin ka zui ve ta nge nge, ka chhuak khat bawk a, boruak dang hip chu ka harh deuh kawk hian ka hria, motor ri beng chheng a tam mai pawh a!




Bathroom a ka lut ka chhuak leh tur kawngka ka hawng tur chiah chu ka pum rawn na lutuk avangin ka che hlei thei ta lo. Ka thlan fim a rawn bawl nghal tiak a, anat dan chu kut lawnga ka taksa chhung zuk tham tawk hi ka tehkhin ber,ka tai bawrah min pawh kawm tlat avangin ka ding kun ngal a, inpetruh fan fan chungin ka pum zawn ka dawm ngawt ngawt.




Ka rilruah ka naute a rawn lan thut avang chuan ka hahdam ta lo kher mai ! Nilo!! Engtin mah a awm tur a ni lo, pumna satliah mai mai a ni. Mahse zing lamah chaw bak engmah ka ei bawk silo. Kawngka pawh hawnna chu chelhin ka ding khur ngawt ngawt a, ka mittui a hnam nghal tiam tiam. Ka phone a rawn ri chu harsa tak chungin ka pick up hram a, ka pum na lutuk chu ka mittui a luang zawih zawih tawh.




" Bawihte... " Hmahruaia'n a rawn tih zawih sup rual chuan ka tapchhuak ta hawk a, " Bawihte... I tha em? " A rawn ti nghal ruai, a aw ah chuan a ngaih a tha lo tih ka hre thei.





" Hmahruai... Ka pum... Ka pum ana lutuk... Nilo... Kan naute... " Ka ke a thisen rawn luang thla ka hmuh chuan ka meng kawk a, Hmahruaia rawn tawng leh chuan enge a sawi pawh ka hre tawhlo. Ka lu a hai nghal muai muai a,ka khawhhmu a phe nghal vek, bathroom chhuatah chuan ka let thla nghal riai riai.






Ka bul vela ri nak nak chu ka mang hriat deuh ruai ruai a, men tumin mit ka khap nghal fak fak, mit ka meng a thil eng deuh hian min chhun khalh avangin ka chhing zui leh sawk a,ka bul lawka tawng ri chu enge an sawi ka hre hlei theilo.




" Doctor, a harhin ka hria ! Mampui, i harh em? " Ka nu (Hmahruaia nu) aw hian a rawn tih chuan ka meng leh siar siar a, nichin ai chuan a zia ta deuh.




" I tha em? " Doctor ni awm tak tur chuan a rawn ti a, ka tha em pawh ka chianglo, ka mit te chu a rawn keu kau a, ka that thu a sawi zui nghal sup.



" Nu, khawnge ka awm? " Thawh mai tumin ka ti a, ka ban a thip nghal zawk chu ka ner nghal sak a, ka nu in la mu rih turin min ti nghal vat.




Ka hawi kual a, Damdawi In a ang riauin ka hria, a ni theilo! Ka naute kha... Thisen chhuak te kha..!




" Nu , ka naute, naute chungah khan engmah a thlenglo tiraw? " Ka ti nghal ruai a, a hmel ka hmuh rualin thil awmzia ka hre nghal ruak.



" Nu.... "



" Thildang engmah ngaihtuah rih suh, i hahdam angai ania " A ti dam thluam a, engtin nge ka hahdam theih tehlul ang ka naute thla hnih êm pawh la tlinglo kha ka chan a sin!




U Nunthari dawr bathroom a ka tluk thu leh Hmahruaia'n ka chhan lawkloh avanga a u a phone thu te leh min rawn hmuh thu chu a sawi a, naute ka chhiat tih a sawi lai chuan ka taksa hi a tang tun a, ka mittui a luang ngiah ngiah bawk, ka rilru nat lutuk vang nge ka mittui luang reng chung si chuan ka tap thei miahlo thung.




" Hruaii, hmanhmawh suh,hun ala tam dawn. Nakinah kan zawt dawn nia. Hmanhmawh rihlo ang, a tha em? " Mipa aw in a tih thum dut dut riah chuan ka harh a,nichin khan ka lo intap muhil anih hmel.




" Sangpui, i hrethiam lo a ni " Ti tu chu Nu Ahruaii a ni.




" Ka hrethiam alawm, i rilru tur chu ka hriatthiam pui che mahse kan nghah a ngai, a chunga thil thleng i hriat kha " Pa Sangpuia chuan a ti sup sup a,an thil sawi awmzia lah ka man pha der lo.




Ka mit ka men rualin Hmahruaia ka hmu hmasa ber a, ka kut humin a hmuiah a nawr a, a mit a chhing tlat bawk. Ka kut ka chet hrut rualin a rawn hawichhuak a " Bawihte.. " Arawn tih thawp sut rualin thil thleng ka hrechhuak leh iar iar a, ka rilru a no tha leh.




" Hmahruai, kan naute ka venghim zo lo... Nu nep tak ka ni tiraw " Ka ti tiau a, rum nghut chungin ka hmai zawnah a rawn awm hnai a ka thiamloh anih loh thu leh vanduai vang anih thu min hrilh nghal sup. Mahse tun tum chu a thusawi chuan min hnem zo hlawllo. A lo pian hun tur thlenga ka suangtuah kha a taksa pawh a insiam hma hauhin ka chan leh si! Khang ka lo suangtuahna ve zawng zawng te kha mitkhap kar lek chhungin a ral ta vek.




Ka hawikual chu an lo awm kim vek a, Lunglei a awm tur anih laiin Remruata ka hmu chu mak ti hle, mahse hna tul vanga rawn phei pawh a ni thei tho. Keimah vang chuan a ni lo ang.





An sawi hmangah thisen ka hloh hnem avangin thisen pek ngaiin ka awm a, blood bank-ah ka thisen mil a awm remchang lo nen pa Sangpuia nen a lo inmil hlauh a, min pek thu an sawi a, an chungah hian lawmthu sawi sen loh ka ba nasa tawh a ni, ka rul let seng tawhlo hial zawk ang.



Min biakna ka chhan theihloh hnuin Hmahruaia a rawn phei nghal vut vut tih ka hriat phei chuan ka in haw ngawih ngawih nimin lawkah a phei chauh a ni a, keimah vangin bak lengin a rawn phei leh nghal chu a ni sia.




" Mampui, tun hun hi inzawh hun a nilo tih ka hria, mahse ka hriat ngei angai " Ngaihtuahna buai hmel zet a Nu Ahruaiin a tih chuan ka bu nghat a, Pa Sangpuia'n nghet zet a a kut a lo chelh sak chuan ka ngaih a ti tha vaklo.




" I nu leh pa fa tak tak i ni em? " A tih chuan ka hamhaih kher mai! Eng zawhna nge ni ngai? An fa tak ka nih thu a ka chhan chuan a thaw hak a, a mitmeng buai deuh nuai chuan ka awm a ti nuamlo tak zet.



" I ni tak tak maw? " A rawn ti leh hap a



" Aw ka ni alawm, ka pian tirh thlalak pawh albumah ka la kawl tha " Ka tih chuan tap mai tur hmel hi a pu in ka hria.




" Anih engtik kumah nge i pian? " Remruata'n a lo ti ve khauh thung, an chhungkaw awm dan hian ka awm an ti nuam hlawllo, Hmahruaia ka en a, ani pawh a mitmeng a buai ru nak tho .




" 29th April, 1993 " Ka ti zawi sap chu an pathum chuan an meng deuh kawk.




"Mahse enga ti nge min zawh vak vak nachhan hi? " An awm dan ka bang bo em avang chuan ka ti ta thlawt a, mak deuh deuh min zawt a, a chhan ka hre ve der bawk silo.




" Lawkin pa Sangpui thisen min pe tiraw? Anih chuan enge ka blood group " Ka tih leh rih chuan Min melh thup hlawm mai. Ka blood group tun thlengin ka la hre lo, Pathian zarah ka hrisel viau a, nachhawkna tak ngial pawh hi ka ei khat lutuk. Thisen test lampang pawh ka ngaihtuah ngai loh phah.




" I blood group tun thleng thlengin i la hre lo a maw? " Remruata'n a rawn ti haw chu ka bu nghat a, pa Sangpuia'n B+ a nih thu a rawn sawi sup. Mahse ngawi teh, engtin nge a nih theih.




" I chiang maw? " Ka tih chuan a bu nghut bawk si. Mahse ka pa AB ania ka nu O, engtin nge B+ ka nih daih theih ?


A zawmna atan chuan a sei riau mai ni maw😝😝

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)