29th APRIL - 33(Last Chapter) BY PAPUII SAILO

Episode kal lai dah luhna

Moderator: writers

Ruatpuii Sailo
Posts: 100
Joined: November 22nd, 2020, 10:57 am

29th APRIL - 33(Last Chapter) BY PAPUII SAILO

Unread post by Ruatpuii Sailo » May 17th, 2021, 12:26 am

CHAPTER - 33 (LAST) BY Pápuii Sailo



☆ Remruata Pov ☆



Hmanni lawkah ka farnu, ka nu in thi sa a a neih ni a kan hriat kha ka nu hrin a nilo tih kan hrechhuak a, chu erawh kan chhungkua leh Nite Ruatfeli te nupa chiahin kan hria.Nite Ruatfeli nurse a ni a, ka nu zai anih lai khan a thiannu chu duty zingah a awm ve a,amah tak hi chu free clinic ti tura thingtlang lamah an chhuah lai a ni thung.




Nite Ruatfeli thiannu chuan hmanniah nite Ruatfeli lo hmuin khami zan a thil thleng dik tak a rawn sawi hlawl a, a inthiam theih hlawl loh vanga rawn hmu a ni tih a sawi bawk.





A sawi dan chuan khami zan khan ka nu leh hmeichhe pakhatin nau an vei rual chiah chiah a, ka nu zai a ni a, pakhat erawh chuan neih pangaiin a nei thung. Chunu chu ka nu zaitu doctor enkawlna hnuai a nau pai a ni a, a sawi dan hmangah vawitam nau a chhiat tawh a, a pai lai pawh a nunna atan a hlauhawm thei tih doctor'in a hrilh chungin fa a awh em avangin a enkawlna hnuaiah a pai lui a, mahse vanduaithlak takin thi sa in a hring leh a, ka nu erawhin him dam takin a nei.




Thla kaw chhung nun thap chung meuh a a pai kha thi sa in a hring leh a, a kehchhia kha hmuh a hreawm zia niteii thiannu chuan a sawi hial bawk. Doctor bulah khan ka nu hrin zawk chu pe turin a dil char char a, ka nu ala harh chuanglo a, naute thlak thleng sak mai turin a ngen a, doctor-in thil theih anih loh thu a hrilh ngial pawhin tha tak a a enkawl tur thu tiamin a dil luih ngawng ngawng avangin an thlak thleng tak thu leh chumi zana duty ho zawng zawng chu naute thlak thleng chung chang sawi chhuak lo tur a vau beh vek an ni tih nen.




Ka nu an la zai a maw ti a, kan chhungkaw ho in an nghah thup lai khan thil tam tak a lo thleng reng a lo ni.



A fanu a la dam thu hnuk ulh tun chunga niteiin ka nu a hrilh zan a ka nu mak ti hmel leh hamhaih hmel, awihlohna a khat kha ka mitthlaah hian chiang takin a la lang thei. Tu nu in nge a fanu thi hrin a hrin chu kum 30 dawn hnuah ala dam tih miin rawn hrilh se awih nghal mai bik ang?




A thiannu nen a an inbiakna zawng zawng a lo record min ngaihthlak tir vek a, thudik a hriat ruala ka nu rilru na lutuk kehchhia kha khawvela ka thil hmuh hreawm tih ber ala ni. Ka pa leh keipawh kan bang bik chuanglo, mahse ka nu ang êm in kan mittui a tla ve lo thung.





A tuk atangin zawn hna kan thawk zui nghal a, niteii leh ka pa in Damdawi In lam record hlui an hai nghal a, an zawng chhuak har lo. Khami zana doctor duty kha a lo boral tawh zel zui leh nghal.




Niteii thiannu in ka farnu enkawltute chu Damdawi In atanga an chhuah hnuah Lunglei lamah an insawn zui nghal tih a sawi avangin Lunglei lamah ka phei nghal chuk chuk a,an hming chauh ka hria a, an veng insawnna ka hriat loh avangin ka buaipui rei phian.





A tawpah ka hrechhuak thei hram a, mahse ka thil hriatchhuah erawh chuan naute inthleng chungchang ka hriattirh a min thawn tluk zet khan min thawng zui leh, a chhan pawh ka chhui chhuah chu tudang nilo in Mampuii te chhungkua a ni!




Kan vawikhat inhmuhna atanga mak deuh a keimaha thawk a awmna chhan te, ka nu leh pa te nena an inngaina nghal mai te kha! Ka nu phei chuan " Mampuii ka hmuh hi chuan ka naute kha ka hrechhuak ziah thin" A lo tih nachhan te kha inzawmna kan lo neih reng vang a lo ni mai ang em?




Hmeichhe chhia a nilo chung a hmeichhe pangngai ang nilo a ka farnu anga ka en tlat na chhan te kha! Engkim khan chhan a lo nei ru vek!





Hmaichhan ngeiah ka hrilh duh avangin Aizawl lam ka pan nghal a, mahse ka thlen chuan Mampuii'n nau a chhiat thu ka va hre zawm zat a.




Ka ngaihtuah chian pauh leh ka pa nena an mizia in an zia te ka ngaihtuah thleng chho a, a hmelah ka nu a ang riau hian ka hre thar bawk anih chu! Tlangval a pumpa ka pangai hleithei bik meuhlo.




Ka nu leh pa ka hrilh chuan a thawng ve takzet tho. Ka nu phei chuan khum a Mampuii muhil chu mittui tling pam chungin a melh zui ngawt ngawt. Mahse kha naute kha amah a ni ngei em tih kan chiang ngam chiah bik chuang lo.




Ka pa in inbengdai turin a hrilh sa teh nangin ka nu insumthei hlawllo in a rawn harh rualin a zawt a, kan zawhna a chhan dan atangin kei chuan ka farnu ngei a ni tih ka nem nghet nghal hmiah.




An pianni leh thla, a kum nen lam a in an bakah a pianna hmun thlengin a inang vek tlat. A enkawltu khan a fanu anih loh thu chiah a lakah a zep a nimahna.





❀ Zothanpuii Pov ❀




Vawiin hi DNA test result chhuah ni a ni a, ka awm hle hle theilo a ni ber. Kei hi Pa Sangpuia leh Nu Ahruaii fanu niin Remruata farnu ka lo ni tak tak ang em? Tih ngaihtuahin room chhungah ka teikual sek a, Hmahruaia'n thu hahdam tur a min tih pawn ka thei meuhlo.Thil engkim fiah fel fai tak a min hrilh khan ka rilru hi a buai nuai nuai a, ka rilru a mang vek bawk.




An thusawi hi a dik anih chuan kum tam tak ka nu leh pa ang a ka lo neih te hi ka nu leh pa diktak lak atanga min lahrang tu an ni dawn tihna a nia.Misual an ni lo tih kum tam min enkawl chhung khan ka hria, ka nu leh pa tak nilo tur chuan ka ngaihtuah ngamlo, hmangaih tawp lo va min hmangaihtu te an ni miau. Anni lo midang neih ka nei lo bawk.




Boruak dang hlawk kan tawng ta bawk nen ka nau chhiat hian rilru luahin inthiamlo viau mah ila, a zawng zawngin ka rilru a luah hlei theilo. Ka chunga thil mak pui pui thleng thin hi ka ngaihtuah ngai loh leh ka suangtuah ngailoh vek a ni. Ka hringnun hi thil mak hlir a ni ber.




" Mampui, Pa Sangpuia te an lokal a" Kawngka a rawn dak chung u Nunthari'n a rawn tih chuan ka tha a khur thei hial. Hmahruaia ka melh nghal ruai a, a mitmeng chu ka chhiar sak thiamlo, thil thleng mek hi a dawng sawng thiam chiah biklo tih erawh ka hria.





" Bawihte.. Kan chhuk a ngai ania " Zawi sup a a rawn tih chuan boruak ka hip lut kawk a, thudik ka hriat chak rualin ka hre chak lo bawk. Rilru pangai pawh ka pu hlei thei meuh lo.




" Hmahruai, ka nu leh pa te kha ka nu leh pa tak tak lo nilo ta se... "




" Hahdam rawh le...inhnuaiah kan chhuk thlak angai ania, hmeichhe chak tak inih kha " Ka chal a rawn fawp vawng vawng chung a a tih chuan tlem chuan ka zia ta deuh.



Muang changin kan inzui thla a, sitting room a lan theih chuan Pa Sangpuia te chhung an lo thu thap a, an lam ka pan chu chik zetin min lo en a, nu Ahruaii phei chu a mittui a tling deuh pamin ka hria.




*


*



" Anu, a mawi em? " Nui sen sen chung a min lo hmuaktu ka fanu ka hmuh chuan ka meng kawk a, ka nui hlei thei meuhlo.



" I sam kha tu tan nge ? " Ka ti bul hmak.


" Apa.... " A rawn ti fan ruih chuw ka meng kual nghal ralh.



" Khawnge i pa chu a awm? " Ka tih chuan choka lam a kawk nghal va va



" Anu, a sam chu a mawi em? " A rawn tih leh chuan nui lui sak chungin a mawi ka tih thu ka hrilh a, mahse a mawi hlawllo hi a ni tawp. Hmahruaia hian eng vanga heti ang a cut sak nge anih?




" Duati, lo infiam lawk la, apa bulah ka kal lawk ang aw " Ka tih chuan bu lap lap chungin a toys a khalh zawm leh nghal a, keiin Hmahruaia awmna lam ka pan nghal thung.




" Ka rin aiin ilo thleng hma leh sia... Diklo a awm em ni? " Ka hmel tum bar a hmuh chuan a tih zawm zat a, diklo chu amah hi




" Duati sam saw engtin nge itih ? " Ka tih chuan nui suk chungin " Ka cut " A ti awlsam then a, ka ner nang thung.




" Pangngai deuhin a cut theih loh mi? A chalsam te saw veilam atangjn dinglamah a chhuk thlak saw "lungawi lo lutuk a ka tih chuan a nui chhuak hawk.



" Hmahruai, a nuihzatthlak loh ania, naktuk a birthday a ni a, sawtiang tw chuan miin an nuih vek ang a sin, cut that dawnin a chhing lutuk dawn bawk si " Ka ti hlar a.




Naktuk a birthday anih avangin vawiin lamah ka chhuak a, an pafa in an in awm thung a, kawngka ka luh rual a ka fanu sam ka hmuh khan ka thinrim bawk si, ka nuih a za deuh bawk si. A sam a dar pel tawh kha, a beng hnuaiah a lo tan sak a, chu chu ka hrethiam thei mai, a mawilo hran lo bawk. Mahse a chal sam ber hi! Ka sawi thiam dan chuan a dinglam atangin a chho zawngin a cut chho pawp niin ka hre ber. Veilam a bul deuh mat a, dinglam pawh a mithmul chungah a awm daih.




" Kan fanu harh thit thet zia leh a awm hle hle theihloh zia i hriat kha, sarah-i sam angin ka duh ve a ti reng a, duh ve na na na chu tiin ka tan a, tha deuhin a awm ve mai. Mahse a chalsam ka cut laiin zawhte miau ri a hriat avangin a hawi thut a saw ti sawn a lo chhuak " Nuih insum zet a a tih chuan ka nui tawi tak ringawt.





" A inhmeh em saw, a biang chum zet nen phei saw chuan a lang duhawm zawk daih " A rawn tih leh chuan kan fanu Arabella Lalhriatpuii infiam chu ka en a, a sam chu enge maw kawng zawng tak chuan a inhmeh riau tho. Mahse kan fanu anih avangin keini chuan kan hmu mawi thei mai a, midang tan chuan a nuihzatthlak tho ang.




Naktukah kum thum a tling dawn a, Pathian zarah a kum phu lohin a ruangam a lian bawk. Fiahlo deuh hian a tawng ve niap niap zel a, naupang chiar hiar chi a nilo bawk nen mi lawm a hlawh viau.





Ka hmuiah fawp zauhin a fanu duatlai hrai puar turin a bowl ken lai nen a fanu lam a pan zui nghal chu ka en zui ta reng.





Ka chhungte dik tak ka hriat hnu atangin kum li lai a liam leh tawh. Kan DNA a inmil tih kan hriat ni khan tu mai pawh kha min thawng em em vek, lo inhmu fo tawh mah ila an fanu anga min hmuh leh na hmasa ber anih avangin nghet zet a min kuah chungin ka nu khan min tah khum hawm hawm a, ka pa pawh a mit a hnawm ve chap nghe nghe.Ka chhungte ang chiaha ka lo ngaih thin te kha ka chhungkua tak tak zawk an lo ni reng tih ka hriat khan awmdan ka thiamlo.





Min enkawltu ka nu kha ka chhungte lak atanga min lak hran avangin a thiamlo chu ka ti a mahse ka dem theilo, ka pa khan a hriatpui ve em ka hre lo na chu, ka nu leh pa tak tak bulah hian seilian ta ila ka nun a nuam deuh zawk ang tih mai loh chu an hmangaihna ka dawn a in ang rengin ka ring. Khawsa thei tak kan nilo chung khan ka nu leh pa te khan ka duh leh mamawh min tih hlawhtlin sak lo ngailo.





" Ka hmangaihte u, happy birthday u le " Ka mit ka men rualin Hmahruaia'n a rawn ti sup a, nui seih chungin lawmthu ka hrilh let sap. A fanu bulah ' anu happy birthday ti rawh le' a ti zawm zat bawk.




" Anu, Happy birthday " Ka hmai zawn a rawn nui sen sen chungin pakhatin a rawn ti ve vat bawk a




" Ka vantirhkoh hmeltha te nangpawh happy birthday " A chal a fawp chungin ka ti let ve sap chu a nui ri nghal hak hak.




Apa in a signal zauh rualin ka dul zawnah an insawn thla nghal vat a, rang lutukin ka kawr a hlim chho nghal a, a beng a dawh zui nghal hmiah. Chu veleh ka pum chhung a mi te reuh chuan a u tawhna chu hria ni awm takin a rawn pet ve leh nghal a,Duati a rak nghal tung mai. Zingkarah hi chuan kan beng chheng thei a nia.




Naute thla sarih mi ka pai leh mek a, an pafa hian ka dul hi infiam nan an hmang a ni ringawt. Zingah lah ka harh hmain ka dul an chul an chul zel a, zanah lah chuti bawk. An khawih lai lah hian a rawn che ve ziah leh nghal, a pian hma hauh atangin an inzawmna a tha nghal em em a, a rawn pian hunah phei chuan an inchhun pafa hlawm khawpin ka ring.Duati pawh hi a pa fanu bik liau liau a ni.




Nikum lam khan Aizawlah an transfer leh a, mahse a nauin nupui a nei ve ta bawk nen infin lo in In hrang kan chang ta thung a, In pui nen a inhlat lutuk chuanglo bawk.




Chhungte ho an rawn thleng khawm tak tak a, Duati'n nuam a ti leh hle tawh. Kan pahnih birthday anih avangin kawr in ang deuhin ka order a, Hmahruaia pawn Duati nen a kan kawr hak rawng ang tho a ha ve.




" Pa, Remruata chu a lo thleng dawn tawh em? " Ka tih chuan a phone tur thuin min chhang a, a phone a hmet zui nghal mual mual.




Kan tan chhuah leh a rem tawh loh avangin cake rawn lam kawi turin ka ti a, ka pa te rawn thlengin an ni aia a chhuah hmasak thu an sawi a, a rawn thlen zui ve mai ka rinlaiin a rawn thleng har ta phian.




" Duhsaki a lam kawi lawk a ti anih chu " A phone a off hnuin ka pa chuan nui suk chungin a rawn ti a, ka then zui ve sak. Duhsaki nen hian kum hnih zet chu an inkawp ve tawh, an nghet tha viau bawk chuan ka hria.




Rei vaklo hnuah an rawn thleng ve mai a, Duhsakin min rawn pan vatin present min rawn pe chu lawmthu ka lo hrilh luam a, Remruatan ani ang hmeichhe fel leh nunnem lutuk a thlang chat hi a thiam ka ti viau. An innei har vak pawn ka ring tawhlo.




" Cake in order na neitu te hi i hria em? " Ka bula rawn dingin Remruata'n a rawn ti zawi ruih a. Ka hriat loh thu leh kan order laia a neitu ber a awm loh thu la hrilh nghal zat.



" Phirte nu kha ka hmu a" Nui ro halh chunga a tih chuan ka melh nghal kawk a



" Duhteii maw? " Ka tih chuan a lu a bu nghat,



" A dawr anih kha " A rawn ti zawm leh zat. Hmanni kan order khan a neitunu ber a awmlo an ti kha ania,



"Anih phir te chu... "



" An awmlo aniang, ka hmu tello Duhsangi chiah ka hmu " Ner sak chungin a ti bul hmuk.




Zawhna zawh leh ka tum lai takin Hmahruaia'n min rawn ko a, va kal rawh a tih avangin ka kalsan a. Zawh tur ka la nei nual, nakinah ka la zawt leh bawk ang. Ka beidawn san tawh a tih hnu khan ala zawng zui tho em ka hrelo a,mahse ka hriatah vawikhat pawh a sawi ri leh tawh ngailo.




"HAPPY BIRTHDAY, KA HMANGAIH " A bul ka thlen rualin a ti ril ruih a, kan bula thil phek zet hlai deuh intuam chu kawk zauhin " Present " A nih thu a sawi zauh a, hawng nghal rawh a tih leh sup bawk.




A tuamna chu zawi muangin ka phelh a, uluk zetin min lo en reng bawk.




" Aw Lalpa !! " Lemziak ka hmuh rualin ka hmui ka hup chawt a, ka mittui a tling nghal pam bawk. Engtin nge anih theih zawk?



Ka nu leh pa, min enkawl seilian tu te zawk leh kan fanu chu an lem a lo ziah tlan tir a nih chu! Thla an la ho a maw tih mai turin a tak a ang em em mai leh nghal. Engtin nge a nachang a hriat zawk?




" Ka lawm lutuk e " Ti tiauin ka kuah a, ka hnungaj chul heuh heuhin ka chhip a hmuiin a rawn nawr zui nghal vang vang.



Ka nu leh pa te khan ka fanu hi hmu ve se an hlimpui ve ngawt ang tiin a bulah hian ka sawi fo thin. He lemziak mawi zet avang hian ka fanu hi an hmu ve hman nimaiin ka hre hial.





Tui zet a ka pasal leh a fanu muhil thaw sak sak chu ka thlir a, Duati mang chhe lutuk chu ka nuih pui hak a, a ban phar hiang reuhin a bawp dinglam apa awmah a nghat a, chuti chung chuan tui em emin a la muhil tho. Ka phone phawrh vatin thla ka laksak a, ka la zo ka en chu ka nuih pui nghal vur vur. Ka phone hi an pafa thlalak deuh hlirin a khat, chutiangin Hmahruaia phone-ah kei leh Duati a ni ve thung.




He khawvela mal ngawih ngawih a ka inhriat avanga he khawvel chhuahsan ve daih ka duh lai khan lo ti puitling ta ila hetiang hun hlimawm lutuk hi ka tawng awm tawp silo. Lungngaihna in min hual vel lai khan ka hma hunah tun ang hun hi ka tawng ang tih ka ring lo a,ka beiseilo a ni mah zawk.




Hmahruaia'n " Pathian hian kan chungah chhan neilo in thil a thlen tir ngailo, kan hmalam hunah remruat lawk a neih avangin hreawmna leh harsatna te min pe fo thin" A tih kha a dik zia ka hre chiang tulh tulh.




A hunlai kha chuan hreawm tak a ni, mahse Hmahruaia min fuihna avangin beiseina ka nei thar a, Pathianin min puihna nen tun hun hi ka thleng theiin ka tan a rem a lo ruat lawk hi hmu thei ka ni.




Dawizep takin khawvel ka chhuahsan chak em em lai khan ka nunna lo chhat ta ila ka nu leh pa dik tak ka hre ngailo ang a, ka fanu ngei pawh hi ka nei awm silo. Ka harsatna te a puihna zarah ka tuar chhuah theih avangin ka chan emaw ka tih zawng zawng te kha min pe let leh vek zawk a, Pathian hi chu a tha a ni.




" I muhil theilo mi? " Rawn meng phak chual chung a Hmahruaia'n a rawn tih chuan ka lu ka lo thing vat a, a fanu mut dan chu a hmu ve tih hriat takin a nui suk a " Mangchhe reuh lutuk mai " A ti nghal hluk.




" Ka hmangaih muttui " A rawn tih thawp sup chuan ka nui nghal ver ver a



" Muttui le ka pasal duhtak" Ti chungin mangram lamah ka lut zui ve ta ruai ruai.





29th April min lo hlut sak a min lo chhiar sak thin tu te ka hmangaih riau che u😍😍



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)