The secrets behind the Elite and My love Ch-7 (by Beatrice Scorpio Ralte)

Episode kal lai dah luhna

Moderator: writers

Beatrice Scorpio
Posts: 105
Joined: November 14th, 2019, 11:33 pm

The secrets behind the Elite and My love Ch-7 (by Beatrice Scorpio Ralte)

Unread post by Beatrice Scorpio » May 17th, 2021, 8:53 pm

.
.
.
Kha topic kha kan kal pel tawh emaw ka tia, mahse kan la kal pel lo a ang khawp mai.


"Engmaw a zawh a nga?" Ashton chuan a rawn ti a. Nilo, Vanessa chhang su-


Ni e, mi rilru a thu sawi thei ka ni lo a, Vanessa lah mi rilru chhiar thei a ni hek lo, chuvang chuan a ruk a ka thusawi chu a hre ta lo a. "Jace-an niminah a kiss a."


Ashton chuan a mit chu a khap fuk a. "Ngati?" A awka chu...engmah a lang lo. A aw chu a ruak vek tawp, feelings nei eih lo ang mai hian, mahse pangai tak a lang turin a insum tih erawh a hriat.


"Chu chu alawm hriatchhuah kan tum," Nathan chuan a lo ti a.


"Kan sawi tawh lo thei angem? Midang emaw min ti ani ngei ang." Kan thusawi lai tih tawp tum chuan ka lo pawt chat ve vat a. Jacen chuan kan lam chu a rawn pan a, helai hmun rawn thlen nan hmun thum a then a hmun khat a la rawn kal a ngai.


Vanessa chuan a mit chu a khap fuk a, "Mahse nangman i-" A va han â tak e aw. A sawi zawh hma chuan ka lo nghawk a. Tun tum chu a hrethiam ta, a ngawi nghal chawt a.


Mahse a tlai deuh mah mah.


"What the hell?" Ashton chu ka lo au tuarh a, chutia Jacen-an kan dawhkan a rawn thlen rual a a khabe a lo hnek chawrh chuan. Keira, Nathan leh Vanessa chuan ngah vak an lo ngaih hmel loh.


"Ngahmah ngai duh suh. Chance an neih apiangin an khati ziah alawm." Nathan chuan a rawn ti a, a fry chu ketchup-ah chuan nawrin a ei nghal a. Chuan, a phirpui leh a bialnu unaupa-te chu cafeteria lai takah an insual a ani hetah thil a lo ei mai mai a nih chu. Karei, an zing a fel ber leh remna siamtu emaw ka lo tia.


"Ni e, i thiamloh a ni lo, Elena," Vanessa chuan a rawn ti a.


"Ngati?" Ashton-an Jacen chhuat atang a a pawt tho lai leh cafeteria kawngkhar lam a a pawt phei lai chu ka en reng a. Keimah chauh ka ni lo. Mi mit zawng zawng fukna chu a ni teh meuh mai. Elite ho hi an insual vak ngailo miau a.


"An mize inrem lo vel aniang?" Keira chuan a dar san ak pah chuan a rawn ti a.


"Tuman in thelh dawn lo em ni?" Ashton-an Jacen cafeteria atang a a pawh chhuah lai chuan ka lo ti a.


Nathan chuan a dar chu a san ak a, "Ash a chak ziah."


Keira chu a nui suk a, "Jace hi chuan a phu ve deuh ziah."


________________


Vanessa leh Jenna chu an pahnih hnihin English fifth period-ah chuan an rawn lang lo ve ve a.


Test kan neih avangin ka be thei tak tak dawn pawh a ni chuang lo a.


Last period lai laklawhah chuan, tu emaw hian kawngkhar chu a rawn kik a. Mr, Sullivan chuan a kut chu a rawn phar a, chhunzawm tur a min rawn hriattir nan chuan, mahse awmzia a nei vak lo, a tam zawkin an lo en thap, essay-answer chhan tur atang a tu emaw in an rawn tihbuai beisei chuan. Tihbuai an ni ta ngei e, Ashton Sinclair hmangin.


"Elena class atang ka hruai chhuah a ngai." Ashton chuan a rawn ti a. Mit zawng zawng chu ka lakah a rawn fu ta vek e. A rapawm zawk.


Mr. Sullivan chuan a mitko chu a lo ti chuar a. "Tunah maw Ashton? Test kan nei laklawh asin."


"Aw," tiin a chhang bung nghut. "A hmanhmawh thlak."


Mr. Sullivan chuan ka lam chu a rawn hawi a. "Elena?"


Duhthlanna min pe a ni. Test chu ka han en a, Ashton ka en leh a, dawhthei lo hmel zet hian min lo en a. School a ka zirlai hi Elite ho ka affect tir tur a ni lo takzet, mahse Ashton hmel a nelawm lohna saw....in tih hlim nan a ti a ang mawlh lo, a theih vang a ti pawh a ang hek lo, a pawimawh vang tak tak a ang.


Ka thawn chhuak hak a. "A pawilo, ka zo tawh hrim hrim a, Mr. Sullivan, min hrethiam thei angem?"


A lu chu a bu nghauh a, "Tehreng mai."


Ka thil chu ka khung khawm a, ka test paper chu Mr, Sullivan-a dawhkanah chuan ka dah bawk a, room atang chuan ka chhuak ta a. "Enge diklo a?" Ashton chu ka han zawt a.


"Kan kal a ngai," tih ringawtin min chhang a, ka banah chuan min rawn kaiin hall-ah chuan hmanhmawh takin min kai phei dawr dawr a. A hnu chuan a ding deuh dat a. "Khawnge i locker?"


Ka mitko chu ka san ak a. "Hemi lo lamah hian." A lehlam hawi zawng a min kaih phei leh dawr dawr chuan ka lo si halh a. Ka tal deuh a, min vawnna nghet tak atang a tal chhuak tur chuan. "Eng teh hrep nge thleng a?" ka han ti a. Ka locker kan thlen hma chu engmah a sawi lo, kan thlen hnu pawn min chhang chuang lo.


"I bungrua la rawh, kan kal dawn." a ti ringawt a. Chiang takin, vawiin a Ashton nelawm deuh kha a bo leh tawh. Hetiang hian intih hlim nan a inthlak thin nge ni a eng emaw a thleng?


Ka locker a lock chu ka han hawng a, a hmel ruak zet chu ka en leh zeuh thin bawk a. Ka thil ho chu ka han la khawm a, min rawn melh rum takah phei chuan ka hmanhmawh sauh. Mi hi awlsam takin ka hlau ngai lo a, mahse tunah hi chuan Ashtin hi ka hlau takzet, chuan a chhan ka hre eih lo. Ka zawh veleh chuan ka banah chuan min rawn kai a, hall-ah chuan min kai phei leh dawr dawr a, school hma lam parking lot lamah chuan min kai phei a. A car bulah chuan dingin lut tur chuan zaizir chuan min han hui a. Ka nui chhuak tep. Min that duh mai hmel pu mah se, kawngkhar chu min la rawn hawn sak tho a.


Ka lut chuang lo, "Khawnge kan kal dawn min hrilh rawh."


"Lut rawh," a rawn ti thah a, a awki chu a nelawm loh takzet. "Hospital-ah kan kal dawn."


Eng teh hrep nge? Tun tum chu muangchang lo in ka lut nghal, seatbelt chu ka hreng nghal sawk sawk bawk a. "Ngatinge hospital-ah kan kal dawn a?'' tiin ka han zawt a, Ashton-an car a start hnu ah leh parking lot atang a a tlan chhuah hnu chuan. Speed limit pel thak khawp chuan a tlan a, mahse ngahmah a ngailo a ang khawp mai.


"Skylar," hrehawm tih hmel tak chuan min rawn chhang a.


Skylar a? "Enge a chungah thleng?" Ka ngaihtuahna hi a sual deuh a ni maithei a, mahse ngati nge ka awm ve a ngaih?


"Tu emaw in rekin step-ah a nem thla a. Nate-an va hmu in hospital-ah a hruai a." tiin min rawn chhang a. A tawp deuh dat a. "Ka hruai che a ngaih thu Nate-an a sawi."


Awle, i duh vang reng a min hruai i ni lo tih hriat chu a tha e. Ashton kherin engvang a hruai nge min nih tih zawhna chu ka la in zawt tho. Skylar chu ka ngaihtuah, anih ka ring, mahse Elite dang ho aiin ka hnaih teh chiam lo.


Ashton-an hospital hma a a din zawng a ka seatbelt in min rawn hrenna na zet avang chuan ka thawk a buai tep a. Kan chhuak a, chuan Ashton chuan ka kal chak tawk lo a a hriat avang chuan min rawn kai leh dawr dawr a. A din zawk awmchhun chu Skylar room awmna zawt a nurse a biak khan a ni. Kan va thlen chuan Keira leh Nathan chu an lo awm sa a.


"Enge doctor-in a sawi?" Ashton chuan Nathan chu a zawt a.


"A lu ah hliam a nei a, chuan pem a nei nual bawk a. A harh veleh a chhuah thei thu an sawi." Nathan chuan a chhang a.


Ashton chuan zawimuang chuan a lu chu a bu nghauh a, a thaw huai bawk. "A chhungte i call em."


Tun tum chu Keira chuan a lo chhang a. "Naktuk zingah an lo let ang."


"Awle, ngatinge hetah a awm?" Ashton chuan min rawn en in a ti a.


"Ash-" Nathan chuan a han ti a.


Ka lo pawt chat a. "Nilo, a pawilo. Keipawn chu zawhna bawk chu ka lo ngaihtuah a." Engvangin nge helai hmunah hian Vanessa emaw Jacen emaw, Skylar hnaih zawk tu te aiin ka awm hmasak?


"A bulah note an hnutchhiah a. Nangmah an address che a." Nathan chuan lehkha them chu rawn phawrh chhuakin min rawn pe a. Ashton chu a rawn hawi chho vat a, ka va ban hma hauh chuan Nathan kut atang chuan min lak khalh daih.


Lehkha them chu a en thuak a, Nathan chu a en leh a. "Hei hi i sawi miah si lo a."


"A chhan chu Elena tan a nih vang a ni," Nathan chuan a lo ti a, Ashton kut atang a lehkha chu pawt thla in min rawn pe a.


Note chu a chuar deuh hlek a, mahse a chhiar theih tho e, chhiar theih loh zawk se ka ti takzet. A thu inziak chuan ka tiril a fan.


Elena, thuruk i zep tlem pauh leh, i hremna tur a pung ang.


"Eng teh hrep nge he thil hi a awmzia?" ka ti chhuak tuarh a. Thuruk engmah ka nei hleinem. Note in thawnna tur khawp leh step atang a mi nem thlakna tur khawp. Chuan enge thuruk ka zep loh chungchang chu ni a? Eng thuruk nge ka neih a, enge ka zep loh chu?


"Nangman min hrilh zawk ta che. Eng thuruk nge i lo sawichhuah a?" Ashton chuan a rawn ti a.


"Engmah! Eng thuruk mah ka nei lo hrim hrim!" ka lo ti let a.


"Tupawn thuruk an nei," Ashton chuan a lo ti let a.


Ka kuttin chu ka kutphahah chuan a tlum vek. "Pawnah ka lo nghak ang." An chhanna ka nghah hma chuan, ka chhuak daih a. Tu emaw min rawn umzui thawm ka hria a, chiang takin Ashton a ni, mahse Nathan chuan a lo dang a. Waiting room-ah chuan ka phei a, ka va thu a.


Thuruk ka nei ni a ka hriat chu Blaire Academy a mi chik tak a ka en atang a rin thu ka lo neih ve ho chauh kha a ni a, chuan thil ho te te ah a ni si a, entir nan an star-te emaw an huat te. A nih ngawt loh chuan.....



Ka ngaihtuah chhuah theih awmchhun chu he thil min rawn thawn tu hi tu pawh chu ni se, warning min rawn pe a ni. Eng emaw ka zawng chhuak ang a, eng emaw thuruk lian tham tak, a nih loh pawhin thuruk tam tak, ka sawichhuah theih si loh.


Letter ka han chhui chuan, police hnenah emaw Kaden hnen a pek a tha in ka hre ta, fingerprint te an chhui chhuah theih nan. Mahse a awm erawh ka ring lo, He thil rawn thawn tu chu tu pawh ni se, Skylar Blaire hi an chhungkaw school ngei a step atang a a nem thla ngam a nih si chuan, fingerprint hnutchhiah lo tur khawp a fing a ni ngei ang.


"Khawi room-ah nge Skylar Blaire a awm?" Ka aw hriat than tak chuan a rawn ti a. Mahse chuti em em a ka hriat than chu a ni lo, thian ang chi hi. Nilo, chu aw chu nitin ka hre thin, thil ziah dan kal hmang te sawifiahin thawnthu hlui te a sawi thin.


Ka han hawi chho a, "Mr. Sullivan?"


"Ms. Evans," a rawn ti a, a laih hmel kher mai. A hnung atang chuan tu emaw hi a rawn pen chhuak a, min thawng lehzual.


"Daniel?"


"Elena," Kaden-a partner chuan a lu chu a bu nghauh a a rawn nui suk bawk.


"Enge nangni hian hetah in tih?" A dik, Mr. Sullivan hian Elite ho hi a hlau lo bik hle a, mahse heti em em a in hnaih hi an nih ka lo ring pha reng reng lo. Chu pawh chu ni tehreng se, pangpar bawr pe se a awm tawk lek a, hetia hospital a rawn kal kher lo hian - ka mit chuan sana chu ka han melh nghal a - school ban zawh rual chiah a ni lehnghal.


Sullivan unaute chu an han in en a. "Uh, Skylar hi ka bialnu a nia." Enga? Ka zawhna pawh ka zawh hma hauh chuan an pahnih chuan hall-ah chuan pheiin an bo zui ta daih a, nurse pakhat hriau hlir a khat cart rawn nawr phei nen chuan an in su tep bawk.


A hnu deuh hlekah chuan Daniel chu rawn letin ka sirah chuan a rawn thu a.


"Tunah Mr. Sullivan chu Skylar bulah a awm em ni?" tiin ka lo zawt a.


Nuihzat hmel zet chuan min rawn en a. "Cameron tiin i ko thei ang. Mahse aw, a awm alawm." a dar chu a san ak a. "Skylar nen chuan an in hnaih alawm."


"Chuan chu chuan a tibuai lo che a maw?" ka han ti leh a.


Min rawn en a. "Chutiang tur a ni em ni?''


"Aa, i bialnu a ni sia." Chuan a chhungah minute reilote chauh a awm a. Mr. Sullivan ai fe in a awm rei lo zawk.


"Ni e, mahse ka unaupa ngei chu ka thik dawn lo." a rawn ti a. Ka mitko chu ka lo san ak. Daniel Sullivan chu bialpa ngaihsam tak a ni. A bialnu chu a ngaihsak hmel loh angreng khawp mai.....


Ka chhan hma hauh chuan tu emaw chuan Daniel hming chu a rawn lam a. Kan hawi chho rual nghal, Ashton chu kan hmaah a lo ding a. "Kan inbiak a ngai," a rawn ti a. Daniel chauh chu a en reng a, ka awm ve lo ang mai chuan.


Daniel chu a ding a, inthiamlo hmel angreng tak chuan min rawn en a, Ashton chu hall-ah chuan a zui phei a.


Ka thaw hawk a, kun hniamin ka lu chu ka han dawm a. Kei ai fe a inthup thei ho bul hnai a awm hi ka tawp san a ngai takzet ani. Thuruk tam tak an nei bawk si. Daniel thutna hlui-ah chuan tu emaw hi a rawn thu a, mahse ka hawi chho lo.


"Hey,'' Ka aw hriat than tak chuan a rawn ti a. Engtik laiin nge helai a rawn thlen?


Ka hawi chho a. "Ka be duh lo che."


Jacen chuan a mitmu chu a lo chet kual ralh a. "Come on, Elena, ka tihpalh." a rawn ti a, a inthiam loh hmel loh hle.


"Mi tenawm i nih kha."


A mitmu chu a chet kual leh ralh a. "Ni e, hrilh ka ni ta lawm."


Room ka chhuahsan hma chuan rum zet chuan ka han melh leh a, a tawpna atan chuan. Elite member zawng zawngte hian ze pahnih an nei vek tih ka chiang. Chuan Elite ho nihna ang tak mai chuan, a hlauhawm ani. Jenna warning kha ka hrethiam tan ta.


Dim tak a tawng thawm ka hriat chuan ka ding chat, Ashton leh Daniel. Kalsawn mai chu ka tum a, mahse Kaden hming ka hriat chuan ka ding nghal chawt. Ka dinna atang chuan an awmna a hla deuh a, chuvang chuan an thusawi chu tlem tlem chauh ka hre thei.


"...A hriat a ngai....thar a awm chuan..." Daniel chuan a lo ti a. Hriat belh tum chuan ka beng chu ka tun hru a, mahse va hnaih belh chiam erawh ka duh lo, min hmuh palh takin.


"....Ka hria...La hrilh suh..."


"Mahse-"


"Kan in hnaih a, tunah chuan kan ti buaichuar thei tawh lo ang." Hei zet hi chu chiang takin ka hria, Ashton aw chu tlem a a rawn rin deuh avang chuan. Daniel chuan tawng zawi deuh tur a a lo ti thawm chu ka hria a, tunah chuan a tir ai mahin an tawng zawi tawh zawk.


Ka hnungtawlh a. He thil teh hrep hi enge awmzia ni neih nuaih? Chuan engvangin nge Kaden hming an lam? Tunah tak hi chuan ka haw duh takzet, he thil hi ka theih ang tawp a chinfel ka duh, mahse Ashton kha heta min hruai tu ber a ni si a. Waiting room a let leh chu ka duh tawh lo bur. Jacen ka be duh lo. Skylar room a kal chu ka rilruk ta zawk a.


A harh tawh maithei asin.


Enge ka sawi pui ang ka hre lo, mahse lai fahran a va awm ngawih reng chu ka duhthlan tur zing a tha ber chu a ni tho tho. Step atang a nem thla tu leh note min thawn tu chungchang enge maw min hrilh tur pawh a nei mahna. Mahse zawhna zawh chi a ni chiah em erawh ka chiang lo.


Chutiang thil ngaihtuah a ka rilru ka lo tihbuai ve chiam chu a sawt lo takzet, a chhan chu room ka va luh chuan Skylar chu a lo la harh lo a. Nathan leh Keira chu an lo chhuak a ni ngei ang, a chhan chu Skylar tih loh ah chuan Mr. Sullivan chauh chu room-ah chuan a lo awm a.


Ka lut chiah chu a lo hawi chho a, "Elena," tih zawngin min lo lawm a.


"Mr. Sul- I tha em?" Ka hmuh hnuhnun ber aiin kum nga dawrh a upa a ang tawh alawm mawle.


Ka hmuh hnuhnun ber kha chu minute sawmpanga kal ta mai chauh kha a ni si a. Skylar a en vawng vawng lai chu ka en reng a. A mit a chauhna lang chu enge maw tak chu a ni, mahse awmzia a nei lo reng reng...


"Ka tha," a ti tawi hmuk a. A tawp nan Skylar chu a en leh a, tichuan min rawn en leh a. "Thawhtanni ah kan inhmu dawn nia."


Chumi awmzia chu naktukah school a rawn kal dawn lo tihna em ni?


Zawhna hun ka neih hma hauh chuan, inherin room atang chuan a chhuak ta daih a, Skylar taksa che eih lo bulah chuan min hnutchhiahin. Khum chu ka han en a, kawngkhar lam ruak huai ka han en leh a. Ni e, kha kha miin thian an en dan a ni hauh lo, eng ang a in hnaih pawh ni mah se. Chuan chiang takin miin an unaupa bialnu an en dan tur pawh a ni hek lo.


An pathum hian love triangle buaichuar takah an awm a nih loh vek pawhin an unau zing a Skylar bialpa zawk chungchangah hian dawt an sawi a ni ngei ang. Chuan Daniel-an Skylar a ngaihtuah vak lo dan ngaihtuahin leh, a bik takin Mr. Sullivan-Cameron nen a tehkhin phei chuan a ngaihtuah lo bik takzet, thil thlen dan chu ka ringhlel takzet ani.


Skylar Blaire hian kan English teacher hi a date ngei a ni. Chu chu Elite ho thuruk zep tlat pakhat chu a ni. Chuan Ashton leh Daniel chungchangah hian eng emaw a awm ngei a, chuan Jacen-a thu min hrilh mak zet chungchang pawh kha, closet-ah khan. Note a awm leh a, Jenna message nen.


Ka pawm lo thei lo, ka rilru lehlam hi chuan mi zawng zawng in a an hriat group chungchang hi ka hre chak a ni, tumahin a an hriatchian tak tak loh hi.


Ka hriat chakna hian min thah em loh beisei ang.

____________________

A/N

Awle, ka story min lo ngaih hlut sak tu te leh, ka ziah a nih vang hrim hrim a lo ngai hlu em em tu te chungah thinlung leh tih tak zetin lawmthu ka sawi a.

A thenin a tawi tiin in rawn complain a, ni e story dang nen a tehkhin chuan a sei vak lo ngei a, a chhiartu tan phei chuan a tawi duh viau ang tih ka hria. Mahse ka story lo chhiar tu te ka ngaih hlut vangin zan tin tih chhuah ve ka duh si a, a ziaktu tan chuan type tam hi a har khawp mai a. Mit ten a lo dawl bik lo a, mit leh lu te hi a na ve duh khawp mai a. Chuvangin in mi hriat thiamna ka ngen tak zet zet e. Kan ti chho bek bek ang a kan la complete thei em em ang.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)