CHAPTER-9
- IMG-20210516-WA0041.jpg (34.88 KiB) Viewed 1894 times
"Inruala ka haw loh chhan chu, Apuii nen kan haw rual a," a ti sap. Maw? Ani hiii.... "Nang hi.. in ṭha leh tihna ami?" tia ka zawh chuan nui sukin ,"Chutiang deuh chu," tiin min chhang a.
"Awihawm loh e," amah ringhlel deuh chuan ka ti a, Apui nena an chungchang Zorina hnen aṭang ka hre ve nual a, ka hre vek lo chung pawh hian a nih pui leh chu ka ring lo hrim hrim ania mahse tunah an in zui leh tih thu a sawi a.
"A ni a lawm, tinge i awih loh?"
"Aa, ka hrechuang nang. Ka awih lo ve deuh tawp, amak em a lawm," ka ti hap a. Engtinnge ka ngaih chiah pawh ka hrethiam lo. "Ṭha i ti lo ami?" a rawn ti ta chiah a, chhan ngaihna ka hre lo chiang teh e. Keimahah hian nuam tih lohna deuh ka nei.
"A mak i ti viau ami? Ka sawi kha i birthday kan lawm zanah pawh," a tih takah chuan hmeichhe pakhat hual ruk a neih thu a sawi kha ka ngaihtuah chhuak a, za lo zetin ka nuih a ,"Kha hmeichhia kha maw i sawi chu?" amah en ran chung chuan ka zawt a.
"Kha hmeichhia.." ka thusawi chu a rawn sawi nawn a, em em a na. "Aw, kha hmeichhia kha," ka ti nawn leh ngat a, 'kha hmeichhia' tih a lo huat pui em em ringawt pawh chu ka ngei kher mai.
"Apuii, aw ka sawi chu Apuii hi ania," ka mitah tak en chuan a ti leh a, sawi tur pawh hre tawh lo chuan ka lu ka bu ta zeuh. Apuii nen a an ṭha leh tur chu a mak ka ti tho tho.
"I tui kha a zo em?" a tih chuan a zo lo tih hriat nan ka lu chu ka thing a.
"In inah chuan ka lo chhuk kher lo mai ang, ka tui ken hi a zo a. Lo in ka tum a mahse," tiin ka bag aṭanga ka tui bottle a lak chhuah chu a rawn lek zeuh a. A in hma chuan ka tui bottle chu enin ,"I va in tlem ve, tui in tam hi hriselna a nih hi," tiin a in nghal a, ka tui paina hi a lian ka ti viau a, a chanve aia tam a awm. A vawihnih naah a in zo vek.
"Ka kal nghal mai ang, a tlai tawh emai," a tih chuan ka bu nghauh a, a tlan phei zui nghal daih chu ka en zui vang vang. Apuiin a kawp tawh chung pawha hetia a duh leh mai thei hi keimah hian hrehawm ka lo tih pui daih leh nghal a.
Zanah chuan kan ṭhianho group ah chuan Lhi chuan a haw hma chhan a zawt ta nge nge, Muansanga chuan Apuii nen an haw dun thu ka bula a sawi ang bawk khan a sawi a, mak an ti ve ve tih an zawhna ho aṭang chuan a lang reng.
A ṭhianṭha ber Zorina ngei pawh chuan a fiamthu a nih a ring ve tho.
Zorina chuan "Dawt lo sawi tum lo mai teh a, in in bia tih pawh min hrilh ngai lo," a ti a Msa lahin WhatsApp lamah an in biak zeuh zeuh thu leh tun hnaia an in biak nasat thu a lo sawi mai bawk si.
"Ms, thudik ka sawi tawp ang kei chuan ka duhpui tawh vak lo che," Lhi chuan a ti a, chu chu keipawh ka ngaihdan chiah, ka sawichhuah ngam loh a ni. Muansangan a rawn chhan hun ka nghak ve reng. Zorina pawh hian a duh pui tawh bik in ka ring lo.
"Kha kha chu kan in hmuh thiam loh vang mai mai alawm," tiin a chhang a, Apuii chungchang an sawi a, chhiar pawh chhiar tawh lo chuan ka clear pawp a, ka mutsan ta daih. A duh duh nih pui leh pawh nise pawi keiin ka tuar ve dawn chuang hleinem tih rilru put ka tum mahse Muansanga hi a mawl ka ti tho tho.
A tuka school kan kal chuan chhun chawlh laiin Lhi chuan Muansangate bawk a sawi chhuak. Kan pahnihin school hnunga ṭhuthleng, kan ṭhut fo na ṭhinah chuan kan ṭhu dun a. "Kei chu mak ka ti e, Apuiin lo be leh pawh nise Msa hi chuan a biak ṭhat ka ring tawh lo ania,"a ti nang nang a, ani pawh hi a la lungawi thei chuang lo.
"Keipawn mak ka ti," tih bak sawi ve tur ka hre lo.
"Mahse Msa hian ngaihtuah chiang hmasa lo chuan a ti lo ang. Bakah inhmuhthiam loh vang chauh atih kha, Muansangkima hi chu thil zawng zawng hi a sawi fum fe ve ngai lo a, engmah hi ka hriatthiampui teh nuai lo e a," a ti leh a, ka rin dan vel chiah a ni.
"Aww, mahse ṭha deuh tur chu Msa pawn bialnu a neih chuan kei leh Vala, nang leh Zorinpuia chuan kan leng ho ṭhin anga," tiin min chhaih a, a nui vur vur.
"Kal mai teh, min chhaih ve ziah suh," ka tih chuan uar fahranin a nui a. A ṭawngka in min chhaih tawh lo mahse a mitmeng erawh chun min la chhaih zak zak tho. "Nghal viau lo teh aw," ka tih chuan "Vawiinah hian school lokal phei se chuan kan zavaiin kan haw rual anga, a nuam ang chu,"tiin ka banah chuan a rawn kuah a.
"Eng nge in lo tih a?" tia ka dara rawn khawih tu an awm chuan ka dak a, Zorina chuan min lo vur vur. Nichin lawka a thusawi kha Lhin a sawi ang tih hlau zetin ka ṭhu a, ka mitmei bawk. "Apuii leh Msa chungchang kan lo sawi mai mai," a tih takah chuan ka thaw huai mai. Nidangah pawh kan pahniha kan awm chuan min chhaih nasa tho a, kan awm khawm erawh chuan engmah a sawi tawh ngai lo thung mahse ka hlauthawng tho zel. A sawichhuah palh chuan ka dinhmun a lai dawn lutuk tlat.
"Ti hian a tih tih in awm phawt rawh se, ka hrilh reng a lawm," Zorina chuan a ti deuh hmuk a, Apuii chu ka duhpui tawh lo tlang a nih dawn hi. Kan inkara lo ṭhu thla chuan ,"Ti hian tlangval luck ka ang ve deuh a lawm," thawveng tak chuan a ti zui zat leh nghal a.
"Khawnge Msa?"Lhi chuan tiin a zawt a.
"Aw, tu emaw hmuh tur a nei tawh a. A hmu ve te aniang chu," Zorina chuan a ti mai a. "A va induh nghal em em ve ngaihzawng neih vang maiin min phatsan dawn a ni maw?" Lhi chuan a lo ti vat a, amah pawh hi a ni ve reng sia. Vala lo kal se zawng kan chang leh awm tawp si lo a.
"Hei nang pawh engnge i nih vak bik,in in hauh chang lo chuan kan bulah i awm tam bik lo," ka ti a, lungawi lo zet chuan min en khai a. "Dikchiah," Zorinan a rawn tih ve phei chuan min melh rum dun hle.
"In han ṭang dun velah, hmuh tur nei lo bik pawh ka ni hleinem," tiin a tho hluai a, kawng dawm meuh chuan min en a, Zorina nen chuan kan lo nuih vur vur thung. "Han hmu la, hmuh tur i neih chuan," Zorina chuan a tih chuan Vala school rawn kal lo tih a hrechhuak leh a ni chek ang chu rang zetin a rawn ṭhu thla a.
"In van sual chiang tak, i hre viau ang," a tih chuan Zorina nen kan in signal a, ka nui ṭut ṭut. Kan pathum chuan infiamin, kan thawm pawh a ring ṭha hle.
School kan han kal chho a, kan Second Term Exam atan pawh kar hnih thaw thang bak a awm tawh lo, final exam a a pawimawh dawn avangin ka zir ve ṭan tawh. Zing ka tho ka lu a na bur a, ka tonsil a vun lai a ni bawk nen ka nuin school kal lo law law turin min ti a. Nachhawkna vawihnih lai ka ei tawh a, vawihnihnaah chuan min chhawk ve tawh.
"Mate, mate, i ṭhiante an lo kal ania," ka nuin min rawn auh lang lang chuan ka chhuak zui nghal a, Zorina leh Lhite sitting-room ah an lo ṭhu reng a.
"Ehe, teh hlawl che u chuan," tiin an bulah chuan ka ṭhu thla nghal a. "I zia deuh ami?" Lhi chuan a lo ti var a, ka bu nghauh. "School i rawn kal loh chuan a ninawm teh mai ania aw, naktukah i lokal thei tawh ang tiraw? Childrens Day a ni leh nghal," Lhi chuan a ti leh nghal vat a, ka nuih a ti za ang reng viau a mahse keipawh ni ila Lhi hi school rawn kal lo tase hrehawm chu ka ti ve viau tho in ka ring.
"Kal ka tum tawh ang, ka lu a nat tawh loh chuan.Tukin zing kha chu a na lutuk a, ka ti hlei thei thlawt lo a ni," ka ti hap a. Ka tonsil vung chu kar khat dawn a ni tawh ka aw chhang lutuk pawh a reh tawh zawk. Tonsil vung vel hi chu ka ti lui thei mai mahse tukin zing anga luna leh luakchhuak hluia ka awm kha chu ka ti lui thei thlawt lo a ni.
"I aw pawh a zia deuh a lawm," Zorina chuan a ti a, vawikhat school ka kal lo a. School form nen an lokal a, an damlohin ni tase ka kal thei awm si lo a an zahawm ru riau mai.
"Khawnge Muansanga?" ka zawh zawh rual rual chuan ka inchhir nghal. "Kan sawm a mahse Apuiin a lo nghak a, an haw rual a. Apuii hi a atchilh leh viau dawn a ni mahna," Lhi chuan a lo ti mai a. Ni e, ṭhian ai pawimawh ngaihzawng a nei tawh a lawm le, kei te chu enga tan mah min ti tawp nang.
"Ka va zung lawk teh ang," tiin Lhi chu a tho thurh a, ka room a bathroom-ah kher a lut leh tawh.
"Nizanah phone i khawih rei ami? I lu te a nat a, kha i mit pawh a sen deuh," Zorina chuan chik zeta min en chuan a ti a, lu thing nak nak in "Teuh lo mai, phone khawih nasat vanga lu na tur chu nangmah hi i ni mai. Games i khel nasa e," nui deuh chuan ka ti a.
A ni lah a thu tak fahran mai "Hrisel dan a in ang vek hleinem, i dam sam loh lai te ania," a ti deuh deuh.
"Games ka khel ngai tawh lo ka tih kha, ka rawn online zuai bak hi ka khawih tam lo. Lehkha te ka zir nasa zawk."
"E.. a nih chuan lehkha zir tawh lo mai rawh," a lo ti awlsam et leh nghal a. Nui hak hak chuan "I van â tak, i thurawn min pek hi chu zawm chi vak a awm dawn lo a nih hi," ka ti a, a nui ve sak tho.
"Damloh phah nana hman ai te chuan lehkhazir loh kha a ṭha zawk a lawm, lehkhazir loh hi hriselna," a ti leh than, chhan pawh ka chhang peih tawh lo. Ani hi chuan lehkha a zir khat tih ka hrechiang khawp mai mahse a rilru a chak a, a zir ve chhunah a thiam zung zung. Exam hma kar hi chuan a zir ve ṭhin mahse zanreiah games a khel leh tho zel, an mit te hian engtinnge a tlin em em ṭhin ni ka ti ṭhin.
School bana lo peng zuai an ni bawk a, an awm rei lo khawp mai. Ka nu pawhin Muansanga awm lo chu a hre chat chat khawp mai, an haw dawnah a hming an lam hram kha.
Zanah chuan ka lehkhazir peih lo chuan ka phone ka khawih kual mai mai a, Zorina leh Lhi nen kan in bia. Muansanga message a lo luh chuan ka seen duh lawk lo.
"Tlaiah khan ka lo kal ve ta lo a, i zia deuh em?" ka chhiar chhuah rual chuan ka ner nawk mai.
"Zia," tih zawngin ka chhang a, "A ṭhat chu," a lo ti ve mai, ka seen a ka reply tawh lo ka thinrim hlur mai. A ngaihzawng neih hnua a danglam lutuk hian min ti thinrim. "I va buai bik ve," va tih mai chu ka duh a mahse 'A ṭhat chu,' tih zawng hi chhan ṭhat leh chi ah pawh ka ngai lo.
Schoolah chuan an in zui tam lutuk lo, kan bulah zel a awm mahse ke pawn ka haw tawh mang ngai lo. Apuii hi Ramtharah an awm a, Chandmari a ding tur bus ah Muansanga nen hian an haw daih zel. Zorina erawh chu kan bulah a haw tam zawk, Apuii hi chutiangin a be ṭha duh bik lo niin ka hria. Apuii kan zing a tal tam lo lawm ber te zinga mi ka ni ngei ang, vawikhat mah biak pawh ka la be lo hrim hrim. Ngaihzawng vanga ṭhiante thlahthlam ching hi ka biak ṭhat reng nachhan tur ka hre lo. Min lo biak lahin a tirah ṭha deuhin min bia a a hnuah biak ṭhat ngam tawh loh khawpin a ṭawng tlem leh a. Muansangkima awmdan hi ka hrethiam lo tak tak a ni.
Ads click leh hram hram ang u aw
