- download.jpeg (8.25 KiB) Viewed 2011 times
CHAPTER-11
"An ruala i haw chuan keipawh anni ruala ka haw a ngai dawn sin," a rawn ti sar sar, a ni ve tho bawk si. Ka pawm ta ringawt a, Zorina ka khawngaih vang chauh in. Muansanga re ru sawn a lo ning palh ang.
Zorina chuan min thlah a, 'Lo peng la,' ka ti chu a phur khawp mai, coffee tui tawk an ngiat leh tlat bawk a. "Ka photographer te i ni bawk a, ka lo siam sak ang che," ka tih chuan a bu nghauh a, sitting room lamah chuan a phei a, tui lum a awm leh awm loh ka en leh te te.
"Chhun a ka hman kha ka la chhuang leh reng reng hleinem, eirawngbawlna tur lo chhuang nghal rawh," ka nuin a tih chuan coffee siamna tur chu belte ah ka chhuang ta zawk a.
"I phone lo la, ka lo thawn ang che. WhatsApp a inthawn aiin a fiah zawk," a tih chuan roomah ka lut vat a, ka phone zinga ka charge chu ka phawi ve ta chauh, nileng te hian kan charge mai a za panga lai a awm tawh ang tih tur a ni.
"Kha lo inthawn mai rawh, ka va inthlak lawk ang,"tiin roomah chuan ka luhsan nghal a. Zorinate ho chu kan inah an rawn tlangnel tawh hrim hrim a, an zah vel han venthawn an ngai tawh lo. Ka inthlak rei lutuk lo, min nghaktu a awm ve reng avang chuan nidang ang chuan ka muang suar suar bik lo. Ka inthlak zo ka chhuak chu ka nu chuan tui a so thu a rawn sawi nghal a, choka lamah ka phei nghal a.
Ka nu chuan Zorina lehkha a zir nasat tawh leh tawh lo a zawt a. "Ka lehkhazir hun a la ni ve hleinem," tiin a chhang mauh mai, "Zirlai tan lehkhazir loh hun a awm em maw ni aw, hunawl apiangah lehkha te chu zir tur a lawm," ka nu chuan a lo ti zek a, thu ṭha an in hrilh mawlh mawlh a, an han in chhang velah chuan ka lo nui ṭut ṭut mai. Zorina chu a thusawi vang chuab a inchhir ve ram ram tawh viau ang.
Ka coffee siam zo ka va phei chuan a lo ṭhen chak chak mai, ka nuih vur vur a. Chhantu ngai hmel a pu, ka nu a ṭawng tui lai ka va biak takah chuan a sawi zawm ta bik lo. A bula ṭhu thla vein vawiin lama kan thlalak chu kan en dun a "Heihi a nalh hi," ka tih chuan "Ka la thiam em a lawm," a lo ti nghal zel a. "Ka chhiat loh vang a lawm," ka tih chuan a nui nasa ngang mai.
"Ka nih tum hi thlak ila a ṭha ang, model te hi ni zawk ila,"ka tih chuan nuih za in sum zet hian "I sanna in a pha lo," a rawn ti a. Ka ngei kher mai, hei pawh Muansangkima ang chiah a ni, an san avang mai hian mi hi min han hmusit a.
"Mi hmusit viau suh aw, ft 5 leh inches 3 ka ni ve aw," tih leh ka ke a tlawh chu ka rual a, a mal a tuai vut vut a ,"I kut leh ke hi chu avan rang tak," a ti nang nang, a phu tawk chiah a ni. Coffee a in zawh chuan a haw ta thuai a.
Zana ka online an status ka en chu vawiina kan lenna a hriat ngang mai, an lo intlar thla put a. Muansanga status chuan ka mit a la leh ta ber. Apuii nen a an thlalak na a ni a, a hnungah chuan Zorinpuia nen kan la lang ve zui.
"Hmela," tih ringawt chu ka type uk a, ka thawn lo. "Bialnu nei ber pa," tih chu ka va thawn ta nge nge. Midang status ka han enkual a, Lhi pawh a duhthawh leh ṭeng ṭeng khawp mai, up pawh ka up ve hmain panga lai a lo up fel diam tawh.
Muansanga message lo thleng chu ka en a "Nang pawh, khawvel nuam ti em em nu," a rawn ti ve a, khawvel nuam ka tih vak pawh ka hre lo e a.
"Nang awm lo phei la chu a nuam viau ang," ka va ti a, nimin ka damlo min lo kan ve loh vang khan ka la thinrim reng.
"Tunlai hi i thin a van chhe em em?" a rawn ti ta chiah reng a, amah vang vek tih hi hria se a ṭha ang. "I ngeiawm em a lawm," ka va ti ta thlawt a, "Engnge?" a rawn ti hu leh nghal.
"Eng mah, bialnu i nei ber," ka ti leh hram a, a online lo a a reh vang vang, khumah chuan a message changin ka bawk leh ren run phawt a. "Engnge i lungawi lohna?" a rawn ti daih a, sawi ka duh leh chiah loh avang chuan 'Chutiang ka nei lo,' tiin phone chu lukham hnuaiah ka dah ta daih. Ka tan sawi pawh a nuam chuang lo a, a bialnu tana hun a pe pawh chu thil dik lo a ni chuang lo a, engmah hi ka hrethiam tawh lo.
~~~
Vawiin lamah exam pawh kan zo ve tawh dawn a, chawlh kan nei nghal a ni ringawt dawn. Maths kan tih dawn avang chuan ka huphurh hran em em lo, chawk chak hran lo mahila zir nuam ka tih ber a nih avang hian ka thiam ve zung zung a, rin ai tak hian ka ti ṭha phian zel bawk a.
Exam zawhni kan phawklek hunlai ber a ni a, Maths kan ti bawk si, Arts ho chu an zo hma hlawm ngang mai. Keini Maths la ho tan chuan a hnuhnung ber a kan ti chu a hrehawm lek lek zawk.
Ka chawh zawh chuan ennawn pawh ka ennawn peih tawh lo, ka dah nghal daih. Maths paper exam zingah chuan a chhuak har pawl ka ni bik lo mahse ka chhuah chuan Muansanga ka va hmu nghal chat. A lam chu ka pan vat a, a bul ka thlen chuan "Kan zalen ta," ka ti a, a ṭhen deuh sak.
"I chhang ṭha em?" tia min zawh chuan "Ṭha ang," tih zawngin ka chhang a, a nui ringawt. "I chhang thei vek lo ami?" a tih chuan "Chhang thei vek e," chu ka ti leh tho a.
"Apuii a lo la chhuak lo ami?" Engvang teh hrep a zawt nge ka nih pawh ka in hre lo.
"Chhuak tawh e, a ṭhiante nen an leng dawn a," tia min chhan chuan "E" tih zawngin ka chhang mahse ka zep lo chhungril takin Apuii a awm ve lo tur hi ka lawm.
Midang an lo chhuah har em avang chuan school hnunga ṭhuthlengah chuan ṭhuin kan lo nghak a. "A hmun hi nuam i ti ve em?" ka bula ṭhuin a rawn tih chuan ka nghauh a, thlasik khaw vawh lai mah nise thli rawn thaw vawt seng seng chu a nuam tho.
"Thingkung vel a tama nuam ka ti, a hahdam. Helai hmunah hian in sak chilh mai ka duh," ka tih chuan a hmel en kher lo mahila a nui tih ka hre thei. "Arsi thlawk i hmuh velah duhthu i sam mai dawn nia," a rawn tih chuan ka nui hak hak. Muansangkima mai mai hi a, a tlangval dawn tawh a, arsi thlawk a duhthusam la sawi dut dut chu.
"I awih ami?" tia ka zawh chuan "I awih lo ami?"tiin min zawt let zek leh nghal a, lu ka thing nar nar a.
"Aw, hmeichhia i ni emaw ka ti a lawm," mifiam tih hriat zet a a tih chuan ka ṭeu nghal hlar mai. "Muansangkim, hmeichhia ka ni ve, ve ziah a che," tih ngaihna hre lo zet a tiin ka thaw chhuak hak a.
"Ka hria, ka hria, ka fiam mai mai che a nih kha," khi deuh ṭha a a tih chuan ka lo la melh khai thung. "I bialnu anga sam sei ka neih ve loh vang mai a, mi hmusit viau suh aw. Bialnu nei ber pa," tiin ka tho hluai a, a bialnu in la nu hnap hnap ang chauh hmeichhia anga a ngaih dawn chuan hmeichhia ka ni lo zawk mai ang.
"Malsawmsang, khatiang lam ka sawi tum a ni lo,"a rawn tih chuan ka kal sawn nghal hmawk hmawk. Kan in be ṭha ve thei dawn chauh a, ka thin a ti rim nghal zel mai. "I van thinchhe tak,"tih ri ka hriat rual chuan ka bag rawn chelh a rual nghal, ka bag a a pawh tlat vang chuan ka kal thei der lo leh nghal a.
"Min thlah vat mai teh aw," ka ti a, midang lo awm ve te lah chuan min en duh em em leh nghal a. "Min ngaidam em sawi phawt la," a tih chuan kan chhehvela mi awm chu ka en a, "Vawikhat mah ti khan min chhaih tawh lo la," buk nghauh pah chuan ka ti a, min thlah ve mai bawk a.
"Thil tui deuh ka lei ang che," a tih chuan ka ta var var a, min han chhaih leh na teh se a hre viau ang. "Kan inhmu lo vang vang dawn sia, min lei ngei chu a ngai. Chuan tiang khan vawikhat mah min chhaih tawh suh ang che,"ka tih chuan a bu nghauh a. Hall kawtah chuan Zorina leh Lhi chu ka hmu vat, anni pawn min rawn hmu ve nghal vat tho.
"Kan zawng che u alawm," Zorina chuan kan bul a rawn thlen chuan a ti nghal vat a, "Kan zawhna a rei tawh lutuk a, khutah kan lo ṭhu daih a lawm," tiin ka lo chhang thuai a. Vala kan nghak leh rih a, a rawn chhuah chuan muangchangin kein kan haw ta a.
"Kan inhmu lo vang vang dawn sia, kei chu school kal leh char char rih ka chak," Lhi chuan a rawn ti a, keipawh kumin chawlh chu ka phur viau lo. "Lehkhazir lo hian kal char char phal se,"a ti leh nang nang a.
"I ngaih ber tur chu i bula kal kha ania, a rawn leng em em ang," tiin Zorina chuan a fiam zeuh a,"Nangni pawh in ngaihawm dawn tho a lawm," a ti leh nang nang.
Kan ril a ṭam tlan tawh avangin kan school chhaka restaurant hnai berah chuan kan chawl a,kan school chhak maia awm e ti lo chuan kan vawikhat chawlhna a ni. Restaurant aṭanga kan chhuah chuan Muansanga "Engnge ka lei ang che?" a rawn ti a, ei chak ka neih awm pawh ka hre bawk si lo mahse engnge maw tal min lei ngei se ka duh. "I duh ber min pe mai rawh," ka ti a.
"Dawrah sawn ka va phei lawk," Muansangan a tih chuan Zorina pawn thil lei a duh avang chuan an in zui phei a, Lhite nen chuan kan lo nghak a. An rawn let chuan Lhi chuan Zorina a melh khai a,"Khatiang thil sual kha ti ti suh," a ti nghal hlak bawk. Meizial zuk ruk zeuh zeuh a ching a, Lhi hian a hau peih hle. A hauh ṭhin vang hi a ni mahna Lhi nena kan awm ve hi chuan a zu duh ngai miah lo thung.
"Kha le, ti kha chuan min ngaidam fel aniang chu,"tiin chocolate leh cola chu min rawn pe. Chocolate ka ngaina lem lo nain drinks lam erawh chu ka ngaina tih chu a theihngilh bik lo e.
"Muansangkim, ka duh ve. In va phakar ve a," Lhi chuan a rawn ti a, kei erawh intithei zetin ka nui var var thung. "A ba min rul a lawm," ka lo ti then a, Lhi hmuh tur chuan ka lek lang va va a. "Khawi pakhat zawk zawk kha,"tiin min chhuhsak a tum a, kawnglai a ni tih pawh ngaihtuah lo chuan kan in um ti tih.
"In va naupang chhia tak,"tiin an phun leh hluk hluk ṭhin a.
A hnuah chuan ka sem ve ta tho a, "Kha, ei ve la," Zorina bula ka tih chuan a lu a thing nak nak. Zorina tih lohin kan ei a, ka la chang tlem ber zui leh nghal a. Chocolate ral Lhi a awm a,a ei zo deuh vek.
In ka thlen hnu chuan ka khua a har nghal thei, ka ngai ve reuh khawp ang. In ka thlen chuan inthlak pahin phone ka en a. Muansanga message ka hmuh vang chuan ka nui vur vur.
"I bag a chocolate kha chu nangmahin i ei dawn nia," tih a ni a, ka bag chu ka hai rak rak a. A fiamthu miah lo,a lo awm tak tak. "I dah lai pawh ka hre lo reng reng. Ti kha chuan ka ngaidam vek tawh che," tih chu ka thawn nghal vat a, ka nui var var reng mai. Tlai ami ang ni tawh lo in fruit&nuts a ni a, ka ngaina daih zawk.
Lehkha zir tur a awm tawh lo bawk a, zanah chuan groupah kan inkawm ta reng a. Lhi chuan a rawn video call a, phur zetin ,"Apa ten khuta kan huanah sangha dil an siam a nih chu maw. Zanriah kan kil laiin an sawi chhuak a, a pain a phal vek a. Urlawkni chu a buaithlak emai ni sawm thum pakhatah i ṭhiante nenka hruai dawn che u ania a tia, lo in ring ru aw," a rawn ti a. Inhmuh khawmna hun ṭha kan nei tur chu kan phur hlawm hle a.
Hello guys, karleh aṭangin online class kal dawn a. Routine an lo siam thlap a, hunawl pawh a vang pharh ang mahse rawn dah chu ka tum tho a, type khawl dan te ka ngaihtuah a. Ti hian ka rawn sawi lawk tawp aw, kal tir puat puat hi a theih bik bawk si lo a, nakinah buai vak ka hlau tho bawk sia a buaithlak duh khawp mai. Chu chu ka rawn sawi deuh tawp, ka hmanhmawh lutuk emaw chuan min lo hai hreh lo ula
in lungawi zan kha ka duh ve tho sia
Engpawh chu nise ads click leh hram hram ang u aw
