by Amy Cck * ZORINPUIA POV *
Ka message chu seen mahse reply na ka dawng let ve tawh lo thung a. Ka hriat a chinah tun hi midang message ka thawn thlum ber tum a ni bawk a. Ni lo Hmangaihzuali lak a ka awm dan hi chu ka tan a vawi khat na vek a ni. Hmeichhia ka ngaihven hmasak ber a ni a mahse a ni erawh chuan a lak a ka feeling hi a hnawl thung a nih kha!
A pa a riah pui avangin a room ka chan sak ta thung a. A khumah chuan mu in ka nui leh suk thin. Mi duh tu tam tak an awm lai a he hmeichhia ber kher ka ngaihven ta tlat hi thil mak tak pawh a ni ve hrim hrim. Nizan a a tap ka hmuh a ka awm dan chiah kha ka sawi thiam lo. Nizan mai pawh ni lo in Brandona birthday zan a a tah pawh khan ka awm dan kha kei pawn mak ka ti.
Kha mi zan kha chuan a mitah khan natna ka hmu a, kha khan min ti na ve hial bawk. Chuan nizan khan chuan a hlauthawng tih ka hmuh sak thung a. Zing a ka pa ka biak khan chaw hnu lamah ka haw leh a lo ring deuh kha a nia. Mahse kei man ka cham rih tur thu leh Hmangaihi chhuk rual a ka let ve law law tur thu ka hrilh a. Ka pa pawn a mak a tih hmel viau. A chhan chu midangin a khawsa a awm chi ka ni lo a ka duh ngai lo tih a hre chiang a. Ka nitei te in lamah tak ngial pawh hian a riah hi chu ka riak khat khawp mai.
Nizanah ka mu miah lo bawk nen ka mut chu a rawn chhuak zui nghal mai a. Chhunah week kan hmang a, kan in khel chau nen zan khuain motor khalh in ka long run zui nghal a. Chhunah ka hah chawlh bawk si lo a. Ka chau pawh chu a awm ve hliah hliah. Chu pawh Hmangaihzuali vang bawk in! Hah chawlh emaw awm hahdam ai chuan a bul a kha ka thlang ta zawk miau a. Damdawiinah pawh khan a thiannu kha thlah haw nghal turin min ti lo se chuan ka la awm pui reng duh a nia. A thhiannu nen an in be char char a, sawi tur hre ve lo na fam chu ka phone ka khawih san ta ngawt a.
Vawiin kan chak chung chang leh game dang zel tur te an sawi zui luam a. Ka tel ve theih dawn tak lohah chuan kan house leader hnenah ka in report a. Football leh game dang a la awm nual a vang in min ui viau nghe nghe a nih kha.
" Mama i U leh i pa chaw va pe rawh aw. " Tuk thuan kan ei laiin nupuiin a rawn tih chuan " Kei man ka va pe ang! " Ka ti nghal vat. Tlanhlua lah chuan pawi a lo ti lo nasa mai.
" A... I hreh loh chuan a pawi lo. Dawr lamah kan kal a nga tlai lamah kan rawn kawi ang tih i lo sawi tel dawn nia! " Nupuiin a rawn ti leh mai a. Ka bu nghut. Chaw ei kham ve leh ka in siam nghal a. Tiffin chu la in ka chhuak zui nghal a. Maman motor a khal ve chhun chak thu a sawi avang chuan a bike nen kan in ken thleng a. Damdawiin lamah chuan ka tlan chhuak zui nghal vut.
Damdawiin ka luh chuan min en duh hlawm viau a, ka lam pan a corridor a lo phei ka hmuh chuan nui suk in ka pan zui nghal vut.
" Lo hmuah che ka tum a. I lo thleng tih min lo hrilh tur che a lawm! " Ka hma a dingin min chho melh ha a. Hmui ti sawi zauh in mit hmul ka san uk ringawt.
" I tan rawn chhuah a buaithlak ka ring a! " Ka tih chuan nui sak in " Kal ang. " A ti nghal zat a. Ward lam pan in kan in zui phei a. Papuia pawh a lo thu harh peih ve tawh a ni awm a. Kan thu fel chiah tiin Doctor in damdawi lei tur a rawn hrilh a. Din mai a tum chu a banah ka vuan nghal chawt a min en nghal vat.
" Chaw hi lo ei u la ka lo va lei zawk ang! " Ka tih chuan bu nghat in a thu leh mai a. Doctor in a lehkha pek chu la in ka chhuak zui nghal a. Tun tum kan boruak awm dan hi nuam ka ti viau bawk leh nghal.
Ka let chuan chaw an lo ei zo fel vel a nih hmel a. Papuia chuan a fanu ka hruai haw chu lawmthu te min hrilh luam a. Ka pa te chanchin te pawh min zawt luam bawk. Gate an hawn lai a ni bawk nen pawn lam a chhuah harh a tum chuan ka ding ve vut.
" Ka rei dawn lo. I awm chhungin pawn boruak dawn lawk ka duh a. Ka pa hi lo awm pui la! " A tih chuan ka melh ngur a, a ni pawn chuan min melh let ha.
" Awm pui ka ngai lo a nia. Va chhuak harh ru! " Papuian a rawn tih avangin ka hma a Hmeichhe ding chu dar sak uk in ka nuih suk. A pa ber in chutia a tih takah chuan kan in zui chhuak a. Ka hmaah chuan a kal a, a hnungah zuiin ka nui leh suk thin. Engvanga hlim em em nge ka nih pawh ka in hre chuang miah lo. Damdawiin kawt hmun reh lai deuh a thutna an siamah chuan a thu thla a, a bulah ka thu ve nghal zat. A hma zawn chu melh vang vang in thawk a la zui halh a, keiin a mah chu ka en reng thung.
" Engtik nge i let dawn? " A rawn tih chuan chhang mai lo in ka ngawi vung vung a. Ka chhan mai loh vang nge ka lam chu a rawn haw a, ka lo en reng tih a hriat chuan mit a rawn san ve ak a.
" Kan let rual leh ang chu! " Ka tih let sup chu a hmui pet zeuh in a bu nghat.
" Nuam i tih loh ka hlauh pui zawk che a. Kei lah damdawiin lamah ka awm zui daih sia. " A rawn ti leh mai chu chhang lo in ka nui suk.
" Ti nge i nuih a? Ka ngaihtuah tak tak che, i tawng duh lo ve bawk sia kan in saw nuam i tih loh ka hlau a lawm. " A rawn ti leh halh a. A thu sawi hi ngaihthlak a nuam ka tih zia hi a hre ve kher lo ang.
" He lai hi nuam ka lo ti viau a sin. " Ka tih chuan a awi chiah lo nge a ner nasa nang mai. Mahse nuam ka ti tak tak miau a.
" Hetah ka awm chuan min ngaihsak tih ka hria a. I ngaihtuahnaah ka awm ve thei a. Ka tan i in hawng em em bawk a. Nuam ka ti! " Ka ti sup chu ka nui hak ringawt. Kan inah kha chuan ka awm ve tih pawh a hre lo a ang thin a. Chuan keiin ka ngaihven viau laiin a ni chuan min ngaihsak let ve miah lo bawk a nih kha. Chu vang chuan helai hi nuam ka ti, kan in hnaih hmel bik riau in ka hre bawk.
" Nia, hetah chuan mikhual hming te i pu ve a. Bakah in inah min mukhual tha em a, nuam lo i tih ka duh bik lo a lawm! " A rawn ti a, tun a a lan dan hi chu hmuh a hahdam in hmeichhe zawi awi tak a ang viau bawk a.
" Min en reng suh! " Rei fe kan thut hnu chuan a rawn ti sap. A lan dan natural zet leh ngaihno bei ru riah hi hawi sawn san mai a har bawk em a.
" Enge min hnawl na chhan? " Ka tih chuan mit a khap fak fak a. Kei erawh in a chhanna ka ngai chang reng thung.
" Kha thil kha sawi chhuah ka duh lo a nia! " A rawn tih chuan ka thaw chhuak hawk.
" Keiin ka duh thung a lawm. " Ka ti hmuk chu ka lam a rawn hawi te te a, a mit meng chuan ka mit meng chhiar tum ang mai hian min melh ha bawk a.
" Thil theih a ni lo a. Bakah a chhan chu nang pawn I hre chiang a lawm! " A rawn ti hap.
" Nang aia ka naupan zawk vang hian maw? " Ka ti hmuk chu a dar a rawn sak ak a.
" Chung te pawh chu a niang chu, chuan chhungkhat kan ni ka tih kha! " A rawn ti let halh.
" Kha thil chu a hmung chauh a ni tih ka sawi tawh. Thisen a in zawmna kan nei loh chuan enge a pawi na? " Ka ti let ve sup.
" Engpawh sawi i la i pawm dawn lo a ni ti raw? " A rawn ti ta hap chu ka nui suk. Min hre chiang ve tawh a ni ka ring.
" A dik a lawm! Chuan thil pakhat ka hrilh ang che. Ka tet lai atang tawh in ka thil duh neih loh hi ka la nei ngai lo! Tun thleng pawh hian. Ka duh tawh chu ka neih hma chu ka neih theih nan ka bei thin. Chuan tun tum pawh hi bei dawn ka tum lo a nia! " Tih leh din ka rual a. Min melh nghal ha.
" Ka hmeichhe duh hmasak ber phei hi chu chan che ka tum miah lo! " Melh chhuk in ka ti leh sup. Nuam a ti vak lo nge a hrawk thian khar in ka hawi sawn nghal daih a. Nui suk in ka let tawh tur thu ka hrilh nghal zat bawk.
Ka sawi ang khan ka naupan lai atang tawh in duh ka neih chuan ka ta a ni nghal hmiah thin. Chuan a ni pawh hi eng tikah emaw chuan ka ta a la ni ang tih hi ka hming ka chian tluk zetin ka chiang bawk.
________________________________________________
* HMANGAIHZUALI POV *
Zorinpuia chu ka thlir liam ta ngawt a. A thu sawi engkim kha a nghet churh a. A mitah khan a ti mai mai lo tih ka hmu thei. Mama ang a fiam a, nuih liam pui mai mai theih pawh a ni ve lo bawk a. Ka rilru a ti buai ve hial in ka hria.
Ka pa bul a ka let rual in ka pa in Zorina chanchin min lo zawt vat a. A let tawh thu leh a la cham ve reng tur thu ka hrih chuan a fel a tih thu a sawi ve luam a.
" Pa! Ihh.... Pa Zothana pa leh ka pu kha unau dik tak an ni lo a mi? " Ka rilru kap tu em em mai chu ka zawt ta nge nge a. Ka pa pawh chuan ka zawt teh thut chu mak a ti nge min melh vung vung ringawt.
" Eng tin nge chutiang te i hriat. I pa Zothanan a sawi em ni? " A tih chuan lu ka thing nawk nawk mai.
" Chutiang engmah an sawi lo. A sawi tu pawh ka hre chiang tawh lo." Ka ti nghal zung zung. Pa Zothana ka puh chhiah a an duh hmel lutuk chu ka sawi kha ka in chhir leh deuh leh nghal.
" Nia, a dik a lawm! I pu nu leh pa te kha an in neih khan fa chhawm an nei ve ve a. I pu kha a nu fa bik a nia. I pa Zothana pa hi a pa fa bik a ni bawk a. Chuvang a kei ni an thlah leh chhawng te hi chu in hre ta vak lo pawh kan ni a. Thisen zawm lo na na na chu thlahtu te lam an boral zawh takah chuan in hriatte pawh a lo har zo tawh a. " A rawn ti charh charh a. Kei erawh in sawi ve mai tur ka hre lo. Zorinpuia khan a lo sawi dik tak tak a nih chu tih chiah ka rilruaah a awm.
" Mahse thisen in zawm lo mah i la kan in unauna a bo chuang lo a ni a. Rilru dang te kha i lo pu a nge. Kan pi leh pute kha an in neih tawh a, chuvang chuan an fate pawh unau vek an ni tawh tihna a ni bawk a. I hrethiam ti raw? " A rawn tih chuan nui lui sak in lu ka bu nghat. Mahse ka hlauhthawn leh buaina chu Zorinpuia hian ka lakah rilru dang a pu ta daih hi a ni!
*
*
Hun a liam ve hret hret a, ka pa pawh damdawiinah zan 4 kan riah luh hnuin a chhuak ve tawh a. A ke a la hman theih loh avangin school ah pawh a aiin Mama a kal zui a. Kei ni pawh he ta cham reng thei kan nih loh avangin vawin tlaiah Aizawl lamah kan let dawn a. Kan awm loh chuan ka nu a buai viau dawn tih ka hria a mahse tih theih dang a awm bik bawk si lo a.
Zorina pawh rin ai tak chuan a awm ve thei viau a. Kar khat vel kan cham a, ka pa damdawiin a a awm chhung khan dawr lamah ka nu a lo pui ve thin a. Ka pa chhuah hnu in ka nu in lamah ka awm tir a, kan pahnihin dawr lamah kan kal ve thung a. Mahse ni 2 bak kan kal lo thung.
" I in siam peih vek tawh em? " Mama room ah lut in ka ti lut nghal vat a. In a kan awm vek takah chuan ka room min kian leh in Mama roomah a awm ve leh mai a. An in a a khawsak thin dan ka ngaihtuah hian ka in thlahrung in nuam ka ti lo thin a. Mahse engmah a sawi sel ngai lo erawh a chungah hian a ka lawm tak zet.
A hman tawh thu a sawi chuan chhuah leh mai ka tum a ka in her chu ka hnung lam atang min rawn kuah nghal hlun a. Ka ding khawng awt mai.
" Enge i hriat a? Min thlah teh! " Zawi deuh tak a tiin ka tal a min kuah nghet sauh thung. Hnung lam atang chuan ka darah a khabe a rawn nghat a. A sang tha zer zuar bawk nen a rawn kun ngurin a nia ka rin. Ka pa ten an hriat ka hlau bawk si chu ka kut chuan a sam chhip buk laiah chuan ka han tham nghek ringawt a. Nui ngawr dawtin ka kut chu a rawn vuan a, ka kut pahnih chuan ka awm zawnah a vuan kawp nghal hmiah leh nghal.
" Zorinpui! " Zawi si, vin si, seh chilh nak chuan ka ti a. A rawn chet leh dan avang chuan ip chawi in ka thawk ka hip let kawk. A beng hnung lam atangin a hmai lum vung vung chuan a rawn nawr tawk a. A thaw chhuak leh suai suai thin chuan ka taksa chhung hi a ti khur der der thei hial.
" I rimtui lutuk! " Ti zawi sup in ka beng bulah a rawn phun a. Ka beng chu a hmuiin a rawn pet nghal zeuh chu mit ka chhing sawk mai.
" I mawl a mi? Min thlah vat rawh! " Zawi tein sawi mah I la ka vin deuh hlak chu a hre tho tih ka hria. Nui leh sukin a hmui chu a sawn thla a ka nghawng ah chuan a rawn nawr leh tawk a. Duh lo lutuk in ka tal zui ta nghek.
" Kan haw hunah pawh tun ang hian min ngaihtuah reng ang che! " Tiin a rawn phun chhuak sup a. Enge maw chu pawh chu a sawi ve ziah ni!
" Zorinpui! Ka pa te an rawn kal a nge? " Ka ti leh nghek a, ka tal zui nghek chu a kut pakhat ka kut a vawnna la thla in ka dul zawnah a rawn dah a, a taksa si thlawp in min pawt hnung hrawk a, min vuan nghet lutuk chu ka che thei tawh der lo leh nghal.
" Thawm i siam loh chuan an lo kal lo ang! " Ka beng pulah a rawn ti thawp sup a. Ka thinrim vang nge ka hlauhthawn vang pawh ka hre tawh nek lo, ka thin chu a phu dawt dawt a, ka taksa hi a lum pup pup bawk a . Zorinpuia lungphu ri dawt dawt pawh chu ka hre ve thei bawk a. A rawn chet leh dan a vang chuan ka hmui hnuai pet nghek in ka awm zawn a ka kut a vawn beh chuan a kut zawk chu ka hmer let ta nghek a.
Hepa hi a â tak zet tawh a nih hi! Ka nghawng sir lam deuh chu a hmui in a dai satliah mai tawh pawh a ni lo, a fawp zui dek dek a, a tir chuan a rawn za ve deuh a mahse a rei tulh tulh a ka sawi thiam lo ka awm dan chu ka kaiza tha te chu a rawn zawi tulh tulh a, ka tal sawn thei bawk si lo chu a khat tawk in chil ka lem kalh ringawt zel .
" Mambawih! " Pawn lam atanga ka nu in a rawn tih chu ka harh chhuak zawk a, ka meng bial kawk mai. Ka tha tawp in tal sawn tum chuan ka bei leh a, min kuah nghet sauh in ka nghawng chu a fawp uar zual sauh a, ka nu chu a rawn hnai zel tih chu a thawm atangin ka hre thei. Ka nu in kawngka a rawn hawn rual deuh thaw in min thlah a, min hmuh ka hlau lutuk chu ka kat nghal dawt mai.
" Koh i van hre thei lo ve! " Ka nu chuan a rawn ti lut hliai a. Ka nghawng tuai nauh nauh in Zorinpuia chu ka melh chho rawm a. A kut chuan a hmui tuai zauh in a khi suh duh chauh leh nghal.
" Dar eng zat velah nge in chhuah dawn? " Ka nu chuan a rawn ti leh a. Chaw ei hma a zan tlan kan tum thu ka hrilh ve nghal a. Eng eng emaw a sawi a mahse ka beng leh lamah a lut a leh lamah a chhuak leh zel. Chu pawh tun lawk a Zorinpuia chet dan vang khan. Ka nu a chhuah dawn chuan rang lutuk a um in ka um chhuak a ni mai. Hnung lamah Zorinpuia nui ri suk pawh ka hre zui a. Ka hlauh avangin ka tlan chhia ni ber in ka hria!
Mama school a rawn bang a, chaw kan ei zui nghal a. Ka nu leh pa te chuan Zorina chu an be luam a. Kei erawh vawi khat mah ka be lo. Ka ngei deuh tlat a, tlai a a thil tih avang khan ka be peih vel lo.
" U... Ngati nge i nghawng kha? " Laltlanhluan a rawn tih chuan ka chaw ei lai ka tawp chawt mai.
" Enge? " Ka ti hlak chu min chhan hma in hre chhuak thut in ka sam chuan ka hliah sawk sawk a, rannung in min seh ka tih chuan Laltlanhlua bawk chuan a awi lo nasa mai. En chian tum a ka sam rawn dah sawn tum a, a rawn tho uai chuan ka fian in ka lo vaw nghal fawk a. Kan tih thin dan bawk in ka in hnial zui leh nghal a. Zorinpuia lah chu kan sirah tawng lem lo in a lo then ve suk suk a. A mah vanga hetiang a awm ka ni tih hi a hre lo emaw ni zawk ni.
" Engtia rei nge min biak lo i tum? " Rawn ti sup tu chu melh pawh ka melh peih lo. Tukverh lam ka hawi hmak a. Chaw ei kham fel veng vawng khan kan chhuak a. Kan tlan ve fe tawh. Mahse kan la in be miah lo.
" Heiii.... " A rawn tih pawh chuan ka hre lo awm hmak.
" Hmangaih! " A rawn ti zawi sup chu ka melh nghal rawm.
" Ka hmingin min ko suh! " Ka ti nghal hlar.
" A nih chuan engtin nge ka koh ang che? " Nui zal in sum zet a a rawn tih chuan chhan ka tum uk a mahse chhan dan tur ka hre lo. Min U rawn ka ti in ka u i ni lo a ti bawk si. Hahthlak e mai a.
" Min ko lo mai rawh! " Ka ti bul leh hmak chu zal zet hian a rawn nui chhuak hawk a. Hrilh hai zet in ka en ta tawp. Enge nuih tur pawh ka hre lo. Mahse tun ang hian a nui ka la hmu ngai lo tih erawh ka hre thung.
*
*
Kan khaw lam a kan awm chhung in college week pawh an lo hmang zo ve mai a. Class pangai in kan kal leh mawp mawp tawh a. Ka pa te nen pawh kan in be chhun zawm reng a. That lam an pan zel tih ka hriat chuan ka lo hahdam ve sawng sawng a. A ke erawh a la hman theih loh avang in tiang nen a in hawl ve beuh beuh tih Maman a sawi chuan ka pa chu ka khawngaih reuh viau mai.
" Zuali... Prof. Saidingi naute chu i en ve dawn em? " Hlimin a rawn tih chuan lu ka bu nghat.
" Chawhnuah frist period ka nei a, chu mi zawhah ka kal ang ka tia! " Ka ti let ve mai a. Saidingi chu a ai ka kal sak professor hi a ni a. Nizan khan naute mipa a nei a, ka va en ve ngei chu a ngai a lawm.
Hlimi lo kal ve la ka ti nang in last period thleng in class a nei a, a thei ve ta lo a. Ka hman ve leh taxi in damdawiin lam ka pan a, damdawiin luh hma in nau enna tur ka lei kawi a, an awmna tak ka hriat loh avang chuan damdawiin corridor ah ding in ka phone a. A nau nen an awm thu sawiin, a nau min hruai tur in a rawn kal dawn a, lo nghak tur a min tih avang chuan ka lo nghak ve ta ngawt a. A nau chu eng hmel pu nge a nih pawh ka hre bawk si lo nen a min rawn hmuh loh hlau chuan ka hawi kual ve ruai a.
Ka hawi na lam a ka mi hmuh avang chuan ka hawi sawn mai thei tawh lo. Rammuanpuia sawn he tah enge a tih ve ni. Ka lam pan chuan bing zet in a rawn kal a. Ka hmaah tak a rawn ding khawng nghal luah chu hmuh loh der theih pawh a ni tawh lo.
" Kan in hmu leh ta a! " A rawn tih chuan ka ner sak.
" I kal na turah kal rawh! Min ti buai lo teh! " Ka ti zui hlak chu a rawn nui suk a. Engvang a ka mi nghah pawh chu a va rawn thleng har ka rilru chuan ka ti vawng vawng a. Ka hma a Muanpuia chu hmu lo der ngat ngat in professor chu ka call leh a. A ni lah chuan a rawn chhuah daih tawh thu a sawi bawk si chu. Min hre lo a nih ring in a phone no te chu min rawn pe a. A nau no a ka call rual in ka hma a ding phone chu a rawn ri zui zat a. Hrilh hai zet in Muanpuia chu ka en ta ngawt. Hepa hi a nau a ni tihna maw?