MY SEXY BILLIONAIRE MOM CHAPTER 56 - 58

Episode kal lai dah luhna

Moderator: writers

Tevala Renthlei
Posts: 16
Joined: June 15th, 2021, 10:23 pm

MY SEXY BILLIONAIRE MOM CHAPTER 56 - 58

Unread post by Tevala Renthlei » June 21st, 2021, 7:54 pm

CHAPTER 56
A ngaihna a hrelo hle, tunge ni ang tih a ring thiam lo, beisei si beisei ngam vak silo hian, ‘Ka nu maw’? A zawt ta tawp a.

‘Aw, i nu’ nui sangin Betty chuan alo chhang a.

Elevator atanga chhuakin, room kawngka chu zau vak lovin Betty chuan a hawng a, Young master chu lut turin a zaizir a, amah chu kawngka bulah chuan inringtawk tak mai hian a ding tau a.

‘Ka nu’ Chuck chu a luh pah chuan a zam ru ve hle.

‘Chucky, lo lut rawh’. Phone call a, anu aw ngei kha a ni tlat.

Chuck chuan a nu a hmu chu a rin aiin a la naupan hmel daih mai, kum 35 vel awm lek hmel ala pu a ni. A hmelthain, a invawng uluk tih a hriat hle a. Mitmengah a nu chu chhun hle.

‘Ka fapa, Chucky, lo kal hnai teh’ Chuck chuan anu chu panin a kuah vawng vawng a. Vanlaitla ang maia inngai, nu leh pa pawh neilo, chhungte pawh neilo ni a a inhriat thin te kha a rilruah lo tharin a mittui chu a rawn hnam tial tial a, a far zawih mai, dan hman a ni lo.

‘Ka fapa, ti khan awm suh, hringnun ah hian fight tur tam tak a awm a, chutah chuan i chhel a ngai’ tiin a kuah bet a.

‘Ka pa hi khawiah nge’

‘Ka rawn haw hmasa a ni, ka fapa, Karen Lee kha keimah’

Chuck chu a meng bial kawk a. Mak a ti ngei mai. He hotel, Richard Yuri hnen atanga leichhawngtu Karen Lee maw. Anih chuan Surname hi enge awmzia ni ta ang le? Chu erawh a zawt ngam rih chiah lo.

‘Ka nu, engatan nge he hotel man to lutuk tur hi i lei kher a’

‘Ka fapa, ka business tihnawk thei chu ka thenfai zel angai lawm chu chu business i tih chhoh hunah pawh hre reng ang che’

‘Aw le, ka nu.

‘Bawiha, eitur ka siam sak che hi ei dun ang’ A nu chuan eitur a siamsak chu a rawn la a. Chuck chu a lungchhe hle mai, chutia a nu thilsiam ngei mai a han ei chu, hun kal tawh zawng zawngte a ngaihtuah a, hetianga hmangaihna hi a dawng ngai lo kha a ni a.

‘Ka nu, ka awm rei lo mai ange, ka thiannu khan minlo la nghak reng ang’ tiin chulai hmun chu chhuahsan a tum rilru a.

‘Awle, bawiha, fimkhur takin aw’

‘Kan inhmu leh thuai dawn nia’ Anu chu melhin, Chuck chu a chhuak ta nghal a.
Elevator ah chuan chhukin Yolanda pawh chu alo la awm reng a. Midangte pawh chu, chulai hmunah chuan thil engmah thleng ni awm lo tak hian an lo phusa leh tan tawh a. Chutia, elevator atanga Chuck rawn chhuak an hmuh chuan an titi lai chu an tawp deuh thuap mai. Chuck chu an lo en thap hlawm a.

‘Kha mite kha eng ang nge an nih min hrilh chiang thei em’ Karen Lee chuan Betty chu a melh a.

‘He khawpuiah hi chuan mi hausa ber pawl an ni awm e, company lian ve tak tak pathum an nei a, thil an tithei fu mai, tin, Gang rualkhat hi an zawm deuh ni awm tak a ni’ Betty chuan a hriat ang ang chu a hrilh a.

‘Company pathum chauh an nei a, tiang khan mi chunga leng ang maiin an khawsa a maw? Ka pafa duatlai lakah kut an thawh leh nghal a’ a ti ram hmak a. A awki chu vin lo mahse khawngaihna aw a tel lo tih a hriat theih.

‘Boss, tunah chuan damdawi in lamah hruai an ni a, an chhuak har lutukin ka ring lo, engtia tih nge i duh’ Betty chuan Karen Lee chu uluk takin a en a.

‘Ka fapa chungah harsatna an siam tawh tur a ni lo’

‘Boss, kan dahtha mai dawn em ni? Tunah ka naute ka hrilh nghal mai dawn em ni’ Betty chuan Boss Karen Lee tana rinawm taka thawh chu a tum a ni. Tin, Boss chu mi hausak anih mai piahlamah rilru tha tak, midangte harsatna siam zawnga awm hmasa duh ngailo mi a ni tih a hria a.

‘Ni love, helai hmuna thilthleng hretu tam tak an awm a, Hospitala va umzui a, chutiang thlentir chu ka la duh love, Miten Chuck an hmuh zui dan tur hi ka ngai pawimawh ber rih’ Betty hnenah chuan a fapa chu a ruka venhimna pe turin a hrilh a.

‘Ka kalsan lawk che avangi min hrethiam dawn nia’ Yolanda bulah chuan Chuck chu a ding a. chutia thuthmun a rem ve tak nghal mai loh avang chuan Chuck chuan chulai hmuna awm reng chu a duh vaklo ni turah ngaiin, ‘a pawi love, boruakin a zir lo bawk nen, haw mai ila pawi iti em’ tiin Yolanda chuan a zawt a.

Chuck chu a nui sak a, ‘tha i tihte chuan’

Yolanda chu chair atanga rawn thovin pawnlamah chuan an inkai chhuak a. Thil thleng chu sawi tur tam viau mahse an pahnih inkarah feeling engemaw tak an neih ve ve avangin sawi tur reng an hre lo. Reife ngawi renga an tlan hnuin, Yolanda chuan Chuck chu melhin thinlung leh tihtak zet hian ‘Zanin thilthleng kha pawi ka ti takzet’ tiin a hrilh a.

Car chu muang changa tlanin, ‘kan duh vang renga thleng a ni hleinem’ Chuck chuan Yolanda rilru hrehawm chu a thiam ang tawkin thawi dam a tum a.

‘Mi tha lo tak anih kha, i tan kawpzui zel chi a nih ka ringlo’

‘Um, a dik alawm, hun kha leh chen kan inkawp chhung khan harsatna lian tham em em min siam lo mahse, chhungkaw hausakna hmachhuan tak mi ani tih ka hria a, chumi avang chuan ka laka a insawitheihna tur engmah ka la siam lo, tun thlengin’ Yolanda chuan a thu dik tak chu a hrilh vek a.

Chuck chuan chhan vak ngaihna a hrelo, a ngawi reng a.

‘Boss, he thil thleng avang hian ka chungah engpawh thleng se dem thei che ka nei lo’ a ti chuai raih a. Lehlam hawiin darthlalang chhanah chuan pawnlam chu a thlir daih a.

‘Ni love, chutiang ngaihtuah a ngai reng reng lo’ Chuck chuan aw dam tak hian a chhang a.

An pahnih chauhva chuang an ni bawk a, Boss tia ko a ni. Yolanda tan hian Manager hna thawh chu duhthusam a ni. Chulorengah Plaza lian tak ani leh nghal, Boss future bright tak hnuaiah ala ni lehzel nen. Zanin thilthleng avang khan Manager atanga ban a ni thei tlat. Amah avangin Boss chuan mualphona nasa tak a tawk a.

Pawnlam melh pah chuan a mittui a far zawih zawih a, a dinhmun tur angaihtuah a, a lungchhe tak zet a ni.

Car chu kawngsirah muangchanga tidingin, minute rei lote car steering vuanin a ngawi vang vang a, Yolanda kutah chuan ava chelh sak a, Yolanda chu a rawn hawi chuang lo, pawnlam chu a la melh reng a.

A rilru lehlamah a tette atanga alo chenpui, a nupui, Yvette. Mahse, an inkarah engmah la thleng lo. A thinlung atanga paihbo tur chuan hun tam tak a mamawh dawn tih a inhria. Lehlamah a tana mi tha em em, rilru tluang leh duhawm, Yolanda chuan hnemtu a mamawh takzet.

Va awm hnaiin, Yolanda banah chuan na vaklo hian a pawt a, a insum zo lo, Chuck chu a boss ni mahse, a awmah chuan a bei thlawp a, a tap khur dar dar a.


Chuck chuan nghet taka kuahin, a rilru leh thinlung zawng zawng chuan a khawngaih a ni. Mahse, heihi khawngaihna ringawt nge, hmangaihna zawk?


Minute rei a nilo, Chuck chuan Yolanda khabe ah chuan dim te a dawm kangin, a sam chu a bengah chuan a hui phei sak a, William in a ben na lai, a hmui chu dim te in a tuai sak a, a hmuiah chuan muangchangin a fawhsak ta vawng vawng a.

Yolanda pawh chuan ngawi rengin a lo dawh ve tawp a, chutia a thlah tak mai siloh avang chuan Yolanda pawh chuan rilru zawng zawnga inpumpek turin a chhang let ve ta a. Rei ngial, lungchim taka an infawh hnu chuan Yolanda chu a koki ah a pawt bei thlawp a, a tukhum sam chu a chul sak heuh heuh va.

Chuck chuan a nun mal tak tawmpui turin Yolanda chu a thlang fel ta. Chu a thutlukna siam chu Yvette a hmuh leh hunah a thlak mai angem? Nge gentleman anih zia a lantir zel zawk dawn?

Sawi tur ber pawh an hre lo, Yolanda chuan ngawi rengin hmalam chu a en char char a, chutiangin Chuck pawh chuan a car chu ngawi rengin a khalh a. Mahse, an rilru erawh hmun khatah a awm. Tawng lo mahse, an hlim ve ve a ni.

Phone alo ri a, “Hello, Chuck, naktuk chu ka company chungchangah thil sawipui lawk che ka duh a, city square ah kan inhmu dawn nia’ Yvette chuan a rawn ti a.

Chuck chuan chhan ngaihna a hre lo, a ngawi reng a, rei vaklo hnuah chuan, ‘Awle, a tha lawm” tiin a chhang a. “A that chu, anih phawt le” Yvette chuan phone chu a dah nghal a.

A tukah chuan Yvette chu hmu ta se, Yolanda nena an inkara thilthleng hi hrilh chi a ni angem? Eng angin nge a ngaih ang. A rilru chu a kal thui viau a, mahse Yvette lam ngaihtuah hman a ni tawh lo tih a inhria.

Phone a rawn ri a, Chuck chuan “hello, ka nu, eng thil pawimawh nge ni ta, tun ang zing zingah te min rawn biak tak” tiin a nu Karen Lee chuan thil pawimawh hmanhmawh thlak tak hrilh duh a nei anih ngei a ring a. “Chucky, vawiin tlai lamah hun i nei angem, dinner ei pui che ka duh a”


CHAPTER 57
“Awle, ka nu, vawiin ah hian city square kal chhoh pui dan turah ruahmanna siam kan lo tum a, mahse renovation ti tura company ka biak te chu nidanga inhmu turin appointment ka lo siampui mai ang. Ka rawn kal dawn nia” tiin a chhang thuai a.

“Awle, Chucky bawih, tlai dar 5 ah, Royal Villa, Grant Resort ah” dar 5 anih chu aw” tiin phone chu a dah a.

(Yvette company pawh chu a thawrimna vangin a lo thanglian leh ta, a harsatna lian tak avanga a in ngei a hralh hnuah in pangngai tia sawi tur a la nei lo. Lei a rilruk. Wendel hnen atangin vanneihthlak takin man tlawm takin lei tur a hmu.)

Yvette pawh chu college ah hun tam zawk hmang mahse, chawlh pawh sawi lovin a training company tan chuan theihtawp a chhuah chhunzawm reng a, hah pawh a hah phah viau a. A company pawh chuan beiseina eng tak an nei chho leh tan mek a ni.

“Chuck, helaiah hian i duty shift hi ka hrethiam lo hle mai, zing ah i rawn lang ziah a, rotation in in kal lovem ni” tiin City Square a Chuck rawn lut chu alo zawt a. Chuck chu a hamhaih lek lek mai, mahse insiamtha vatin, “college kal tur ka ni thova, zing lamah zirlai ka zir hman vak chuanglo nen, zing lam duty hi ka duh zawk deuh thu ka hrilh a” tiin a chhang a.
“Anih chu, i zirlaiah rilru pe la, exam a hnai tawh a, part time job i tih pah avang hian i zirlai ah i tihchhiat phah ange” tiin Yvette chuan Chuck chu duhsakna aw ka chuan a hrilh a. Chuck chuan a rilru takin mak a ti a, hetiang ang hian, tun hma zawngin a be ngailo kha a ni a.

“Ka lawm e, ka hna ka tan phawt ange” tiin Yvette chu a kal pel a, Manager room lamah chuan a lut a. Chutia hnathawk tura kal si, manager room a a lut leh phawt a hmuh chuan thil nihphung pangngai anilo tih Yvette chuan a hria. Mahse, Manager Yolanda hnuaiah thawk mahse inthiantha tak an niin a ngai a, mak pawh a ti lutuk lem lo.

Yolanda chu dan pangngaiin, a thawmhnaw hak chuan a ti hmeltha leh ngei mai. Chuck rawn lut a hmuh chuan nui sangin alo welcome a. Dawhkan hmaa thutna awm chu a kawh hmuh a, Yolanda hmachhawn chuan Chuck chu a thu a.

Nidang chu nise, city square tana an hmathlir te an sawi dun leh nghal tur a ni a, mahse, tun tum chu nidang ang a ni tlat lo. Chuck chuan sawi tur a hre lo hle a, a ngawi deuh reng a,a hmaa thu, nula hmeltha leh pian thiam zet chu a melh a, tukverh lam a melh leh thin a. Yolanda pawh chuan tih vak ngaihna a hre lo, chhuanlam tur siamin city square tana ruahmanna a siam, file chu a keu a, Chuck chu a hmuh a.

“A tha lawm” tih chauhvin Chuck chuan a chhang a. Aw a thian a, “en teh, nizana” a ti hman chauhva, “ka tihpalh lutuk, i awm ti nuam lo duh suh, ka thiam loh a nih kha, theihnghilh zawk ang” tiin Yolanda chuan alo pawt chat vat a.

“Ni lo, englo a nia” a ti hman chauhva, phone a rawn ri a, Chuck chuan phone la chhuakin a han en chu Lara Jean chuan video ngatin a rawn call a, ‘henu hi engtinnge ka tih dawn ni, a huangtau tak zet a ni’ a ti rilru a. Phone chu a hmet tawp a. Chuck chuan sawi chhunzawm a duh viau naa, mahse Yolanda chuan file chu a keu a, a rawn melh tawh loh avang chuan, “Ka kal phawt ange” tiin chair atang chuan a thova, office chu a chhuahsan a. A chhuah fel hnu chuan Yolanda chuan a en zui reng a. A rilru ah ngaihtuahna hrang hrang a lut a, mahse chu zawng aia pawimawh, a hnathawh laiah chuan rilru zawng zawng pek a ngai a ni tiin amah leh amah chu a inhrilh a.

Royal Villa, Grant Resort ah chuan dawhkan pakhat kil in karen Lee leh Chuck chu an thu a, ei tur erawh an la order lo. A nu chuan “en teh bawih a, i hmalam hun hi enge a nih zel dawn chu ka hre hauh lo naa, rinawmna leh taihmakna nen i thawh chuan hmalam hun eng tak i nei a, i nu hian ka puih theih loh hun che pawh alo thleng thut thei” tiin thutak fe hian titi bul a han tan phawt a.

“Ka nu, eng thu nge sawi i tum” tiin Chuck chuan thil awmzia hriatthiam loh hmel takin a zawt let a. Ni e, nu a nei tih a inhriat tirh atang khan a nu hian thil reng reng chu sawi kual lovin anihna tak sawi nghal mai turin a duh thin kha a ni a. Tun tumah pawh hian anihna tak sawi nghal mai turin alo beisei a ni.

“Mihring nun tichhetu hmasa ber chu rinawm lohna hi a ni. Chu chuan hlet tam tak a nei a” Karen Lee chuan Chuck en pah chuan a ti leh phawt a.

“Ka hre reng ang ka nu” tih bakin chhan ngaihna a hre lo.

“En teh Chucky bawiha, ila naupang viau a, thutlukna dik leh diklo pawh kawng tam takah ila thliar hrang thiam lo ang tih pawh ka ring che, tin, tuna ka sawi tur hi ila ngaihtuah ngai loh pawh a ni thei a, thutlukna siam pawh i harsa viau mai thei”

Chuck chuan chhan dan tur a hre tawh lo, enge a sawi tum lah a hre bawk si lo, a ngawi reng ringawt a.

“Bawiha, i tana tha tur bak hi engmah duh ka nei lova, hun rei tak chhung chu ka lo ngaihtuah tawh a, midang bula i la inthup dan zawng zawng pawh hi ka hre vek a, chulamah chuan sawi tur ka nei lo. Tha i ti anih chuan a tha a ni mai. Mahse, hetiang reng hian nihna thup theih loh hun i nei ang”

“Tin, mahni nihna kan thup avang hian nasa takin thil thalo tihna chance a sang tih hre reng la, chutiang chu thleng lo se ka duh a ni”

Chuck chuan, a nu thusawi dan hmang a hriat chuan thil engemaw lian tham taka thutlukna siam tir a tum niin a ngai a, mahse engthil nge tih a hre thiam thei lo.

“I nihna dik tak i lan chhuah tir hunah chuan hmeichhe tam tak hian an rawn pan ngei dawn che a, tunah pawh a ni tawh reng mai thei, chu chu ka hriatpui chiah lo che”

Chuck chuan sawi tur a hre lo, dawhkana tui chu a thli a, a nu a pe a, amah pawh a inthlir bawk a.

“Hmanzana i hmeichhe rawn hruai kha tunge anih a, engti mi nge anih tih te ka hre vek tawh a, in pahnih inkar erawh chu ka hriat phak a ni lo”

“Chucky, puitling i ni ve tawh a, chumi chungchangah chuan engemaw tak sawipui duh min nei em”? A nu Karen Lee chuan Chuck chu nelawm tak si, thutak hmel takin a melh a.

Chuck chuan a nu thiltih theih zia a hria a, sawikual vak ngai lovin Yolanda chungchang pawh a hre vek tawh tih chu a ring nghet bur.

“Ka nu, i hriat angin Yolanda kha reilo te chhung atan Manager atan ka ruai lawk a” Chuck chuan aw a thian karh karh a, “mahse ka nu, Manager puitling ang maiin, a hnaah a inpe zova, a fing em em a, a remhre em em a, Manager tak tak turin lak mai ka lo rilruk a”

“Chucky, chung zawng zawng chu ka hria alawm” tiin a nu chuan thildang beisei zawk ni awm takin Chuck chu a melh a.

“Ka nu, ka tana tha tura i ngai anih chuan ka hnial lo che” tiin Chuck chuan a hrilh a. Chu chu a nu chhanna beisei ani tih pawh a hria.

“Chucky, final decision siam chu i rilru ah ala awm lo pawh a ni thei, mahse ka sawi hi ngun takin ngaithla la, ka sawi tawh angin i nihna hi i zep reng thei dawn lo, chu hunah chuan hmeichhe tam takin an rawn la zar buai dawn che, mahniin i ding zo lo fovang, chumi thlen hma ngei chuan venpui tur che i thlang duh anih chuan, keipawhin tha ka ti khawp mai.”

Chuck chuan, a nu chu uluk takin a en reng a, an titi na chu eng tiang takin nge a tawp tir dawn tih erawh ala hrethiam chiah lo.

A nu chuan, Chuck awmdan atang chuan a ngaihtuahna chu a rin zawn thei a, “Chucky, tun tumah hian inneih chungchang kan sawi rih lo a nia, mahse chutianga i remti anih chuan inhual lawkna i neihpui ngei a tha ang” tiin a hrilh a.

Mak tih hmel deuhvin Chuck chuan a nu chu a en a, “mahse engtin, heichu kan pahnih inkar chauh pawhin a tihtheih mai lovem ni?”

“Ni love, i duhthlan turah ka inrawlh lova, mahse ka rilrem zawng tak i thlang tih ka hria a, min ti lawm hle a ni. He inhual lawkna hi nangmah venpuitu tur anih ang chiahin lian tham takin kan buatsaih ang” tiin Chuck chu a hrilh a.

A tana a nu pawimawh zia a hria a, hnial chi ah a ngai lo, “Aw le, ka nu i remruat ang chuan i duh hunah ruahmanna i siam dawn nia” tiin Chuck chuan a nu chu a chhang a.

Waiter an kova, eitur chi hrang hrang, man to ber ber chi an order hnu chuan, “Ka nu, i ruahmanna siamah chuan ka pa hi engtin nge ni ang? A rawn tel dawn nge dawn lo? Ka pa hian engtin nge a ngaih ang”

“Chucky bawih, heng zawng zawng hi i pa ka sawipui a, i pa remtihnaa ti ka ni”

“Anih ka pa chu a rawn kal ve dawn em?” Chuck chuan a pa ala hmuh loh avangin a phur ru hle mai. A pa hmuhna remchang a nei thuai dawn niin a ngai a.

“Chucky, i pa hi a rawn tel thei lo anih pawhin reilo te hnuah in inhmu thuai ang, a business hi i hriat thiam phak bakin a lian a, a buai khawp mai a, dawhthei taka i awm a ngai rih a ni” ti chauhvin a chhang thei a. Engmah a sawi chiang ngam bik lo.



(Zelda chuan a restaurant lamah rilru zawng zawng pe thar lehin city square chu boss a hriat chhuah huna hmalak leh chauh a tum)

Kar khat dawn aliam ta, Chuck leh Yolanda pawh chu nitin office ah an inhmu a, mahse, an inkar chungchang titi hnuhnung bera an thusawi ah khan laklawh takin an pawtchat anih kha.Yolanda tan pawh ngaihzawng anga en ngam chi a ni lova. Chutihrualin, a boss anih miau avangin an inbe tha em em reng thova. Zanlamah pawh wechat hmangin an inbe reng thova, mahse plaza chungchang bak an sawi dun ngai meuh lo.

“Weekend a ni a, shower a a inbual lai chuan phone message a lo dawng nual a, a inbual zawh hnu chuan phone phe zek zek chu a en a, Lara Jean chuan thlalak hrang hrang a rawn thawn leh chu niin. “He nu tak hi chu aw” tiin a nui suk a. A dah leh mai a.

Chutia Baller in message a read tih a hriat chuan, Lara Jean chuan ‘baller, naktuk tlailamah i hman angem, mall ah min kalpui lawk la” tiin message a rawn thawn leh a, emoji a rawn dah tlar bawk a. Chuck chuan engtinmah a chhang chuang lo.

Khuma mu pah chuan, Yolanda profile chu a check a, a thlalak chu a en reng a, “Yolanda, i buai em, biak lawk che ka duh a” tiin message a va thawn a.

Yolanda chu a online lo, mahse Chuck message a dawn atanga rei vaklo hnuah “buai love, min lo bia la” tiin a reply a.

A nu nena an titi na chu engkim hrilh a ngai tawh tih a hria a, engtik ah nge a nuin, ruahmanna a rawn siam dawn a hre bawk si lo, chumi hma ngeia a hrilh chu a ngai a ni. Engtin nge a sawi tan ang? A rilru a buai ru takzet.

Anih nih ni turin Yolanda chu a call a, rei pawh a in ring hman lo, Yolanda chuan a lo la vat a, “Yolanda, thil sawi pui duh che ka nei a, i awmna hmunin a zir lo em” tiin bul a han tan te te a.

CHAPTER 58
“Rem lo love, zanin phei chu dorm ah ka riak lova, hotel lama riah ka lo rilruk zan tak a ni a” tiin a rawn chhang a.

Chuck chuan ngaihthat lo hmel deuh hian “Engati nge hotel ah” tiin a zawt vat a.

“Eng dang ni love, exam te a hnai tawh bawk nen, dorm ah chuan duh aiin rilru pek a har a, chhun lamah Manager ka ni bawk si a, lehkhazirna hun ka nei tlem deuh ka tia” tiin a rawn nu pah a.

“Engatinge, chutiang te chu min hrilh loh, ka hnenah pawh room ruak a awm a, tin, hmun dangah pawh ruahmanna ka siam sak thei che a” tiin Chuck chu a lungawi lo lek lek zawk hial a.

“Sir, ka ti buai tam tawh che em mai, ka hnathawhna pawn lam ah chuan tihbuai che a tul reng reng lo” tiin Yolanda chuan a chhang a.

“Ka hmingin min ko thei lom ni, Sir, tia inkoh te chu”. Titi pawh kal mar chho viau mai, a tantira a huphurh teh lul nen.

“Yolanda, ka sawi tur hi uluk takin min ngaihthlak sak la” Yolanda chuan “Aw le,” ti chiahin a rawn chhang a.

“Hmanzan thilthleng kha i hria anga”

“Aw, thil thleng palh ani lawm ni” tiin Yolanda chuan Chuck inthiam lo lutuk tur chu alo pui vat a.
“Ni lo, kha thil thleng kha, thu tlukna ka siam hnua thil thleng asin” Chuck chu a ngawi deuh vang vang a. Yolanda pawh chuan sawi tur a hre lo. A ngawi reng a, rei deuh fe an ngawih dun hnu chuan, “Ka nihna hi engtik hunah emaw chuan thup sen loh hun ka la nei dawn a, chumi min venpui tur chuan ka duh che ni”

Yolanda chu a ngawi deuh reng a, “Aw le, ka theihtawkin ka venpui ang che”

“Nilo, Yolanda, ka sawi awmzia chu, chu hunah chuan ka nuna rawh luh tumin hmeichhe tam tak an rawn lang dawn a ni. Chumi min dan pui tur chuan ka nunah hian rawn lut la ka ti a ni”

“Chuck, engmaw? Mahse.. a ti bah nuai a.

“Thu tlukna ka siam tawh a, ka nun min tawmpui turin ka thlang che a, chu chu min remtihpui em, hmanni thilthleng kha tihpalh a ni lo tih ka sawi duh”

Yolanda chu a ngawi reng a. “Chuck, i tan hnawksak mai ka ni ang tih ka hlau a ni”

“Ni lo, ka tan engkim i ni zawk”

Rei fe an ngawih dun hnu chuan, “Chuck i thutlukna siam chu keipawhin ka pawm a, i nun venpuitu tura min thlang anih chuan i tan rinawm takin theihtawp ka chhuah zel ang che”

“Mahse hei hi min hriatsak la, William Yuri hian ka lakah insawitheihna tur ala nei miah lova, chuti chung chuan awlsam taka min thlah hi a tum dawn miah lo a nia”

“Chu chu nangma buaina a ni tawh dawn hleinem, ka buaina a ni tawh a, ka kutah engkim i dah dawn nia, keiman ka chingfel dawn nia” tiin Chuck chuan Yolanda chu a tawng thlamuan a. Zep lova thil nihna dik tak leh thil rawn la thleng tur a hrilh avang chuan Chuck chu a lawm rilru hle zawk a.

“Yolanda”

“Aw, enge Chuck”

“Kha mi zana thiltleng”. “Ni lo, buaina thleng kha, khami tuma min pui tura rawn kal kha thil awmzia ila hre lo mai thei a.”

“Hotel thar neitu, Karen Lee kha i hria ang tiraw”

“A hming chu ka hria a, mahse tunge anih ka hre lo”

“Karen Lee kha ka nu a ni a, phone call a ka biak kha a ni. Min rawn puitute kha ka nu in a rawn tirh te an ni a”

“Karen Lee kha i nu maw”. Mak tih hmel deuhvin a thusawi lai chu a rawn pawt chat a.

“Aw, ka nu a ni”. Thil tam tak i hriat thiam loh a awm ang tih ka ring. Tun huna sawi vek sen a ni lova, hun remchang ala awm zawk ang. Ka sawi chhuahna chhan chu, ka nu nena kan ruahmanna in Inhual lawkna hun buatsaih tha kan ti a, rem kan lo ruat a, i ngaihdan hriat ka duh hle mai” tiin Chuck chuan Yolanda chu a ngaihdan a zawt a.

“Chuck, min surprise tam tawh hle mai, hemi chungchang hi chu kan la sawi tha zawk dawn mi niang” tiin a chhang a. Zankhat thilthua ruahmanna siam vek chu a fuh lohna chin awmin a hre ve deuh a ni.

Darkar dawn fe an inbiak tawh avangin Chuck pawh chuan a sawi tur pawimawh zual a sawi zo tawh bawk nen, tin, Yolanda chu lehkhazir a duh vanga Hotela riak a ni bawk nen, a lehkhazirna hun tur a pawh hek sak nasa dawn lutukin a hria a, “Aw le, a tha lawm, naktuk lamah te pawh sawina hun kan la nei mahna, tin, i zirlai chu zir tawh la, naktuk ah kan inhmu leh dawn nia. Mangtha phawt le” tiin phone chu an dah a.

Phone an dah hnu chuan darkar chanve dawn lai chu Yolanda chuan lehkhazir reng a ngaihtuah lo, an inbiak chungchang chu a ngaihtuah let a, Chuck te ang, mi hausa leh inngaitlawm, nun ngil, a nuna tel ve tura a sawm chu mak a tiin a lawm a, zep lo chuan a mizia avang ringawt pawh Feeling alo nei ru ve fe tawh kha a ni a. Thilthleng tawhte a ngaihtuah let a, Chuck chuan a sawi mai mai lo niin a hria. Chulo rengah hmeichhe flirt mai mai chi anilo tih pawh a hrechiang a. A hlim ru veng veng a ni.


(Chuck chuan sawi tur reng a hre lo, hria pawh nise sawi hun niin a hre lo, a falin sawipui a rilruk. A duh aiin a hre hma, Yvette reaction a hlauhthawn avanga hrilh ngam lo char2 a ni.)

Bar ah chuan a thiante nen William Yuri te chu an awm a, darkar fe an awm tawh a, an boruak hip pawh a sang tawh viau mai. Yuri pawh a invaupung chho tan. A nihna leh an chhungkaw dinhmun avang chuan chu bar a midang awm ve te pawh chuan an khak ngam meuh lo. Thinrimna tur a zawng ni ber hian a lang a. An sir vela thu te chu tihbuai chak tak hian a melh kual vel a.

A khat tawkin Yolanda chu a call nawn deuh reng a, mahse Yolanda chuan a pick duh tlat loh avangin a ngaihdan a ni lo takzet bawk nen.

“Thiante u, a tawk viau tawh lawm ni, min chhuahsan tawh mai dawn em ni” tiin Manager chuan hawihhawm takin a rawn ti a,

“Helaiah hian awm rei theih hun insiam em ni”. I sumdawnna hi a tlak chhiat phah dawn em ni?” Yuri chuan nelawm loh zet hian Manager chu a melh khawi khawi a.

‘Ni love, helai hmunah hian hun hlimawm tak hmang turin ka duhsak che u, mahse a landanah chuan buaina a hnai zawk tlatin ka hria” Manager chuan thil awmzia chu tha takin a hrilh a.

“Ni e, thianpa, kan kal tawh mai dawn em ni? Helaia awm reng pawh a ninawm alawm le” tiin Yuri chu hmin tumin alo ti ve bawk a.

Yuri lah chuan a thinrimna hrik thlak a chak tlat, a bialnu nen an boruak a chhiat vang ringawt pawhin engemaw hlekah thinrim a chak em em a. Chumai piahlamah, a ngamloh val, Chuck a tawng a, nasa taka diriam leh hmuhsit a tawk niin a inhria a, chhungkaw hausa tak, mi chunga leng nia a inngaih laia khatianga a tlawm em em kha a pai dam thei lo a ni.

“Engvangin nge helai hi ka chhuahsan ngawt anga, ka duh chen chen ka awm ang, a ngam chuan min pawt tho rawh u, William Yuri ka nih hi” a ti lung lung a. Chulaia awm ve te pawh chuan ngawi rengin an melh deuh hrak hrak ngam tawk a ni.

“Kan inkar thu a tawp tih i hriat kha, min rawn tibuai leh tawh suh” tiin Yolanda chuan message in a chhang let a. Chu message a hmuh chiah phei chuan a thinrim zual hle.

“I ngaih ang ngawta awlsam chuan thil ka ti hauh lovang, nang leh i bialpa hian in la tuar khawp ang” tih leh phone chu chhuat charah chuan a vawm darh chu a rual a.

Boruak a sosang a, thawm a ring tulh tulh mai. Anihna takah chuan Yuri hian a pa hmachhuan viau mahse, a hma lawkin an che chhe hle tawh a, a pa chuan a pui duh tawh kher angem?

Manager chuan phone la chhuakin police call a tum tak siah chuan harsatna lian zawk an tawk ang tih hlauvin, a thiante chuan Yuri rui tawh tak chu an hruai chhuak lui ta a.


“Hello, Chucky, ruahmanna siam turin engkim ilo tifel ang chu maw?” Karen Lee chuan Chuck chu a rawn bia a.

“Aw, ka nu, thutlukna ka siam tawh tih i hriat kha, i remruatna chu engtik ah nge”

“Ka fapa, i thil tih hian min ti lawm hle mai, kar leh thawhlehni zan hian tiin ruahmanna kalpui ka rilruk a, nangmahni pahnih lamah harsatna a awm loh chuan”

“Ka nu, i ruahmanna siam fel hunah min lo hriattir dawn nia”

“Chucky, he thil kan tih turah hian mi tlemte chauh kan sawm anga, chungte chu keiman ruahmanna ka lo siam ang”

Chuck chu a ngawi deuh vang vang a, a rilruah zawhna tam tak a rawn lut a, “Mahse... ka nu,” a ti hman chauhva.

“Thutlukna i siam tawh kha, tupawh, eng mi pawh sawm ila, chulamah chuan rilru ti hah suh, i thuthlukna siam tawhah khan i rilru zawng zawng i pek angaih hunlai a ni” A nu chuan an mi sawm tur chungchang chu sawi tam pui tulin a hre lo.

“Aw le, ka nu” phone an dah hnu chuan Chuck chu chair ah a thu mu a, a kut pahniha tukhum vuanin dawhkanah chuan a ke a hlang a, thil tam tak a ngaihtuahnaah a lo lut a. A hun kal ta zawng zawngah harsatna leh diriamna a tawh thin zawng zawngte a mitthlaah a lo lang a. A chenpui Yvette hnen atanga hmangaihna leh duhsakna tawngkam a dawng ngai lo te, class ah mite nuih sawh anih thin lai te, tin chhunah riltam em em, engmah eitur nei lova a tei ruk ruk thin lai te chu a ngaihtuah a, a rilru a na thar hle a, a mittui a rawn hnam tial tial a. A mit a nuai a, thawk a la hak a.

Thawk leh khatah amah hmangaihtu, a nu ngei aw a hriat atanga a nun rawn danglam chhoh dan te, midangte diriam thei dinhmuna a ding chung pawha a nihna a la zep tlat mai te chu engvang nge, mi zawng zawng ngaihsan leh tlawn rawn ni turin a awm thei reng si a, tihte chu a ngaihtuah zel a. Anihna pholan a la duh loh chhan chu Yvette vang niin a hre ta tlat mai.

Hmun ropui leh mi naran tlawh phak loh, mi hausa ah pawh mi hausa tawntaw te chauh chet tlatna The Muraka Suite a hnathawk te chuan mawng vawm ba ang maiin hotel chu an buatsaih a, chu building lian zet chu Thawhlehni zana hman turin nu pakhat hian a pumpuiin a book a. Chulai hmunah chuan sawm bikte lo chu tumah an lut tur ani lo tih chu an thu hmuh awm chhun a ni. Hotel book nan ringawt pawh dollar 5 million lai a rawn transfer a, chumaia nilo, decoration a tha thei ang bera titurin leh an senso chu hriattir leh turin a rawn ti bawk a.

Zelda Maine pawh chu a restaurant lamah chuan khual tha tak tak te a thleng awl lova, ram hrang hrang atanga rawn kal mi hausa tak takte pawh chuan tlawh ngei turah an ngai a ni ber. Zelda Maine, pianthiam leh hmeltha chuan henhsawh leh zeihawi takin a mikhual te chu alo dawngsawng a, a buai ve thei hle a. Chutih laiin a rilru pangkhingah City Square boss thar hriat chu ala tum fan a.

Yvette pawh a hnalamah theihtawp a chhuah a, zan dar 8 hmain a haw hman lo a ni ber, a tih thin dan pangngaiin dar 7:30 rik hma deuh chuan City Square chhuahsanin in lam panin a inkhalh haw a, car a park fel hnuin kawngka bianga Letter box ah chuan envelope alo awm a. A hmaa alo tih thin tawh ang bawkin kawngka luhna bulah chuan box alo awm bawk a.Yvette chuan angaihna a hre lo hle. Envelope chu la in, kawngka a hawng a, box chu inchhungah chuan a pawm lut ta a.

Khumah chuan thuin, envelope chu a hawng a, ‘Special Invitation tih chu a zu chhiar hmasa ber a. phek chhung zawkah chuan,

ENGAGE

Join us for Celebration
The Muraka Suite / 54th Street
8:00 P.M at Sharp

tih hi alo in ziak a. invitation card chu a en nawn leh thin, a hrethiam lo hle a, tute nge an nih a, khawi atangin nge tih lah a inziak bawk si lo.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)