SELFISH LOVE CHAPTER - 11 by Amy Cck

Episode kal lai dah luhna

Moderator: writers

Amy
Posts: 432
Joined: May 15th, 2019, 8:49 pm

SELFISH LOVE CHAPTER - 11 by Amy Cck

Unread post by Amy » June 21st, 2021, 11:45 pm

CHAPTER - 11 🌼 by Amy Cck



Kawngka lam rawn hawiin Zorinpuia chu a tho ruai ruai a, a hmeichhia zawk pawh chu a thu chhuak zui nghal vat bawk. Engmah sawi lem lo chuan kan in en haw hlawm a. Tunlai chu class a kal khat tih ka hria. Chu mai pawh ni lo in inah pawh hian a awm khat lutuk tlat. Chaw ei nan a rawn hmang hi a ni ringawt. Zan lamah lah a riak chhuak ziah bawk a. Kei mah vang a ni tih ka hre ve reng bawk nen ka chhungril lam atang chuan nuam ka ti vak lo.



Vanneih thlak lutuk in in hnuai lam atang in kan nula a rawn chho a. Step hmawr atangin ka pi in koh thu min rawn hrilh a. Ka inthlak a nga ka chhuk tur thu in ka chhang ve nghal a. Engmah dang sawi lo in ka room ah ka phei tlang nghal daih bawk.



Ka in thlak sawk sawk a, ka pi in min ko ve teh mial chu hman hmawh fahran in ka chhuk a. Ka pi room lam ka pan nghal vat a. Mahse thil pawi pam erawh a lo ni lo a. Pa Zothana a hna vangin a zin chhuah lawk a ngai dawn a. Hna la khawih lak lawh a neih avangin inah a rawn let hman rih si lo a, a thawmhnaw tlem siam sak a, a office a va pe turin min duh lek chu niin.



Pa Zothana roomah chuan ka lut phei a. Kawngka ka hawng chiah chu ka ang phiau mai. He in a room zawng zawngah a pui ber ang. Ka pi room nen a in tiat viau a mahse a chhung chu a ni khup a. Tumah pawh awm li mah se a zah awm ru khup mai.



Thil dang ti khawi lo in a thawmhnaw chu ka siam sak ve tawp a. Mahse hetah ka awm chinah a la zin chhuak ngai si lo a, bakah a ken duh tur la hriat tak loh avang chuan in thlahrung deuh tak in ka call hram a. Ken tur tlang pui a rawn sawi takah chuan ka siam zui nghal mawp mawp a. Room atanga chhuak in ka pi ka ko a, chu mi rual in in chung lam atang chuan Zorinpuia leh a hmeichhe awmpui kha an rawn chhuk ve chiah bawk.



" Bawihpuia chu i lo awm reng a? I buai loh chuan i U Zuali hi i pa office ah i va thlah dawn a mi? " Ka pi chuan a ti zui nghal a. A ruk in ka ner sak mai.



" Ee... Thian i nei bawk sia Zualte driver chu i be zawk mai dawn a mi? " A rawn ti leh hlauh chu ka lawm ngei mai.



" Umm... Kan bia.. " Ka tih lai in.



" Ka va kal pui mai ang! " Zorinan a rawn ti thum dut a, ka ner sawk mai. A thiannu nhe a bialnu hi kal san in min thlah a in huam chu a nia! Ka pi lah chuan Zorinan min thlah an chuan driver koh buai vel kha kan tlai a hlau bawk nen min in zui chhuah tir a. Zorinpuia bike la chhuak chu gate bulah ka nghak ta ngar a. Garage atanga rawn tlan chhuak in ka hmaah a rawn ding a, kei pawh chu ka thu ve nghal a. In sik hlau ang hrim in kan in karah ka zin bag lian vak loh khai chu ka dah zui hmak.



A tlan chhuak chu kawng kawi kan pelh rual in a ding zui hmuk a. Ka lo in ring lo nen ka bura zui lawk a, a mah chu ka la nem rawk rawk zui, hahthlak hian!



" Enge! I din dawn chuan i speed hniam ve tal ta che! " Ka ti ram hmak chu a helmet darthlalang up in a rawn thle buk a. Melh zui rawm in ka thut dan ka siam rem zui nghal zat. Kan in kar a ka bag dah in a nek leh lutuk a hreawm a tih thu a rawn sawi chuan ner sak in ka siam rem ve tak na a, awm zia awm tam teh lua lo. Engvang pawh nise a ding thut kha ka ngei hrim hrim a ni tawp.



Pa Zothana Office kan thlen chuan kan in zui chho a. Bag a khai a, kei chu a bulah ka kal ve mai mai. Hetiang te chu a mahin kal pawh nise a buai loh teh lul nen, tih ka ngaihtuah chhuak leh hmu hnawh a. Office kan thlen chuan pa Zothana PA hian meeting an neih lak lawh avang in a bul a dah mai turin min ti a , bag chu hnut chhiah in kan let zui nghal a. Kal lam leh haw lam kawng tluan in kan in be ta miah lo chu ka awm thiam lo lek lek zawk.



Zorina parking a a tlan luh lai in in ka luh sab a, ka luh rual in ka piin min lo chhawn vat a. Pa Zothana kan va hmu a maw a ti a nih ka ring. Engtia reng nge zin chhuah a tum tih min zawt a mahse kan hmuh lo thu in ka chhang let thung. Nakinah a call mai tur thuin min chhang a, choka lam pan in kei pawh ka phei ve nghal a. Choka ka lut chu Zorina thiannu kha a lo thu ve reng a, a phone a lo hmet mial mial a. Min hmuh rual in min lo nui nghal sang.



" Miss, min la hria em? Kan class ah i rawn lut ve ngai si lo a! " A tih chuan a hmel chu ka hria a, a hming ka hriat mai loh thu ka hrilh chuan ' Tebawihi ' a rawn ti a ka bu nghat.



" Zorin ka pi khan chaw ei ve tur in min sawm a! " A ti hliai chu ka hawi vat a, chokaah Zorina a rawn lut ve chiah tih ka hmu zui nghal a. Then suk in Tebawihi bulah chuan a thu thla a, hriat tham loh hian an in bia a, chuta kar a lo awm ve reng chu a nuam bik vak lo nen ka chhuah san zui daih.



Ka room ah pawh chho lem lo chuan sitting room ah thu in ka phone ka hmet mial mial a. Tei nen kan in text char char. Kan luck lo dun nge pawh hi ka hre lo biak tur thlawt hi kan nei lo. Kan thian dun hian kan hlim ve em em tawp a.



Chaw ei lai chuan Tebawihi chu a tawng barh barh a, ka pi chu a be peih reuh bawk nen, kei erawh nidang ang lo tak in ka ngawi thei viau. Tebawihi chuan ka ai a awh ni zawk mai hian ka hre hial. Ka pi sawi duh chi tak in a tupa chhan chhin a sawi bawk nen nuam a tih hmel viau mai.



" Zorin min thlah tawh la, dar 8 ah hostel gate an kalh dawn sia! " Tebawihi chuan common room a kan thut thap laiin a rawn ti a. Ka pi chuan a ui der ve viau leh nghal. A tupa in in a hmeichhia a rawn hruai luh vawi khat na a nih vang pawh a ni mahna.



" Bawihpui i rawn let dawn nge.. " An din rual in ka pi chuan a ti zui nghal vat. Zorinpuia chuan min rawn melh nghal zawk a, mahse ka hawi sawn nghal daih thung.



" Let lo ang! " A ti sup a. An in zui chhuak chu ka thlir ta reng.


" Pi khawnge Zorina hi a riah thin a? " A tawpah chuan ka hre chak leh in sum zo lo chuan ka zawt ta tawp. A thiante in ti dawn i la a rial chhuak ziah nen a dik thei tlat lo.



" A nu in lamah a riak a nih kha! A chang hi chuan a riak ziah zel a lawm! " A ti awlsam then a.



" Anu maw? " Ka ti haw, nu Adiki te chu a boral tawh sia. Ka rilru a ti buai vek chu ka piim a hre thiam nge. " Aw...ka monu dam lai khan i Papuia hian a pual in in a lei sak a, tah chuan a kal in a riak fo a lawm! " A rawn ti leh chu ka thaw huai thei. Tun hi a hmasa ber a ni lo tih ka hriatna chuan min ti thawl huai mai.



Ni a kal ve bek bek a, pa Zothana pawh kar 2 lai chu a zin na lamah a cham ta der a. Ka pi nen hian an in be fo a, Zorinpuia nen an in be ve em chu ka hre lo. A chhan pawh Zorina pawh avang lutuk tlat a. A rawn haw chhunah ka piin in a awm tam turin a hrilh a, zawm ta nge a ti lem hlei lo a. Kei phei chu awm lo ang hmakah min ngai ni ber in ka hria.



Ka laka a rilru ka pawm sak duh loh vang pawh a ni mahna. Mahse kei chuan pawi ka ti hran lo, kha tiang thil kha thil pangai pawh a ni lo a. Chiang tak a tawpna siam kha a fuh ber bawk a. Muanpuia nen erawh kan in be ngun in kan inah pawh a rawn leng lut ngun a. Hman atang tawh a mipa fel leh mi biang biak thiam tak a ni bawk a ka pi lah hian a nel in a ngaina tawh phian a.



Mahse hreawm ka tih ber chu college a a rawn kal hian a ni, Hruaia nen kan lo in kawp ve bawk nen a nau bialpa hlui nen a mi hmu dun fo chu hmai a uang duh lo khawp mai. Door bell ri rang rangah chuan kawngka lam chu ka pan vat a. Vawiin sunday a nia, chawhma hi ka in khawm ve a, a bak chu ka ti ngai lem lo thung.



" Nite... Nangni a law! " Kawngka ka hawng rual chuan nui sangin ka ti a. Nite Emily leh a pasal an lo ding a. A pasal chuan hmeichhe naupang hi a pawm bawk a. Puipuii a ni tih ka hre ve. In chhungah kan in zui lut a. Ka pi erawh chawhnu a in khawm ban in a leng kawi leh a niang, a la rawn haw lo a.



" Tumah an awm nange? " Nitei chuan a ti a, nui pah in lu ka bu nghat.



" He mi te chhungkua hi chu, khawnge Fapa Duatsualtheihloha hi! " Nui hak a a tih chuan Zorinpuia a sawina tih hria in a ni pawh a awm loh thu in ka chhang mai a.



" Ka u a zin sia ka nu khua a harh hlau in kan rawn leng a, an lo leng bo dial sia! Kan leng thlawn! " A pasal melh ralh a a tih chuan a pasal chu a ner sawk mai.



" Phone hmasa rawh tiin i duh lo a nih kha! Ti rawn Bawihte! " Tiin a fanu biang chu a fawp zeuh a, Puipuii lah chu a nu nghat nghat leh nghal.



" Thawn thut ka duh ve maw le! " Tu bar a Nitein a tih chuan a pasal chu a nui hawk mai. Nitei hi nurse a nia a pasal hi specialist doctor a ni bawk a, an in hmeh tak zet.



" In lo leng thlawn hlei nem hei kei mah ka awm a lawm. Ka khua a har ka tih lai mek a nia! " Ka tih chuan an nui dar dar a. Thil dang sawi in kan ti ti a, kan nula a room lamah a awm avangin thingpui lum turin chokaah ka phei a, Puipuiin juice a suh zawk avangin ka siam sak nghal bawk.



Choka atangin tray chawi in ka chhuak a, center table a dah in ka thu ve dawn chiah tihah doorbell a rawn rin avang chuan ka pan leh nghal vat a. Kawngka ka hawng chu Zorinpuia a lo ding reng mai.



" Thla chu ka ni lo a nia! " A rawn tih chuan a in ti zet in ka nui heu mai. In inchhungah a rawn lut a, min kal pelh rual in ka ner sak mai. Chu pawh eng emaw rim a nam vang chauh in.



" Pute! " ( hei hi Zothana te storyah pawh khan ka buai tawh 😱 Emily fanu hian Zorina hi a putea tunge a U tur zawk? Kei mahah chuan ka nu te lamah hian kan 'U' a! Ka pa te lam hian ' an pu' bawk si? 🤔 cmt ah lo sawi ru a, a hria chuan.😁) Tih leh Puipuiin lo ban a rual a. Zorina pawh chuan a pawm kang nghal nawlh.



" Pute chu i rim a tui lo! " Puipuii pawn ka rim hriat kha a hre ve tih ka hre mai. A tal thla nghal vat a. Nitei te bulah chuan a kal zui nghal daih.



" Zorin lo thu ve lawk rawh! " Tiin nitei chuan Zorina in chung chho tur chu a ko peng a. Zorinpuia pawh chuan hnial lem lo in a pan ve hnu hnu a. Kei pawh an bulah chuan ka thu ve nghal zat.



" Tunlai i nung chang a tha vak lo tih ka lo hria a. I pi in in a haw khat thute pawh a sawi a. Ti nge hetiang hian i awm a! " Nitei chuan vin hauh si lo khauh zet lawi si hian a ti a. Zorinpuia chuan ngawi ngul in min la en zui. Pa Peka chuan Puipuio chu varanda lamah a pawn chhuak daih a. Nitein Zorina a zilh lai hi a fanu hriat tir a suh loh vang pawh a ni mai thei.



" I pa a zin bawk si. Bakah zin lo mahse a hau leh kher lo mai thei che. Mahse kei chuan en liam che hi ka tum miah lo a nia. Tlangval in, engtiang pawh in lian in puitling mah la nun dik lo i zawh chuan ka la vaw hreh miah lo che. I pa leh I pi in phal lo mahse kei chuan ka pawi ti lo tih I hriat kha. Engvanga zu te in ve nge I nih reng reng. Sim hmak ang che! " A ti zui mawlh mawlh a.




Zorinpuia chu in chungah a chho a. Nitei chuan en zui in hahthlak ti zetin a thaw chhuak hak.




" Ngati nge Zu te a in ve tlat ni. Insual leh class han kal that loh hi chuan tlangval te an ni ve a, a awm viau a mahse zuah hi chuan a fihlim thin viau a sin le aw! " A ti zui vawng vawng a. Sawi ve tur avang khawp mai.



Nitei te pawh an haw phei a. Ka pi nghah chhuah an tur viau nan a leng rei ta phian sia. Inchhung lamah chho in ka room a tlang ta mai lo chuan Zorina room chu kal pel lo in ka lut ve hmiah. Khumah chuan a vang zawng a mu in in chung lam a melh vung vung a. Ka lut tih pawh hria ang in a awm miah lo leh nghal.



" Enge i duh? " A rawn ti ta sup. En erawh min la en lo thung.



" Ngati nge hetiang hian i awm a? Class i kal tha bawk si lo, inah i rawn haw khat bawk si. Chuan tunah zu i in bawk a. Nitein zu i in ngai lo tih min hrilh a. " Ka ti ta hap a. Khum maang lamah chuan ka ding ngar bawk.



" Tah chuan ti nge i lo buai ve a? " A rawn ti sup. Ner sawk in a nii ro nghal hawk a. Mu reng chung chuan min rawn melh a. A mit meng chu a ni nghulh mai. Mut hmu tha lo pawh a ang mah mah zawk.



" Ti nge ka buai lo ang! " Ka ti hap a. Ka sawi zawh hma chuan a rawh thu chhuak hlawl bawk.



" Ka ' U ' i nih vang tih sawi i tum a nih chuan sawi tum buai suh? " A ti hmuk a, ka thaw zui ve ta halh. Engmah sawi in awm zia a nei dawn lo tih ka hriat avang chuan in her a chhuak mai ka tum chu a thu rawn sawi leh avang chuan ka ding dat.



" He tia min awm tir tu chu nangmah i ni a sin! Mahse nang chuan engmah mah i ngai leh tawp nang! Class rawn kal a, kha i bialpa in a rawn hruai lai chu hmuh fo kha ka duh lo. Nang theihnghilh tur che in min duh a, ka tum mek a nih hi! Nang mah hlat thei ber leh i hmel pawh hmu tam lo tur ber in ka khawsa bawk. Chuan tunah engvang a hetiang a awm nge ka nih tih min zawt a maw? " A ti zawi sup. A aw chu zawi thum dut mahse a na tih ka hriat sak thei.



" Hetiang a awm tur hian ka ti lo che! " Ka ti hap a. A lam hawi a ka in her chu a mit meng rum lam mah chuan min lo melh ve chiah bawk.



" Ni e, awm tur chuan min ti lo mahse awm lo thei lo in min siam miau. Chu vang chuan tun a ka awm dan pawh hi min en liam mai mai rawh! " A ti leh hmuk a. Tho thurh in bathroom lamah a kal zui a, bathroom kawngka a in khar thleng chuan ka en zui ngawih ngawih ringawt.



" Ka lo leng dawn a nia! " Zanriah kan ei khamin Muanpuian min rawn bia a, a rawn tih chuan ka ngawi vang vang. Zorinpuia inah a awm sia Muanpuia ber kher in leng neih chu a nuam miah lo ang.



" Ka sawi i hre thei em? " A rawn tih leh takah chuan ka harh chhuak zawk.



" Maw.. Tunah maw? " Ka ti hu chu a rawn nui hawk a. Motor in a rawn tlan mek thu a sawi chuan phal loh chi pawh a ni tawh lo. Ka room atang ka chhuak a, Zorinpuia nen kan la in tawk chiah leh nghal. A in bual zo hlim tih hriat zet in a lang fresh sur a. A ni pawh zanin a tak a in a awm. Ka rilru chuan tiin in hnuaiah ka chhuk a. Ka hnungah min zui ve zel in. Sitting room ah ka thu a, ka opposite ah chiah a rawn thu zui ve nghal a. Tunlai chu in be khat tak hi ka ni ringawt.



Rei vak loah doorbell a rawn ri a, ka thutna atang chuan tho in kawngka lam chu ka pan nghal vat a. Kawngka ka hawn rual in Muanpuia nen kan in hma tawn nghal zat.



" Lo lut la! " Tiin ka ding sawn deuh a , kan in zui lut a, ka pi pawh a room atang a rawn chhuak ve hlawl mai.



" Ka rin ai I lo thleng hma daih! " Ka tih chuan min rawn phone lai khan a rawn tlan mek a, a rawn thlen tel tu a sawi ve luam a. A thil khai chu ka pi a pe a, ka en haw mai. Ka pi in a en chuan chhang leh eng emaw ei tur a lo kei sak niin. Kei ni lo ka pi a lei daih chu mak ka tih rual in a fing ka ti viau thung a. Ka pi in lawmthu a sawi mawlh mawlh a, Zorina erawh in vawi khat chiah a melh a, a phone a hmet zui nghal hmak.



" Thingpui ka lum ang cheu aw! " Kan ti ti mawlh mawlh ni chuan tiin ka ding a, choka lam ka pan zui vat a. Rei lo teah thingpui chu ka chawi phei a. Muanpuia chhang rawn kei te chu kan hmeh a. Ka pi lawm thiam thei lutuk hi a duhawm zawk. Muanpuia hi min duh pui em em bawk a. Ka bialpa emaw a ti hial a mahse pangai tak chuan kan la in kawp leh lo thung.



Thingpui kan in zawh in ka pi chu mut tum in a room lamah a kal mai a. Kei leh Muanpuia leh Zorinpuia chu kan awm a. Thuthleng pakhatah Zorinpuia chu a thu dawn duai a. Kei leh Muanpuia pakhatah chuan kan thu dun thung a. Sawi tur a vang vek. Ka pi awm lai khan a nuam daih zawk.



" College kan kal kum a kan final year te ho in reunion an rawt kha kal ve i tum em? " Muanpuia chuan a rawn ti hlawl a. Ka meng a deuh ha.



" Chutiang pawh ka hre ve miah lo! " Ka tih chuan whatsApp group an siam thu te sawiin min add tir ve nghal a. Zorinpuia chu biak ve ngaihna a awm lo hrim hrim bawk a, Muanpuia nen chuan ka ti ti tui leh ta phian a. Huat na thinlung ka nei tawh lo bawk nen a hma ang chiah in kan in nel leh tawh phian a.



Dar 10 velah Zorinpuia pawh chu inchung lamah a chho ve ta hram a. Mahse a lo hma tawh bik lo nen Muanpuia pawh a haw ve ti tih nghal a. Pawn kan gate bul thleng ka va thlah a. Ruah hmi a la tla ser ser zui. A motor a lut in a tlan liam thleng ka thlir a, inah lut in kawngka ka kalh a, mut tum in in chung lam ka pan chu Zorinpuia hman hmawh zet in a rawn pen thla pawk pawk a. A mut daih tawh ka ring kha. Leather jacket dum ha in, a kekawr leh pheikhawk pawh a dum vek. A helmet a rawn khai bawk nen ka in tawh rual in ka vuan ding chawt.



" Kaw... Khawiah nge i kal dawn? "Ka ti haw a, ka aw mai ni lo in ka hmelah pawh hian tun ang a chhuah a tum chu mak ka tih zia a lang chiang viau ang.



" Ka chhuak lawk dawn! " Ti zawng a min chhang in ka vawnna chu a thing thla a, a kal zui nghal hmuk chu step lak lawh a dingin ka en zui ta reng a. Tun anga a chhuak tur chu ka ngaihtuah riau bawk.



Ka room ah lut in mut tum in ka in tin tuah a, khumah chuan ka mu meng kar a. A hma khan ka mut a chhuah nen tunah chuan ka harh tha tawh mah mah. Tul lo zet in Zorinpuia kha ka ngaihtuah tlat a. Ka rilru lak pen tum in ka phone ka hmet eng a. Fb-ah lut in story te chhiar ka tum a mahse ka tui thei thlawt lo.



Pangai tak a chhuak pawh a ni lo a. A mitah khan thinrimna a lan chhuah chian mai bakah a thian tha tak hmu tur chuan a chhuak hauh lo ang tih ka hmu thei. Ka rilru ka kawm reng emaw ka tih laiin ka lo muhil a ni mahna.



Tu emaw hian ka taksa hi a khawih tih ka hre thei, mahse mai mizial ang tih ang mai hian ka che thei lo a ka harh thei thak lo. Thawk leh khatah ka meng kawk a, ka taksa lo bawh bet rengtu vang chuan au vak ka tum a ka aw a chhuak thei miah lo!



Meng buai nawk in Zorinpuia chu ka en a. Ka kut a nem sawn ka tum chu rawn che thut in ka lu zawnah ka kut chu a rawn nem kawkalh zui hmiah a. Ka tal zui nghek a. Mahse a taksa a lian em a awm zia a awm vak lem lo.



A kut leh lam chuan zawi muang in ka shirt chhungah a rawn zen lut a, a mit meng chu a thim dup khup a. Zu a in leh tih a rim atang ka hre thei. A kut chu rawn sawn chho zel in ka awm bawr a rawn hrawm nawk a. Ka hlauthawng leh thinrim bawk si chu ka taksa chu ka chet nawk nawk a. Mahse awm zia awm lo tak a ni. Engvangin ka au chhuah a thawm ka siam theih miah loh pawh ka hre lo.



" Engvangin nge min hnar bik reng? " A rawn ti zawi ruih a. Ka thin chu a phu dawt dawt a, ka taksa chu hlauhna avangin a khur ru der der bawk.



" I mit mei tha hmu tur hian kha pa ang kha ka nih kher a ngai em ni? " A ti leh hrawk a. A aw chu a seh chilh nawk mai. Tawng ve ka duh a mahse engmah ka sawi thei lo. Ka vai ruai a mahse ka harh tho chuan ka in hre bawk si.



A kut chu ka taksaah a vah kual tir rual a. Hlauhthawnna a rawn awm nasa zual sauh a. A kut chu sawn thla in ka kekawr hak kawng a a rawn zen luh chuan ka mal chip chawiin ka thawk ka hip let kawk mai.



" Naupang ang a min ngaihna hi paih bo la, thil dang zawng zawng pawh theihnghilhin vawi khat tal chu mipa angin min en ve rawh! " Ka beng bulah chuan rawn phun sup in ka panty chhung a a kut chu a chet zui nghal a. Ka thaw tha thei lo chu ka thi mai dawn in ka hre hial!

*

Ka men leh meuh chuan khua a lo var vek tawh a. Nizan kha hre chhuak thutin ka thu chhuak a, ka taksa chu ka en kual nghal ruai. Mahse engmah hmuh tur a awm lo. Engkim a pangai vek bawk si chu ka thaw chhuak hak. Nizan kha ka mumang a ni thei mai a ngem? Zorinpuia ka ngaihtuah luat vang in ka muhil lawk thei lo, chuan ka ngaihtuah lutukna lamah ka mang phan hial tihna maw?



Ka thil ngaihtuah chu awi lo lutuk in ka ner nghal sak. Mang lam thleng in lo ngaihtuah mah ila kha tiang khan engtin nge ka hmu thei zawk? Lu thing nawk nawk in ka tho a, bathroom ah ka lut nghal hmak.



“ Mang rapthlak tak a ni! ” inbual pah te chuan ka phun leh sap thin. Ka mitthlaah hian a la rawn lang ziah leh nghal chu ka duh lo tak zet! In hnuai a ka chhuk dawn Zorinpuia a lo haw leh haw loh ka en hram a mahse a lo haw miah lo nge a tho tawh zawk, a room chu a reh thuap mai.



Rilru buai ru zetin inhnuai lamah chuan ka chhuk a. Gym room ka lut hmasa ber a mahse ka hmu chuang lo. Chokaah ka phei a kan nula kha a lo che leh malh malh tawh. Zorinpuia a hmuh leh hmuh loh zawh ka tum a mahse a hriat ka rin loh vangin ka pi ka lo chang ru deuh a.



Ka pi pangpar tui pe zo rawn lut chu ka lo nuih nghal ver ver a. Zan a mu hma a zing hi a tho hma bawk a. Ka awm tirh kha chuan thawh khalh kha ka tum ve ngei thin a mahse zingkarah tih tur a awm lo bawk nen a hnu chuan ka peih tawh lo.




" Bawihpuia hi nizan khan a riah chhuah leh a mi? " Ka zawh hma in ka piin a rawn ti a, a nih chuan Zorinpuia a rawn haw miah lo tih na.



" Chuan.. .. Khang kha ka mumang an ni tak tak a maw? " Ka hriat tawk chuan ka phun sap a. Mit ka chhin rual in Zorinpuia mit meng send rum leh rum ul kha ka mitthla let thei bawk si. Ka taksa pawh a tang leh nghal vek bawk. Hrilhhai zet in Ka thaw chhuak halh a. Kei hi Zorinpuia ringawt ka ngaihtuahna lamah Ka â zo tawh a ni ngei ang.



" Vawinah i Papuia pawh a rawn haw thleng thei tawh dawn a! " Ka piin a rawn ti a daih a. Pa Zothana a lo haw dawn thu a sawi chuan ka lo phur ve em em a. A chhan pawh Zorinpuia hi a zilh ve deuh ka beisei a. Ka piin ka hna banah Zorinpuia hruai haw nghal tur a min tih chuan hnial ka tum zet a mahse ka hnial leh duh ta lo thung.



" Naktuk hi Bawihpuia pian cham a nia! " A tih chuan ka melh vat.



" A ni maw, in lawm dawn em? " Chuvang a mi pa Zothana a lo haw dawn a? Zorina hi chu a duat ngawt mai! " Ka ti zui nghal luam a. An fapa rangkachak la hi a ngaihna a awm thlawt bawk si lo.



" Ni chiah lo han ti i la ka sawi sual deuh mai thei. Naktuk hi Bawihpuia phian ni ni mahse ka monu, Bawihpuia nu kan chan ni kha a ni bawk a. Bawihpuia hi a pian ve leh a nu in pawm chu sawi loh a hmel tak ngial pawh a hmu hman lo. " Ka piin a tih chuan ka en haw mai.



" A pian tirh phat in maw? " Ka ti chuan lu a bu nghat. A tet laiin a boral san an tih kha chu ka hre ve deuh a mahse a pian tir ve a nih thu chu ka hre ve chiah!



" Ni e, kan chhungkua kan hlim ni ber ni tur kha hriat reng tlak khawp a lung chhiat thlakah a tang zui a. Bawihpuia hian a nu thihna kha a mah vangah a ngai hial a. Ka tupa khawngaihthlak hi, a thinlungah hian a tet te atangin chu thu chu a tuh nghet ta tlat a. Chuvang chuan a nia lo hruai haw turin ka duh che!



Naktukah chuan hmuh tur a awm leh dawn si lo a! " A tih chuan ka khawngaih ve khawp mai. Tukthuan kan ei sawk sawk a. Ka in siam a, taxi changin college lamah ka kal zui nghal a.



College ka thlen pawh chuan ka awm a nuam thei lo. Rilru kam run tu ang mai hian ka awm a. Campus ah chuan Zorinpuia hmuh beisei in ka hawi kual leh thin. Class ka lak a piangin corridor pheiah te chuan ka zawng ru reng a. Mahse a vang lutuk tlat.



" Zoremsang i ninawm lutuk! " Hmeichhe vin that ri ka hriat chuan Pol Sc department room ah chuan ka lut a. Zorema leh Zonuni chiah an lo awm. Min hmu chu an hawi phawk hra a, Zorema zawk chuan Zonuni banrekah chuan a vuan bet tlat a nih hmel.



" Miss! " Zonuni chuan a ti sap a. Nuam tih hmel vak loh hian Zoreman a vawnna kut chu tal pit a tum a mahse a thlah duh lo a nih hmel. An ni pahnih hi chu an lar ve a, Zoremsanga Principal fapa ni chungin buaina nei zing ber a ni hial ang college ah hian. Zonuni erawh professor leh staff ho in an fak rawn luih luih khawp a hmeichhe nungchang mawi leh lehkha thiam thei a ni bawk a. Tunah EU ah hian secretary din hmun a chelh mek bawk a. Chuvang chuan ka class a mi te ni lo mahse ka hre ve lutuk tlat.



" Zorinpuia awmna in hre mial em? " Ka ti thawr. An pahnih chuan an in en dun ha a.



" Zorina vawinah class a la rawn kal lo hrim hrim! " Zorema chuan a ti ve sup. Ka sawi tawh ang khan kan college ah chuan buaina siam zing ber leh buai an awm tawh chuan lo tel ve thei ziah a nih a, tunah pawh a hmai vel chu a khem leh nual tawh.




" Phone tum chhin la! " Zonuni chuan a rawn ti ha a. A nu liam vak lo bawk nen a bul a mipa sang zet ding chu a melh chho zui ha. Zorema pawh chuan Zonuni kut a chelh lohna lam chuan a phone chu a hmet mual mual a. Kei oawn phone chu ka tum ve ngei a mahse call a la thei lo a, ni lo.... A la duh lo a nih ka ring zawk! A tawpah phei chuan ka call a reject zui hmak a nih kha. Chuvang a zawng kual pawh ka ni reng a.




" A la thei lo! " Zorema chuan a phone lek vut in a ti chhuak leh sup a. Ka thaw zui hap.



" Nizanah khan Zorina chu a tel ve em? " Zonuni lah chuan melh zui rawm rawm in a ti a, Zorema chuan ner sawk in a lu a bu nghut.



" An in pakhatah khan a awm a ni mai thei! " Zorema chuan a rawn ti leh sup a. In pakhat an ti ve ziah a, a hmun tak pawh ka la hre lo. Ka pi khan Nu Adiki tan a Papuia lei sak a nih thu pawh a sawi kha. Mahse a awmna hmun ka hre miah lo.



" Tlai banah min va hruai hman a ngem? " Ka ti ta tawp.



" A... Tehreng mai Miss Zoremsanga hi a hman lutuk! Tih tur dang a nei lo hrim hrim! " Zonuni chuan nui sak hian a rawn ti a. Zorema pawh chuan ban a min lo nghah tur thu a sawi a. Office lamah ka chho ve ta hram.



Chawhnu class kan kal leh mawp mawp a. Banah chuan college gate bulah Zorema chu a bike nghengin a lo ding reng a.



" Zorinan class a kal loh chuan ka thlah thei che a nia. Lam tu tur i neih loh bawk chuan! " Hruaia chuan a rawn ti a. Lam tu tur a tih kha Muanpuia a sawina a ni tih ka hria. An in mil vak lo ka tih tawh kha.



" Ai... Tih tur pawimawh ka nei a! Ka kal san hmasa ang cheu! " Nui sangin ka ti a, Zorema awm na lam chu ka pan a. A bul ka thlen rual in a bike a ti nung nghal zat. Kei pawh chu a hmungah ka thu ve nghal a, a tlan chhuak dawn tihah a jacket ip a a phone chu a rawn ri a, a han la leh te te a. A phone a beng zawn a a dah chuan ka ang phiau mai. A mah a in la pa viau sia a phone cover chu a nu lutuk tlat!



Mahse an tawng danah a phone ken chu a ma ta ni lo in Zonuni ta kha a nih hmel leh ta zawk. " Khaw nge Zonuni? " A rawn ti ri pawh ka hre thei. Kan in awm hnaih ve em bawk a.



" Tunah tak chuan kan in a ka room ah a awm ka ring! " Tih leh phone dah a rualh a. A tawng danah kha chuan a lawm loh hmel em em mai leh nghal. An in ngaizawng a nih te ring rum rum. An mizia ngaihtuah chuan in kawp rem lo berah ka thlang ang kei chuan.



Kan tlan chhuak zui nghal a. A speed lah chu a chal phian leh nghal. In pakhat zawnah hian a ding chawt a. Kawngpui atang chuan chhawng hnih ang in a lang a. A lian lutuk lo a mahse pawn lam atang chuan a lang fel at a, a nawm hmel phian bawk.


Zorema chuan tih tur dang a neih thu sawiin a tlan leh nghal daih a. In lam pan chuan ka kal a. In pawnah chuan Zorinpuia bike pawh a in hung run a, a bike ka hmuh rual in nizan ka mang kha ka hre chhuak leh nghal a lu ka thing nak mai. A awm tih ka hre chiang leh zual bawk nen doorbell chu ka hmet a.



A rawn hawn mai loh avang chuan ka hmet nawn leh a, kawngka chu a rawn ri khap a. Mahse lo hawngtu chu Zorinpuia a ni miah lo.



" Miss nang maw? " Tebawihi chuan rawn ti in mak min tih hmel deuh hian min en a. Min hmuh a in rin loh ang chiah hian kei pawn hmuh ka in beisei bik lo. Chu mai ni lo in ka in thuamna chuan ka mit a la nghal chat a. Mipa tshirt tih hriat reng reng a lian ha in a bak engmah a in bel lo a. Ke lawng teh tlawng in a ding bawk!




❤❤❤ sei mang ta ra dah ka tum nen hetiang chance vel hi tihpalh thil in ka cut hmawk a nih kha 😭😭 kei pawh hian ka ui lutuk hi ka mood a ti off vek thei. Mahse a thik pangai tho turah ngai ang😓😓 like, cmt leh click kha lo ti ve hram u la, ka cut teuh manah tal khan 😂😂❤❤❤



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)