Ka hringnun zin kawng 36

Episode kal lai dah luhna

Moderator: writers

SeniChhakchhuak
Posts: 74
Joined: May 27th, 2021, 10:49 pm

Ka hringnun zin kawng 36

Unread post by SeniChhakchhuak » June 22nd, 2021, 11:08 am

Ka hringnun zin kawng
- Seni Chhakchhuak

Bung 36-na

"Bawihi, ka inthlahrung viau na-in thil dil lawk che ka duh a..."
Sawi hreh tih hriat deuh hian a thaw leh hak phawt a. Chutah muangchang hian, "Ka pasal a dam lo a, min admit sia, eng mah kan lo inring lawk bawk si lo. Pawisa lah tih tham kan nei lo. Tu mah han tih ngam ka nei tawh si lo a, in hnen lam ka rawn pan chawt mai a ni" a ti a.

Amah pawh tih tawh naklaiin, a pasal, ka pa leh kei a tlansan a a neih kha maw? "I duh thlanna a nia, i chawh lutuk," lo tih hrep mai chu ka nap a.

Ka pasal chu lo inrawlh vatin, "E ka pi, lungngai reng reng suh. Mut bu te pawh hetah a tam a, i mamawh ang apiang chu heta tangin i keng thla dawn nia. Pawisa chu eng zat nge in mamawh ang?" a ti nghal zung zung a.

Ka pasal lakah chuan ka va han inthlahrung tak! Mahni lo maha inthlahrun ruk ve naklaiin. Damdawi inah ka awm zo chiah a, kan buaiin sum lah kan inhman nasat lai tak a ni lehnghal. Eng mah pawh ka sawi ve lo, ka nu chu ka ngei lutuk. Ka hreawm tur pawh dawn loa min umsanna ngei mai enkawlna tur min rawn dil ngam a nia.

"Aa, 2000 te chu a tawk mai ang" a rawn ti leh a.
"A tlem lutuk ang, 3000 tal hi la rawh. I makpa hian eng mah ka la tihsak ve loh che hi. In mamawh tur pawh kan siam fel ang a, i keng thla nghal dawn nia" tiin a siam fel zung zung a. Tawngkam khat mahin ka nu chu ka be tawh lo, room lamah ka luhsan ta daih a.

Khumah chuan ka bawk thlawp a, lukhama hmai phumin ka tap ta tlawk tlawk a. Ka dar-a rawn khawihna avang chuan muangchangin ka tho chhuak a. Ka pasal chuan chik zetin min lo en a. Eng mah sawi lo chuan a awmah min pawm bei hle hle a. A awma bei chung chuan ka tap tha leh a.

"U Rf, i lakah hian ka va inthlahrung tak em! Ka phu lo lutuk ka nei che a, ka thik thu a chhia-in, hriat thiamna reng reng ka nei lo che a, chuti chung chuan min hmangaihin, min la duat em em zawk a. Pawisa ka tlak ral lai takin, hah taka i thawh sa ka nu-in a rawn la ve leh a, ka zak ngawih ngawih," ka ti a.

Ani chuan, "shh...Chutiang sawi suh. Eng kim hi Pathian vanga ka neih leh tih theih a ni a, Pathian hnenah lawm thu sawi la a tawk. Ka lakah inthlahrun a ngai lo reng reng. I nu pawh ka nu a ni ve tawh a, an harsatna-a tanpui hi ka tih tur a ni zawk alawm. Nang pawh i nu hi ngaidam ve tawh la a tha lo maw? Ngaihdam ngai lo mihring hi kan awm miah lo a, chuvang chuan kan inngaihdam tawn zel hi a ngai a nia" a ti duah a.

A thu sawi chu dik ka ti khawp mai. Kei tak pawh hi U Rfa khan min lo ngaidam duh miah lo se chuan rilru na takin emaw ka awm ang a, kan innei thei dawn lo tawp tihna a nia. Chutiang zawnga kan ngaihtuah chuan ka nu dinhmun pawh ka hre thiam ve ta deuh a.

Zing leh tlaiah ka pasal chuan ka nu te chu chaw a zu pe thin a. Ka lo lawm vak lo nen, kan inah pawh a rawn kal mai hreh deuh tawh a.

Kei pawh chu ka tha chho ve leh tawhin, ka taksa pawh a chak tha ve ta viau mai. Ka nu-te damdawi in awm chu an chhuak thei har phian a. Kar hnih
zet an inenkawl hnu chuan an chhuak ve ta a. Ka pasal chuan kan motor-in a han thlah thlap a. An vannei lel lawl asin aw!

Motor horn ri-ah chuan ka phu zawk a. Ka pasal chu a lo let leh tawh a, varanda-an ka lo hmuak a. In chhungah chuan kan lut dun ta a. Bawihtei pawhin a pa chu a lo bawh ve chung chung a.

"Bawihi, i nu-te chu an khawsak a harsat ve hmel khawp mai. An inchhung pawh a tla bal angreng lutuk, ka khawngaih reuh tak tak a ni"

"Um! An khawngaihthlak tak ve" ka ti liam puat a. Ka pa nena harsa deuha kan awm lai ka mitthla-ah a lo lang chuai chuai a.

"Eng nge i ngaihtuah leh tak veng veng" tiin ka hmai bulah a kut a rawn vai a. "Biak pawh i hre thei reng reng lo a" nui var var chungin a rawn ti leh a.

Ka nui ringawt a, ka chawhmeh siam chu ka va chhunzawm leh ta a. Naute a rawn tap ngak ngak a, Bawihtei chuan rang lutukin room-ah chuan min tlan luh khalh leh ta zauh mai. A pa nen chuan kan inen a, kan nui dun tawp.

Room ka va lut chu, a nau pawm thawh ve a lo tum, thei si lo chu an lo inthuttir deuh ti tih a, a lo buai ve khawp mai a, an inti na ang tih a hlauhawm zawk thin a nia.

"Bawihte, khatin ti tawh suh aw. I nau i ti na ang"
"A tap a, ka khawngaih alawm. Anu, Mama ka pawm duh"

"Hnute kan pe ang a, thuthlengah ka mut ang a, i lo awm dawn nia"
"Um, ka awm chak tawh. Hnute chu pe vat vat rawh anu" a ti sauh sauh a.

"In awm em?"
"Aw awm e, lo kal rawh u"
"Hei committee kohna aw"
"Aw le, lo dah tawp rawh u"
A pa a inbual bawk sia, naupangho nen chuan kan chhuak phei ta a. YMA committee kohna a lo ni a.

Naute chu ka mut a, chawhmeh ka siam chhunzawm leh ta a. Thenawmnu a rawn lut a, Bawihtei te unau hi an lawm ve bawk a, an rawn chhawnchhaih ve reng a. Kan titi pah reng bawk a.

"Chhanchhante, ka haw dawn. Nanaute hi ka hawpui dawn a nia" tiin thenawmnu haw tur chuan Bawihtei chu a fiam paha. Ani phal lo lah chu a tap nghal pur a.

"A nih leh ka hawn dawn lo, bang rawh le. Chhanchhantei hi alawm kan duat" tih pah chuan amah chu a pawm a. A lungawi ve leh mai bawk a. A pa committee a ngaih avangin thenawmnu chhuah hnu chuan chaw kan ei ta nghal a.

Hun a ral a, kan naute pawh a changkang ve tawh hle a. Bawhkhup a thiam tawh avangin thuthlenga mut chi pawh a ni tawh bik lo. Kan pa farm kal chu hmanhmawh deuhin a lo haw a.

"Bawihi, thu lawmawm loh deuh kan hre tlat mai" a rawn ti a.
"Eng nge?" ka lo ti vat a.

"I nu kha a chau thut a, Serchhip an rawn panpui a..."
A sawi zawh hma hma chuan, "Engtin nge a awm?" ka lo ti vat a. Haw viau thin mah ila ka nu a nihna a bo chuang si lo. Bakah U Rfa'n ngaihdamna chungchang a sawi atang khan ka rilru a dangin, ka nu ka huatna pawh chu a lo nep ta hle tih a dam loh thu ka hriat chiah khan ka hre thei.

"An chhan hman ta lo. Kawng lakah a rawn boral ta a ni" U Rfa'n a tih chiah chuan ka thingthi hnawk mai a. Ka mittui a far nghal zawih zawih mai. A pawi ka ti... A dam laia ka ngaihdamna thu ka hrilh hman lo khan min va ti na tak! Kan inhmuh hnuhnun ber tum khan tawngkam thlum leh mawi hnai pawhin ka chhawn lo a, ka laka inthlahrung dek khan a awm a. Hmuh pawh min rawn hmu nawn tha ngam tawh lo a nia.

"Ka nu min ngaidam rawh aw" tiin ka tap vak vak a. Awmze awm tawh loh hnu-ah ngaihdam ka dil a, hriat pawh a hre tawh si lo. Thil chu a lo ti sual tawh ngei alawm. A inchhir ve tho, a nun pawh a nuam lem lo tih a hmel leh a che zia atangin a hriat vek. Kei a fanu, a inhnem ve theihna awm chhun tur hian mi fel famkim ang hrim hian ka lo deng a, tawngkam feikibar nen ka lo chhun ve sawk sawk a. Aw! Ka nu a va pawi tak em!

Keimah ang tho a fahrah, rilru hah inhrik thawlna tur neih hauh loin maw i liam. Kei angin pasal a nei fuh ve bawk si lo. Ka tap tawp thei lo.

Ka pasal chuan min rawn kuah a. Bawihtei lah eng mah hre thiam ve hek lo, a lo tap ve vak vak a. Thenawmho an rawn lut khawm tak tak a. Ka pasal chuan thil awmzia a lo hrilh zung zung a.

Ka nu chu Serchhip khaw luh dawn tepa boral a ni a, an rawn tlangpui a, kan inah a ruang dah phawtin, kan veng YMA ten kuang siamsakin, Khawlailung lamah chuan kan phur chho ta a. Ka pasal nau Mami chuan min zui chho ve a, kan motorah naute a chuanpui a, kei chu pick-up hnungah ka nu ruang bulah thu-in ka tap deuh reng a. Ka va inchhir tak, an thih tawh hnu chauh a an chunga that hian awmzia a nei tawh si lo.

Ka nu chu kan vui liam ta. Chhungkima kan awm ve thin na kan In chu a ngai tein a lo la ding a, a lo rawp ve tawh hle. A chhia a chhia chuan an la luah ve reng a. Ka lut a, ka pi leh pu leh ka pa ka rilru-ah lo lang telin, ka lung leng lutuk chu ka tap chhuak rawih rawih a. Zah pawh ka sawi thei tawh lo a ni ber mai.

Tunah chuan ka pi leh pu, ka nu leh pa ka sun zo vek ta. Kum 30 em pawh tlin hma-in mi pali ngawt kan sun ve ta chu a nia.

Ka pa Muana te khan, "zan khat tal chu riak ve rawh u" an tih avangin, kan pa chuan farm lama kan chhawr te a phone kual a, ka nu ruang chhuah zan chu Khawlailungah kan riak ve ta a.

Zanah pawh chuan ka muhil thei meuh lo. Ka ngaihtuahna chu a vak kual thuiin, kil tin chu a dap kual vel ruai a. Aw! Lalpa hringnun hi i tel lo hian a va lo ho em!

Aizawl kan awm hma deuh a, ka pass lawm nana Ar tui min rawn kensakte kha ka mitthlain ka hmu a, min ti natu leh min vel taptu a ni zel tawh si. Chumi zan chuan chhin khat mah ka chhing lo.

A tukah chuan thlan hungna lamah chuan kan pa chu tel ve-in, keini chu ka nu-te in lamah chuan kan phei ve leh a. Ramhura fanu, ka naupan zual laia ka kawm ve thin pawh kha pasal a lo nei tawh a, fa pathum chhang zing deuh deuh a neiin, zu an lo zuar thin a. A nau mipa te pawh zu an hehin, an chhungkua an lo buai ru hle tawh a lo ni.

Ka pa Muana te pawh chu Ropuia a awm tha duh bawk si lo, U Sangtei'n pasal a nei tawh bawk nen U Rela pawh kan khaw lamah a awm daih tawh a. U Rfa nen an inhmu pawh an hlim dun ve hle.

Chawhnu lamah chuan Serchhip lamah chuan kan haw thla ve ta a. In kan thleng chu ka chau hle, lusun nen, zan lama mut theih loh nen, in luh rual rual chuan thuthlengah ka let nghal a. Ka pasal chuan, "Khumah va mu hahdam daih rawh. Khawsak chu ka lo rel mai ang" a ti a. Tun tum chu ka tlawmngai peih lo, nau chu ka mut a, a bulah chuan ka mu ve nghal a, ka muhil zui nghal a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)