LALPA NEN CHUAN ENGKIM A TIHTHEIH. Chapter 5#

Episode kal lai dah luhna

Moderator: writers

Becky khiangte
Posts: 69
Joined: April 30th, 2021, 12:12 pm

LALPA NEN CHUAN ENGKIM A TIHTHEIH. Chapter 5#

Unread post by Becky khiangte » June 22nd, 2021, 7:14 pm

#LALPA NEN CHUAN ENGKIM A TIHTHEIH#
CHAPTER 5#

🎼Thim zingah thu in ,
Mangang ritphur in,
Hlimni reng i beisei ngam tawh lo maw?
Mahse, nghak hram la,
Kawng hawn ani tawh,
Pathian hmel duhawm chu a lo eng ngei dawn e.

Cho: I rilru lungngaia rumin,
Mangangin tap thin mahla,
I beiseina chu
Bo rih mahse,
Thim chu a kiang ang,
Khua a la var dawn ,
Pathian hmel duhawm chu a lo eng ngei dawn e.🎼
" Kim, beisei bo hle mahse, he hla hian beiseina min siam leh thin. En teh, hmanni a speaker ka sawi kha naktuk chu kan va pan ve tawp dawn mi ang? " Ka ti a. A kut lukham chu phelhin ka lam a lo hawi a, " mahse, min lo ten viau lo ang maw" ..
A ngaihtuahna chu a dik ani.

Addict a kara +ive kan ni tlat. Mahse kha speaker pawh kha a hma in addict a lo ni ve tho a, min hrethiam tho mai thei asin.

" Va pan chhin phawt I la , kawng min kawhhmuh thei mai thei asin. Speaker a nia, min ten ka ringlo" ka ti hram a, beiseina ka nei tlat.
" Mmm... I tih tlat chuan kan kal dawn nia, mutthilh tum teh ang" kan maimitchhing ringawt, mit kham ven nan a ni mai...

Zing dar 8 a lo ri tawh, kan lo muhil ve sek aniang, kan harh chuan . Ril a tàm ve ruih mai, pum a ruak tlat. Ka tho a, thingpui ka lum a, fridge ka hawng a, cake ka la chhuak a, ka zai a, piece hnih ka dahchhuak a.
Kimkima pawh a lo tho ve a, " Morning, I va tho hma ve" a nui leh vur vur tawh. Nizan khan a rilru a hah tehreng nen, tumah chuan a hlim leh tawh aniang, he pa zia hi ka duh em mai. A lungngai rei ngai lo, a hlim reng mai.

Sana ka kawk va a, " hma viau mi" ka nuih ve sak. Ka sam a rawn tuai zauh a, bathroomah min luhsan a.

Thingpui chu ka siam rak rak a, ka phur viau mai, kan speakera chu whatsapp msg ka thawn a, min rawn reply thuai a, a awm dawn thu leh min lo beisei reng thu ka chhiar huan ka lungphu a su dup dup mai. Kimkima pawh a lo chhuak a, thingpui ka lo pe vat a, cake chu a ban ve a. " Eirawng I bawl dawn em, chaw pangngai ei ka chak" a ti a. Zanah chaw kan ei tawh lo a, nimin nilengin mood a fu lo bawk nen. A ril a tam ve tawh ang.
Eirawng chu ka bawl thuai thuai a, tukverhah hawichhuakin, duhsaki zai a lo zawm ve a, ka mittui a tla zawih thei.

Pathian hnenah hian ka tawngtai lohna a rei lutuk tawh. Ka nun beidawn em avang hian Pathian awm pawh ka ring tawh lo hial ani...

Ka putea min khawih lai te khan min lo chhanchhuak ni se la chuan, tunang hian ka awm lo tur ania, ka nun chhiat vek tawh hnu ah amah beiseina min siamsak a, eng ang Pathian teh hrep nge maw anih le!

Chaw ei kham chuan khatla lamah kan liamthla a, speaker in kan lut tur chu ka tha a khur tlat. Kimkima chu ka chelh a, ka ding dat, thawk kan la leh te te a, kawngka chu ka kik ta, nu hmel fel tak, hnar zum rat mai , samkir hian kawng min lo hawn a, " lo lut rawh u, in va lo thleng hma ve, kan lo beisei reng tawh che u asin" a aw tham deuh chhalh chuan a lo ti a, a nui sang a, a hmel chu a zahawm , chu chu ka sawithiam dan ber ani.

Inchhungah chuan kan zui luta, sitting roomah chuan pa pakhat T shirt nghawng bial chi ha hi a lo thu a, a kutah bible a lo keng a, a tarmit sawi che dat in min lo en a, " E kha, in lo thleng tawh maw, in va fel em, vawiin chu kan inkawm ang a, hlim deuh in. Ngampa tak khan awm ula, " tiin a kut a lo pharchhuak a. A nui sang a, a hmel chu ka sawi thiam lo. A nunah khan hlimna a awm . Amah kha kàp engtu a awm ka ti mai. Kan inchibai a, thutna tur min kawhhmuh ah chuan kan thu a.

Min lo welcome that em avangin ka zam lutuk zawk. Ka kut ka nuai neuh neuh a. " In thlahdul rawh u, in tang tung anih kha, zalen deuh in kan inkawm dawn nia" a ti leh a. Ka tang lutuk tih ka inhre chiah. Nichina lo welcome tu che u kha ka nupui ania, Epi ania, kei hi pu Ramte min ti mai dawn nia, " tiin an nu chu thingpui lum turin a tir zui nghal a. Phur takin pi Epi chu a che vat vat a, a nui sang reng bawk. An inah hian kan zalen tlat, boruak a nuam riau mai.

Thingpui in zawh chuan, " Enge ni in sawi duh kha, ka lo ngaithla ang e" pu Ramtea chuan a ti ta a. Kei chu min rawn melh deuh bikin ka hria. Ka aw ka thian kharh a, " Englo ania , addict kan nia, chuan damdawi te kan vawrh bawk thin ....
Tunkar chho ka khua a sik reng vangin kan intest a, chuan... " Ka ngawi dat a... Ka thaw hak. Min lo melh ngar a, ka sawi leh tur chu a lo nghahhlel hmel hle. A meng zim sun a, a chal a chuar nung a, a tarmit a siamtha zeuh" chuan" a lo ti a.
Ka chil ka lem khawlh a, " ka lo positive reng a, a hnu ah ka thianpa hian a test ve leh a, kan pahnihin HIV+ive kan lo ni reng anih chu... " Ka mittui a rawn hnai leh a, ka khur deuh ngar ngar.
Pi Epi chuan min lo kuah vat a, ka hnungzangah a chul a, zawi te te in a beng thek thek a. Kimkima chuan" Ka pu, kan tan hian beisei tur a la awm em?. Chhungkaw zahawm tak atangin ka lo chhuak ve a, ka nu leh pate zahna siamtu nih hi ka duh bik lo asin. Min pui rawh" a lo ti ve bawk.


Pu Ramtea chuan, " Ummm, engpawh nise, Pathian hnenah tawngtai phawt ang u aw," zaidam takin a ti a. A tawngtai lai chuan engtinnge mawni hian ka awm, ka chhipah a za, asa deuh hum humin ka hria. " Lalpa, heng ka unaute pahnih hian nangmah an hmuh theih nan che an nunah harsatna I thlen a vangin lawmthu ka hrilh a che. He Harsatna hi an tan hlawkna ah chantir ang che, Isua hmingin ka dil e, Amen. "

Pathiani min hmangaihna te, kan sual tlanna tura a fapa neih chhun min pek thu te chu an sawi dap dap a. A tawpah keini ang misualte tana a tawrhna leh eng anga sual pawh ni mah ila , Pathian hmangaihna chuan min la ngaidamin a fa ah min la pawm duh ani tih te min hrilh chuan ka thinlung a hneh hle mai.
" Ka pu, keini ang addict a kara +ive lehnghal hi Pathian chuan min la ngaidam thei ang maw? " Ka ti chhuak ta a.
Lawm takin min melh a" Ngaidam thei teh reng e, Pathian chuan eng anga sual leh bawlhhlawh pawh a ngaidam thei asin. Kan sualte kan sim a, a hnen kan pan hun hi a lo nghak reng thin zawk asin" a ti a.


Kan pahnih chuan min melh tawn a," in sualte sima a hnen in pan chuan a lo ngaidamin a lo kuangkuah thei reng che u, Pathian chu hmangaih Pathian a ni a, kan vai hian vanramah min hruai vek a duh avang hian hun tha min siamsak reng thin zawk ani. Nangni pawh he in natna in vei hi amah in panna tura a kawng buatsaih ani tih hi in hrethiam tawh ang chu maw" a ti leh dap dap a.

Ani dawn tak maw, lo positive lo ila chu , beidawnna tak tak ka la nei lo ang a, Pathian pan duhna pawh ka la nei awm si lo.
Mahse, ka la buai ani. Ka damdawi tih hi ka bansan tawp thei lo, kum tamtak ka lo khawih tawh a, engtinge ka nghei thut thei ang.
Ka mitmeng atangin ka ngaihtuahna a chhiar thiam emaw ni, pu Ramte a chuan" engtinnge ni ang tiin I ngaihtuah ani tiraw, a awm lutuk e, in tan vawilehkhata damdawi han nghei thut chu a har ang, lungngai lo ula , sim in duh tak tak anih chuan ka pui ang che u. " A va han tihzia em aw! Pan fuh hi ka inti lutuk....

Tichuan, an zarah ART damdawite la in , ost nen tangkawpin kan damdawi khawih pawh chu nghei turin min pui ta a. Nitin an nupa in civil hospital min hruaiin councelling te min neihpui bawk thin.

Keini pahnih pawh kan tha chho sawt tawh hle mai, kan hmel hmuh a nuam a, kan hlim em em tawh ani. Kan suffer zawng zawng pawh kan tuarchhuak ta, min thlahthlam lo va min kaihhruaina rah chu a lo lang chho ta. Tunah chuan kan pangngai tawh hle mai. Tun hma a min hretute pawhin min hai hial mai.

Kan eizawnna pawh chu kan la kalpui zel a, thingzai zawrh chauh kan khawih tawh a. Kan ina lo kal thin te pawh an dang ta.

Salvation nu ho(home leaque) an ti emaw ni an lo leng thin a, tawngtaina leh sharing te an rawn nei thin.

Piantharna tak tak chu ka la chang em mein ka inhre lo, mahse ka thinlungah hian nung tlat hi a awm ani.

Zankhat chu kan thingzai sem kan haw tlai deuh a, biakin pakhat kan tlanpelh lai chuan zaipawl hi an lo zai a,
🎼 PATHIAN HNAWL TAWH HNU
NI IN INGAI LO LA;
PATHIAN IN A THEIHNGHILH TAWH CHE RING LO LA;
ENGANG SUAL PAWH NI MAHLA,
A LA HMANGAIH RENG CHE,
CHHANDAMNA I LA CHANG THEI TIH HRIA LA

CHO: A HMANGAIH A NGAI RENG FO;
CHIANG TAKIN A HRIA CHE;
SAWMNA HNAR TAWH VANGIN BEIDAWNG LO LA, A DILTU HNENAH A PE,
A KHAWNGAIHNA MAK CHU
A HMANGAIH CHE ,
A LA NGHAK RENG A CHE 🎼....

Pathian hian min lo la hmangaih reng ani. A hnen kan pan hun a nghak ani tih Chiang takin ka hre ta a. Mahse amah pan tawp turin kei hi ka insit ani. Kei addict ve mai hi, atan enge maw ka nih le, tihtheih engmah ka nei si lo. Damdawi ka khawih tawh lo ani ringawt a, ka taksa pawh a tha chho tan.

Mahse, piangthar han inti tur hian ka nunah hian han danglamna huih hi a awm si lo. Ka la piangthar lo zawk in ka hria ..

Kan haw kawngtluan chuan ka inngaihtuah a. Tunah hian piangthar lovin lo thi ta ila, vanram ah ka kal dawn lo tih ka inhre Chiang lutuk. Ka thillo tihsual tawhte khan min rawn bei zui a, Pathian tan hian engmah ka ni lo. Mitha an tam em mai, kei ve mai mai hian tihtheih ka nei si lo tiin ka inngaihtuah a. Mahse, pianthar ve chu ka duh bawk si.

Pu Ramtea te inah chuan kan peng kawi a, an lo la meng a, kawngka kan lut chu ka tek chhawk mai. Thingthiin kan pahnih tan an nupa in an lo tawngtai anih chu...
Ka hming an lamlai tak ka nang fuh a, a mak ka ti lutuk.. kan tlawh lohna a rei ve deuh tawh a, chu ti chung chuan min lo la tawngtaisak reng anih hi. Pan fuh hi ka va inti em!.

Ngawi rengin kan lo ding a, an tawngtai zawh chuan an lo dingchhuak a. Pi Epi chuan a mittui a hru zeuh a. " In lo kal ta maw, kan tawngtaina Pathianin a chhang anih hi.... In dam tha em? "
" Aw, kan tha e, ih ... Ka piangthar ve duh " ka ti ta tawl mai.

An nupa chuan min en hau a, chutah.. Pu Ramtea chuan " I duhthlanna kha Lalpan a nghak ani, tunah chuan a nghakchhuak ta anih hi, a lawmawm e," tiin min chibai a, Pathian thu sawi zuina a nei a, hlim takin kan inkawm chho a, ka harsatna ril ber, piangthar chhinchhiah na keimah a awm tur a ka beisei tlat te chu kan sawi chho zel a. Zan rei tak thleng kan inkawm a. Ka zang ta huai mai. A vawikhat nan ka tawngtai ve ta.

" Lalpa, kei addict, HIV+ hi min duh ve anih chuan , I tan ka rawn inpe e, min lo nei ang che" a bak ka thiam tawh chuang lo.

Mahse, a mak lutuk. Ka tawngtai atang khan keimah min delh rittu kha a bo duak hian ka hria.
Kimkima pawh chu a tawngtai ve ta a. Kan lawm em avangin kan tap zawih zawih mai. Pu Ramtea chu a tawngtai veleh a, hlabu a rawn phawrh a, an mahni salvation hlabu a rawn phawrhchhuak a.

Pathian hnawl tawh hnu niin inngai lo la,
Pathianin a theihnghilh tawh che ring lo la tih hla chua a rawn keu chhuak chiah. " Aw, he hla hi , hei chiah hi alawm nichin mai khan an lo sa a, zaipawlin , a nalh ka lo tia , traffic jam vangin kan ding reng a, ka ngaithla reng a, ka va lawm em" ka ti hluai a," I sa chhin ang u hmiang," Pu Ramtea chuan a lo ti ve bawk a, a guiter chu an nu chuan a lo pe vat a, an mil chawt chawt a, hla chu an la ta, ka thiam ang ang chuan ka lo sakpui ve a.

A thu tlar tin mai chuan ka rilru a khawih thar em em mai a, a thluk pawh chu ka thiam ta thuai mai..


Kan zai zawh chuan" Rinbawih, I aw a va tha ve, kan rawngbawl na ah zaitur kan mamawh sia, min lo zui ve ta che" Pu Ramtea chuan a ti ta mai...

" Nia, a lawmawm ngawt ang, kei pawhin ka zui ve thin alawm, hei in hmuh ang hian fa kan nei lo a, in pahnih hian kan fa te in ni mai.. min zui dun theih chuan kan lawm ngawt ang. Pathian pawhin a hmang em em ang che" pi Epi chuan a lo ti ve bawk a. Ka huphurh hle mai, ka lawm bawk si.

Ka chhan hma in kimkima chuan " nia a tha khawp ang, kan pahnih chauh a kan awm hi chuan ka zam deuh thin a, in rawngbawlna a kan zui che u chuan Pathian thu ngaihthlakna hun tam zawk kan hmang thei ang a, kan zui ang che u" a lo ti vat a.

" A va lawmawm em aw, ni e, tawngtai ho na te kan nei thin dawn nia. Thla tharah hian Aizawl gilgal corps ah rawngbawlna kan nei dawn a, chuan sawleng corps ah camping leh crusade kan nei dawn bawk a, chu mi tur chuan in lo inbuatsaih ve ang a, tiraw??.. Rinbawihi pawh hla I lo zir belh ang a, Nitin min lo pan thin dawn nia.. " pu Ramtea chuan ti a..

Tichuan zan a lo rei ta bawk nen, hlim takin kan haw ta a..

Thla a thar chuan Gilgal corps ah chuan Pu Ramtea ho chuan rawngbawlna kan nei chho ta a. A mak hle mai, kan customer te pawh an lo awm ve nuk mai nia.. tha awm deuhin rawng an lo bawl a, lehlamah an lo rui ve thei tho a lo nih hi..
Zai tur chuan min sawm ta a.
Pathian hnawl tawh hnu niin inngai lo la tih chu ka sa ta a, ka tui bawk a, a hla thu in min hneh bawk nen, ka meng miah lo.
A diltu hnenah a pe,
A KHAWNGAIHNA mak chu ,
A hmangaih che , a la nghak reng a che tih ka sak chhoh lai chuan halleluiah amen rawn tituar ri ah chuan ka meng chhuak zawk a. Kan customer kha a lo ni. Pathianin a thinlungah hna a thawk ani ngei ang.

Ka zai zawh chuan testimony sawina hun hawn ani a, kan customer chu a lo ding chhuak nghal.
" Simna tello in Pathian rawng hi ka lo bawl thin a, lehlama awr dum lehlama awr sen an tih ang hi ka ni. Hotute min ruat avangin SAY ah te a hmingin hruaitu ka lo nih ve avangin Pathian pawh pha tak tak lovin kohhran rawng zawk hi ka lo bawl thin a, tunah chuan nun simin Pathian rawng chauh ka bawl tawh ang" a rawn ti a.
Thusawina hun te chu a ni chho ta zel a. Sermon nung tak mai kan ngaithla a, kan ban dawnah chuan zai turin min sawm leh a.
Pathian hmel tih hla Lalduhsaki sak vawi tamtak kan ngaihthlak tawh chu ka sa ve ta. A hla thu in min pawlna a rei tawh bawk a. Ka sa nung ve riauin ka hria, Pathian thlarau chuan nasa takin min khawih nawn a, ka sa hlei thei lo, ka Amen tuar 2 a, ka tap bawk. Music chu a lawngin a kal zel a, a tawpah phei chuan kimkima a lo ding ve tawp, min rawn sakpui ta tawp mai ani. Mipuin min lo zawm bawk a, vawithum kan nawn na ah kan zo thei hram.

An CSM an tia maw ni , chumi te inah chuan min hruai a, thingpui inho na leh tawngtai rualna te kan nei a, an kohhran hruaitu hrang hrangte lo kalin min chibai liam liam a..

Chawhnu inkhawmah chuan, Kimkima a tetimony a sawi ve thung ang a, kei ka zai leh bawk dawn ani. Team member pathum an lo kal ve bawk a, kan inpawh tha tawh bawk a, kan infiam ve bawrh bawrh tawh mai. Rilru thianghlim tak pu in rawng kan bawl tlang a, a nuam khawp mai.

Chawhnu inkhawm pawh an rawn kal thahnem khawp mai. Zaiho na in bul kan tan a, team member te zing a mi Jeremy leh patea chuan zai an kaihruai a, kei hlachang min sawitir bawk a. Zai anuam khawp mai.... Sermon sawi hma in Kimkima testimony sawi turin a ko a.


" Kei hi , Lalruatkima ka ni a, in hma a lo ding tur hian ka that bik vang ni lovin Pathian min hmangaihna leh a zahngaihna a vang chauh ani.
Addict ve mai ka nia, damdawi ka vawrh bawk thin a, nu leh pa tamtak tan chuan ka ngeiawm thin viau ang. Ka damdawi khawih vangin HIV+ hial ka lo nih phah ta a...
Mahse, Pathian hmangaihna chuan kei addict, positive ve mai pawh hi min lo la hmangaih a, a hnen pan turin min la sawm a, min la nghak reng ani tih ka hriat hian amah pan lo thei ka ni lo.
Kan speaker te nupa hian Lalpa ke bulah min hruai ta ani.
Pathian thu thianghlim I lo ngaithla ang u.
Johana bung 3:16
PATHIANIN KHAWVEL A HMANGAIH EM EM A, CHUTI CHUAN A FAPA MAL NEIH CHHUN A PE A, AMAH CHU TU PAWH A RING APIANG AN BORAL LOH A, CHATUAN A NUNNA AN NEIH ZAWK NAN.
Lalpan a thu thianghlim kan chhiarte malsawm rawh se. Ka lawm e" a sawi tha ka va ti em! A tawngkamte chu khawia mi nge maw ni zawk ni. Amen , halleluia an lo pe sap sap hlawm mai.
Sermon hma in Jakoba Pathian tih hla chu ka sa ve leh thung a.
Kei bumhmang leh misual tawmkailo tan pawh hian, Jakoba Pathian ngei kha ka Pathian a ni si..
Sermon nung tak mai kan ngaithla leh a. A nuam thei khawp mai.

Pathianin kei misual , mite tana hnawksak, addict akara positive lehnghal a rawng bawl ve a phal hi ka phu lo lutuk ani. Pathian hmangaihna , a dawhtheihna leh a ngilneih a chu nasa takin ka chang thar leh a, ka lawm em em ani.

Kan chanchin chuan ka nu beng pawh alo thleng ve ta hial a. A lawm hle niang, kan rawngbawl na ah min lo panchilh vang vang, kan han inhmu chu kan inkuah tawp a, kan tap char char, mahse tuma mi chu lawm vanga tap ani ve thung. Kan speaker leh team member te nen ka inhmelhriat tir a. Speaker ber chuan " E khai , hei fanu I lo nei zaithiam hle mai, kan rawngbawlna min ti phuisuiin Pathianin a hmang bawk si a, a lawmawm hle mai" a lo ti bawrh bawrh a." Awi maw, in lo kaihruai tha a, ka lawm lutuk zawk asin, in chungah hian lawmthu sawisenloh ka ba asin, nangmahni kaltlangin Pathian hmel ka fanu hian a hmuh leh theih phah a" ka nu chuan a lo ti ve bawk a. Hlim takin rawngbawlna kan nei ho zel a..

Mahse, chu chu setana thiktham a lo ni aniang chu...
Kimkima testimony ah khan positive kan nih thu an lo hre pung chho ta a, kan inluahna te chuan min hnawtchhuak a, warning pawh min pe lo. Kan bungrua te chu min paihchhuahsak vek a, kawngka an lo kalh thap.

Ka rilru a na ve hle mai, kei hmeichhe rilru no zawk phei chu ka tap tawp.

Mahse, kan thu ngaihthlak khan min hnem leh thin. Ringtu nunkawng hi a nuam leh hahdam reng ani lo a, hrehawm tam tak tuarin vanram kawng kan zawh dawn ani tih kha ka hrechhuak thar leh a. Hengte hi chu a la nep lutuk ringawt . Kan Lalpa min tawrhsakna ngaihtuah chuan, kut em min thlak pawh ani hlei nem. Ani chu a mihring siam, a hmangaih ngawih ngawih ten kut thlakin chil te hial an chhak asin.

Kan bungrua te chu kan khawm a, ka nu te inlam ah chuan pik up in kan phur ta, kan hire tawp mai ani.

Ka nu in min lo hmuh chuan min lo khawngaih leh hle mai. " Rinbawih , ka va lainat tak che em! Kei chuan ka hnawtchhuak ve lo ang che u, lo kal rawh u" tiin min kailut a, kan bungruate chu Duata leh sawmtei chuan min lo thiarpui ve bawk a. Kimkima chu a zum deuh duk a, mahse ka nu leh naute chuan inthlahrung lo turin an ti a, an fiam bawrh bawrh a, ngampa tak chuan a awm zui ve ta mai.

A unau te leh a chhungte aia kei min thlangtu kha ani ve miau a, ka phatsan thei bik lo. Kan awm dan chu a fuh viau lo na chu ka nu pawh chu a la ngawi ve hrih phawt ani.
A chhungte lamin aw an la rawn chhuah bawk si lo a, anin a pan ngawt ngam bik si lo ani.

Kan han khawsa chho ve naw naw a. Ka Naute chawma awm chu harsa kan ti dun viau mai. Kan thingzai lakna te lah chuan kan chanchin an lo hria a, engmah min pe duh tawh lo. Kimkima inthlahrung lutuk chuan , " engah nge maw ka lo inpuan kher kher le" a ti thul . Mahse ka hnem hram hram a, " kan tan a Pathian kawng min ruatsak anih hi, nakinah chuan kan la ngai dawn asin, heng Harsatna kan tawh te hi amah min hnaihtirtu ah kan hman zel hi angai alawm, Harsatna tawk lo ringtu nun chu a chak thei hlei nem" tiin ka hnem leh thin.
Kan speaker chuan hnawhchhuah kan nih chu a lo hre ve a, min rawn zawngchhuak hlawl mai. An hnena cheng turin min rawn sawm a, mahse ka lo hnar thak, ka nu hi awmpui ve ka duh hrih, Kimkima erawh chu ama thutlukna ah ka dah a. Roomah kan inzui lut a, "Kim, I duh chuan min kalsan rawh, I tan pawh a nuam zawk ang, hetah chuan I hrehawm tihmel hi hmuh hrehawm ka ti ani. Ani chuan I chhungte hnen pawh a hruai thleng thei ang che, an lo ngaidamin an lo pawm leh thei ang che a nga, kan pahnih tan a tha zawk ang" ka ti a. A ngaihtuah chian chuan a dik ati hle a, mahse min kalsan chu a hreh ve hle tho mai.

A chan ngaihtuah chuan a awm ve reng mai, a hun harsa lai zawngah ka bulah a awm a, tunah a nun a inthlakthleng ve chiah a, kan pahnih tan kan awmhran a tha zawk bawk si. Thutlukna siam ahar ve ngawt ang. " Ummm. Ka kal phawt ang a, ka nu te hneh ah pawh ka la kal ve anih chuan nang nen kan inneih an phal theih nan ka lo dil ang a, nang pawh lo tawngtai ang che aw" a ti ta nge nge a... Kan inkuah a, kan infawp zeuh.

Karkhat lai a liam leh ta, kimkima pawh pu Ramtea te inah a awm tawh a. An duat bawk a, nuam a ti viau mai. A nu te nen an la inbe lo a, hun tlem a la mamawh ve ani awm e. Keipawh ka nu nen in kan nghak thin a, Pathian thu te kan sawi dun thin a, kan awmna bul bawr vela mite hi an rawn lutkhawm thina. Sharing te kan nei ho thin.

Ka chanchin chu min sawitir hmasa a, Pathian nena kan intawn dante, sawi nuam ka ti a, ka sawi ning thei lo.
Kei misual boral mai tur , a tana tangkaina nei ve miahlo pawh min lo hmangaih a, min lo pawm duhtu hi ka phatsan tawh lo ang..


Inrinni tlaiah chuan ka nu nen kan kawmthlang huan kan ritfai a, antam chin ve kan tum a, lei ka lo leh turh turh lai chuan, ka phone a lo ri a, kimkima a lo ni.
Ka chhang vat, "Duat, engnge ni ta," alai leh ringawt ang chu. 😂.
" Um.. ih... " Ka sawi dik tak tak ..
" Aw, sawi rawh le, ka ngaithla e"
" Ka nu ten min lo bia a, lo haw rawh an ti a, ka haw dawn asin, chuan.. " ka va lawm em! Hetia midang ina ka tello a awm ringawt kha ka lo khawngaih viau asin. Mahni hringtu ngei te hnen a awm chu a lungmuang deuh zawk ang chu.
" Mmm. A tha nasa nih chu, bible te kha lo chhiar tha la, I chhungte rilru thlak vek I tum dawn nia, beidawng lovin aw, ka lo tawngtaipui ang che" ka ti a, phone ka dah nghal.

Ka nu chuan kan inbiakna chu a lo hre vek tho a, engmah kan sawi zui lem lo. Lei ka leh zawh chuan antam chi kan neih chu ka theh nghal a, kan duhtawk ani mai.

Thingpui in turin kan inchung nu Didiki ni chuan min lo ko a, kan pan chho a, " awi kan in hi inluah lo ang tih ka hlau em mai, a khawharthlak thei sia, inu lo awm chinah phei hi chuan thingpui hang inpui tur te ka nei tawh a, nuam hi ka ti leh zual ania" pi khumi chuan a ti seuh seuh a, a thau bawk a, kawrfual hi a ha reng mai, atan chuan anuam zawk , bakah hmuh pawh anuam phian.

Kan chungah a tha a em em a, mi dang hi chuan a khirh si te hi an tia, mahse, kha kha chu a zia ve ania, hriatthiam ve angai.
Thingpui kan inzawh chuan " ka nu khum, kan haw thla ang e , inbual te kan duh tawh a, bai ka lo siam ang , I lo suak dawn nia" ka ti a, kan hawsan ta a.


Nithum a ral leh chuan, pu Ramtea pawhin min lo be leh ta, sawlenga kan kal a hun dawn tawh alo ni.
Team member te nikhat nilenga Pathian hnena chawnghei tawngtai a rawt a, Hangi lunglen tlangah kan kal dawn a lo ni.
Ka nu chu ka hrilh a, min phurpui viau mai." Rinbawih, hetia Pathian tana in penchhuak ve ta hi ka va lawm em, ka lo tawngtaipui zel ang che aw" a ti a.ka lu chunga kut nghatin min tawngtaisak a, malsawmna min hlan bawk.

Pu Ramtea te in ka thlen chuan an lo awm deuh thap tawh a, keimah chiah min lo nghak tawh a, ka tlai ber avang chuan min lo fiam bawrh bawrh a." Lal anu bulah I awm a, I pangchang viau nimaw," patea chuan a lo ti zeuh a...an nui ham ham a..

Hangi lunglen tlang chu kan thleng ta, a hmun chu a thengthaw nuam hle mai.. Chokiderin min lo welcome , biakin te fel deuh mai an lo nei ve a, tahchuan tawngtai rualna kan neih zawh ah mahni theuhin fianrial tawngtaina nei turin kan cabin turah theuh chuan kan lut ta sang sang a. In te fel tak nahni chauh a tawngtaina tur an lo siam thluah mai , chutah chuan duhtawkin Lalpa pawlna te ka nei a . A changin bible ka chhiar a, a chang leh ka zai a, a changin ka tawngtai bawk. Pathian pawlna leh awmpuina nasa tak mai ka dawng chho zel a, nuam ka ti em em mai ani.

Kan rawngbawl zelna tur te chu Pathian hnenah ka hlan ta zel a.
Reilo te emaw ka tih chhungin kan hun tiam a lo zo ta der mai.

Biakin ah bawk chuan kan lut khawm leh a. Pu Ramtea chuan, " A lawmawm e, vawiinah hun tha tak mai kan team in kan hmang thei a, Pathian awmpuina leh a pawltharna pawh kan dawng theuh in a rinawm a, tichuan, naktuk chaw eikham lamah hian sawleng chu ka pan ang a, zan atangin crusade kan nei chho tawh ang a, Rinbawih pawh I hla ho kha zaninah kan en leh ang a, hla hi thu a ni bawk a, thluk nei anih avangin mi thinlungah a cham rei bik a, mi thinlung a hneh bik avangin tha takin I lo inbuatsaih dawn nia... Aw le, Pathianin kan tawngtaina te chhang a hun tha tak min pek avangin lawmthu kan sawi ang a, kan haw tawh dawn nia" a ti a. A tawngtai zawh chuan motor ah kan lut leh ta sap sap a, bazarah ka mamawh te enkual ka duh avangin min penpui zuai a, kan speaker te inah kan in drop vek phawt a, chuta tang chuan mahni inlam kan pan leh ta sang sang a.

Ka nu chuan lawm takin min lo dawngsawng a, ka naute hmel pawh hmuh a nuam tawh tak zet ani. An hlim hmel ka hmuh hian nuam ka ti. Ramtea pawh in ka chanchin a lo hre ve tawh a, min lawmpuiin min chhuang tak zet ani tih thu min lo thawn a, kumtawp lamah Christmas hmang turin a rawn chhuti ve dawn a, ka hmu chak tawh khawp mai....

Ka nu chuan chhung inkhawm a kaihruai a, kan rawngbawlna turte min hlansak thlap a, ka lu chunga kut nghatin a tawngtai bawk a, kut insuihkualin Lal biakna kan sawi ho a, kan hlim hle mai.

A tukah chaw ei kham chuan sawleng kan pan ta ,kan team ho chu kan thlengho vek a, an biakin bulah CSM te inah kan thleng a, min dawl zo bawk a, a nuam khawp mai.
Sawleng hi Mizorama Salvation hmuchhuaktu puKawlkhuma lo humtu khua kha a lo ni a, an ngaihsanawm khawp mai, Salvation history te chu min hrilh ve nual mai.

Crusade leh camp chu kan nei chho ta a, kan rawngbawlna tlawmte Lalpan mal a sawm a, campers an thahnem in , boruak a tla tha khawp mai. Kei pawh solo leh testimony sawiin ka hmanhlel a, sawi nuam ka ti bawk a, ka hmel a hlim sarh reng bawk nen, min lo ngaina der ve hlawm hle a, naupang pathum phei chuan ka kalna apiangah min zui a, ka sam tawn dan , ka benga ka zeh dan leh ka thingpui in a ka thutdan lamin an lo chhinchhiah a, an lo zir ve thin a, a hlimawm phian mai.

Kei ve mai hi , Lalpan a rawngbawl ve min phalsak avang hian ka lawm em em a. Pu Ramtea hi lo tawnglo ta ila, hetiang dinhmunah hian ka ding miah lo ang, Lalpan , a hmanrua atan a rawn tir ani tih hi ka hmuchiang hle ani.

Kei addict ve mai, thiamna engmah nei lo, chhuan tur pawh engmah neilo hi a rawngbawl min phalsak a, ka tan vanah hmun min buatsaih sak a, ka tello hian a hlim thei lo a, min ngai em em ani. Pathian hi chu a va tha tak em!

Kan team chu camping chhawnghnih kan nei a, kan taksa chu a hah hle mai, mahse , kan thlarau nun a hlim em em a, campers te Pathian hnenah nun thar nei a an han inhlan hmel hmuh te chuan a hahdamthlak em em ani.

Lalpan min thlahthlam lo a, min tanpui nasa in, a khawihtharna kan chang nasa em em ani.

Keimah ang bawk a nun beidawng leh, Harsatna tawk ka hmuhte chuan tanpui a , an saltanna atanga chhuah zalenna kawng kawhhmuh ka duh ta zel a, ka vei em em ani.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)