Chapter-3
Thil thleng dang em em pawh awm lovin kar dawn chu a liam ve ta reng maia,Thartei erawh a na tih ka hriat avangin ka theih ang leh ka thiam ang tawk tawka ngaihsakin tih hlim ka tum hram hram thin.
Pawn lama hlim taka nuia,thenrual pawla ,nitin hringnun pangai taka hmang thin zingah hian,zan a lo thlena an khum lai zawl bela lukham kuah chunga mittui,aw rawl chhuah hlau chung chunga inhup bet chawn chawn paha tap thin engzah tak awm ang maw ?
Inrinni tuk khat chu ka piin hma taka min kai thoin bazaar-ah min hruia,mumang nen ka kal ni berin ka hria. Mu chung a kal an tih ang mai hi ka niin ka inhria.
Peih leh peih lova ka hawi kual vel lai chuan vai mutia zingah chuan uncle_a ang tak hi ka va hmua,kuhva bag ni awm taka lang chu a lo pu ve tang tanga,motor lian tawkah chuan a lo hlang ve tang tanga.
Kal chunga hmu zuai ka nih avang leh ka harh chian loh em avang chuan ka mit vaiin ka hmu sual vel mai mai niin ka ngaia,ngaihtuah zui lem lo chuan ka kal liam san taa.
Bazaar chu an lo tam ngei mai,kei lah mu tho chiah harh chiang lo,khum atang tho chiaha chhuak kha ka ni a,thawh hlim atanga mihring zi nuai nuai han hmuh mai chu ka luak te an pawt lek lek.
Haw lamah chuan egg roll double size a special ngata ka order chu kan lam pheia,khawlaiah chuan ka keih ngawng ngawng hi a ni mai.
Ka hnung lam atang chuan ka putea hian min lo koha,ka va hawi letna chu ka harh chiang lutuk mai bakah ka khawng vek,a thianpa Vena,ka star em em mai,ka inkhawm phah chhan ngei mai kha a lo ding ve,ka pi chuan min hrethiam tih hriat tak hian min nuih seka.
Kan lam pan chuan an lo kal pheia, ka rilru te te chuan 'Venhnapa em em hi chu zingkar kar atanga han chhiat loh hmeltha teh vawt e van tul lem lo tak' tiin ka ngaihtuaha,ka insawh nawk nawk ni ber hian ka hria.
Putea leh ka pi chu an inbiaa,ka putea chuan ka pi chu a kai hrang deuha,thil pawimawh tak sawi ang mai hi an ni.
"I slipper a inkhing lo leh tawh ania" ka phu zawka,ka che dawrh Vena'n a vawi khat min biak ve na.
Vena nui sen sen hmel chu ka en renga, ava han hmel tha chung chuang tak. Pathian pawh hian a siam lai khan hun a duh rei bik hial ka ring.
"I slipper kha a inkhing lo leh tawh" a rawn ti nawn leha, ka harh zawk.
Ka slipper kan en na chuan pakhat bata pakhat crocs,hnuai lam chu ka melh deuh ngar ngar hi a ni tawp,ka hmui chu ka pet fan fana,chhang turin chakna reng ka nei tawh lo.
Ka putea chuan hnung lam atang min rawn beng dak arh a,ka melh rum ve nghal,
"I mumang kha va phihfai rawh" tih pah chuan min kalsana.
Pen thum vel an pen hnu chuan Vena chu a lo hawi leta,
"Dawng,i sam tawn kak kha,i duhawm lutuk,tak takin" min rawn tia,a leh hawi pahin a nuih seiha,ka luang ni berin ka hria.
Ka lungphu kha a tawpa,khawvel vir a tawpa,Vena chiah kha ka hmu ni berin ka hria.
Vena hi sang tak ni lo mahse rual pawl tawk vela sang a ni a, a thianghlimin amah hi a no sara, cher lutuk lo thau tih theih ni si lo hi a ni a,mit meng fiah kak mai leh hnar ngul sang vah, vai hnar ang em em ni si lo a nei loa,a mit hmul teh lah chu dum buk deuh chhap,duhtaka pawh ni awma dik a ni a,a hmui hnuai lam hi langsar vak lo in a phira,tlemin a rawn pawrh deuha,ava han sexy tak.
Ka duhthusam ang hi amahah hian mi nung angin a rawn lang chhuak ni berin ka hria.
A thatna leh duhawmna belh turin khawtlang pawhina mi fel tia an sawi,kohhranin mi puitling tia an chhiar a la ni zui.
In thlen hma kawng tluang chuan ka nui ver vera,in ka thlena darthlalang hmaa kan ding chiah chu Vena nuih chhan ni awm kha ka hre ta,
Eitur lian zet ka kenga,ka slipper a inkhing lo a, rubber rawng senin ka sam ka tawn kaka,ka kawr hak lah chu ka size aia let thum vela lian,ka bag ah lah chu a puar tha ngang bawk si. Ka thu sawp deuh nuaih nghal hi a ni tawp. Ka zak lutuk,khuk ral daih ka duh.
Ka ngaihtuah leta engtin nge Vena khan ka hming a hriat le?
A tukah chuan phur lutuk tak maiin ka tho a, ka tum ber chu chhe lo tawk tak maia Vena hmaa inlan ve a ni. Mahse buaina pakhat ka nei a, make-up hman dan them pawh ka hre lo. Hmai pawh phih loa college kal mai mai thin kha ka ni si a.
Zing kar hma takah Pci ka phone chho a,min chei tur ringawtin,a rawn thlen chuan mut a kham lo tih ka hre thei nghal,mahse chu chu a pawimawh lo,lan nalh ka duh chu chu a ni tawp.
Pci chu a lo thlen rual rualin,inrinni zinga ka thil tawn chu phur takin ka hrilh nghal mawlh mawlha,a thingpui tur siam pah chuan,ka chezia zawng zawng nen,ka ri chel chula,a chang leh ka tum leh vaka,a chang leh ka hmai hup chungin ka zah thu ka sawia,ka che sek a ni mai.
Ka sawi zo ka va hawi phei chuan,Pci chu a lo muthlu daih hi a lo ni a,puan nuam siin thlamuang zetin a lo mu berh berh tawh. Ka va han sa tak em! phur em ema ka thil hrilh zawng zawng kha a lo mut thluk san amaw? Ka melh rum chiama,awmzia erawh a awm lo,a mu tui lutuk.
Ka va sawi harh nawk nawka,ka tung tho nawlah,ka make up neih ve ang ang leh a lo ken ang ang chu ka phawrh rawk rawka,ka hmai te chu ka phiha,Pci hmaah chuan a chei turin ka va thu fel thana,mumang nen min chei ni berin ka hria.
Make up bakah ka kawr hak tur leh puan bih tur,ka pheikhawk tur thlengin a rawn thlang veka. Chaw a ei ve nghal nghe nghe.
Phur lutuk tak maiin dar rik rual rualin biak in lam ka pana,Vena thutna thin atanga ka lan ve dek dek theihna hmun,amah erawh a lan chian em emna hmun tur chu ka zu thlang chata,ka phur lutuk te chu ka zang vaha,mahse ka hmeltha riaua ka inhriat avangin ka lu te chu ka hawi kual tha ngam lo vel.
Tan hun thlengin Vena hmel hmuh tur a awm lo,Putea ka zawng leha ani pawh ka hmu chuang lo. Ava ho tak,ti khawp khan ka buaipuia,Pci phei chu mut a kham loh phaha,Vena ber lo inkhawm lo. Nilengin ka mood a off kir kawi nuai vel vek.
Mak tihna erawh ka nei deuh Vena leh putea meuh an inkhawm loh chu,buaina pawimawh tak an nei ni turah ka ngai.
Thawhtan tuk a lo herh chhuah meuh chuan dan ngaite-in college lam panin ka chhuak leha,dan ngaitein kan tlai leh.
Mak ka tih thin em em chu,eng ang pawhin tlai ila Pci hi a danglam eih ngai lo reng reng,a phone a khawiha, an class kawtah a thu tawpa,tlai hi pawi tihna nei ang pawhin a lang ngai lo.
Darkar thum dawnte ka class kal min nghah tumte pawh hian a thutna ngaiah a lo thu ngar ngara,a phone a khawiha,ka chhuah rualin a rawn kal ve leh maia,ngawi reng hian min zui haw ve leh det det mai thin. Engmah hi a sawi nawi ngai lo reng reng,amak a ni he nu hi chu.
Chhun chaw ei chawlh hun a lo thlenga,Nancy chuan kan section kawtah min lo nghaka,ka chhuak chiah chu min lo beng bu lawpa,
"Enge,Nanbawng" vin zetin ka ti leta,
"Principal officeah min lo kalpui" a huphurh tih a hriat theih
Nancy chu ka en deuh rana,
"Ka peih lo" tiin ka chhanga,chhan loh ang chiah a ni min pawt chho nawk nawk.
A hnukin min hnuk chho hi a ni bera,Fathera'n min lo hmua,an class kawt atang ring leng lawngin
"Nancy sawisa hrep rawh" a rawn ti,ka va ngei tak.
Duh loh chungin principal office kawtah chua ka ding ta taua,Nancy lah amaha luh a la duh lo zui,min pawt lut ve leh hram. Principal dawhkan hmaah chuan Timy leh Steffi an lo dinga,min lo melh zuk zuk a,nuih a za lek lek an mizia a that ve hmel lutuk.
Principal hmaa kan ding fel awrh tihah Drew a rawn lang ve hlawla,a rawn nui lui tet tet a,ka ngaihtuah ang tho kha a ngaihtuah ve a ni maw ka ti maia,nuih kha a za ve duh bawk em a ni.
Principal chu a rawn dinga,ka nuih za a va zual tak,a chhip ka chhem pha tep,a chal a ngalh si,a dul a kiar em ema,tarmit te reuhte a la vuah zui.
A hmel en reng reng chuan a thinrim tih a hriat theih mahse ka nuih a ti za,a lawmawm reuh lutuk.
Eng tak chu tisual ang maw heng ho hian.
Principal chuan min han en kuala,thinrim tih hriat tak,aw vin tak,ring tak ni si lo hian
"Engvangin nge MLA kawlthei in lawh ruk,in zak miah lo em ni? mi in kawta leihlawn intung in la pheia, lungremah in lawn chhoa,thir lena an hungna tichhiain huan chhunga mi kawlthei in lo amaw? tui pipe-ah inlawn chho lehnghal"
Drew chu a bang bo em ema,principal bulah chuan inthlahrung em em mai hian
"Excuse me sir,mahse ka tel ve lova" a rawn ti ngam tawk.
Principal chuan a rawn melh kawka
"Nang ber hi a ni lawm ni hei banga lawn hi" rawn tih pahin a phone a thlalak chu a hmuh tira,kan va bih ve de dea,kan va nui chhuak teuh tak
Drew chuan zawi te hian "Sir keimah ka ni lo,Thartei a nih kha banga lawn chho kha chu" a rawn tia, primcipal chuan mak a ti hle
"He lung rem sang taka lawn chho hi hmeichhia maw?" ti pahin a thlalak ken lai chu a en leha,Drew chu a chhuah tura,Thartei lo chho tir turin a ti thunga.
A chhuak lai ka en pah chuan,ka ban chu inthlahrung takin ka phara,
"Sir,thlalak kha ka lo en ve leh lawk maia,plizin" ka ti de de a,mak tak maiin min entir ve mai bawka.
"Sir,hei lo adang i nei em? a dang a awm lo em ni?" tiin ka zawt leha,ka inthlahrun bakah ka hlau lek lek,
"Nei lo,a awm tawh lo hemi chiah hi an rawn laa" tiin min chhanga,ka nui sek a,
"Sir,lo ru zingah khan ka tel ve lo" ka tih zawm zata,ka thiante chu an rawn hawi phei nasa hle mai,principal chuan thlalak chu an ena,min hmu ve lo ngei maia bakah E.U ah te ka lo inhmang ve bawk nen,min hmelhriat sa deuha min kaltir mai a.
Ka thiante chuan mak ti tak leh ngei hmel tak hian min melha,an kal lehlam ka dil emaw tih mai tur a ni. Ka chhuah chuan Thartei leh Pci an lo thlenga,Principal roomah chuan an lut tlang ve nghal.
Rang lutuk fahranin class lam ka pana,ka hawi let eih lo,engtin nge an inhauh ti pawh ka hre tawh lem lo. Hriat kha ka chak lutuk mahse ka zuam lo ka hlau.
Diktak a sawi chuan,kawlthei lawh ruk leh mi in kawta leihlawn intung hle hle lai la chhuaka,Thartei lung rema lawn liam tura titu leh theihai awmna lai kawh hmuhtu kha keimah vek hi ka ni a,ka ei hnem ber bawka,pum in a ngeih loh thak thlengin ka ei.
Principal thlalak kawl ka en ah khan ka inhmu lova,a dang a neih loh thu min hrilh chiah khan,ka tan hun tha a ni tih ka hre theia,ka insawi chhuak mai mai a ni. Ka thiante ho khan min hek loh hram ka beisei.
College ban hmain ka hawa,ka thiante ka hlau,ka tihsual an tuar a ni si a,min dimna an nei dawn si lo. Pci leh Thartei pawh ka haw san hmiah.
Ka haw kawngah chuan ka pi-in thlai rah lei tura min tih avangin bazaar lamah ka haw leha,inrinni tuka unclea ang tak ka hmuhna hmunah khan Unclea ka hmu ta tak tak maia,college a lo kal lo bawk nen,ka en deuh renga,pui mai mai a ang hauh lo mai,a thawk ve ngei a ni.
Mak ka ti hle a,biak tuma va kal hnaih ka tuma mahse a buai hmel em avangin ka tihbuai mai mai ka hlau deuha,bakah thil lian tham a nih ka ring lo bawk nen. College kal laklawh kara inhlawh a duh aniang ka ti maia,be lem lo chuan ka kalsan ta maia,ka leh hawi leha,a va lo thawkrim reuh ve aw ka ti rilru neuh neuha.
Zan a lo thlen chuan,nilenga ka khawih ngam tak loh ka phone chu ka han check ve a ka rin ang ngeiin kan thianho whatsapp group Bunkers Party tia kan vuah chu min relna hmunpui a ni ringawt. Ka phakar zia hlir chu an sawia,ka phu tawk lek alawm kan ti phei chu an sa hlawm ngang mai.
Kan college bulah hian MLA in pathum lai a awma,in hnung lamah chuan huan a awma,huan chu hnuai lam kawngpui atanga pawh tur chuan lung rem sang ve tawk tak lawn a ngaia,Thartei khan engtin nge tui pipe mai mai ring khan a lawn liam theih ni.
A tuk college ka thleng chiah chu ka na teh e,Timtimy'n min lo su nawka,a hnu lam chu kut hlir a ni tawh mai. Min beng tlir zawt zawt nghal vek,thi lo a ruangin min chhuah ni berin ka hria.
Unclea chu college-ah a rawn lang ve ta hlawl mai,kan hmu khat bawka,simeikhu tiin kan koh mai thin.
Timy bawk chuan class bunk a rawta,period thum kal ila chawhnu lam kan bunk dawn nia tiin kan inthlaha.
Mahni section lam theuh panin kan kal darh leh ta a ni.
Period thumna a ral chuan kan spot,zun in ah kan inhmu khawma,Thartei hmanhmawh tawkin a rawn daka,
"Nancy in ka bunk ve duh lo a ti" tih a rawn report a
Arona leh Drew chu an chhuak nghal vata,Timy'n a zuia,an hnunga midang zawngin
Nancy chuan class a lo la duh bik hi a lo ni a,a lo tang ve nasa mai. Drew chuan a zu pawt nawk nawka,mahse a hneh lo. Nancy a lianin a thau zawk tlat a ni. Drew chu a lo theh leng dawr dawr hi a ni ringawt.
Arona chuan Nancy bag chu a rawn ak chhuaka,Drew chuan Nancy chu rawn kaih chhuah ve ik a tuma,a thei ngang lo.
A bag la tura Nancy lo chhuak chu kan bawh huka,kan pawt luai luaia,class a bunk chu a ni ve ta der mai. Class ila in i thiam bik tur a ni lo kan ti deuh tlat.
Lungawi lo takin a in ak nghawng nghawnga, harh chhuah ve a hun tawh thu leh kan naupang chhia atih thute chu sawiin min zilh ve ngiala,rei lo te hnuah chuan a phur ber berah a thang leh ang tho a.
Chaw eikhawm kan rawt thut maia,kan dan a ni a,chaw hi kan eikhawm leh thut thin Mahse pawisa kan nei lo.
Fathera chuan pawisa a han khawn khawma Kei leh Pci leh Timy chuan Rs 10/- kan thawha, Nancy leh Steffi ten Rs 20/-,Thartei in Rs 5/- kan va broke tak em!!
Mipa ho chuan Rs 50/- te te in an thawha,alu kan a eikhawm mai kan rel thlu ta.
Mipa ho chuan Steffi te in lamah lo va tlang turin min ti a,an ni an bazaar bakah eirawng pawh an bawl veka,hmeichhe ho chuan kan sil ve tawk thin.
Steffi - te in luah kan thlen chuan room-ah ka tlanga,ka muhil nghal bawrh bawrh.
Mi tu emaw hian ka puan sin a rawn hlima,min rawn sawi nawk nawk pahin min lo thut tir lawpa,ka men chuan Arona hi a lo ni a
"Chaw eikhawm apiang hian i mu bik ziah mai" ti nuah nuah pah chuan min pawm chhuak a ni ber e.
Kan tho chhuak chu kut an lo beng vel hluah hluaha, Nancy,Timy,Unclea leh Drew te chuan carrom board an lo pen a,Arona leh Fathera'n sa an lo siama,Steffi'n bai tur a lo buaipuia,Pci pawh ngawi rengin rawt thak a lo siam ve melh melh a.
"Sa te in lo lei vel elaw?" tiin ka zawt a
"Lei tel leh mai e hei" tiin Arona chuan min chhang vata,
"Pawisa kan thawh loh kha" ka ti ka ho maia
"Anru_a'n a thawh vek alawm" tiin min chhanga an nui vel mai maia.
Tui taka chaw kan ei kham hnu chuan,zial te an han zu sang sanga Steffi ho in
a then room lamah an lo va thli kerh kerh bawka. Drewa bulah chuan ka va thu vea,ka va tlak ve papa,a va tui lo nasa tak,ka vawi khat in ve na a ni.Drew hi mak tihna riau ka neia,a bulah chuan ka thla a muang em em zel mai hi a ni. Engtin pawh awm ila min endika mi sawisel chi hi a ni lo tih ka hriaa,chuvang pawh a ni mahna ka va lem ve sek ni.
Haw kawngah chuan ka hai deuh riaua,ka thiante chu an kal sawk sawka,ka kal tha thei der lo . Hah thlan hluama ka hawi chho chu Drew hian nui sen sen chungin min lo nghaka,
"I lu a hai em ni?" ngaihven tih hriat tak hian min lo zawta,
"Hai lo e,ka chau deuh mai mai" tiin ka chhang ve leh maia,
An kal chak hlawm em avang chuan ka hmu pha lo,kan thian ho hi ride kan ti ngai loa,ke hlir hi a ni deuh tawp. Ka chau chu ka thu deuh hnawka,ka hmaah chuan kut a rawn inpharh a,ka han en chhoh chuan Drew a lo ni. Nui sen sen pah hian
"Ka lo kai dawn che em ni?" a rawn ti a,ka pha kual peih vel tawh lo,ka vuan rang hle. Stepah chuan min kai chho a, min nghak deuh det pahin ka zai ngai siin muang changin kan kala,i vawi khatna a ni sia,i hai deuh anih kha,keimah vang vek a ti a ti a,kan phun chho sep sepa,kan ti ti tui phiana,kan han nui leh lawk thin
Hepa mak dan em em hi chu aw. Nihna ang ang hian a lan ngam . Ava hahdam tak.
Kan thian ho ah hian inngaihzawnna tih vel a awm loh vang hi emaw ni a nuam riaua,mahse hemi tlai atang hian Drew nen chuan min chhaih an ching chho ta a.
Mahse ka hmu ve dan chuan kan thian ho-ah hian midang Drew hian star a neiin ka hria,tunah chuan bialnu a nei riha a la inthup mai mai tih hi ka ngaihdan a ni a,ka thiante bulah pawh ka sawi nghe nghe. Nancy pawh chuan ka ngaihdan chu a ngaihdan chiah a lo ni ve.
Unclea chu ka en a,a ban hi na a tih hmel ka ti em ema,Thartei'n an khuah thuak thuak te pawh chuan a tim deuh tlata hriatna ka neia,a that leh that loh thu zawh lahin a that thu a sawi mai bawk si a. Kan tam deuh nen ka zawt zui ta lem lova.
Kan hawna tur kawng kan han pan nak naka,ka awm a nuam tawh lo lutuk leh lo ni ve phelh phulh nen
"Unclea hi mutia niin a inhlawh thin in ka hria?" ka ti chhuak heua,
Pci chuan a ngaituah hmel vak loh mahse Thartei chuan " Engtin nge i hriat" tiin min lo chhang vata, vawi hnih lai ka hmuh thu leh ka rin dan chu ka sawi vel ta mai maia.
Thartei chuan "Unclea chu nupui fanau a nei tawha,chhungkaw chawm a ngai pah alawm" tih thu min hrilh ta mai. Mak ka ti hle mai,Unclea hian Thartei hi a star emaw ka tia,inngaizawng turin ka hual ru lehnghal. Pci erawh a ngai reng
"Pc i hre tawh em ni" ka ti ta hiala,
"Aih" tiin awlsam lutuk hian min chhang let
Thartei chuan ka mak ti lutuk chu,min hrilhfiah belh taa,
"College a lo kal loh zeuh zeuhte hian hna a thawk thin alawm,ram pawnah te a kal leh zauh thin hi. B.A chhuah ngei a duha,hnathawk pah,chhungkaw chawm pahin lehkha a zir leh alawm" tih thute min han hrilh leh zela,mak ka va ti tak em.
Kan bula a khawsak hnem loh avang khan a induhte kan tia,kan titauh khumin,kan haua,simeikhu tiin kan nuih fova,kan dinhmun a lo van inang lo tak em!!
Ani chu kan awmdanin a awm ve maia,kan ruala nuiin,min tih nuih nana fiamthu thawh nasa sa ni thin. Kan chezia leh kan fiamna thu ah te khan a lo nui liam mai mai thina,a ruk khan a lo va hah thin dawn tak em.
Thartei lah han en reng reng hian a la tha lo tih ka hre theia, a chungchang ka zawh lahin ka sawi peih lo,a ho em mai a ti liam puata mahse ho a tih loh zia leh a nat pui tih hrethiam lo rual ka ni si lo.
Pakhatin a hahna leh chauhna,mawhphurhna sang tak nei anihna dah thain hlim takin kan awm tawk lekin a awm thina,fiamthu thawhin min ti nui tu ber a la ni fana,ngaihzawng leh hmeichhe lam reng reng a sawi ngai lohna chhan te kha a fiah ta uar mai.
Thartei lah a hlimna leh a hmangaih ber a chan meka,a nui huah huah renga,thawveng ber mai angin, a sam thing zet nen a hawi ve lah lah tho.
An nui hmel kha a bo ngai lova,an hlim hmel kan hmuh loh phah lo.
An na tawrhte kha a na nep ta tihna lam a ni lova,an hahnate kha a hahdam bik tihna a ni lova. An tan khawvel kha a awlsam bik lova,midang aia chak bik.leh pau khauh bik an ni lo.
Hringnun hi a thlak theih loh tih an hriaa,an mahni tan nitin an bek ve talh talh thin mai zawk a ni.
Lang lo lamah hian mi tu pawh hian hringnun kan nei veka,mi nun i endik hmain i hmuh pui loh hringnun an hmang tih i ngaihtuah hmasa thin hram hram dawn nia.
In ka thlen chuan Timy missed call a lo awma,ka call back chuan, Drew ka duh leh duh loh thu min lo zawta,ni ru,kan tihpui ang che Nancy nen tiin a rawn sawi deuh chiam,ka lo nui liam vel mai maia, Steffi lah chuan private meuhin min rawn zawt bawk. Ka lo pha veka,ka lo fiamthu san vel mai mai.
Zep lem lo ah chuan bialpa nei dawn ni ila chu Drewa hi chu duhthusam mi a ni ngei mai. Mahse inthianthatna leh hmangaihna hi chawh pawlh loh tum mi ka ni tlat. Drew erawh bialpa atan chuan duhthusam,amah hian magic a nei emaw tih tur khawpin a bulah i hahdam thin ang.
Zan a lo thlen meuh chuan ka chau hle aniang,dar sawm pawh meng thleng zo lovin ka lo muhil der maia,zing lamah ni dang zawng ai ka harh hma,ka harh rual rualin phone ka check a,Drew message a lo awm a,phur fahran hian ka opena,mak ka inti leh si,nidangah pawh a message ka dawng fova tun ataka phur taka han open mai chu,
In ka thlen tluan leh tluan lohte,ka that leh that loh thute min lo zawt hi alo nia,tha takin ka rpy a,ka mut hmat thu leh ka chau ve deuh anih ka rin thute ka hrilha,a la tho lo aniang mi a reply lem lo.
Eirawng bawl pah chuan ka zai hlarh hlarha ka mood a va fuh tehreng em,ka insawi vel nghal nghala,ka eitur siamte chu ka be vel deuh mial miala,a pu te ui lo lengte chu ka lo be liama keimah kha ka hlim em em hi a ni tawp,a chhan erawh ka hre lo. Mut tam hi ka ngeih anih hi ka ti ta vel mai mai a.
Dan ngaitein college lam panin ka chhuak leh taa,ka thiante ho ka hmu chak em em a,a bik takin Drew.
A/N : Type dik loh leh chhiar har deuh a awm anih chuan ngaihdam ka dil e, ziah dik vek hi ka har ve deuh thina.
Ad ah khan min lo click sak ve leh zuai la.
Chhiar nuam le 🥳🥳
*Eng pawh i nih theihna khawvelah hian,
Midangte hrethiamtu nih tum hram ang che*