BEISEINA 27

Episode kal lai dah luhna

Moderator: writers

SeniChhakchhuak
Posts: 74
Joined: May 27th, 2021, 10:49 pm

BEISEINA 27

Unread post by SeniChhakchhuak » July 27th, 2021, 9:46 pm

BEISEINA
- Seni Chhakchhuak

Bung 27-na

Ka pian a hnu lama minute 5 rei ber țum niin ka hre hial. Ka țhu hle hle thei lo, ka tho sek mai a. Ka chhuk a, ka chho leh țhin a. Chhuk leh ka tum lai tak chuan Zorini chu thaw hlawp hlawp chung chuan a rawn tlan chho a.

"Hmanhmawh ang, kan tlan vat a ngai," tiin a tlan chho nghal char char a. A hnungah chuan ka tlan chho ve nghal a. A awm dan ațang chuan muangchan chi a ni lo tih ka hria a. Ka motor dahna kan thleng chho a, Sangsangi chuan naute chu motor-ah chuan a lo țhutpui a. Eng mah pawh sawi lo chuan kan lut a, kan tlan nghal nal nal.

"Awi, ka hlau lutuk. Room ațanga chhuah ka tum chiah kha ka pa phone a rawn ri ta mai...," a ti a, a hah lutuk chu a'n thaw leh halh halh phawt a.

"Kan in piah deuh maia mi Pu Msa khan tukverh a kan thil inpe vel kha a lo hmu deuh a ni ang. Ka pate chuan ka room an rawn kik det det a. Ka thawmhnaw chu hmanhmawh deuhin Bawihtei angin ka siam a. Mutchhuah hmel deuh hian ka lo chhang der vel a. Chhuah tumin ka ințam vek tawh si, an lo luh palh chuan min man chhuak dawn chiang mai si a.

"Eng nge? Mi mut tui lai lai a," ka lo ti hmuk a.

"I muhil char char em ni?" ka pa chuan a rawn ti leh a.

"Aw, Bawihtei a harh țep a nia, lo au vak vak suh," ka lo ti leh a.

Ka pa chuan, "I pa Msa ten kan in vela mi chevel awm ang deuh an hmu alawm maw le," a rawn ti leh a.

"A ni maw pa. Pawn lamah a nih chuan zu en chhin teh u. Bawihtei'n hnute a hne laklawh lutuk a, a hnek zawhah ka rawn en ve ang, inhnuainu Nu Ramtei pawh zawt chiang ngei ngei ru aw," ka lo ti vel a.

"Msa pawh chu ko thla chhin la, a mit vaite pawh a ni ve thei a, i zu kal chhin hrim hrim phawt teh ang u," an ti a. Ka hmanhmawh loh chuan ka talawk dawn si. Hlau chung chung chuan kawngka ka hawng dek dek a. An thil buaipui atalang chuan kawngkapui pawh chu an lo hawng huau a. Rang zetin ka rawn tlan chhuak ta a nih hi. Ka tlan chhuah lai vel tak khan inhnuainu an kai tho vel mek a. Min hmu lo hlauhin ka hria. Pa Msa chuan min lo hmu ru leh em phei chu ka hre lo," a ti a.

"Ka hlauhzia chu," a ti a, a nui zui hak hak a. Sangsangi chu an in kawtah a chhuk zawk a, Zorini chuan naute chu a pawm a, kan tlan zui lehnghal a. Min rawn um zui ang nge um zui lo ang hriat a ni si lo a, a chak thei ang ber chuan ka tlan par par a. Sana chu ka bih zuai a; dar 1:50 chiah a lo ni a. A tlai tawh bawk a, tlan a sawt zawk hlauh a.

Khua kan pel a, ka thaw huai mai. Mahse, eng emaw chen chu hmanhmawh a la țha-in ka hria a. Kan khua Chhiahtlang lam pan chuan kan tlan par par reng a. Zorini chu a chau deuh a ni ang, a muthlu ta lawp lawp a. Ka khawngaih reuh hle; harsatna a pal tlang nasa em a ni. Tlema muang deuh chuan ka tlanpui ta a. A pate pawh an buai vel chhung nen min rawn um phak mai ka ring chiah tawh lo deuh a.

Ka bula ka hmangaih Zorinite nufa tui taka muhil chu ka en a, ka nui sak a, ka hlim ve khawp mai. Thui fe kan tlan tawh tihah chuan Zorini chu a rawn țe chhuak thut a, ka ding nghal chawih a.

"Zorin, eng nge?" ka lo ti a. A rawn meng a, a mitmengah chuan hlauhna ka hmu a.
"Khawnge ka awm?" a rawn ti a. A thlan chu a rawn tla nghal bawrh bawrh a. Naute pawh chu a rawn țap zui ve nghal a. A biang tawn tawnah ka dawm a.

"Bawihte, min en teh. Ka bulah i awm a nia, kawng thui zawk kan tlan tawh a nia, lungngai suh, i him em em ang," ka ti a. Tlem chuan a zia ta deuh a; naute chu hnute a hnektir ta a.

"Ka mumangah ka Pa ten min lo um nasa lutuk a, min man dawn țep tihah ka rawn harh ta daih a, a tak emaw ka ti hman a," a ti a, ka khawngaih hle. A samah ka chulsak a, ka fawp zeuh a, muang chang chuan ka tlanpui leh ta a. Zing lam dar 5 velah chuan kan khua chu kan thleng ta a. Ka chhungte chu an lo tho tawh a.

"Ka pa, in va tho hma ve a," ka ti a. Ka lai lut ve deuh hlek a, Zorini chu ka kai lut a. Mak ti hmel pawh an pu lo.

"Ka tunu thar chu ka lo pawm teh ang," ka nu chuan a lo ti nghal a. Chutia a lo ti nghal thei ringawt chu mak ka ti khawp mai a.

"In rilte a țam em? In chau ngawt ang," an lo ti sawk sawk a. Țhuthlengah chuan kan țhu a, Zorini pawh a lai ve deuh hlek a.

"Nu, Pa, mak in va tih hmel loh ve," ka'n ti tawng a.

Ka pa chuan aw a'n thian kharh kharh a. "Zing lam dar 3 vel khan Zorini pa-in min rawn phone harh a, a rawn thinrim khawp mai. 'In fapa-in kan fanu a rawn ru chhuak a, ka lawm lo khawp mai. In fapa kha makpa atan ka duh lo tih lo hre rawh,' a rawn ti a, a rawn ang nasa khawp mai a, eng mah sawi ve-na hun pawh awm lo-in phone a ti tawp lehnghal daih a," a ti a.

Ka nu chu lo țawng ve-in, "A pawi ngawt mai, mahse, a nih tur ang a ni vek tawh a, rilru hahdam takin awm u la, Pathian kutah innghat phawt ila, engkim a fel ve leh vek mai ang," a lo ti charh charh a. Bawihtei pawh chu a rawn harh ve ta hlawl mai a. A pi leh pu chuan an lawm khawp mai. A nu chuan hnute a pe a, zana kan mut loh avang chuan kan mu ta a. Ka harh chuan chawhnu lam dar 3 a lo ri vah tawh a. Ka mutna bul chu ka en vat a, Zorini chu a lo awm tawh miah lo. Hlauhthawnna chuan ka khat nghal a; rang deuhin ka tho vat a. Mahse, ka nu nen chuan khawsak an lo rel dun țan der tawh hi a lo ni. Bawihtei chu a pu-in a lo pawm a. Ka farnu chu eng eng emaw khalin chhuatah chuan a lo țhu nuaih a. Va chhuak pheiin, "I lo mu tawh si lo a, hlauthawng deuhin ka rawn tho a," ka va ti a.

"Hlauthawng mah che, ka nu leh pa an awm phawt chuan ka hlau miah lo," Zorini chuan nui var var chungin a lo ti a. Ka nu leh pa a ti nghal mai chu ka lo lawm khawp mai a, ka nu leh pate pawh chu an lawm hle tih an mitmeng ațang chuan a hriat theih nghal a. An in pawh nghal em em mai a ni.

Zanah chuan chaw kan ei kham kan inti fel chauh tihah chuan kan kawngka chu an rawn kik dat dat a.
Ka nu chuan, "Lo lut rawh u," a lo ti a.

Kawngka a rawn inhawng a, rin loh lutuk maiin Pa Kima,Roberta leh kan veng pa Pa Sawia an lo lut ta mai. Helai thleng thlenga min rawn um zui ka lo beisei miah lo. Zorini chuan ka banah min rawn vuan nghal chat a. Kei pawh chu ka lo insang mar nghal țung a. An rawn lut chuan min rawn melh rum khawp mai.

"E, lo leng rawh u," ka nu chuan a lo ti nghal sawt sawt a.

An han țhu a, Pa Sawia chuan, "Hei kan pute pawi in lo sawi palh a ni awm a, a pawi khawp mai. Buai chung chungin rawn liam chhoh nghal an ngaih phah a," an ti nghal deuh tawng a. Ani hi kan vengah pawh pa suala sawi a kai ve hial a, mi hian an nel mang hlawm lo. Keini chhung phei chu min hmusit tak zet a. A thu rawn sawi Dan teh tawng ațang pawh chuan min tham lohzia a ti lang chiang hle a ni. Ka lo sa nghal zak mai. Țawng tumin ka ang zuau hman tawh, ka pa chuan a mitmeiin min rawn khap vat a. Chutah ka pa chuan dam dap hian, "Ni e, a zia lo ngawt mai. Kan fate'n pawi an lo khawih palh hlauh mai a. Mahse, an induh tawnin, an karah naute a lo piang ta hial a ni a. Heng hi chu palaite intirin, țha takin kan sawi tlang tur a ni dawn lo em ni le?" a lo ti dap dap a.

Pa Sawia bawk chu rawn țawng chhuak lehin, "Palai intirhna chi pawh a ni em ni le?" min tham lo tih hriat zeta nui huk huk chung chuan a ti leh hram a.

"Palai rawn tirh buai a ngai lo. Kan duh lohzia che u kan sawi chiang viau tawh a ni," a rawn ti hluk hluk a. Boruak chu a rit ru khawp mai. Pa Kima bawk chuan, "Zorinzual, lo kal rawh le," tih pah chuan a ding hluai a. Zorini chuan min rawn vuan nghet sauh a; kei pawhin ka lo vuan nghet ve salh a. Zorini a chet sawn duh mai loh avang chuan Pa Kima chu kan awmna lamah chuan rawn pheiin, Zorini chu a rawn pawt ta nawk nawk mai a. Keiin ka lo chelh tlat a, ani lahin min thlah duh bik der si lo. Ka pa ngaihdan a ni ta lo.

"Kima, ka țhian i nia; zaidawh takin ka lo dawngsawng hram hram che a. I mi hmuhsitna hi tawrh a har ta riau mai. I fanu duh lo chung hi kan fapa hian a ru lo a nia. An induh tawn avang zawkin an rawn inzui haw a. I fanu duh lo chung kha chu hruai lui lo hram teh," a rawn ti chang ta fak mai. A insehruh nasat dan aţang chuan a thinrim hle tih chu a hriat theih a. Ka pa hi pa ve tak mai a ni a, a piantharna hian a ti danglam mai mai zawk a. Kei pawh chu ka thin a rim tawh hle. Mahse, ka aia upa an nih bakah ka pa chuan min khap rih avang chuan ka la insum ve hram hram a.

Pa Sawia bawk chu rawn țawng chhuak lehin, "Sanga, nangni chhungkua nena inzawmna neih an chak lo a nih chu. An fanu a nihna a la bo chuang lo a, an duh danin an la ti thei alawm. Innei pangngai pawh an la ni lo a," a lo ti leh dawr dawr a.

Ka pa chuan, "U Sawi, i mi țawngkhum duh dan chuan ka lai a chhun hle mai. Keini chhungkua hi eng vanga min han hmusit ve chiam nge maw in nih le aw? Thihna hmaa ang khata ding tur țheuh țheuh, inhmusit bik tur hi kan awm em maw ni le?" a ti ve ta khawl khawl a.

Kan mi mawl Roberta chu rawn țawng chhuak ve-in, "Ninawm, sawi buai vak a ngai lo. Haw ang u," tih pah chuan Zorini chu a rawn pawt ve leh a. Ka thinin a tuar ta lo, Roberta kut chu ka lo man a, ka herhsak ta vak mai a. A na ti chu a au țhawt a. Ka pa pawh chuan min khap duh bik tawh lo.

"Eng ang mi pawh niin, lo rethei viau pawh ni ila, tuna in awmna hi chu kan in a ni tlat. In hausakna kha kan awt bik reng reng lo a nia. Khawngaihin min hawsan tawh rawh u. Zorini chu kan fanu a ni ve tawh e," ka pa chuan a ti leh ta hrak hrak a. Zorini chuan a duh lo bawk nen, ka pate an rin ang ngawt an lo ni bik lote pawh a ni ang; an chhuak ta hna hna a.

An chhuak chiah chu Zorini chuan ka pa chu a va kuah thlawp a. "Ka pa, ka lawm lutuk. Khawngaih takin min hawtir miah suh aw," a ti a, a mit tui a luang ngiai ngiai a.

Ka pa chuan, "E Bawihi, lungngai reng reng suh. Tunah chuan kan fanu i ni tawh a, nangman, ka haw duh tawh i ti a nih loh chuan kan kaltir miah lo ang che," a lo ti a. Ka nu lah chuan a mit tui a lo hru ve zauh zauh a. Ka nu chuan țawngțai a rawt a, ka nu chu a țawngțai ta a. Kan chau deuh nen, kan boruak a la rit deuh nen kan room lamah chuan mu hahdam turin kan lut ta a. Bawihtei pawh a piin a lo paw mu then tawh a. Zorini chuan mutna vel chu siam remin, ka nu chuan Bawihtei chu a mut a. Ka nu chhuah hnu chuan kan mu ta a. Ngawi rengin lehlam hawiin a mu kawm ngat a. Ka va kuah a, "Bawihi, hahdam deuhin awm rawh. Engkim a țha leh vek mai ang," ka ti a.

"Rin, engati nge heti tak maia ka pa hi a sual tak le? A mak ka ti, min duattu leh nangmah pawh haw ngai lem lo kha a ni sia," a rawn ti chhuak ta sap a.

"Nia, kei pawhin mak ka ti. Mahse, a awm ve tho. Ka nun tawh dan kha a lo pawi em a ni. I nu ka lo kawp ve maite kha ka tih loh tawp tur a lo ni; pawi khawp mai," ka lo ti a, ka thaw halh a. Zorini chuan min chhang lo, ngawi reng chuan a mu kawm ngat reng a. Ka lam hawi chuan ka kuai her a, a hmui sen vam hamah chuan ka fawp ta vawng vawng a. A maimitchhing chial a; chutah min rawn kuah a, min rawn fawp let ta a, hun rei tak in hmu tawh lo leh inthlahlel em emte chuan tu mah dip daltu awm tawh loin, hmangaihna lipuiah chuan kan hleuh dun leh ta bawrh bawrh a.

Ads in click ve ngai lo a ni maw



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)