SHE PART _ FOUR

Episode kal lai dah luhna

Moderator: writers

Maveni hmar
Posts: 164
Joined: March 17th, 2021, 6:20 pm

SHE PART _ FOUR

Unread post by Maveni hmar » July 28th, 2021, 4:11 pm

PART _ FOUR



THIRTEEN : JOURNEY TO KOR

chair panga hi puk kawtah chuan an rawn dah a, vengtu mipa sawmnga rual hi kan rualin an kal ve bawk a.

Billali-a hnenah chuan, "Ustane-i kan rualin a rawn kal ve dawn em?" tiin ka zawt a.

"A duh phawt a hnu." a ti a. " Kan danah chuan Leo-a nupui a ni tawh alawm. Hmeichhe huaisen tak a ni a, Lion-a(Leo) hi a hmangaih a, tin a nunna pawh a humsak nghe nghe kha. Chuvangin a kalna apianga kal ve turin dikna a nei a ni." a ti a. "Amah-i khan 'a tul loe.' te a ti a nih ngawt loh chuan." tiin a belh leh a.

No ang tak tlang pangah chuan kan chhuk thla a, a pang lehlamah kan lawn chho leh a. A sir lehlam chu thui tak thlengin phaitualhnim hian a cham put mai a, ram hniam chu a lang tam tulh tulh mai. Chu hmun chu kal tlangin hmun hniam hnawng churh mai sir lam chu kan pan zel a.Chutah chuan chawlin a hnuah chuan kan kal leh ta zel a. Kan lawnglenga kan rawn paltlang tak hmun ai chuan a nuam loin a hrehawm fe zawk a ni.Kan vel chu thil tawih rim hi nam huam huamin tuiah te chuan rul tur nei dum chi te chu rang fe fe hian an tleng zuai zuai a. Thawm ri hriat tur awm chhun chu Utawk ka hmuh tawh azawnga lian ber mai ring zet zeta a hram tuak tuak leh kan chung zawna sava hram niai niai chu a ni mai.

Ni tlak dawn ruaiah chuan thliarkar tetakte rawn chawr chhuak, ram ro tha tak chu kan chuang chhuak ta a. Chutah chuan zan kan riak ta a. Mei bulah thuin han mu vel thin mahila Utawk hram ri leh rannung sehna avang chuan zan rei tak thleng chuan ka muhil thei lo a.

Ka bul lawka mu Leo chu ka'n thlek zawk a. A mit chu de sar sarin a hmai chu a sen tan a, a hmui chu a ro hal mai bawk a. Malaria vangin a khua chu sik hluah hluaha a bulah chuan ngaihtha lo takin Ustane-i chu a thu ran a.

A tawp a tawpah zawng ka chhing ve ta sek a, ni chhuah rual chuan ka harh ve leh mai a. A kuta lu dawm vawng vawngin Leo pawh chu a rawn thu chhuak hlawl a.

" Eng nge i an?" tiin ka zawt a.

" Ka khua a sik hluah hluah mai. Thi mai dawn ni hian ka inhria."

Job-a pawh chu a khua a sik ve a, mahse Leo ang em chuan a sik nasa lo deuh.

Billali-a hnenah chuan, "Kal zel thei an ni dawn em ni?" tiin ka zawt a.

"An kal zel tur a ni. He lai hmuna awm reng chu thihna mai a ni zawk." tiin min chhang a.

Chitichuan kan kal ta zel a. Hmun hlauhawm tak hi kan thleng a. An khup thlengin thlengin tui chu an dai a, hma lamah chuan min kaihruaitu pahnih hi tiang nen an kal a, an kal pah chuan an kalna tur chu tiangin an hawlh dan dan zel a.

Chutah au thawm a lo ri ta hlut a, an ri ta nuaih nuaih a.

Billali zawntute zinga pakhat chuan rul a lo rap palh chu niin. Chair chu a let a, Billali chu tuiah a tla ta bawrh a Tui kam ka thlen chuan Billali emaw a zawntu pa hmel reng hmuh tur a awm lo a, a zawntu pa hmel hlim lo zet kha hmuh tur a awm leh ngai tawh lo. Chair leh nihliap atana an puan zar chu tui chhungah chuan ka hmuh theih avangin Billali awmna tur awm ang chu ka rin hriat theih mai a, mahse Billali-a tak erawh hmuh tur a awm lo.

" Het'ah hian a awm! Het'ah!" tiin pakhat chu a te chul a, mahse tanpui turin engmah a ti chuang si lo.

" Kal kiang teh!' ka ti thawt a, tuiah chuan ka zuang lut nghal a. Puan chingchivet kara Billali lo tal laih laihna chu ka thleng thuai a. Puan chingchivet kar ata chu la chhuakin khawmual lamah chuan ka hnuk chhuak ta a.

Khabe hmula tui bawlhhlawh dir tluah tluahin a ding a.

" Uichoho!" tiin a vin tuarh a. " In pa hi tuia tlahlum turin min hnutchhiah vei maw. In la hre khawp ang! Nang ka fapa, Baboon, i thian ka ni kumkhua tawh ang. Ka nunna i chhanhim a, i nunna ka chhanhim ve theih hun chu a lo la thleng mial mahna." a ti ta a.

FOURTEEN : THE HOME OF SHE

Ni tlak hma hretin ram hniam lai chu kal pelin chhak lam hawi zawnga tlang chhawknghawl deuha in phah chho zui mai chu kan zawh a, thing hnuaiah zan chu kan riak ta a. Leo-a enkawlin Ustane-i chu ka pui zankhua zak a, tunah chuan a dinhmun chu a tha lo tak zet tawh. A tukah chuan a na tak zet tawh a ni.

Ni a chhuah hnu lawk chuan hnim duah hluahna hmun tlang hi kan thleng a, kan hnuaia hnim, thing leh pangpar vul chukte chu ka hmu thei ta. Hla takah chuan tlang pian mak danglam tak hi a hmuh theih a, a awmna chu a hla ang reng fu mai a, a bial pup mai a, han teh kual chuan mel sarih vel a ni ang. Tlang pang te chu bang ang maiin phaizawl atang chuan a lo chawr chhuak zuah a, a chhip chu khawvar tir chhum zing chuan a khuh chuk a. Chair-a thu chunga ka lo thlir vang vang lai chuan Billali chu ka bulah a rawn kal a.

" Saw saw alawm A- thu-zawm-turi chenna in chu."

" A topui teh e." ka ti hluai a. " Sawng lung te saw lawn a har awm mang e."

" Kan hnuaia kawng khu en chhuk teh."

Luipui kang chat tawh emaw mihring siam chawp tui kawng ni maia lang chu ka thlir thla vung vung a.

Billali chuan ti hian a sawi fiah a," Hmanah chuan khu lungsum khuar lai takah khuan lui a lo awm tawh thin a. Lui mawng khu he tlang ai hian a sang thin a ni. Kor khawpui dintute chuan tlang bul thutah khuan kawng an tan tlangtir a, chu chuan lui tui chu a sah kang vek a, chu chuan kan kal takna hnu ram hniam leh hlauhawm tak tak kha a siam ta a ni. Tui a lo kang chah takah chuan mihring kal tlang theihna kawng a lo awm ta a ni..Lui kuang hlui thenkhat chu khawpuiah hmangin a dang zawng chu huan atan leh an ran vulh tlattir nan an hmang ta a ni." tiin.

A tawpah chuan lungbang luhka chu kan chuang chhuak hlawl a, kawngka lo inhawng thim mup mai chu kan hmachhawn ta ran a.

Kan chair chu leiah an nghat ta a. Billali chu ka bulah lo kalin kawng ruk chu ka hriat theih loh nan ka mit tuam a ngaih thu min rawn hrilh a. Ka mit an tuam hnu chuan kan kal leh ta a. Kan kalna tur chin hre hauh loa lungpui chhungril lama han imzawn luh tak vu vu mai chu nuam lo tih rukna riau hi ka nei a. Mi pen thawm leh tui luang ri ngaithla chuan ka thu ran a. Reilote hnuah chuan chung min zawntute chu an zai tan ta a, lung bang leh in chung atanga rawn ri chhuak ang mai hian an aw chu a makin a hlim lo hle a. He lam saw lam, ding leh veiah te kan kual kawi chho ngil nasa mai sia kan kalna chin awm ang reng ka chhut thiam lo.

Darkar chanve zet hnuah chuan ka mit tuamna chu engin a rawn chhun takah chuan puk chhung atangin pawnah kan chuang chhuak ta tih ka hre thei ta mai a. Chutah ka mit tuamna chu phelh turin Billali-a thupe thawm chu ka hre ta a.

Tunah chuan lung bang chhung lamah khan kan awm tawh a ni tih ka hre ta a. He lung bang hi pawn lama a lan san ang huin a chhung lamah chuan a sang lem lo, a chhan chu lui mawng chu tlang aia a san vang a ni. Phaizawl lai lamah chuan khaw ram tawh ni awm tak hi ka hmu a, a bak zawng chu huan leh leiletah an hmang a. Amahagger mipui chuan min rawn bial tak tuau tuauah chuan thil dang han thlir kualna hun ka nei thei ta lo, Amahagger mite chu puka kan mi hmuhte nen khan an inang hlawm hle a ni.

Chutah ralthuam nena infam sipai pawl khat officer-in a rawn kaihhruai chu kan lam panin an rawn tlan a. Fanghmir an bu atanga rawn inzui chhuak diah diah ang mai hian lung kua atang chuan an rawn chhuak a. Chung sipaiho chu Amah-i vengtu pawl khat an ni a. Vengtu Captain chu Billali hnenah kalin chibai a buk a. Chutah sipaiho chu inherin kham sirah chuan kal an rem ta mup mup a, min zawntute chuan an zui ve nghal a. Mel chanve vel kan kal hnu chuan puk lian tak - feet sawmruk a sang leh feet sawmriata zau kotlangah kan ding ta a. Chutah chuan Billali chuan chhuk turin min ti ta a, mahse Leo thung chu an zawn lut ta a. Puk chhungril lam chu khawnvarin an ti eng. Bang chu milem hian a khat dul mai a- lam lai lem leh ramchhuak lai lem a ni tlangpui a, indo lai lem pawh tlem azawng a awm bawk. Heng milem atang hian an khawpui bei turin sipai an lo kal tawh a ni tihte chu ka hrethiam ve nel nual a. Milem karah hiam thu hi a inziak thluah nain chung hawrawpte chu a hriat pawh ka hre ngai lo.

Chhiahhlawh a vara inthuam hian min lo hmuak a, engmah sawi loin an lo kun ngaih a. Engmah an sawi loh chhan chu (a hnua ka hriat leh danin) a tawng thei loa a beng a lo ngawng a lo ni awm a.

Puk lian zetah chuan kalpawhna kawng pahnih hi a thiangin a kaw tlang ruah a, vei lam pang kawngah chuan vengtu an awm a: chuvang chuan he kawng hian Amah-i chenna chu a pawh a nih ka ring thiam mai a. Chhiahhlawh chuan dinglam kawng zawh turin min kawhhmuh a. Puan zar dulhna hmun chu kan thleng a, chumi piahah chuan pindan pakhat hi a awm a, chu pindan chu kham banga boruak luhna tur kua reh kuakin a ti eng a. Chu pindanah chuan Leo chu kan hnutchhiah a, a kiangah chuan Ustane-i chu a awm ve nghal a. Chhiahhlawh chuan mak tih hmel takin a melh a, pindan dang Job-a awmna turah min hruai a, chutah Billali nen kan pindan turah min hruai leh ta a.

Pindan tinah chuan tui dahna bel a awm theuh a. Job nen chuan kan inbuala, kan intifai leh thei chu kan lawm hle a ni. Kan inbual zawh chuan nula hi a rawn lut a, kan la luh lohna pindanah chaw ei siam peih a nih tawh thu chu zaizir hian min rawn hrilh a. Chu nula pawh chu tawngtheilo bawk a ni.

Chaw ei pindan sir tinah chuan lung dawhkan mak danglam tak tak hi a awm a. Dawhkan tin chung zawnah chuan boruak luhna kua hi a awm theuh a. Dawhkan pakhat chu mihring pianzia ang chiaha ker hi a ni a : lu dahna tur leh taksa dahna tur, hmun hnih chu bawp pahnih dahna tur, tin ke dahna tur te- mihring mut lenna tur chiahin an ker kua a. Bang vel chu milem maksak pui pui hian a khat tlat a.

Milem hmasa ber chuan mihring a in chhunga a thi lai hi a entir a. A dawt leh ami chuan ka dawhkan sawi mihring pian zia anga kher chunga ruang mu lai hi a lang leh a. Chu ruang bulah chuan mi pathum hi an ding a, mi ruang lung zawn chung hreta reh kuakah chuan thil tui hi an leih lut a. Chu thil tui rim emaw a hu emaw laka inven nan chung mi pathumte chuan an hnar an tuam bawk a. Milem pathumna chuan mi ruang chu thlanah a zalh a, a lu leh ke zawnah bati an chhi lai lem hi a lang leh a.

He pindan hi a hmaa Billali-an min lo hmuhtir tawh mak tak maia ruang tawihtheihlohna a an lo sawngbawlna hmun chu a ni tih ka hre chiang ta a.

Kha chen zin veivak kan ni bawka ril a tamin ka ei hnem ngang mai. Job lahin milem lam reng a hre chang lo.


FIFTEEN : "SHE WISHES TO SEE YOU"

Chaw ei kham chuan darkar khat vel chu Job-a nen Leo bulah kan thu muang rih a. Chutih lai chuan Billali chu rawn kalin thupui fun zet hian, " Amah-in hmuh che a duh thu a sawi a, he thil hi mi tlemte hnenah chauh phal a ni thin a, inchawimawina a ni chiang khawp mai." a rawn ti a.

A thu min hrilh chu phur fahran loa ka lo dawnsawn avang chuan mak a ti deuh ni hian ka hria. Billali zui tur chuan ka tho chhuak a, chutia ka han thoh chhuah pah chuan chhuata thil eng emaw tle zeuh hi ka hmu a. Ka chhar ta a. Thingrem chhunga zungbun ' Ni fapa' tih inker kha lo ni rengin. Leo chu a dam loh vanga lo cher tain a kut zungtang atangin a titla palh a nih ka ring a, a bo pil mai loh nan ka zungtangah chuan ka bun ta a.

Kawng veilam pang chu zawhin vengtute chu kan kal pel a, chhiahhlawh pali, mipa pahnih leh hmeichhe pahnih hian min lo hmuak a. Tawng hauh loin an lo kun zauh a, mipa pahnih chu an lut hmasa a, hmeichhe pahnih chu an hnungah an kal a. Chhiahhlawhho pindan nia ka rin puanzar inzar kawngka tam tak kan kal pel a. Kalkawng tawpa kawngkhar chu kan thleng ta a, chu kawngka chu vengtu pahnih hian an lo veng a. Chu kawngkaah chuan lutin pindan zau takah kan chuang chhuak ta a, chu pindanah chuan hmeichhe pakua emaw sawm emaw hi an lo awm a, a tam zawk chu an la naupang hle a, thu chungin eng emaw hi an lo thui mawlh mawlh hlawm a. Heng hmeichhiate hi an beng a ngawngin an tawng theih loh avangin tawngkam khat mah an chhakchhuak lo.

Pindan tawpah chuan puanzar chhah takin a zar kawngka hi a lo awm leh a, kawngka hmaah chuan hmeichhe pahnih hi an kut an awma pawm kawkalha lu lo kun ngaihin an lo ding a. Kan va kal hnaih chuan an pahnih chuan an kut chu lek chhuakin puanzar chu a sirah an hnawl tawm a. Chutah Billali chuan thil mak tak a ti ta : a bawkkhup a, a kut leh ke hmang chuan hma lam panin a vak phei ta mai a.

" Bawkkhup rawh." tiin min rawn melh chho a. "Bawkkhup rawh, Baboon, i kut leh ke hmangin bawkkhup rawh, Amah-i awmna hmunah kan lut tawh dawn a nia." a ti a. Mahse ka bawkkhup ve ta lo a, ka hlau hle nain Billali-a hnungah chuan muangchangin ka kal ve zel a. Hetiang tehhrepa pindan han luh tak mai chu atthlak ka tiin nuih nghek tak hi ka nap a.

Pindan tawpah chuan puanzar pan zet mai inzarna kawngka hi a lo awm leh a. A piah lama eng chu chu puanzarah chuan a rawn inkap lut raih a. Chu pindanah chuan keini pahnih tih chiah lo chu midang tumah an awm lo.

A tawpah chuan chu puanzar chu kan thleng ta a, Billali chu chhuatah chuan a bawk phek thlawrh a.

Puanzar sir leh lam atang chuan tu emaw hian min en reng nia hriatna hi ka nei a, chhan hriat hauh si loh hian hlauhna hian min man ta tlat mai a. Chu hmun chu a reh tlawk tlawk mai a. Rim mak tak, pangpar rim na tak rim hi a nam rum rum a, mal ngawih ngawiha inhriatna chu ka nei ta a.

Minute reilote hnuah chuan puanzar chu a rawn in che ta a.


SIXTEEN : ALONE WITH THE QUEEN

Arabic tawng kulmuk tak hian aw hian, "Mikhualpa, eng nge i hlauh ni?" a rawn ti ta a. Aw ka hriat tawh azawnga aw mawi ber mai a ni - luite tui luang ri ker ker te, tui chunga ruahtui han dir ri her her te, zing ni chhuah hlima sava hram mawi tak leh benga rimawi ka hriat nalh ber hi a ang ber a. Chutah kut ngo var hai mai hi puanzar karah chuan a rawn lang a, puanzar chu a nam tawlh ta a.

Lalnu hmai chu puan nem var hian a inkhuh a, a taksa chu ruang tuam hlawm ang mai hian a inkhuh vek bawk a. Chuti chung pawh chuan ka hmaa inkhuh tlat chu nula hmeltha tak leh la naupang tak a ni tih a hriat theih a. A kut leh ke a han chet vel te chu a zei thlarh mai a.

" Engah nge i hlauh em em ni, mikhualpa?" a han ti nawn leh a. A ban a han phar chhuaka, a inthuamna vur ang maia varah chuan a sam uai thla hniang chuan a ke a zuk thleng thelh a ni tih ka hmu a.

" I hmelthatna hian min ti hlau a ni,Lalnu." tiin ka chhang a. " A tha ! Ka Baboon, a tha! " tia chhuata Billali lo phun su su chu ka hria a.


" Mipate hian thudik sawi nachang an la theihnghilh bik em lo a ni tih ka hre ta." a han ti a. " Le, min han hrilh teh, engtin nge hetah i lo kal theih? Eng hmu tura lo kal nge i nih? Hiya, A- thu- zawm - turi thil tihtheihna huang chhunga i lu rawn rawlh tur khawp hian eng vanga i nunna hi ngaihlu lo viau nge maw i nih le? Engtin nge kan tawng hi i thiam viau theih ni? Hmanlai tawng un lutuk a ni asin, khawvelah hian an la hmang ve reng em ni?" a ti ta duah a.

Chutah Billali chu a en a.

" Oh! Putar, i lo la awm ve reng a ni maw! Min hrilh teh, eng vanga he mite hi tihbuaia awm nge an nih a, bel hmanga thah thelh an nih? Eng nge a awmzia?" a ti a.

" Oh, Hiya! " dak chhuak chuang miah lo hian a han ti a." Job-a tia an koh laka thinur hmeichhe pakhatin khang misualho kha a kaihruai a. Ka va thlena ka va puih hmain he pa Baboon-a leh mi pakhat Lion-a chuan huaisen takin an lo bei let a, hmeichhia pawh chu an that a. Thil sual titute zawng zawng chu an chungthu i rel turin Kor-ah hian kan rawn hruai a ni. "

" Ka hria e. Naktukah an chungthu chu ka ngaihtuah ang. Nang erawh chu - ka ngaidam che a, fimkhur hle tawh ang che."

Billali bawkkhup chu a rawn thingthi chhuak a, vawi hnih a bu zoh zoh a, inherin a luh dan ang chiah khan a bawkvak chhuak leh ta a.

Kei erawh chu Lalnu maksak leh hlauhawm tak nen chauh chuan kan awm dun ta a.


SEVENTEEN : AYESHA UNVEILED

" Le! Kan tar khabehmul tuak vara chu a kal ta a. Thingthia an chibai min buk leh an hlau hmelte hi ka kham ta e. A chang hi chuan dawi hmanga thah a, midang hlau hmel dang sawp sawp te hi hmuh ka duh leh thut thut thin." a ti a.

Pindan chhungril lama ka luh theih nan puanzar chu sir lamah a hnawl tawm a.

Puanzar piahah chuan pindan feet sawm pahnih vela zau tur hi a awm a. Sir khatah chuan thutthleng leh dawhkan hi a awm a, dawhkan chungah chuan thei leh tui awmna belthleng hi a awm bawk a, chu hmun chu khawnvar hian a en raih a.

" Thu rawh." a han ti a. "Min hlauh chhan tur i nei hleinem, lo nei pawh ni ta tehreng la i hlau rei hauh lo ang, a chhan chu ka that dawn che a ni. Le, min han hrilh teh, engtin nge kan tawng hi i hman thiam a?" a ti a.

" Ka zir alawm. Egypt ramah chuan an la hmang reng a ni." ka ti a.

" Ah! Egypt ram kha a lo la ding reng a ni maw? Persian-hoin an la awp reng em?"

" Aih, Persian-ho chuan kum sanghnih liam ta khan an chhuahsan daih tawh a ni."

" A nih leh Jerusalem kha a la ding reng em? Zirtirtu leh hruaitu ropui lo la kal tur thu kha an sawi chamchi a, a lo kal tawh reng em?"

" Isua Krista chu a lo kal tawh a, a zirtirnate chu khawvelah a la nung reng a ni."

" Ah, chungte chu ka awm hunlai hnu lam a nih chu - vawi khat chu Jerusalem-ah ka awm ve tawh a, lungin min vawm a, ka banah hian min vawmna ser chu a la awm reng ang. En mah teh!" tiin a inkhuhna chu a hlima, a vun var hai maiah chuan sen val kalh hi a lo awm a.

Hlauhna leh mak tihna chuan ka khat a. "Mahse Lalnu, Isua Jerusalem-ah a lo kalte chu kum sanghnih liam ta daih khan a ni si a. Engtin nge kum sanghnih ngawt i dam theih?" ka ti he haw a.

Min melh vang vanga, ka thinlung chhungril zawng zawng hmu tlang vek thei ni mai hian a lang.

" O mi à pa, " min ti tawl mai a. " Thil engkim hi an thi thei niin i la ring cheu a ni maw? Chutiang thihna chu a awm hleinem ; inthlakthlengna thil mai chauh a ni. Heng banga milem ziaktute damlai pawh kha kum sang ruk lai a liam tawh asin. Dam lohna nasa tak vangin an thi fai vek a, an thi chiah pawh a ni lo, an thlarau chuan tun minute mai pawh hian min lo la chenchilh reng a ni mahna ."

A han hawi kual vel a, "A chang hi chuan chung thlaraute chu ka mit ngei hian ka hmu thei ni te hian ka inhre thin." a ti a.

" Mahse khawvel ngaihah chuan mitthi an ni vek tho alawm."

" Hun reilote chhung chauh an thi a, an rawn piang nawn leh thin a ni. Kei, Ayesha - chu chu ka hming a ni. Kei Ayesha-i hian mi pakhat ka hmangaih chu a rawn pian nawn leh ka lo la nghak a ni. Kum sanghnih kal ta khan a thi tawh a - kei hmeichhe hmeltha leh thil tithei tak hi heng hnam mawl ransa aia chungnung hret ho zingah hian eng vanga khawsa nge ka nih i rin?" a ti ta a.

" Ka hre lo le." ka han ti a.

" Ka hmangaih chu ka nghah vang a ni." a ti a. " A rawn pian nawn leh hunah chuan he hmunah hian a rawn kal ngei dawn tih ka hriat tlat vang a ni."

Kei chuan, " A nih keini mipaho hi kan piang nawn zel thei a nih chuan nang lah thi ve thei loin i insawi si a." ka ti a.

" Nia, chu chu a dik alawm - nunna leh thihna thuruk leh thuruk dang tam tak ka zir thiam vang a ni. He rama in rawn kal ka hriat theih dan leh Amahagger mipui laka ka hum theih dan che u kha mak i ti em? He tui hi han thlir teh." a ti a.

Ka ding chhuak a, belthlenga tui chu ka'n en a. Tui chu a thim ruih a, chutah a rawn fim telh telh a, kan lawng chu tuiah chuan a rawn lang a; lawngah chuan Leo chu rannung laka invennan a hmai khuhin a mut laiin, Job, kei leh Muhamed -a chuan luikam lamah kan hnuk lai kha a lo lang a .

" Eng thil nge ni ta! Dawi thil em ni?" tiin ka au thawt a.

" Dawi thil a ni lo." tiin min chhang a. " He ram nena inkungkaih hun kal tawh hlim thla chu ka hmu thei a, mahse hun lo la awm tur thil erawh ka hmu thei lo a ni. Belthleng tuia hlimthla kha hmuin mi ka rawn tira ka rawn chhanhim ta che u a ni. Min hrilh teh, lawnga tlangval mu kha eng nge a an? Hmuh ka duh a mahse a hliam tuarin a dam lo nasa tih min hrilh a ni." a han ti a.

" A dam lo nasa hle a ni. A tan eng emaw tal i ti thei lo em ni?" ka ti a.

" Ni khat dang chu mut chawlhtir leh rih phawt ang. Ama chaknain a dam lohna chu a vai kiang thei a nih chuan a tha, mahse a thei ta lo a nih chuan ka lo kal ang. Tu nge enkawl a?" tiin Ayesha chuan min zawt a

" Ka chhiahhlawh Job-a leh i chipuite zinga mi hmeichhe pakhat Ustane-i te'n an enkawl a ni, O Lalnu."

" Ka chipuite! Heng salho hi ka chipuite an ni loa, tin Lalnu tiin min ko suh. He hming hi ka kham tawh a ni. Ayesha tiin min ko zawk rawh, he hming hian nunhlui liam ta te min hriatchhuahtir thin a ni. Ustane-i chungchang kha - vawi khat chu hmeichhia vangin thil hlauhawm tak ka la tawng dawn tia hrilhlawk ka ni tawh a. He nu hi a...." a tawng lai chu a tawp chawt a, "Ka la hmu ang!" a ti ngat a.

Tui chu a thlir a, " Enteh, he nu hi a ni em?" a ti thuai a.

Tui chu ka'n en ve a ; Ustane-i chuan tu emaw duat hmel taka a en chhuk lai hi a lo lang a, " Aw, ni e. Leo-a muhil lai a en a nih hi." ka ti a.

" Leo-a" a han ti nawn sap a. "Lion-a. Thil mak tak a ni. Thil ni thei a ni lo." tiin tui chungah chuan a kut a phar a, milem chu a reh ta a.

" I kal hmain eng emaw i duh zawng min dil duh i nei em, Holly? Amahagger mipuite hi an mawl hlawm khawpa, engmah hriat lah an nei hek lo, ka chhiahhlawhte ngei pawh an beng a ngawngin an tawngthei hek lo. Duh zawng mi dil duh i nei em?" a ti a.

" Aw, nei e, Ayesha." tiin ka chhang a. " I hmel ka hmu duh a ni."

A nui hak a, " Greek-ho thawnthuah chuan hmeltha a hmuh vanga thi tawp mi pakhat chanchin a awm asin. Ka hmel ka hmuhtir che chuan eng emaw hrehawmna i tawrh phah mai thei a nia." a ti a.

" Hmelthatna hi ka hlau lo." tiin ka chhang a.

A kut chu phar chhuakin a inkhuhna chu a hlim ta a.

Engtin nge hetiang khawpa hmeltha hi a awm theih zawk le? Ka sawi fiah thiam thlawt lo. Engtin nge heti khawpa hmeltha hian sual a kai theih? Sual a pai miau si. Eng emaw chen chu ka mit pawh ka lasawn hlei thei loa. Chutah ka hmai chu ka kutin ka hup ta ringawt a, ka hmai hup chung chuan ka kutzungtang kar atangin a hmel landan rawn inthlak danglam chu ka hmu thei a. A mit chuan eng emaw hi hlauhthawnna leh beiseina inpawlhin a thlir ta vawng vawng a.

" Mihring!" tiin a phun sep a," Kha zungbun kha khawi atanga i neih nge ni? Sawi rawh chuti lo chu ka dawi hmangin ka that ang che ! Ah, ka ti hlau che a ni maw, min ngaidam rawh. Mahse, zungbun kha khawi atanga i neih nge? " a ti a.

" Ka chhar a ni." ka ti a.

" A mak hle mai." a ti a. " A mak tak zet a ni. Vawi khat chu khatiang lung kha ka hmu tawh a, Kallikrates-an a bun thin a, a roh tak zet thin a ni. Kal rawh! Tunah kal rawh! " a ti tuarh tuarh a.

*****



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)