PASTOR FANU--41

Episode kal lai dah luhna

Moderator: writers

Ramdinsangi Ralte
Posts: 158
Joined: December 2nd, 2018, 4:10 pm

PASTOR FANU--41

Unread post by Ramdinsangi Ralte » August 2nd, 2021, 8:26 pm

"Zuali, khatiang kha inleng te lo lawm dantur ani in ihria em? pa siam-an Rinzuali arawn tih rual chuan, inthlahrun hmel fe chuan kei ni thian thum chu min melh kual rulh rulh a. "Pa, anni ho hian kan inah hian engmah tihtur annei miahlo, kan dinhmun chhe lutuk min nuihzat tur a rawn kalte lo lawm chiam hi kan bat ani miah lo bawk, heng vanduaina kan tawn zozai hi anni ho vang vek hi ania sin, chumi hrereng chung chuan hlimtak in kalo dawngsawng ang maw? Ateuh lo lutuk, anhmel hmuh hi ka peih hrep lo e" rum fahran a min melh chung a arawn tih chuan. "Lalrinzual ngawi rawh ka tih chu" pa siama chuan arawn ti hriam hrawk a.







Kei ni thianthum chu nuamlo ti fe chuan kan in melh kual hrek hrek tawh a. "Pa siam kan va haw mai ange, vawiin ah hian nangmah ni rawn diriam tum a lo kal kan ni miah lo a, inchhiat tawh tuarpui tur cheu a rawn kal mai kan ni tih minlo hriatsak dawn ania" Rinzami nen hamhaih luat vang a tawng na chang pawh kan hriat loh laiin, mipa ber tihtak ah josepha chu arawn tawng chhuak vat a.








"Nilo e, Zuali thilsawi kha chu men ah minlo thlak sak hram teh u, anau thihna hian amahah nghawng anei nasa lutuk a, inhriat thiam ah kan ti aniang chu" a rawn ti dam thluam a.
A pa thu rawnsawi vang chuan, Rinzuali chu lungawilo fe hian inchung lamah chuan atlan chho hlawk hlawk a.







Pa siama vek chuan "Tikhan lo awm ve reng rawh u aw, tlailam ah zanriah min kilpui ve nghal turin ka sawm cheu ania, ka fanu hun hnuhnung min hmanpui tur a inlo kal hi ka thinglung takin ka lawm ania, Zualtei nu kiangah hun hman tam deuh ka duh bawk sia, kan fanu thihdan hian anghawng na lutuk a, tunah pawh hian Rinhlua vang liau liau in ka fanu ruang rawn thlahliam thei kanni a, jail lama kan kir leh hunah pawh ka nupui hi minlo ngaihven sak reng turin ka ngen duh cheu a, ka kalsan ang cheu , minlo hrethiam mai ru aw" hmel ngui ruih a arawn tih chuan, pa siama chu kalo lainat ngang mai.







Ka hmangaih Rinhlua pa that tu ni mahse, ahmel ah chuan inchhirna leh hreawm tihna hlir ka hmu thei, mihring siamthat nan khawdur angai anlo tih thin hi pa siama nunah hian a langchiang viau in ka hria, ka rilru chuan kalo tawngtai pui ve mawlh mawlh a, kum tamtak liam tawh a athil tihsual chuan rawn vawlet in, an chhungkua chu ani tel hian an kehchhe mek zel mai chu ani si a. "Lalpa tanpui hram teh" ka rilru a ti mawlh mawlh chung chuan kalo thaw chhuak hawk a.








"Kan haw mai dawn em ni? Katih reng kha, helai hmun ah hian lawm kan hlawh teh chiamlo chu anih kha, Rinzuali te ang ho hi chuan engmah inchhirna an nei ve tak tak ngailo ang, thil ti sualtu zawk in thiamloh minlo chantir lek lek chu anih hawt kha" phun sar sar chung a Rinzam-in arawn tih chuan, Josepha nen chuan kanlo ngawi reng a.








Kan tihtur ber kan hlenchhuak tawh tho bawk a, keipawh chuan haw mai pawh chu ka pawiti vak tawh bik chuang lem lo a. Josepha chu ka mitmei chuan ka va rawn deuh a, ani pawh chuan "Haw mai ang u, helai hmun a kal kalo rawt ta kher kher chu thil atthlak tak ani, lo in lanlo law law ila tha tur hi ania, anthil tihsual ah inchhir ahnek in thil, thleng engkim ah khan mawh phurtu ah minlo puh titih der chu anih tak tak kha" lawm hmel vak lo chuan arawn ti ve sup a.







Khawhar lenpui tur te pawh inkhat deuh thaw in anrawn lut tawh a, khuangpu tur te pawh chu zai inpeih fe in anlo thufel at tawh a. Pa siama pawh biak lumlam atul tawh a kan hriat loh vang chuan pawn lamah chuan kan in zuichhuak leh ta dial a.
Kan motor park na kan thlen chuan kan ding bial taih a.







"Engtia awm nge intum? kan tihtur chu kan tlakfel der tawh chu ania, kei chu inlam ah haw tlang nghal mai ka duh" Rinzam-in arawn tih chuan josepha chuan minrawn melh vat a. "Keipawh home lamah ka let leh nghal mai ang, vawiin ah ka pa in an intihhlim natur thil vel a va lei a, tihtur atam dawn sia, hetiang a kan awm tak rau rau chuan ka kir leh nghal zawk mai ang, sepha nangmah zawk hi inlam ah ihaw dawn nge home lamah irawn kir ve leh dawn? Ka lo ti thuai a.






"Home ah chuan ka rawn kir ve leh mai ang, zamtei va drop phawt ila, chutia hna thawhtur a awm phei chuan muangchang tawh lo in ikal vat teh ang u" tih leh motor a thut luh chu arual nghal zat a.






Rinzami te in lam pan a kan tlan lai chuan "Sepha isumdawnna lamah hian irilru pe ve deuh tawh la kaduh khawp mai, iawmdan vang hian inu pawh a mangang tawh viau ania, mi rilru puitling tak i ni a isumdawnna ah hian inthlahdah athiang lo tih chu ihriat chian viau kha, tunah hian spot thar an siam leh nghal a, i elpui te lakah hian i customer te hi ihlauh thiang lo hrim hrim. A thaber ni reng tur in ngaihtuahna thar isiam ahun tawh viau chuan ka hria" Rinzam-in arawn tih chuan kei pawh chuan Rinzami thilsawi chu kalo tuihnih ve luam a.








"Inthil sawi chu adik khawp mai, tunah chuan ka normal leh vek tawh e. Lo lungngai lo phawt mai teh u, ngaihtuahna thar nen ahma aia tha nitur in sangtak ah ka invawrh leh ngei ngei ang tih ka tiam che u" joseph-an arawn tih chuan Rinzami nen chuan kanlo thaw huai a.








Rinzami te inah pawh lutkawi tawh lo chuan home lam pan chuan kan tlankir leh vang vang a. "Zorin khawvel hi chu lungngaihna leh buaina hlir hian akhat nimai hian ka hria, ilak a ka rilru put thin dan zawng zawng te kha chu sawi ngailo in ihrevek a. Ngurpuii nen a hun reilo te chhung a kan inkar a hmangaihna lo pianchhuah mai dan te kha, tunthleng hian keipawh hian kala hrethiam thei lo, hetiang tak hian kei tlangval senior lam tawh hi hmangaihna vangin ka talbuai theih hi kalo ring ngai miah lo asin, chupawh ka fa nilo midang fa paimek tu lakah leh nghal, atirah kha chuan Ngurpuii kha a chanchhiat luat vang khan ka lainat thin a, kha kha khawngaihna kha engtik lai khan nge hmangaihna ah alo inthlak ka hre bik lo. Ngurpuii nen kan inkar hmangaihna kuhmum, rawn parchhuak ve det det kha, mi nunrawng lutuk te vang a thliah a a awm ta mai hi hriatthiam har kala tireng mai, hmeichhia te chu neih senlo ka hmu ve tho sia, mahse tinge ka hmeichhe duh ve te hian min kalsan bik zel tih hi keimah leh keimah ka inzawt nawn fo thin asin" hmel ngui riai a joseph-an arawn tih chuan kalo khawngaih kher mai.





Mittui tling pam chung chuan josepha lam chu ka hawi a. "I tan a khuanu ruat kan nih loh vang mawle, ita tur diktak chu ihma ah hian arawn inhung mai ang, chutih hunah chuan hmangaihna vang hian ina nawn leh tawh ngailo ang tih ka sawi ngam bal, Ngurpuii nen in inkar a hmangaihna chaktak arawn thleng ang chiah khan, itan aruat ihmeichhia tur diktak ihmuh hunah chuan hlim takin inui leh thei dawn alawm, sepha, nupui ineih hma hi chuan rilru hahdam takin ka awm theih pawh ka ring chiah lo, engpawh chu ni se Pathian kutah engkim hi thlen in amah ah in nghat phawt mai ila, rinna in Abrahama pawh khan ramtiam lam apan tih kan hriat kha, keini mihring te buaina hi chu keini lo chinfel theih pawh ani chiah lo, Pathian kut a tluk luh mai hi kan tihtheih sang ber chu anih hi, kei te hi min han enla, mi zawng zawng hmusit leh chil chhak rawn ka nih thin kha, kan chung a vanduaina lo thleng zawng zawng te vang hian kan chauh phah tur anilo a, rinna kawnga intahhriam nan kan hman thiam angai tih ka hrilh duh che a. Engpawh chu ni se, bang lo in tawngtai fan fan phawt ila, kantan nithar duhawm tak chu alo her chhuak ve leh mai thin ania" ka ti dap dap a.






"Zorin, kanun a ka thiltawn tawh zing a duhawm ber mai chu nang kalo tawng che hi ani. Ka thianpa hi ka lawmpui hle bawk, nangang hmeichhe tha lutuk nupui a anei thei tur bik che hi ka thik rum rum thin ania aw" nui hawk hawk chung a arawn tih chuan aban ah chuan kalo chum taih a.





"Iti zahtak thei e, hmeichhe dang te aia ka that bikna vak a awm reng reng lo, mi tu te pawh hian thatna lai te theuh hi kan nei vek alawm" nui vur vur chung chuan kalo ti thuai a.






"Rinhlua nen chhungkua indin hun tur hi ka mitthla thin a, nangni pahnih vang hian riangvai chanhai te tan kawl a lo eng ta ruak tur chu ka suangtuahna hian ka hmulawk asin, hmangaihna nasa tak nen inthlazar hnuai ah hian mitam tak in hahchawlhna anla hmu zel dawn si a. In pahnih inkar hmangaihna buaichuar tak ni thin, thawk leh khat a lo felfai ta kuar te hi ingaihtuah ve thin em? Heng zawng zawng hi Pathian a rinna inghah tlat thin vang tih hi, mimawl ber tan pawh hriat thiam loh chi rual ani lo e" thutak zet chuan a rawn ti sup a.






Home kan thlen chuan ka pa bazar pawh alo haw tawh a, volleyball net zar na tur ban khur athen in anlo lai tlauh tlauh tawh a. Kanu chuan Alpha chu alo paw muhil tawh a. Josepha nen kanhmel ahmuh rual rual chuan minrawn pan vatin. "Mambawih inva rawn let leh rang si ve? minlo ti nghal var a.







Josepha zawk chuan "Nia tiraw, kan tih loh tawp tur kan va ti a, lawm kan va hlawh lo chiang teh ania" nui vur vur chung chuan arawn ti chhuak phawng a. "Inthiamlo viau teh suh, Romawii thihna chungchang ah kan tuarpui tih leh, antan banglo in kan lo tawngtai reng thin tih kan va sawi ringawt pawh kha thil tha tak ani hrim hrim alawm, anni khan hmelma angin minlo ngai mahsela, kan haw velo tihtal kan va lantir kha thil hlawk thlak tak ani tawh hrim hrim" kalo tih chuan kanu pawh chuan "Mambawihi ngaihdan kha ka pawm zawng tak ani, kan tawngtaina te hian engtik ni ah emaw chuan rahtha ala chhuah ve em em ang" alo ti ve bawrh bawrh a.




"Ka va inthlak anga hnathawk ho te saw ka va pui ve tawh ange, siam zawh vat a inkhelh nghal ka duh, chubak ah tunlai chu exer ka la tha bawk silo a, ka fit lo riau leh nghal a" joseph-an arawn tih chuan kanu nen chuan kanlo nui var var a.







"Han inkhel tak teh u, in infiam lai lo thlir chu achakawm tawh tak alawm" kanu chuan alo ti thuai a. Keipawh chu inthlak tur chuan inchhung lamah chuan ka lut zui ve nghal zat a. Ka inthlak fel chuan ka phone chu ka bag atang chuan phawrh in, whatsapp msg chu ka inkual thuak thuak a. Rinhlua msg pawh alo awm ve vang a.








"Bawihi intha em? ka ngaihtuah riau cheu ania" tih arawn thawn ka chhiar chu ka nui sak a. Rinzuali te inah kan kaldawn tih ka va hrilh pawh khan minlo ngaihtuah sa viau reng a, a msg ka reply lawk bawk silo a minlo ngaihtuah tawh viau chu ka ring sa tho a.






"Kan tha e, home ah kan let fel leh der tawh" tih chu ka va thawn nghal vat a. Rei pawh ka nghah hma chuan ka phone chu arawn ri nghal zat a. Min rawn call tu chu tudang nilo in Rinhlua ani chiah reng a.






Phone ka lak rual chuan "Bawihi intha takzet maw? invan let leh hma si ve, nge thilthleng a awm zawk? min ngaihtuah tih hriat fe chuan arawn ti sup a. Kan thiltawn vel chu zepthen awmlo chuan kalo hrilh nghal malh malh a, pa siama mizia mak katih zia te chu kalo sawi chul a.







Leh lam atang chuan arawn thaw chhuak hawk a, chutah ban deuh charh hian "Bawihi pa siama chu hmanni khan jail ah ka zu hmu alawm" arawn ti sup a. "Tinge engmah minhrilh ve loh a, ka kalpui vetur che ania, itan chuan ani hmuh chu thil nuam tak ani dawnlo tih ka hria a, engkim atha em? kalo ti vat a.






"Nangmah vang liau liau alawm, reitak chhung ka pa phuba lak tum a kalo beih ve tawhna te kha tunah chuan abo zovek tawh. Bawihi pa siama hnen ah chuan enge kasawi tih min zawt dawnlo emni? arawn tih chuan "Enge isawi a? kalo ti vat a. "Pathian hming in ka ngaidam che tih ka hrilh a, chuan maw enge thleng zel tih ila hreduh em? atih chuan angawi dat a, aw ka tih nan kalu chu kalo bu zauh a. Min hmu thei lo tih kalo hrechang tawh miah lo, nui suk chung chuan "Enge thleng minhan hrilh teh? kalo ti dam dap a.






"Ka pa lak a athiltih sual zawng zawng ah khan, kei hian Pathian hmingin ka ngaidam tih ka sawi rual khan pa siama chu atap zawih zawih alawm, keipawh ka insum thei bik lo a, tap chung in kum tamtak hmelma ang mai a kalo en thin nen khan kan inkuah a, kha ka thiltih vang khan ka inchhir hauh lo, kan hmelma te hian kan hmangaih hi anlo mamawh ngawih ngawih tih ka hriat thar leh phah a, tunah chuan min delhtu phurrit zawng zawng te kha lak kian sak in ka awm tawh a, ka dam chhung hian midang lak a phuba lak hi ka tum leh tawh ngai hauh lo ang. Tun aia hma ah khan pa siama hi lo ngaidam ni ila chuan, tun a an chhungkaw chung a thilthleng zozai pawh hi athleng miah lo ang mawle" a rawn ti sup a.







"Tunah hian enge ka tihchak deuh ihre duh em? Kalo ti chhuak sep a. "Hremiah lo mai, min han hrilh la' arawn titha ve mai bawk a. "Tun tak hian kuah vawng vawng che ka chak lutuk, chuan maw ithil tih vang khan ka chhuang lutuk che ania aw, ngaidam theitu nih nawm zia atak a hretu inithei hi ka lawmpui takzet che, ka hmangaih em em pa" ka tih chuan arawn nui hawk a.




"Ka angel te, keipawh hian ka ngai lutuk che asin, ka rawn hmu hmanlo ang che kati tawh na chu, ka insum leh theih pawh karing tawh chiah lo, zanlam ah reilo te tal nangmah hmutur che a rawnkal kaduh riau" arawn tih chuan kalo nui har har a.






"Insum la, zingah kan inhmuh tawh kha, tunah chuan kan inneihna tur thil ibuaipui angai alawm, ithil thil tihtur ichinfel hma leh ikiangah ka awm hma thei dawn tih ihriat tho chu ka ring a" ka tih chuan "Min ngailo ve sia maw, aw le, aw le kalo kal lo ang, mahse kan inhmuh hunah chuan kathu thu in i awm angai ang" arawn tih chuan "Awle boss ithu ang zelin le, eng pawh chu ni se hna thawk leh tawh rawh, keipawh tihtur ka nei a volleyball court an siam mek a, josepha pawh aphur ngang mai" ka tih chuan "Sepha chu ala haw lo maw? Bawihi" arawn ti deuh vak a.







"Um ala haw lo chu anih hi, tunah chuan ka normal leh tawh e chu atia lawm, lo ngaihtuah suh, ithianpa hi mi rilru puitling tak ani tih ihriat ve tho kha" ka tih chuan "Chutiang lam anilo, ibulah a awm theibik kha ka thiik alawm" pangchang zet a arawn tih chuan kalo nui hawk hawk a. "Thik duh reng reng suh, kadam chhung zawngin ibulah ka awm reng dawn tih kha theihnghilh lola aw, phone kha dah tawh rawh le, kan hna ve ve ithawk tan leh tawh teh ang" ka tih chuan engmah sawinawi tawh lemlo chuan phone chu a off tha ve nghal mai bawk a.







Pawn a ka va chhuah chuan, volleyball court chu anlo siam zo fel der tawh a, ball chu anlo beng laih laih tawh a, va pawh mai lo chuan rilru hlim veng veng chung chuan anche vel chu kalo thlir dauh dauh a. Josepha pawh aphur ber ber ah alo tang leh tawh a.





Rinhlua nen pawh phone kaltlangin kan inbe awllo a, nihnih chhung chu kan inhmu tawh lo a, palai hmel lahmu chiah lo mah ila engkim kan chhungten an sawifel sa diam tawh a. A ni tur vel ruat fel ang chauh ani tawh bawk a, kan inneih na thil vel buaipui in aphar buai thei khawp mai.





Asawi ang tak tak in karkhat dawn chu min hmuturin home lamah arawn lang lo ve teh mial a, asawidan in "kan inneih hmangei a, maremi hi hotel enkawl theitur khawpa hmantlak ah chhuah hman kaduh bawksia, ani arintlak zawh poh leh kei kalo hahdam ting anga" atih ve nuap nuap khamaw.






Ka pa nen kan titi dun mawlh mawlh laiin Rinhlu-ab minrawn call hlawl a. "Bawihi zanin chu karawn kaldawn ania aw, ka awmthei tawh thlawtlo, karkhat chhung hi hetiang em em hian animaw alo rei a? arawn tih chuan kalo nuih char char a. A rawn sawi thutak em em mai bawk si chuan minti nui lo thei lo.







"Kan inneih hma chuan kan inhmu tam thei tawh dawnlo tih isawi atang khan ni ruk chiah ala liam sia, tunah min hmulo a i awmtheih tawh thlawt loh thu irawn sawi leh chu ania" nui kar kar chung chuan kalo fiam zauh a.






"Tunah hian ka uang lo nasa viau ania aw, ka rawn hmulo che anih chuan kan inneih ni thleng tur hian kadam zo thei lo hial in karing asin, athuhrim ah minngai ve miah lo tihna emni? Keiin itello a awm harsa katih em em lai hian, nang hian minngai ve miah lo zawk" lawmlo aw lek lek a arawn tih ngat phei chuan ka nuih aza zual sauh a.






"Saibung tiat pui tawh si hi tinge inaupan chhiat theih em em bik le? kangailo bik che tihna lam nilo in, chhungkua din mai tawh tur kan nih vang hian, ka ngaihna che hi naupang chhia zet a tilang velo in, puitling tak a awmin ka tuar mai mai zawk alawm, kangai lutuk che hi theih nise itaksa ah khan vangvat ang mai a beh reng mai asin kaduh ni" nuih insum zet a katih chuan arawn rum hawk a.






"Nang zorinsangi ka hmangaihna che ah hian puitling tak a awmkher angaihna ka hre ve hauh lo mai, ka thinlungin aduh dan ang hian naupangchhia deuh a rawn hmuh che kaduh zawk fan chu anih si hi, chuvang chuan zanin ah hian ka rawn leng dawn hi anitawp mai ani" arawn tih leh lek phei chuan ka insum thei tawh thlawt lo, za lutuk chuan ka nui chhuak ta chiam a.




"Enteh Rinhlu kan fiamthu hlut na chu keitak hian kangai che in, isawi ang chiah khan kan inhmuh loh chhung lek pawh kha rei kati ve tho mai, inpeih vat vat la palai hmel hmuh vat vat kaduh tawh zia hi ihrelo zawk ang, ka nun zawng zawng hi nang nen a hman dun hi kaduh em asin, chuan thil pakhat hma deuh ah rawn kal rawh aw, kalo hmuak ang che, kan awmna a inhlat ve sia kan awmdun rei thei dawn silo a" ka tih chuan.
"Anih chuan tihtur tlem a zawng kala nei a, kan thawk vat vat anga kalo kal vat ang" kan inbiak na arawn titawp rang lutuk chuan min ti hrih hai letling zawk hial a.







Kanu leh pa in min uap reng thei ani bawk a, home han enkawl pawh chu a hahthlak em em lo a, a chang chuan tunhma ang tho khan zanlam ah ka teichhuak ve leh zauh zauh a. Rinhlu-an zanlam a ka vahchhuah chu a remti vak lo a, mahse kan inneih hunah phei chuan ka duh ang in pawnlam a ka rawngbawl hna hi ka thawk thei tawh in ka ringlo a, chubak ah ka rawngbawlna min dip tur chuan hmangaih viau mah ila Rinhlua hi pasal ah ka neih theih ka ring lo hul hual a, arang thei ang ber a ti ti pui ka duh viau bawk.






A hma te kha chuan, pasal ka neih theih tak tak hi kalo inring ngailo thin kha ania, mi zawng zawng hmuhsit leh kawhrawn ka nih lai te kha chuan, katan hian mipa, min hmangaihtu hi an awm vetheih ka ring ngai lo, chenna bulbal neilo a kumhnih taltap kalo vahvaih ve na te kha Pathian hian minlo theihnghilh bik sak reng reng lo, katan kawng min ruatsak in, tunah chuan kalo suangtuah phak loh dinhmun ah min dah in, midang te tan malsawmna nitur in dinhmun sang takah minlo hung ve reng tawh, ka rawngbawl hna thawhna kawngah hian hlawhchham rak chang pawh ka ngah ve thin khawp mai.








Lal isua krista hnungzui hi harsa kantih em em lai hian, sual kawng zawh hi kan awlsam leh viau thin si a, heitak hi a buaithlak lai tak chu ani, ringtu ten kan chaw lakna hnar ber. Bible chhiar leh tawngtai aia thil nuam hi khawvel ah hian atam tawh lutuk a, kawng nuam zawk ni a kan hriat lamah hian kan thle liam dual dual zel zawng chu anih hi.






Ka pa in "Mambawih pasal ineih hma chu home lamah kan awm ve rih ang, thil tul leh pawimawh i indap khawm ve angai anga, chumi chhung chu kei hian i ai kalo awh rih mai aniang chu, amah erawh chu, ka awm ve vang ringawt hian i inthlahdah thiang miahlo ania aw" atih chuan kalo bu nghauh nghauh a.








"Pa, pasal ka neih hi irilru tak tak in tha iti em? Ka tih chuan angawi vung vung a. "Mambawih hmeichhia inia, mipa te ai hian hmeichhia te hi chu in hnuaihnung zawk a, chubak ah in awmnem zawk bawk a, home ah hian addict, rilru ngaihtuahna fim pawh hmang thei tawhlo te an awm ve nuk bawk a, diktak chuan he home enkawl tur a kan in ichhuahsan tirh te kha chuan mutmu pawh ka tuah hleithei meuhlo asin, ipa hian Pathian ah rinna kalo nghat tawklo deuh te pawh ania nge, i in humhim na tur atan leh, he home khaipa ber tur pasal ineih hi atul takzet zawk asin, Rinhlua nen in inneih hunah chuan ipa hi rilru hahdam taka ka awm ve theih tawh ka ring" arawn ti chuar chuar a.








Ka pa bulah chuan va thu in, ka va kuah vang vang a. "Pa, kanu nen inkianga hun ka hmang tam theilo lutuk hi hreawm kati thin, tlema kanla naupan lai deuh kha chuan irawngbawlna hmunah khan ka awm ve mai thin a, zirna avangin chhungkua kan awmho thei tawhlo a, tunah ipention ve chauh a kan awmhran angai leh bawksia, kan naupan lai te kha kangai thin asin aw, kanu nen inthlazar hnuaia kan unau a kan awm thin lai te kha, ka pasal neih hma chhung min rawn awmpui thei tur hi ka lawmzia ihria em? Ka pasal neihni tal chuan kan inchhung atang ngei a pasal neih hi ka chak ve asin aw, mahse tunah chuan ihmuh ang hian chhungkaw hran kanei tawh bawksia" kati sep sep a.







Ka pa chuan duat fe hian ka samah chuan arawn chul hliau hliau a. "Ka fanu, ipa hian ka chhuang che asin, ichhungte kianga nuamsa tak a awmthei reng ini chung pawh a, mahni nawmna kalsan meuh a midang te tana i inhlan thei hi aropui takzet, midangte angin ithil tih chakzawng te hi ti ve thei lo mahla. Vanah lawmman itan a awm ani tih hrereng la, chumi hrereng chung chuan itheihtawp chhuah zel ang che aw, inu nen hi chuan kan kum te alo tam ve tawh a. Bible in mihring damchhung kum asawi kanlo thleng ve titih der tawh a, tunang hian kan uap theih tawhloh hun che pawh alo la thleng anga, hun harsa tamtak ipaltlang angaih ni te pawh alo la thleng ngei dawn a, chung hunah chuan ibeidawng thianglo ania, sual hian kan chakloh na lai hi ahre em em a, chuthil hmang chuan minrawn bei chat thin a, entur diktak i entlat chuan ihnungtawlh ngailo anga, itluchhe heklo ang, joba nun kha theihngilh ngaisuh ang che, tun ang hian irawngbawl hna hi atluang purh reng dawn miah lo ania" ka pa thu minhrilh chu ngun tak in kalo ngaithla a ka thinlung phek ah ka ziak nghal thlap bawk.







Ka phone rawn rik takah chuan ka pa minkuahna atang chuan ka in lahrang vat a, number lawng chauh anih vang chuan tlem chuan ka hamhaih deuh a, phone ka pick rual chuan, hmeichhe aw sin lam deuh hian "Zorini ini em? arawn ti sep a. Ka pa minlo en ve rengtu chu melh zauh in "Aw ni e, enge nita? khawi atangin nge aw, inumber hi ka nei silo a kavan hremai lo che" kalo ti thuai a.







"Ani dawn teh tak e, in hmelhriat tir hmasak nachang che kalo hrelo a, maengi ka nia, tunah hian Lrm hospital ah kan awm mek a, ka rawn biak chhan zawk tak che, chu ka pasal vang hi ania, amah chu ila hria em ka hrelo a. Ramchhana kha ania, ka pasalin asawidan chuan, in inhmuh atang khan kumkhat avei tawh a, amah tak ilo hretawh lo anih pawh in kan pa hian hmuh che aduh a, tunah hian adamlo mek a, anihna takah chuan athimek zawk, zorin khawngaih in ka pasal hmutur hian ilo kal thei angem? A kal hma in hmuh ngei che aduh tlat sia" arawn tih chuan kalo hrilh hai angreng khawp mai.







Kumhnih chuang rawng ka bawl chhung khan mi tamtak ka hmu in ka kawm kual thin a, tuna arawn sawi hi tu ber nge ka hremai thei tawh tlat lo ani, mitthi mai tawh tur in chutia minhmuh aduh tlat si chuan, ka rawn hmu theilo ang lo tih chi lah chu ani der bawk silo, ka rilru abuai ru angreng khawp mai.





"Zorin, ka pasal duhthusam hnuhnung ber chu irawn puitlin sak thei ang tiraw? tunah ngei hian irawn hmu thei angem? A dinhmun hi atha vaklo a, zanin hi kan daih tawh kher lo maithei ani" beidawn hmel lutuk a arawn tih chuan namen lo hian ka lungphu arawn rang a.





"Aw le, ka rawn kal nghal dawn ania, ka rawn thlen hunah ka rawn call ang che" ti in kan inbiakna chu kan ti tawp a. Phone adah rual chuan ka thaw chhuak hawk thei...cont



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)