BEISEINA 32

Episode kal lai dah luhna

Moderator: writers

SeniChhakchhuak
Posts: 74
Joined: May 27th, 2021, 10:49 pm

BEISEINA 32

Unread post by SeniChhakchhuak » August 2nd, 2021, 10:21 pm

BEISEINA
- Seni Chhakchhuak

Bung 32-na

"Rin, nun kawng sual kan zawh hma khan lo intawng hman ila ti raw? Hnawk leh hriat chhuah leh tur awm miah loin lo inkawp ila ka ti. Ka nun hlui duhawm lo zet khan hreawm min tihtir țhin," ka nupui Zorini chuan a ti sap sap a.

"Ni e ti raw? Nun hlui chhia neih loh chu duh thu sam a ni alawm. Mahse, kan lo nei palh tawh a, zirlai țha tak atan hmang hlauh ila a țha phian ang a ti raw?" ka lo ti ve a.

"A bul ber chu kan chhungkaw inrelbawl dan fu tawk lo avang hi a ni ber mai. Kan fanu hian kan hnung hi rawn zui lo hram se ka duh. Kan hun kal tawh chu a nih tur ang a ni tawh a; kan hma lam hun tal hi chu uluk hram hram ang aw," a rawn ti leh sep sep a.

Ka lo fawp leh vawng vawng a. Ka duh tawp thei lo, hetiang em em hian a lo felin, a lo puitling ang tih reng ka ring pha lo.

"Duatnu, ka va han duh tak che em! I thil thlir dan reng reng hi a țha-in, a puitling khap mai a. Kei mah ber hi insiam țhat ka ngai a ni," ka ti a.

"Rin, ka nu (Zorina nu) ka ngai e. Zaninte hian a bulah awm ila chuan min hnemin, min țawngțaisak leh ngei awm sia," a ti leh a.

"Um, naktukah ka phone ang a, lo zin rawh kan ti dawn nia," ka ti a.

"Rin, ka haw miah lo che a nia aw. Mahse, ka rilru chu a na ve det," a rawn ti leh a.

"Um ka hre thiam lutuk che duatnu. Min hua-in, min thinrim khum reng mah la ka hre thiam lutuk. I insum thei lutuk hian min hnehin, min ti zak ru chem chem zawk mai," ka ti a. Ka rilru dik tak pawh a ni. Ka zak ngawih ngawih tawp mai a ni.

A tuk zingah pawh chuan ka nupui chu a ngui riai reng a. Min haw lutuk lo mah se, mi pangngai tan chuan hlim taka han nuih awr awrna hun ni mawlh hek lo le! Ka nu chu ka phone-sak ta a, ka han sawi chawpchilh bawk nen, a hna a lo laklawh deuh avang chuan a tuk lama rawn chhuk chu a tum ta a. Ka nu nen chuan han titi dun se, a rilru natna leh min ngei rukna zawng zawng chu zep awm miah loin ka nu bulah chuan han inhrithla se, a rilru tawt lutuk pawh a zia phah ve deuh mahna.

Zing chaw kan ei kham chuan chhuak peih lo viau mah ila, school kal ka ngai si, phur lo zet chuan ka chhuak ta hna hna a. School-ah pawh chuan ka mood a fu thei lo, naupang pawh ka vin phah nasa hle. Chawhnu lamah chuan ka lu nat chhuanlamin ka haw hma ta ringawt a.

In ka va thleng chu a lo reh țhiap mai a. Ngawi reng chuan kan mut pindan lam chu ka pan ta a. Kawngka ka hawng dawn chiah tih chuan, țap, insut hlep hlep ri ka hre ta a. Ka lut mai ngam ta lo a, kawngka bulah chuan ka ding reng a. Ka nupui duh tak chu a insut ri hlep hlep reng a. Ka khawngaihin, ka va han inhaw tak.

"Lalpa, engati nge harsatna hlir hi ka chungah a lo thlen bik le? Ka sual lutuk vang kha a ni ti raw? Ka lo tenawmin, mipa chi hrang hrang, sum duh vangin ka lo kawp tawh țhin a. Chu mai ni loin, ka hmeichhiatpui ngei pawh ka lo kawp țhin. Tuna ka pasal sawn thlak hi thinrim ve ngawt ngam tur pawh ka ni lo. Kei a hmeichhia zawk pawh kha ka lo tenawm țhin em asin. Mahse, Lalpa, ka rilru a na ve tho bawk si. Ka thik ve ngawih ngawih bawk si. Lalpa, ka sual tih ka hria; mahse, mi sualte Pathian i ni a, nangmah chiah ka BEISEINA awm chhun i ni ta. Lalpa khawngaih takin ka dil a che," tiin ka nupui chu țap chungin, a thiam ang tawk chuan a lo țawngțai ve a nih chu.

Aw! Mipa chu ka inti ve sia maw! Ka va laktlak loh tak em aw! Ka nupui chuan a lu, kei hi zah takin min en a, kei erawh chuan ka lu Krista chu ka lo zah ve der si lo. Ka mit tui a rawn tla ve ta zawih zawih mai. Heti khawp hian a ni maw ka nupui rilru ka lo tih nat ni. A țawngțai zo chu a rawn chhuak a, kawngka bula mit tui tla phunga ka lo țhu a hmuh chuan a phu deuh zawk a.

"Duati, i tan hian eng mah ka ni hlawl lo. Min kalsan la, mipa țha tak va zawng rawh," ka lo ti a.

A rawn kun hniam a, min rawn kuah chung chuan a țap țha leh a. "Rin, ka tih palh lutuk. Ka tan hian i țha tawk a nia aw. Piang nawn leh dawn pawh ni ila, nangmah tho hi neih leh ka duh asin," a ti a, a țap pur a. Kei lah ka lo țap pur bawk a. Pa ka tih loh dan deuhin ka awm a nih chu. Mahse, ka dinhmunin a zir lo bawk a, pa leh pa loh pawh ka sawi thei lo a ni ber mai.

Ka insum theih lohna chuan chhungkua, hlim lo takin min awmtir ta a ni ber mai. Rei lote hlimna ka chen khan, hun rei zawk min ti hlim ta lo chu a nih ber hi. Ka inchhir a, inchhir a sawt tawh si lo.

Ka nupui chuan hlim hmel tak pu lui chung chuan min tih hlim chu a la tum ve zawk hram hram a. Ka va han tluk lo han han tak. Eng vang maha chan chu ka phal thlawt lo.

"Min en reng zel suh," a rawn tih chuan ka ngaihtuahna ațang chuan ka harh zawk a, ka nui chhuak huk mai. Ka nui ve leh ta. Ka nui hmel a hmuh chuan a lawmin, a hmel chu a rawn eng set set a.

"Awi! I nui thei tawh. Ka lawm zia hi," a ti ta chul mai a.

*******************

Zorinzuali pov

Zanriah kan ei kham chu ka inbual a. Bawihtei țap vak vak ri avang chuan ka hmanhmawh khawp mai a. Ka chhuak chiah chu hmeichhe pakhat a lo awm avang chuan ka ding deuh chawih a. Hmana kan pa in luaha lo awm kha a niin ka hre deuh a. Ka ngaih chu a țha chiah lo na-in, a enga mah hmaa lo ngaih țhat loh ve ringawt chu ka ti deuh bawk si. Amaherawhchu, ka pasal hmela hlauhthawnna hmel avang chuan thil dik lo eng emaw chu a awm ang tih chu ka ring deuh tho a. Inti huaisen luiin, ka va țawng lui vel a.

Hmeichhe lo awm nu-in, "Nau ka pai," a ti ta mai. Ka mit deuh sulhin ka hria. Ka pasal hmel chu ka va en vat a, chu nu a ngei hmel leh inthiam lo hmel ka hmuh chuan ka khawngaih letling hle. Rilru na-in, thinrim rilru ve viau mah ila, ka inthup hram hram a. Engtin emaw deuha ka lo tih duh loh avangte pawh a ni ang, chu hmeichhia pawh chuan min chhuahsan ve leh ta mai a. A chhuah hnu chuan kan room lamah ka lut a, khumah naute chu mutpuiin, ka țap ru fap fap a. Ka pasal chu rawn lutin, min rawn kuah a, ngaihdam min dil mawlh mawlh a.

Huat viau ka tum nen, a hmel ka en a, a inthiam lo tak zet hmel ka hmuh chuan ka khawngaih tlat a, ka haw thei thlawt lo. Kan titi dun ta char char a.

Keima nu tak chuan min hur bosan tawh a, ka pasal nu tal chu ka bulah awm se, han inhrikthlak bawrh bawrh chu ka chak hle. Zorina chuan ka nu chu a chah ta a.

Chhuna kan nufa chauh a kan awm chu ka rilru a na thar leh a. Mahni inkhawngaihna bawk chu a lo lut leh a. Nau ka ti mu a, khumah chuan ka inngaihtuah lungpuam a, ka mit tui a tla pur reng a. Kan roomah țap pur chungin ka țawngțai ve ngei a. Ka țawngțai zo ka chhuak chu kan room kawngka bula Zorina lo țhu ka hmuh chuan ka phu nasa hle. A lo la haw lo turah ka ngai a, ka țawngțai thu chham zawng zawng kha a lo hre vek a nih hmel. A țap ve ta tlawk tlawk mai. A inthlahruna, hreawm a tih ve tehreng nen, a hreawmna belhchhahtua ka lo țang chu ka inthiam lo hnu hnawh hle. Theihtawp chuan tih hlim ka tum ve hram hram a, ka zei lo bawk si. A tawpa tawpah zawng a nui ve ta hram a.

"Hello"
"Aw, a v lawmawm; lo thleng vat rawh," Zorina chuan a ti mawlh mawlh a.

"Zo, ka nu chu a lo chhuk mek aw," ka pasal chuan a rawn ti a; ka lo lawm hle. Keimahni tea awm chu boruak a rit ru riau a.

"A va lawmawm ve aw..! Lo thleng vat teh se," ka lo ti a.

Chawhnu lamah ka nu pawh chu a rawn thleng thla ve ta a. Bawihtei chu a pawm nghal a, a lo ngai viau tawh a ni ang.

"Kan rawn thleng har reuh lutuk a. Vawiin chu kan tluang vak lo atin ni," ka nu chuan a ti nghal bawrh bawrh a. A inbualna turte chu ka siamsak a, inbual tur chuan a lut zui ta a.

Ka pasal school kal hlan chuan ka nu chu kan boruak tawn mek chu hrilhin ka inhrithla nasa hle. Ka duhtawka ka insawi thawl hma chu țha deuhin min ngaihthlaksak char char phawt a. Ka duhtawka ka sawi hnu chuan min hnem ta a.

Zanah chuan Zorina nen chuan min țawngțaisak ta a. An buai viau na-in, kar khat chu a cham ve ta a. Ka nu a awm chuan ngaihtuahna sawr bing vak vakte a awm lo deuh bawk a, ka zia chho ta phian a.

"Bawihi, i rilru ti hahdam hram hram rawh aw. In lamah kan buai ve bawk sia, ka han haw chho phawt ang a, a țul leh ka lo kal leh zawk ang a," ka nu chuan a ti a.

"Nia, min ngaihtuah suh. Ka zia tawh lutuk a nia. In buai a zia veleh in vaiin rawn zinthla leh rawh u," ka lo ti ve a. A tukah chuan min haw chhohsan leh ta a. Kan nupa inkar pawh a zia chho ve zel a. Remruati pawh chuan sawn man chu a rawn la dil ta chuang hlei lo a.

"Lalremruati chuan sawn man a va rawn țhing lo che ve a," fiamthu deuh reuh chuan ka ti a.

"Sawi lo mai teh. A hming i sawi ringawt pawh khan ka luak a ti chhuak," ka pasal chuan a lo ti hluk a. Kei chu ka lo nui uar uar a. Thik enah pawh ka en ta lo, kan nuihpui vel ta mai mai a. Kan nupaa fiamthu thawh a kan nuih nghek nghek lai chuan kawngka a rawn ri leh ta karh karh a. Kawngka lam melh reng chung chuan, "Lo lut rawh u," ka ti a. Kan kawngkaah chuan ka pa chu a lo ding ta heu mai a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)