MR. CAPTAIN S2 : Hello! Stranger Ch #2 by Floria Laldansangi

Episode kal lai dah luhna

Moderator: writers

Floria
Posts: 522
Joined: August 28th, 2017, 12:07 pm

MR. CAPTAIN S2 : Hello! Stranger Ch #2 by Floria Laldansangi

Unread post by Floria » August 3rd, 2021, 8:01 pm

MR. CAPTAIN S2
<Hello! Stranger>
{My Treasure S3}

[The Unfinished Story]


Chapter < 2 >

{Sorry Mom}


EVALYN...POV

<><><><>

"Damian kawngkhar hi hawng rawh," A thinrim changa a tihdan ngaitê bawkin a room-ah a in kalh khum leh hmiah tawh, thla 3-hnu ah kum 5 kan tling ve dâwn chauh a, kan heti deuh ngar ngar mai chu a ni sia


"Malsawmhlu, thu ngai sawi nawn ka duh lo tih i hriat kha, kawngkhar hi hawng rawh. Inbiak kan ngai," Ka chum leh dat dat


Thawm ala nei lo hrim hrim. Luhlul leh mahni thu duh lutuk kawnga a Pa a chhun leiluau lutuk hi chu ka ngei lek lek ṭhin! A hmel leh mitmeng ah a chhun mah tih nak alai hian!

"Nangpawh insûm ve tur che a nia. I fapa lunglen rapthlak tehlul nen," Mimii'n phone aṭangin a rawn ti niah niah

"It doesn't surprise me at all, she has always been very sensitive about her ex," Henry-an a rawn ti ve nghat nghat bawk a, ka thaw hak. Bryan-a hming lam rik tawhna ah hi chuan ni e, duh aiin ka sensitive ṭhin mah mah rêng a ni


"Hna ka thawk dâwn, ka out a nia," Henry-an a tih rualin, "i fapa kha ti lungawi phawt teh, naktukah kan inbe dâwn nia, keipawh hei ka fanu a ṭap," Tih leh ka chhanna pawh nghak lo chuan an out dun nghal a, ka phone en in, ka fapa room kawngkhar bawk chu ka en leh


"Vawi...vawi 5 thleng chiah ka chhiar ang. You better to open your door before i get angry. If you still refuse to open up, you know what I'll do right Damian?" Ka chum zui leh dat dat


"1.....2...3...4...5..... Ka...." Ka tih laiin kawngkhar a in unlock ri khap, ka thaw zui hap bawk


Kawngkhar chu dimtê in ka hawng a, min hmuh rualin bang lamah inherin, blanket-in a inkhuhbet zui nghal zat, ka nui ru sak


"Ka tihpalh, vin lo tur che kha ka nia; Mahse, nangpawh i thutiam i hlen bik lova," A khum tlângah ṭhu thla pah chuan blanket chu ka pawt dat dat, "Ummmm!" Ti vak chungin a pawt bet ve ngar


"Damian....! Min ngaidam dâwn lo tihna em ni?" Ka en ran


Muangchangin blanket chu a dahthla a, ka lam rawn hawiin, a rawn inher riai riai bawk. Nuisang a en chungin, "kan inbe thei tawh angem?" Ka mitah tak min en kalhin, ka thinrim tawh lo a ni tih a hmuh hnu ah rawn inbeng kângin, "Why i don't have Dad?" A zawhna tehtlawng chuan min ṭhawng lutuk a ka meng kawk, "Maw?" Ka ti chhuak haw ringawt, ka hamhaih lutuk chu sawi mai tur pawh ka hre lo


"Joshua, Maxwell, Samantha leh midang zawng zawng pawhin Daddy annei a, eng nga tinge ka neih ve loh. Damian-a pawhin Daddy a duh ve a. Camping kal ve ka duh a, ka Daddy nen 100m race pawh tih ve ka duh a," Ka fapa mittui tla zawih zawih a, chhuak vàn kâi a ṭap chu mangang lutukin ka en ngawih ngawih



Ka biang a rawn lum thla pup, "Damian....!" Ka hrawkna lutuk chuan ka aw chhuak a ti thâwp sât


Mittui nen min rawn en in, in hnit hlap hlap chung chuan, "Mom, Daddy ka duh ve, Maxwell angin a koki ah chûan ve ka duh tawh," Chutiang taka Damian-a lungchhe hmel chu ka la hmu ngai lo, ka hmu ngai lo takzet!


Sawi tur ka hre lova, ka fapa mit a natna leh Pa a mamawhna chuan ka lung hi kut lâwnga zentu awm ang maiin ana thîp ngut ngut bawk



Ka fapa chu ka lamah pawt hnaiin, nghet takin ka kuahbet a, ka duh miah lohvin ka mittui a rawn luang zawih zawih bawk


"Ka tihpalh, ka tihpalh Bawihte," A bak sawi theih reng reng ka nei lo. Puitling thiltihsual, ka thiltihsual, ka luhlul rahah ka fapa hian a seng a ni


Ka hmangaihna hmanga Bryan-a min huatna ka hneh theih kha ring tlat lo ni ila, vawiin ni hian ka fapa mittui hi a tla lek lo tur. He khawvelah hian pawisawilo ka tihnat tur an awm lek lo tûr...!



A vawikhatnan ka inchhir a, a vawikhatnan teh meuh meuh ka fapa ka hring hi ka inchhir a ni. Mahse, ka hmangaih luat vang zawkin a ni thung, he thinlung, Nu thinlung hi a kehsawm a, ka fapa mit aṭanga natna leh beiseina ka hmuh hian, ka nunhlui avanga inchhirna leh Damian-a laka ka inthiam lohna in khuarkhurum tawp chin nei lo ah min pawt lut vawng vawng a ni ber!


"Mom, are you crying too?" A rawn tih thâm ṭiak takah chuan rang lutuka ka mittui hru hulin, chil ka lem khalh a.



Nui chhuak hak a, ka kuahna aṭanga nam sawn deuhin, "teuh nang," Ka ti tak nâ in, ka fapa hi ka bum dâwn lo nasa lutuk tlat. Mit hnawm chap chung a min rawn en chho ve kiau chung chuan, a kut tereuhte mai, tinrêng damdawi a keng tel emaw tih tur khawpa thiltithei chuan, ka bianga mittui a rawn hru dam vei dap a


"Sorry Mom, ka ti ṭap tawh lo ang che. Ṭap tawh suh Mummy," Ṭah aw ṭiaua a tih chuan ka insum zo lo, ka mittui bawk a rawn luang zui leh pup.

Ṭah nui hak pahin, "ka ṭap tawh hleinem," Tih leh a sam tuai sak mai ka tum chu a lo thle sawn vat. Ka ṭah nuih zui ar ar, a sam khawih a duh loh zia ka hre chhuak thut!


"Ok, tunah chuan kan in ngaidam tawn tawh bawk a. Thutiam kha ila hria em?" Abu nghat, "kum 15 ka tlin hunah engkim min hrilh ang, chumi hma chu zawhna zawhloh tur," Kan thutiam fiah zeta a sawi chuan ka lo bu nghat nghat. Kan nufa chuan mit la hnawm chap chung chuan kan infiam zui a


"Thildang sawipui leh tur che ka nei a," A nui ar ar lai chu tawpin min rawn en kiau, thaw ka'n la hmasa te te a


"Thursday hian Taiwan ka kal a ngai dâwn a, online class i lak leh a ngaih hmel," Ka tih chuan a ner zui nang nang


"Mahse, Tuesday ah Samantha birthday kan hmang dâwn sia," A tih chuan nuiin, "nia, kan läwm hman dawn alawm," Tlawn pah si a ka tih chuan inngaihtuah deuh vang vangin, "Ok. Mahse, Joshua ka hrilh phawt ang," Tih leh phone zawn a tum chu, "a tlai tawh, naktukah pawh i hrilh thei alawm, i hmaibal te kha phihfai la, mu tawh ang," Ka tih chuan min en chungin a bu ve ta nghat nghat a, ka nuih sen sen!

.
.
.
.

Kawngkhar ri ni âwm tak, ri deuh dawt dawt ka hriat rualin ka ṭhu chhuak hlawl, Damian-a ka dap nghal rak rak, ka sirah a lo thaw ri sêk sêk


Khum lu bula light chu hmet êng in, Damian-a tihharh hlau tak si chuan ka tho a


Ka kawr chung ban pah chuan sana ka en zauh, zinglam dar 4 rik dawnah tunge maw ni le?


"Eva, keimah...." Room aṭanga ka chhuah rualin Tluanga aw ka hriat chuan ka pan hnai vat


Kawngkhar ka hawn rualin zu rim a rawn nam huk, min rawn bawh nghal rawk rawk bawk


Ka phu nasa lutuk leh a taksa rihna in min delh avangin hnunglamah ka tawlh nghal rawk rawk


Nghet taka min kuahbet chuan, "reilote ti hian awm lawk ang," A thaw chhuak zui ham ham

Mahse, min kuahdan erawhka duh miah loh dan a ni!


"Tluanga awmsawn teh," Min kuah nghet tulh tulh, "Tluanga..." Ka ti leh ṭhak

Thaw ri hrawih a inla hrangin, mit sen râm mai, rui tih hriat taka min thlek vang vangin, "Eva..!" A ti sup


Engthu nge a ngaihtuah a, sawi atum tih ka hriat chian êm avangin tawlhsawn vatin, "a tlai tawh Tluanga, naktuk lamah kan inbe dâwn nia. Hotel-ah i let theih loh chuan room ah sawn i mu dawn nia," Tih leh kawngkhar lock tumin ka pensawn a



Thaw ri hrawihin, ka hnunglam aṭangin min rawn kuah zui thut, ka rin loh dan lutuka a chet avangin ka rak ṭhat bawk


"Bengchheng suh, Damian-a a harh ang," A la ti zawk zamah a


"Min thlah rawh," Ka tal ve phat phat tak nâ in, min kuahna a ti nghet tulh tulh mai si a, tâl chhuah ngaihna a awm lo hrim hrim


"Lalnuntluang, min thlah rang rawh," Ka ti leh ṭhak.

"Vawikhat... Vawikhat chauh ka thusawi hi ngaithla rawh. I unaupa, i nuṭa neih chhun ka nih reng tur thu i sawi a; Mahse, vawikhat pawh i eng nge nih ka duh min zawt ngai miah lo," A ti ban chap chap


A ruih êm avangin a lei a seh chil deuh nawk nawk a, hriat a har lek lek zawk


Min kuahna phelhin, alam hawia min kuai her nawk chuan, kat deuh nawk nawk chung leh bu deuh lap lap chunga min en in, "Evalyn, i unaupa nih ka duh ngai lo tih i hria a ni lo'm ni? Nge ni a, i hre duh lo zawk?"


Min vawnna phelhsak ka tumve ṭauh ṭauh tak nâ in min hmer nghet mah mah. Ka thaw chhuak ta hak, a mit a en chho kalhin, "Ka nuṭa i ni a, i ni reng bawk ang ka ti a ni lo'm ni? In unau na bâk engthil nge ka lak aṭang hian i beisei chuan ni?" Ka tih zawh rualin alamah min pawt hnai hrut a


"I thinlung, i thinlung... Ni lo, nangmah, nangmah hi, tunge i hmangaih tih leh tunge i thinlungah awm tih ka pawi sa lo, Eva hun minpe ve rawh, ka tiam angche, ka tina ve ngailo angche tih leh Damian-a tán Pa ṭhaber ka ni ang. Ka thisen angin ka hmangaih ang. Ka thisen ai pawhin ka hmangaih ang tih ka tiam angche," A ngenin min ngen a ni tawh zawk


Mit khap fak fakin ka en chho haw ringawt. Sawitur ber pawh minti hre lo

"Eng emaw tal sawi teh Eva," Ka ngawih tlat avangin a rawn ti leh a

Ka dar a vawnna kut chu muangchangin ka dahsawn sak, min thlah ve mai bawk


"Ka chhanna tur che chu i hresa alawm Tluanga, engtikah mah athleng ngai dâwn lo," Dam dap leh hrethiam ngeise tih beisei zet chuan ka chhang a



A bek a pawng deuh nghal ṭalh ṭalh chu ka hmu ru reng bawk. Ni e, tlawm lakna tham a nia läwm!


Mahse, eng ang taka nasa in nge Lalrinsanga ka hmangaih tih chu hmutu leh hre ber tu a ni hial angchu! Ti chung hian engvanga ka lakah hian beisei la nei reng fo nge a nih ka hrethiam lo


Damian-a ka pai a ni tih a hriat hnu leh midang pawhin an hriat hnu ah, ka tih tlak loh avanga â nih ka hlawh nasat zia te, vawikhat chauh sawi loh 1sec pawh titla turin ka ngaihtuah buai chhin lo


A chhan chu ka fapa hi kei leh Bryan-a fa a ni miau a, sàwn mahnise ka mipa hmangaih lak aṭanga ka dawn. Pathian minpek a ni tih ah khan ka chiang êm a sin!


Bryan-a ka kalsan erawh ka huat vang emaw ka hmangaih loh vang a ni lova. Kha mipa thinlungah khan engtikah mah hmun ka chang ngai dâwn lo a ni tih leh, tu emaw hlimthla nih kha ka duh tawh loh vanga kalbosan ka ni tih kei leh Tluanga, midang pawhin an hria alawm......


Nâ leh beidawng tih hriat lutuk, beidawng nih duh si lo mitmeng a min en na chu en lehtin, "zawhna, a chhanna i hriat sa chu zawt lo tur ini. Beidawnna leh natna bak dawng ngai lo ang a, natna belhchhah thu anni fo thin," A mita natna chu ka hrethiam a mah se chu ringawt chuan a beidawn tir phah chuan siloh avangin, Tony ang maia chetzia leh mitmeng a tih beidawn chi a ni lo tih leh na taka ka siam a ngai a ni tih ka hrethiam ta zawk a



"Mu tawh rawh," Tih leh inherin kawngkhar kalhin kan room lam ka pan zui vat


Room kawngkhar kalh thlap mah ila, a rui rilru kalsualin kawngkhar, tharum hmanga a rawn hawn mai ka hlauh luatah chhin khat pawh ka chhing ta lo. Zinglam dar 6 pelh hretah kawngkhar ri ka hria a, a chhuak ri ka hriat hnu ah room aṭangin ka chhuak ve chiah bawk!


<><><><>


BRYAN...POV

{Hello! Stranger}

~Taiwan~


"Ni 3 liamta khan Melbourne-ah Tluanga hmuh a ni a, zinglam hma takah apartment pakhat a tlawh thu hriat a ni bawk. Mahse, tumahin hmeichhia nen an hmu dun lo," Marco thusawi chu mipui zi hut hut karah chuan ka ngaithla


"Ka hrethiam e, zui zel rawh se." Min chhan hma in Phone off in ka Nu te dinna lam chu ka pan hnai a


"Haw teh ang u, Gay parade tih ang reng, Kristian kan nih hi," Ka Pa chuan a ti leh hluk


"A nuam ve mai mai alawm, ei tur atam êm hi, Taiwan awmlai a LGBTQ parade hmuh ve te chu," Alice-in nui ar ar chungin alo ti vat. Hotel kan chhuahsan aṭangin kan kalna hmun hi ala sawisel char char, ka Nu erawhin nuam a ti nge engmah a sawi lem lo


"Mipa leh mipa te an infawp a'h," Ka Pa bawk a ni


"I phun peih mange aw! I duh leh nangmahin Hotel-ah chuan let la ti nia," Ka nu in a rawn ti hlak



"Ka tel lovin khawnge i kal ang?"


"I fate nen hian kan lêng angchu Vacation hmang ka a nih hi Lion," A nui ver ver, ka Pa erawh a lo rum nghut thung


"Min zui ve zela hna thawh tur inei a ni lo'm ni?" Ka Nu en chungin, "ka cancel a nih kha," Ka ti sup, ka hmaa juice ka nau in a rawn lek chu ka ban zat bawk a

.
.
.

"Excuse me....Excuse me... Hello... Hello! stranger," Tih paha ka kekawr pawt dat dat tu chu ka en chhuk a

Ka sunglass la thla meuhin ka en zui, "khawngaihin i ke ila sawn thei angem? Ka coin i rap," American aw phawi taka arawn tih fiah leh kalh kalh chuan ṭhut hniam ka tum

A kut nen meuh, "Stop. I ṭhut kher angai lo, i ke hi la sawn mai rawh," A ti fiah leh kalh a, ka nui chhuak ta huk mai. Kum 6 hnuah ka thu leh tihluihna tel lova ka nuih vawikhatna a ni

"Awii! Bryan te tetlai a ang lutuk. Lion han enteh mah he nau hi," Ka nu chuan a rawn ti hluai

Keipawhin ka naupanlai thlalak ka en angah ka in ngai hial

Ka ke chu ka khai a, 50cent ka rahbeh chu chhara tuai faiin, "ka lawm e," Tih leh inherin a tlan sawn nal nal, ka nui leh suk

"I fapa ni âwm a nih kha le," Ka Pa pawh chuan a rawn ti sup a, ka lo thaw halh thung. Ni e, Evalyn-i kha nei ni ila chuan kan fa hmasaber pawh khatiang rual kha a ni ve tawh mai thei asin!

Kum 6. Kum 6 lai a ni ta, Evalyn-i ka zawn erawh ka la ṭhulh phah chuang law. Ka zawng hmù ngei bawk dâwn tih ka hria. Khawvel hi hrut chhuah vek ngai pawh nise, ka hrut chhuak mai ang!


"A nu leh pa anṭhat hmel êm a nih saw," Ka nu hawi na lam chu ka en a


"Evalyn..." Evalyn-i a ni, 2sec vel chu chetna chang ka hre lo, a sam dum ngil ṭha tak mai, a dar thleng leka sei chuan a landan ti danglam mah se kha ka hmeichhe zawn ngei kha a ni

"Evalyn..." Ti leh supin umzui nghla mai ka tum chu Alice-in minlo pawt bet vat


"Engthil nge itih?" Ka ti hrawk


Ka Nu leh Pa pawhin min en hau, "helai hi Gay parade a nih hi. Eng nge a rawn tih ang?" Alice-in a ti hlar


"Hreptak a," Ti hlukin min vawnna chu ka thing thla a, ka hawi leh erawhin hmuh tur a awm tawh lo thung


Ka chhip sam ka tuai puat, ânchhia ka phuh chhuak zui hluk bawk a


Ka phone phawrh rawk rawkin Marco ka call zui zat


"Australia-ah ni lovin, hetah Taiwan-ah a ni an awm ni, Taiwan-ah a zawng tur tir angche," Phone a pickup ruala tih leh ka off lehnghal


Ka chhungte mak ti hmel chu hmu mahnila, Evalyn-i kal liam chiahna khan ka lu um aluh hneh mah mah

"Evalyn-i a ni tih i chiang amaw?" Ka Pa in a rawn ti dut


Ka beng awmna ka chian tlukin ka chiang, "i tisual leh a ni ang. Bakah, kum 6 lai a liam tawh, alo ni a nih pawhin, i hmuh ang khan pasal fanau nei anih kha, engtia tih nge i tum. A kalsan tawh che, amah vanga i tawrhna zawng zawngte kha i hre lo emaw ni? I thi lek lek a nih kha," Alice-in a ti zui hlak hlak


"Mambawih," Ka nu in a lo ti vat. Engthil nge Evalyn-i chungah ka tih tih leh Tetei te nena kan inzawmna a hriat loh avangin, ka accident tawhah khan Evalyn-i a puh tlu hmia a, a haw zui ta em em reng


"Hotel-ah let hmasa rawh u," Tih leh pensawn ka rual, "kaltir rawh," Ka Nu in a ti ri chu ka hre hman hrâm


He hmunah hian a awm tih ka chiang, rei a ni lova, thui pawh an kal hman tawp lovang....!

Evalyn min lo nghak rawh, ka zawng hmu ngei angche, "pasal fanau maw" ka ngaihtuahna ringawt pawhin minti thinrim, eng ang nun nge i hman ka mit ngeiin ka hmu dâwn alawm!



<>~><><>

Ads click kha chhiartu lam tih ve tur a nih kha aw, in lo click vek dawn nia



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)