LUNA ILENA CHAPTER - 5

Episode kal lai dah luhna

Moderator: writers

Lalnunmawii manuntei
Posts: 109
Joined: November 26th, 2020, 10:46 pm

LUNA ILENA CHAPTER - 5

Unread post by Lalnunmawii manuntei » August 3rd, 2021, 8:12 pm

LUNA ILENA

BY

Lalnunmawii Manuntei


Kan inbiakna an ngaithla zo chu kei ai mahin an hrilh hai zawk emaw tih tur an ni.



"Kan mihring pa mai mai chu, ka call dawn, engtin nge a ngam zawk a, ka hnena a thusawi zawng zawng kha a hre tawh lo em ni?" A thinrim hle a ni tih a hmel aṭang pawn a hriat, ka rilru na viau mahse buai nuai a awm chu ka duh hauh lo.



A sawi ang tak tak chuan a call ta ngei a , "a pic thei miah lo, a lo hre lawk a ni ngei ang, a pawi lo e mai, number dang aṭang ka call leh tho ang" dan pawh tum mahila a sawt lo, ati ngei dawn tlat a.



Mate-i chuan "ka number hi a nei lo ang, ka sim thar a nia, ka whatsaap na chu hran daih ni tho a ,a hre lo tawp ang" a tih chuan beisei na nen kan nghak ran a, a pic thei chuang lo, a tawp nan tiin Zualbawihi chuan ka phone aṭang a call leh ngat a , awmzia a awm lo, "min be peih lo hle a nih dawn hi, a tan chuan engmah lo mai ka ni" ka ngaihtuahna chu sawi chhuah ka chak, ka nat em vangin ka sawi chhuak thei lo mai pawh a.



Ka ṭhiante pahnih hi awm lo se chuan engtin nge ka tuar theih ang, kei hmeichhe derdep tak hian engtin nge ka hmachhawn theih ang.



Ka inṭap muhil ani ngei ang , zing khawvar dawnah chuan ka ṭhangharh a, ka ṭap thei tawh lo, ka na a reh tihna chu a ni chuang lo, na leh tur chuang awm loin ka na a, nat dan pawh ka thiam hek lo, he ka na hi amah ngei pawn an ti dam thei tawh ngai lo ang.



Ka room varenda ah chuan ka chhuak a , ka pangpar te chuan ka na min hriatpui lohin mawi takin an par vul chuk a, ni chhuak in a chhun chuan a mawi leh zual , nidang chu ni se ka hlim hle ang, tun ṭum chu a dana dang em a ni.



Khuahmun lo a ngaihzawng neih hi bansan hlauh tur a ni, kan bul hnai a an awm reng te a nih loh chuan rin mai mai loh tur , kan rinawm angin an lo rinawm ve lo a nih chuan kan nat tamna mai mai a ni.



"Vawiin chu class kal lo leh phawt mai ang, vawiin nileng zankhuain ka sun a nga , ka dam thei ngang lo a nih leh engtin nge ka awm zel ang tih chu hunin hril mai teh se" ka rilru hi a buai nuai mai, leh lama mi lah chuan " midang ta ni tur chuan ka phal hlawl lo, ka tan a rinawm turin a intiam a , ka tan a ni lawm ni ṭhahnem ngai takin lehkha pawh a zir, a theih loh , engtin nge ka enliam mai theih ang, dam rengin ka thi a ni ringawt a lawm" ka ngaihtuahna hman dan tur pawh ka thiam lo.




Ka mittui lo tla chu duh lo viau mahila ka dang thei si lo, ka hmangaihin min tina tih hi pawm thiam a har ani, huat ka tum viau na in ka haw thei lo,tu nge mahni hmangaih ber te haw thei tehreng ang, huat a hnek in hmangaihna a zual zel si.



"Bawihte i tho tawh em? Chaw ei kan peih tawh a nia, tlem tal lo ei ta che" a la hma viau emaw ka tia ka rilru ka kawm chhungin chaw ei a lo hun der tawh.




Ka ngaihtuahna te chu a tawi tup , engkim hi ka mumang ang vekin ka hria, ka nu a lo lut thut, ka room ka kalh lo tih ka hrechhuak chiah, i ei chak lo em ni? Ka chang mai lo, "Nu ti nge in rilru ti hah tur ringawt hian ka lo pian a? Piang lo ta ila in rilru a hahdam deuh tur , fanu lak tlak loh tak ka ni, min ngaidam ru aw" ka ngaihtuahna mai mai emaw ka tih kha ka nu bulah ka sawi chhuak vek, ka â tawh a ni ngei ang.




"I piang lo ang tih mawlh hi sin kan hlauh, ka fanu i ni hi ka chhuang lutuk che, fanu tha tak i ni a lawm, ngaihdam ngai chu i nu leh pa te hi kan ni, engmah kan hriatpui lo che a" ka nu thusawi chuan min ti hahdam huai thei.




"Nu ka zak e mai, nakinah apa office kal hlanah ka ei mai ang, ka ei tak tak ang , tunah chuan a la ṭam lo a" ka theih tawp chhuahin ka tlawn ve a, a lo pawm ve mai bawk, ei tak tak tumna chu ka nei lo
ka nu lawmah ka ti mai zawk.



Mahni chauh a ka awm takah chuan ka ngaihtuahna aṭanga lak kian ka duh , ka ngaihtuah loh theih si loh , a nunnemna phen a hling zum tak in a min chhunna bawk kha ka hrechhuak leh ṭhin.



A tan ka tling lo a , duh dang a nei te a nih chuan ṭha takin min hrilh thei reng, ti nge a bialnu hnen aṭang ka hriat, ka ngaihtuahna ka hman nasat lutuk vang nge ka thluak a buaiin , a puak keh dawnin ka hria.



Ngaihtuahna ṭha lo tak tak min put tir a, zah luatah manni nunna hial lak ka duh, ngaihtuahna a fim loh lai chuan kan ngam loh pawh kan ti thei zel.



Ka message tone rik rual chuan ka mittui ka hru hul hak a, " i va reh ve, min ngai lo riau mai, ka lo zin dawn a nia, thlalehah min lo hmuak a ngem" he thu a ziah lai hian a nui ngei ang, ka hun tawn a hre ve der si lo a, ka chhan hma hauh chuan phone call a lo lut nghal zat, ka ṭawng hma chuan" induhnu, min hre tawh lo emni, i seen ringawt a" ka seen chiah emaw ka tia, ka â zo ṭep tawh a nih dawn hi, ka thil tih pawh la hre mumal lo chu nia..



"In dam ṭha maw? In ngaihawm hle mai".
"Aw dam e, nangni in dam zawk maw?" Ka aw aṭang chuan ka ṭap tih a hrethei ngei ang.



"Ti nge i aw chu, i dam lo mi nge i ṭap zawk" ka mittui a luang leh ta nge nge, ka thlavang hauhtu leh min hmangaihtu te bulah chuan ka mittui hi a tla hma bik riau.




" Ka hmangaih berin min bum,ka â thei tak ngial dawn, dam pawh ka thlahlel lo, ka thinlung hi a na mek a ni" mittui hru zeuh pah chuan ka ti a, nuih luih tum chu a harsa em a ni.




"Ka ṭhian thil pakhat ka hrilh ang che, bum i lo tawk a nih chuan lo beidawng suh aw, ti khan lo tuar hram hram rawh, i theih ang ang khan lo hmachhawn la, i beih chiam pawh a ngai chuang lo a nia, ana ang tih chu ka hria , i na khawp ang ka hrethiam lutuk che nia, i ṭah a chhuah chuan insum hauh lo in ṭap rawh amaherawh chu i nunna atan a thil pawi thei chu ti miah suh ang che, a chhan chu maw nangmah hmangaih lo a bum a rilruna a siamtu che pawh heti tak a ihmangaih thei nih ngai chuan nangmah hmangaih em em tu che , khua nu in lo ruat sak che chu engtiang takin nge i hmangaih ang tih ngaihtuah zawk rawh, bum tu che chu engtikah emaw bumin a la awm ve ngei ang, i tuar chhuak thei tih ka hria a nia" a thu sawi chu dik ti viau mah ila ka chhang thei lo.




Ka hrawk leh ka hnar te chu a thip hlur tawh, darthlalangah in en ilang chuan ka chhe ngawt ang, ṭah lai hian kan hmelchhe duh an tih hi ka ring ta chiah.




"Ka lo phei ṭep a nia , min lo nghak hram rawh aw, i nunna hlut zia kha sum tam takin a lei thei lo, mipa khat vanga i nun i ti chhe vek a nih chuan a hmusit zual ngawt ang che, i na a nih pawn a bulah chuan na lo ang takin awm rawh aw" thei leh thei lo chuan "umm ka lo tum ang" tiang em em a ṭhian fel hi ka lo nei reng a , inkawm tam em em lo mah ila ka tan chuan a hlu lutuk.




Kan inbe rei lo, mahse a thusawi khan thil tam tak min ngaihtuah tir daih thung, kei aiin khanu kha a thlang a ni mai a , a aia ṭha zawnna hun ka nei tihna a ni mai.




Ka pum a ri raih raih mai, ka ril a ṭam a ni ngei ang mahse, ka ei chak lo, ka chak lo tak zet, a ri nasa ve bawk nen ei tur chuan chohka ka pan ding nghal, ka hawi kual a tumah an awm lo bawk nen ka dap ri rak rak a.



Chaw pangngai ka ei peih loh vnngin ka ngainat ber Spicy noodle ka siam ta zawk a , rilru nat laiin thak ṭhakin ei ila ni mai tiin hmarcha ka pawlh tlawr .




Ka duh aiin ka ei thak tih hre mah ila ka ei lui ngar ngar, a sa bawk si chu ka si hluam hluam , " kha ti vak vak in thak tawh suh, i pum a na mai a nga sin, paih rawh, a dang ka lo siam ang che" min pawh sawn sak hmak, fridge a tui vawt chu ka in pawp pawp, a thak a reh thei chuang miah lo.




Ka rilru na chu chutimai in a reh bik lo, ka thiante hi an awm lo ang tih hi ka hlau ṭhin, tlai ban rualin an lo peng kawi mahse an pahnih chauhin an ni lo, Sir Samuela pawh a tel ve.




Kan chhungkaw Âka hmui ber ka nu chuan a lo chhawn vat a , thingpui te a lum sak a, ka zak lutuk, ka ṭhiante ve thung chu an hlim em em a, an star ve bawk a ni.




Ka nu , nu a zawnga fing ber chuan tih tur nei anga insawi in an room lam min pan san daih.



Kan in chhung boruak chu duh aiin a rit ka ti, ka hma a mi hi awm lo se chuan a zâng hawk ngei ang.





"Ti nge school i lo kal loh a? I enge na a ?" Zawhna chhan harsa ka tih ber mai min zawt a , chutah min la en reng zui, "ka damlo a ni tawp mai, na lai ber sawi tur ka hre lo" a nuih a zat hmel kher mai, "naktukah chuan lo kal ngei ngei tawh ang che " a ti nghet churh , ka chhang ngam tawh lo.Vanneih thlak takin a chhuak daih zui, ka thaw huai mai.




A kal liam hnu chuan "a chhan a hre vek tawh a ni ngei ang, i enge na a tih lai khan thinlaina lo tih tur a nia" kan nui ta bawk bawk hlawm a, ka nui leh thei ringawt pawh hi a lawmawm.




"Nizana kan haw hnu khan story ka chhiar a , awii a changtupa chu a pa hluah hluah hi a ni tawp mai, chhiar ve ru, in zawngchhang ang tih ka chiang , tunah pawh a mood ah ka la cheng veng vengin ka hria" nikum ata tawh kan hrilh fin theih loh , ngaihzawng nei hman lek loin a chhiar ṭhin ," Zualbawihi leh story chu sawi zawm a inhmeh ber tawh" Matei lah chuah a lo ti a , a duh lo nasa mai.



Zanrih ei tur a min koh chuan zak engang mah ila ka chhuah ngei a ngai bawk si, hreh tak chung chuan ka kal ve hram.



"Bawihte vawiin lam enge i lo an a , i zia zel maw, i luna hi i sawi reng mai a , nakinah inentir la ṭha ang" ka pa thusawi chu mak ka ti lutuk, engmah ka sawi tawp si lo. Ka nuin ka pa hriat hlau takin min thup mawi sak a ni ngei ang.




"Ei ṭeuh rawh aw, ni hnih lek chhung pawn i tla kawk thei a lawm le" ti pah chuan hmarcha plate chu a pawt sawn daiha , "nu ka lawm e , ka hmangaih lutuk che" ka rilru chuan a ti mawlh mawlh thung.



Zanriah ei kham lunglen a lo chhuak tlat mai, nidang ah chuan kan inbia te kha a nia, in dem ngawt theih pawh a ni bik lo.



Ani vangin ṭah ka tum tawh lo mahse ka chhungrilah ka na vawng vawng tho si, theihnghilh tumna pakhat mah ka nei lo, ka thei ngai dawn lo tih ka chiang em a ni.



Karkhat a liam hnu chuan pangngai takin school ka kal leh thei tawh, ka zirlaiah ka rilru ka pe tlat, ngaihtuah loh ka duh ani, ka ngaihtuah chuan ka rilruah a thar leh a ka na mai mai zawk..



School lut thar ang maiin ka zak thar thut a , ka mize harh vang tak ṭhin kha a zawiawi ta lutuk a , ka ṭhiante pahnih hian hrehawm an tih hlau viau mah ila , ka insiam rem thiam tawh lo



"Sir Samuela subject a nia, note kha mahni in siam tur a ti sia , ka thiam ang angin ka insiam ve tawp, guide rin ve mai tur a nia, ka ngei tak tak" Matei phun hlak hlak chu nuih loh theih loh.



Inah ka awm chuan amah chauh ka ngaihtuah leh emaw a nianga tiin school ka kal ve em em kha nia, amah bawk ka hrechhuak leh tho si, ka chhungril rum vawng vawng hi tumah reng hian an hrethiam si lo, sawi chhuah chi lah ni hek lo, a rukin ka tuar tlawk tlawk .




Sir Samuela lo luh lai hre lo lek in nikum lam a ka hlimna mitthla in ka lo chhui kir vel chu niin, a lo luh aṭang keimah aṭang a mit a la sawn miah lo, min en ngun lutuk chu nuam ka ti hauh lo.



"Note chu in lo insiam ta em?" A ṭhenin an siam thu te an sawi a , a ṭhen an ngawi hmak, kei pawh ka tel ve.



"Karleh lamah sport kan nei dawn a , tunkar chauh zirna hun kan nei a , sport kan neih leh chuan examin a zui nghal mai dawn a , ṭhahnem ngai takin kan zir ṭheuh dawn nia" min en tawh lo ringawt pawh chu ka thawveng huai.



"Sir, computer class kan kal leh dawn tho em ?" Ka bula ṭhu intifel thei lutuk hi chu aw, Matei nen ṭul lo kan tih thu a rukin kan sawi a, a lo hre ve a ni chek ang chu min melh pawk a, a rukin kan nuih char char.



Class pangngai takin kan kal tawh lo, a chang chuan nuam ka tiin keima tawkah ka lo hlim ve em em ṭhin, a chang chuan nikum liam ta kha min ti hrechhuak a , ka lunghlui leng leh ṭhin.



Ka hmangaih kal liam tur hlim taka thlah liam chu thil theih loh tawp a ni, hmangaihna chu mi pahnih inkara thleng tur ni a , pathum kan awm tawh chuan a dik thei tawh ngai lo, Lal pahnih rawngaa bawl theih loh tih ang maiin duh zawk a thlan fel a ngai ta si, ui tak chung a ka thlah liam ngai ta kha ka dam e, ka na lo, ka ṭha lutuk tih chu ahar a ni.



"Eng emaw berah hian tel ve la, i duh thlang ta che, i tel ve loh chuan a nuam miah lo a nia" min sawmtu hi zahawm viau mahse ka peih ve lo, "engmah thiam ka nei ve lo, ti hian ka lo thlir mai ang" thiam ka nei lo reng bawk a , a awih ve a ni chek ang chu a kal sawn nul nul, ka lawmthu tak a ni.



Ka ṭhiante pawh nuam an tih hmel viau a ni, Zualbawihi lah chines checkers ah tel a , a ni zawng thluak ṭha tih takah pakhatna a hauh , Matei pawh 400 metre race ah pakhatan bawk a ni ve leh a , kei zawng sport hi ka tui zawng a ni ve ṭhak lo, a au phurtu a ṭan hi ka thiam ve em em a ,ka tuina ber pawh a ni .



"Ka bag hi min lo ken sak teh, khawdang hawi miah suh ang che , chuti lo zawng ka chak thei miah lo ang, i au peih lo a nih pawhin min lo ṭan em em ang che" ka bengah a ri nawn tlut tlut, kha mi ni kha herchhuak leh ta mai ang chiahin ka hria, ka maimitchhin rual chuan nikum a thil thleng ta te kha ka hmu phe ruai , in tih har tumin ka lu ka thing vak , awmzia erawh a awm tehchiam lo, ka bul vela mi kal te leh au ri te chu a inpawlh nawk nawk. Ka tha te chu a rawn khur , ka meng ngam lo , ka thluak te chu a buai nuai mai, vawilehkhatah thla neia vansang taka thlawk delh delh ang mai hian ka awm.



"Mawite , engtin nge i awm ? Lo meng teh" min sawi nawk nawk, ka hming a min koh te chuan chhan let ka duh mahse ka taksa ka ti che thei miah lo, ka hmui chet tumin ka tha tawpin ka ṭan ka la ve, awm zia a awm lo.



Min kohtu te pawh chu an ngawi ṭhap mai, ka hmangaih ka bulah a lo kal vang a ni ngei ang, " engtin nge i awm a? Keimah vang a ni em? Mi thusawi awih mai mai lo turin ka hrilh che kha, keimah ngeiin ka hrilh che em ni, heti tak hian i nat phah bawk a, i lakah hian ka lungawi lo lek lek ṭhin, ti nge min rin theih loh" a hmela inthiam lohna te chu ka hmuh hmaih lo, "tih palh , a thleng nawn tawh lo ang" ka thu hriat a dik lo tih chiang taka asawi takah chuan ka zak ngawih ngawih mahse ka lo duh hle a ni tih ka hriat phah..




Mawite Mawite tih ringawt pawhin vawi engzat nge min koh ka hre seng lo, ka bula ṭhu chu khawih tumin ka kutin a zawng ruai a , tumah reng an awm lo," U Hlim khawnge i awm? Min kalsan suh aw" vawi lehkhatah ka ṭap chhuak , ka bula awmte chu tunge an nih ka hre thei lo, ka khawhmuh a phe vek.



" Mawite, i lo harh tawh maw, ka van lawm tak em! " mittui nen ka ṭhiante'n an lo tih chuan ka hrilh hai der mai , "ka van hrethiam lo e , enge a awm zia, ti nge in ṭah a? Ka awmna pawh hi mak ka ti, engtin nge ka awm a? " An pahnoh chuan ka en tawn chhen " mimawlnu nikhawhrelo in i lo awm a , kan rilru a hah zia hi i hria em? Kam ngaihtuah lutuk che a sin" Matei chuan insut feih feih chung chuan a tia , ka ngaihtuah neuh neuh chuan ka manghriat ruai.




" Uhlima a lo kal em? A thu sawi kha a tak nise ka ti" ka thu sawi vang chuan an ang phiau mai.



" A thusawi kha a dik ka ring tlat, ka mumang mai mai chu a ni hauh lo ang, a lo kal chiang a lawm" ka hawi kual , ka ṭhiante bak tumah ka hmu lo, "i ngaihtuah nasa lutuk a , a tak emaw i ti mai mai a nih kha" beidawng zet a Zualbawiin a tih pawh chuan eng emaw felhlel a awm tlatin ka hria.



" A lo kal tih in hria a ni chiang a lawm, ka hmu anga ka na ang tih in hlauh vangin in zep a nih kha, ṭha deuhin sawi mai ula, zep inneih a , dawt min hrilh nih chuan kan inṭhian ṭhatna a tawp nghal ang" ka ngaihtuahna a buai vang nge , ka rilru a thu awm chu ka sawi chhuak hlawl.



"Dawt kan hrilh lo che, pangngai takin awm tum teh, hmu ilang chuan eng vang a na tak a siam che nge a nih kan zawt ngeu ang, min ring rawh" Matei mitmengah chuan dawt a tello tih ka hmu thei.



Doctor leh Sir Samuela lo inzui lut chuan min ti hrilh hai der, "a lo kal ve tih an sawi si lo, engvang amin buaipui em em nge maw a nih le?" Ka ngaihtuahna hian kil tin a hruat a niang, eng emaw hlekah ka ngaihtuahna ka seng vak zel.



"I lo harh tawh maw? Engmah hlauhthawn na tur a awm lo a nia, thil i ei ṭhat loh vangin i bp a hniam a , luhai i nei bawk, damdawi tlem a zawng kq chawh ang che chuan thil ei ṭha la , i dam a ni mai" a nui sang a , kan bula mi te lah chuan min en ṭhap sia ka lai chu ka che buai lo chauh.




Hospital kan chhuah san dawn chuan min dim dawi lutuk a , ka nuih an ti za zawk, doctor khan chhuah phal lo mahse dil luih kha ka tum hrim hrim a , hmeichhe luhlul thinlung hneh thei tu ka hmangaih khan min kalsan lo se chuan damdawiin khumah ka la mu ngei ang.



Ka bul vela min hual vel tu te hian min hriatchhuah tir a , ka tum loh deuhin ka hrechhuak leh ṭhin, drugs ngawlvei ten vawilehkhatah an thlah thei lo ang hian amah ngaihtuah hi ka bansan thei lo.



"Kan thleng e , in enkawl ṭha hle rawh aw, tlem tal thil ei ngei ngei ang che" min ngaihtuah hmel taka ti tu chu en pawh ka en peih lo, "i thu lo ve chiang e , ka nun a nia i lo buaina tur a awm lo" tih mai ka duh a, em a ka tia ka ngawi leh ta zawk.



Ban min vai lauh lauhin min tlansan nghal, ka thawveng huai dawn emaw ka tia ka tawt ṭun mai, kim lo riau hian ka in hre tlat .



Ka room ka pen lut chu ka chau nghal rawih rawih, ka tha neih zawng zawngte chu an bo zo vek, engkim hi ka ning in ka kham ngawih ngawih, thinrimna tur ka hre thei em em a , ka awm dan chu keimah ngei pawh hian ka hrethiam lo.



Tlai ni tla tur chu ka thir vang vang, ka lung a leng veng veng, "amah kha ka ngai , ka ngai lutuk, kan inhmuh lohna pawh a rei ve tawh bawk a , a thlalak en lo chuan a hmel awm dan pawh ka ngaihtuah thiam lo, a ni zawng min ngai lo te in a duh tak nen an awm dun ngei awm sia" ka ngaihtuahna pawh hian min ti lungngai zo tawh, "vawiin khan a hmel chiang takin ka hmu ngei sia, a lo kal lo an ti tlat bawk si, kei hi ka chiang zan tawh lo em ni zawk le? " chhanna min pe thei tu reng an awm lo, a ni chauh lo chuan tumah reng hian min hrechiang tak tak lo, min hringtu ka nu leh oa ngei pawn...



Sport kan neih tawp ber ni a ni, phur vak lo chuan ka insiam ve, kal loh tum eng ang mahila ka ṭhiante pahnih hian an phal dawn lo nasa mai, tihluihna in min kal tir dawn tho sia tiin ka insiam reng a.



School compound kan thlen chuan haw leh mai duhna rilru ka nei, ka mi hmuh hian ka luak a ti chhuakin ṭhiante bula awm pawh a ti tui tang lo zo vek tih hre lek lo chuan min la nuih ang ta deuh deuh a, phur lo chung a phur ang tak a ka lan derna te chu a ti reh tial tial.



"I ṭha tawh maw? Nimin lam athleng ang kha chu a thlen nawn beisei lo ang" nui suk a a tih chuan chhut thluk tawp ka chak et et.



A kal liam hnu pawh chuan ka thin a la rim hlur , ka mood a ti off zo vek, engtin nge an star theih hlawm ni, a hmel chu a chhe hran lo mahse ka ten tlat,a nuih phei hi chuan ka hmu nikhua lo zo vek.



A ha var rual zet zuk leh hmuam ti lo tih hriat tak a var sar te, a mitmeng verther hmel zet tehi ka ngaithei ṭhak lo, amah ah hian ka mipa duh zawng mizia engkim mai chu engmah hmuh tur a awm ve lo. Hei vang pawh hian ka ngeiin ka hua a ni tawp mai.



"Sir samua hi chuan a ngaihsak bik che a, amah hi a fel bawk sia , ala hmelṭha em em zui , a pa lutuk te hi a chang hi chuan ka bialpa ang tur ten ka suangtuah vel ṭhin" Matei chu rapthlak ti lutuk chuan ka en ren rawn a , Zualbawihi lah chuan a lo tuihnih ve nghal zat, " dik chiah, kohhran leh khawtlangah a inhmang bawk si, lehkha a thiam bawk a chutin an la hausa em em zui, a bialnu chu khawvela mi vanneih bera chhiar tel tlak a ningei ang" lehlam hawiin ka nek khum vak ringawt, kei chu min ngaihsak lutuk te hi ka ten hluah hluah, a hmel ka hmuh ringawt pawh hian ka luak a chhuak ṭhin, ka mithmuhah a nuih ngat phei hi chuan ka insum zo lo lek lek zel, ka ngei lutuk hi melhbo daih te hi ka chak ṭhin" ka sawi zo chu ka lu a rifawk nghal, "â leh lutuk mai, nang ngaihsak che hi a bat a ni bik lo" ti hlakin Zualbawihi chuan mi an khum tawn tawn a .



"Hlima khan a ne pawh a tluk lo tih hre ta che, engkimah a perfect zia hi student dang zawng zawngin an star luai luai a , a hmuhah lan ṭhat te, fel nih te an tum hlawm a , i â tak zet nge i mawl zawk" a thinrim nge ding chung ngatin min hmachhawn, ka mittui a hmuh rual chuan U Hlima a lo sawi chhuak chu a inthiam lo hmel kher mai.



Ka ṭhutna aṭanga tho chhuakin awm dawm vang vangin kalsawn ka tum, min lo dang nghal" tihpalh i rilru tih nat ka tum vang a sawi ka ni lo a nia" a thusawi chu ka bengkhawn duh lo" keimah chauha awm ka duh rih" ka chhungril aṭanga min hnawh tu vang hian thawchhamin ka thi thei mai dawn, ka thinrim vang ni loin ka inthiarfihlim ngei a ngai.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)