The Other Side Of Heaven chapter - 10

Episode kal lai dah luhna

Moderator: writers

Hluhlutei
Posts: 430
Joined: January 12th, 2017, 8:44 pm

The Other Side Of Heaven chapter - 10

Unread post by Hluhlutei » August 16th, 2021, 8:19 pm

IMG_20210816_202029.jpg

"Hual vek in ni tawh, Hmeichhia kha rawn chhuah rawh duhthlan tûr dang i nei lo" tih rî ah chuan a kut chu ka hûm tlawk tlawk a, "Kal rawh le, Aizawl i thlen hunah min lo zawng dâwn nia" a beidawng âw chuan min tina vawng vawng mai, chutah muangchâng chuan kawngkhâr lam chu min pan pui a, ka mittui luang ngiai ngiai chu arawn hru zauh, "Engtin nge i a awm ve ang?" Ṭap âw ṭiau a ka tih chuan nui lui suk in duhthawh zet hian min rawn fâwp a, keipaw'n ka fâwp lêt ve nghâl zat, chutah thâwk la ham ham in kan chal leh chal chu a in sîk tîr a, "Engti kawng zâwng paw'n ka rawn zawng chhuak ang che" ati hniam ruih a, ka lo inhnît feih ringawt, "Ka hmangaih che" tihpahin ka chalah chuan arawn fâwp leh vang vang a, kan han inkuah leh vawng vawng ṭhin, "Him takin haw la, Jail ka lo tâng a nih leh a ṭha a ni mai" atih chuan ka lo bu nghauh nghauh a, chutah muangchâng chuan chhuak tûrin min nawr phei dat a, "Rawn hawi lêt suh" ati chang deuh fak, chutah pâwn ka chhuak chu Police ṭha hnem tak hian kan awmna chu an lo hual khup nia, "Nula, i ṭha em?" Police pakhatin arawn tih chuan ka lo bu nghauh, "Emily hetah rawn kal vat rawh" an rawn tihna lam chu ka hawi ruai a, kan awmna chhak deuh ah chuan ka pa leh Ka u an lo ding vâng mai, kal mai nachâng pawh ka hre lo, Police pakhat chuan blanket hian min rawn tuam in ka pa te awmna lam chu min pan pui dâwr dâwr a, kan kal lai techuan kan awmna In tê chu ka thlîr zui vawng vawng ringawt, ka u chuan min lo kuah nghâl thlawp a, a ṭap nghâl zawih zawih bawk.


"Ka naute, i va han dâng em em ve, nâ te i nei em?" A tih chuan "Aih, ka engmah a na lo, Ben kha, a ṭha angem?" Ka han ti ringawt a, hrilh hai hmêl zet hian ka u leh ka pa chuan min en hû mai, "Tu Ben-a maw?" Ka u in arawn tih chuan, "Hetah hian min hruai a, pa ani chu mifel tak a ni, min tina ngai lo, engtinmah ti suh aw khawngaihin" ka han ti nghâl mawlh mawlh a, ka pa hmêl tak rûn chuan eng rilru nge a put pawh min hriattir thei lo, "Chutiang ngaihtuah buai suh, car ah lût ila, eitûr ka rawn keng ṭeuh a nia, ila dam chu ka van hlim tak" ka u chuan arawn ti siam siam a, car a min hruai luh a tum lai tak chuan, "Sir, a chhûngah khuan awm an la awm a, râlthuam a pai bawk, engtin nge kan tih ang?" Police pakhatin arawn tih chuan car a ka lût tûr chu ka ding dat, "Kâp rawh u" ka pa chuan tâwi fel tak hian alo ti nia, ka nghîng dawt thei, "Ni lo, pa, iti thei lo ang" vîn ṭhawt chuan ka ti a, "Emily car ah lût rawh, tûmah zuah ka tum hauh lo" ka pa chuan chang fak hian alo ti khur khur a, ka sa nghâl phat, car kawngkhâr chu khár ṭhuaiin ka pa awmna lamah chuan ka kal phei hlawk hlawk a, "A thil tihsual hremna chu dân in a pe mai ang, thah kher a ngai lo" a hma ah chuan dingin ka ti chang fak a, "Emily tûnah chuan ni love, car ah lût la, i û nen lo va haw r'u" a tih chuan "Aih, Ben-a tello chuan ka haw dawn lo" awki sâng zeta ka tih rual chuan silai tam tak hi A puak nghâl dum dum mai, ka thlang lam chu rang takin ka hawithla a, in tê kha Police ho khân an lo kah rawn nia, "Ni lo, kâp tawh sû" ring taka tihpaha tlân thlâk ka tum chu ka pa chuan ka hnunglam aṭangin min lo pawm bet hmak nia, "Khawngaihin kâp tawh lo hrâm rawh u" tihpahin ka ṭhingṭhi zui hnawk, lei ah chuan in beng kâng in ka aw râwl tâwp chuan ka ṭap chhuak a, ka inthinrim ṭah chhuak bawk si chu awm ngaihna pawh hre lo in ka aw râwl tâwp chuan ka âu nghek nghek ringawt, ka u chuan min rawn kuah thlawp a, ka taksa pum chu A khûr chhuak vekin ka hria, ka khaw hmuh techu arawn thim deuh mup a, ka u in min kohna chu hla tak aṭang hian ka hre ruai ruai mai, chutah arawn thim ta mup a.






Ka harh leh chuan Damdawiin ah hian ka lo mu reng mai, ka sam chu tu emaw hian alo chûl hliau hliau a, ka nu ṭap ri feih feih ka hre zui nghâl, ka nu hmêl ka hmu chiah chu alo meng sen râm mai,

"Ka fanu khawngaih thlâk te" ṭap ṭiau hian alo ti a, ka mittui ka bekah arawn luang lum thla nghâl pap mai, ṭah ve hawm hawm ka châk a, mahse ka chau lutuk, ka chau takzet a ni, "Nu, engkim kha ka mumang vek tiraw?" Ka tih chuan ka nu chuan alu lo thingin ka ṭap zui hak a, ka âwmah tehian min hnawh nghâl ut ut mai, Benjamin, a thi lo ang, a thi tak tak lo, "Hei hi ka mumang aniang, ni lo, a thi thei lo" tiin ka in sik a, mahse A tak ngei a ni tih a chian nan ka bân sihna chu Ana vâwt vâwt mai, "Ka tihpalh a ni Bawihte, ka thiamloh vek a ni" ka nu chuan arawn ti mawlh mawlh a, ka nu chu mak ti zetin ka lo en hâ ringawt, "Min rawn phone hma khân an lo kal daih tawh a, i pa leh i û in ka call tlang thei bawk si lo, pawi ka ti lutuk" tihpah chuan A inhnît leh feih feih a, inchung lam hawiin ka thaw hawk ringawt, awm ngaihna pawh ka hre lo, "A lem vek a ni, reilotê ka muhîl anga ka harh leh chuan Ka bulah hian arawn kal em em ang" tihpahin ka han maimitchhing lui a, a tak a ni ngei tih erawh ka hria, mahse ka ring phal thlâwt lo a ni.



"A pa in a ruang ala tawh a, ani chu an vui liam tawh"

Ka nu chuan ṭap chung hian arawn tih a, ka thinlung ava han kehsawm chiang tâk êm, ka kehsawm vek ni mai hian ka hria, ka puansin lai chu nghet zeta hûm pahin ka mittui chu ka bekah a luangthla zawih zawih a, ka ṭap lo, mahse ka mittui erawh namên lo in atla zawih zawih thung, a mitmeng hlauhawm tak phên a a nunnem zia leh A tawrh tam tawh zia ka hria, a nun kha nuamin a hmang ngai lo asin, mi tam tak a tina in tual hial a that tih hre mahila khatianga thih kha a phû bîk lo, mi zawng zawngin tual that tu leh misual tiin an hre reng tawh anga, mahse ka hriat rengna erawh adang daih thung, hmangaihna awmzia min hriattir a, nun hi alo awlsam loh zia min hriattir bawk, ka dai ngai loh lei vânram min fan pui tu a ni a, khâng zawng zawng kha min hriatpui ve tawh si lo.




A hmeichhe hmangaih em em boral ta nên khân an in hmu leh ngei âwm si a, ka ngaihtuah chiang a aboral chu ka lawmpui leh ta zâwk, he lei hi a tana siam kha a ni ve miau si lo a,tûnah chuan A hlim tawh ngei ang tih ka hria, mahse ka ngai lutuk, ka ngai takzet a ni, a hmangaih em em ṭhin bulah thlamuang takin a awm ngei anga, mahse ka hmangaihna erawh engmah lo a achang tûr hian min tina takzet a ni, ka hmangaihna lan tîrna hun ka nei tlêm lutuk leh ho lam taka athâm ral mai tûr hian min tina takzet a ni.



Luna bûr in ka meng diar diar a, ka khûmah ka lo mu than tawh, ka harh chhuah rualin natna in min rawn tuam leh nghâl ut ut a, mahse ṭap thei pawh ka ni tawh lo, ka chau êm a ni, ka chau takzet, nurse upa lam hi A rawn nui lût var var a, nuih pawh ka nuih lêt peih lo, ka room, ka khum te, engmah hi thlâkhlelh na rêng ka nei lo, ka chau a, ka rilru leh ka taksa, ka thlarau thleng hian a chau ngawih ngawih mai ni, ei tûr tui hnai tak tak hi rawn chhawpin,

"Emi, ei luih tum rawh, khati kha chuan I chau lutuk ang" aw dam diai hian arawn ti a, ka chhâng lo, ka melh ngai ka lo melh tlawk tlawk ringawt,

"I naute tân khân i chak ṭhat angai ania" arawn tih chuan ka harh chhuak zawk in ka hria, amah chu zawi muanga en in "Naute a?" Ka âw pawh chhuak mang hlei lo chuan ka ti deuh sap a, "Aw ni e, i pum ah khân naute karhnih mî a awm alâwm" nui var var a arawn tih lai chuan ka nu leh ka û mit sen râm hian an rawn lût hlawl a, an hnungah ka pa pawh arawn tel ve, en pawh ka en peih lo.


Ka pum chu khawihin ka mittui arawn fâr zâwih a, mittui luang ngiai ngiai chungin ka nui sak, ni e, ani chu A kal tawh, mahse thil pêk ṭha deuh min hnutchhiah a nih hi, ka rilru chuan ka ti a, ka nu chu ka bulah chuan rawn ṭhu in arawn ṭap chhuak leh hak tawh, "Avan pawi tâk êm" tihpahin a ṭap zui tlawk tlawk ringawt, "Nu, tinge i ṭah a?" Ka lo ti deuh hâ a, "Pawngsual i tâwk ang tih rin ngaihna pawh ka hre lo" ṭap aw ṭiau hian arawn ti a, ka chhâng thei lo, keima duh thû ngei a ni si a.


"Khawi, thil chu ka lo ei ang" ka tih chuan ei tûr chu min rawn pe a, arsa techu ka ei nghâl bawrh bawrh mai, "Naktuk ah Doctor ka lo bia anga, midangin an hriat tam hma in ti tla vat ang" ka pa in arawn tih chuan ka sa nghâl phat, ka Fian ken lai chu dah ṭhuai in ka pa chu rum zet hian ka en a, "He naute hi ka ti tla dâwn lo" ka lo ti chang fak, ka chhûngte mak ti hmêl chu ka khawngaih letling zâwk, "Mate engemaw i sawi le?" Ka u in alo tih chuan, "He naute hi ka nei dâwn, ka nei duh, min tih luih in tum vaih chuan ka tlân bo ang" ka ti chang deuh fak a, ka pa thinrim in hûm ruh chu ka hmu reng, mahse A hma ang kha ka ni tawh lo, engmah hlauh ka nei tawh lo, he naute chân hi ka hlau ber tawh zâwk, "He naute hi engvângin nge i neih ang? Kha mi tenawm fa kha ni lâwm ni?" Ka pa awka vîn zeta arawn tih chuan "I ṭawngkam kha fîmkhur rawh, ani kha mi tenawm a ni lo, ani kha ka hmangaih lutuk, he naute hi pawngsual vanga pai ka ni lo, ani nen kan in hmangaihna rah chhuah a nih hi" ka tih chuan ka nu chuan rapthlâk min tih hmêl zet hian min enkar a, ka chaw chu ka ei zui mawlh mawlh a.


"Khâng misual ho khân i chungah enge an tih ka pawisa lo, ka fanu hian tual thattu fa a pai hi ka rem ti lo, kum 19 chiah ila ni a hma hun êng tak ila nei, rai puar chungin lehkha i zir leh dawn tihna mi? Midang min sawi dan tûr ngaihtuah teh, i pa hi mi te zah kâi ka nih hi I hria em? Ka fanu hian sawn a pawm chu sawi loh tual thattu fâ a hrin hi ka rem ti thei lo" ka pa chuan A han ti zui buan buan a, a ze ngai bawk a chhuak leh ta e, za lo zetin ka lo nui lui hak,
"Mi te zah kâi hah...." Ka nui hul hak a, "Mi te zah kâi i nih leh nih loh ka pawisa lo, he naute ka hring ngei ngei ang, ani i thah tîr kha I duhtâwk lo em ni? Ka pa lungngai suh, ka fa hi chu keiman ka enkawl ang, ka chunga i tih ang hi chuan ka fa lo piang tûr chu sawi loh ka hmelma chungah pawh ka ti ngai lovang" awki sâng lek lek chuan ka ti lêt ve ta zêk a, "Emily" ka nu in alo tih vîn ṭhat lai chuan ka kut ka phar chhuak hliai, "Lo in rawlh su, hei chu ka pa nên kan inkar a ni, ka thinrim lai taka ka sawi vek loh chuan, tumah lo in rawlh suh u" ti ram hmakin ka pa chu ka en zui kar a, ka nu pawh a ngawi zui ve mai.

"Naupang lehh....ka lo enkawl seilian che hi ka tisual takzet a ni" tiin ka pa chu A phun hluk a, "Ni e, ka nu in min hrin thlâk chiah khân tinge fahrah in ah min dah zawk loh? Kei hi I fa angin min en ngai em? Hmeichhia a ka lo piang hi i duh lo a, i thinrim hrîk thlak na ka ni a ni lâwm ni? Nang hian i fanu angin min en ngai lo, khâ naupang khawngaih thlâk khân hmangaih tu mit meng chu A hre rang ve asin, kei hi vawikhat tal min hmangaih thû i sawi ve tawh ngai em? Ka Birthday apiangin ka u i tihsak ṭhin ang hian cake te min rawn hâwn ve ngai em? Iti ngai lo, vawikhat mah, hmeichhia a ka lo piang hi ka thiamloh em ni? An ni ho in min man lai khân min rawn tlan chhuak duh lo kha ka lawm asin, Benjamin khân min man ngei alawm, mahse ani khân nun awmzia min hriattir asin, hmangaihna ka dawn ngai loh min pe tu a ni a, engtin nge mi tenawm i tih theih? Ka pa, Benjamin ka tawn hma kha chuan enge ka duh a ka duh loh pawh ka hre ngai lo, ṭhian ka nei lova, midang zawng zawng ṭhian te nên hun nuam tak an hman laiin keichu he room ah hian mi tâng ang maia khung beh ka ni ṭhin, mahse ka pa ka hmangaih tho che, achhan chu ka pa ini miau a, mahse, ka mipa hmangaih em em i thah tîr vâng erawh chuan ka ngaidam thei lo che"

Ṭap chunga ka tih hrep hnu chuan ka thaw nghâl hak hak a, ka chhûngte thâwm a reh ta duk mai, ka nu erawh kil khatah alo inhnît hlap hlap thung,

"He naute chungah hian engemaw a thleng a nih chuan dam chhan tûr pakhat mah ka nei tawh lo, ani hi ka damchhan a ni" ka tih leh hnû chuan ka pa chu A chhuak ta hmak a, chu vêleh ka û leh ka nu chuan min rawn kuah in kan pathum chuan kan ṭap hlap hlap ringawt.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)