The Other Side Of Heaven chapter - 11

Episode kal lai dah luhna

Moderator: writers

Hluhlutei
Posts: 430
Joined: January 12th, 2017, 8:44 pm

The Other Side Of Heaven chapter - 11

Unread post by Hluhlutei » September 1st, 2021, 10:55 pm

Benjamina'n min kalsan na pawh kum ruk (6) aliam leh ta reng mai, khâng kum ruk(6) chhûng khân nikhat pawh ngaihtuah loh lai ka nei ngai lo, ka chhûngrila natna leh thinrimna te up betin hun ka hmang liam a, kan in ah pawh awm duh lo in ramdangah lehkha te zir in Doctor degree nei tûr khawpa huaisenna leh chakna min pe tu chu ka fapa a ni, kum khat chhûng zirna chawlh san in ka âwl a, nau ka pai vâng leh ka naute enkawl ka ngaih vângin, nau ka hrin hnu in exam eng engemaw ka paltlang hnu ah Medical College ah ka inziak tling ve ta A ni, Ka pa nena ka inkâr zau tak chuan tum ruhna lian tak min pe a, nau awm tu tûr ka nu in min lâk sak chu nu fel tak a ni, a châng chuan Bawihtea hian a ngai ṭhin mah zâwk, hnute ka pe tawp a, ka khawih tam lo ve bawk êm a ni, ka nu leh ka û in min pui nasa hlê a, an ni phei chu awm lo se ka inzir puitling thei meuhin ka ring lo, nau ka vei a ka hrin ni mawlh kha a ni, ka nu hi ka tan hian alo va han hlu tak êm.


Ka pum na ti a mittui tla zawih zawih a ka tuar laiin ka pa erawh a hna thil ah a buai chhuanlamin a kal bo daih a, mahse ka phût lo hrim hrim a, ka rilru pawh a ti na tham lo, Thi lek leka ka awm hnu in fa duhawm tak ka hring a, ka na tawrh rah chhuah mawi zia kha khami nî khân ka ṭap hial a ni, ni e, ka la naupang a, fa enkawl dan engmah ka hre hek lo, mahse ka hlim a, ka lawm êm vânga ṭap ka ni, ka fapa hmelṭhat zia chu, midangin ṭha min tihpui ve kher ka phût lo, ka mitah chuan angel tereuhte ka hringnun tluang taka ti kal tu a ni a, ka tan a hlut zia chu ka sawi fiah thiam phâk bâk a ni, ka âtchilh tawp a, mipa dang han melhna rilru ka pu ngai hek lo, ka fapa chauh ngaihtuah in ka hun ka hmang ṭhin, mi zawng zawng in apa chu tunge a nih an hria, mahse pawi ka ti lova, ka zahpui hek lo, midang thusawia buai ni ila chuan Benjamin kha ka hmangaih ngai lovanga, a fa hial ka hring hek lovang, mite min sawi dân ka hre lova, an duh duh sawi tûrin dikna an nei tih ka hria, thudik chu enge ka hria a, Pathian in min hriatpui bawk a, chu chu A tâwk ka ti viau mai, mahse chu aia ka rilru tina zawk leh, a rûk a min ti ṭap fo tu chu Bawihte hi A ni leh nge nge ṭhin, thing delh loh lung delh loh chu lo ṭhang lian chho in pa neih hlut zia leh pa neih châk na te arawn hre chho ve a, tlaikhat ka class bâng chu ti hian min lo zâwt a, "A nu, tinge a pa hi vânah a kal hma em em a, a pa chu a hrisêl lo viau em ni?" Ti a min zawh nî kha a ni, ka fapa hmêl pawisawi lo tak chu ka en ṭhin, ka hmui ka pet a, ṭah ka tum lo, chhân dân tur lah ka hre hek lo, ka hmui ka pet a, nghet zetin ka kuah thlawp ringawt, ti hian ka chhâng ta tawp a, "Bawihte, A pa chu A dam lo nasa lutuk a, a pa chuan A hmangaih lutuk che" ṭah insûm zetin ka ti ta ringawt a, khami nî aṭang khân a pa chanchin techu min zawh zauh zauh a chîng chho a, a rûk in ka ṭap tawp zêl, mahse ka pa laka ka luhlul na vâng tal pawhin chak lo tak anga lan ka tum lo, chuvângin ka inti chak lui a, pa tello hringnun chu na tak a ni, a tawng tu nih loh chuan sawi mai hian a fiah thei lo.



Tûnah chuan School te a kal ve tawh a, keipawh Doctor ni ve in Sawrkar Hospital pakhatah ka thawk ve a, mahse ka la junior vângin ka hlawh pawh ala tam lutuk lêm lo, psychiatrist Doctor niin mi chi hrang hrang harsatna tam tak ka hre hnem tawh a, Keimah a ka ṭhut ve aṭang phei chuan ka hlâwk phah hle, Ṭawngṭai ka thlah ngai lova, ka hunawl apiangah Bible te chhiarin damdawiin a puih theih loh chin ah chuan Bible thu hmang te a hnem ngai an lo awm ve ṭhin bawk nen, ngai ah nei chho in ka taksa leh rilru thlengin ka hna chuan chakna min pe ṭhin, rûka mi te ṭanpui ngai vetho ka ni a, mahse nitin midang harsatna sutkian sak tumin thu ṭha tak tak ka lo hrilh ṭhin na chungin keimah ber hi ka thinlunga khâkna tih rehna erawh Bible ah hian ka la chhiar fu lo tepawh a ni mahna le, ka pa ka huatna hi ala reh thei lo, vawi tam tak ṭap zawih zawihin ka pa ka ngaihdam theih nân ka dil ṭhin, mahse, kei mihringa zawnga chak lo tak hian min hring tupa hi ka ngaidam thei tlat lo a ni, mi tu emaw hmangaih reng chung pawh hian alo huat reng theih tho tih ka zir chhuak phah nghe nghe, ni e, ka pa hi ka hmangaih lutuk, mahse kei mi lunglian tak hian ka ngaidam thei lo a ni.



In ka thleng chu Garrage ah ka car ka park lai chuan tual zawl ah Bawihtea chuan ball alo pet lauh lauh a, ball hi A ngaina hle a, Ronaldo te, Messi te, Je je a te hi A ngaihsan zawng an ni tlat pêk a, footballer tûr a nih ka ring nghet hmiah tawh, min hmuh veleh chuan arawn nui ver ver a,


"Nu, lo en rawh ka pet goal dâwn nia" tihpah chuan A han pêt ri zui ṭak a, awlsam tak chuan alo pet goal nghâl nia, ka kut chu ka han bêng a, a che zia reng rêng ah chuan A pa chiah chiah a ni mai, a mize cool tak thlengin, a in ti tlangvâl hle nghe nghe,

"Ball boot thar min lei la, hei ka bun lai hi nimin khân alo kak deuh a asîr hi" tihpahin a ball boot sir lo kak deuh chu arawn ti lâng va a,
"I rawn sawi lo a nih kha bazaar ka kal a, cheese cake i duh chi kha ka rawn lei a sin" ka tih chuan min rawn pan vat A, kan nu fa tê chuan inchhûng lamah kan lût nghâl vat, ka fapa hi hetiang em em hian alo tlangvâl tawh tihpawh ka lo hre lova, "Lehkha i zir tawh êm?" Ka tih chuan A lei a chhuah zauh, ala zir lo tih ka hre mai, "Naktuk in test dawn sia, tinge ila zirloh?" Ka tih chuan min rawn nuih tlawn ti tih chung hian, "A ho lutuk nu, ka thiamsa vek a ni tho" awlsam zet hian alo ti nia.



Inchhûng kan lût fel chiah tih in Puia, arawn lût ve a, ani hi ka thawhna Hospital a thawk ve a ni a, ani erawh Office lam ami niin LDC a ni thung, rawn len ve zauh hi A chîng a, mi fel tak a ni, a hmêl pawh a chhelo, min ngaizawng tlata hriatna ka nei a, ka iai hran lo na in, midang han nei leh mai tûr hian ka fapa chu thuhran lo ni ta se, ka thinlung hi ala in peih tak tak lo a, midang tân ka in phallo a ni ber ang chu, beisei awmin ka awm ngai hek lo, chhûngkaw khawsa thei tak ni lo mahse an khua thingtlâng lamah chuan mi te zah kâi chin kha an ni ve a,ka nu leh ka pa erawh hi chuan namên lo in an lo be ṭha ṭhin thung.



"Ilo haw daih a, haw rual ila ka ti sin" arawn ti lût mawlh mawlh a, Car ka keng ve tih a hre lo A ni mahna le, kan in chhak lawka awm a ni a, car hi ka la khalh thiam lutuk loh vângin kan haw rual ve ziah ṭhin,

"Nia, vawiin chu car ka keng ve a, ka buai miah lo" ka tih chuan A nui deuh suk a, "Anih chu, engin nge i haw ang aw ka tia ka ngaihtuah lutuk che a" atih chuan thildang sawiin "Lo ṭhu rawh ka'n inthlâk lawk" tih leh room a luh ka rual nghâl a, Bawihtea nen pawh hian an in nêl viau nghe nghe, ka inthlâk zo chu ka nu nên chuan ti ti mawlh mawlh pah hian thingpui an lo in dûn a, Bawihtea a bulah lo ṭhu in ka cake lei chu alo ei pah mial mial bawk.


"Nu, Ka Birthday ah apa Puia hian ball boot min present dâwn a, min leisak lo mai rawh" Bawihtea chuan alo ti siam siam a,Ka lo nuih sak ringawt, hepa pui rauh hi min ngaizawng tak tak in ka hria,

"Nu Mapui chaw ka ei ve dâwn nia, rawng ka bâwl peih lo e" a tih chuan, ka en deuh hrâwk a, chaw rawn ei ve zauh hi A chîng a, mahni a khawsa a ni bawk a, a âwm ka ti tho mai, mahse ka lakah hian A in luling ang tih ka hlau ber, hmangaih chuang miah si lovin ka khawngaih anga, khawngaih vângin ka lo pawm mai ang tih ka hlau takzet a ni.


"I ei duh phawt techuan, Bawihtea hian A ngai ropui che si" ka nu chuan alo ti mai a, kei erawh ka ngawi reng thung, ka nu chuan hna thawh tûr eng engemaw a neih vangin a room lamah min luhsan a, Bawihtea leh Puia chuan games an khel dûn mial mial mai, kei erawh ka phone ah News techu ka chhiar vêl mai mai a, "Emi, vawiin enge i an? Damlo an tam êm?" A rawn tih chuan, "Tam hran lo e, mahse ṭanpui ngai tak tak vek an ni" ka phone en reng chung chuan ka lo ti liam puat a, ka bulah chuan rawn ṭhu thla thurh in, "I hna ang thawk tur hi chuan ṭawngṭai taihmâk angai viau ang" arawn tih chuan nui sakin a hmêl chu ka va en a, "Nia" ka lo ti ringawt, hetianga mipa in min hnaih an tum hian ka hlau ṭhin, ka ten ru tlat zêl, "Duat tu tur i mamawh ngawt ang, psychiatrist Doctor nih chuan kawppui te hian an zir angai teh mai ania" thu tak zeta arawn tih chuan, "Ka hria lawm, fapa ka nei a, kawppui neih hranpa ka ngai tawh hleinem, bakah keini ang pa tello a fa pawm chu A tu chuan nge maw min duh ve ang le" awlsam zet hian ka lo ti a, "Iti ang lo e, kum 26 i tling ve âwrh chauh a, i hmêlṭha a, nei duh tu che chu an in tlar del dul ang chu" alo ti deuh hluai a, ka nui zui hak ringawt, kawppui neih leh tumna rilru hi vawikhat mah ka la pu chhin lo, Benjamin kha ka hmangaih hmasa ber leh hnuhnung ber ni se ka duh a, ka rilru sawhsawn ka tum hek lo.


Zanriah ei hunah meuh chuan ka pa leh Ka u pawh an rawn haw ve thei hrâm a, chaw ei lai chuan Puia leh ka pa chuan hna chungchang leh Sawrkar hmalakna vel techu sawiin an ti tí tui dûn hlê a, ka u leh ka nu te nen erawh kan sawi duh zâwng a nih ve loh vângin kan lo ngawi kar thung, ka û paw'n thlaleh mai ah khian pasal a nei ve dâwn a, Mi ṭha tak a nei tûr chu ka lawmpui hle, upa deuh hlek tawh mahse Pastor niin chhungkaw pangngai tak aṭanga seilian a ni a, ka pa zahawmna ti zual tu alo ni leh zêl bawk nen ka pa lung adum khawp mai, Kohhrana a nihna hi ama ṭânghma hai nan bâk a hmang ngai lo tih te hi zoram mipui tehian hria se ni tur, Puia a haw hnu chuan ka pa chuan, "Puia hi mifel tak a ni, kawm ngaih hle rawh, chhungkaw pangngai tak aṭanga seilian a ni a, nang ang A nei duh che nih phei chuan A lawmawm viau ang" thlêng ka sil mawlh mawlh lai A arawn tih chuan ka ngawi reng a, chhân en ah pawh ka en lo, ka neih loh tûr zia chu pui tak a ni.




"I luhlul lutuk leh i rilru lian lutuk hi chu sim ṭhen ve la ka ti khawp mai" a ti zui leh hlak a, ka la chhâng chuang lo, ka tih tawh loh ah chuan ngawirengin ka ti lo hmak hmak mai ṭhin, han ân ve buan buan hi ka thiam ve tlat lo a ni.


"Ni e Mambawih, i pa thusawi kha ngaihtuah chiang la, Bawihtea pa hi eng chen nge ila sûn dâwn? Pasal dang neiin hlim takin awm la ani pawn a duh zawk ngei ngei ang, a hmangaih che a nih chuan i hlimna tûr aia duh a neih ka ring lo" ka nu in arawn tih chuan ka thaw chhuak deuh halh a, Ka nu chu Proffessor tih takah rilru hneh zawng taka thusawi hi A thiam riau a, a nun a nemin dam thluam chi hi A ni a, ka u hian A chhûn hlê bawk, kei erawh ka pa nên chuan mi in ang sa in ang kan ni a, kan in millo riau zêl,

"A nu, Pa Puia nen vawikhat kan khel leh lawk anga lehkha ka zir ang" Bawihtea chuan arawn ti zui lâng lâng a, "Nangmah chauh in ngaihtuah lo la, i fapa hi ngaihtuah tel rawh, Bawihtea pa tân chuan Puia aia ṭha hi an awm thei lo, Pa tello a seilen tir ngawt chu thil dik a ni lo ania" ka nu chuan arawn ti leh dap dap a, 'Ka hria' tih vîn ṭhawt ka châk lutuk, mahse ka ngawi ta zâwk a.




Mut hmunah techuan ka in ngaihtuah ve nasa khawp mai, keimah chauh in ngaihtuah thei ka ni tawh si lo, ka fapa hian pa a mamawh takzet a ni, ka phone arawn ri ral ral a, ka en chu Puia alo ni, ka chhâng zui mai a.


"I mu tawh em?"

Awki hniam ruih a arawn tih chuan ka âw thian kharh pahin, "Aw mu tawh e, ka la muhîl lo" ka lo ti mai a, "Naktuk chu car keng tawh lo la, ka lo hruai ang che i chesual palh ang" arawn tih chuan ka ngawi deuh vang vang a, "A ṭha lawm" ka lo ti leh mai, sawi tûr avâng duh kher mai, "Bawihtea a mu tawh ami?" Arawn tih chuan, "Aw mu tawh e, lehkha a zir zo a amuhil nghâl daih a" pangngai tak chuan ka lo ti leh mai a, thu ho deuh deuh kan sawi nek nek hnu chuan inthlah felin keipawh ka muhil zui ve mai a.


A tûk zingah chuan rin ang ngeiin min rawn lam ngei a, Car a kan ṭhu lût chu Bawihtea piancham lâwm dan tûr ringawt sawiin ka ti ti phei mawlh mawlh a, ka lakah hian ṭhian ni lo deuh rilru dang pu lo se, in ngaihzawnna chungchâng engmah sawi lang lo se ka ti rilru hlê bawk, ka ngawih reng chuan arawn sawi chhuak khut ang tih ka hlauh vângin a ṭawng pawh ngaichâng lo in ka ti ti mawlh mawlh reng a, chutia ka ti ti mawlh mawlh lai chuan kawngsir ah hian A ding deuh dat a, "Coffee in ang, a vawt emai" tih leh chhuah a rual nghâl a, keipaw'n ka zui chhuak ve nghâl, dâwr kawtah chuan zîng kar kar a rui thle lûk lûk mipa pathum vêl an lo ṭhu ṭhap bawk a, an zînga pakhat chuan min rawn hmuh veleh chuan, "Aw haw...nang chu" mit meng zîm sur a min en chung hian arawn ti a, hrilh hai zetin ka lo en hâ thung, "Ka hria che,Pu Ruata fanu kha ini maw? Ṭhian te u, amah hi lawm ka Patea that tupa bialnu kha" a han ti zui nuah nuah a, ka vawikhat tawnna a nih tawh loh vângin mak tihna ka nei lo, mahse ngai ah erawh ka la nei thei lo, "Tual thattu fa pai kawrh chungin zak miah lo in Doctor ka ni e techu tia, i pa in lâk vei nen A chawh ve ngawt mai Pu Ruata chu, sum tlêm tê hmangin ka ka hup a han tum vêl a, ka Patea nunna kha nangni suma thleng theih a ni lo aw" pawr zeta tihpah hian arawn ding chhuak ta mai, palian tak a ni lo A, ala ding ngil thei lo zui, ka hlauh loh dân chu pui tak a ni,

"Ka pa sumin i rui thle bâk bâk tho alâwm le, i Patea nunna kha sum a thleng theih a ni lo a, thleng kan tum hek lo, nangman ka pa i vo vâng chauh a pe che kan nih kha" ka ti ve ta ngat a, hetianga hmusit taka min tih hian ka ngawi mai mai thei ṭhin lo, ka chak lohna lian tak ala ni chhunzawm zel chu nia, "Iva zakthei lo ve a, nang sawnpai chu sawi loh tual thattu fa i pai kha zak hle rawh, khua hawi ngam tur pawh ini lo" tihpahin min rawn nam dâwrh a, ka lo in ring lo bawk nen ka kat nghal nawk nawk mai, "Duhtâwk rawh u, He hmeichhia hi nanga hmuhsit mai mai theih a ni lo, ka kut tum hmuh i duh loh chuan kalsan vat rawh" Puia chuan arawn ti ta khur khur a, chu zurui pa chu A ṭhian te pahnih chuan lo kai hrangin an bengdai zui sap sap a.


"Tlangval ila inchhîr ange aw, I hmeichhe kawp lai kha ks ai pawn a tenawm zawk" ala rawn ti nia, Puia chu ding datin chu pa lam chu nui suk hian A en a, "KS hmu sit phâk ini in ka hre lo ka pu, Ani hi Nang aiin ka hre chiang zâwk, lo in rawlh duh lo mai rawh" chiang fek fawk a tihpah hian ka dâr ah chuan rawn khawihin car ah chuan min luh tîr vat a, ani pawh rawn ṭhu lût ve in coffee sa ver vawr min rawn pêk pah chuan A in khalh chhuak zui mai a, Benjamin chu ni se engmah sawi lo in A rawn hnek thal nghâl ṭhuai ang, tih techu ka ngaihtuah na ah arawn lût a, engvânga Puia nena tehkhin nge ka nih pawh ka in hre lo e a.


"Tinge khatia i tih a? Rawn in rawlh ve kher angai hleinem" inthiam lo zeta ka tih chuan, "A ho lutuk, engmah a nih loh kha, khatiang zurui mai mai thusawi ah buai lo la, chhâng lêt duh tawh suh, ngawihsan hmak zêl rawh, nih loh pawn min lo ko la, ka chhan ziah ang che" tihpah chuan min rawn en vang vang a, thu tam tak a sawi lo na in, awmzia erawh a nei thui hlê tih ka hre thei.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)