PANGPARHNIMA CHAPTER - 19 by Ahmangaihi Violette Khiangte

Episode kal lai dah luhna

Moderator: writers

Ahmangaihi violette
Posts: 231
Joined: February 1st, 2020, 3:14 pm

PANGPARHNIMA CHAPTER - 19 by Ahmangaihi Violette Khiangte

Unread post by Ahmangaihi violette » September 15th, 2021, 3:31 am

PANGPARHNIMA - by Ahmangaihi violette Khiangte

CHAPTER - 19




"Lo che sawn suh aw" min kuahna a thlah rual chuan vawtin ka chhungril a rawn luh nimai hian ka hria a, ka kaiza tha a khur nasain din ringawt pawh chu a har lam mah a ni, hmui hup chungin Tower a ruang inkhai chu a pan phei a, a mar a va dehsak lai te chuan ka vai riai tawh.




"A vawt vek tawh a nih hi" a tih ri chu ral hla taka ṭawng ri ang maiin ka hria!




Ka vel boruak chu an chawl duk a, thawk a sakin ka thin bawr chu a thip hlur a, ṭah chhuak miah silo chuan ka tawt up up a, ka awn riai riai tih chu ka hre thei!




Ban tha chak takin nghet lutuka min vawn rual chuan thawk ka la kawk a, "Chiai suh, inti pachang rawh" ka hawi a riai a hmuh chuan ka chiai nasat zia a hria a niang min kuah nghet sauh sauh a, Tower lam chu hawi lehin "A rui lungpuam in a ti anih dawn hi, midang kan hrilh vat a ngai ang" a ti leh zat a. Chiaia hun a ni lo, inthing harhin ka Phone ken lai chu ka lek chhuak a, a Batry sen tawh mah se, a lo la thi lo hlauh mai.




"Tu nge ka Phone dawn?" ka kut khur nasa lutuk vang chuan Phone pawh chu ka hmet fuh hleithei lo, ka aw te thleng chuan a khur zo a, Avisa rin chhanin ka ding a ni ber.



Phone chu min lo laksakin tu emaw a Call a, chutih laia ruang ka han melh leh chu mit ka chhing leh rang teh e, hruia la inkhai reng chungin UThlenga chu ka lam hawi tak hian a rawn thle a, mit ka chhing chung pawhin a hmel chu ka mitthla ah a chiang em em mai bawk.




"Tower-ah UThlenga a inawkhlum a, midang ho kha lo hrilh darh ula, a chhungte pawh in lo be dawn nia"



"Thim hlim vel a ni maithei, a taksa chu a vawt vek tawh"



"La thla loin ka lo nghak ang che u" tih ang reng chu a sawi mawlh mawlh a, tu ber nge a biak pawh ka hre chuang lo. Phone a hman zawh hnu chuan "Tirawh le, nang chu lo zuk haw rawh" a rawn ti ta mai a, pen khat pawhin ka tawlhsawn ngam tawh lo hrim hrim.




"Ka duh lo...lo kal ve rawh" ka ti ṭiau a, ka ṭap lo mah se, ka ṭah a chhuak takzet. Hlauhna namen loin min ṭham a, keimah a chhuk thlak chu ka zuam lo hul hual bawk.




"Midang an lo kal mek a, an lo thlen hmain ka zuk thlah ang che" tih leh min pen pui a rual a, a hmanhmawh hmel khawp mai.



"UThlenga chu tinge le?" ka ti hap a, "Ka hre lo le, a hma pawn in awhhlum a tum fo a, a rui lungpuam a nih ka ring" a tih chuan lo rin a; rinloh ngaihna pawh ka hre lo, a in awhhlum chhan lam aimah chuan a hmel ka mitthla a chiang lutuk chuan ka ngaihtuahna a luah hneh mah zawk.




"A ke kha.... ka va su a, ka tawk chiang lutuka... a lo inthen bawk sia" thawk ka la halh a, ka sawi zawng ringawt pawh chuan ka tawt up up mai.



"Lo ngaithla teh, midang bulah i hmuh ve thu hi lo la sawi lo la aw, chuti anih loh chuan a ruang hmu hmasa ber tu i nih vangin zawhna a tam dawn a nia, sawifiah ngai chu keiman ka sawi mai ang, nang chu i lo ngawi tlat dawn nia" a ti thla mawlh mawlh a, chutiang zawhna chu chhang thei dinhmunah ka ding lo bawk a, ka hnial buai lo khawp ang.




Forest Quarter hlui awmna kan thlen chuan a ding dat a, "Kal rawh le, ka lo en ang che" a tih chuan ka kal duh mai bik lo. "I chho leh dawn a mi?" ka ti leh ṭiau a, tunah hi chuan ka bulah awm tlat se ka ti mahse, a rem teh ṭeuh bawk si lo.




"Umm...midang ka lo nghak ang, Phone pawh hi ka lo Charge dawn nia, hei hi kawl la" tih pahin Keypad Phone tereuh te hi a Jacket aṭangin a lo phawrh a, "Ka pi Phone a nih kha, lo kawl rih rawh, chanchin ka lo hrilh ang che" a ti leh zung zung a, engmah sawina hun pawh min siam loin min nam nghal dawt dawt bawk.




Kan in lampanin hmanhmawh deuhin ka pen thla hlawk hlawk a, ka lehhawi leh chuan thingkung hnuai aṭangin min lo la thlir reng a, kei ang chuan hlauthawngin chiai ve lo mah se, a rilru chu a buai ve hle tih ka hria.




Zawl ka thlen thlaka ka han hawi leh chuan Tower lampana a kal chho chu ka han hmu a, Bike lo tlan chho thawm ka hriat takah chuan hmanhmawh lutukin ka tlan zui a, kan Veranda ka thlen phei rualin tu tu te emaw Bike a an lo tlan chho chu ka hmu nghal bawk, UThlenga chhungte nge an nih a Avisa ṭhiante ka hre lo Tower lampan chuan an tlan chho a, an hmanhmawh hlawm khawp mai.




Inchhung ka luh chuan Nutei leh Pa Ruata chu ṭhutthlengseiah an lo mu a, "I va lo let leh hma ve" Nutein a lo tih chuan ka ding ren rawn a, kawmchhak tlang lawka ruang awm chu zep tlat chi ni pawhin ka hre lo.




"Nute, Tower-ah khian in awkhlum an awm a, mi an tlan chho sup sup mai" ka ti chiah chu an nupa in an lo tho uaih a, "Tower ah a, tunge ni a?" Pa Ruatan phawk lutuk hian a lo ti a, ka lu ka thing ringawt.




"Han ngaihven rawh" Nutein a ti sawk sawk a, chutih laichuan pawn lamah ṭawng thawm a ri lang lang a, ṭhenawm khawveng ho an nih hmel, Pa Ruata chu inbun ṭha sawk sawkin a tlan chhuak ve nghal a, Nutei pawh Veranda ah chhuakin a va ngaichang a, kei erawhin ka Room lam ka pan nal nal thung.




Khumah lawnin rizai in ka intuam hlun a, tukverh lam hawi chuan ka ṭhu khawng auh reng, ka thinphu rang lutuk leh ka taksa khur reh hleithei lo chu thunun tumin ka insangmar ṭeuh bawk a, vawtin ka chhungril a rawn ṭham titih bawk nen ka khua a sik thei mai dawnin ka hria.




Parda chu keuin Tower lampana mi kal chu ka thlir ve reng a, pawn lama Nutei ṭawng ri leh ṭhenawm pa a be ri chu ka ngaithla ran bawk. Tlangah chuan eng a de sep sep a, mi thleng chho an tam tawh a nih ka ring.




Avisa Phone min pek chu ka hmet eng a, zan dar riat a pel zawt chauh a; chu ringawt pawh chuan min ti hah zual hian ka hre tawh, zanin zet chu zan a rei duh dawn khawp mai.




Darkar em pawh a liam hman lo ang tih ah tlang lam aṭang chuan an rawn inphur thla a, nutling ṭap hawm hawm ri te chuan min ti mur sung sung thei, Police an lo kal tih te ka hre chawp chilh a, eng ti sual hawt silo chu ka lo hlauthawng em em lehnghal a, ka hlauh ber pawh ka hre chuang lo.




Henry-a leh Zorema an in lampana lo kalin inchhungah an inzui lut a, Avisa ka zawng ru deuh a a hmel awm reng reng ka hmu lo, min lo biak beiseiin ka Phone hum lai chu ka en leh ṭhin.




Pa Ruata lo haw thawm ka hre zui a, Nutein thil awmzia a lo zawt chul a, vengthlang tlangval in awhhlum thu leh a chhuk ve tur thu a sawi laimekin thenawmte kawngkhar kalh rak rak ri ka hria a, ka va en chuan Henry leh Zorema chu an lo chhuak a, hmanhmawh deuhin Bike-ah chuangin vengthlang lam an pan zui a, Avis a hmel ka hmu ve lo mawlh mai chuan ka awm a ti nuam thei lo.




Ani hi thu an zawt fiah a nih ka ring, awi aw....nizan maiah Uthlenga te nen an inti buai bawk si a, a inawhhlum chhanah an lo ringhlel ringawt ang tih ka hlau, amah an ring lo a nih pawhin Zorema te emaw an ringhlel ang tih pawh hlauhawm tak a ni, a ṭhiante an tel phawt chuan a mawhphurah a ngai leh ringawt emaw a nia nga, chutiang a nih vaih chuan a buaithlak dawn lutuk.




Pa Ruata a chhuah hnu chuan thawm chu a reh tlawk tlawk mai a, Sitting room a Nutei thawm ri sat sat chu ngaithla rengin khumah chuan chelo changloin ka lo ṭhu a, tukverh parda kau lai aṭanga thla eng lo lut chuan Room chhung chhuat chu a en riai ruai bawk a, Current a awm loh vang nge ni thla lah chu a eng zual em em a, zan a rei tawlh tawlh a eng zual zel emaw tih tur a ni, a mawi ka ti lo a, mi rap lek lek zawk.




Thli thaw vuk vuk leh kawmthlang lam bang thli thawt ruala kawlthei kungin a rawn nawk ri te chu a ṭihbaiawm thar riauin ka hria a, thawm ri hlekah ka tang hru reng ringawt tawh. Zung tura ka thawh ngamloh chu thuhran mut tak ngial pawh ka mu ngam lo, Bati chhit ka duh lo a, thim hi rapthlak ka ti lutuk mah se, tunah hi chuan Bati eng pawh rapthlak ka ti tho ang, engkim hi an rapthlak zo vek.




Ka ke chu ka hmuh phakloh a a awm ka duh lo a, chuvanga ka mu ngam lo hulhual bawk, bawp khawkherh at a ṭhuin ka Room chhung eng riai ruai ah chuan ka hawi kual sek a, ka puan sin chu chhuata a tlak ṭhen hlauin ka pawm khawm sauh sauh a, khum hnuaiah chuan engnge maw awm tur a ka ngaih tlat vangin ka mawng a za ruai lehnghal!




Ka mittui a lo hnam ṭiam ṭiam a, ka ṭah loh nan ka insum ve hle chung pawhin ka mitah chuan mittui a tling pam tho. UThlenga hmel mawlh kha a ni, a damlai hmel ka hriat chian em em mah nise a thi hmel kha ka hmuh chian em avangin ngaihtuah loh tum sateh mahila mitthla ah a rawn lang leh ṭhin a, chiang lutuka a ke ka va nawk lai te kha ka ngaihtuah let leh phei chuan ka hnungzang thling chenin min fan thei nia!




"Mate, i muhil tawh a mi?" Nutein an Room aṭanga a lo tih chuan aw thian te te phawtin ka chhang a, "I Pa Ruata kha a tlaivar ve dawn aniang, kawngkharpui kha va kalh daih rawh" a tih vang chuan ngam lo eng ang mahila ka thawh chu a ngai ta tho tho.




In ti paukhauh luiin ka huaisenna zawng zawng sawm khawmin ka tho chhuak a, ka tho chhuak phei chu a vawt zual hian ka hre mai a, kawngka ka kalh laite chuan ka kut a khur nasa kher mai, ka tho ta sa sa thawh leh ngai tawh lo turin Bathroom ah ka lut a, keimah leh keimah chu ka intih ṭhaih ni ta berin ka hria, lungmuangin ka awm thei lo a, Bathroom aṭanga ka chhuak leh te chu a tlanin ka tlan a ni tawh thang tawh.




Tui Bottle nen hmanhmawh deuhin Room ka pan a, a ngai tein khumah chuan ka ṭhu leh a, Nutei pawh a la muhil bik lo aniang a thawm sat sat reng a, a thawm ka hriat chang chuan ka lo thlamuang ve leh huai ṭhin a; mah se, rei vak lo ah a thawm a reh zui dak a, thli thaw vuk vuk ri leh kawlthei kungin bang a nawk ri chiah chu ka thawm hriat chhun a ni leh tawh, zanin zet chu zan lungchhiatthlak leh ṭihbaiawm tak a ni.




Phone sana ka en leh chuan dar 11 chauh a la ri a, ka kawng a na ut ut tawh a, lukham siam remin khum lu bang ngheng chuan ka ṭhu rem sauh a, ka ṭawngṭai zing malh malh khawp mai, chuti chung pawh chuan ka dawih chu a reh thei miah lo lehnghal a, rilruin tlaivar a tum em em ringawt a, Avisa Call lah chu ka chang pah reng bawk.




Zobuaii te emaw Number a awm takin ti a Contact list ka en diat diat lai chuan Zawhte hram thawm ka hre thut a, kan kawmthlang mai chu niin ka hria, a hram nge a ṭap zawk ni! Nausen ṭap thawm ang mai a ni lehnghal, ka ṭhuthmunah chuan ka thaw dep dep ringawt a, ka hlauh ti zual tura min runluih te pawh a ang lek lek zawk hial!




Ka Phone ken lai lo nghawr thut vang chuan ka au chhuak lo chauh a, ka puan sin karah ka hlauh pil daih nghe nghe. Hmanhmawh deuhin ka dap rawk rawk a, lo Phone tu chu "Mampuia" tiin a in Save a, Avisa tih ka hre nghal mai bawk.



"I mu tawh em?" a lo ti nghal pang a.



"Mu chiah lo, ka muhil thei lo a" pangngai taka tiin zangkhai thei ang ber turin ka chhang a, a aw ka hriat rual khan ka hlauhna te kha an kiam duak maiin ka hria, ka ngai vawng vawng mai bawk.




"Mutthil tum rawh, kan tlaivar dawn a, naktuk zingah ka lo chho ang" midang hriat a hlau a ni maithei a ṭawng zawi viau a, pawnah a chhuak lawk a nih ka ring.




"Ka muthilh theih pawh ka ring lo, ka lungphu te hi a mumallo lutuk a, bakah.... ka mit ka chhin hian UThlenga hmel kha ka hmu zel a..." ka sawi tawp lam chu ka hnuk a ulh lek lek hial. "Ngaihtuahloh tum la" a ti leh mai a, chutiang te thei ila chuan ka ti daih tawh ang chu maw le.




"Ka thei lo a lawm, awm ve tal la chuan....." ka ngawi rauh rauh a, ka muttui a rawn lum thla pap mai. "Ka ngai lutuk che" ka aw chu a ri che che chauh tawh, ka zep lo...tunah hian ka ngai takzet, ka mangan lai leh hlauthawnga ka awmlaia ka inhnemna ṭhin a angchung kha ka thlahlel takzet a, duat deuha min kuah a min thlamuan leh turin ka mamawh bawk. Engmah sawi lo mah se, a pangtilum ringawt pawh ka thlamuanpui em em ang tih ka chiang a ni.




"I muthilh theih loh chuan min lo be zeuh zeuh dawn nia, engmah hlauh tur a awm lo, nang chu nula huaisen i nih kha" nui lek lek chungin ti mah se a sawi thu tak viau lawi a, ka inhru hul ve nghal thuai bawk.




"Police ho khan thil an zawt che em?" tiin ka zawt ta daih a, ngaihven hmasa tur pawh ka ni zawk maw le.




"Aw...ka hmuh thu ka sawi a, a bak vak a awm lo, a pa nen vawiin lamah an lo inhau a, chu mi rui lungpuam chu anih hmel" a lo tih chuan chanchin lawmawm ni hauh silo chu ka lo thaw huai a.




"Nizanah in intibuai bawk sia ka lo hlauthawng lutuka" ka tih chuan "Hlauthawng suh, chutiang engmah buaina tur a awm lo a nia, zan a rei dawn tawh muhil tawh rawh" a lo ti sam leh mai a, kan inbiakna kan tihtawp hnu chuan ka thin tawt zualpui chu a veng ve ta deuhin ka hria.




Muthilh ka tum ngial a mah se, mutchhuah chu khawilam ka harh chiang tulh tulh a, ka mit ka chhin ruala mitthla a lo lang ṭhin vang chuan thinphu a rang leh dup dup ṭhin, Dar khat rik hnuah pawh ka la meng kar reng a, muthilh chu tum buai loh law law ka rilruk tawh.




Avisan 'Min lo be zeuh zeuh dawn nia' a tih kha hre chhuakin ka Call a, a lak theih loh vangin Phone chu ka dah let leh a mah se, reilo te hnuah Message a lo thleng a "Dar thum a rik hunah ka lo chho ang" tih zawng a ni, ka tibuai lutuk angem aw ka ti deuh a, ka inthlahrung ru angreng khawp mai.




Inthlahrung viau e ti lo chuan ka nghakhlel hle lawi a, chutih laia ruah sur hnai tur ang maia kawl phe leh zawk ṭhin chuan ka rilru a ti hmanhmawh ru riau bawk, thla eng a dul tawh hle a, thli a thaw nasain chhum a zing chhah viau tawh a ni ngei ang tukverh pawn lam chu a thim ruih tawh a, boruak a vawt zual hle bawk, a lo thlen hma a ruah a sur mawlh a ni ka hlauh tawh ni.




Dar thum chu a ri har takzet, Minute tin chu rilruin a chhiar a, tukverh chu hawng ngam siloin ka thlek leh rih ṭhin, ka Phone ka en chuan dar hnih leh a chanve a ri tawh a, Bike tlan thawm hriat beiseiin ka beng ka chhi ngun hle a, hetiang em em a mi nghahhlelh ka neih awm hi ka la hre ngai lo, ka helhawlh ni ta berin ka hria.




Ka mut a chhuak pawhin ka hre miahlo kha a nia mah se, ka lo muthlu ta tho a nih hmel e; Phone nghawr ri ah chuan ka harh hlawl a, chutih rualin tukverh darthlalang chu vawi thum a rawn kik karh karh a, Parda ka va keu rualin a Phone hmai a lo lek eng vah a, ka hawng chiah chu thli a rawn thaw lut hawk mai a, pawnlam chu a vawt ṭha ngang mai.




Engmah pawh ka sawi hmain tukverh ah chuan a rawn lawnkai tharh a, tum loh deuhin ka khumah kan ṭhu dun ta chu a nia. Ruah lah chu a rawn tla zui phuar phuar a, thli a tleh deuh titih bawk nen a vawt takzet tawh.




"Darkar khat mutna hun ka nei" tih leh ka khuma mut a rual a, hamhaih deuha ka lo en laichuan ka banah rawn vuanin min pawt mu zui a, insi riala muin hnai fahranah kan in en ran bawk, "I la hlau em?" a tih chuan lu ka thing vut a, tunah tak hi chuan ka hlau lo mah se, ka awm a nuam lo khawp mai, ka bulah a rawn riak ringawt dawn a, heti em em hi chu a lua ve deuhin ka hria.




"Min lo khan rawh" ka chet hmain ka ke chu ti kangin min rawn khan chial a, ka kawngah nghet lutukin min kuah zui bawk. "I vawt vek a nih hi" min en vung vunga a tih leh lai chuan a lamah ka tawlh hnai ve hrat a, a awmah beiin a lungphu dup dup ri chu ka ngaithla a, ruahsur thawm bengchheng tak karah pawh a lungphu ri chu chiang takin ka hre thei.




A hmui lum thar thara ka chal a rawn tawh lai chuan min kuah nghet salh a, a pangtilum te chu ka kham thei lo, a awmah chuan hmai phumin thawk ka la ham ham a, Avisa rim ka hria; engthil dang rim mah niloin Avisa rim a ni, a rimtui ka ti a ka ngainat zawng tak a ni bawk.




"Lo dak teh" a tih chuan che duh mai loin a awmah ka bei reng a, ka chal a rawn fawh leh takah chuan tlema insiamremin ka hawi chho a, ka hnarah rawn fawp zauhin ka biang a rawn dawm zui hmiah bawk, chutah rawn thokang uaihin ka chungah a rawn inbengkhalh a, ṭawng ka tum chiah chu ka hmui rawn kharin uar zetin min fawp zui a.




Pawn ruah sur leh khawpui ri te chu thawk lehkhatah an chawl duk maiin ka hria, hmangaihna ah ka luangliama ka pil riai riai ti ila ka sawi sualin ka ring lo, engin nge ka velah min hual tih ka hrechang tawh lo a ka hriat zawng chu ka mipa hriat tawh a zawnga infawh zei ber mipa in lungchim zetin min fawp mek a ni tih zawng hi.




"Tikhan i zia deuh tawh em?" min chhuk en ran chunga a tih chuan ka hmui hupin ka lo bu nghat nghat a, a nui suk mai. Min lo fawp leh zauh a "Tawk tawh" ka tih takah chuan ka sirah a let thla thawk a, "Mizo thlahrang i hlau lo emaw ka tia" nui kar kar chungin a ti zui a.




"Khatiang kha ka la tawng ngai lo a lawm, min ṭhawng em a sin" ka ti leh hap a, " I tawn vawikhatna a ni ve em, engtin nge i hlauh ve miahloh theih le?" ka sawilai chuan inchunglam hawiin a ngawi ran , a ngaihtuahna chu hmun dang daihah a awm emaw tih tur a ni.




"Vawikhat dang chu ka hmu tawh mahse, khatiang lo deuh kha a nia" a ti zawi deuh sup a, "Engtiang?" ka lo ti vat nain min chhang zui tawh lo. Ka kham turin a kut a rawn phar a, a lamah tawlh hnaiin ka lo kham ve vat a, chutah a sir zawnga rawn inletin ka kawr a rawn hlim zui a, a kut ka lo man bet rang khawp mai.




"Aih, hetiang hi chuan inkawm lo ang" thawk a la deuh hawk a, min hnial buai ka rin tehlul nen duat deuh hian min rawn kuah a, engmah sawi zui loin ka inkuah hle hle ringawt.




"Awm ve loh i chak chhan kha min hrilh teh?" a hrawk bawk khawih niap niap chunga ka tih chuan a nui suk a, "I awm ve hi ka lawm teh mai ania, chuvangin awm ve loh chak tawh reng reng suh" ka ti nawn leh ngat a.




"Awm ve reng se min duh em?" a tih chuan ka en rang khawp mai.



"Duh e, chuvang a lawm rui tawh lo la, i nun fimkhur rawh ka tih che, rei deuh i bula awm ka duh a lawm, i ruih reng chuan UThlenga ang khan..." sawi zo duhloin ka ngawi daih a, "Ka awm reng emaw awm reng lo emaw, ka damchhung hi chuan min theihnghilh ngai lo ang" thutak zeta a tih chu a awmzia ka hrethiam lehpek tawh lo, a lam hawi ka tum lai chuan ka lu chungah a khabe a rawn nghat dat a, "Muhil rawh le" zawi deuh tak hian a ti a, a kut lehlama ka sam chulin min kuah nghet sauh bawk.




Engtik laiin nge ka muthilh hman ka hre miah lo, ka harh leh chuan khua a lo var uar tawh a, pawn lamah chuan chhum a zing nasa khawp mai, ka tukverh inhawng kau deuh aṭang chuan thli a rawn thaw vawt her her a, Avisa chu engtik laiin nge a chhuah takngial pawh ka hre lo.




Rei vaklo ah Pa Ruata lo haw thawm ka hria a, Nutei thawh hnu lawkah ka tho chhuak ve a, zing lamah pawh ruah a la tla cherh cherh reng, ṭhenawm te in lah chu a inkalh ṭhiap mai a, Avisa chu vengthlang lamah a chhuk leh daih a nih hmel e.




Tukṭhuan eidawnah Veranda a ka va chhuah laichuan Tower lam kawnga Avisa leh Dawngzela lo chhuk chu ka han hmu leh lawia, Quarter hlui bulah chuan dingin tlanglam chu a hawi vang vang a, a lampanin ka kal ve nghal thuai bawk.




Min hmuh rual chuan ban a lo vai zauh a, thingkung hnuaiah chuan min lo nghakin a lo ding a, "Good morning, Mangpui i mang em?" nui miah lo hian a lo ti reuh a, min ti lai lo chauh a ni.




"Ti ve ziah suh" ka tih laiin a hmui a lo pet sawi duh lek a, Dawngzela chu biain "Lo zuk haw la, ka reilo ang" tiin mihring biak tak hian a bia a, a hmel ngui zet chu a mut ṭhat loh vang nge nizan boruak vang kha ka hrethiam lo.




"Ka rualin chhuk thla rawh aw" ka lam hawia a tih leh chuan ka bu nghat a, chutah a Cigarette phawrhin zial a ṭan a, in lampana Dawngzela kal thla ka thlir laia ka thawm hriat vang chhuan ka nghilh dup mai!



Kha ri kha!



A lam ka hawi vut a, a Lighter a talh leh phat rual chuan phawk lutukin ka lo en a, ka hai hauh lo, kha ri kha nizan khan ka hria! Tower ka thlen chhoh hlim khan Generator bulah khan ka hre chiang a ni!



(ZAWMNA)



"Chaw i ei tawh em?" a rawn tih chuan chhan mai nachang pawh ka hre lo. Ka rilru a buai deuh nuai a; thil ni lo pui pui ka ngaihtuah zui a, ka ngaihtuahna chu keimah ngei chuan awih awmloh ka ti!




"Enge Tower-ah i tih a?" chik lutuka ka en laichuan a zial zuk chu a fawp khu hlat hlat a, "Diesel ka dah chho a, nizan ah engmah ka ti hman leh si lo a" ka lam lo hawiin tawi te hian a kiai suk a, ka nuih let ve hleithei der lo.




"Nizan khan engtin nge i lo lan thut theih a, min lo zui tihna a mi?" ka rilru chuan a lo awmsa reng tawh em ni aw tiin ka ngaihtuah a, thawm awm miah lo a ka bul a lo thleng thei te kha mak ka ti hnuhnawh riau tawh.




"I hnungah ka kal reng a lawm, Quarter-ah khuan ka awm a, i kal chho kha ka hmu che a" tiin Forest Quarter hlui tlabal zet tawh lam chu a thlek zauh a, ka thil zawh chu mak a ti deuh nge ni min en chik hle a, kan in en hnai dunin kan thutak dun ngang mai a, engnge maw hlauhthawnna hian ka tirilah min ṭham leh der tawh bawk.




"I kal thawm ka hre miah lo" ka ti zawi sep a, "Ka kal hnaih lutuk lo che a" min en dan chu ka duh miah lo, zep nei a ang lutuk, a engamah hma chuan ka tawt nghal up up mai.




"Chaw chu i ei tawh em?" ka lu ka thing ringawt a, ka rilru a buai tak zet, nizan ka thlen chhoh khan thawm ka hre mai lo a mahse, let leh ka tum lai tak khan Lighter talh ri ka hria a nih kha, ka beng chhe ri mai mai chu a niin ka hre lo, tun lawka Avisa Lighter talh ri ka hriat takah phei chuan ka chiang angreng khawp mai. Mah se, zawhna ni ta chu tu thawm nge ni ang?




"Enge i ngaihtuah a, i rilru a va buai hmel ve?" ka hmai zawnah kun hnai meuh a min lo en takah chuan thawk ka la hap a, tlang pan chhohna lampang chu melhin chil ka lem ri khalh bawk.




Ka bula mi lo nui suk chu ka en leh rih a, ka hmuia rawn fawh mai a tum laichuan a awmah lo namin "I lo awm sa miah lo maw?" ka ti leh tawl a.




"Awm sa nang, tinge? Mi hmuh i nei em ni?" a tih chuan lu ka thing leh lawi a, Avisa ka hnungah a lo kal chauh a nih tak tak chuan tu emaw midang an awm ve tihna a ni thei a ngem le!




"Chaw chu eithuai la, i insiam chhung nen kan tlai lutuk ang, mi nghah hi ka taima vak lo ania" lo kal ve nghal mai tum hmel a put loh vang chuan "Enge i tih leh dawn a?" ka lo ti he haw a.




"Kan thing ṭiak kha an nung ṭha em ka ve en lawk teh ang" a ti sam mai a, a Phone ken lai ka bih sak chuan chaw ei a lo hun viau tawh, "Phone thar ka nei a, i pi Phone kha vawiinah ka pe let ang che" ti a ka hrilh hnuah In lampanin ka chhuk san a. In ka thlen hma deuha ka han lehhawi chuan Tower kawng nilo; thinghmun panna lama hmanhmawh deuha a kal phei chu ka va hmu a, eng a ti dawn chu ni maw?




"Thing ṭiak ka en dawn" a ti si a, an thing ṭiak dahna chu Quarter hlui thlanglamah a ni bawk si, dawt min hrilh anih hmel. Ngaih ṭhalo deuhin inah ka lut a, ka chhungte chuan chawei turin min lo nghak reng tawh zawk a, chawei lai te chuan ngaihtuahna a la peng hleithei meuh lo.



"Kan mitthi kha a chhung ten thah anih an ringa, Case an File a ni awm e, a inkhaina hrui kha a sang mah mah a, rahchhan awm bawk silo te kha an ringhlel a" Pa Ruatan a tih chuan hawi chhuak vatin "Thah a ni maw?" ka lo ti hluai a.




"A...engmah a la chiang lo, ka chho khan ka han hmu ve hman a, a rinhlelh awm ve riau a lawm" a tih leh chuan "Tower ah a lawn te a ni zawk lo maw, a sang te chu awihawm daih zawk lo a mi?" Nutein a lo ti thuai a.




"Ka hre lo le, a lawn pawh a ni thei tho mai, inawhhlum a lo tum fo tawh chu an tia, nimin chhun lamah a pa nen an lo inbakkaih a niawm a, a chhungte hian an mahni vanga ngaih hi an hreh te pawh a ni ve thei tho, zan hmasain Vengthlang tlangval intihbuaina ah a tel a nih hmel bawk a" Pa Ruatan a tih leh lai chuan chaw bar nachang pawh ka lo hre tawh lo.




"Haw tu a nei ve nual dawn anih chu a, Addict insual hrat bawk si chuan" Nutein a tih chuan ka lo ip ru nasa mai a, Avisa te ṭhian ho ka ngaihtuah chhuak lo thei lo.




"Thil ruk a ching te an ti, mifel vak chu a ni lo, Case pawh File mah se, awmzia vak a nei tawh lo ang, nizan lam hnuhma zawn dawn lahin ruahin a sur hnan hrep tawh a, kan Avisa hian a hmu hmasa ber a, a sawi dan aṭang lahin engmah chhui zawn theih a awm bawk si lo a" Pa Ruatan a ti leh niah niah a.




Tu emaw ka thlen hma a lo awm sa awm tlat ni a ka ngaih ang hi lo dik ni ta se la; Uthlenga kha thah a ni thei mai dawnin ka hre tawh, an awm ngei em chu ka chiang hauh lo nain rinhlelhna liantak ka nei lawi a, ka ngaihtuah ngun poh leh felhlel a awmin ka hre zual a, ka inngaihtuah hah hlui thei mai.




Ka insiam chu ka muang chang hle a, nizan thil thlen dan chu rilruin a chhui kir rauh rauh bawk, Tower ka thlen hma khan min zui tu thawm ka hre lo a, hla deuh hlek pawh ni se ka ri hriatna a ṭhat tehlul nen engmah ka hre lo kha mak ka ti a ni, thawm ka hriat chhun lah Tower ka thlen hnuah a ni bawk si, kha thawm ring lo te si kha chiang em emin ka hre leh lawi a!




Lalchhuansanga khan dawt min hrilh a ni thei a ngem? Rinhlelh duh lo viau mahila rin harsa ka ti tak zet, nichin lawk pawh khan dawt min hrilh zo chiah lehnghal. Awi aw!...kei hi, ngun deuha ka inngaihtuah a ngai a ni.




Ka khumah chuan zangthal duaiin ka mit ka chhing vang vang a, nizan thimhlim maiah khan Uthlenga kha Tower lampana a kal chho kha ka hmu a, ka mitthla ah pawh a la chiang viau mai, a lu a hiat chho nauh nauh a nih kha maw....




A kutin engmah a keng lo, hrui emaw pawh engmah a keng lo. Anih si chuan Tower-ah hrui a dap chawp tihna a ni ngei anga, a ruang ka hmuh laikhan a inkhaina hrui lam reng reng en nachang ka hre lo, a hmel ka rap em vang khan rei pawh ka en duh lo anih kha. Ka hnungzang zawn velah khan a ke a inkhai a, a inkhai sang thawkhat viau bawk.




Thah lo ni dawn ta sela tu thah nge ni ang tih chuan a ni rilru tibuai ber chu, a hmelma hnaivai ber ka hriatchhun lah chu nizan hmasa lama a insualpui Avisa te ṭhian ho an ni mai si a, a hma deuh lawka Zoreman a lo hnek tawh bawk vanga an thinur rawn che chhuak an la ni lehzel a, ringhlel duh lo chung pawhin ka ngaihtuahna chu an mahni ah ngawt a tawp zel bawk si.




Ka rinhlelhna ti zual tur tinga Avisa khawsa zia hriatthiam har ṭhin lutuk hian min ti buai bawk. Enga tinge helai Forest vengah daih daih Uthlenga kha a rawn in awh hlum? Enga tinge Avisa enkawl Tower-ah kher kher?




In awkhlum turin hrui remchang a awm beiseiin a lo kal tihna em ni ang? Ka thluak chuan engnge maw ngaihtuah chhuah chu tum ve sateh mah se, tawite ah a tawp hmuk zel a, ka hah hlui ringawt mai a ni.




Avisa hi ka hrilh ve mai dawn em ni ang aw tiin ka ngaihtuah a, ka thawm hriat chung chang kha hrilh ta ila engtin nge a ngaih ve ang le, amah ka ringhlel deuh reuh tih te hi hria sela engtin tak ngai ang maw. Ngawi teh...! Khumah chuan ka ṭhu chhuak hluai a, ani pawh hian engthil emaw hriat a nei a ni lo maw le? Nizana thawm kha lo hre vein zingah thlithlai turin a kal te pawh a ni thei.




Ka thil ngaihtuahna vang chuan ka thaw veng huai huai a, chumi hnu lawkah kei aiin lo thleng hmasa ta se tih bawk chu ka ngaihtuah leh a, chutiang chuan ka thluakah ngaihtuahna hrang hrang a lam kual vel ni berin ka hria.




Bike ri ka hriat tak vangin hmanhmawh deuhin Room ka chhuah san a, Henry te pafa inphur chhuak tur chiah chu ka va hmu a, ka lam hawia nuisangin "Handout kha ka hmu aw, nang nge nge a tihzia ṭhin khawp mai" a lo ti var a.



"Hen-a zawk i ngaizawng emaw ka tia Viste-a zawk a lo ni maw?" R.O in a lo tih chuan ka lai ram ram a, chhan pawh ka chhang let lo, ka nui tawi tak tak ringawt.




"A la insiam anih kha, va tur deuh rawh" R.O bawk chuan a ti leh a.



"Va tur tak tak rawh, in tlai lutuk ang" Henry-an a tih leh takah chuan ka bu nghat a, an ni pawh an tlanchhuak zui ve thuai a, Avisa te in lam ka pan laichuan zai ri ruai ruai ka hria a, inchung erawh awm an awmlo emaw tih turin a reh duk lawi a, zai lo chhuahna lam chu Bathroom niin ka hria.




Sitting room lam ka pan laichuan Avisa Room inhawng hiai chu ka va hmu a, engtin nge a Room a awm reng reng tiin kawngkharah chuan ka va dak a, a Bed of Roses ah ngei mai chuan a thawmhnaw hak tur niawm tak hi a lo awm a, thosilen a zar lemlo a, lukham pakhat tlawng a awm bawk a, a khum chu a ruak ang reng viau thung.




Kil khatah chuan Steel Almirah lianpui leh pheikhawk bawm lian zet hi a awm a, pheikhawk chu uar ve thawkhat tak a ni. Bang thlang lamah chuan thingkung ro ṭawiluih hi a awm bum mai bawk a, rawng a hnawih hnum deuh hlarh bawk nen a nalh vei phian bawk a, lukhum leh eng engemaw tar nan a hmang a ni ber.




Chhuah leh mai ka tum chu dawhkan tea ka thilh hmuh vang chuan ka ding leh dat a, enchian tumin ka pan phei zui bawk. Sarang chhungah Cigarette bung la sei fahran hi a awm a, a sarang lah chu Rubber in a ṭawn ṭup a, a ngaihna ka hre lo khawp mai.




Ganja emaw ni dawn le? Cigarette pangngai ve mai ni chuan ka hre bawk si. "Het" tih ri ah chuan ka phu chiam a, ka rak chhuak ṭhawt nghe nghe!




Awm dawm meuha ka lo en laichuan Towel veng chungin a lo lut a pheikhawk pawh a bun lo. Ka lampana lo kalin min rawn fawp nghal thawr a, a taksa thlawp zaihin min chawikang bawk. "Min thlah teh, a tlai tawh teh ania, insiam vat vat rawh" ka lo ti chul a, min fawp ṭha leh te tein a hmanhmawh phah lem hlei lo a.




"E khai aw, ka Towel ven a tla daih!" a tih chuan ka hawi thla vut a, "I la ven reng hi! ka tih chuan nur nang hian min melh a, "Tunah khan enge hmuh i beisei a?" a ti chu awihlo fein ka lo en thung.




"Ringawt a che, chutiang beisei hmel ka pu a mi?" ka lo ti kha kha a, a nuih a za khawp mai. "Keiman ka pu" tih leh khum lam min panpui a rual a, ka lo tal chiam chu ka mawngah a rawn beng ri thlawp a, a thinrim a maw ti a phawk zeta ka en laichuan khumah min theh thla zui dawp a, ka awm a nuam lo ruai mai, khum vela inkawm hi chu ka duh dan a ni lo tak tak a ni, tun ang dinhmunah leh lek phei chuan.




Hlauthawng ru deuha ka lo en laiin khuma a kawr chu lain a in ha sawk sawk a, "A vawt lutuk" a la ti zui! Min tih hlauhthawn hman tehreng nen.




"Cigarette saw ti nge i dahṭhat a?" a khumah bawp khawkherh ata ṭhuin dawhkana sarang chu ka kawk a, "Zuk leh ah" tih zawngin min chhang a, ka awih vak lem lo.



"Avis" a Boxer hain a thawmhnaw bawm lam a pan a, a pian a nalh vei phian mai, a sek tih tur em chu a ni lo, a dulah pawh Six pack lam a lang lo, taksa inphut mawi tawk tak erawh a ni chiang a lawm.




"Chhuansang" a faifuk hlarh hlarh a, a ti laklawh nge ni min chhang mai loin a thawmhnaw bawm chu a hai ruk ruk reng.




"PANGPARHNIM" ring fahrana ka tih takah chuan a rawn lehhawi vut a, "Thil dang daih hrilh tur che ka nei a" ka tih chuan a dar a chhin uk ringawt.



"Eng lo....enteh" ka ti leh hluai a, min rawn ngaihven tawh khawp mai.



"Eng lo chu khawnge?" nui chunga a tih laiin kei erawh thutak viau. "UThlenga kha mahni intihlum a nih i ring tak tak em?" ka tih takah chuan a nui tawp hmuk a, zawhna mitmengin min en tawh.



"Ti nge?"


"Ka zawt mai mai che?"



"Min zawh mai mai chhan i nei em?" a ti lehzela, a ha hawlh zawng tak a nih hmel.



"Mak ka ti deuh a" amah zawk chu chik deuhin ka en a, ani pawn chutiang tho chuan min en ve bawk.



"Mak ka ti ve duh ania?" a tih leh chuan ka thil ngaihtuah chu hrilh ve mai tur em ni ang ka ti rauh rauh a, ka rilru a buai leh nak tawh. Engmah pawh ka sawi hmain ka lamah lo kalin ka hma chhuatah chuan a rawn ṭhu hniam a, "Nizan khan hmuh i nei em?" chiang khel khawl hian a rawn ti zui a.




"Aih nei lo" thawk a la hak a, ngun lutukin ka lo en thung. "Dar engzat nge?" tih paha thawh leh mai a tum laiin a banah ka lo vuan vat a, "Thawm ka hria a, Lighter talh ri khep thawm a nia, nangmah i ni em?" ka tih takah chuan phawk lek lek hian min en a.



"I hre chiang em?" eng ngemaw hriat sa nei ang mai a ni!



"Aw, ka hnungah i lo kal niin i sawi bawk sia, ka thawm hriat kha chu.." ka sawi laimekin "I hre chiang maw, pen thawm te i hria em? Hmuh i nei em?" a lo ti zung zung a.




"Aih, Lighter talh ri ka hria" ka sawi laimek chuan ka biang tawn tawnah a rawn dawm a, "Ngaihtuah chiang rawh, tu emaw hmuh i nei miah lo maw?" a ti nawn leh ngat a, a awmdan chuan ka ngaih a ti ṭha lo zualin ka thinphu a ti rang dup dup thei.




"Tumah.. ka hmu lo..." ka aw chu a lawi rat tawh.



"Thawm chu khawi lam aṭangin nge i hriat?" a bengverh zawng tak thil chu ka sawi a lawm, a ngaihven mah mah tlat a ni.



"Generator piah lamah khan a nia, ka chiang vak lo mah se..."



"Ka ring che, tu emaw an awm anih chu" a lo ti khauh mai, min ringhlel miah lo tih a hmelah a chiang hle bawk. "Tu nge awm ang?" phawk zeta ka tih laiin a ding vut a, "Zial rim chiah ka hria" dawhkana Cigarette bung chu rawn lek pahin a ti zui a.




"Kha kha eng nge a awmzia?" ka lo ti hap a.



"Nizanah khan ka han let leh a" a tih chuan thil awmzia ka hrethiam riai ruai tawh. Mah se, mi tam tak an kal chho a, chu Cigarette bung ringawt chuan awmzia a nei thui vakin ka ring lo.




"UThlenga kal chho kha ka hmu a, hrui a keng miah lo a, a inkhaina hrui kha i hmu em?" ka tih leh chuan a nui deuh suk a, "Eng mah a keng lo, i chiang em?" ka chiang tih lantir nan ka bu nghat a.




"I thluak i van Brain reuh ve Chhingchhengte" ka lamah rawn inherin a ngai te bawkin ka hma ah chuan a rawn ṭhu a, "Hrui thar ṭha deuh mai a nia, i thil hriat hi a ṭangkai lutuk, he Cigarette bung hi Tower thlanglam ngaw chhung kal thlakna ah khan ka chhar a" sarang chu phelh mawlh mawlhin ka hnar bulah a rawn lek hnai a, 'Hnim rawh' min ti nimaiin ka hria.




"A rim kha i hria em?" a tih chuan a ngaihna ka hre lo hle ringawt.




"Cigarette rim ka hria" ka ti tawl a, ani a lo nui suk thung. " I zuk ngailoh vangin a danglamna i hre lo anih kha, rim dang a nam a lawm, eng rim nge ka hre thei mai lo mah se, ka la hre vat ang" a ti sam leh mai a, a hmelah chuan a phur hmel hlein ka hria.




"Miin an that tihna a mi?" ka tih leh takah chuan a bu nghat nghat a, "Tu emaw chu nizan khan ngaw chhungah khian a biru a, ruah sur kher lo sela chuan a hnu hma pawh a awm tur maw le, nizan ruah sur kha a pawi khawp mai, nilo sela chuan..." min bia niloin amah a inbia a ni mah zawk.




"Eng tin nge kan tih ang?" ka tih chuan "Khawiah mah i sawi tur a ni lo, tuna kan thil sawi hi midangin an hriat a rem lo ania, ka ṭhiante emaw i chhungte emaw Nuihiau a pawh" a ti nghat nghat a, Cigarette bung chu enin chal chuar tap hian a inngaihtuah vung vung bawk a, amah ka lo rinhlelh na te chu a bo fai vek tawh, chu chuan ka awm a ti nuam huai huai bawk.




"A chhung ten Case an File dawn an tia, Zorema te hi.." a hmel ka hmuh rual chuan ka ṭawng tawp chawt a, lawm lo hmel a pu in ka hria. "Zorema chu a ni lo, a thawi pawhin sawi miah suh" a ti hluk a, ka ṭawng tawp chiang khawp mai.




"Nang chu lo buai ve lo la a ṭha ang, tuman ruang i hmu ve tih an hre lo bawk a, hre ve angin i awm lo tawp dawn nia, tlaiah UThlenga i hmuh thu pawh chu sawi a remlo ang, ka hnenah bak tu hnenah mah sawi suh" khauh zet hian a ti nghat nghat a, a hmel landan inthlak danglam thut vang chuan ka ṭi dak tawh, Zorema ka sawi chhuah vang kha nge pawh ka hrethiam lo.




"Tower ah chuan chho leh lawk teh ang, Frist period i awl thei ang tiraw?" ka chhanna pawh nghak loin a che vut vut a, a inpeih hnu chuan rilru nuam lo deuh chungin ka zui chhuak a, a awm dan chuan ka awm a ti nuam lo ru khawp mai.




Thing kung lian deuh awmna kan thlen chuan "Helai i thlen hian khuta ṭang khuan ka lo hmu che a" tiin nizan a a lo awmna Quarter hlui lam chu a hawi thla a, "UThlenga chu a chho hma viau a nih hmel, ka kal chhuah pawh khan a la hma angreng a, tu emaw in Tower ah khian a lo nghak anih ka ring bawk a" a ti leh zat a. Chu chu thil nithei tak a ni.




"Zawl i chhuah chhoh khan helai hi ka thleng tawk vel ang" a tih leh chuan ngawi rengin ka en kar a, tlanglam pana a pen chho hlawk hlawk chu a hnungah ka zui ve zel bawk.




Tower awmna zawl kan thlen chuan ka hmul thi an ding sung sung in ka hria, ka tiril ah min ṭham tu a la awm reng a, a hmunhma ringawt pawh chuan mirap a ni!




"Hetah hian ka ding a, chuan thawm ka hriatna chu sawlai saw" tiin Generator awmna in chu ka kawk a, "I beng a va ṭha ve" tih leh ka kawhna lam chu pan a rual a, rang lutuka a hnungah zuiin ka hawi kual ruai reng bawk a, hlauhna hlirin min ṭham niberin ka hria, ka awm a nuam lo takzet.




Kan dinna lai chu ke hniak awmna hnu nge hi a chiau pur bik a, nizan lama an hnu hma anih hmel e. Tower lam ka han melh chuan mitthla ah a rawn lang uar a, Avisa banah ka vuan rang khawp mai, "I thawm a hriat hnu khan Generator phenah hian biruin a hnuah helamah hian a kal ta a" tih pahin Tower piah a ngaw awmna lam chu a pan phei a, hlat ngam si hek lo a banah chelhin a kalna lam a piangah chuan ka zui ve zel lo thei lo.




"He ta ṭang hian a chhuk thla anga, ngaw aṭangin thlanglam kawngpui a zuk pawh anih hmel" ka lam lo hawiin "Khulai Fah kung khu i hmu em" tih pahin thingkung lian deuh hi min kawhhmuh a, "Khumi bulah khuan Cigarette bung kha ka chhar a, nizan kha chuan kal thlakna hnuhma kha a hmu theih a, ruah sur lo sela chuan zingah hian a chiang zawk tur maw le" a lu tuai vutin a ti leh rih a, engtia tih zel nge a tum tih hre lo mahila keichu ka hlauthawng takzet, a chhui pawh chhui zui miah lo se la ka duh zawk mah tawh.




"Rinhlelh i nei em?" ka tih chuan a bu leh nghat a, zawhna mitmenga ka en laichuan "I hriat ve loh a ṭha zawk" a ti mauh mai.




"Zorema a mi?" ka tih chuan inher vutin Tower chhip chu a melh chho vang vang a, "Ka hre lo, anih loh beisei ang" a ti zuai ruih a.




"Keichu ka hlau thawng a nia, nang pawn buaipui zui duh suh, tualthah hmang phei chu....kan lamhnai min hrechiang tu anih phei chuan kan ringhlel tih a hre vat ang" ka lam a lo hawi rualin ka darah min rawn kuah a, "Ngaihṭha deuhin lo awm rawh, i hmel a hmu lo a, engmah i tan hlauh tur a awm lo ania, hre miah lo anga i awm kha a ṭha ka tih kha" a ti ve tak nain ka hlauh chhan tur chu ka hrechiang ngang mai.




"Hlauhawm e, ka aw a hria a lawm..." ka lo ti vin hlar a, chu chu a lo beisei miahlo aniang thawk a la hluai a "Kan lam hnai anih poh leh kan tan a hlauhawm zawk, keini tan chuan zawn chawp ngai a ni a, a tan chuan kan ni ve lo, chuvang chuan hriatchhuah tum lo ang" ka ti nawn leh zat a, engtin mah min chhang tawh loin kan piah a Tower lam chu a en reng a, eng nge a ngaihtuah tih takngial pawh ka hrethiam pha tawh lo.







(End of chapter - 19)

(Chhiar zawng zawngin Comment pek tum zel ang aw)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)