SWEETHEART - 8 BY APUII TLAU

Episode kal lai dah luhna

Moderator: writers

Apuii Tlau
Posts: 210
Joined: January 30th, 2021, 2:54 pm

SWEETHEART - 8 BY APUII TLAU

Unread post by Apuii Tlau » September 18th, 2021, 10:05 pm

Chapter - 8






Thaw ka la leh te te phawt a, engkim mai hi tinge a dik loh tak vek le! A harsa! Ni e a harsa khawp mai, ka engkim hi a tawt ngawih ngawih.....









"Tinge kei kher?" Ka ti chhuak halh a, ni e ka pawm mai a beisei vang nge ka duh lutuk tih a hriat vanga naute lem ang maia min kaih kual theih a inrin vanga min thlang ani hlauh zawngin a pawi lo ang ka tih chuan dawt ani ngei ang.











"A chhan maw....chhanna min pe zawk mai rawh, sawi duah lo in" a rawn tih leh vut chuan ka lo ner nang a. Thinlung i pik sa nen ka ngei zual sawt thung bawk. A infiamna mai mai ni tur in a kianga awm ngen ka ni hauh lo, nilo ka ngen lo ka hrilh zawk.











"Ka zawhna kha chhang hmasa phawt rawh..." ka ti ve hlak a, aw ka vin hmang lo tur erawh in ka insum nasa kher mai. Ngaihtuahna pawh a tawi leh tup tawh. A duhdan a sawi ka ngaihtuah chian phei chuan keimah ah tlawm intihna ka ngah a, ka lo ti mah mah em ni tih thleng in ka ngaihtuah kual.












"A chhan, ni e....I damlam bik alawm chuvang chu a tawk in, ka zawhna chhang tawh rawh" a rawn tih leh hmuk chuan ka lo thaw halh a. Ka danglam eih lo, ka zang hawk lo a ka nat zual phah lo na chungin ka na erawh a dam chuang lo, ni e sawi tur a ka mamawh chhanna ka dawng miau hek lo.












"Zawhna pakhat leh chiah " In seh ruh teu chungin ka aw khur lo tur thunun hram hram in ka ti sap a, ka aw a tham chhal bawk, chu erawh ka dan hneh rual ani lo.












Nin hmel zet a thawk la hawk in "Sawi rawh" a tih leh hmuk chuan zam zet hian thaw ka la hmasa leh te te a...A thinrim dawn tih hre tho chungin ka zawt lo thei silo











"Miss Venpuii..."ka tih rual rual a rawn rum nghut avang chuan ka tawp leh dat a, "Mitthi tawh chu i kal tir thei mai lo em ni! Ka.....ka, bul tan ang kan pahnihin ka tih kha i duh ang apiang in ka awm ang mahse khawngaih in ani kha theihnghilh rawh...." Ka sawi lai chuan tlawm inti lutuk mahila ka chan phal bawk silo a tawp nan tak tak ani ka la zawh fan ni, ka mittui tla leh ka tawng bah nak te chu ka thunun hman ngang lo bawk. Hmeichhe tan chuan a tlawm thlak em asin mahse tinge ka chan phal miah loh chhan pawh hi ka hre tawh lo, ka duh mai nilo ka at chilh ani ngei ang mahse, kan dinhmun erawh a thuthlukna zir in adanglam tawh ang........












"Ka thei lo..." luhlul zet a a rawn tih leh hmuk chuan ka beidawng leh rilru na lutuk chu ka tap chhuak lo chauh.











"A tha e! Ka tihpalh ani, zawt miah lo tur che ka nia......Mangtha le!" tih sap pah chuan min chhanna pawh nghak lo chuan ka dah daih a. Ka khum bul ah chuan ka thu hnawk a, ka khum tawm chho in ka kut chuan ka inkuah khawm than a, chhuak zet in mahni chuan ka tap chhuak hawk a. Ka na tak! Kan hun hman tawi te hlimawm tak te chuan ka tan rilru natna leh min ti hreawm tur bakin tunah chuan hmun an luah thei tawh lo.











Ka tan alo sang deuh ania nge tiin inhnem tum sa teh mah ila ka na lo thei chuang bawk silo, ka hah ka chau ka engkim hi an tlawm a an na bawk.











Kawngka chu nam hawn theih a dah in ka mu ta daih a, ka tap lai an hmuh chuan ka chhungte hi kei ai mahin an thlabar dawn tih lah ka hre reng. Mut vat ka tan a tha zawk, U Zela text in ka lu nat vanga ka mut hma thu ka sawi ta ngawt a, ka room ah lutin kawngka ka kalh hmak a, ngaihtuah lo duh teh mahila khum ka deh rual chiah in ka tlawm zia ka hre nawn a, hnawl ka nih chian lutuk vang te pawh aniang ka tap tawp hleithei meuh lo.












Ka muhil thei bawk silo, ka rilru harh kur te chuan min vel leh thin bawk si, ngaihtuahna nei miah lo a hun hman ka chak tak zet. Chuzan chu ka tan chuan tahna leh lungngaihna manganna khuar khu rum a ka tlak zan alo ni ta reng mai. Mahse ka tuar chhuak dawn tih erawh Rosangzela Pachuau fanu ka nih avangin ka chiang a, nimahsela a hlim chhawn ala nih vang nge ka hun tawn chu a hrehawm tih hian a sawifiah zo kher lo ang.










Dar 9 rik hma deuh a ka chhungte rawn haw pawh chuan ka la harh kur a, khumah mu kawm ngul in a khat tawk a ka mittui tla sek chu ka tuai zauh zauh bawk.












"Miaupui" U Valpuia'n room kawngka kik paha alo tih pawh chuan ka chhang duh tawh lo, nilo ka thei lo zawk pawh ani tho ang chu. Kawngka ka kalh tlat avangin an lo lut dawn lo tih ka hre bawk.












"Bawihte" Tia a rawn kik leh pawh chuan ka chhang duh lo hrim hrim. Hetianga min hmu anih chuan chhuanlam siam tur ka hre dawn der silo. A bul rat atanga an hriat phei chuan keimah zawk hi hmun dangah min thawn bo duh hial ang tih ka hre bawk.











"A muhil tawh niang, damdawi te kha ei la ka tia a chhawk anga a muhil aniang" U Zela'n alo tih pawh chu ka hre kar. Ka tap ri emaw ka insut ri tak ngial pawh an hria ang ti hlau ka insum nasa lutuk te chuan min ti pik zual a, ka hrehawm ting bawk.












"Kawngka kalh angai lo asin le, a dam loh phei chuan...." Ka nu in alo ti ve zat bawk a.Ngaithla duh tawh lo in ka phone chu on in earphone nen zawm zat in Magdalene hla bawk chu ring zet a play in ngaihtuahna bo thak tur khawp chuan ka insang mar bawk. A har, ni e a har tak zet!











Zing karah chuan rit bur in ka tho chhuak a, nizan chu ka tap muhil leh ngei aniang, ka mit a bui lak a, ka sam a thur bawk nen keimah kha ka ang lo tak zet. Peih lo deuh chuan ka ngaihtuahna tlan bo san tum in ka tho chhuak hnak hnak a, ka sam ka khuih mam thuak thuak hnu ah ka room chhuahsan in hnunglam bathroom ah ka hmai ka va phih leh nawk nawk phawt a, ka mit meng sen rum leh bui deuh lak erawh ala reh thei lo kher mai kan then lui vak vak nangin awmzia erawh a nei thui lem lo.











Zawi zet chuan choka lamah chuan ka phei hnek hnek a, Dar 6 ala pel thui lo nangin ka nu'n chaw chhum tur alo siam mawlh mawlh tawh. Chaw ei dawnkan ah chuan chair pawt chhuak in ka indawm zawi hle ringawt.











"I la nuam thei nange? I khua la sik em? Nizanah room kawngka i kalh daih bawk sia" alo ti nghal sawk sawk a. Chaw chu gas ah chhuang in a kap alh nghal zat bawk.











"Nuam lo satliah mai mai niang, ka tha tawh ang" ka lo ti liam ve satliah ngawt a, thingpui min lo pek pah chuan ka pang a rawn dek vang vang a, nu te kut chu alo dang deuh bik nge min ngaihtuahna aw ringawt pawh hian min ti lawm thin. Ka nu hi han thinchhe ve hlek hlawk viau mahse a chhungril sual loh zia ka hria a, ka thinlung takin ka pawh em em bawk.











"I pang chu sa tawh lo phawt a, Zela nen damdawiin ah va in entir ula tha ang" a ti leh vut a, Alu chu dawhkan ah rawn dah chho in chemte chu lo ban pui zat in kan vel dun nghal mial mial bawk.












"Ka peih lo, ka tho harh riau in ka hria ka tha tawh dawn aniang" ka lo tih liam san daih a. Ka natna ang hi chu damdawi hmang a tihdam chi ni nghal loh chuan. Ngaihtuah miah loh leh hriat rih miah lohna hian tlem in min chhawk zawk ang ka ring. Dam turin ka la inpeih lo a,Mahse khuarei ah erawh ka la dam ve mahna le.











Ka pa zing chhuak chuan hritlang damdawi leh eng eng emaw taksa chakna lam min rawn lei chiam pek a, a va tul teh chiam lo thin tak. Mahse sawisel hran ka tum lo min ngaihsak zia ka hria a ka lawm bawk.












Chaw ei hma hret in U Valpuia alo tho a, choka dawhkan a ka thu hle hle lai chu ka pang a rawn dek nghal vang vang a. Ka damlo tak tak emaw an ti te chu ka inthlahrung zo vek min ngaihsak hlawm ropui si, an rilru ka tih hahsak ani ringawt alawm.











"Vawiin ah damdawiin ah va in entir ta che u, Zela nen" a tih leh sup chuan lu ka thing na na a, a hla ropui si ka peih teuh lo mai. Bakah sawi tawh angin ka natna hi damdawi hmanga tihdam chi pawh ani ber lo.











"Ka tho harh viau tawh, ka tha tep ang, Apa'n damdawi alo lei bawk a" ka tih chuan a bu ve nghat a, min nawr lui ngai miah lo nangin ka thlavang erawh a hauhna thei hle. Mama erawh ka tana tha tur a hriat ah chuan min nawr luih a hreh miah lo thung,mahse vawikhat mah chutiang ala ti lo thung, Au Zela erawh amah vang liau liau in B.A a chhuak ve kan ti lo thei lo ang, tha ni a a hriat lamah chuan kan 2 hian kan luhlul dan a inang vel ang.












Chaw ei kan siam laiin mit nuai nawk nawk in Au Zela a rawn tho ve chiah chu ka nu'n alo khak nghal malh malh a, a la inla young mai sia pubg a khel rei theih vang bak ani lo zinglamah a mu chauh zel nen.











"I room kawngka kalh tawh suh, nizanah kan rawn chum chhe lo chauh alawm.....i khua la sik em?" a rawn ti ve nuah nuah a. Sawi uar ve thei sia! An thusawi ka hre vek tih hre hlei lo.











"Ka tha lutuk....ka dam var var " nui luih vur vur paha ka lo tih chuan min melh ve vang vang hnu ah "Lo kal teh!" tihpah in min han kuah nawk nawk chu min dim lo si ka lo te tuk a, anni erawh alo nui hawk hawk thung.












"Khaih! In inti nà nge?" Ka pa'n alo tih ve dut hnu chuan min thlah ve ta chauh.
"Tlai ah leng vang vang ang hmiang, Zotui ah bike va ensak lawk tur an awm a" a tih pah chuan tap ah chuan kut a va sil mawlh mawlh a. Hru hul thuak thuak in dawhkan kan kil ho ta bawk.











"Eng maw i tih dawn?" ka nu zawk in alo tih chuan " Ka thianpa hmelhriat te bike chiang lo a awm a, va en pui lawk an ngai a" a ti tha ve mai a. Ka sawi tawh angin Au Zela hi chu hetiang thil chhe siam tih lampang hi a chem kalna zawng ani daih a, a kum ngaihtuah in experience pawh a nei nual tawh bawk nen hetiang lamah hian pawisa ala lut ve nual tawh ang.











"A dam loh kha hruai chi pawh ani lo!" Au Valpuia'n alo tih chuan "Ka dam tawh..." ka lo ti vat a. Hawi harh ka mamawh, rilru lak penna ka ngaihtuahna ram mai nilo ka suangtuahna ram atanga min hruai chhuak tu tur eng emaw ka mamawh!











"Nizan pawn i khuasik kha.." alo tih leh lai chuan "Umm...a rei lo, damdawi ka ei a mut duhna awm sia ka lo muhil daih anih kha, ka tha vek tawh" ka lo ti khalh leh zung zung a. Tun bak bak a ka chhungril hliam lai a awm kher lo ang, chuvang reng chuan a dam na tur in ka beih angai anni hi ka nei bawk a.











"Mama pawh vawiin ah tlai ah lo chhoh a tum kha" Ka pa in a rawn tih chuan "T.Shirt min lo chah teh hak tlak pawh ka neu mang tawh lo" Au Zela chuan alo ti leh vat a. Chaw chu a bar nghal mawlh mawlh bawk.










"Engtik nge in result a chhuah dawn?" Au valpuia chuan alo ti leh dut a. June thla tawp lam anih ka rin thu ka lo sawi vat bawk.











Nileng chuan ka nu pui in pot vel kan ti fai dauh dauh a, nidang tih pui ngai hek lo in ka pui chu mak ti viau mahse a lawm zia a tilang tho, Mahni chiah a rilru kawm ka peih lo ve tho bawk nen. Au Zela erawh in kan inthlang kawt zau lai ah chuan Apa Scooty Access grey ngei mai chu a sil hauh hauh a, motor lam ah hi chuan a duh uluk bawk a a sil rei hauh hauh khawp mai.











"Miaupui, dar 2 vel ah kal ang aw... Thingpui te in dawn tawh ang u Dar 1 a pel tawh ania" Au Zela bucket ruak leh scooty silna hmanrua vel rawn ken chhoh pah chuan ati mawlh mawlh a. Ka nu nen pawh chuan kan zawh thuak tawh avangin keimah zawk chu lum tur in ka lut nghal a, Au Valpuia leh Ka pa erawh an office thung.











"Kan kaldawn chuan inha lum rawh aw.....tlai lam ani ve bawk nen thli hi a tha teh chiam tawh lo ani" bathroom atanga a ke sil rawn hruk chhuah mawlh mawlh pah chuan ati leh a, thingpui siam mawlh mawlh pah chuan lei ka va chhuah chiam chu, min han melh rum der vel a, tih lai a awl awl nen min 1 pawh a mengrum hlei thei hlawl silo a.











Thingpui in zawk zawk in kan insiam ta nghal a. Dar 2 ah erawh kan chhuak thei tawh kher lo. Ka shirt chungah Jumper dum ha in Jocker pant dum puan chhah lampang ka ha leh a, tlailam anih tawh vangin sneaker ka bun thlap a, a tha tawk viau chuan ka hria. Au zela pawn ati ve deuh tup tho, a tlai lam tawh nen kawng a khu reuh thin aia kawng an siam lai ni bawk nen mask kan vuah vang a, kei erawh in ka la peih loh vangin ka la thla daih thung. Au Zela erawh in ala vuah run thung.










Au Zela nen chuan scooty chuan kan chhuak ta nghal a, ka khalh thiam ve sawlh sawlh nangin khawchhung a la khalh an phal lo tlat lehnghal, motor a tam an ti deuh tlat, motor awm lohna a tlan bik tlat te chu thiam har deuh tur asin.











Lamthuamthumah chuan kan ding leh rih
"Ei tur ve lei rawh, ka siam chhungin tih tur avang dawn ania" tih paha pawisa min rawn pek ve ngei chuan chhuk vat in ka ban vat a.Dawr lam pan chuan ka phei thauh thauh bawk. Ka phur hmel an ti khawp ang ka ring ka kaldan mai mai chu! Ka ti laklawh bawk si....









Dawr ah chuan lut in ka duh zawng chu ka ban vat vat a, pepsi can kan lak tel hram kha. A man kan inpek fel lai chuan dawr hnunglam dawr neitute in ni nghal atang chuan Dinsanga rawn chhuak hlawl anih chu! Phawk deuh tak hian ka lo melh hru a, ani pawn min hmu nawlh chu a inring chiah bik lo tih a hriat reng.










Ka awmdan chu insiam tha vat in pawisa nawi min kir tur dawr neitunu in pawisa a chhiar mawlh mawlh ngawt mai chu ka melh lui a. Ani erawh dawr neitupa nen an inbe mawlh mawlh thung. Ka pawisa kir min rawn pek chuan ban vat in ka thil lei polythene a khai chuan ka chhuak vat a, ka hnung lama an inthlah ri chu ka hre zawm ve zat bawk.











Au Zela Scooty chunga lo thu run chu ka thil khai chu ka pe vat a, a hma ah chuan engtin tin emaw a khai lai chuan a hnungah ka lo thu kai nghal hmak thung. Ka rilru hmanhmawh tlan vat vat se ka ti, kha mihring kha hmuh rih ka duh miau lo.
Scooty a tih nun lai chuan dawr lam ka va hawi phei chuan dawr kawt ah tak ding hian min lo melh run a, a mitmeng chu a rum lam mah ani. A hma min melhna ang mit meng kha hmuh tur a awm tawh miah lo bawk, a duh ang chhanna ka pek loh vang ani ngei ang. Ni e , tu hmeichhia mahin fa hrin sak tur ringawt in mipa an hnaih duh lo ang!











En pawh en rei duh lo chuan Au Zela kawngah chuan nghet zet a kuah in a hnungah chuan bei than in dawr lo lampang hawi chuan ka ka insiam rem daih a. A tana ka inhuam thuk zia leh ka duh zia a hriat hnu ah pawh fa hrin sak tur ringawt in min duh tih ka hriat na chuan min tina nawn leh a, ka tum ni miah lo in ka mittui a tling leh piau tawh.











"Paul-a te in ah peng lawk ang aw, hmanrua tlem lak tur a awm a!" au Zela'n a tih chuan aw thian kharh in zang khai vah hian ka lo aw a, ka pik zia erawh ka aw nilo in ka mitmeng chhiar tu chuan a hrethiam ngei ang.









Paul-a te inkawt kan thlen chu kan ding leh rih, an inlama ava kal lai chuan scooty bulah chuan ka lo nghak ran a, ka jumper ipte a ka phone rawn nghawr dat dat chu ka phawrh vat bawk, kan tlan lai atang tawh khan ari tawh nangin ka ngaihven lo lui kha nia a rik sek takah chuan ka en ve hram. Ka tum loh lutuk anih vang nge ka nui lui hak a , engtiang a tlawm a awm tur in nge min duh tak zet ni! Ka tlawm tawk tawh viau sin, kalsan ka tum ve leh ti hian amah zawk in min lo biak leh si te chuan ka thei kher dawn em ni.









La lo chuan ka melh ngawt ngawt a, a tawp ve thei hram lak ka chak tluk zet in ka duh lohna pawh a tam tawh. Miss call 7 lai alo awm tawh leh nghal, amah vek ala ni zui. Ka en lai mek chuan a rawn call leh zat a, enge maw hriat ni? Harsatna eng emaw a awm te hi ani lo maw? tiin alo call tam tawh em avang chuan ka la ve ta hram a.








"Hello!"












"Tunge khapa kha!" a rawn tih nghal hrawk chuan ka mit ka chhing sawk a. Beng chheng lutuk, au khum vak vak tur ka ni bik lo. A duhdan in ka awm tawh dawn rih bik lo, tunah chuan engkim ah mangtha ka ti tawh tlat.











"Hrilh che a ngaihna ka va hre lo" a aw ki ang ni hauh lo a ka tih chuan a rawn rum nghut a. Ka duh tawh lo ani miah lo duh tawh lo ka tum mai zawk ani, amah erawh chu a harsa tak zet. A aw ringawt pawn suangtuahna thar min pe thin miau si a.











"Zothanpui sawi mai mai rawh!" a rawn tih leh hmuk chuan ka ner nawng a. Ka hminga vawikhat min kohna ani hial lo maw! A hawrawppui ngat leh nghal in. Nizanah na tawp khawk in min siam a tunah lah ka lakah thu neih a tum leh tlat lawi bawk sia. He thil awmze nei thei chuang lo tue hi ka ning! Min ngaihtuah emaw ka ti mai dawn alawm hmanzana a thusawi kha hre lo ngat ila chuan a thik emaw ka ti hial thei ngei ang. Chu erawh ani hauh silo!











Ka dah ta daih a, Au Zela lo phei leh mek chu ka lo nuih lui sang a, ka phone bawk a rawn rik leh vut chuan ka switch off hmak thung. Ka chhungten min lo biak duh leh Au zela phone ah ni tawh mai. Khapa kha ka be chak rih tlat lo.












● A va tam mawh thin tak.......😄, Tian ti ang, lo comment leh vek ula comment a tam viau chuan naktuk zanah chawl lo in ka dah leh mai dawn nia.....mahse comment vek tur😅.......Muttui vek ule💙



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)