SELFISH LOVE CHAPTER - 41 by Amy Cck

Episode kal lai dah luhna

Moderator: writers

Amy
Posts: 432
Joined: May 15th, 2019, 8:49 pm

SELFISH LOVE CHAPTER - 41 by Amy Cck

Unread post by Amy » September 18th, 2021, 11:58 pm

IMG_18092021_104804_(400_x_500_pixel).jpg

CHAPTER - 41 🌼 by Amy Cck




" Enge i an a? " Khum sirah chuan dingin ka ti sep a. Min en lo chuan hma lam a melh ngur a. Ka chungah a la lawm lo reng tih ka hre nghal. A taksa a la pangai lo tih hriat lutuk in a hmui pawh a hil bel a, a mit meng pawh a la chau tak zet.





" Enge hetah i rawn tih? " Min en lem lo chuan a ti leh hluk a. Sawi tan mai dan tur pawh ka hre lo. Ka rai ka ti nghal tawp dawn nge ka chhungte vang a ka kal san kha ngaihdam ka dil hmasa zawk dawn pawh ka hre lo.





" Pawi ka ti lutuk engkim hi ka thiam loh a ni. " Ka tih rual chuan a rawn nui ro hawk a. Mahse a nuih zawng a a taksa che khan a pum chu a ti na nge ner sawk in a dul chu a dawm nghal a. Hlauthawng lutuk in ka pan hnai nghal vat a.





" I tha em? I pum a na a mi? " Tiin buaipui ka tum a. Hman zan lawk khan zai in hmun tam takah an thui a, a tan chuan chet pawh la harh tak tur a ni.





" Min khawih teh hrep suh. " Ti chang bawl in ka kut chu a vai per nawk a. A taksa a che nasa deuh chu a then zui leh sawk.




" Zorinpui enge i hriat a? Na i nei kha... " Ka khawih a duh bawk si lo a a hliam a tih nat zual ka hlau bawk nen hlauthawng zet chuan ka vin ta nghek. Khum a in kam kan sa vang chuan ngheng dawtin a a thaw chhuak hawk a. A na viau nge ni a thlan fimte chu a chalah a rawn bawl tek tek thei hial.





" Awiii.... Ka duh lo, i dul kha a thi a nia! Engtin nge ka tih dawn? Doctor emaw nurse ka va ko ang! " Ti a ka in her tur chu ka ban rekah a rawn hmer chawt a, phawk zetin ka hawi let a, a mit meng chu a thim in a in seh ruh nasa bawk a niang a bek te chu a pawng tawlh tawlh mai.





" Kha tiang a min ngaihtuah anga awm der kher kha a ngai hran lo a nia. " A rawn ti bul hmuk chu hrilhhai zetin ka melh zui haw a, thaw chhuak hawk in a mit chu a chhing vang vang a, a rawn meng leh chu tlemin a pangai deuh a mahse a na chu a in sum tih ka hre tho.





" Enge i sawi kha i thiam loh maw? Hahh... I thiam loh chu a ni chiah in ka hre lo. A bul ber chu ka pi a ni tih ka hria. Ka haw tak zet a mahse a ni ka huat aia nasa in nang hi ka hua che. " Ti vin hlur in ka kut chu a pai leh nawk a. A dul chu a thlek zauh a ner sawkin a kut a thisen kai chu a melh leh nghal a, a mit mengah khan min ti nat tluk zet in kei mah leh kei mah hi ka in hua a ni.





" Nakinah kan in be dawn a nia, doctor ka va ko a nge! " Tiin ka mittui rawn chhuah tum chu ka khap let sak sak a. Cabin chu chhuah san in corridor a hman hmawh zet a ka phei chu hman zan a doctor Zorina zai tu kha ka tawk hlauh a thil thleng ka hrilh chuan cabin lamah kan in zui vat a. Papuia pawh cabin pawnah a lo ding ve run tawh.





" Cabin chhungah i awm khan ka hre sia. " Min hmu chu hrilh hai zet in a rawn ti a. Ka bul a doctor a hmuh leh phei chuan a hlauthawng ve lek lek in ka hria.





" Nia Papui Zorina dul kha a rawn thi a chuan doctor koh tumin ka chhuak a. " Tiin cabin chu ka nem hawng a. Doctor leh Papuia nen chuan kan lut a mahse cabin chhung a lo awm ka hmuh chuan ka ding dat. Kha nu kha a ni!





" Khawi maw i hliam chu a thuina a pe chuan a buaithlak khawp ang. " Doctor chuan tiin a damdawiin kawr hak chu a hlim sak a. A sir hnai teah chuan kha hmeichhia Zorina in a ka hmuh nu kha a lo ding ve reng a. Engtin nge ka chhuah chhung rei lo te khan a lo luh hman ka hre lo. Ka duh aiin Zorina chu a din hnaih mah mah a kei erawh Papuia bulah ka ding reng thung.





" A thuina chu a peh lo a mahse i hliam hi a la thar lam in i dulah kher a awm bawk a. Chet pui hlek pawh a kan thuina hi peh mai thei a ni a. Che tam lo la, tawng tam vak chi pawh i la ni lo a nia. I tawng khan i dul lam hi a che ve zel a chu chu i tan a tha lo. " Tiin doctor chuan a hliam vel chu a tih fai sak a, ka thaw huai mai.





" Ti hian ka ti fai a nga i kawr hi chu in thlak mai dawn nia Pu Zo kan in be lawk dawn em ni . " Tiin doctor chu a kut kawr chu a phelh zui mawlh mawlh a. Papuia bawk chu thaw chhuak hawk in lu chu a bu nghut.





" Zualte , Bawiha kawr hi i lo thlak sak mai dawn em ni? Sawmi i lo pui thei ang ti raw? " tiin Zorina bul a ding hmeichhia chu a melh zui a. Papuian Sawmi a tih takah chuan ka hre chhuak zawk Chrismas lai a Zorina a phurh haw hmeichhia kha. Kha kha a ni tih ka hre chhuak chiah. Hman ni tukah khan ka thinrim leh rilru na lutuk khan ka lo hre lo mai zawk a.





" Aw... Kan awm a lawm kan ti thei mai ang. Ngaihtuah duh suh Pa Zothan. " Sawmi chuan nui sakin a ti a. Papuia pawh chuan doctor chu a zui chhuak a. Kei erawh ka dinna ngaiah ka ding reng. Zorina kawr phelh pui tum dawn i la ka khawih a duh bawk si lo a, a hma ang khan ka chet tir leh ang tih ka hlau bawk nen ka thu chuan ka pan mai ngam lo.





" Saw lai kawr kha rawn la la. " Tiin ka awm ve tih hre lo ang hmak in a bul a ding hmeichhia zawk chu a melh nghal vut a, chu mi hnuah a hma lam chu a thlek leh nghal zauh a. Sawmi pawh chuan rang zetin a buaipui nghal vat. In seh ruh nghek in ka dinna ngaiah chuan ka ding tlawk tlawk.





" I la haw dawn lo em ni? " Kawr an in hak tir zawh chuan Zorinpuia bawk chuan a rawn ti a, a mit mengah pawh ka awm ve reng chu a duh lo tih hriat tak hi a ni ringawt.





" In be lawk ang chuan ka haw ang. " In ti pau khauh lui chuan ka ti ve hmak a. Ka sawi duh chu sawi tho ka tum lui tlat. Chutah chuan engkim a tawp a tih pawn ka lawm thlap tawh ang.





" Sawi la. " Tiin min rawn melh nghal ngur a. A puan sin a thisen a kai vangin Sawmi chuan a thlep fel mawlh mawlh a. Khum mawng lamah a dah fel zui a. Zorinpuia bul a a thu chu ka melh nghal rawm.




" A fal in in bia ang. " Ka ti leh hap.




" Oh... Ka lo va chhuak ang. " Tiin Sawmi chu a rawn ding a mahse a kutah chuan Zorinpuian a vuan bet chawt.




" Chhuah kher a ngai lo. " A ti hmuk chu ka nui ro ta hak a. Ka nuih erawh za lo tak a ni, ka nuih zawh rual in ka mittui chu a rawn luang thla pap a, ka kut hnung lam chuan ka hrui nghal vat.





" Zorin... " Ka tih rual chuan " Nang nen chauh a awm ka duh lo. " A ti leh hluk a. A thu sawi chu tawi hle mahse min tih nat zia hi a hre kher lo ang.





" Sawi duh I neih chuan sawi la. Min ngaihtuah vang a lo kal pawh i ni chiah in ka hre lo. " A tih leh rual chu ka in sum thei tawh ngang lo " Engmaw i sawi? " ka ti ram hmak. Ka thinrimna chu engah mah ngai lo ang maiin a then suk a. Tun a a awm dan hi ka haw tak zet.




" Zai pui ka tawk a ka na tih hre reng chung a min haw san hnuah min ngaihtuah ber angin i rawn khaw sa a nia, a hma ang chiah khan. Min hmangaih thu sawi reng chung a min kal san ang chiah khan. Mahse tun tum chu min bum theih in ring suh. Kei min ngaihtuah lo in kha pa. Oh... I bialpa thar kha va ngaihven zawk rawh. " A rawn ti liam puat a. A sawi awl sam lutukte chuan chhan mai dan tur min ti hre lo hial zawk.




" Bialpa maw,... " ka ti ro hak.




" Ka sawi dik lo a mi? Nangmah ngeiin i sawi kha. Chu pawh hmai chhanah ngei. Ka khawih pawh duh lo tu kha tu nge i la theihnghilh bik ka ring lo. " Ner sawk in a ti leh a, a kut chuan Sawmi ban rekah chuan a la vuan reng bawk. Chu chuan min ti thaw tha thei lo. Kan pahnih chiah a awm chu a duh lo tak zet a nih saw.




" Nge ni a nang hian hetiang din hmun a ka din vang hian min khawngaih a ka bul a rawn let leh i rilruk zawk. Kha pa khan a thlah phal meuh ang che maw? A hmeichhe duh ber i rawn lan takah chuan a lo kawp ve char chat hmeichhia pawh a thlah hmak thei a nia, chuan nang in kei min kal san bawk a. In lo in hmeh khawp a nih hi. " A thu sawi duh dan chu mak ka ti. A tawng chu a ring hran lo mahse a thu sawi chu ka hre chiang mah mah thung.




" I nunna chhan himtu lak a i tawngkam chu a mawi lo hle mai. Muanpuia khan thisen i mamawh ngawih ngawih lai khan a tanpui che a. Engtin nge tunah hetiang hian i sawi theih zawk. " Ka ti vin ta nghek. Zorinpuia erawh in min chhan a tum hmel loh tak zet.





" Chhuak rawh. " A rawn ti let ta nghut. A pum bawk chu a na leh nge a rum zui nghut a. A bul a ding hmeichhia chuan a buaipui zui vat. Kha tih chhung zawng khan ngawi rengin a lo ding a nia. Zorinpuia nen a kan thu saw khan a thawn loh danah engkim a hria tih a hriat mai.





" Aw le... Inchhir suh ang che. Min hmu duh lo in ka bul a awm i duh lo bawk a. Tun bak chu ka rawn kal tawh lo a nih pawn min hre thiam dawn nia. I lo dam vat dawn nia. " Tiin ka in her a kawngka lam chu ka pan zui hlak hlak a. Ka bul a awm pawh duh lo saw a fa ka pai thu ka hrilh ang maw. A teuh lo hi a ni tawp.





Kawngka ka hawng tur chu pawn lam atangin a rawn in hawng a Papuia nen kan in hma chhawn zui nghal a. Ka hmel dik lo a hmuh hlau chuan ka hawi chhuak tha ngam lo.





" Ti nge let leh i tum tawh em ni? " A rawn ti dam dup a. Chil ka lem nghal khalh ringawt.




" Ehee... Sawmi pawh i lo awm e law? " Ti riah chuan ka hawi chhuak a ka pi pawh Papuia bulah a lo ding ve reng mai. Roomah chuan min be miah lo in a rawn lut a Sawmi nen chuan an in be zui mawlh mawlh a. An in pawh hmel khawp mai. Ka hma a aw thian khurhah chuan ka hawi chhuak zawk a Papuia chuan min lo la melh ve ngur a.





" Aw... Nia ka let tawh mai ang ka ti. Ka pa te haw tur ka thlah a ka rawn kawi lawk a. In lam ka ngaihtuah deuh a. " Nui lui sak chuan ka ti a. A mit meng chuan min chik ngei mai.





" A nih chuan ka thlah haw phah dawn che nia. Min lo nghak la. " Tiin roomah chuan a rawn lut a midang bulah chuan in lam a a ket tur thu a sawi tel luam a. Ka pi a rawn thleng ta bawk a a ngaih a tha ta deuh a nih ka ring.





" Kal rawh le. " Tiin Papuia chuan kawngka a rawn hawng a kan in zui chhuak a. Ngawi rengin motor bul kan thleng a Papuia pawn mak min ti deuh nge min en leh vung vung thin.





" I pa te chu i ngai deuh em ni? I va nguai ve. " Motor khalh chung chuan a rawn ti a, za lo zet in ka nui hak.





" Lungleng rual ka ni tawh hlei nem. Mahse an rawn awm ve takah chuan khua chu a har dawn in ka hria. " Ka ti let ve tak na in ka rilru tak erawh ka hahdam zawk. In thup reng reng a ka nu leh pa bul a awm kha hreawm ka ti a ka thawk a pik hluah hluah.





" Chuan i hna kha i zo tawh em kha? " a rawn ti leh a lu ka lo bu nghat.





" Hna dangte i buaipui leh tawh em? Nge ni a i hmu tawh zawk. Kan office ah i duh chuan i rawn thawk thei a nia. Hna dang i zawn chhung a lo thawh lai lawkna a tan pawh. " A rawn tih chuan Muanpuian min kawh hmuh tawh thu leh kan lo in biak fel tawh thute ka hrilh ve a, Papuia pawh chuan tha a tih thu a sawi ve sup a, Zorinpuia nen kan chung chang vel vang khan a lakah pawh hian ka kim ki in nuam ka ti lo zo vek.





Kan in theng min thlah a, hna a neih vangin rawn lut kawi lo in a tlang tlang a. Zan lamah Zorina riah pui leh a tum thu te sawiin, nizan a Pu Zuala sawi ang chiah khan midang a rin tawk loh thu te chu fiamthu ti tak deuh in min hrilh ve luam a. Awm ka ti pui viau mai. A tet te atang a a kut kawih a nih vangin midang kut a dah chu a thei lo a ni ka ring.





" I pa chu beisei chi a ni lo tih i hre ve ti raw? Nakinah pawh nang chuan min dem suh ang che aw. Kei man tha deuh in ka en kawl ang che. " Tiin ka pum la thep vek chu ka bia ka be ta ringawt. Zorinpuia ka ngaihtuah chuan ka tah a chhuak ru tun a. Mahse ka thiam loh hmasak zawk a nia dem thei erawh ka ni vek bik lo.





" Kan hma lam hun ah tawn tur kan la ngah lutuk a nia. Chuvang chuan kan pahnih hian chak tak a kan awm a ngai. " Tiin ka mittui chu ka hru zeuh a. Thla rei lo teah ka nu leh pa te pawn nau ka pai tih an hre chhuak a nga. A pa ka sawi dawn loh miau vangin an rilru pawh ka la ti na khawp ang. Chu tih hunah chuan chak tak a ka awm theih nan ka in puah chah erawh chu a ngai viau ang.


*

*

" U vawiin chu kal ve kher i tum a mi? " Tuk thuan kan ei laiin Mama chuan a rawn ti a. Nizan atang vawi tam min zawt tawh.




" A ngai sia lawm. Ka peh hel reng thei tawh lo a nih hi. " Ka ti hap. Tein mo thianah min hman a tum tlat a. Ka hnial ve char char a, khua a a awm atang khan a sawi tawh a mahse ka din hmun he ti hi a ni ta sia ka hnial a. Ka chungah a lawm lo a min be duh lo hial a. Kar tharah an in nei tawh dawn a, nuam ka ti lo bawk nen thih leh thih tiin ka tan sak mai loh chuan.




" Mahse nau i pai hi. " A rawn ti leh vat.




" A la lian chuang lo a an hre kher lo ang. " Ka ti ve mai a. Mahse a ruk chuan ka huphurh ve tho. Tuman hre lo mahse a biakin chhungah engkim hretu hmaah ka ding dawn chu a nia. Huphurh awm tak a ni.





" Tunlai i mu tlem bawk nen ka awm i ti nuam lo a nia. " A rawn ti leh a ka chhang duh tawh lo. Zantin mumang ka nei ziah a, chutah Zorinpuia hlir ka hmu a. Accident a tawh zan te kha ka mang phan fo a. Tui tak a ka mut lohna chen pawh ka hre tawh lo. Chu chuan min ti chak lo leh zual a. Chaw ei theih loh a mut theih bawk si loh chuan taksa chuan a chhiat pui hma khawp mai. Thla pawh a la liam em lo a mahse ka vun a dang in ka taksa pawh a cher tak zet.





Chaw kan ei kham hnuah ka in siam a rei vak lo ah Tei ten min rawn sawm a. Andrewa thianpa erawh dawrah a rawn kal dawn thu an sawi a. Andrew an motor khalh in a bulah Tei a thu a, an hnungah kei leh Tei nau Rini kan thu thung.





" Hmanni kan kal khan i hman ta si lo a kan hual lawk kha i duh loh chuan vawinah i thlak leh thei tho a nia. Mahse i in hmeh dawn tih ka hria. " Seat hma atang chuan Tei chuan a rawn ti a. Zorina nen kan tawp tih a hre ve tawh bawk a min chawh phur a tum ve tak zet a, ka din hmun in a zir lo lutuk hi ka khawngaih zawk. A best ka nih ang in mo thianah pawh min hman a tum ruh viau a, ni lo se chuan ka hnial fir thla thak mai tur.





" Tak in Zorina pawh damdawiin atangin a chhuak tawh a i la kal miah lo tih Emily a sawi a. Tunlai i buai viau chu a ni phawt a nga. " Andrew chuan a rawn ti a, ka ne ne kual vel mai mai. Ka hria a mahse hmuh ka tum lo mai zawk a ni.




" A dam chiang tawh a mi? " Tei chuan a ti vat.




" Dam var ni lo mahse a zia tawh khawp mai. " Andrew bawl chuan a ti a. A phone a rik takah chuan a chhang zui a. Kha mi ni damdawiin ka chhuah san ni atang khan ka la hmu leh miah lo a, ka ngaihtuah na erawh a luah ngut ngut a. Hmu ngai lo e ti lo chuan a chanchin ka ngaihven reng a, a chang chuan Mama te ka tir leh ngawt thin. Sawmi nen pawh an in hnai viau a nih ka ring Maman damdawiin a hmuh fo thu a sawi miau a.





Dawr kan thleng a, kawr te chu kan hah chhin ve a, ka lo cher ta bawk nen ka nalh ta lo khawp leh nghal. Tei pawh in " Heti khawp a i cher chak hi mak ka ti che. " Min ti hial a. Mo kawr kan en zo dawrah kan chawl a. Andrew leh a thianpa leh kei leh Tei te unau kan ni mai a. Chutiang a nuam lo tihna tur a awm lo bawk nen ka harh ve hawk in ka hria ka chhuak khat bawk a.





" Thiana saw saw Zorina a ni lawm ni? " Andrew thianpa in a tih chuan ka thil ei lai ka chawlh dat. Ka hawi ve lo a mahse an ni ngei tih ka hria. Andrew an a ko zui nghal miau a.





" Lo thu ve ru. Enge in tih a, i la dam chiang lo a ni lawm ni i vah chhuah nghal a. " Andrew chuan kan bul an rawn thlen rual in a ti a. A bulah Sawmi pawh a lo tel ve a, an in zui ngun viau a nih dawn hi.





" Nia, thil pawimawh ti turin a lawm kan chhuah. " Tiin chairah chuan an rawn thu a. Ka bul chiah ruakah Zorinpuia chu thu in a piah chiahah Sawmi chu a thu a. Ka taksa chu a tang nghal tung mai. A rim pa hrak ka hriat chuan ka ngaih zia ka hre thar uar uar bawk.




" Enge in tih zawk a? " Zorina chuan a ti ve sup.




" Inneih in buatsaihna lam maw le. " A ti ve mai a. Tei chuan min hrethiam zetin min be zui reng a. Mahse ka bul a thu vang hian ka tawng pawh a sak vek. Kha ti chen hmuh loh tum in ka bei a mahse tunah kan thu dun leh reng chu a nia.





" I phone a mi ri chu. " Tein a rawn ti sep takah chuan ka bag ka zen rawk rawk a. Screen a hming chu en in Muanpuia a nih vang chuan midang an ti ti tui bawk nen tho chhuak in ka bia a.





" In in lamah ka rawn kal dawn a mamawh i nei em? " Call ka lak rual chuan a rawn ti a. Kan chhuah daih thu ka hrilh a. Mahse kan haw hman tawh leh tawh loh min zawh vang chuan kan zo thaw khat tiin ka chhang bawk nen a rawn tlan na tur a ni tho bawk a ka rawn lam phei ang che a tih vangin ka hnial bik lo. Tunah phei chuan haw daih ka chak hluah hluah zawk. Zorinpuia leh kha nu nel tak a an in be vel hmuh ai chuan.




" Tu nge a? " ka thut leh rual chuan Tein a rawn ti sap.



" Muanpuia a nia, rawn kal a tum a ka awm si lo a, min rawn lam dawn a . Ka haw hmasak a ngai ang. " Tiin ka chhang ve kher a. Zorinpuia pawn a hria tih ka hre thei. Ka bul chiahah a thu miau a. Min theihnghilh tih ka chiang tawh a, a tel lo in ka hlim tih hi hriat tir ka duh, hlim tak tak lo mah i la. Min tih nat kha a tum ber a nih thu a sawi kha a nia mahse na lo ang a lan ka tum ve tlat thung.





Dawhkan a ka phone dah a rawn rik takah chuan la vatin Muanpuia chu ka chhuah tur thu hrilh in ka dah leh nghal a. Midang ho chu ka haw hmasak mai tur thu hrilh in ka mangtha luam a. Ka thutna atanga ka tho chu ka bul a thu a rawn tho ve nghal tih ka hria. Hre lo der in ka pen chak zual sawt a.





" Tlan chhiat chu i tum hle mai maw? " dawr atanga chhuak a step ka chhuk tur chiah chu a rawn ti a. Ka ding dat a mahse hawi let duh chuang lo chuan step a pen thlak ka tum chu ka banah min vuan nghal chawt.





" Enge i duh a? ” ti vin thatin ka kut pawh thlak ka tum chu vuan nghet sauh in a nui suk a. Ti hian a hmel ka hmu ve chiah a, a tha tawk tak zet a nih hmel. Damlo a ni tih pawh a hriat tawh lo reng reng.




" I damlo em ni? " A ti sup chu ka ner ve sak thung.



" I hmuh ang hian ka dam mah mah zawk. Ka bul a I awm loh hian ka dam tha leh zual. " Ka ti let nghek. Min ngaihtuah ang a a rawn awm ve chu ka ngai thei thak lo.





" A that chu. Damlo suh ang che. A nih loh chuan i chungah phu ba ka la thei lo ang. Tunah hian engtin nge ka tih dawn che tih ngaihtuah in ka rilru ka seng mek a. I lo damloh ve zel chuan a tha nang. " Awl sam zet a a ti chu ben sawk mai ka chak.





" Chu tia law, keimah vang chuan i ngaihtuahna seng buai duh tawh suh. I hma lam hun atan khek zawk rawh. Chuan kha i mil pui tak pawh i tawng tawh a, kei min ngaihtuah leh zel chuan a thik mai ang. Ka sawi dik ti rawh. " Tiin za lo zet in ka nui a, a mit meng chu a rum zual sauh.





" Zualte... " Step tawp atangin Muanpuian min rawn koh chuan ka hawi thla vat a. Zorinpuia erawh rum nghutin ka ban a vawn chu a hmer na zual sauh.





" A ni atang khuan kan tan dawn em ni? " Ka beng bulah chuan a rawn ti sup a. A sawi chu ka hre thiam lo lek lek. Ka hrethiam lo tih a hria nge a nui leh suk a.





" Kan pahnih hian in kawp satliah kan ni lo tih maw le. I tan a mipa hmasa ber ka nih thu hrilh ta I la.. " A tih lai chuan a awmah ka nem dawt a, a na lai ka ti fuh nge rum nghut in ka ban chu a thlah a. Rem lo zet a ka din vang chuan step chu rap pial a, Muanpuian min koh ri ka hriat rual in ka taksa chu ka sawh thla zui rawk rawk thung!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)