SAVE YOUR TEARS~ Chapter-14

Episode kal lai dah luhna

Moderator: writers

Muani_21
Posts: 23
Joined: June 5th, 2021, 10:54 am

SAVE YOUR TEARS~ Chapter-14

Unread post by Muani_21 » September 19th, 2021, 12:54 pm

Save Your Tears

Chapter-14

By; Muani

A boring dawn tih ka chiang.

.
.
.
Mizoram ka haw atang pawh kar hnih dawn aliam leh tawh. Nitin mahni tawkah ka buai ve em em renga, hah lutuka hnathawh turte chu awm em em lo mah se, ka thu mai mai hman meuh lo a ni e! Diktak chuan kei chu kan ina ka awm hian ka ți deuh duk thin a maw? ka awm khat deuh tawh mai bakah ka chhungte vang hian nuam lo ka ti. Mak pawh in lo ti mai thei, mahni inah han inthlahrun tlat mai chu in lo ti pawh a ni mahna, kei chu kan ina ka awm ai in, ka thiante bula ka awm hian ka thla amuanga ka hahdam daih zawk thin! Kan inah hi chuan a thut mai mai theih loh, " thatchhia" tih a ni mai.



" Nunfel, i u teinah ka zu leng lawk ange, hei hi lo su rawh aw" ka chhuat nawh lai chuan ka nuin a rawn ti a. Amah pawh en lem lo chuan, ka lo aw ve mai bawk. Ka nu leng tur ka lawmzia zia chu a, mahni in thlamuang deuhin ka awm thei dawn tihna.


" ka kal ania" tih leh kawngkaa chhuah a rual nghal. A chhuah hnu chuan chhuat chu ka nawt deuh vat vat. Ka nawh zawh hnu chuan ka nu'n suk tura a tihho, thutthleng chunga a dahho chu la in bathroom lamah ka pawm phei a, machine-ah chuan tui dah lutin surf ka telh leh te te phawt . Thawmhnaw chu rawngkal thei tur chi awma ka hriat loh vang chuan a tam em em lo bawka vawi khatah ka thuai tir nghal vek. Thil dang ka tih zawh deuh vek tawh vang chuan insuk hi a ni tawh mai a, a thuai chhungin ka lo thu hahdam thei tihna. Keimaha awm e ti lo chuan ka khi deuh sun sun. Bathroom atang chuan chhuakin ka room-ah ka lut a, chhuar atang chuan lehkhabu chhiartur chu la chhuak in sitting room lamah ka let leh thuai. Thutthlengah chuan thuin ka lehkhabu lak chu ka chhiar nghal.


Washingmachine a rawn rik tak vut vutah chuan ka thutna atanga thoin bathroom lam ka pan a, machine chu herhtawpin a bal vak lo bawk a, ka thuai nawn ta lo mai. Ka insukho chu tleuhin ka spin a, ka han zar leh nghal sawk sawk. Ka zar zawh chuan inchhungah lutin ka in sukna vel chu ka tifai leh thuak thuak a. Ka lehkhabu chhiar lai chhiar zawm leh tum chuan ka thutna ngaiah ka thu thla leh nghal.



Ka lehkhabu chhiar chu ka lo tui ngang aniang, a chhah teh reng nen ka chhiar zo hman vek nia mawle! He lehkhabu, " The Long Road Home " hi chu ka duh ngawt mai. Chutia lehkhabu tha tia sawi tur phei chu a ni hran lo, mahse he lehkhabu hi chuan ka nun a phawk chhuak ka ti mai teh ang! Keimah chauh hi hreawm tuar ka lo nih loh zia te, miten an dinhmun leh harsatna atanga hlim tuma an beih hram hramna kawng lo bum boh ziate he lehkhabu ka chhiar apiang hian ka hre thar leh thin a, chung an harsatna atanga chhuah an tum dan leh beihna te chuan huaisenna min pe ka ti mai teh ang.


He lehkhabu pawh hi mite chuan tha an lo ti em em lo pawh a ni thei, mahse, ka tan chuan a hlu ka ti lutuk tlat. Anun khawchhuah theih nana a beih ve hram hramna te, tuarchhel taka engpawh a hmachhawn ngamna te hi ka fak lo thei lo. Kei ai chuan he lehkhabua a changtunu ti mai teh ang, nun hi chu a retheih lehzual, a lainatawm ngawih ngawih a ni tawp! A tette ata tawh a amah hringtu nu ngei in ruh tliak rem ruma a sawisa thinte, amah aia a bialpa a ngaihsak zawk tlat te, a hringtu apa ngeiin a ngaihsak loh zia te, a hmangaih hmasa in a inawh hlum san a, a hnuah hmangaih dang tawngin a hlim ve em em a, chu lah chuan lem a lo chang mai mai si,a pawisa hahtaka a thawh chuah chiah duhin a lo kawp der vel mai mai a, chu thu a hriat chhuaha a thinrimzia te, chupa in a sawisak hnua thi chhawnga a kalsan dante hian ka hnuk a ti ulh ngawih ngawih a ni tawp. A tawpah Doctor tha em em mai, amah hmangaihtu a tawng hi ka lo hlimpui ngawih ngawih hi a ni mai.


Ka thil ngaihtuah ata lang chuan ka thil hriat chhuah duh loh ber mai ka ngaihtuah thleng leh ta nge nge. Theihnghilh chu ka duh miah lo,mahse ngati nge nitin hian ka hriat chhuah ziah ni! hun hlimawm tak min hmanpuia, eng mah pawh sawi lo a min thlauh thla hmaktu kha mipa kha ngati nge maw ka ngaihtuah chhuah ziah reng reng ni!? Ani chu ka hriat rengna atang hian bo tawh lo tur chuan ka duh ngei alawm, mahse hetia hriat chhuah zel pawh hi ka duh chuang lo.




Hunte kal deuh se, ka hnaah ka let leh hun chuan ka buai em em dawna, hetianga ngaihtuahna hun hi ka nei tawh lo mahna le! Hetah chuan thil tih tur awm reng mah se, buai khu chung ka nih loh vang hian thil ka tih lai emaw, ka awm awl deuh chang pawn ka lo ngaihtuah chhuak leh thin. Lehkhabu ka ngainat theih tehreng nen, Austina ka ngaihtuah chhuah zel thin vangin chhiar pawh ka chhiar that ngam tawh loh phah hial bawk. A chhan chu khang lehkhabu-a mipa hmeltha leh hausa, cool bawk si ang kha amah ka lo ngaihbel zel thin vang a ni. Mahse ani chu khang lehkhabu ami te nen chuan an dang daih thung! lehkhabu a mite chuan an hmangaihte an bum ve ngai tlat lo! Hah hmangaih, ka nuih a za zawk e a, ka â tawh anih hi, ani khan min hmangaih chu sawi loh, min duhthu tak ngial pawh a sawi ngai hlei nem le.


Ka phone rawn ri ral ral vang chuan ka thil ngaihtuah kual vel chu tawpsanin ka Phone chu ka chhang vat.Ruthii a lo ni.

" Mate, engtik nge Aizawl chu i rawn chhuk leh dawn?" a rawn ti nghal tawng. Thawt thawt zel hian a.


" Ka la hre mai lo, thla tirah rawn chhuk ila ka tia"

" Na... kar hnih chhung ila awm dawn tihna asin khatah, min ngai lo si" a rawn ti nang nang. Naupang chhia thei si, chhungkaw duat rawn tih takah a ngaihdan te lah hi maw.

" Aw, ka chhungte pawh an ngaihawm ve a" ka tih chuan a rawn,"hmmmp" vak. A hmel awmdan tur ka hmuh chak zia chu a.


" Tak tak a, nia, i hman hun hunah lo chhuk rawh aw" a rawn ti tha ve leh mai.

" Ka hman hunah lo ka rawn chhuk thei lo chu anih hi" ka lo ti zauh. A ngei leh ang chu aw.

" Niang chu, ngeiawm viau suh. E, calling letter ila dawng leh lo ami?" a rawn tih zawm zat.


" Ka hre lo, mail ka la check miah lo, zanah ka lo check ang"

" I hausa tawh sia, an rawn koh leh che pawn kal tawh lo mai rawh" a rawn ti a a nui har har bawk. Min hmu thei dawn lo tih hre tho mah ila ka lo ner vak thung.


" i chhe emai a, ka retheih zia hi e" uar fahran chuan ka lo ti let. Hausa hi minti ve ziah, ka hausak loh zia hre tu chu amah tho hi a ni sia.


" khaw khat nula hausa, mahni hlawh hmanga in pawh sa thei chin ngat thian ka nei hi ka va han inchhuang tak em!" a rawn ti deuh chiam. Kan nui dun ta hawk hawk.


" Aw anih chu, rawngbawl ka ngai tawh dah phawt ang aw" ka tih takah chuan min hnial lem lo chuan a lo 'aw ' ve mai bawk. Phone kan dah hnu chuan rawngbawl turin choka lam ka pan ve nghal zat.


Rawngbawl pah chuan hla ka ngaithla pah vel mai mai a. Ruthii thusawi vel kha ka ngaihtuaha a thil rawn sawi dan vel khan ka nuih zu ti za deuh tlat a maw le. A sawi ang khan ka hlawh leh ka pa te hlawh ve te nen mite ang pui puia lian leh ropui chu ni lo mah se, Pathian in kan phu tawk ang a tih in leh lo min din sak ve a, kan chhungkua pawh kan lawm ve khawp mai.


Rawng ka bawl zawh hnu rei lo teah ka chhungte pawh an rawn haw kim ve mai bawk. Ka pa te an inbual zawh chuan chaw ei ka siam zui nghal.


" Pa thla leh chu Aizawlah chhuk ka tum asin" chaw ei lai chuan ka pa bulah chuan ka ti a. A phal loh ka hlau ang reng hle.


" Tih tur pawimawh i nei ami?" ka pa in min chhan hmain ka nu chuan a lo ti hmanhmawh.

" Nei em em lo e, mahse.."

" i neih loh chuan hetah awm mai mai rawh, i hunawl neih chhunah hian i u va pui rawh. A naupai ala na deuh a, inchhung sekrek velah va pui thin rawh" a rawn ti hlak.


" I chhuk ziah tho alawm, pui ve la a ni mai a" ka lo ti deuh hlak. Nitin a chhuka puih ve mai awm, ka nu hi chu a. A sawi hma khan va puih tumin chhuk ila chuan," inah pawh thawh tur a awm hi, ka chhuk ziah thoa lo chhuk ve zel a ngai lo" a ti leh ang chu. A thu thua awm vek tur hian mi hi angai a. Ka ning tlat zel alawm.



" Ka chhuk dawn pawn a ngai lo, in lo nghak rawh minti ziah tho alawm" Ka lo ti ve hmak.

" Ti ang chu a hmain a ngai lo tihna a ni mai lawm, a reng rengah Aizawlah enge tih tur I neih reng reng a? " Ka nu chuan a rawn la ti hram. Midang erawh an lo ngawi kar thung.


' Aw, a hma daih pawn ka sawi tawh reng kha. Ruthii a graduated ve tawh sia lawm ila kan tia, ka tel loa lawm a duh bik si lo alawm" Ka chaw bar zauh pah chuan ka lo ti ve leh zat.


" A ho emai, mi pass tih mai mai, I pass pawh ni hlei lo" Ka nu chuan a rawn ti deuh hmak. A mak thei ania ka nu hi chu. Tun tum chu ka chungah a fel ka lo tih teh reng nen, rei tak hi chu kan inmil thei lo chu a ni e.

" Pa, kal chu I phal em?" Ka pa bulah chuan ka la zawt leh hram. Ka nu hi chuan phal lo mah se, ka pa in a phal chuan a tawk.


' Engtik nge lawm a tiha? " Ka pa chuan a rawn ti sup.

" Aw, chu ka chhuk hma leh a lawm hma dawn tihna a ni mai lawm" Ka lo ti var.


" Aw, I kal dawn nia" Atih takah chuan ka lawm ngei mai.


Chaw kan ei kham chuan thleng vel chu ka sil a, zan lamah hi chuan eng mah tih tur a awm hran ngai lo bawk a, ka tih tur vel ka zawh hnu chuan ka room-ah ka lut ta daih. Mut erawh ka la tum chuang lo thung. Ka khumah chuan ka Phone chu ka dah thla a, washeoomah ka hmaite phihin, ka ha te ka nawt a, cream vel inhnawih lehin khumah chuan ka thu fel than. Ka phone vel ka check a, Olivia message a lo awm vang mai. Phur tak chuan ka hawng nghal thuai.

' Hey Des, I tha em? ' tih te mai hi a lo ni. Ka haw atang khan kan la inbe mumal meuh lo ti ila adik ang.


" Hey Olivia, ka ngai lutuk che. Ka dam alawm, nang zawk? " Tih ka thawn let vat. He lamah dar kua a ri tep tawh a, anni lam tan erawh a la hma viau thung ang chu.

" Ka tha alawm, keipawhin ka ngai lutuk che" Rei vak lo hnuah min rawn reply zui vat. Chutiang chuan eng eng emaw sawiin kan in text deuh char char a, a haw hnuaa a awmdan leh an chhungkaw ho a an hun hman dante min rawn hrilh nasa mai.

.
.
.

" Nunfel, i u te chhungkua kha rawngbawl kep rawh aw" chaw chhum ka siam dawn mek lai chuan ka nu in a rawn ti a. Ka chhang let lem hlei lo thung.


" A ei duh tur ang zawng kha siam la, a naupai ala na lutuka a khawngaih thlak emai" a rawn tih zawm zat. A fanu rangkachak hi chu a duat ania aw.


Ni e, ka nu hian ka u hmeichhia hi a duat thei lutuk a, thenawm khaw veng kan chhungkua min hre chingtute chuan," i nu fanu rangkachak" an ti fo. An sawi thiam hi ka tia, a chhan chu ka nu hian engkimah a ngaihtuah khu chuk zel. Ei tur pawh lei se, ' hei chu i u'n a duh ve dawn hi, lei kep ila atha ang' a ti ngei ngei zel. Ka u pawh hi ka nu ang tho, an intan dun bawk si, an pian an hmel nen zawng zawng hian an in ang vel vek. Khawiah pawh kal se an inzui kual reng chu tiang khawp chuan an inkawm nasaa intan lo chi pawh hi an ni lo hi ka ti thin. Ka u lah pasal nei tawh e ti lo in, kan in lamah a rawn leng deuh reng a. A chhan pawh an pa chhungte unau hi an tam em avang leh nupui pasal nei deuh vek an nih tawh avangin tu-te pawh an nghah narawh. Hei vang hian an tu te pawh an lawm seng lo ti mai ang, kei ni lam thung tan chuan kan tu hmuh hmasak ber anih miau avangin kan lawmin kan lo duat pui bawka, an pa chen hian kan in lamah an rawn tal tam.


An inneih tirh velte phei kha chuan kan inlamah hian an rawn riak phei zing khawp a , chutianga an rawn riah phei chang chuan an puan sin tur hi puan dang awm kher mah se, ka nu kha a mak ve ngawt mai, ka puan sin lai kher kha an pe ta thin a! Khang hun lai khan enge a rilruah awm ang aw ka ti thin? Ka rilru nat theih zia kha! Tum khat an rawn riak phei pawh thlasik lai a ni a, December khaw vawh em em lai a ni. Kan khua hi a luma lum em em, a vawh a vawt uchuak ang chi kha a ni. Zan mut a lo huna an mutna tur an phah fel vek tawh, puansin tur pawh blanket pahnih a ni ta in ka hria ka nu khan a pe a, vawt antih a hlau deuh aniang ka bulah a rawn kal a,ka blanket sin pakhat zawk kha," i u te sin tir ang, vawt anti lutuk palh ang' tihpah in a rawn la daih, khang hunlai khan puan chuang kan lo nei tam em em si lo a, chuta chhapah thlasik lai a lo ni kher bawk nen, puan kan sin thuah vek tawha puan chuang lak tur a awm tawh si lo, ka sawisel ngam bik si lo kha, zan khuain ka vawt ti lutuk kha mu leh mu lo inkarah a ni ka awm ni. Chutiang vel chu ania ka nu in ka u a ngaihtuah dan chu maw. Khang hunlaia ka rilru nat theih zia kha!



" Desii a awm em?" ti ri chu choka atang chuan ka hre pha ve vek. Tu tak chu ni ang maw.


" Awm e, rawng a bawl anih kha, lo kal rawh " ka nu chuan a lo chhawn vat.


" Enge ni ta a, nang meuhte i rawn lan a?" ka nu bawk chuan a ti leh a tu tak chu ni ang maw. Kan khuaa ka awm khat avang leh ka awm ve lai pawh khan pawn ka chhuah tam loh avangin tu vak mah hi hriat em em ka nei lo, ka school kalpui thenkhat bak hriat ka nei lem lo ti ila a dik ang.


" E, eng lam ni lo e, zanin chu veng thenawma khawharin kalpuiah rawn sawm ka tum maw le" chupa chuan a ti sup. A tu tak chu ni ang maw, chutianga khawhar in kalpui tur a min sawm duh tur chu ni? Ka bai chhuan lai lah chu a la phul duh em em lehnghal, gas chu herh hniamin sitting room lamah chuan ka chhuak phei nghal.


" E, U Chhan, nang elo? tu nge le aw ?ka lo tia" U Chhana kan branch YMA hruaitu te zing ami ka hmuh takah chuan ka ti vat. Ani ber kher ka hmu chu mak ka ti ang reng viau mai.


" Aw, ka nih hi" tihpah chuan min rawn enin a nui suk." Zanin chu khawharinah rawn kal ve ta che ka rawn ti deuh a" a rawn ti sup.Chhan mai dan tur pawh ka lo hre lo, khawharin velah ka kal ngai bawk si lo, chu mai a ni lo YMA thil tihna velah ka kal ngai lo hrim hrim zawk. Va lan deuh thut kha ka inthlahrunga nuam lo tihna keimahah a rawn awm vang a ni.


" Na... ka la kal ve ngai si lo a" ka lo ti sap.


" E, a pawi reng reng lo, kal ngai lo tak kha alawm kal tur a kan duh le" nuih hawk hawk pah chuan a rawn ti sup. Ka lo nui ve ta tawp.


" Mahse, inthlahrunawm ve lawm, hmelhriat ka nei lo bawk si a"


" Khawharin kal turin hmelhriat neih a ngai em ni ?" ka nu in a rawn tih chuan U Chhana chuan



U Chhana chuan a lu a lo bu nghut nghut. Ka nu thusawi chu dik ati viau a ni mahna.


" Lo insiam rawh aw, ka rawn sawm phei dawn che ania, ka va phei leh nghal mai teh ang" tih leh din a rual nghal zat.


" Hotut'n in tih chuan kan hnial ngam nang a" ka lo tih chuan a nui deuh suk.


" Anih chaw ei tui u" tih leh kal a rual nghal.

" Chhana hi chu a fel ngawt mai, tihian naupang te in YMA-ah te hruaitu nihna te a han chelh theih ania, nangpawh pasal turte hi zawng tan tawh la a tha ang" U Chhana chhuah hnu chuan a ti nghal zat. Pasal neihte sawi a, chutiang ka la ngaihtuah hman lo nasa. A hrim hrimah tunah tak phei chuan tu mipa mah hian ka rilru an la peng lo tawp ang. Ka nu thusawi chu chhan pawh chhang lem lo chuan chokaah ka luh san leh nghal daih.
.
.
.

Khawharin kal chu an lo tha hnem phian a, hmel hriat em em pawh ka neih hran lem loh avang chuan u chhana bulah chuan ka awm ve zel ringawt. Ani pawh chuan thian ka nei lem lo tih a hria a ni mahna, khawi dangah mah a kalsawn bik lem lo. Ka rin ai in thalai kal an tam phian mai. Kan mithi chanchin an ziahna thutthlenga awm chu la in ka chhiar a, a chanchin an ziah danah hi chuan a fel hmel khawp mai. Ka hriat ngai a nih lem loh avang chuan thudik nge dawt pawh ka hre chuang lem hlei lo a! Mizo hi chu misual bera kan ngaih pawh hi thi se, a chanchin an ziahnaah chuan a lo piangthar leh diam tawh thin! Enge awmzia niang aw ka ti thin? A lawmawm rual rualin thil tul ber a ni em aw ka ti? Mi an damlaia an thatna sawitur hre uk si lo a, thihhnua in fak leh vel hian enge maw tangkaina a neih reng reng ni? A mithia te lahin eng mah an rawn hre tawh dawn der si lo! atangkai lo ve hi ka tia lawm.


Zan a rei tial tiala kum lama upa deuhte an haw rem zo tawh. Tlaivar tura kal ka nih ve lem loh avangin keipawh haw mai ka pawiti tawh teh chiam lo, mahse, mahnia kal ka nih loh vang leh ka kalpui pa ber lah hruaitu zing ami a lo ni kher bawk si, haw rawt kha ka inthlahrung tum hrang bawk si chu ka sana ka bih deuh zuk zuk tawh mai.

" haw i duh tawh em?" u chhana chuan ka awm dan chu a hrethiam a ni mahna, min rawn zawt deuh sup.


" Ka hre lo,i thu thu a ni mai" 'aw' han tih tawp kha ka inthlahrun ve deuh vang chuan ka lo ti let sap thung. Dik tak chuan dar sawm pakhat lai a ri tawha haw chu ka duh tawh viau a ni.


" I chau lutuk palh ange, tirawh ka thlah tawh ang che" a tih takah chuan ka lo lawm ru viau mai.


Zan a rei tawh bawka, khawharina zai ri tih loh chu thawm dang hriat tur pawh a awm tawh lo. Keini pahnih lah chu inbe mang hlei lo chuan ngawi reng chuan kan kal dun mawp mawp hi a ni mai. Kei mi biang biak thiam lo ta reng reng chuan han biak hmasak vak ngaihna ka hre bik bawk si lo. Ani lah a ngawi deuh run bawk si. Kan awm dan chu ka han ngaihtuaha inhaw deuh haw dun lo thei si lo hi ka intehkhina ka nuih a rawn za thut, ka lo insum hman si lo ka nui chhuak ta hak.


" ngati nge a?" U Chhana chuan a ngaihna hriat loh hmel fe chuan a rawn ti hu.
A hmelawm dan ka hmuh chuan ka nuih a za zual sauh. A hmel chu ka nui deuh thut mak tihna hlir in a khat nimai in ka hria. A awmdan hi ka hriatthiampui. Ka awm ang khan ani pawh hi rawn nui thut ta se chu mak ka ti ve tho ang.


" Ngati vak mah, ka nuih a rawn za thut mai mai mawle" ka lo tih chuan a awih loh hmel nasa.


" A ni tak tak alawm " ka thusawi awihloh hmel fea a chal atih chuar deuh tap chuan ka lo ti leh nghal vat.


" Nula pui tawh si, khawilaia lawm loha nuih thut mai chu, mite phei chuan min hmu se, ' a nula hruai chu a chiang lo a ni maw,' an ti ngei ngei ang mawle" min fiam titih deuh, thutak ang reng deuh si chuan a ti sup. Zan rei lam ni tawh mah se,a thusawi chu ka nuih pui ta hawk hawk thung. Ani pawh a nui ve suk suk.


" I lo lut kawi dawn em?" kan in kawt kan thlen chuan ka ti sap.


" Aih, lut kawi lo mai ang, ka va let leh vat zawk a nge" a lo tih chuan ka lo meng deuh kawk.

" i let leh dawn tihna maw? i haw tlang dawn emaw ka tia" ka lo ti ha. A haw tlang ve tawh dawn emaw ka ti kha ania, ani zawng mi tlawmngai ngang kha a ni bawk a, ka hrethiam tho mai.


" Ka va let leh ange, hruaitute kan ni ve a, zan khatnaa han tlaivar loh kha chu a nuam lo emai" ka lo rin dan chiah a ni. U chhana te hi kan in ral lehlam hla vak loah an awm a,a felin khawtlangah leh kohhranah pawh a inhmang nasa thei hle. Ka tetlai atang tawhin hre mah ila,amah hi kei ai fea a upat vang hian ka be ngai lem lo thung. Chuvang ania vawihin tlai a lo kal hlawl pawh kha mak ka tih em em ni.


" Nang chu i fel thei e, u te nge nge chu tluk in lo har a ni e" ka tih chuan ka thusawi chuan a nuih tir suk suk mai.


" I lo nula ve ta tak tak anih hi, lut tawh rawh a tlai tawh " a tih chuan, " anih mangtha aw" tiin ka luhsan ta daih.





noted; Interview in ka la buai char char amaw,in nghak char char tih ka hre bawk si, ka i thlahrung tawh bawk sia ka lo dah tawp ti khian, ka edit lo, a ngaihnawm loh ngawt ang. Ka rilruah eng mah a lut thei lo, enge ka type a, enge ka type loh pawh ka hre lo, min rawn hau mah ula pawi pawh ka ti lo mai ang. Tihpalh lutuk u



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)