IRRESISTIBLE LOVE LAST CHAPTER

Episode kal lai dah luhna

Moderator: writers

Maveni hmar
Posts: 164
Joined: March 17th, 2021, 6:20 pm

IRRESISTIBLE LOVE LAST CHAPTER

Unread post by Maveni hmar » September 19th, 2021, 6:29 pm

CHAPTER _ NINE & TEN ( π™‡π˜Όπ™Žπ™ π˜Ύπ™ƒπ˜Όπ™‹π™π™€π™)


Mariya's P.O.V:


July ni 11 a rawn her chhuah meuh chuan England mipui chu an helhhawlh a ni ber mai, titi dang reng reng a leng lo, khawi hmunah pawh European Championship final chu titi tui ber a ni vek mai.


Kei football awmzia hre lo leh ngaihsak ngai lo ber mai pawh chu ka tha a khur ru der derin ka phi cheng tawh mai a ni. Kan thianho bawk chuan a hmunah kan enho leh a boruak chu a rik hian a ri hulh hulh mai a.


Khawchhia leh chhum zing chuk karah zan 8:00-ah chiah Wimbley Stadium-ah chuan entu mipui 67,174 hmuhin UEFA European championship 2020 final chu tan a ni ta a, referee ah Neitherlands mi BjΓΆrn Kuipers hman a ni. Italy lam chuan kawr pawl,kekawrbul dum pawl leh moja pawl hain England lam chuan kawr var, kekawrbul var leh moja var nen an khel thung a ni. Ka D hmelthaa chuan nui var vara ban min rawn vai lap lapin flying kiss min rawn hlan leh a, ka lo chhang let rang kher mai. Khelh phat atangin England fans thawm chu na hem hem tak a ni.


Khelh tirh atangin England lamin ball an chang nghal a. Harry Kane chuan right side-a tlan Trippier chu ball a va pass phei a, Trippier chuan penalty area hla taka awm Shaw chu a va cross phei leh thung a. Minute 1 leh seconds 56-naah chiah chuan Shaw chuan half volley pheiin goal post veilamah chuan goal a khung ta. Mipui au thawm chu pui tak a ni. Ka lawm lutuk chuan Giselle ka chum nawk nawk mai a. He goal hi Shaw-an England tan a goal khung hmasak ber leh European championship final-a goal lut rang ber a la ni.


First half-ah chuan goal dang luh belh loin hun a zo ta der. Kan champ ngei dawna rinna hi ka nei lian tawh lutuk chu ka thinte hi a su dup dup tawh mai, ka auna lamah ka aw te chu a chhang zo tawh bawk.


Second half chu England lamin an kick off a. Minutes 47-naah Italy lam Barella chuan Yellow Card hmasa ber chu Kane lakah a chawi a. An inkhel ka lo thlir ve dan chuan England lam chuan an hneh lo hle hian ka hmu a, ka bei a dawng tan hle tawh a.

Italy lam corner pet chu Verratti chuan goal-ah a head phei fua a, Pickford chuan goal post-ah lo tiperin chu ball per let chu rang lutuk hian Bonucci chuan goal-ah a lo hit lut ta. 1-1 in an in draw ta. Bonucci chu goal a thun hian kum 34 leh thla 71 chiah niin European championship final-a goal khung thei upa ber a ni ta bawk.


1-1 a an han in draw takah chuan England Manager Gareth Southgate chuan a tactic thlakin Trippier chu la chhuakin a aiah attacking player Bukayo Saka chu a luhtir a, 4-3-3 formation chuan a thlak ta a. Chuti chung pawh chuan Italy lam chuan game an la thunun zawk ta tlat reng mai. Goal dang luh belh loin second half chu a tawp ta a.


Extra time-ah pawh han innuai viau mah se England an che hlei thei lo. 1-1 a inhneh tawkin hun a tawp ta. Ka beidawng chu ka hnual nghal rawih mai a. Inkhel en hian heti khawpin ka tang ang tih ka inring ngai lo. Ka tang lutuk chu ka na vek mai a ni.


Declan ka zuk thlir thla thin a, hah leh beidawn hmel taka thu thluang duai ka hmuh chuan ka thinlung hi a na zawk mai a, champioan no mawi hawn ngei a duh teh lul nen. Mahse, hawn theihna chance a la awm alawm. Penalty shoot-out a an chak ngei a ngai a ni. Manager Gareth Southgate pawhin chak a tum ruh hle tih a hriat substitute atangin Rashford leh Sancho a chu penalty pet thiam tiin a rawn dah lut nghal rap a, thla a muang deuh suai suai e.


Penalty shoot-out an han tan ta a, England fans tamna lam goal-ah chuan an pet leh ta nghal, kan ri hulh hulh tawh mai a. Italy lam chuan pet hmasain Berardi chuan a pet goal nghal, chutah Kane chuan pet ve lehin a pet goal ve leh a :1-1. Belotti pet chu Pickford chuan a lo save ta hlauh. Giselle chu ka beng bulah a rawn te tak tak a nih kha!


Maguire chuan a pet goal ve leh ta a : 2-1 in hma kan hruai ta. Italy lam Bonucci chuan a rawn pet goal ve leh:2-2.
Rashford chu rawn pen chhuakin ball chu a pet ta. Lalpa! A pawi lutuk! Goal ban a pet per ta! Bernardeschi chuan a rawn pet goal ve leh a:2-3 in hma an hruai leh ta.


Sancho pet chu Italy keeper Donnarumma chuan a save ta hlauh, mittui parawl purin Caroline chu ka chum awk awk a. Jorginho ball pet chu Pickford chuan a lo save leh hlauh mai a, Giselle nen chuan kan inkuah chung chung a.

Tunah chuan kan innghahna awm chhun Saka chu a rawn pen chhuak ta. A pet goal hlauh chuan 3-3 in kan in draw leh theih hlauh chuan sudden death kan la khel thei dawn a ni. Mahse Donnarumma chu vei lamah dive pheiin Saka ball chu a save ta hlauh mai.

Ti kha chuan Italy chu a tum hnih nan European championship an champion ta a ni.

Ka seat-ah chuan ka thu hnawk a, Declan chu ka zuk melh a, a hmela tuarna chuan min tina ngawih ngawih a ni. Zuk tlan thlak a zuk kuah vawng vawng mai ka duh a ni.

Pet goal ve lo ho kha ka han dem viau dawn a, ka khawngaih leh hnuhnawh hle a. Hrehawm an tih dan tur leh an tana nat bik tur zia hi ka hmuhthiampui a ni. An duh vanga pet goal lo pawh an ni lo a, chak tumin theihtawp kha an chhuah ve asin.


Ka tang bawk si kan chak zo ta lo ui lutuk chu ka mittui a tla hial thei a ni. Ti kha chuan kan class-a thiam thei ber Remchhungi'n exam-na a mark zaah marks 99 a hmuh tuma a rilru nat dan kha ka zuk feel pui ta chiah mai. Tling thelhva piang pawitih a zual...

Aw, vui thei kan ni lo engah mah kan hneh lo a ni. Shots, shot on target, ball possession, pass, pass accuracy, fouls yellow cards leh off sides ah pakhat mahah kan khan lo fai vek corners petah chiah an ni aiin kan tam.

Declan chu pitch atangin mipui thutna lamah a rawn lawn chho a, min rawn kuah chawt a, min fawp ta mawlh mawlh mai. "D, khawngaihin..'' mipui thawm hak danah chuan big screen-ah kan lang tih ka chiang mai a, ka zak bawk si chu a awmah hmai ka phum ta tlat a.


" Baby, min ngaidam rawh. I laka ka thutiam ka hlen zo ta si lo a.Mahse hei hi khawvel tawpna a ni lo. Nakumah World Cup kan khel leh dawn alawm. Chutah chuan i hmingin champion no mawi chu ka rawn hawn ngei ang tih ka tiam a che." a ti mawlh mawlh a.


Hnem zawk tur ka nih laiin min hnemtu zawkah a tang a nih chu, patling ka va ti si em. Ka kuah chial a," Engkim a tha vek,D. Champ lo mahla ka hmangaih che. Group stage pawh kha paltlang lo mahla ka hmangaihna che a ngai reng, ka chhuang lutuk che." tiin ka inhnip hlawp hlawp a.

Ka mittui chu hru hulin, "World cup Champion no mawi ka tiam zawk ang che, mmm?" tiin mittui parawl par hian min nuih lui sak a.

Big screen-ah kan lang a, mi tin chuan kan thla an la chuai chuai bawk, ka zak lo ang. Ka hmangaih hi chak zo lo mah se ka chhuang tur a ni.

"Rashford, Sancho leh Saka te kha lo hnem rawh aw. Hrehawm an ti dawn a nia.." ka ti sap a.


"Tehreng mai.Ka hmangaih che."


"Kei pawn ka hmangaih che. Kal tawh rawh..i thianten an nghak a che." ka ti ta a.

Pitch lamah chuan inthazo takin a tlan thla leh ta zai zai a, a tlan pelh ho chuan a taksa lo khawih tal duhin an lo ban huang huang hlawm a.


Pitch lama Declan chhuk mek chu ka thlir reng laiin ka phone a rawn ri a, ka nu a ni tih ka hmuh chuan mak ka ti kher mai. Tunah hian Mizoramah chuan zan lai dar hnih a pel daih tawh dawn si a. Hetiang chen chen ka nu a meng ngai lo, thil tha lo thleng a awm em ni ang? Hlauhthawnna chuan min rawn tuam nghal a, thinphu hlawp hlawp chungin ka chhang thuai a. "Aw, nu. Thil dik lo a awm em ni?" ka ti thuai a.


Aw dam raih hian,"Awm lo e, bawihte. Engkim a tha vek. I pa nen TV kan en duna, TV-ah ka lo hmu che a..England chak zo ta lo kha pawi ka tiin ka tuarpui lutuk a ni tih hi Rice hnenah lo hrilh rawh aw." a rawn ti ta mai a.


Declan nen kan infawp lai kha ka nuin min lo hmu a nih chu! Ka nu mai bakah he inkhel lo thlir ve tu ka hmelhriat ho mai ni loin ka Mizopui zawng zawngin an hmu vek dawn! Karei! Ka zak thar leh hnuhnawh. Ka hmai chu a sen ap ap a, ka bialpa nen kan tawm dun lai ka nuin min rawn phawk fuh ta ni mai hian ka inhria a, hrehawm ka ti kher mai."Nu..., pawi ka ti...i zak em? Min zahpui em?" ka ti bah nuai a.


"Zahpui lo e. Khawvel mipui hmaa zahpui lo tu che hmangaihtu inkhel thiam tak i nei kha ka lawm lutuk a nia. He lamah chuan WhatsApp status-ah an hmang nghal chuai chuai mai asin." a ti ta a.


Ka thin chu a phu zawih zawih mai a, "Awi..nu, a zahthlak em mai!" ka ti chuai raih a.


"Hmangaihna hi a zahpuiawm loa, hmangaihna tihlan hi thil zahthlak a ni hek lo."


"Mahse, mi thenkhat chuan hmeichhe hurherh leh inzuar emaw zahna hmu lo, mipui hmaa mipa fawp ngam khawpa huaisar leh zahna hmu lo tiin min sawi zui chiam ngei ang." ka ti a.


" Midangin an sawi zui dan tur che dawna kimki reng mi i nih chuan hmasawnna i nei ngai lo ang. Kawng engkima hlawhtlinna chang thin mi chu huaisen taka mi sawi dan tur pawh pawisa loa pen thinte hi an ni." ka nu chuan a ti dam raih a.


"Ka lawm e, nu - min hriatthiam avangin. Mahse mi thenkhat chuan 'mahni fate zilhna chang hre lo, nu mawl' tiin i thlavang an tawng ngei awm si a. Hmeichhe dukdak lo leh KS fa neiah an puh dawn che asin." ka la ti hram a.


"Chu chu i nihna a ni lo tih ka chian chuan a tawk. An duh duhin lo sawi ang hmiang, an hnena thudik va hrilh lah ka bat a ni hek lo. Min ngaihtuah suh, kan society hi ka hre chianga, a chhanna lak dan tawk pawh ka thiam ang tih ring mai rawh." a nui hak a.


"Ka hmangaih che, nu."


"Kei pawhin ka hmangaih che, bawihte."


Ka nu nen kan inbiak zawh chuan ka thawl ta hawk a. Ka nu berin min hrethiam a min rin tawk a hnu duh duh chuan eng pawh lo sawi se pawi ka ti lo.

Ka nu nen kan inbiak zawh chuan Aizawl lama ka thiannu Tetei Malsawm chuan min rawn call leh nghal a. "Hmeli, i bialpa nen in inchuk lai kha ka hmu a nia aw.." tiin a rawn nui har har a.


"I chak ve a nih mai chu." ka lo ti a.

"Jesse Lingard nen chuan chak e! Kha pa kha ka duh hlum lo chauh!"

"Ka rawn biak ang che!"


"Min rawn biak ngei ngei ang che."


"Lutuk...mahse bialnu a neiin ka hria." ka ti hak a.


"Awi...ka thi...pawi lo..ka pian nawn leh hunah pasalah ka nei mai ang." tiin a nui ta hak hak a.


Lawmman an semte chu kan en tluan chhuak vek a. Midang tin vek hnu thleng chuan kan la thu a, Mason chu rawn chhoin kan thian pali chuan an dressing room lamah min hruai thla ta hlawm a. An team mate leh an kawppuite thenkhat chuan min lo fiamin min lo beng ang thawk thawk hlawm a.


Jadon Sancho ka hmuh chuan ka kuah chawt a, a mita tuarna chu ka hmuhin ka lainat ngawih ngawih a ni."Jadon, i thiam loh a ni lo a nia. Khuanu hian thil thleng tur engkim hi a duang lawk sa veka mihringte tihdanglam theih a ni ngai lo." tiin ka hnem malh malh a.


"Hrehawm ka ti lutuk hi haw pawh ka hreh a ni. England mipui lakah hian ngaihdam dil mawlh mawlh ka ba, an duhthusam tithamraltu ka ni ta mai si a." a ti chuai ruih a.


"Khawngaihin intipachang hram hram tum ang che. Hei ka thiannu Caroline-i hi phone-ah pawh in inbiak fo tawh kha." tiin Caroline chu a bulah ka kai phei a.


Caroline chuan,"Jadon, i thiam loh a ni miah lo a nia. " tiin a kut a va vawnsak a.


Jadon chuan Caroline chu a kuah chawt a, a bulah chuan a tap titih ta mai a," I mithmuha hero ka tum nen ka zero ta vek a nih hi. Min kalsan phah miah suh aw. Ka kiangah awm reng rawh, min kalsan chuan ka puak keh mai ang." a ti a.


"Ka kalsan miah lo ang che. Ka tan chuan ka hero i ni reng tho a nia." tiin an inkai chhauk ta a.


Giselle chu Jordan Pickford bulah hruaiin ka inhmelhriattir nghal a, "Jordan, ka thiannu leh i fan number one Giselle a nih hi." ka ti a.


"Ah, Giselle maw? Declan-an ka bulah a sawi fo che a, in thlalak hote kha min hmuhtir tawh alawm. Kei chuan ka hmelhriatna che a rei tawh mai." tiin mawi zet hian a nuih var var a.


Giselle chu a sen deuh ap ap a," Footballer zinga ka ngaihsan ber i ni a, i che tha ka tiin ka ngaisang lutuk che." a ti a, a aw te chu a khur deuh titih a.


"Kei pawhin hmeltha ka ti chein zanriah min kilpui duh ang em?" Pickford chuan a ti a.


"Aw, aw, tehreng mai."


An pahnih chuan kalsanin Rashford leh Saka bulah chuan ka phei ta a. Raheem Sterling ka hmuha 'God Must Be Crazy' tih film-a G-a fapa mawng poh terha tlan leuh leuh ka hriatchhuah ziah leh Rashford-a ka hmuha Tekral (prayer mantis) ka mitthla nghal zel mai hi an ang ka tih vang nge pawh ka hrethiam bik chiah lo. An mahni hrilh ila chuan an duh lo ve ngawt ang chu.


Theihtawpin ka han hnem dun ve ngial a, an bulah an mahni hnem turin an bialnute an awm bawka ka kalsan leh ta thuai a.


Manager Gareth Southgate chuan min lo nuih vur vur a," Kan lunglen tuar thei lo pa chu i enkawl thei tawh dawn a nih hi. A Γ tchilh che ni berin ka hria." a ti a.


"Kei pawhin ka atchilh a ni ber mai." ka nui sak a.

Ka darah min rawn beng thuk thuk a,"Hlim reng ang che u. Football khawvelah hian hmalam hun eng tak a nei a nia." a ti a.


"Ka lawm e,sir."


In lam pana kan haw kawngah chuan a kut lehlamin steering wheel a thunun a, a ban lehlam chuan a dar si chetin min kuah bet bawk a, "Engkimah khan keini aiin an chungnung zawk a chak kha an phu a ni." a ti sup a.


"Ni e, rilru tina loin an chak kha lawmpui ila kan na lo a ni mai." ka lo ti sap a.


"World Cup-ah kan la intawng leh ngei anga chutih hunah chuan kan hneh ve tawh em ang chu."


In ka thlena a car a hun fel rual chuan min pawm nawlh a, in chhung lama min luhpui nghal mai hi a tum a, "I bag hi khai lut nghal ang." ka ti a.


Min nghat a, a bag chu lain a ak lawk a min pawm lut leh ta vaw vaw a.

Kan inbual fai hnu chuan an inkhel kha kan thlir nawn leh pahin wine kan in dun a.

Ka phone ka han en chu Rashford, Sancho leh Saka sawiselna leh an vun rawng vanga hmuhsitna lam rawng kaia thu chhuah hi ka hmu ta teuh mai a. Ka rilru chu a natpui kher mai, an duh vanga pet goal lo lui pawh an ni bik si lo a. A then phei chuan England squad atanga ban turin an lo nawr vei thul. Ka ngei lutuk chuan Declan chu ka chhiartir ve nghal a.


A chhiar zo chu a ner sak a," Hetiang fans suakho hi ka hua a nia. Fans diktak an nih chuan kan chet that lai chauh a min fak loin kan chet chhiat lai ber pawha kan chakna hnar ni tura min hnem zawk tur an ni asin." a ti nghut a.


"Ireland ram tana khel thin ka ni a, England ram tana ka khelh tak chiah khan thaha vauna te ka dawng nasa hle a, ka nun kha an tihrehawm tak tak a ni. Tunah pawh hian Jadon-te ho chuan vauna an dawn nual ka ring a ni." amah bawk chuan a ti leh a.


An comments chu ka huat em avang chuan "Rashford, Sancho leh Saka te hian ram tan theih tawp an chhuah asin. An duh vang renga pet goal lo an ni bik lo. Squad atanga bang tura ti lo khan nangmahni kha England fans atangin bang rawh u. Nangni ang fans kan mamawh lo." tiin ka chhang let ve ta a.


Min rawn hnial an awm chuan ka tawng nasa ngawt ang. BTS fan ruh kawl Army pachal, mi hnial peih leh tawng chak ka awm alawm ka ti deuh mai a.


BTS Army group-ah chuan an ni pathum thlavang hauh turin ka army-puite chu ka va sawm a, "Rashford, Sancho, leh Saka, pet goal lo mah ula kan hmangaih che u" tih chu min retweet sak a Trend turin ka sawm nghal a. K-pop fandom hrang hranga ka thiante chu min pui turin ka sawm hlawm bawk a.


K-pop power chu kar loah lo lang nghalin chu thu chu Twitter-ah chuan a trending nghal. Hei hi Army ho thawhrah vek a ni bik lo, K-pop fandom hrang hrang te tanrual zar liau liau a ni.

*****


A thawnthuah tal hian England hi ziah champion chakin ka kut a za et et mai nia...Declan Rice hi golden boot ka dawntir tep bawk🀣🀣

π˜½π™Šπ™‰π™π™Ž π˜Ύπ™ƒπ˜Όπ™‹π™π™€π™πŸ‘‡πŸ‘‡

CHAPTER _ TEN ( LAST CHAPTER)

Mariya's P.O.V :


European Championship a zo a Declan pawh club hrang hrangin an rawn ngaihven tan hle mai a, chung zingah chuan Manchester United leh Chelsea Football Club pawh an tel a ni. West Ham United-a khelh reng ai chuan club lian zawkah khel se ka duhpui hle nain kum 2024 thleng West Ham-ah contract a lo signed tawh si a, an hotute lam phalna lo chuan a chhuah theih mai si loh.


Infiammite a bikin footballer te an hlawh hnem lutuk hi mak ka lo ti thin a, mahse an hah leh thawhrim ngaihtuah chuan hei aia hlawh sang hi an phu hliah hliahin ka hria. Chawlh hi an nei tlem a, an hah em em a hunawl an nei ngang lo a ni.


Euro a zo a, World Cup 2022 qualifier chu 6 June 2019 a an khelh tan tawh nikum chhunga an khelh zawm theih tak loh kha kumin March thla atanga an khelh tan leh chu an la khel mek zel bawk a, an club tan khelh a lo ngai reng bawk nen kan Declan hi a hah hnup hnup thin.


Ka ngaihtuah mai mai a hmanlai Gladiator hun laia khang Gladiator ye leh tunlai kan footballer ho hian inanna tam tak an neiin ka hria a ni. Gladiator ho zingah pawh khan insual thiam leh huaisen a piang kha an man a sangin to tak takin midang hnenah an hralh chhawng a, an pute tan rim takin an insual thin a nih kha. Tuna kan footballer ho pawh a inkhel thiam thiam an man a sang a, to zawkin club dangah an hralh chhuak a, an club tan tha hnem ngai takin theihtawp chhuahin an khel thin a ni. An danglamna awmchhun chu footballer te hian thisen a chhuahin mi an that ve lo tih chauh ni maiin ka hria.


Kumin September ni 5 hian kum 19 ka tling ve ta chiah a. Richard leh Maggie te chuan a lawmna ropui takin Grant Hotel-ah min neihsak a. Declan-a chhungte mai bakah England squad leh manager, West Ham United players te leh an manager te an sawm vek bawk a. An ni bakah ka thiante pathum Giselle,Zahra leh Caroline ka sawmin Richard leh Maggie thiante eng emaw zat an rawn tel bawk a.


Zan lamah dinner party neih an han rawt nain England chuan World Cup qualifier kha zaninah an khel dawn si avangin chhun lama lawm an titlu ta a ni.

Nilengin hun hlimawm tak kan hman mai piah lamah birthday gift ka dawng hrawl hlawm lutuk chu mak ka ti zawk a ni. Maggie leh Richard chuan tuna ka birthday kan lawmna hmun Grant Hotel, Stratford ami hi birthday gift-ah min pe a. Declan chuan Car man to tak min pe bawk a ni.Pawisa leh tlereuh hlu tak tak ka dawng teuh bawk.


Zan lama inkhel tur an nih bawk avangin England team chu vengthawngin chawhnu lam dar hnih leh a chanveah kan party chu kan tin ta hlawm a.


Zan lam dar 8:45 chuan 2022 World Cup Qualifier England leh Andorra khel en turin kan thian zaho chuan kan hmangaihte jersey theuh hain Wimbley Stadium-ah kan thu leh thap tawh.

Entu mipui 67,171 zingah Greece mi Anastasios Papapetrou referee-na hnuaiah inkhelh chu tan a ni ta a. Andorra chu football-a ram langsar an ni lo bawk nen hnehsa a ngaih an ni nachungin kan tang nasa leh fan fan kher mai. Aw rawl tawp tawpa auin kan te teng tung reng a, tlemin kan lo kai deuh nen kan zam lo vei ham ham lutuk .

England chuan 4 - 0 in Andorra chu an hneh ta a.Inkhel a zo chiah tih chuan ring lutuk hian music a rawn ri ruai ruai a Westlife ho hla 'I Wanna Grow Old With You' tih chu an play ta ruai ruai mai a. Big screen-ah chuan Declan Rice chu nui sang hian a rawn lang a.

Another day without your smile,
Another day just passes by,
But now I know how much it means.
For you to stay right here with me,
The time we spent apart will make our love grow stronger,
But it hurt so bad I can't take it any longer.

I wanna grow old with you,
I wanna die lyin' in your arms,
I wanna grow old with you,
I wanna be lookin' in your eyes,
I wanna be there for you,
Sharin' everything you do
I wanna grow old with you.

Mitin chu ngaihna hre loin kan hawi phawk deuh hra hlawm a. Big screen atang chuan Declan Rice ngei mai chuan, " Nikum kum laihawl vel lai khan Stratford thlera ka kal laiin hmeichhe pakhat bag hi ruksak a ni a, a rutu thuamhnaw ang chiah ka lo ha ve si a. Chu hmeichhia chuan a bag rutu emaw tiin min rawn zuan tlu a, min bawhbet a, min hit ta a ni. Khami ni, rukru emaw min tihni atang khan nang hian ka thinlung hi min ruksak zawk asin. Kei ni loin nang kha rukru i ni..

Khami ni atang khan ka tana Pathian ruat i nih hi ka ring tawh a. I tel lo chuan ka nun hi a kim thei tawh lo a, mihring tling loah nang hian min siam a ni. Khawngaihin he mi khing phel hi min siam pum leh ta che. Mariya, ka hmangaih che a, ka nunna ai pawhin ka hmangaih zawk che a ni.
Vawiin i birthday ni a lo thlen hian ka thinlung chhungril ber atangin ka lawmpui em em che a ni. Happy birthday, my love.

I kianga hringnun hman chul dun hi ka duh a, ka lo upata putar ka nih thleng pawhin i kianga awm ka la duh cheu a ni. Mariya, khawngaihin pasalah min nei ta che. Pasal atan min nei duh em?" a rawn ti ta mai a.


Stadium chhung chu a thum hluah hluah a, " Aw tirawh, aw tirawh" an ti dual dual a.


Awm ngaihna reng ka hre lo. Min surprise hneh kher mai. Ka lungphu chu mu leh mal awm loin a phu saikalh nawk nawk a, ka hlim bawk si chu ka mittui a luang zawih zawih a. Big Screen-ah chuan min rawn close up chiang ngei mai.

Declan chu zungbun kengin ka lam a rawn pan a, mipui chu an ding thup a, " Mariya, aw tiin chhang rawh." an ti rual dual dual a.

Ka bul a rawn thlen chuan ka hmaah thingthiin, "Mariya, ka hmangaih che. In hnam chaw pui ber chu Rice (buh) a nih angin, i dam chhungin he Rice hi chaw atan i ring duh ang em?" mittui tling pam hian a ti a.

Awm ngaihna pawh min ti hre lo, a bulah chuan thingthi thla vein ka kuah chawt a, "Aw, ka nei ang che. Ka hmangaih che, D." ka ti sap a.


Ka kut zunglaiah chuan zungbun chu min buntir pah hian a mittui a biangah a luang tih ka hmu a, min pawm kangin ka hmuiah chuan lungchim takin min fawp ta vawng vawng a.


Kut beng thawm leh kut chang tum thawm nen mipui chu an au ta hluah hluah a.

Ka hringnun lehkhabu hi phek nawn leh thin mahila tun ang renga ka hlim hi ka la hre lo a, vawiin kum 19 ka tlin champha hi ka tan ni danglam bik leh hlimawm hlira khat a ni a birthday thilpek ka dawn ropui ber a ni bawk ang.

Zahra, Giselle leh Caroline te chuan min rawn kuah chawt a, hlim takin kan tap pur hlawm mai. Ka hlim zia hi thuin ka sawi chhuak thiam hlawl lo a ni. Ka hlim, aw ka hlim lutuk. Ka hlim tak zet a ni. Declan Rice hian khawvel hmeichhe hlim berah min siam a, mipa hlim bera siam ve hi ka ba a ni.


Thla khat hnu-ah chuan Anglican kohhran ho biak in All Saints Church, Kingston Upon Thames-ah chuan kan innei ta a. Giselle, Zahra leh Caroline te chu ka thianah tangin Declan chuan Mason, Jadon leh Pickford te chu thianah a hmang thung a. Kan inneih min hriatpuitu leh lawmpuitu an thahnem kher mai a.


Honeymoon chu a pi leh pu Jack leh Margareth-i te ram Ireland-ah ngei chuan kan hmang ta bawk a. Lasi thawnthu ang maiin...chuti chuan hlim takin kan awm dun kumkhua ta a......tiin A TAWP TA.

πŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’žπŸ’•πŸ’žπŸ’žπŸ’žπŸ’•πŸ’•πŸ’•πŸ’•πŸ’•πŸ’žπŸ’žπŸ’žπŸ’•πŸ’•πŸ’•πŸ’•πŸ’•πŸ’žπŸ’žπŸ’žπŸ’žπŸ’žπŸ’žπŸ’ž



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)