STORM AND SILENCE : CHAPTER - 26

Episode kal lai dah luhna

Moderator: writers

MoonPie
Posts: 60
Joined: August 17th, 2021, 10:12 am

STORM AND SILENCE : CHAPTER - 26

Unread post by MoonPie » September 19th, 2021, 7:10 pm

CHAPTER-26



Darkar tlemte chuah nung dama awmna hun a nei.



Awlsam taka a thusawi kha ka bengah a cham reng. Mr.Stone-a chibai minlo bukna pawh ka hriat chhuah chuan bukletna hun a ni tawhlo.



Darkar tlemte.



Tu emawin Simmons chu an hrilh hre dawn em? Mr. Ambrose hian? Mahse a hmel enin chutiang a tih hmel chauhlo. Amah phatsantu hi thah a tumlo a, mahse venhim nan a kutzungtang pakhat pawh a lek kanglo ang tih ka hria.



"Mr. Linton?" Mr. Ambrose-a aw chuan ka ngaihtuahna ata min ti harh zawk a. "Ka office ah lo lut lawk ta che, thil sawipui duh che ka nei."



Engthil? Thi mai tura i mi kalsan kha engtin nge ni ve dawn?



"Aw le, Sir." Ka zui lut a. Hre lawk tur ka nia sin.



Hriatna hi thiltihtheihna hi hun hi pawisa a ni lawm ni?



Tichuan misual chu kanlo hrechhuak ta a. Engtin nge ni zel dawn? A lawm nan nikhat chawlh kan la ang maw? Teuhlo lutuk! Mr. Ambrose a nih chhung hi chuan chutiang a thleng ngailo ang. Sumdawnna thil chinfel tur a awm anga, a awm zel bawk ang.



Eng nge kan tih dawn ka hre hauhlo. A hming pawh ka hriat loh hi kan chhui dawn em ni? Mahse engatan nge min mamawh? Hming hriatloh zawn chu ka thiam hauhlo ang. Ka hmanthiam purunsen ip nen pawh nise.



Mr. Ambrose chu a chairah a thu a, a ep chiahah ka thu ve nghal bawk. A tihdan pangngai a a sawi tum sawi ta mai lo chuan dawhkana lehkha ho chu a remfel a.



Engthil hrep nge maw thleng hi? Mr. Ambrose hun khawhral duh ngailo hi a che khawmuang a maw? A sawi dan takin, hun hlu tak pawisa a chantir theih.



Engemaw chu a awm a ni. Zawtlo turin ka insum hram hram a. Lehkha tawp a dahfel chuan a rawn hawichhuak ve ta nge nge.



"Darkar khat hnuah i haw ang. Stone'n i thawh tawh chin hlawh a pe che anga, i haw na tur cab a laksak bawk ang che."



Engthil?



"Ka ..ka hrethiamlo."



"Thil ho te a ni. Kan thawhdunna a tawp e. Ka hman velah i banna lehkha ka lo thawn dawn che nia. Nih phawt ,Mr.Linton. Ka chelh khawmuang lo ang che."



A dawhkana lehkha chu ka awmve lo ang maiin a en daih a, a thil sawi hriatthiam nan hun ka duh deuh. Ka hriatthiam meuh erawh chuan ka inhumruh teh e.



"Min…min ban dawn a maw?"



"Aw, a nih hi. Ka ban tawh zawk che maw le." Hawichhuakin min en ran a. "I la awm reng danah i hrethiam lo a ang. Ban i ni. I kal thei."



"Tinge?" Ka mittui rawn hnam tiah tiah chu ka duhlo ngei mai. He mihring hmaah hian ka tap lo ang! A ngaih anga hmeichhe nep ka ni lo. Ka nilo! Ka nilo! "Tinge tiang hian i tih? Eng nge ka tihsual?"



"Tisual a?"



"Hreptak hian! Ban nih chuan engemaw tihsual vang a ni thin a ni lawm ni? Eng nge ka tihsual? I file te ka pe rang tawklo che em ni? Ka inchei mipa tawklo nge? Ka thaw ring lutuk em ni? Min hrilh teh, eng nge ka tihsual?"



A lu a thing a, a mit erawh keimahah a awm reng.



"I hrethiam lo a ni,Mr.Linton. Tihsual engmah i nei lo."



"Eng maw?" Ka mittui a luan hma ka khap fuk fuk a. "Anih tinge? Tinge min tirhbo i tum?"



"I hmuthiam lo em ni?" Tiin dawhkana a kut chu a humruh a. Pangngai takin lang mahse, a phena khawdur awm hi ka hria. Mahse chuvang mai mai chuan ka kal dawn lo. Harsatna a tawh laia , a dinhmun a hlauhawm lai hian ka bansan theilo!













Engtik lai atangin nge a dinhmun hlauhawm leh hlauhawm loh chu ilo ngaihven ve a? Nangma tawka buaina i ngah tehreng nen.



Aih, a nilo. Buaina neih hi nuam ka ti. Bakah, he mi uikawm hnen atanga thla hlawh ka lak hma chu ka kal dawnlo!



Ka mi uikawm sawi chuan min rek duh hmel hi a pu a, a aw vawt ruih hian, "Mr.Linton, kawnglaia thirchhe zawng mai mai ka nilo a, sumdawng lian ka nih hi. Lalram neiin indo ka hmachhawn dawn mek a ni. Chu indona chu keimaha ka beih a ngai."



"Indona a? Lehkha pakhat vang maiin maw?"



"Aw, indona. Ka hmawchhawn tawhah chuan a la lian ber hial maithei. Chuvangin i inrawlh ve ka duhlo."



"Tinge?" Ka aw a khur anih chu! Zawng aw!



"Dinhmun hlauhawmah hmeichhia ka dah theilo." A hawi vah a. "Mipa zahawm tak ka nihna hian a remti theilo a ni."



A chhan tur nia ka ngaihtuah zingah chu chu a tel hauhlo. Min melh ang chiahin ka melh let a.



"Hmeichhe chaklo leh venhim ngai ka nilo! Mihring zalen ka ni a, ka duh duh ka ti thei! I hnuaia thawh ka duh a nih pawhin ka thawk mai ang, min ban chhan mumal tak a awm hma loh chu,Sir!"



Muangchangin a kut hum chu a phelh a.



"I hria em, Mr. Linton, 'Sir' itih hian 'changpat thuduh' tih sawi i tum hi a ang mah zawk thin ka ti."



"Eng nge a chhan ni thei ang?"



A reh leh vang vang a. Mr.Ambrose ngawi ang em a reh hi a awm theilo ang, a reh hian a reh tlawk tlawk zel.



"Anih, i duhthuin i kallo ang maw?"



"Aih!"



"Mr.Linton, nang hi, i â in pawisak i neilo takzet a ni."



"A ni maw, Mr.Ambrose?"



"Aw , ni e, Mr.Linton"



"Timaw i ban duhloh?"



"A chhan chu i hria. Hei chauh hi intodelhna tur huntha ka neih chhun a ni."


Puih i ngaih lai takin ka kalsan duhlo bawk che.



Chu erawh ka sawi ri ngamlo.



"Thah i ni thei asin." Thu pangngai sawiin a sawi thei hi mak ka ti.



"Ka hria alawm , Sir. Min vuina man i chawi angem?"



"I â zo tawh em ni?"



"Aih"



"Anih chuan i kal nghal tur a ni!"



"Ka kallo ang!"



"Ka kaltir thei che. 'Mister Victor Linton' hi a awm tak taklo tih kan hre ve ve. I nihna diktak hi ka sawichhuak thei asin, chu chuan awlsam takin a kaltir ang che."



"Sawilo turin i intiam tawh kha!"



A hrawk a thian kharh a. "Tun ang ema ka sawi chak hi a awmlo ang. Hetah hmun i changlo, i ngaihtuahna leh duhthusam atthlak tak vek an ni."



A dawhkanah ka kut ka nghat a.



"Eng nge i duh?" Ka ti chang fak a. "Eng nge i suangtuahna? Zawt che in ka sawisel sak tawh ngai che em?"



A beiseiloh tak ka zawt a ni ngei ang, a ka a ang deuh a. "Aaa..aih"



"Anih chuan ka duhthusam te hi atthlak mintih sak tawh ngai suh! Ka damchhan an nia sin!"



A ngawi leh vang vang tawh. Mahse tun tum chu keimah ka tawngchhuak hmasa.



"Ka zawhna i la chhanglo, Sir."



"Eng kha?"



"Thi ta ila, min vuina man i chawi angem?"



A kut a en zeuh a.



"Ka hrelo le. I thawh thatdan a zir aniang chu. Sum min hmuhchhuahsak hnem thawkhat hman a nih chuan, ka ngaihtuah tha leh ang."



Ka nui nghal var var. "Anih i thu ah i ding dawn maw? Ka awm thei maw? Hmeichhia pawh ni ila, hlauhawm pawh nise ka thawh chhunzawm thei ang maw?"



"Aw" A ti hmuk. "I thawh chhunzawm thei, i duhthua i bang a nih loh chuan."



A ai nasain ka nui. "Chutiang a thlenglo ang, Sir!"



Fimkhur taka a kut pahnih suihin, "Chiang lutuk suh."



"Tinge? Eng nge i tih dawn? A hma aia tam file min chawitir ang maw?"



Ka hmusual a nih ka ring a, mahse ka hmu ngei bawk si. A hmui sir a tih chet zauh chu nui ni ngeiin ka hria.



"Chu chu ka ngaihtuahnaa awm a ni hauhlo, Mr. Linton."

Nuam ka ti lutuk hi awm ngaihna ka hrelo. Mr.Ambrose ka lakah a tlawm ania! Mahse in ka thlena Sir Philip tawlailir ka hmuh chuan ka hnual nghal vekin ka hria, chhiahhlawh tamtham tak anlo la awm zui.



Heiham!



Ka hrethiam nghal! A hma kha chuan Wilkins hi Ella hmu turin amahin a rawn kal thin a, tawlailir pawh te fel at, chung neilo chi a hmang thin. Tuna tawlailir lian a rawn ken hian chhan pakhat chiah a nei : Ball. Ella nen chauha an kalna tur a nilo bawk, kan vaia lenna tawlailir a rawn keng miau.



Kei tiamin. Kei mi khawngaihthlak hi!



Hreptak hian! Nilo! Tinge a hmain ka hriatloh? A hmasa kha chuan sawilawk awmloin min sawm ngei a, mahse chu chu thilthleng zen zen a nilo. A tlangpuiin a hma karkhat velah sawmna an pechhuak thin.



Tinge ka hriatloh? Hnial dan tur ka ngaihtuah hman tal tur ania, nihloh pawhin ka biru thei tur, a tul chuan in pawh hi ka hal mai ang.



Ka nutei rawn chhuak chu ka hmu a, vanneihthlak takin ka inthlak hman hlauh. Min rawn hmuh chuan a nui zeuh tih ka hria. Tawngkam thaloin ka phun hluk a, hmeichhe hman atan chuan a mawi viaulo. Ka nutei hian min hriattirlo lui a ni, tlanchhuahna ka neihloh nan min hrilh duhlo a ni!



Tlanchhiat ka rilruk a. London kawtthler thimah tlanin lei(bridge) hnuaiah ka riak mai anga, tuman mintibuai lo bawk ang. Mahse ka unaunu Ella ka hrechhuak. Ka nau hi Isr Philip-a lak ata chhanchhuak turin ka intiam a ni lawm ni? Engvanga tlanchhiat te ka ngaihtuah ngam.



Tihtur pawimawh ka neih tak si avang chuan peihlo zetin ka kal chhat chhat a, karloah kan in kawngkhar ka thleng ve mai bawk.



"Ah! Ilo thleng ta maw!" Ka nutei chuan nui sang hian a lo ti a, tualthattute bak tiang hian an nuih thiam ka ringlo. "I lo hre tawh em? Lady Metcalf Ball ah sawm kan ni tih ka hrilh theihnghilh daih che a."



Ka chhing vang vang, ka chan hi ava rapthlak em!



"Lady Metcalf maw?" Ka aw ah chuan ka phurloh zia a langchhuak chiang hle.



"Ni chiang e. Chuan Sir Philip hian a tawlailirin min hruai vek bawk dawn a sin. A ti ropui tiraw Lillian?"



"Ka awmdan hi sawi pawh ka sawichhuak thiam lo."



"A nih chu." Tiin a aw chu a rawn danglam ta vek mai, sipai lalin thu minpe a ang tawh zawk. "Chho la han insiam rawh! I thawmhnaw hak tur ka dahchhuahsak tawh che kha. Minute nga hnuah i rawn chhuk leh hman tur a ni."



"Kan va kal hma awm em em."



"Hma dawn lo. Kan kal hmain biak lawk duhna che ka nei, i tlanchhuahloh nan ven i ngai bawk."



Uh-oh. A tha dawnlo tawp mai.



Ka chho nghal vat a, minute ngaa insiam zawh chu ka tum ve viau. Mahse Ella minpui turin a awm lo, minute sawmpanga hnuah ka insiam zo ve hram. Ka chhukleh chuan ka nutei chu a lo lawm hmel vaklo khawp mai. Drawing room atang Maria nui ri har har ka hre bawk a.



"An lo kal ania." Tihleh min kaihsawn a rual a. Pawn lama chhiahhlawh ho chu hnawt kiangin tawlailir hnungah min kai phei a.



"Ngaithla teh naupang!, engtin nge Lieutenant Ellingham kha i tirh bo theih ka hrelo…"



Inrawlhna ka neilo tia hnial ka tum chuan a hmel hlauhawm ber chi hmangin min ngawih tir leh hmak tawh.



"Engtin nge i tirhbo ka hrelo." Zawtein a tawng bul bul a. "Mahse Sir Philip ball a thilthleng ang kha a thleng nawn tawh tur a ni lo. Lam duhloh vel kha! Zanin chuan khatiang kha a awm tawhlo ang , i hria em naupang! Mawilo taka chet emaw atthlak taka chet, engmah! Mipa zahawm tak fanu angin i awm ang, chutilo chu min hmachhawn a ngai a nimai."



"Mahse ka duh vang renga khatianga awm ka ni hleinem.." Beidawng zet chuan ka lo ti ve a, "A…a thleng ve tawp. Mize nu leh nulo ka thliarhrang thiam lo a, engtin nge ka tih dawn?"



"Oh, a awlsam lutuk." A hmaizahna tiparhin a inzap a. "I tih duh letling chiah zel kha ti la , a dik vek a ni mai."



Chutiang khawpa awmdan mawi hrelo chu ka ni mile?



A chang chang te chuan ni ve maithei. Ka duh changin, aaaa…a tam zawk aniang. Aw! A tha lawm! Nutei duh dan chuan ka awm ang. A hniam thei anga bera kunin chibai ka buk hnâp a.



"Tehreng mai, Madam. Tunah chuan ka kalsawn i phal angem? Ka nau zawn ka ngai a ni."



Ka nutei chu thil hmusual ang maiin a khap fuk fuk a. "Oh..a tha e. Kal rawh. A chhelo e, a chhe hranlo. "



Ka kun leh a. "Ka lawm e, Madam. I chhiahhlawh rinawm hi i chungah a lawm takzet, Madam." Ti duaha kun lehin ka kalsawn ta a.



Tawlailir sir lamah chuan ka unaunu ka hmu a, vanduaithlak takin ka hmuhtum loh zawk a ni. Maria chu ka nuih sang a. "Unaunu duhtak, ka hmu che chu ka va lawm em. Ka nau duh tak Ella awmna ka zawt thei che angem? Biak ka duh a ni."



Ka unaunu chuan min en vang vangin mak a tihhmel teh e. "Patea wine i in ru ami?" A ti hmuk.



Chu chu ni zawk se ka ti. Vawikhatmah zu ka la tem chhinlo a, mahse thluak tih chawmawlh nan leh na tawrh tih ziaawm nan a tha lutuk an tih ka hre tawh. Tun dinhmunah hian ka mamawh hle a ni.



"Pathian hmingin ni lul lo e, ka unaunu duhtak. Tinge chutiang ngaihdan te i neih tak mai? Thil mawilo lutuk a nih chu! A hrim hrimin , engtin nge hmeichhiain zu a in theih ang? Thil awmanglo tak a ni, ka unaunu duhtak."



Ka nui leh a, ka kun leh a, ka unaunu mak tih a tling em em. Ka lemchan thiam zia hi! Ka kalna tur tak niin ka hria.



"Ka Ella duhtak-i zawng turin ka kal phawt ang e, ka u duhtak Maria."



Ka kal pel rual rualin ka nuihmel ka ti tawp nghal. Ka kareh a kham hman vek alawm le.
Ella chu Wilkins nen an rawn chhuak a, ala kuah zui ka ti! Rang zetin ka lemchan ka tan leh nghal a, ka khi nghal sâng. Kawngkhar la inhawng deuh atang chuan pangpar bawr tam zet ka hmu hram.



"Pangpar dang leh maw?" Zawitein kalo ti sup.



Ella chuan beiseina mitmeng hian min melh kiau a, ka khawngaih ang reng.



"Dozen chanve vel mawle! Ka hmui hi rose par a ang atia, chuan ka sam nihawi par , ka vun lily par, chuvang chuan pangpar tamtawk minpek a tulin a hre ta aniang. Khawngaihin min kalsan suh, Lill!"



Ka ban ka beng thek thek a. "Lungngai suh, ka awm hi."



Maimitchhingin thaw a la vang vang a, tichuan ka hrethiam chiah. Tuna amah kuahtu hian nupuia neih a duh vanga hetianga awm a nilo. British knight in a kuah miau alawm le! Chu ringawt pawh chu Ella tan chuan thihdangna tham a tling.



Mimal tak chuan British mi lianho hi ka ngaisang tehchiam lo, ramhnuaia kala vahrit leh sihal va kah leh ringawt bak tihtur an hrelo. Ka ngaina em em pawh a ni chuanglo - vahrit chu vawikhat parkah ka hmu tawh, hmelchhe zetin minla hram khum zui a, kah chakawm rum rum chu an nia lawm - mahse hlawkna tur awmin ka hrelo a ni.



Tawlailirah chuan kan lut a, Wilkins chu ka nau bulah thuin , an ep chiahah ka thu thung, a hmai ben awlsamna turah. A beng parh tak leh hnar ngul sei zet atang hi chuan hmeichhe han khawih thut duh hmel a pu chuanglo nain, inven tluk a awmlo. Ka hawisawn hlek chhung pawha engmah a tih hmanlohna tur khawpa hnaih ka duh.



"A nuam ti r'u?" Sir Philio chuan nui sang hian a ti a.



A thluak chianglo anga ka ngaih vawikhatna a nilo.



Midang pawh an rawn lut ve a, kan kim hnu chuan Lady Metcalf in lam panin kan chhuak ta a. Engtia rei nge kan tlan dawn ka hrelo, kala kal ngai miaulo a.



Kawng penga kan kawi hma hret chuan kan thenawm inkawta mipa pakhat ding reng chu ka hmu a, ralkhat atang pawn Edmund-a lungngai hmel chu hai rual a ni lo. Hmangaihna tih vela ka tlulut lo hi chu ka lawm ngawt mai, thil atthlak tak a ni.



Ella chu a hawilet ve thut a, kei ka hawisawn daih thung. Ella'n a hmangaih hmel a en chuan a nat hmel ngawih ngawih.



"Eng nge i en a, Miss Ella?" Wilkins chuan tiin a hawina lam a en ve nghal a.



"Oh , engmah, engmah." Tiin a leh hawi a, vanneihthlak takin kan kawi hman a, Edmund pawh a hmu ve hman ta lo.



"Aa.." Zam hmel takin Wilkins chu a nui zauh a. "Kan pan mek hian kan kalsan tak chu engpawh ni se, a khum ngei ka ring."



"Ni maw?" Ella chuan pangngai takin a tichhuak a, mahse a mitmeng erawh chutiang a ni velo.



Anne chu rawn tawlh hnaiin, "Lady Metcalf ball chu a va pui awm ve, nge ni a kan hriatloh i hre zawk?"



"Aih, ball chu London khawpuia ball dang ang bawk a nih ka ring, Lady Metcalf thawhrimnate ka sawi hniam tumna nilo se."



"Anih, eng nge i sawi awmzia kha?"



"Minlo ngaidam ula." Nui leh suka tiin, "Kalo sawichiang lo deuh a ni. Eng nge niloin tunge kan pan mek tih zawk hi ania ti danglam tu chu."



Anne leh Maria ngaihven a hlawh ngang mai.



"Mi pawimawh leh danglam bik a awm dawn tihna em ni?" Maria chuan a ti a. "Mipa a ni em?"



"Aw, Miss Maria."



Phirte mit chu a de vat vatin ka hria. Kei erawh nin vangin ka thaw halh. An sawitur dawtleh pawh ka ringthiam nghal vek.



"Tlangval nge nupui nei lai?"



Ka ringsual lo chiang.



"Tlangval ni chuan ka hria."



Ka meng a, a hmaa phirte mitmeng de vat vat chu nep te a ni tawh, an sa seh tur an hmu ang maiin an meng ling vat mawle.



"I ngeiawm thiam e Sir Philip." Maria chu a nui har har a. "A vir tawk lekin min siam zel a."



"Eng nge i mipa sawi chu a danglam bik na?"



"Aw, min han hrilh teh! Eng nge a danglam na?"



Sir Philip chuan a mitko a san ak a. "London-a mipa hausa ber zinga mi a nihna piah lamah maw?"



Ka mit chhing tum mek chu ka meng leh chiang hle. Ka thinphu a rang nghal a, chutiang bawkin ka thaw pawh. Ball ah a kal awm lo emai, ni em? Amah ngeiin mipui thiltihkhawmna hrim hrim a ngainat loh thu a sawi kha.



"Anih a hming? A mizia? A hmel?" Anne leh Maria chu an za cheng tawh.



Sir Philip chuan a lu a thing a. "Nilo e nulate u, engmah ka sawibelh tawh dawn lo. Ring tur chuan a taka hmuh ngei a ngai."



Aw Lalpa! Amah a ni! Ka hria a ni!



Awi nilo! Ka hmu dawn maw?! Kawrfual ha chung lehnghalin! Ka chhungkua, mipui lam nuaih nuaih leh nui karah! Engthil phiangsen nge ka sawi anga? Engtin nge ka awm dawn? Chuan, a pawimawh ber : khawiah nge ka biruk ang?
…. . …



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)