SWEETHEART ~ 9 BY APUII TLAU

Episode kal lai dah luhna

Moderator: writers

Apuii Tlau
Posts: 210
Joined: January 30th, 2021, 2:54 pm

SWEETHEART ~ 9 BY APUII TLAU

Unread post by Apuii Tlau » September 19th, 2021, 10:41 pm

Chapter - 9






"I mask vuah tawh la aw, khaw pawn saw lei an lai nasa a, a khu viau ania" seat hnuai a a thil lak dah luh mawlh mawlh paha a tih chuan ka jacket ami mask chu la chhuak ve vat in ka vuah nghal sawk sawk a, rawn din ngil paha min rawn nuih ver ver chuan ka lo nui tawi ve tak ringawt. Ka awmdan teh thlawt kha nidang chu nise ka phun ka phun awm sia tun erawh ka ti tha leh lutuk bawk sia chu te pawh chu niang!











"Lo chuang rawh le" Scooty chung a thu a tih nun vut vut paha a tih chuan rang zet hian ka lawn kai leh a, a kawngah nghet zet a kuah in a hnungah ka bei hlan bawk. A taksa che dat ah chuan anui tih ka hre thei mai bawk nangin ka awmdan chu ka siam rem buai vel peih tawh lo, ka kuah hian ka hahdam a tian rei lo te ngaihtuahna zawng zawng bo vek a awm ka duh!












Kan tlan chhuak ta vang vang a, thli thaw in ka sang a rawn chhem leng te chu a nuam phian, a khu lai kan thlen chin ah erawh ka jacket lukhum chu ka khum nghal vang a, Au Zela pawh chu ka khum tir ve nghal bawk.












Kan awmdan leh ka thil tih zawng zawng kha ka u te pahnih Valpuia leh Mama hrilh ta ila chuan Dinsanga nen an inhmelhma hlen mai thei ani tih ka hre ve kar a sawi chhuah chi ah pawh ka ngai lo, Au Zela erawh a uang reng a, a sual miah lo bawk pawn lama that loh hmel deuh hi a rilru that zia leh a puitlin ruk zia amah chik tu te chuan kan hria ang. Ka nu pawh hian vin ve hlak hlak thin mahse an inhau fiam emaw tih tur mai mai anni.












Khaw chhung pawh darkar chanve chuang hlek kan tlan hnu chuan kan lut ve ta mai a, kawng a nuam vak lo nen tlan chak a har ve bawk ani pakhat. A din dat chuan ka hawi chhuak vat a, kan chhak deuh kawng atang hian tlangval pakhat lo chhuk thla in min rawn pan in ka hria.












"I va tlai ve......Tan scooty hi dah la khulai deuh khu nia" kan bul alo thlen chuan alo ti nghal var a, min la melh zuk zuk zui.
Ka chhuk thla nghal vat a, Au Zela pawh chuan scooty chu site stand ah dah in a rawn chhuk ve nghal zat bawk.












"Zothan, ka thianpa Nunmawia nih hi, Nuna ka chhang chiah kan tè ber Zothani" Au Zela chuan alo ti vat a. Chu pa chuan min rawn melh in a nui vur vur a, ka lo nuih let ve mai bawk. Sa pan lam sang pangngai tak ani a, a lu a buk ve hle bawk.












"Chhuk ang u" tiin hma a hruai nghal a au Zela nen chuan a hnungah kan zui thla ve nghal zat bawk. Au Zela nen chuan an ti ti nghal barh barh a, an sawi hmangah a patea bike ani awm e. Nunmawia a tih pa chu phunglung ve chi aniang a tawng zuah zuah a a tawng ring thei phian bawk. Rawlh thawk sliper a bun sia a kezungpui lah chu Zopa takin a bawng tha viau bawk...hehe












In dai reih ruih assam type lian lampang zet tual nei tha deuh lampan chuan kan phei zel a, an inkawt ah chuan an bike siam tur chu niang patling pakhat ka tiat pui vel awm hian a lo bih kual ve dun dun bawk.











"Patea hei an lo thleng" Nunmawia'n a tih leh lung lung chuan thingpui no chawi chuan alo hawi chhuak vat a, pa lian tak ava ni si lo em. A hrim hrim in Mizo hi chu liantak hi kan vang pharh ve hrim hrim a.
Keini unau hi alian pawl chu kan ni ve mai thei ni. Mama leh Valpuia hi an intiat deuh a Ft. 5'10 vel an ni mai thei an than belh te nih loh chuan, Au Zela hi 5'8 vel ani thung a, Kei 5'3 ka ni ve chauh. Hmeichhi hi chu than alo thu hma ani ta ve ang.












Au Zela te nen chuan an inbe nghal luam a, a chhiat dan te an han in hrilh zung zung a, inchhung lam atang chuan naupang pahnih hi chak zet in an rawn in um chhuak vawn vawn bawk. Nunmawia patea chuan an han au leh rih, an tlan liam vang vang tawh sia auh let chu a har ve ang.











"En nghal mawlh mawlh mai ang duh aiin kan lo tlai sia" tihpah chuan bike chu an han thiat vel emaw ni an check nghal zung zung a. Nunmawia zawk chu in chhungah chuan lut vut in chair keng hian a rawn chhuak leh vat a, min rawn pek chuan lo ban zat in lawmthu ka lo hrilh sap a, Au Zela bike siamna sir deuh ah chuan kan lo thu dun ve khar a, a patea zawk nen chuan Au Zela chuan an siam mawlh mawlh thung.











"Bawihte, ka kut ah oil a kai tam sia ka phone a ri" Au Zela a rawn tih chuan phei vat in a jacket ami chu ka phawrh sak vat a
"Mama nih hi" tih leh pick up ka rual nghal zat bawk.












"Hello" ka ti nghal var a, dar 3 a pel tawh sia alo thleng tawh anih ka ring.












"Miaupui, i phone ah biak i va har ve?" a rawn ti nghal vut a. Kan misualpa vangin ka switch off daih sia, biak tlang chu ka har ve viau ang.











"Nia, signal ka nei tha vak lo a, i lo thleng tawh mi?" ka lo ti let ve vat a.










"Aw, thleng chiah in lo haw har dawn em? Tlai deuh ah te khan rawn haw suh u, i dam tha lo lehnghal" a rawn tih nghal tlawng ah chuan ka lo nui tawi tak. Ka damlo der ta kher kher chu ka ti fuh teh chiam lo a ang, ka chhungte ka ti thlabar mai mai chu ani sia.












"Lawks kan zawt ange" tih pah chuan "U kan haw har dawn em? Mama'n ati" ka ti deuh kher a, a rawn rum deuh dat chu ka lo nui sawng thung.












"Tlai lo ang, dar 4 vel ah ti rawh, dar 5 ah kan lo thleng ang ti bawk la" Nuih vur vur paha alo tih leh chuan ka lo nui ve hak a
"Lalthanzel leh! Rawn haw har miah suh u" Mama chuan kan thusawi hria chuan a rawn ti leh hluk a, rei vak lo kan inbiak hnu ah kan dah ve mai bawk. Au Zela nen hi chuan kan chimawm ve ang reng sia, min zirtir ani tel mah ang keipawh hi a chang lahin a bula awm tam an han phal lo vel thul Au Zela lah hian a run luih thiam ang reng sia, a tawp ah kan nui tlang leh nge nge thin.











Darkar 1 chuang mah an khawih hnu chuan an zo ve thei hram a. Au Zela pawh a oil kai vel emaw ni a dum nuau mai.
"A chain pawh hi a dul anih hi, a inkhawng nasa viau lo maw" A kut sil mawlh mawlh paha a tih leh chuan " E...chu chu nih dawn chu a ri chhek chhek zela tlan pah hian a eng nge mawni chu aw ka tia, bike lampang hi ka neihna la rei lo bawk nen ka hre lo riau a" Nunmawia Patea chuan alo ti ve vat a. An tuizem ah chuan kut an sil dun mawlh mawlh bawk.












"Haulawng i rawn phei rem chanah kan inah lo kal la ka pawt mar dawn nia, anih loh chuan a thar ani mai, a sprockets pawh saw thlak angai anih saw..." a ti nghal zung zung a. Hepa hi alo thiam ve reuh viau anih hi, kei in a engmah ka hre der silo.












"Thingpui in ang u aw.." kut hruk mawlh mawlh paha a tih leh chuan "Aaa...kan kal zawk ang duh aiin kan tlai zawk maha dar 4 a pel tam ve tawh sia, ka nau hi a dam ala chiang lo bawk nen" Au Zela chuan alo ti nghal vat a.Kan chhungte chuan kan thlen har vaih chuan keini lo in Au Zela hi an hau nasa dawn tih ka hre reng bawk.












"E...Chuti maw, pawisa kan la ange" tih pahin inchhungah chuan alut nalh a, kan lam pan chuan Au Zela chu alo phei ve vat bawk.











"I motor chu enge ala an?" tiin Nuna zawk chu a rawn be nghal vat a. " A tha aniang sawiselna pawh ka nei leh tawh rih lo" alo ti ve nghal zat a, kan bul rawn thleng phei in a rawn ding ve nghal run bawk.











"A that hlauh chu, chuan pakhati lam ve kha.." Au Zela'n a tih leh chuan alo lai ve tut lehnghal, a hmel chu a nuih zatthlak reuh sia, a lawmawm letling phian. Rei lo te ah a patea chu alo chhuak leh vat a, pawisa te in pe fel in keini pawh chu kan chhuak chho leh ta nghal a.











"Ka kawr hma ah hian engine oil kha ka ti kai deuh a" ti nuah nuah in scooty chu a ti nung nghal zat a. Lawn ve vat in kan in vai liam leh ta vang vang a.











"Engtin nge in inkawm teh daih a?" kan tlan chhuah hnu lawk chuan ka ti lang lang a. Khawchhung pawh ni a tlai lam ve deuh tawh nen a reh ve ruih mai.












"Hlimpuia'n zotui ah hian chhas anei ve deuh a kan va rim pui thin alawm" alo ti tha ve mai a. Mipa ho tak hi chu! Khaw hran ah te hian an han nei ve ngei zel a, amah pawh hian ahma in Mualthuamah a nei ve ngei tawh mahse kan hmuh ve hma hauh in an lo inthen leh daih, an la inla tleirawl thawveng ve lutuk hi a!













Kan tlan leh ta vang vang a, khawthlanglamah ni a uai thla tan tawh bawk a kawl pawh a sen mawi leh tawh viau mahse nipui lai ngang ani bawk a khua erawh ala eng ut tho mai. Kawng pawh an lo laih belh leh viau tawh a kan tlan khu leh rum rum tawh.












Hmuntlang khaw peng kan tlan pel a, ka khal ve chak tawh thu ka sawi sek nangin zu han ding duh thak lo a. Tih buai chak viau mahila kan accident ang tih ka hlau ve bawk si.












Khawchhung luh hma daih Kraws (Cross) an phunna lai bul thutna an siamna bulah chuan a ding ve ta hram a.Rang zetin ka chhuk nghal a, site stand a dah in ani pawh a rawn chhuk ve nghal mai bawk.











"Thu hahchawl lawk ang khua ala thim dawn chuang lo bakah kan hnaih tawh tho" a tih teh tlat avang chuan thing thutphah ngheng chhan awm a an siam ah chuan kan han thu thla dun leh a, kan ei tur pai nichin a kan ei tawh avangin pepsi chauh ka nei tawh chu ka va la vat a. A can chu kheuh hawng in ka in khalh khalh a, a tui leh ngei mai. Ka pe ve vat a, alo ban ve mai bawk.











" Ka kalpui che sia hlawh minpe ve dawn em? " tihpah chuan ka va melh let kal a, phakar min tih hmel zet a min nuih hnu ah, 500 tlang hi min rawn pe ve mai a, lawm zet in ka lo khek raih bawk. Pawisa neih te chu nuam deuh asin.











"Miaupui" a rawn tih dut chuan "Yessi" ka lo ti var a, ka pawisa dawn vang chuan ka nuih pah var var bawk.











"Harsatna i nei em ni?" a rawn tih tak sup ah chuan nui sang chuan ka la melh reng a, ani erawh anui tawh miah lo ngun zetin min lo melh ve run tawh. A mitmeng thu tak lutuk avang chuan ka nui tawp riai riai thung.











"Tinge?" nuih lui sak pah chuan ka melh let ve kal a, ka hawi sawn chuan min ringhlel zual sawt dawn tih ka hre ve kar. Hetiang em em a thutak a Au Zela nen kan inbiak hi ka la hre lo.











"I u ka nih hi, midang i rin loh pawn kei chu min ring thei i bulah a tawp thlengin ka ding dawn alawm, kan lo upa a harsatna tam tak kan tawh hun thleng pawn" tih leh sup pah chuan min ngaihtuah hmel zet hian ka kut chu a rawn hum vang vang a. A mitmeng ah chuan min ngaihtuahna thuk tak ka hmu mek bawk.











"Ka tha lawm" ka la ti fan a, ka mittui erawh a tla lo chauh thung. Hmangaih tak te kiang ah chuan no alo awl duh em asin. Min ngaihtuahna aw ringawt pawh in min vel lo chauh chu ani sia a, ka harsat na zawng zawng ngaihtuah phei chuan!












"Lo kal teh le " tih pah chuan min pawt hnai in a awm lum vang vang ah chuan min kuah ta hlu hlu a, in lak pachan tum hle mahila ka tap lo thei lo ka chhungril atangin manganna thuk tak chuan min hnawh miau alawm. Nghet zet chuan kuah let in ka insut ta hraih a, ka nqtna zawng zawng kha min hneh thar riau bawk ni mai in ka hria.












"A tha vek dawn ania, a tha vek ang" tih pah chuan ka hnungah alo chul ve hlu hlu a, min ngaihtuahna aw te min hmangaihna kut te a engkim mai chuan min ti no zo a, ka u awm ngheng ngei mai chuan ka natna tam tak bun ruah tum ang chuan ka tap ta zawih zawih a!











Rei tawk fang chutianga kan inkuah hnu chuan ka awm hrang ve thei hram a. Ka mittui tla chu ka hru nghal mawlh mawlh bawk.










"Sawi tawh rawh le" tih pah chuan pepsi chu min rawn pe a, tlem lo in khalh khal in thawk kan la hmasa leh te te a, dik tak chuan ka sawi zak ve tho mahse ka u ani a amah lo rin leh tur dang an awm lo tih ka hria a engkim mai chu ka hrilh ta vek law law mai. Ka sawi lai chuan achangin ka thinrim a atangin ka mittui a tla thung, ka kut vuan in ka thusawi ngun zet in min lo ngaihthlak sak ve reng a, a hmelah chuan min ngaihtuahna mitmeng bak ka hmu lo thung.











Ka sawi zawh chuan ka thawl hawk maiin ka hria, ka zang a, mahse a tawp ka kharna erawh in min tina a kan thawnthu tawp nan chuan ka suangtuahna dan ani miah lo asin le!












"I chak tak zet, ka chhuang lutuk che" a lo tih sup chuan tah nuih hak in ka melh a, a sawi awmzia ka hriat miah loh vang ani pakhat. " I duhthusam emaw i thil duh ti tur a i ke i pen hmasa ngam hrim hrim pawh kha i huaisen tawk zia ka hria lawm, tuna i natna emaw harsatna pawh hi i tuar chhuak ngei ang, i u i kiangah ka awm bawk hi i mangan hun apiang ah i kiangah ka ding zel dawn alawm" tih pah chuan ka kut chu a hmui chuan a nawr si vang vang a. Mittui tling piau chuan ka lo nuih ve var var bawk. Kan naupan laia ka tah apiang in tihian ka kut min fawh sak ziah a, ' dam dam ' a ti ziah bawk.











" Thil pakhat ho te aw....... I tawrh hi ana tiraw ka tan lam nilo in i hmangaih ohhh....i duh ber mipa in a hliam che a, ani pawh khi hmangaihna a hliam tho anih khi nang chuan keimah belh tur leh innghahna tur ila nei a, ani chu mipa puitling ani tawh tah pui a in paih thawl chu tlawmah an la tawh a an chhungril in an tuar thung, an hliam anat viau phei chuan pawmlamah tihlan loh sen loh lai a awm thin bawk,a khawvel kha beisei tlak awm miah lo in a chhe miau a,a neih hlu ber 2 a chan bawk, ka sawi tum ber zawk chu in na ve ve a, inrem tak in awmdun thei ula in intih dam tawn theih ngei ka ring, mahse a thil phut erawh kha chu nupa innih hma loh chuan intih a ngai hauh lo" a ti leh dap dap a, a tawp lam erawh a sak talh mai.












Zawi muang chuan kan inkhalh haw ve leh ta dat dat a, khua a thim tan deuh ti tih tawh lehnghal. Kan tum aiin kan awm rei bawk nen kan chhungte chu an thinrim leh teh ang chu. Scooty chu min khalh tir ve hram a, a hnung atangin min lo venpui pah reng thung!











Kan kawt a ka din dat chuan a chhuk vat a, amah zawk chuan hung tha mawlh mawlh in kan inzui lut chho nghal mai bawk. Kawngka kan hawng chiah erawh parthi nen min lo hmuah em em chu beisei viau lo mahila hetiang em em chu kan beisei lo ve ve ang.











"In va rei em em ve!" Mama zawk chuan alo ti hluk a. Ka pa'n alo khap nghal vat bawk. An vai chuan sitting room ah an lo thu deuh thap a, min lo meuh khui hlawm bawk.











"Thanzel, i nau kha adam lo kan ti mawlh mawlh ani lawm ni, hetiang khawp a tlai ah rawn haw pui mah ta che" Min rawn pan paha Au Valpuia'n a tih leh vut chuan ka lo ner nang a. Ka pang a rawn dek nghal zat thung.











"Ka tha reng, scooty khalh ka dil tlat a ka tlan chak ngam leh si loh vang anih kha" ka lo tih chuan ka nu chuan ' chanchin tal min rawn hrilh tur alawm, min ti mangang hman lutuk ' tiin min lo khak dun nghal malh malh a. Ka pa in " inti fai ula chaw ei ang u" tiin alo ti tawp vat thung. Nui sawng in Au Zela'n hnunglam bathroom apan a kei choka bathroom lam ah ka lut bo ve nghal thuai thung. Ka nu in min hauh achang hian ka pa hian min chhan nan engtin tin emaw min tirh bo na tur min lo zawn pui vat zel a, min duat hlawm lutuk te hi chhungkua ti nuam tu ani, a hunah erawh a patling leh fu zel a, aman hmaichhan ngat a min hauh tawh phei chuan zawm loh chi loh reng reng.












Chaw ei lai te chuan ka nu chuan min la hau leh zat zat a, "I thinrimna chu chaw sa in kang dai rawh se" Au Zela'n a khat tawk a alo tih sek chuan a nuih loh theih loh, ka nu lah chuan engah mah a ngai der silo, au Zela lah in a sawi tawp duh bik silo, a tawp ah ka nu zawk in "Chaw dai anih hi kan ei" te chu ala ti kha kha a, ka pa ho in kan nui ta vek ringawt.












"Zela thiam loh tho tho ani chaw thleng kha sil rawh se" Mama'n chaw thleng seng paha alo tih chuan "Hnathawk a kal kan nia a khu si ka hritlang dawn aniang ka hrawk a ro lutuk a hnawng thei lo , ka sil peih bik lo" khuh lui kharh kharh pah chuan alo ti a. Mama te hmuh loh chuan min lo la siai zuk zuk zui.











"Keiman ka lo sil mai ang, va mu duai rawh" ka lo ti var a. "I hritlan kha keiman ka lo sil ang, dawhkan leh gas hi lo ti fai ula" Au Valpuia chuan rawn tiin apron a hreng nghal zat a, ti fuh inti zet in Au Zela chu nui sawngin room lamah a phei nghal hmak thung.










Mama'n dawhkan a hruk chhungin chawhmeh thing chhuanlum leh gas tih fai ka lo ti mawlh mawlh a, kan indaih bawk a, ka nu hian kan tet lai atanga min train vek ani bawk a han peih loh hranpa viau hi kan nei lo, mikhual kan neih erawh chuan a mawi ah tiin keimah hlir in ka sil thin. A tam thei si a ninawm theih lai ber.











Chhung inkhawm te kan hman zawh mahni room lamah theuh kan phei leh a, tih tur vak kan nei leh hlawm lo bawk nen dos patti khel in kan rak leh chul tawh, a changin bottle in kan in vaw leh tawk tawk zel bawk nen kan bengchheng ve leh viau tawh.










"Ka dang a ro vek" thaw halh halh pah chuan tiin ka ding nghal zat a, "Frige ah coke ka dah kha rawn keng phei rawh" Mama'n alo tih vat chuan ka phei nghal vat bawk. Ka nu leh pa chu U.S open en in an lo tang duh nasa leh tawh viau, an thut hnaih dan ah.










"Bawihte, Frige bula i phone dah kha nichin khan alo ri a, lak hman pawh ani lo an dah leh nghal daih a" Ka nu in alo tih chuan thlan hliam chuan ka bu nghat a, coke chu phawrh in a chhin ka hawng rawk rawk a ka in nghal khalh khalh bawk.











Mama thei hawn chu ka nu te eitur chu kan zai hmasa leh te te hnu chuan room lam pan tur chuan ka phei leh vat a, frige bula ka phone charge pawh chu ka ban nghal zat bawk. Room chhung a ka luh leh chuan wai wai hi an lo bawl ve rak rak a, an palian hlawm sia an eitur a te bawk sia a nuih zatthlak tawp.











" Taka Mam, enge min lo hawn?" thil ei tawlh tawlh chung chuan kan ti tha leh a, a zin vel emaw hian thil min lo hawn ziah a chah lo mahila min hawn ka ring ve leh ringawt.











"Thu in awih lo si, ka pe duh dawn che u emaw ni?" alo ti nui nui chuan kan hnaih nghal hrat hrat a, phakar min tih hmel zeta min en pah in an pathum chuan an han nui leh vel a. Min pe lo ang tih ka hlau ve ani mai a.











Kan ei zawh chuan a bag chu a han hai rawk rawk a, Au Zela nen chuan paper bag zawi chi a dum hian eng emaw hi min pe ve ve a. Au Valpuia en a ka en leh chuan ka zawhna a hrethiam nge "A dang ka hawn ka pe tawh " alo tih vut chuan ka lo nui var var a. Rang zet in a thil min pek chu ka phawrh nghal bawk.












"Awiiii" ka tum loh deuh anih vang chuan ka au deuh raih a. "Yesss" Au Zela chuan alo ti chul thung. Ka va en sak chuan England football jersey no.6 chu min lo hmuh lang va va a. Nui chung chuan ka ta chu ka hmuh ve vat a No.9 ngat leh nghal.











"Mam, a ori mi? ka van lawm" kan tih chul chuan alo nui ruh ruh duh chauh lehnghal.
"Nilo, 900 man chauh anih kha...a ori te chu sing chuang alawm, i u te hian chutiang leina man em em kan la thawk chhuak lo" nui sawng a Au Valpuia zawk in alo tih pawh chuan ka lawm tho tho a.
No.9 anih vang hrim hrim pawh hian.












"Naktuk ah thla kan la dawn nia, tlangah" Au Zela'n alo tih leh chuan U a te 2 lah chuan an lo phal lo nasa mai. An naute hi min la hrechiang lo em ni? Pachuau luhlul vek kan nih kha maw...












Dar 9 velah ka room lamah ka phei a, room 3 chauh kan nei bawk sia, mipa ho hi an awm ho vek a, room lian ber an changa kei mahni chauh ka ni thung nen a te ber hi ka chang ve thung.











Ka jersey thar chu ka wardrobe ah chuan ka khai lut nghal vang a, khum ah chuan bawk thlawp in ka phone chu ka khawi ve ta chauh. Hui.....hamm....phone ah lah hian rilru hahna tur bak awm lo, ka unau te bula awm rih hi ka tan atha ber rih ni maiin ka hria.










Ka awih thei lo zawk Zodinsanga miss call 7 ngawt zu awm a!!! Pakhat lah chu nichin mai ala ni zui.Ka nu sawi kha ani ngei ang! Call back pawh tum lo chuan whatsapp ah Kimkimi nen kan inbe ta daih a, ani pawh hi tihbuai chi loh thinlung hliam ve tho, ka nun khua hi a chau ve ta ruih mai.











Ka phone dah chuan a rei loh ah ka mu ta hmak a, ka lo muhil ve mai aniang ka phone ri bawk in min ti harh leh. Meng siar siar chuan ka en a, ka tum loh lutuk hming alan vang erawh chuan ka mit phone eng avanga thip zet chu phone chu khup thawk in ka chhing hmasa leh vang vang bawk. Lak loh mai ka duh laiin a tawp a, a rawn ri nawn leh zat thung.














"A tlai tawh em hi! Ka mu tawh" Hello pawh ti buai peih lo chuan ka ti nghal tawng a. A la rawn rum nghut zui. Mi mu tawh te biak tlat tum mai.











"I la muhil chuang hleinem" a rawn ti ve zat a, ngei zet chuan ka ner nang bawk. Zan rei rei a hetiang in min lo be ngai miah lo bawk, ka hnawl kha ala na nge min tihbuai tlat a tum ni! A ni aiin ka na daih zawk reng sia.











"I hre lo, ka dah dawn" ka ti nghal hmarh hmarh a, dah ka tum lai tak in a rawn tawng leh lawi si.Ninawm! Ruih a nei deuh emaw ni niah nuah chuan!












"Enge! Ka mut a chhuak ania" Zawi fiah zet chuan ka ti leh nghat a. Hriat theih mang silo hian a phun leh nuah nuah bawk. Ruih a nei chiang lutuk hepa hi! A mak e, hetiang ruihtheih thil ti ve em tur chuan ka phal lo asin, a hma a pa tha leh fel khawtlang leh kohran tana mi tangkai leh an ni tan pawh a an kut leh ke ber kha ti hian a hrang ta der mai si a, a thil tawn ka ngaihtuah hian ka khawngaih ve tho bawk si, mahse a thil min dil erawh mi pangngai tan thil awm leh mawi ah ka ngai silo.











"I hre thei em? hello hello" a rawn tih leh bul bul chuan "Aww....sawi vat rawh ka mut a chhuak" ka lo ti ve kha kha a. A nun tla bal , belh tur leh inghah ngamna nei lo lutuk te hi ka khawngaih em ani.











"Tinge min biak leh duh tawh miah loh a? Chuan.....Tunge tlai ami kha?" alo ti leh nuah nuah a, ka hriat miah loh laiin ka mittui alo tla fel der chu niin ka kut chuan ka hru vat vat bawk.











"I rui ami?" ka ti teh tlawng a, a tawng dan ah hian a rui tih chu hre chiang viau mahila ka ring phal lo lam mah ani.











"Aih.....ka rui lo, ka zawhna kha chhang phawt rawh, tunge i kal pui kha? Ka thin a rim bawk ania? Ka mu thei lo alawm" a rawn ti leh vut a. A buaithlak thin mange awwww....... Dah san dawn ringawt ila a tawrhna zo zai ka hria a sawi leh sawi hnu ka khawngaih viau lawi bawk sia ni.












"Ka u chiah Zela kha, Mask a vuah a i hre lo mai mai anih kha Zotui ah kan kal lawk a, a tlai tawh ania mu tawh rawh" ka ti let vat bawk. Han hauh chiam dawn in ruih nei hauh chu a sawt viau dawn in ka hre bawk silo.











"E.....Chuan ka zin dawn a enge ka lo hawn ang che?" aw zang vah hian a rawn ti leh sur sur a, a rui hi eng emaw ti zawng hian biak a nuam riau lehnghal.











"Khawnge i kal dawn a?" ka lo ti let ve zat a. Rui lo se chuan a zin dawn tih pawh ka hre tawp nang!












"Venpuii Birthday ania, kan lawm dawn a, enge ka lo hawn ang che" a tih leh chuan ka ka chih chiang hle. Ka mittui bawk an lo hnam leh tiam tiam bawk, a mak zo zai teh e! Min ti na em em tu hi ka la duh tlat mai chu nia! Nat nawn leh hi ka phu ngawih ngawih te pawh ani ve ta ngei ang.












"Engmah ngai lo ka dah dawn aw....ka mut a chhuak a" Tap teu chuan aw tih zangkhai tum in ka ti sap a. Ka chhungril ah chuan min hnawh leh tup tup tawh bawk. Nat inhuam in ka pan a ka na ta cheng a a hrehawm ka ti leh em em tho sia, inhuam ang ngawt hi ani lo chiang khawp mai.












"Cake ka lo hawn ang che aw" a rawn tih leh pawh chuan "Umm...muttui" tiin ka dah san ta daih a. Ka khumah chuan zangthal a mu in ka tap chhuak ta hak bawk. He mipa hi ka phu lo viau em ni! Ka ta tur a siam ani ve lo nge, kan khawvel hmasa ah ka tih sual te vangin hrehna ka tawk zawk!












Midangin an hriat hlau tak chuan ka tap hlap hlap a, hetiang khawp a chhungril tawt leh hrehawm hian ka la awm ngai lo bawk nen tawrh dan thiam a har ka ti takzet! Ka beidawng dawn tawh tak zet em ni!











● Ka duh aiin keipawn tlai ka inti😄 Comment lamah pawh in fel hlawm si, in la fel zel dawn phei chuan kan induat thiam viau ang😍 Muttui suk suk ule💙



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)