LUNA ILENA CHAPTER - 25

Episode kal lai dah luhna

Moderator: writers

Lalnunmawii manuntei
Posts: 109
Joined: November 26th, 2020, 10:46 pm

LUNA ILENA CHAPTER - 25

Unread post by Lalnunmawii manuntei » September 23rd, 2021, 7:33 pm

LUNA ILENA


BY


Lalnunmawii Manuntei



Ka nu leh pa an lo thlen chuan an thinrim hle, " i u mai mai chu min ti hrilh hai der a lawm le, a birthday cake te ka order sak ve em em a , min thungrul dan chu a inzah loh thlak hle mai, Biak in hawngin pasal ka nei dawn dededeideite kha a ti ve khang lang leh nghal, sawi lo tawp se a ṭha tur" ka pa chuan a ti khur khur a, sawi lo pawh nise a thinrim zia chu a hmelah a lang nghal vek thei.




"Ṭhiana insum ṭhin teh, thinrim laiin an ṭawng duah ngai lo, tiang kan ni tawh sa sa inneih vat se ni mai" ka nuin alo tih zawm ve nghal zat.




An rilru tur dawn pha kher lo mah ila an fanu vang hian an zak hle dawn tih lah ka hai bik lo, rilru chu a nuam zan lo.




"Ka pa thinrim ang hlak hlak chu ka ngaithla chhunzawm duh tawh lo, ka ngaithla ve kur a nih chuan keimahah a ṭuan leh daih palh ang " tiin ka roomah ka chhoh san daih.




Ka phone ka check zuai a, Samuela message pawh a lo tlar dul mai, " ka thleng chiah e, nangmahin mi i la awm?" Tih te ani nuai a , reply dawn lahin a online tawh si lo, pawi lo chhang lo tawp ang.




Message seen a reply lo ho hi ka huat zawng tak an ni ṭhin a,tun mai khan ka huat zawng ngei chuan ka awm leh lawi si, inthlahrung deuh chuan ka reply leh ta nge nge.




Min chhan mai loh vang chuan status ka view kual vel a, ka U ṭhiannu U Zotei status chuan ka mit a la nghal hmak mai.




Uluk tak chuan ka check vel a, Samuela ang ka ti riau bawk si, zanina a inchei dan nen chuan a inang fai vek, min bum ka ring lo, amahah hian rinna nghat tawp turin min ti a , ka ring reng bawk, mahse, a caption kher kha chu ka pai dai thei bik lo.




" I hmangaih ber nen hlim taka in awm dun hmuh chu a nuam hle mai, thinlung takin ka lawmpui che, hlim reng ang che u" a rawn ti kher a , kei nen hmangaih biahthu kan inhlan mawlh mawlh laiin midang chutah a ṭhiannu nia a lo chhal nen a inngaizawng tur chuan a dik thei si lo, nge dawt thu mai mai pawh ka hrethiam chiah lo..




Ka U vangin ka muhil thei lo chu ka in let sek a, ka taksa te chu a kham urh tawh, Samuela vang pawhin ka muhil thei chuang lo, hmeichhia zawkin a va biak hmasak hi ka duh ngai lo, tlawmah ka la tlat ṭhin, " enge i tih a ? I mu tawh em?" engmah ngaihtuah chiang hlei lo chuan ka va thawn ve rawih a , a la chhang thei lo zui, bei a dawng ngawih ngawih.




Minute tin chuan ka phone ka bih sek a , a message reng hmuh tur a awm lo, ka thinrim insum zo lo chuan , "min chhang vat rawh, seen teh, seen vat rawh ka ning a nia" tiin ka va thawn leh ṭhin. Min la chhang ṭhak lo nia.




Zan a rei tulh tulh a ka harh telh telh bawk si, ka message kha seen tal se chuan tui takin ka mu ve thei tur, ani lah a reh vung vung bawk si, kan inkarah hian hmangaihna a awm lo a nih te pawh ka ring rum rum, kei ngei pawh hian ka hmangaih em tih ka chiang chuang lo.




Induhna leh inhmangaihna hi a hran hlakah ka ngai a , induhna hi chu duh satliah mai chauh vei zui chuang lo ang hi a ni a, hmangaihna hi chu chu ai a let tam takin a thuk zawk fo, thu ziak mi tam tak te pawn an sawi fiah zo lo; mahse , kan thu in nghahna Bible hian chiang takin a lo sawi ve thung.




"Hmangaihnain a dawh thei a , ngil a nei bawk ṭhîn; hmangaihnain a îtsîk lo va ; hmangaihna a infak lo va, a uang lo va, a che mawi lo lo va, mahni hma a sial lo va, a thin ur duh lo va, sual lam a ngaihtuah lo va, fel lohnaah a lâwm lo va, thutak erawh chu a lawmpui ṭhîn a; engkim a tuar hrâm hrâm a, engkim a ring a , engkim a beisei a, engkim a tuar chhuak ṭhîn." Tiin kan bible hian a lo sawi fiah chiang hle a ni, ka nun ka en let chuan zir tur ka ngah zia ka hre chhuak ṭhîn.





Hmangaihna hi Pathian laka chhuak a ni a, a ropui bawk; mahse, mahni chhung leh khat unau te pawh hmangaih hlei thei lo hian mihrang hlak mai, kan ngaihzawngte kan hmangaih thei erawh hi chu a dik chiah chuan ka hre lo a ni.




Nitin school kalin kan inhmu ngun hle a, a chang chuan kan in lamah a lo leng lut ve fo, chu tiang reng reng chuan hun leh ni kan hmang ral a, thlakhat ka hman tawh a zawng a rei lo ber a la ni .




Kan in exam zo chu kan inla free ve em em a , ka U te pawh kar leh mai hian dan hnihna in an inneih dawn a , kan hlim rualin kan lungngai a ni.




Chhungkua a mi ṭangkai ber leh nu leh pa awm loh pawh a nu leh pa chan chang thei a ni a , a naute hi min hauin min hrawk dawt dawt ṭhin mahse, min hmangaih lo ngai chuang lo, ka tan phei hi chuan a hlu leh zual, ka hmeichhe pui a ni a, kei zirlai ve mai ka ni bawk nen a theih ang angah min awl em em a , ka tan chuan lunghlu ṭha chi ai pawhin a hlu zawk.




"Samuela pawh a lo leng khat ta hle mai, nang ni hi in inṭhen em ni?" Ka nu zawhna chu a ṭul ka ti lo, nula dang nen a sawi zawm an nih khan ka la na viau a nih kha, a insawifiah lo, " min ring tawp mai rawh, kan inkarah engmah a awm lo, mi thusawi mai mai awih rual i ni lo" a ti leh tawp zel a, ka ring a chutih rualin min hlat leh ang lawi si.




Ka nun a mipa hmasa ber a nih loh vang hian ka duhna a nep hran chuang lo; mahse, min biak loh hi chuan ngawih ka chuh ve tawp zel.



Ka ngawih tak rengah chuan , " Hluitei nen an sawi zawm fo mai a , ngaihzawng a neih chuan hmeichhe dang chu a hlat ngam turah ka lo ngai mai a , mipa rintlak a ni ka tih rual khan a rilru pawh a thlak ve thei tho" ka nu mai mai chu ka U ten an hriat loh tur ṭha ṭha an hriat phah vek.




Ngawi turin ka signal a, ka nu lah chuan a hrethiam der si lo, ka U leh a ṭhiante hlatah chuan ka kalsawn nul nul, U Hlutei te nen an inkawm ho vek a , an bul a an ṭhiannu chung chang sawi pawh chu thil mawi va ni suh.




Ka U te inneihni hnai ta lutuk chuan min ti hah zo vek, inlam tihfai leh eng eng emaw tih ngai a tam si, kan kut a awl hman thlawt lo, kan mawng phei chu kan hung ṭha hman ve lo.




Ka rooma ka ṭhu chu ka nu lo lutin eng eng emaw tih tur a sawi melh melh a, a sawi zawh hma chuan, " ninawm e, hmeichhia nih ka peih tawh lo, mahni inah awmpui chán kan chang a, pasal kan nei anga awmpui hna bawk kan ṭan leh anga, mipa a ka lo piang ve lo hi a pawi ngawt mai" ka ti vin hlarh a , dik tak chuan ka inthiam bik chuang lo, ka mood hi a buai leh tawh, ka insum zo ṭhin lo.




" Hmeichhia nih chuan heng hi lawm kan chan, kei pawh ka nu leh pa te kianga ka awm chuan fanu rangkachak ka ni ve a, pasal ka neih hnu chuan kan indan hma chu chhiahhlawh ka ni ve tho alawm" a rawn tih te hlei hlei chuan ka thinrim a zual tawh.




" Ti nge ka lo pian ve le, piang lo law law ila ṭha mai tur, kan khawvel hi ninawm tawh ngawt mai, dam pawh hi ka thlahlel hlawl lo" ka tih leh chuan ka hnung a ri nghal thlawp.




" Â lutuk mai, chutiang sawi tawh reng reng suh" a ti chhum hmuk a, kei lah ka hmui ka veng seng lo , " engatinge ka U ṭhiante awm laiin U Hlutei chung chang i lo sawi? Sawi tawh reng reng suh ka dikna pawh nise an ṭhiannu lam an ṭan loh i ring reng reng em ni?" Ka ti leh hmak, ka thinrim insum zo lo hi a hnu chuan hrehawm ka ti leh ṭhin.




"A pawi tur zawngin ka sawi loh kha, bakah miin an sawi nasa ve reng a lawm, i hre ve lo em ni?" A tih te hlei hlei chuan ka ṭah a chhuak ṭun tawh, an sawi ka hriat vang a thinrim lungawi lo ka ni tih a hriatthiam ve mai ka ring kha nia, ka rilru hi tumah hian an chhiar thiam thei dawn lo a nih hi.




"'Min ring tawp rawh, nang lo duh leh hmangaih ka nei ngai lo ang' a ti a, rin tur a ni em pawh ka hrethiam teh nuai lo, midangin an sawi danah te chuan kha mi zan khan mi dang ta a ni daih tawh" ka ti chuai raih.




" I rilru tur chu ka hrethiam lutuk, ani ang mipa chuan a bum duh che ka ring hauh lo mai, bakah a hmangaih thu che pawh ka bulah zep nei miah loin a sawi vek a , i rilru ti hah duh reng reng suh" min hnem na mai mai ma nise ka lungawi lohna te chu a reh tual tual mai.



" Hmangaihna ah hi chuan inrintawnna a awm a ngai a , nupa inkarah pawh hian inrintawnna a awm loh chuan rei an daih ngai lo, i U pawh a rukin ka chah mawlh mawlh a , engtak ang ang maw" a sawi zawh rual deuh thaw chuan ka U ten an lo koh ve chiah, hmanhmawh deuh chuan min kalsan a.



Ka nu sawi hi dik ngei se ka ti, keimah maiin lo pai ta reng ila rilru dik lo ka pu vat ang, ka nu ang nu ṭha lutuk mai inbunruahna tur ka nei hi vawi tam tak Pathian hnena lawmthu sawi tur chu ka ni chiang hle.



Ka U te inneihni pawh kar lohah kan thleng ve ta der mai, Samuela te chhungkua pawh a bik tak a kan sawm avangin an lokal ve bawk a , Biak in a invuan tur an nih loh vangin Hall lam kan pan sang sang hlawm a.



Ka U tan chuan a hlimna ni ber tur a ni a, kei pawh tiang hun thleng ve tur hian kum tam tak nghah a ngai tawh bik lo, collage ka chhuah rualin inneih kan tum a , tunkumah class 12 ka zo ve thei te a nih chuan kum 3 chiah nghah ka la ngai tihna.



Ka rin ai daihin mi an tam a, ka nu chhungte lam hi Shillong lam a an awm hlawm vangin lo kal duh viau mahse ka Nutei chiah a lo kal thei a, ka pi leh pu te pawn inlamah inneih thlalak vel an lo chang ve thung. Ka pa chhungte lam chu an ṭhahnem viau thung, kan inah an innghah hlawm avangin kan ri laih laih ṭhîn.


Mipui zi nuai nuai karah chuan ka inzep phei zel a, inneih thlalak an zawh hnuin thingpui leh a hmeh an sem hlawm a , mi kan tam bawk nen duh ang pawn ka kal ṭha thei lo, nidang zawng aiin ka in kap sang a , ka ke ṭang te pawh a tliak thei dawnin ka hria, ka ṭhiante pahnih tereuhte te chu hmuh an har ve viau mai, ka inrin hma in tu emaw hian thingpui ken laiin min leih buak a , a sa ve bawk nen ka rak ṭhawt.



Ka thawm hriain tu tu emaw chu an lo kal hlawm a , ka kawrfual hak lai hma lam chu a rang nuai mai, zah luatah ka hawi chhuak ngam der lo, min leih tu pawh chu ka hre ta chuang lo, ngaihdam pawh min dil bawk si lo chu ka mood a buai leh vek tawh.



Min leih tu ai mah chuan ka ṭhiante pahnih chungah ka thinrim tawh zawk, an kalna tur sawi loin min kalsan daih a , ka zawnna lamah tiang hi ka tawng ta bawk, chu mai pawh chu ni loin Samuela leh U Hlutei indinchilh ka hmu leh zet chuan min ti na veng veng mai.



Ka U in pasal a nei a , ka hlim tur ani tih hria ; mahse, ka thil hmuh vang chuan ka roomah ka inkhung chawt.



Ruai pawh ṭheh ve ta lo chuan puanin ka inkhuh hlun reng a , ṭah vak vak ka chak a ka ṭap thei si lo, ka thinah hian min hnawh tu lian tak a awm a, chu chu a reh a nih loh chuan thawk pangngai pawn ka thaw ṭha thei tawh lo.



Thinrim vanga mu ka nih vang nge ka muhil thei chuang lo, ka room kawngkhar an sawi dawt dawt pawh ka hre reng, ka haider lui ve ṭang ṭang.


Zualbawihi leh Matei aw ka hriat pawh chuan ka hawn sak duh chuang lo, an mahni vangin thawmhnaw huh hluamin ka haw a ngaih phah a, tu emaw tak chu kha tianga ka awm vang khan a nui sak ngei ang.



"Mawite, lo hawng teh" Nutei pawh ka chhang duh lo, ka lawm lo a ni, chhunah tumahin min ngaihtuah ve lo a, kei aia ngaih pawimawh an nei vek, lungawi a va har ṭhin tak!.



Pawn lam a mi te chu an reh ṭhuap a , mo lawmna lamah an kal vek ka ring,
ka ṭhiante pawh a tlai tawh avangin an haw mai ka ring deuh, thim hlim a ni bawk nen, thla eng riai mai te chuan ka lung a ti leng leh tawh hle.


Bathlarah chhuakin thla eng chu chiang leh zualin ka thlir a, a hma ang khan a mawi dangdai tawh miah lo, keimahah hian kim lo a awm vang pawh a ni thei tho bawk.



Arsi de sep sep te chuan thla eng chu a ti mawi zual ṭhin a ni ngai a , tunah zet hi chuan an mawina ka lo hmuh ṭhîn ang kha ka hmu thiam tawh lo. Mahse , ka lungawi lohna erawh a mawina te chuan a ti dal tial tial thung, ka nun hi thla nen hian ka lo in tehkhin kual a .



Thla pawh a tirah chuan a bial nghal mai bik lo , a de hmasa phawt a , a hnuah muangchangin a lo bial ta tial tial ṭhîn. Ka nun pawh hi chu tiang chiah chuan harsatna leh buaina in bul ka ṭan anga, a hnuah hlimna ka la chhar ve ngei ang.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)