SAVE YOUR TEARS~ Chapter- 16

Episode kal lai dah luhna

Moderator: writers

Muani_21
Posts: 23
Joined: June 5th, 2021, 10:54 am

SAVE YOUR TEARS~ Chapter- 16

Unread post by Muani_21 » September 23rd, 2021, 7:42 pm

Save Your Tears

Chapter-16

By; Muani



" Good morning olivia " ka dara min sawi dat dattu vang chuan ka meng diar diar. Olivia chuan min rawn chhuk en in a nui var var. Zing thawh hi a hria ania aw.


" Morning Olivia, dar eng zat nge?" ka mit nuai chat chat chung chuan ka ti a. Ka ham bai bai bawk.


" well.. duty hmain darkar khat kan la nei, inti harh rawh le" ka khum atanga min pawhthawh pah chuan a ti sup. Mit nuai chat chat chung chuan ka va en a, a uniform a lo ha fel diam tawh thung. Zingah duty kan neih rual chang chuan a insiam fel dawn tepah min kai tho mai thin. A chhan pawh kei chu mut ka duh lutuk a, zing thawhte hi ka hre lo bawk nen pakhatin bathroom a hman chhung tal pawh mu tura min duh vang a ni ber.


Zingtin kan duty bik kher lo a, team thumah inthenin kha mi team bik kha kan thawhna tur lawng a kalna hmun tur a zirin kan in duty chhawk mai thin. Mahse zan lam dinner-ah chuan kan duty vek ngei ngei thin thung.


Ka khum atang chuan phur loh hmel zet chuan ka tho tham thama, ka han zimar leh ar ar phawtah ka thatchhiat hmel tawp ta anih chu haha, ka ngaihtuahna vang chuan nui sakin bathroom chu ka pana ka intifai ta thuai thuai. Bathroom atanga ka chhuah leh chuan Olivia-i chu a lo insiam zo deuh vek titih tawh. Cupboard-a ka uniform chu la chhuakin ka inthawlh sawk sawk a, ka che hmanhmawh ve ta deuh bawk. Ka sam chu ka hnunglamah hniamtein ka bawk tawm deuh tawp a, inchei uchuak mi ka ni lo a, ka inchei ve hluak ngai lo bawk, mitamtak ngaihdanah chuan waitress ho chu air hostess ho ang thoin inchei reng angai anti thin.Ni e, a dikna chen a awm,kan mikhualte tan khan hmuhnuam tak leh felfai taka kan awm reng angaih vang a ni. Mahse kei chu ka hmuiah lipstick tak vak loin ka hnawih a, ka hmaiah sunscreen leh foundation hnawihin, mithmul ka neih tlem avang hian eyebrows in ka siam ve zeuh a chu chu a ni mai.



" Ka hman e, kan kal thei e" ka hma darthlalanga in en pah chuan ka ti a. Ka hmel chu helai hmun ka thlen tirh ai kha chuan hmuh a nuam tawh zawk fe in ka hre bawk. Mi hnathawk chawl te chu an rawn thau thur thur a, kei ve chu ka va cher em em ringawt. Hnathawh hi ka lo ngeih aniang.



.

Restaurant kan thlen chuan breakfast tur vel setin kan buai nghal char char, Olivia-i nen pawh inbiakna hun kan nei mang lo, mahni buai buaiin kan buai em em vek mai. Christmas a hnaih tawh avangin weekend hmang an tha hnem tawh a. A tlangpuiin mikhual hi kar khatah 3000-5000 kan nei ngei ngei. Chutiang khawpa tam mikhual kar khatah kan nei anih chuan a hahthlak dan tur chu inhriat thiam mai ka ring. Thil nuam zawk zawk chu a ni lo!


Dar sarih rik atang chuan mikhual thenkhat chu breakfast ei turin an rawn kal tan der tawh. Sap ho pawh hi athen fel tak tak, polite tak tak an awm lai hian athen phunchiar ve fe fe an awm ve tho mai. Mahse ti daih teh ang, vai rama HOTEL vela guest ai chuan hrawn an la nuam tho tho. Vai ho chu an duh loh leh an thil chah ni miah lo te hi lo pe fuh ila an ang chiam zela, manager-te emaw kan captain te hrilh hriat phet an tum zel. Sap ho ti mai ila, hnam dang ho chu kan buai vangin lo ti sual zeuh pawh ni ila, ngaihdam kan dil a," ok no problem" antia kan thlak thleng leh mai thin. Vai ho lakah kha chuan hrawn nuam tak an ni. Ka thil chawi kual vel rit bawk, ka ril lah tam bawk, ka tuiin lah chu a hal nasa mai si, ka chawlh chak tawh zia chu a! Back area leh restaurant chhung kar tawn zak zak chu zing atang chuan ninawm ve deuh ania aw.


Dar sawm a rik chuan breakfast ei na vel kan close a, kan thil dah chhuah ho chu back area lamah kan thiar lut leh char char. Kan tih fel zawh chuan kan breakfast kan nei ve thei hram. Olivia chu ko in crew ho chaw eina lam kan pan thuai. Eitur an dahna lamah chuan kalin ka ei duh tur zawng chu ka la thuai thuai. Olivia erawh zing lamah cereals a ei tlangpui thin thung. Engtin nge saw tiang choh ei sawn lunch a nghah theih hi ka tia, kan thil chawi rih theih teh lul nen hian tha pawh hi a nei dawn emaw ni ka ti thin. Kei erawh Chinese chaw duh ngang ka nih vang hian Chinese chaw pakhat tal hi ka ei tel ngei ngei thin.



Hetah chuan kan ei leh in reng reng hi hnathawk tan pawh nise a tha em em vek a, guest ho nen kan ei in a danglam vak lo ti mai teh ang. Phai hotel velah kha chuan tuna kan ei ang te hi chu guests ho chiahin an ei phak, kan ei ve thin anih pawh guest te ei tur buffe hnuaiah kan ei ru emaw an ei bang cafeteria lamah kan ei anih loh chuan hetiang te chu kan ei pha lo nasa. Hotel staff te ei tur a hranin chef ten chaw an chhuma, dal an siam bawk, a changin roti kan ei tel thei a chu chu a ni deuh mai kan ei.Mahse hotel zawng zawng in an staff te eitur an pek erawh a in ang vek lo maithei tho bawk a.Kan thawhna hotel bik chung chang ka sawi anih chu.


Duty dan hrim hrim pawh hi hotel leh cruise chu a hran hlak ti ila a dik ang. Cruise-ah chuan kar khatah ni sarih a awma chu mi chhung chuan hna kan thawk tluan parh thin. Off day kan nei ngai lo, a tirah khan off day kan nei ve thin turah ka lo ngai kha a lo nia, a lo nilo nasa mai. Kan day off neih ve timai ila, kan off neih ve chhun chu kan time off hi a ni mai, ni khatah darkar nga off kan nei a, mut hun tiam loin, a dang zawng dar kar sawm pahnih chhung vel chu hnathawh char char a ni mai. Hotel-ah thung kha chuan zing lamah kan duty chuan chhun chaw ei khamah kan off a, zanah dar 12 thleng kan duty leh mai a, chutah kar khatah ngei ngei in off vawi khat kan nei bawk. Mahse hna a in ang lo ang bawkin hlawh pawh a inthat hleiha, ham thatna pawh a inthlau ti mai teh ang. Cruise-ah chuan hah viau e ti lo hian, a nuama, ram hrang hrangah kartin kan zin ngei ngei bawk. Ka lo hmu ve ang tih pawh a beisei ngai loh te kha ma hmu ta zel chu a ni sia,hah hle thin mah ila a lo nuam a ni.


" Des, kar thar hi lawng danga hna i thawh hun a nia, Florida lam in pan dawn kha aw, naktuk chawhma chu i lo awmhahdam thei tihna" Olivia chuan phur hmel loh fahran chuan an ti hap a. Kei pawh ka phur fahran lo khawp mai. Kann duty dun deuh char char thina, min han rotate vel hi a ninawm dawn tlat.


Kan ei kham chuan chhunah chiah kan duty tawh dawn vangin cabin lam kan pana, kan mamawh eng ilo vel lam khawm kan ngaih avangin kan inthlak sawk sawk a, bazar turin kan chhuak leh nghal zat.

.

Mall-ah chuan kan duh zawngin kan vak kual a, hun kan neih tam tawh loh avangin kan hmanhmawh dun ang reng viau bawk. Kei chu tampon chiah lei ka ngaih tawh vangin Olivia-i thil tur kan zawng kual rih ta phawt. A tawp a tawpah chuan kan va hmu fuh ta hram. Ka hah zia chu a.


" He thil han van zia chu ka awih thei lo zawk!" Olivia chuan a ti deuh hlak.


" Vang khawp mai, buh pawl zinga hriau zawn ang hlauh lah ni" ka lo tih ve chuan in enin kan nui kur kur. A duh chu lain counter lam kan pana, a man pe felin lawng chawlhna lam kan pan nghal thuai bawk.

.
.
.

Vawihin hi Christmas eve a ni a, tu pawh mai chu an phur sarh mai in ka hria. Lawng chung lah chu an chei mawi em em bawk si, kalna apiangah Christmas lam hawi hlir hmuh tur a awm ti ila a dik ang. Mitin mai chu an inthuam smart in an felfai thlap mai. A then lah lawng chhunga dawrah chuan give exchange tur leiin an buai kual chung bawk. Kei pawh tunah tak hi chuan Olivia-i present tur ka en kual vel mek a ni. Ani erawh a duty daih thung.


Zan ni vat vat se ka tih zia lah pui tak, a chhan chu Christmas eve party zan dar 11-ah staff hoin kan neih dawn vang a ni. Lawnga ka thawh hnua ka vawi khat neihna tur anih vangin engtin nge an hman chu a hre lo naa a nawm ka ring hle tho mai.


" Hey Mizo i ni mial lo maw?" rawn ti ri vang chuan ka thil en lai chu dahin ka hnunglam chu ka hawi vat. Hmeichhe pakhat keimah ang tiat vel tur tho, sam dum deuh hlap hian nui sen sen hian min lo en reng.


" Aw ni e " nuih let var var pah chuan ka ti sap. He laiah pawh hian mizo an lo awm ve leh tho anih hmel.


" Christina ka nia, nang le?" tih pah chuan a kut chu ka chibai theih turin a rawn phar chhuak nghal zat.


" Desi ka nia " a kuta lo chibai let pah chuan ka ti zang vah. Ani hi chu a fel hmel hle mai, janeti ang kha chu a ni em lo turah ngai ang. Kha tiang buaina kha chu ka nei duh tawh lo tawp a ni mai. Rilru a thlamuang duh lo emai.



" Eng department-ah nge i thawh ve a?" Christina bawk chuan a rawn ti leh.
A hmel hi a nelawm bik ngawih ngawih tawp. Kei ang chuan a nelawm loh hmel hran loh hi maw.


" Kei chu a.. f&b department-ah ka thawk a. Nang zawk hetah hian i rawn cruise nge ni a i thawk ve zawk?" ka thil en lai en chhunzawm leh pah chuan ka ti let ve zat.


" Cruise teuh nang, spa lamah ka thawk a, kan inhmu ngai lo mai mai a nih chu. He laiah chuan spa lama thawk mizo kan tam a sin, i lo hre ve lo a ni maw. He laiah hian i rawn thawk thar a nih ka va ring" tih pah chuan min nui deuh var var. Ka mizo pui ka hmuh ngai miau loh vangin aw tih thu awm hek suh, ka lo nui sak ringawt. Helai hmuna ka indian pui ka hmuh awm chhunte chu vai thawk ve awm zeuh zeuh hi an nimai.


" ka nia lawm" ka lo ti tha mai.

" Chuti chu i va mal dawn em ve aw..i khua a har thei viau lo maw?" zawhna ava ngah mai mai roh tak e aw.


" Mal hran lo e, hei nangmah ka chhar tawh bawk che a" ka tawngkam thiam ve dan ber chuan kan ti leta, a chhan pawh kan inbiakna chu tih tawp vat a, kan cabin lama let ka duh tawh vang a ni. Eng eng emaw min zawh kual fe hnuah inhmu leh tura intiam in kan inthen thei ta hram. Olivia-i thil pek tura ka tih chu lain kei pawh ka kal nghal mai bawk.

.

Hall zau puiah chuan crew band in Christmas hla an sa a, Lawng chhawng tin atang chuan vacation hmang ve dang mikhual te chuan an rawn thlir thap bawk. Crew members te dinna piah chiahah chuan Christmas tree lian pui mai an hunga a chungah chuan arsi rangkachak rawnga siam lian tak pakhat an tar va va bawk. Lawng chunglam panna kailawnte chu rawng senin an chei tuarha, chutiang bawkin lawng chhawng tin chu rangkachak leh rawng sena cheiin an eng de sep sep bawk. Hetiang reng renga mawi hi ka la hmuh ngai pawh ka hre lo. A mawi a ni tawp mai.


Mikhual thenkhat te chuan Christmas lukhum khumin crew members te hla sak," We wish you a merry Christmas" tih chu zawm dual dualin an bul hnai amite chu chibai an inbuk thliar thliar bawk. Vacation hman nana duhthusam chu a ni chiang a lawm.
Hla an sak zawh hnu deuh lawk chuan kailawn atang chuan santa lema insiam chu a rawn chhuka mipui ho chuan an lawm ngei mai. A bikin naupangte chuan an lawmzual tih hriat tak hian an thawm pawh a tha ham ham khawp mai. Eng eng emaw intihhlimna an neih zawh chuan dinner ei turin dawhkanah chuan an thu tha sang sanga, keini lam pawhin ei tur kan serve nghal bawk. Zan riah atan chuan a tam zawkin turkey( sai ar) an ei a,a rim ringawt pawh chuan chil a ti put thei hial mai.Mi hausa tak niha hetianga chhungkua ang a ni emaw thiante nen pawh ni se Christmas han hman ho chu a nuam dawn hle hian ka lo hre nghe nghe.

.

Staff party a hnaih tawh avangin kan hmabak thil tih fel ngai ho chu kan tifel sang sang. Kan phur tlang bawka kan ti zo duak duak mai hian ka hria.

" Olivia, kan zo ta e " phur zet chuan Olivia-i bulah chuan ka ti zang vah. Min chhang lem lo chuan min rawn zui ve mai bawk. Cabin kan thlen chuan kan inthlak sawk sawka, kan kawr zanin atana hak tur bik liau liaua kan tih chu ha in kan hlim dun viau mai.


" Olivia hei le, i Christmas present, i duh zawng a ni angem phei chu ka hre hauh lo" kan chhuah dawn chuan vawiin lama Olivia tana ka lei present chu ka pe a. A lo meng deuh kawk chu ka hmu hman.


" Oh my god! des, ka va han lawm em em ve. Engpawh nise min pek anih hrim hrim chuan ka duh vek ngei ang" phur zet chuan a lo ti a. Ka kuta ka present box hum tereuh te chu a rawn ban nghal zat. A hlim lutuk hmel chuan minti hlim ve ringawt bawk.


" Lalpa, hei hi engtin nge ka duh dawn tih i hriat theih. Ka duh lutuk" tih pah chuan ka thil pek, silver thi sin sang mai chu a kut chuan a lek va va, chutah min rawn kuah ta chung chung. " Ka lawm lutuk ania" a ti nawn leh sap


"I duh zawng a ni chu kei pawh ka lawm e" tih let ve pah chuan a hnungah ka lo kuah let ve vat bawk.


" Well, kei pawhin thil pek tur che ka nei a " min kuahna thlah pah chuan a ti a. A nui deuh sang bawk.


" I thil min pek ang em a ropui chu a ni lo maithei" tihpah chuan a mutna khum hnuai chu a dap rak rak.


Chutah eng emaw hi a rawn lek chhuak va va.

" Hei hi ania, mutnaah Christmas kar khan ka lo siam char char tawh a. I duh zawng anih ka beisei" tihpah chuan banbun mawi em em mai hi a rawn lek va va. Chutiang ka lo beisei loh em vang chuan a thil min pek pawh chu lak mai nachang ka lo hre pek lo.

" Ti nge, i duh zawng a ni lo em ni?" A thil min pek ka lak mai tak si lohah chuan inthlahrun hmel zet hian a rawn ti a, ka harh chhuak zawk nimai in ka hria.


" Duh teh reng mai Olivia, ka beisei loh lam daih a ni. Ka lawm e aw, nimin nileng khan i buai si a, hetiang thil... ka sawiawmzia chu; i buai em vang khan thilpek min pe kher lo mahla ka thian tha tak i nih vang hian ka lawm lutuk tawh alawm" tih pah chuan a ban bun ama siam liau liau chu ka la ta vat. Niminah a duty nilen avangin present min pe tur khan ka beisei lo tak tak a tin ni. Mahse ka rin loh deuhin ani chuan a kut ngeia a siam min pe ta hlauh zawka, a nachang a lo hre bik khawp mai.


" Ka lawm nawn leh e Olivia" ti leh sapin ban bun kual nalh zet chu ka bun nghal thak.

.

Staff party-na hmun kan thlen chuan an lo ri deuh luai luai tawh. Lawngah hian hnam hrang hrang thawk kan tam vangin kan hnam zia leh tihdan, tawng dan thlengin a dang em em vek a, a then Christian annih laiin a then erawh muslim,Buddha leh sakhaw dang bia te pawh an awm ve nuk tho mai. Mahse chutia hnam hrang hrang thawk ho chu ni mah ila kan inpawh hlawm em vang hian a nuam a, chhungkhat ang tak takin kan in en ti ila a dik ang. Mahse kei chu mi dangte va be huam huam chi ka nih lem loh vang hian hmelhriat tha em em ka nei vak lo. Mi biak vel harsat viau e ti lo hian guest ho erawh ka chhawn tha thei viau thung a nuam pawh ka ti hle nghe nghe. Hei tak hi ka thawhpui thenkhat te pawhin mak min tihna ania kei pawh ka inhre thiam tawh bik chuang lo. Thawhpuite be tam mang si lo a, guest te zawk biak nuam lo tih tlatna nun kha maw.


" Olivia, hetah lo awm la, balcony lamah ka va chhuak harh a nge aw" olivia beng bulah chuan ka ti sar sar. Party boruak hi ka hne deuh tlat tawh.


" Rei lo la aw, kan bang tep ang" Olivia chuan a rawn ti tha ve mai.Aw tih nan ka lu ka lo bu nghat ringawt. Ka thutna atang chuan tho tham thamin pawnah chuan ka chhuak phei a, kan awmna hall-ah balcony a awm ve loh avangin a piah chiah room balcony chu pawh phei ka tum a ni. Zan rei anih tawh vangin guest ho pawh an reh deuh thap tawh, hall piah zawk balcony pawh phei tur chuan hmanhmawh lem lo tak chuan ka phei zel a, balcony ka thlen pheih chuan a lo vawt deuh vara ka harh sawng sawng mai in ka hria. Inchhung nen chuan inthlau tak a ni.


Chutiang chuan rei deuh fe vawt ti tak chung chuan tupui lam chu ka thlir deuh vang vang. Tunah te chuan Mizoram-ah chuan Christmas inkhawm an nei mek emaw ania nga, anih loh pawhin inkhawm an bang thawh zawk mai thei bawk. Biakin kawtah Christmas thingpui leh chhang an ei mek te pawh a ni mahna. Ka thil ngaihtuah avang chuan lunglennain min rawn zem chiai chiai a, ka chhungte ka ngaihtuah kaia, ka awm ve si lo a, he hunhi hlim takin an hmang angem? Nge ni a ka awmlo tih pawh hre chang lo in Lalpian champha hi an lawm zawk le? U Chhana khan min hre chhuak ve angem aw? Nge a ni pawh a thian dangte nen hlim takin he hun hi an lawm zawk? Nimin lam kha chuan Ruthii kha chuan min rawn wish ngei a, ani chauh kha a ni Christmas chibai min rawn buktu ka neih chhun chu! Ka chhungte hnen atang dawn inbeisei tak chungin chawhnu pum khan ka hun ka hmang ti ila a dik ang,mahse eng mah chu ka dawng ta chuang lem hlei lo a. Mak pawh ka ti hran chuang lo.

Ka hun kal tawh vel ka chhut ka chhuta, vanneihnain min nang ve tawh dawn aniang a? Hlimna hi ka nunah ka nei ve tawh tak tak dawn aniang a? ka tih apiangin chu ka hlimna ni tura ka ngaihte chuan rei pawh an daih ngai lo, ka lak atang hian lak bo in an awm zel thin. Thian chungchangah pawh nise Ruthii chiah hi a ni min thlauhthla lo a, hei leh chen ka tana awm a, ka kianga dinga min hnem a min support tlat thin tu chu. Ka tan hian a hlu lutuka ka tih theih apiang chu atan hian tihsak ka inhuam vek a ni ber.



Pathian min hruai tawhna zawng zawngte ngaihtuah kai zelin,min hruai tawhnaah ka lawm thin. Vuina tur ka nei hran lo, hriatthiam loh chang erawh vawi tam ka nei ve thin! khang hreawm tam tak ka lo tawrh tawh te kha tunah chuan ka kal pel tawh a, hna tha tak neiin ka duh leh mamawh apiang ka nei thei bawk a. Mite ang em a hausa leh duh chuang liam nei thei ni lo mah ila, ka chan tawkah hian ka lawm em em tawh. Ka hnen atanga thil min lak bo sak anih pawhin tah chuan ka lungawi thiam tawh. A chhan chu ka thil neih min lasak apiang hi ka tana tha lo leh min tichaklo tu an lo nih fo thin vang a ni zawk. Khawhar tak leh hreawm taka hun ka hman lai kha chuan ka hrethiam thin lo anih kha; Eng ati nge Pathian hian ka thil ngaihhlut apiang hi ka lak atang min lak bo sak? Eng ati nge hetiang khawpa hreawm tuara rethei tur hian he khawvel eng hi min lo hmuh tir ve? tih zawhna hi ka inzawt fo a, ka khumah zantin mu in ka tap thin anih kha. Khang hunlaia ka nun mawlh kha aw. Ka tap ri ka chhungten an hria ang tih hlau reng rengin ka tah pawn ka khumah hmai phumin ka ka ka hup a, ka tah chhuak si tap ring ngam ngai bawk si lo te, ka hrawkin hnawh phui tlat leh hritlang na tak niawm tak a ka hnar ping vek thinte, zing ka tho ka mit sen rum ka chhungte hmuh hlau reng renga ka awm thin lai te kha! Tunah chuan khang kha hun kha chu mangchhia ang maiin ka kalsan tawh chu a ni si a. Pathian hnenah hian vui tur ka lo ni lo tih ka hre chiang thin. Hreawm leh nat changte chu lo nei ve leh thin mah ila, Pathian hian ka tan kawng tha zawk min siam sak anih ringin pawm thiam dan ka zir tawh thin. Thil pakhat-ah chauh lo chuan ka pawm dam thei ta zel bawk a. Ni e, thil pakhat tih chauh loah chuan ka pawm thiam vek mai.

Ka thil ngaihtuah chhuah avang chuan ka mittui a rawn luang ngiai ngiai. Ka bianga mittui rawn luang ngiai ngiai chu hruk pawh ka tum lem lo, balcony railing chu vuanin ka bawh deuh titiha chuti chuan ka awm reng ringawt. Tuipui tui che vel chu khur deuh dar dar chung chuan ka thlir reng a, thil eng eng emaw ka ngaihtuah kai zel.


Mihringt'n kan hmalam hun kan lo hriat loh zia leh kan nun lo inthlak thleng nasat theih zia hi a mak ngawt mai. Kan nat em em laite, hreawm kan tiha kan lungngaih em em lai te chuan, " hei bak hi chuan ka na leh thei tawh lo ang" kan ti fo thin. Mahse hun a kala, khang kan nate khan zirtirna tha tak; tuarchhelna te leh tumruhna te min lo pe a ni reng zawk si. A hunlaia hreawm tuar nasa ber ber te hi a tawpa hlawhtlinna chang an ni nge nge thin a lo ni.Ruthii thusawi ka hriat reng thin chu tihian a sawi thin,
"Nang pawh tuna i awmna, i dinhmun atang khan hreawm i lo tuar a ni mai thei. I hreawmna leh na te chu midang nena khaikhin atan chuan a nep pawh a lo ni mahna, mahse mihring hi kan hun tawn leh thil tawn te a in ang vek lo thei. Tuna i hreawmna kha nakina nun nuam zawk i neih theihna tur a ni tih beiseina nen hmalam pan zel ang che. Khawvelah hian mi tumruh te bawk ania ding chhuak thin. Midangt'n nuam taka hun an lo hman theih nan chuan mahniin hreawm kan lo tuar a tul chang a awm ve fo thin ania" a ti kha. Kha thu a sawina kha rei viau tawh mah se, tun thleng hian ka bengah a la ri nawn tlut tlut thin. Ni e, midangin nun nuam taka hun an hman theih nan chuan hreawm kan lo tawrh a tul chang pawh a awm thin reng a ni.


" He laiah hian din tlaivar i tum em ni?" rawn ti sup ri vang chuan ka ding khawng nghal at. Ka lungphute chu a rawn phu rang ta dawt dawt mai le. He pa hian helai hmunah hian enge a rawn tih ve? Ni lo, ka beng chhe ri mai mai a ni, he mihring hi hetah a awm ve lo! Mahse kha aw kha ka beng chhe ri nilo in ka hnung lawk atanga rawn chhuak a ni tlat. Ka mittui chu hru hul thuakin muangchang chuan ka hnunglam en tur chuan ka inher ruai ruai. Ka hnung maia lo ding ka hmu chiah chu mithi tho leh hmu ang mai hian ang deuh pam chung hian ka en ta tlawk tlawk! Ka beng chhe ri mai mai chu a lo ni lo tawp mai, he pa hian helai hmunah hian enge a rawn tih ve?

************
Noted;

Zanin chu heti thleng hi lo ni phawt rawh se aw. A ngaihnawm lo ang tih ka hria. Tin, a boring mai thei bawk, mahse chhiar chhuak ve hram hram ula, ka plot ngaia ka let leh theih nan ka kual ta duah mai a ni e. Hringnunah pawh phek tin hi a ngaihnawm vek bik hleinem ti rawh u?😅 chutiang bawkin story pawh a ngaihnawm lo laite chu a lo awm ve ang chu ti ru?😆 tak tak ana, ka cham deuh duah thin, a ngaihnawm loh pawn min pawm sak ula, lo comments ve hram hram ula aw💙



Love story-ah kan lut leh thuai turah ngai ang. Ka story kal phung hi a buaithlak a maw..love story lang tam tur chuan a chi vak loa a hmunhma vel hi maw😅



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)