STORM AND SILENCE : CHAPTER - 29

Episode kal lai dah luhna

Moderator: writers

MoonPie
Posts: 60
Joined: August 17th, 2021, 10:12 am

STORM AND SILENCE : CHAPTER - 29

Unread post by MoonPie » September 23rd, 2021, 8:58 pm

CHAPTER-29




Thinrimna chhan tur i nei lo! Tiin keimah leh keimah ka inhrilh mawlh mawlh a, chocolate ka keih hmawk hmawk bawk. Mipa zia ve reng alawm, nautelem ang deuh hmeichhe zuna uai te chu, a zalenna tura bei ngam hmeichhia niloin. Chuan chu chu thinrimpuina chhan tur a awmlo hrim hrim! Chhete pawhin! 




Min pui lo hle. Chocolate chuan tlemin min bengdai deuh a, mahse chair ruaka ka thut thlak leh chiah chuan ka thinrim a nasa ting. 




Ka thinrim em em chhan hi ka hremiah lo bawk. Mr.Ambrose-a engmah ka nilo a, a secretary ve mai ka nia. 




Thil inbuktawkloh vang hi a ni. Ka ti ta nge nge. Miss Hamilton hi hmeichhia a dikna sualchhuah tum chu nise i haw hauhlo ang, chu  zawng chu. 




Ka chhannaah chuan lungawi zetin chocolate ka hmawm leh a, thikna tih vel a nilo chu ka lawm hle. Ava han tui tak! 




Ohh..




He chocolate hmuchhuaktu hi mipa diktak awmchhun a ni! Khawvelin kan nei hi kan vannei takzet. Chocolate ei chung chuan ka inbengdai ve zel a, ngai  ka awh thawkhat. Ka ngaihtuah leh tur chu engtin nge Ella leh Wilkins te inkar hi ka tihbuai zel theih ang. Tlemin nawr leh deuh ila…. 




"Lilly duhtak!"




Ka ding dat a. A aw chu hai rual a nilo. Ka hawilet chu ka nutei ka lam pan hian a lo kal a, mak tak maiin thinrim emaw lungawilo hmel a pulo. A kut phar meuhin, lawmna mittui nen min rawn pan zawk ni hian ka hria. 




"Kalo kuah teh ang che, ka vah duhawm te." Ka tlanchhiat theih hmain min kuah ta hlun mai. Engthil nge thleng hi? Ka nutei hian phir pui a lo nei reng em ni? A awmdan maksak tak sawifiah dan ka hriat awmchhun a ni miau. 




"Lord Dalgliesh nen in lam dun kha ka lo hmu a!" A tih chuan thil a chiang ta uar mai. Ka nutei ngei a la ni e. "Eng nge in sawi? A duh hmel che em? In inhmu leh angem? Oh Lillian, engmah sawilo khan ding reng suh. I ngawi reng zel a , naupang! I rilru put hmang te sawichhuah nachang i hriatloh chuan eng ram ropui mah i thleng lo ang!"




"Eng thil vakmah kan sawi lo." Ka ti a, ka thilsawi danah leh sawiturah ka fimkhur hle. "Kan hmelhriat neih inang chungchang vel kan sawi mai mai.."




"Tha lutuk! Tha lutuk! Bul i tan tha hle a ni. Chhuah reng reng suh ang che..i hria em? Awi Pathian! I nei thei a nih chuan…a ropui dawn lutuk!".




Mr. Ambrose  nen kan lam dun chungchang a sawileh ka nghak deuh a, mahse Lord Dalgliesh'n a rilru a hneh lutuk a, a hre chang lo a ang. A sawi rei deuh hnu chuan ka ning hle tawh. Lord Dalgliesh lakah rilru chhia ka pu chuanglo nain, pasal tur atan chuan ka duh kherlo a ni. Ani pawhin tiangtur chuan min ngai biklo tih ka hria. 




Ka nutein Lord Dalgliesh thawmhnaw hak nalhzia a sawi lai chuan ka tuar thei tawh nganglo. Ka ding vut a. 




"Min ngaidam teh Madam, thut reng hi ka ning deuh. Kalkualin  lampuitur te kan zawng ange." Nui derin ka ti a. 




"Aw le, chu chu tirawh duhtak. Lampuitur tha deuh thlang rawh aw!"




"A hausaber i tihna maw?"




"A tawp a tawpah chuan! I hrethiam ve ta. Aw Lillian..he ni hi ka…" Tap lek lek hian a ti a. Insiamrem leh vatin, "Kal rawh , kal  rawh! Lam an tan leh tawh dawn ania, i  huntha i hlauh palh ange, duhtak!"




"Tehreng mai, Madam."




Ka kalsawn hnu lawk chuan kilkhata pangpar khawi ka va hmu hlauh mai. 




Ding leh vei hawi tawn zak zakin ka pan phei a, pangpar phena ka thu chiah chu ka ngaihdan ang chiah neive midang anlo awm. 




Ella chu tawlhhnung datin a te deuh that a, min hmuh chian rualin a ngawi nghal. 




"Oh Lilly, nang i ni chu kava lawm em!" Tiin bang a ngheng dat a, maimitchhingin, "I hmu hnaivai em?"




Ka hawikual a, Wilkins hmuhtur a awmlo. 




"Aih. Ka hmulo."




"Awi! Ka lawm lutuk. Vawikhat pawh ka sama pangpar dahtir mintum leh anih chuan ka thidang thei mai ang."




"Nimaw?" Tiin mitko ka san ak a. "Eng nge min hrilh kha? Aw.. Aw..Sir Philip ang mipain a duh che hi i lawm hle thu i sawiin ka hria."




A hmai a tai tek a. "A ni alawm! A lawmawm ka tia. Min fak reng a, chuan… Ka.. Heng hmeichhe zozai zinga kei ve mai…"




"Sawi tawp rawh!" Dam diai chuan ka ti a. 




"Nang…ka.."




"Ka bulah inthup a ngailo. Thudik min hrilh rawh:Sir Philip hi i nei duh em?"




"Aaa..duh vaklo."




"Anih tlemte chuan i duh deuh a ni maw? A kutzungte û leh a ke veilam chauh i nei a nga, a bak zawng tlangval a la ni anga maw?"




Ella chuan hnuailam a melh ta daih a. 




"Um..chutianga i sawi chuan..duhlo e."




"Chuan a bak zawng chu?"




Hmuh tham mangloh hian a lu a thing zeuh a. 




"Sawi rawh. Wilkins hi neih i duh em?"




"A..a.."




"Sawi rawh! I ti thei a ni! I nei duh em?"




"Aih!"




"A tha! Ropui lutuk!" Khi var varin ka kut ka tuai a. 




"Ropui a?" Ella chu beidawng zeta lo hawichhuakin, "Eng nge a ropui na? Nute Brankin nei turin mi  duh alawm!"




"Nangmah ngeiin i duhloh thu i sawi kha a ropui ka ti alawm. Chutiang chu i ti ngai zen zen silo a. Buaina chinfel nana rahbi pakhatna a ni."




"Um..anih pahnihna chu eng nge?"




Ka ban ka vai thuak a. "Kha chu a huna thlen hunah kan sawi dawnnia. Tunah rih chuan i rilru ti hahdam tur thil i mamawh a ni."




"Diktaka sawi chuan…i ti dik."




"A tha e, ka unaunu duhtak." Ella chu kuahin ka kalsawn pui a. Ka awm a nuam huai mai, Ella harsatna ka chinfel sakna lamah ka buaina pawh ka theihnghilh thak. "I mamawh tak ka nei alawm. Chocolate khal an tia, eng nge i ngaihdan kan enchhin dawn em ni?"
……………… 




Eitur dahna dawhkan kan thleng tep tihah hnunglam atang tuemawin ka banah a rawn vuan thut a, ka hawi let chu ka phu chiang ngei mai. 




"Heta hi i awm e, mi maksak nu!"




"Patsy!" Ka ti hluai a. Ka nutei kuah aia a let sawm vela nain min kuah nghal a, kan kawrfual tih pukna chu a ri rak rakin ka hria. 




"Patsy" Ka ti leh a. "I  ni tak tak em? Eng nge hetah i tih? Engtin nge sawm i nih theih? Lady Metcalf hian a millo che emaw ka tia!"




Patsy chu a nui sen sen a. 




"Millo e, mahse a tilang thei hleinem, ka nu thianhlui a ni miau a. Chu zawng ai chuan, eng nge hetah i tih?"




"Ka nutei hi i hriat kha..hetiang velah hian…"




"Lamna ah hian nilo Mawli! London ah eng nge itih ka ti lawm, nihloh pawhin England ah hrim hrim hian tinge i awm? Timbuktu velah i pem emaw ka ti alawm. Hmuh tur i awm ngailo. Chuan parkah kalkualin tlangval chhiathluk tur i zawng tih min hrilh miah suh. Chu chu i nutei min hrilh dan ania, mahse i thiante hi parkah chuan kan awm hnem thawkhat a, hmuh pawh kan hmu ngailo che! Eng nge i tih thin?"




Ka hmui ka pet a. Eng nge ka hrilh tak ang? 




Hna ka thawk tih ka sawithei bawk silo. Patsy ka hrilh hreh vang hrim hrim a nilo a, ani hi chuan min thlawp lutuk dawn tih ka hria. Mahse ka hna chungchang ka hrilh chuan Mr. Ambrose chanchin ka hrilh tel a ngai dawn tihna a ni. Chhan engemaw vangin chu chu tih ka duhlo. 




Tawng tumin ka ang zuau a, mahse sawitur ka hrelo. Ka inngaihtuah neuh neuh lai chuan Ella hmai chu a tai tek a. 




"Aha!"




Patsy chuan a kawk va mai. 




"Hriat i nei a ni tiraw? Sawi rawh Ella, sawi rawh le!"




Ella chu sakhi hlauh nei ang mai hian a meng zawk zawk a. Ella hi mi dawheh a nilo, Patsy nawrna angah phei hi chuan a tang thei teuhlo mai. 




"Lilly…umm..Lilly hi.."




"Aw?" Patsy chuan a ti thuai thuai a. 




"Lilly hian ngaihzawng a nei a. Mahse tumah hrilh suh aw, thuruk ania."




"Aw, thuruk ni e." Tiin no lo zetin ka melh a. "Chuvang alawm tuma bula sawi lo tura ka tih che."




Inthiamlo taka min enin, "Ka..ka tihpalh Lilly, dawt ..dawt ka sawi theilo a.."




Ka thinrimna chu tuia mei leih mit ang hmak a ni. Tumah Ella lakah hian an thimrim rei theilo ang. 




"A pawi lo e." Ka dar ka chhin ak a, thudik a ni chuang hleinem. 




Patsy chu ka en leh a, a ka ang deuh phuauin a mit chuan melh bik a nei lo. Engmah sawi siloin a phun ser ser a, mathematics a kaa chawkin a chhanna hre theilo ang mai hi niin ka hria. 




"Ngaihzawng nei a?" A ti sep a. "Mipa maw?"




"Aih, samak mawle." Ka ti hmuk. "Aw, mipa! Eng nge maw nise itih le?"




"Diktak chuan samak pawh kha ti la ka awih zawk daih ang!"




Ka kut ka hum ruh a. "Ka hmaizahna hian vuak hrep i duh em?".




"Tharum thawh a ngailo. Mak ka ti mai chauh a ni. Lilly Linton, hmelma lamah maw?"




"Hmelma lamah ka kallo aw!"




"Nilo em ni? I duhlai chuan hmeichhiate dikna chanvo sualchhuak tura i beihna te titawp turin a ti che em? Nghak reng rawh, ala thleng em em ang. A dawtlehah chuan a tlawm zawkah i tang ang a, la te phiarin puan thuiin , hmeichhiate awmna tur diktak chu inchhung a ni ila ti ve mai ang."




Min ngei hmel zetin a nui suk a. 




"Hmalam hun eng tak kan nei asin ka thian. Thui tak thleng thei tur kan nia, inneih nawmsakna vang mai maia i thlauhthla tur hi chu a pawi ngawt mai." A ti leh a. 




A uang deuhreuh tih chu ka hria. Mahse a thutak tho bawk. Tiang vang mai maia bansan tur ka nih a ring a maw! 




Ka hmuhtir ang. 




Naktuk hna ka neilo bawk a, hun tamtak ka nei dawn alawm. A beng bulah kunhniamin midang hriatveloh turin ka tawng a. "Naktuk dar 10 ah Green Park ah midang ho nen min rawn hmu r'u. Hmeichhe diktakin a tihtur chu ka hrilh ang che u."




Min en in a nui sang a, a mitmeng chu phurna vangin a de sawt sawt thei. 




"Eng nge i ruahman a?"




"Thuruk a ni rih." Mit  ka siai zauh a. "Tun atan  chuan kan thianho thu hriat duh tak ka hria ti ila a tawk rih. Tihtur kan nei!"




Ball chu a liam zung zung mai hian ka hria, ka rilru luahtu dang a awm tawh vang pawh a nia nge. Mipa pahnih tawngthei zetin Hyde Park a thilthleng tur min hrilh kha ka ngaihtuah zui char char a, ka thluakah hian ruahmanna a insiam zut zut mai. 




Ka ruahmanna tam zawk ah chuan Ella, Patsy , kei leh Lord Dalgliesh an tel. Hei hian thatna tamtak a nei:




1.He room chhungah hian Lord Dalgliesh-a bul vel hi a lun ber a. Chuvangin Sir Philip hmu thut pawh ni ila, kan bul hnaia duchess thau leh mipa lian tak tak hnungah Ella kan biruk tir zel mai dawn a ni. 

2.Chuan, ka nutein min rawn en chang apianga Lord Dalgliesh bula ka awm a hmuh chuan Christmas leh Easter inkawp ang maiin a hlim hle mai dawn a ni. Ka tumlo tih a sawi dawnlo tal alawm. 

3. Lord Dalgliesh atang Mr. Ambrose hla takah a awm bawk. Nichin lawka thian hlui ang maia an inbia hmuh kha chuan tuna an awm dan hi mak ka ti angreng viau. Mahse eng nge kalo buaina tur awm? 




Kan in ngaihtuah muk hlawmin tuman min rawn tibuai lo bawk a, ka bul lawka mipa pakhat a rawn khuh zeuh chuan ka phu deuh zuk. 




Chupa chuan zah taka chibai min bukin, "Minlo hrethiam la Miss, i awmsawn deuh thei angem? Lord  Dalgliesh-a lehkhathawn pek ka ngai a ni."





A mi ngenna ang chuan ka ti a, chutiang bawkin midang pawhin. Mahse tumah chu thil hrephalo tur khawpin an tawlh hla lo thung. 




Lord Dalgliesh bul a thlen chuan a hrawk a thian leh a. "Min hrethiam la ka Lalpa. . I lehkhathawn tur ka lo keng a ni."




Lord Dalgliesh chu a mi biak mekte lak atang hawisawnin lehkhathawn chu a la a. "Tu hnen atang nge?"




"Chhiahhlawh dang tho a pu emaw a pi hming sawi duhlo a ni. Mahse i chhiar chuan a thawntu i hre mai ang a ti."




Lehkhathawn chu a hawng a, mahse a chhungah lehkha emaw thuziak pakhatmah a awm lo. Samzai buang hi a lo awm a. 




"Aw!" Colonel pakhat chu rawn tawngchhuakin, "I lehkhathawn dawn chu mipa niloin hmeichhe hnen atang a nih ngei dawn hi, in ring ve em thiante u?" Mipui ho chu an nui huah huah a. "Ti teh Dalgliesh, tunge hmeichhe vannei chu min han hrilh hlawm ta che."




Lord Dalgliesh chu a bul vela thilthleng hrelo ang maiin a ngawi vang vanga , reilote hnuah harhchhuak zawk ang mai hian samzai chu ipah a thun leh a, a ak tha nghal a. Midangho chu nuih sangin, "Awww thiante u, chutiangin a hming ka sawichhuahsak thei bik nang. Bakah hei chu induhna lantirna aiin indona puanna ti ula a dik zawk ang."



Colonel chu a nui leh a. 



"Indona maw ni a? Nang nen maw? Chutiang ti ngam chu thilsiam ropui ve tak a ni ngei ang."



"A aia thu dik a awm theilo ang , Colonel."




Ka lu ka thing a. Keichuan hmeichhe sam a nih ka ring hauhlo, a tawi mah mah. Mahse tu ta nge ni ang ngaihdan ka siamthiam chuang lo. Diktak chuan, ka ngainatzawng a nih loh avangin Lord Daniel Eugene Dalgliesh hi hlat hram hram ka duh. 

.....



Hun chu a liam zel a, Lady Metcalf  pawh kawngkhar bulah dingin mikhual a mangtha den den tawh. Ka nutei chu a hlim ngang mai a, Lord Dalgliesh nen kan lam tih ringawtin a rilru a luah avangin Ella pawh Wilkins  nen vawithum chiah an lam tih a hrechang lo. 




Anne leh Maria erawh an tum bur a, ka nutein anni aia ka tihthat avanga a zilh vang a ni. Anni nen tawlailir khata chuan ho chaklo hle mahila, midang zingah chuan engtinmah min khawihlo turah ngai ang. 



Pawna chhuah hmasaka thlifim dawn ka tum lai takin ka banah tuemawin a rawn vuan a. 



"Reilo te, i hman chuan , Miss Linton?"



Lord Dalgliesh a ni. A hnungah chuan ka nutein beisei nei takin min thlir reng tih ka hria. Tih beidawn duh hle mahila, ka hmaa mi zawk hi hnial ngam a nilo a tin ni. 



"Eng nge ni, Lord Dalgliesh?" Ka tih chuan room kil lampang mi tamlohnaah chuan min kai phei a, ka nutei  lunghnur hmel chu ka hmu hman. Ka hmaah dingin min hliah hneh hle a, kalsawn  tum pawh ni ila, a chet sawn loh chuan ka theilo. 



"Thil zawh che ka duh a, Miss Linton."



"Zawhna i nei leh tawh maw?" Mitko san akin ka ti a. "I ngampa sawt hle mai, ka Lalpa, tun tum chu lampuiah pawh min sawm hmasa lo ania."



Ka chhannain a tilawm ang zetin a nui sang a. 




"A dik alawm. Mahse tumah lam an awm tawhlo a, rimawi a tawp tawh bawk si a. Ka thil hriatchak hi minla hrilh thei tho angem?"




"I zawhna a zir a ni ang chu, ka Lalpa. Min han zawt ta che."



"A tha e." Tiin a mitmeng pawl chuan min en ran  a. "Zan tir lam khan ka hawichhuah apiang hian tuemawin min thlir reng hian ka hre tlat a. Hnai taka min en reng an awm tih ka hria. Chutianga min thlithlai rengtu chu i mi hriat a ni bawk, Mr. Rikkard Ambrose. 



Ka nui tep a ni. Nang niloin Miss Hamilton alawm a en tih ka tum uk a. 


Mahse ka in ngaihtuah chiang a, Miss Hamilton kha a thlir reng em? Khatih lai zawng khan Lord Dalgliesh nen an ding dun reng a, ani zawk hi em ni alo thlir reng? Lord Dalgliesh hi a hmangaih chu a ni em lo ang , tiraw?




Ngaihtuahna tamtak a rawn lut zut zut a, mahse ka hmelah lanchhuahtirloh hram ka tum. "Chuan chu chu eng nge kei nen inzawmna a neih?"




"Thil ho te: Mr. Ambrose'n min enloh lai apiang khan nang hi a en che a."




Engthil? 



"I chiang em? Hetiang ballroom zau lutukah..."



"Min ring rawh. Ka chiang. He room chhunga midang zawng ai hian a en ngun che, kei tiamloin."




Engemaw hlim riauna ka nei ta tlat a nih chu. Mahse  ka dar ka chhin khum ak ringawt . 



"Alo ni maithei e. Ka lo hre reng renglo."



A mit a zim san a. "Hmeichhe tamzawk hian Mr. Ambrose-a melh nih chu an hria asin."



"Ka khawhmuh hi a fiah vaklo a." Kalsawn tumin ka che a, mahse ka  chhuak lenglo, a ding luau bawksia. "I zawhna chu, Lord Dalgliesh. Kan tawlailirin min kalsan dawn ania."



"Ah, aw ka zawhna." Tiin a bu nghut a. "Mr. Ambrose hian a ngaihven chhan che ka hre duh."



Ka hmui liak huhin pangngai thei ang ber chuan awm ka tum a. "Min  ngaihven tih ka hre miahlo."




"Ka hria alawm. Mahse tinge a chhan ka hre duh." A mitmeng chuan hliah hneh hle mahse a phen thu awm chu ka hai bik hauhlo : Tinge London mipa hausa hian nang ang hmeichhia hi a ngaihven? 



Ka kut ka kuangkuah than a. "Chu chu tinge Mr. Ambrose i zawh mai loh?"



Ka zawhna chu hrelo ang hmakin a awm. 



"Zanin khan in lam dun. Hmeichhe dang a lampuite kha chu a hmeichhe hruaiin a hmelhriattir emaw midangin an hmelhriattir an ni vek. Nang erawh kha chu....tuma hmelhriattir loha lamdun in ni. A hmain inhmuhtawhna in nei. Khawiah nge? Eng nge thleng?"




"Ka hre tawhlo. Ball dangah emaw kawtthlerah a niang."



Hreptak hian! Ka aw pawh a pangngai thei tawhlo. Kawng a dal tlat bawk si a, a ninawm tan riau. Ninawm pawh a ni lo, a hlauhthawnawm tan. 




"Hmeichhe tamzawk chuan.." Tiin a rawn kun hnai a. "Mr. Ambrose nena an intawn hmasak berna chu an hria ang."



A la nui sang reng a, a zawhna hi midang chuan hre pha se , ka chanchin a ngaihven vang hrim hrim emaw an ti ngei ang. Mahse a nilo. 




"Aw, ka hriatna hi a thalo lutuk a" Ka ti hlar a. "Ka mi hriatreng duhlo te lakah phei chuan! Khawngaihin  i che sawn thei tawh angem? Ka chhungte ka zawm vat angai."



"Miss Linton.."



"Kalsawn rawh ka tih chu."




A ti duh lawklo lehnghal, mahse a tawlh hnung ve ta hrut a, ka leng tawk vel chiah chiahin. 




"Hmeichhe mak tak i ni Miss Linton. Kan inhmuh leh vat ka beisei."




Hah! Hremhmun a khal hunah le!


"Nih phawt le, ka Lalpa."




Chibai buk zeuhin ka kalsawn a. Lady Metcalf chuan sipai tamtham zet alo mangtha mek a, an phenah ka kaltlang hmak. 




Ka chhuaha ka hmuh theih tawhloh hnu chauhin ka tlan a, ka pheikhawk chu marble chhuatah chuan a ri ring hle. Chhiahhlawh thenkhat pawhin mak ti takin min en tih ka hria, mahse ka pawi sa lo, ka chhia leh tha hriatna hian he in hi chhuahsan vat turin min ti a ni. 




Pawn ka thleng chu chhum a zing ngiai ngiai a. Zawhna tamtak ka luah hian a ri reng mai. 




Mr. Ambrose  khan Lord Dalgliesh zawk em ni a lo melh reng? Lehkha ipa samzai kha eng nge a awmzia? Khawia mi nge? Chuan, khang mipui zozai zingah khan tinge Mr. Ambrose'n kei kher min en? 



Tawlailirah ka lawn vat a, driver pawh a lo awm tawh. Keimah chauha awmna tur hmun reh ka mamawh a ni. Ka inngaihtuah theihna tur. 




Thutna ah chuan thuin ka thaw huai a. Keimahin ka awm ve ta. A tawp a tawpah! 




Ka hawichhuak chu ka ep chiaha Wilkins  lo thu chu ka hmu a, a kawrkilh karah chuan nihawi  par leh rose par a lawr fur lehnghal. 




"Ah, Miss Lilly." A nui sang a, zâwng lawng rui ang mai. Hmangaihnaa tlulut  mipa pawh a ni maithei. Ka hre hrang lo. "Ilo thleng hmasaber chu a tihzia e. Ka biak lawk theih che ka beisei. I unaunu Ella chungchang ania."


.. . .... 



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)