Blue Valentine Chapter- 17

Episode kal lai dah luhna

Moderator: writers

Rosy Lalhriatpuii
Posts: 25
Joined: August 31st, 2020, 8:36 am

Blue Valentine Chapter- 17

Unread post by Rosy Lalhriatpuii » September 24th, 2021, 1:32 am

“Kal sawn nghal rawh!” Ngurnunsangi aw ki vîn tak chu Inchhung ka luh rualin Ka hre nghal, Gabby a nam sawn deuh dâwr chu ka va hmu hman bawk.


Rinzuali chu tap chungin a lo thu a, a bulah Rosangzuali alo ding tawp ringawt bawk.


Engthil nge maw ni le?


“Kan in kârah rawn in rawlh in suh” Gabby chuan a ti ve nghut a, Rinzuali chu khawih tumin a va pan hnai a, Ngurnunsangi chuan a bân ah a pawt nawk a, “Kal sawn rawh ka ti” vîn zet hian a ti leh a.


Gabby chuan a kut a lek kâng hman awrh… hmanhmawh lutuk in ka pan phei rawk rawk a, Ngurnunsangi chu a dul zawn tangin ka pawt bet a, ka kalsawn pui nghal.


“Hey..min thah rawh…Min thlah rawh ka tih chu..” tiin a te vel chiam a. A ke a leng deuh bat bat bawk. Ka pawm nghet sauh.


“Min thlah rawh ka tih chu…Zothankim!" a rawn ti vak a. Ka samah min rawn keh tumin a rawn ban a, ka thle sawn hman hram.


Corridor ah bawk ka chhuahpui a, chhuatah ka nghat thla a, Ka nghat thla fel chiah..kal leh a tum in a che phat a, ka pawt leh dâwr.


“An pahnih in ching fel rawh se..in rawlh ve suh!"


“Ka unaunu nih saw..” a rawn ti hlar a.

“Ka thian a ni ve tho…an inkâr ania an pahnih in ching fel zawk rawh se” tha deuh chuan ka ti leh a.

“Gabby saw..”
a ngawi leh hmak.


“Aw Gabby chu enge?”


“A sam ka pawt kawlh dawn” a ti nia.


Ka nui chhuak huk teuh lutuk, in sûm tumin ka hmui ka pet zeuh.


“Tinge...enge in buai na?” nuih za ru tak chuan ka zawt a.


“I hriat ve ngai lo..kal sawn rawh, ka kal duh nia” a rawn ti leh nghat a.


“Han tum la..” ka ti duh chauh. Corridor luhna kawngkhâr ah chuan ka ding tlat bawk. Min melh rum leh pek tawh Khawp mai.


“Saw nu sawn Rinzuali kut alo thlâk leh a nih kha” a rawn ti vin hlar a. ‘Leh’ a tih chuan a thlâk fo anih ka ring.


“Ava tha lo ve..mah se tha deuh in a sawi fel theih alawm”


“Tha deuh a sawi fel ka duh bawk lo” naupang chhia zet hian a rawn ti leh hlar a.


Ka nui chhuak hawk. “Tinge I lawmawm em em a, Nguri?” nui vûr vûr chung chuan ka ti a.


A lo mengphar deuh vak a, a han ner zui leh deuh kher bawk a. Ka nuih a za leh hle tawh.


Corridor in daidanna darthlalang chu rawn kik ri ah chuan kan let rual chiah in ka ring.


Laldawmtluanga chuan zaizirin lut turin min rawn hui a. Ngurnunsangi chu kal nghal mai a tum leh pek a, a kutah ka chelh sak vat a. A tang leh tung hman a, a kutzungtang kârah ka rawlh lut vat a, ka hum nghet hle, corridor tang chuan ka chhuahpui nghâl.


Ka rin loh zetin Gabby leh Rinzuali chu in hnaih takin an lo thu dun a, Gabby chuan Rinzuali hnenah enge hrilh niawm takin a phun sep sep a, Rinzuali chu a ngawi ngal reng. A tap tawh lem lo nih hmel.


Rosangzuali leh Laldawmtluanga an bul lawka lo ding ngawi dun reng chu ‘enge thleng a’ tih melh in ka va mitmei a.


Laldawmtluanga chuan alu a lo thing nung nung ringawt a.


“Ka rin dan vel reng..” a rawn phun sep a. Keimah bakin an hre pha lo ang. A kut ka chelh na chu phelh tumin a rawn vuan a, ka mitmeiin thil pawi ti lo turin ka hrilh. Hrethiam tak maw? Min melh deuh ran ringawt a, ka thlah ve mai.


Ka thlah chiah Rinzuali chu a pan nghal a, a va bia a, Rinzuali chu a rawn hawi chhuak hian a bu zeuh a. A ding chhuak nghal. Gabby alo ding ve nghal zat.


“Kan haw mai ang” Ngurnunsangi chuan Sangzuali en chung chuan a ti zui sap a.


“Aw…a zia lo e, nakinah kan in hmu khâwm leh dawn nia aw..”
Sangzuali chuan alo ti ve vat.

Ngurnunsangi chu a lo bu nghauh ringawt a. Rinzuali pawn engmah a sawi lo.


An chhuak tur chu, "Thlah in ngai em?”
tiin ka bia a.

“Aih ngailo..” alo ti leh vat. Ka rindan sa tho.

Pawnah chuan ka zui chhuak ve hlawm nghal.

Gabby leh Rinzuali chu an ding khawmuang leh.

A helmet khum mawlh mawlh chung chuan Gabby leh Rinzuali te lam chu a en deuh ngar a.

“Fimkhur deuh in khalh rawh aw..”
ka ti a.

Ka biak chu hria ang pawn a lang lo. Gabby leh Rinzuali te lam chu a la melh ngar a.


“Ngurnunsang!!” vin deuh taka ka tih chuan, min rawn melh ve chauh, “Nge?” a rawn ti leh hlar a.


“Fimkhur rawh ka ti”


“Ka hria..” a rawn ti nghat a.


Scooty chu a ti nung a. Rinzuali chu a rawn kal ve mai bawk.


“in thlen velah ka lo bia ang che” Gabby chuan Rinzuali hnenah a ti sup a. Ngurnunsangi chu alo meng rang leh nasa. Ka nuih ati za leh pek tawh.


Min rawn melh leh zawk a, ka lo nui vûr vur min hmuh chuan a meng tal leh tap a, an tlân chhuak zui nghal.


An tlân liam chu ngawi rengin kan thlir a.

“I ngaihdan tur ka hria lawm” a rawn ti zawi sup ringawt a.

“Engmaw?” satliah thei ang berin ka lo tia.


“Ka duh dan a ni bik lo ania Bawih-a” a ti leh ringawt a.


“A ho emai..tirawh lut ang” tih pah chuan a dârah ka kuah a, Rosangzuali te inlamah chuan ka let pui lehnghal. Min hrilh lo anih chuan zawh zui viau ka tum hran lo hrim hrim. Ka tana tangkai lo tur leh lek phei chu..mah se tunah chuan Ngurnunsangi a tel ve tlat a, ka hre tawh bik lo.


Rei pawh kan awm tawh lo, eng mah thleng lo ang in awm kan tum vek a, boruak a nuam lo zo vek. Kan haw ve deuh nghal mai. Laldawmtluanga birthday berkher chu kan hmang maksak ang reng.

………
“In in thleng tawh mi?” a online ka hmuh vang chuan ka va ti a.

“aw” tih a rawn thawn let ve nghal.

“Rinzuali chu a tha tawh em?”

“A muhil…”

“I la muhil ve dawn lo mi?”

“Aih..a muthilh ngheh hun ka nghâk”

“Tinge?”

“Thil tha lo a tih ka hlau alawm” a rawn ti.

Amah hian thil tha lo a tih ka hlau fê zâwk sia.

“Nih chuan..Ka lo menpui ang che”

“A ngai lo..”

“Keiin ngai ka ti lawm…enge tunah khan I ei châk?”

“Engmah” tih chiah a rawn thawn a.

“Engmah chu zawn a har âwm e..lo pek che ka tum sin le..” nui vûr chung chuan ka va thawn a.

A hmu a, min chhâng leh mai pek tawh lo.


“I muhil mi…” tih ka type lai mekin, “Zothankim” tih ringawt hi a rawn thawn a. I muhil mi tih chu ka delete a, “Umm” tih ringawt ka va thawn.


“Ka mu tawh dawn muttui” tih a rawn thawn a, a off line nghal. Ka nui huk ringawt. A va lawmawm thei tak!



Ka chhâng zui bik lem lo. Muttui a tih chuan min ti muttui dawn tih ka hria. Khi vûr vûr ka maimitchhing a, kâr loah ka lo muhil ve nghal daih.

……..

Naktuk kan inkhelh hun a ni tawh a, Vawiin chu kan practice duh thawh ve angreng hle. Friendly match mai mai mah ni se pawisa in chawi kan tia, tam lo mah se chak ngei kan tum ruh ve hle.

“Bawih-a…Kim-a?” court bul lawk atanga rawn au ri ah chuan ka hawi phei vat. Op-a alo nia.

Ball chu Ampui-a ka pass phei vat a, Op-a chu ka pan hnai nghal vat.

“In la practice rei dawn mi?”

“Rei vak tawh lo ang…tinge?”
ka ti let a.

“I rualin ka lo haw ang…ka bike damdawiin ah ka dah a”
nui chung chuan a rawn tia.

“Aw pawi hlei nem” ka lo ti tha ve mai.


“Kan office ah khian ka lo awm ang, I zawh hunah min lo call la” a rawn ti leh a. Ka lo bu ringawt. A kalsawn zui nghal a.


Court lamah ka let zui ve leh mai.

…..
Kan practice zo tui ka in lai mêkin Gabby kan department pan thlâk na tanga rawn tlân chho mek chu ka hmu a. Class a kal a mawni le? An kal ka ring chiah silo a. Mahse ka hmu bawk sia.


“Hey…Dude…Romuanpui!” tia ka auh zui vak chuan a ding ve hrâm.

“In la zo lo law?”
a rawn ti let a.


Ka pan hnai a, “Zo chiah, class a awm a mi?”
ka let nghal a

“Awm lo… record book ka lam lawm, ka lam kep che u, Vawiin bak hun a awm tawh hlei nem" a rawn tih zawm nghal a. Ka lo nui suk.


“Iva fel ve”
nui suk chung chuan ka ti a.


“Fel e…i haw nghal dawn lo mi?”


“Dk-a te hostel ah ka in bual phawt dawn”


“Nih chuan ka haw san dawn che..”


“Um..poilo..” ka ti let a, a tlân chhuak nghâl a ni mai.


Dk-a nen chuan an hostel lamah ka in phur thla leh nghal a. MZU hostel ang ah hi chuan riah ve ngawt pawh a in thlahrun awm loh, heta zirlai Nih hi chuan.

………

Hostel tanga ka tlân chhoh leh Chuan tlai dar 2 a hnai tawh.

Ka rin loh zetin Opa leh Gabby an lo in bia. Gabby chu a kal daih tawh khan ka hre sia, tih ngaihtuah chung chuan an dinna bulah ka va in khalh phei a.


“Ilo chho tawh maw?” Opa chuan min lo be nghal a.


“Aw ka rawn call dawn chiah che a” ka lo ti tha ve mai


“Ka thiannu pa kha a zual thut a, hospital ah min va thlah lawk mai ta che”

“Brenda-I pa kha maw?”
ka lo ti vat.


“Aw..” a tih lai mekin a phone a rawn ri a. Kalsawn deuhin a chhâng vat nghal.


“Tinge ilo let leh a?” Gabby melh chung chuan ka ti a.

“Record book hi mawle.. experiment number 2 kha siamthat vek kan ngai Sir Vivek-a’n a tia ka lo theihnghilh daih a, ka lo let leh in in ah ka rawn kal hman tawh âwm silo a..” a ti duah a. Record book chu min pe nghal bawk. Ka bag ah ka dah lut ve mai.


“A daih rei tawh loh hmel a, kal vat ang.. Gabby.. lo kal ve la tihtur I nei em?” Gabby hnenah chuan a ti nghal a.


“Nei tho a, Mahse aw..ka lo kal ve zawk ang.. Brenda-i chu ka hre ve lawm" a ti tha ve mai.


Kan tlân chhuak deuh nghal.

“Serchhip ah phurh chhoh mai an rilruk a” a rawn ti a.

“Serchhip khua maw an nih?” ka ti deuh hu . Thli thaw vak leh ka tlân muang fahran lo bawk si chu kan tawng ring ang reng.


“Ni e I hrelo maw?”


“Hre nang..tinge phurh chhoh chu an tum a, a serious viau I ti sia”


“A pa in an In lama haw hman a duh ani áwm e.. taka hmanni khan Brenda-I khan I number min dil tak, alo bia che em?” a rawn tih zawm a.


“Be lo niang” tih chiah in ka chhâng. Min lo biak áwm ka hrelo. E.. ‘mu tawh em?’ rawn ti ringawt tu kha ni mai thei.


“Va mak ve..” a rawn ti leh a. Kan tawng zui tawh lo.


“Taka...Greenwood ah an awm aw..” Op-a’n a rawn tih leh chuan ka bu ringawt. An lo in sawn chhuak a nih hmel.


Durtlang lamah chuan ka tlân chho a, Gabby chuan ka hnunglawkah min lo zui ve zel bawk.


Kan thlen chuan Brenda-I pa cabin ni tur âwm tak bul lawkah chuan awm an lo tha hnem angreng. Op-a chuan Brenda-I thu kun lap mai chu a va bia a, an phun dun sep sep a, Opa chuan ka rawn kal ve tih hrilh niawm tak hian Brenda-I chuan Gabby nen kan din na lam chu a rawn melh a, min hmuh chuan za vak lo hian a then sak nghal.


Dingchhuak hian min rawn phei vat bawk.


“In lo kal animaw..in van fel em em” Gabby melh pah chuan a ti a. A aw chu a thám deuh tiam a.


“Gabby nih hi..” ka lo ti vat. Nui seih chung hian, “Brenda-I ka nia” tih pah chuan a kut a phar chhuak nghal a. Gabby pawn alo vuan ve vat.
Gabby'n Brenda-i chu ka hria lawm a tih khan an in hre tha turah ka ngai ngawt a. An lo in hmêlhriat chiah lo nih hmel.

“Tunah enge a an a?”


“Ala biak theih loh a.” a rawn ti let sep a.

“A tha leh vat mai ang”
ka lo ti ringawt. Za vak lo hian a nui leh seih a.


“Nia tiraw..lo kal ru saw lamah sawn thutna awm” tih pah chuan a kal zui nghal a, Gabby mitmei zeuh pah chuan kan zui ve mai. Hnial tung a mawi si lo a.


“Pate…hei hi Zothan-a nihhi hmanni khan a mah hian nia min rawn thlah kha..chuan hei a thian Gabby” pavalai deuh tak hnenah chuan a ti a, ka lo hamhaih deuh.


“E..a ni maw..in va tilawm ve aw…” a rawn ti a.


“Kan lo kan vat thei lo a, a zia lo hle mai” ka lo ti ve luam.


“A pawi reng reng lo, in lo kal a in ti lawmawm lutuk..ti khan lo thu ru aw..ka va chhuak lawk ang ” a ti zui sup a. Ka lo bu ringawt.


Thutna ruakah chuan Kan thu thla a, Op-a chu ka hmu tawh mai lo, cabin chhûngah lut ve nih ka ring.


Mipa pathum vel hi kan piah lawkah an ding a, min rawn ngaihven hmel lem loh bawk.

“Eng na nge ni hrim hrim a?”

“Hrawk cancer ania..” a ti zawi sep a, in sûm deuh tak hian a in sût deuh hraih a, a kiu pahnih a mal chungah a nghat in a hmai a hup nghal. Gabby chu ka va melh zeuh a.

‘hnem ta che’ tih melh in lo melh. Ka ner sawk.

“A tha leh vat mai ang” tih pah chuan Ka kut lehlamin a hnung zangah dîm tein ka ben sak thek thek a.
Ka hnem thiam dan tawk. Thawk tha ve tak ang maw?


A rawn hawi chhuak lo, a tap khur der der mai. Hetiang hunah chuan a thian Hmeichhia tu emaw ten awmpui âwm tak ani sin le.


“Bawih-a saw Anun-I” Gabby’n ka beng bualah a rawn tih sup chuan a melh na lam chu ka melh vat. Ngurnunsangi nen kan mit a tawng chat a, a hawi sawn rang hle.


Brenda-I hnunga ka kut dah chu ka la thla vat nghal bawk.
A bula ding chu an Monu kha a lo ni.


“Ka va kal lawk..” tih leh Brenda-i chu ngaihtuah tawh eih lo chuan ka tho a. Ngurnunsangi te lam chu Ka va pan phei nghal.


“Enge in tih a?” Ngurnunsangi melh chung chuan ka ti a. An ding ve mai a, Min chhang lo..


A monu zawk khan , “ ehe! Scooty rawn dah tu kha ini tiraw?” nui chung chuan a rawn ti hliai a. Min lo la hre ve nih dawn hi.


“aw ni e…enge in tih a?” nui chung chuan ka lo ti tha ve mai.


“Hei kan in check up satliah lawk anih hi..nang zawk?”

“Ka thiante damlo ka lo kan lawk a.” ka ti ve leh mai.

A nau pawm chu a lo te deuh that a. A thlem vat vat nghal.

“Ate..pawn ah kan lo va awm ang aw..kan kal phawt mai ang aw..Zonun ami khah?”



“Zothankim-a zawk” nui chung chuan ka lo ti vat.

“aw aw ni tak e..a nih aw” a rawn ti leh a. Ka lo bu ringawt.

Ngurnunsangi chu ala ṭawng lo hrim hrim.

“I thin ka tirim leh tawh mi?” nuih za ru tak chuan ka ti a.

“Ka thin tih rim chhan tur I nei mi”?
a rawn ti let nghat nghal.


“Nei aniang I lungawi si lo va” nui suk chung chuan ka ti a.

Engmah sawi lo hian min melh deuh ran a, a thaw hak a.

“Kal tawh rawh..saw an nghah che saw” a rawn ti chhuak hap a.


Gabby te thutna lam chu a melh zawk a. Ka melh ve vat nghal, Brenda-I chuan kan lam alo hawi reng a, a hawi sawn rang hle bawk.


“Saw vang sawn mi I lungawi loh?” tia ka zawh chuan Min chhâng lo.


“Englo Gabby bula thu saw Brenda-I nih saw..a pa a zual thut a..chuan..” ka tih lai mêkin, “Chu chu engvangin nge min hrilh” a rawn ti chang fak. A meng ling deuh hlar leh pek tawh bawk.


“A chhan chu hre turin ka duh che”


“Engvang chuan?”


“I lo thîk emaw vel ka duh lo a..” nui suk chung chuan ka ti a.

A thaw hak a. Chiang deuh tak hian min rawn melh a.


“I hre sual anih ka ring.”



“Eng ber ah?”
ka lo ti sam et.


“A vai hian..nang nen hian in zawmna engmah kan neilo, ka tan engmah I ni lo.. I duh duh hmu la..ka..” a ti hman chiah, Ka pawt hnai dawr a, a mit meng UK deuh khep ah chuan Chiang takin ka en a, “Sawi nawn leh teh!” ka ti bung nghut.


“Eng chu?” ka mita min en ran chung chuan a rawn ti ve leh.
Tak zet hian!!


“I tan hian engmah ka lo ni lo a maw?”



“Aw”



Ka thinrim lutuk chu ka nui hul hak ringawt. A tan hian.. Nia..a tan, a tan hian engmah ka lo ni lo…ENGMAH!!


“That chu..” tih chiah ka sawi a, ka thlah nghal nawk a. En tawh eih lo in ka kalsan nghal.


Ka duh alawm. Nasa takin. A mah anga Hmeichhia ka ngaihtuah na luah tu hi ka la tawng ngai eih lo bawk. Mah se..a tan khan engmah ka lo ni lo!!



Ngawi rengin Gabby bulah chuan ka thu a. Brenda-I chu a chhûngah alo lut hman tawh thung.


“Tinge a?”
a rawn ti ha a.


“Eng mah” tih bak in ka chhâng lo. A ner sak a, min be zui bik lo. Ka lâwm thu tak.


Tih theih vak a awm chuan loh avangin kan haw san a. Op-a erawh kan haw san. Ka mood dik loh zia a hre ve niang Gabby pawm kan haw dawn thleng pawn min be bik lo.


Wine shop ah zu ka lei kawi a, chaw pawh ei lo in ka room ah ka khung a, ka in deuh pawp pawp. Ka rui hma ang reng. Ka in tawh lo ang ka ti sin le..kha nu phiangsen vang khan ka in phah. Phone ka switch off hmak a, ka mu nghal daih.

…………

A tûk zing chu kan in khelh hun a ni tawh a, phur fahran lo chuan ka kal a.


Inkhel kan tan deuh chiah tih in Kan tum pui te zinga mi vangin ka ke ka ti na ta tlat pek…chêt chhiat na hlirin min zuiin ka hria.


Ka ke chu a lo na vak lo tih ka hriat chuan lâwm viau mah ila ka lungawi Chuang lo. Ka mood chu a chhe kher mai. Thinrim deuh tun in inkhel chu ka en a, kan chak lo zui…ka rilru in Ngurnunsangi ka puh hmiah.


“I ke chu a na viau em?” tih hi contact ka save loh atang in ka dawng a. Ka lut a, ahma a min lo text tu bawk kha ni. “I mu tawh em?” rawn ti tu kha.



“Na vak lo e..tu nge?” ka ti let ve. Hmêlhriat loh ka be ngai lo chungin hriat ka duh tlat.


“Va bung hmawk hmawk ve..keimah Brenda kha” a rawn ti. A lo nih tak tak reuh hi.


“Ka hre lo che lawm..I pa chu enge a an?" ka ti let ve.


“A zia hret leh tawh,I ke chu?” a rawn ti leh a. Ka nui suk. Min ngaihsak tu neih chu a nuam ru ve riau.


“A dam tawh nimai..tin nge I hriat a”?


“Ka thian ten min hrilh a” a rawn ti let a. Mak ka ti ru hle.


“I thainte chuan min hria a maw?”


“Hriat loh ten…Zothankim-a Renthlei kha an tum pui zinga mi pahnih in an ti tlu a, a ke tih nat phah an rawn tia” tih a rawn thawn. A rawn sawi dan kher kher chu ka nuih a ti za hle.


“Min lo en ve loh vang aniang ka in hliam” tih ka thawn ve. Chhelo leh lar ve deuh biak te chu nuam lo ka ti lo bik lo a.


“Naa…awih âwm loh ee”


“Tak tak alawm..”
biak zui ka châk tlat.


“Nimin ami kha I bialnu tiraw? In in hmeh tawp”

Ka lo rum deuh nghut.


“Nope..” tih chiah in ka reply.


“Naa..sawi ve mai la..hmanni basketball court bulah pawh khan ka hmu reng che u..” smiley lem a rawn dah tel teuh a.


“Ka bialnu ani lo” tih ka thawn a, data ka off nghal hmak. Ngurnunsangi chungchang a rawn sawi chuan Ka mood a ti chhe hman leh tawh.



(Ti thleng hi ni mai rawh se…min lo chhiar saka ka lâwm e..Brenda-I huat bik awih tawh lo 😝💙💙💙💙👏)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)