PROMISE

Episode kal lai dah luhna

Moderator: writers

SumMer Ralte
Posts: 104
Joined: September 6th, 2021, 11:35 pm

PROMISE

Unread post by SumMer Ralte » October 14th, 2021, 11:11 pm

CHAPTER-12




"Lut tawh rawh le, i awm rei lutuk chuan i chhungte ngaih a tha lovang" ka sam a chul hliau hliau pahin a ti a, lu ka lo thing nar nar "Kal hmasa zawk rawh, ka lo en ang che" ka tih chuan min melh khui khui a, a hmeichhia zawk in en liam tir chu a hreh ve hle ni tur a ni, ka nui hak a "Kal rawh, ka lo en ang che" tih pahin a biangah chuan dingdihlip ak ak in ka fawp a, nui sukin motor chhungah a thu lut nghal






A kal dawnah a kut vai zeuhin lut turin min mitmei zui nghal a, mahse zanin hi chuan a tlan liam thleng en ka tum thung. A liam tak hnuah inchhungah ka lut ve chauh a, ka nu leh pa te erawh an mu tawh thung "Engtikah nge result a chhuah dawn?" Zawi tein Dinmawii chuan ka beng bulah a rawn ti sa sa a





"Naktukah" ka chhang tawi tak tak khawp mai, lu buk nghat pahin "Eng em chu thleng lo hram se ka van ti tak" a ti ve niah niah a, amah ai hian ka duh zawk daih ang chu mawle; rilru pik tup e ti lo chuan engtin tin emaw ka muhil ve thei hram. Vawiin pawh office ka kal dawn lova, ka pa result a zirin ka hna pawh hi bansan mah ila pawi tihna ka nei tawh lo





Enkawl ka duh a, a nat leh hnuah ngat phei hi chuan ka duh leh zual mahse ka hna vang leh zel a ka enkawl thei dawn lo a nih chuan ka hna zawk chu chan mah ila pawi tihna ka neilo; ka pa dam that hunah hna te chu a zawn leh theih reng tho a, chuvang chuan ka hna aiin ka pa hi a pawimawh zawk ka ti





Damdawi in kan thlen hnuah ka nu leh pa te chuan pawnah min lo nghak a, kei erawh chuan a result ka lamsak thung. Doctor sawi danin a cancer ngei a, third stage a nih tawh thu pawh a sawi nghe nghe, chemo kan khai vat a nih loh chuan kan tan a buaithlak tur zia leh a nun tan a hlauhawm tawh zia a sawi chuan ka bing mup mup nimai hian ka hria





A thilsawi ho chu ka hre chang chang chauh a ni, cancer a ni tih kan hriatna a la rei loh teh lul nen ka tha chu a na tlat a ni. In sawiselna a nei ngai lova, ka awm loh san hnuah pawh ka nu sawi danin engmah na a nei ngailo; tun hnai chho hian a pum a na a tih thu a sawi a, an inentir khan cancer a nih an ring ringawt kha a ni a, a na a zual tak deuh avangin Aizawl an rawn panpui ve chauh kha a nia





Chutianga ka rin loh lutuk tak maia a serious ta viau te chuan min ti hlauthawng zual a, engnge tih hmasak ber tur pawh ka hre bar lo. Chhuah mai nachang pawh hre lovin kawngkhar bulah chuan dingin ka pa result ka ken mek chu ka hum ngawt ngawt ringawt a, ka pa ka hmu ngam thlawtlo; a hmel pawisawi lo taka min en chung khan min nuih leh var var emaw kha a nia nga, insum lek lova ka tah khum hrep ka hlau a ni





Inthunun tum a rei fe ka awm hnuah ka zia ve ta deuh chu ka chhuak ve thei chauh, ka pa in min hmuh rualin "Engnge a lo an a, hlauhthawn awm thil te a ni em?" Beiseina sang tak neih hmel zet chuan min zawt a, chhan mai ngaihna ka van hre lo si em. Hlim hmel thei ang ber pu chawpin ka pa chu ka nuih a "A tha vek e, treatment i lak that chuan i dam leh vat thei a ti nih chu" dawt chu ni chiah lo mahse "I cancer a" ti a hrilh chu ka hreh tlat a tin ni





"A lawmawm nasa a nih chu, ka hrisel a vawikhat pum nat vang maia na vak tur ka ni hleinem le" a tih te chuan ka tah a chhuak leh tun tawh mai, an hmuh loh kar lakah ka mittui chu ka hru leh zeuh thin a; ka nu in ka awmdan chu a hrethiam chek a ni ang chu min rawn melh leh ralh thin a, nui lui ve bawk mah ila chhungril tak atanga nuih suh ka theilo hrehawm ka ti tlat a ni





"Restaurant ah thil tui tawk kan ei dawn mi" ka nu in a tih chuan ka pa pawh a phur hmel kher mai, ka nu chuan min biak a duh tih ka hria mahse ka pa hriat a sawi chu a duh bik lo tih hriat takin hun awl a zawng ve reng tih a awmdan atang chuan ka hrethiam mai. Thil kan ei lai te chuan ka ei hlei thei lo, ka ka hian engmah a chak lo; kan thil ei te chu a tui pawh ka ti hrep lo





Kan haw hnuah ka nu chuan ka pa inthlak lai chuhin ka bulah a rawn kal a, thu awmzia leh ka pa result tak tak ka hrilh chuan amah pawh chu a nghilh ve dupin ka hria; thuthlengah a thu thla hnawk a, a hmui chu hupin ka pa hriat hlau tak siin a tap a. Chutianga ka nu awm ka hmuh takah chuan ka insum zo tawh bik lo, ka nu chu kuahin ka pa hriat hlau tak si chuan kan tap dun ngawih ngawih mai






Luca pawhin chanchin hriat duhin min rawn bia a, pangngai taka chhan a harsa khawp mai; ka aw thunun ka tum lutukna lamah ka aw te chu a lai rut a, a tial ti tih bawk. Tiang em em a ka nun a hrehawm ka tih hmasak ber a ni hial ang, natna pangngai lo deuha an nat tawh hi chuan rilru in a chhui hmasak ber chu an thih hun hi a tih theih ber ang chu, ka pa pawh ka han chan ve hian ka na lutuk ringawt






Ka rilru ti hrehawm lova, ngaihtuah ngut ngut lo turin leh zana a lo kal tur thu min hrilh leh hnuah kan inbiakna pawh chu kan dah ve thei hram, Dinmawii pawh a lo haw tawh a; ka pa mutthilh hlanin chanchin te chu kan hrilh ve a, a ni pawhin a tuar ve viau in ka hria. Ka pa hi pa ang tak taka a en ve avang hian hrehawm min tihpuiin min tuarpui ve viau bawk





Ka nu mi insum thei thin tak pawh insum zo meuh lova a tap a nih chuan a na ve hle tihna a nimai. Ka pa hmuhah hlim lo angin awm lo mah ila, a tu a te mai chu hlim thei tak tak kan awm meuh lo; zanriah kan ei lai te chuan ka lo en leh vung vung thin a, nidangah ka lo chik ngai lo nge a natna ka hriat tawh vanga ka ngaihbel zawk pawh ka hrelo ka pa chuan chaw te chu a ei tlem em em a, kuttum tiah lek tak tak chauh a ni a ei ni





Zanah chuan a insawi ang tak takin Luca pawh a rawn leng leh a, ka bulah thu in ka kut a kai tlat a; nu leh pa te hmaah meuh chutianga awm chu ka zak ve deuh bawk nen ka kut lak thlak ka tum lahin a phal aw kawng lo leh nghal. Min thlah a hnekin ka kut a vawnna chu a hma aiin a tih nghet sauh zawk emaw ni! A rukin ka nu leh pa te mitmei ka veng reng a, ka tan lutuk na lamah ka hah hlui thei nia





Ka nu leh pa te nen an titi siam siam a, tlem a kum upa te duh zawng tur hria ni awm takin sawipui tur lah chu a hre vei phian leh nghal a; mipa tawng mawh leh ngeng tak ang a ka hriat kha zanin hian a phelh chiang hle bawkin ka hria, a tawng duh mai bakah ka nu leh pa te chu a nuih tir hawk hawk theih bakah kei ngei pawh ka rilru a na tih inhre lo lekin a bulah chuan ka awm thei a, ka sawi tawhin a bulah hi chuan thlamuan theihna riau a awm ni te pawhin ka hriat phah





Thingpui lum turin choka ah ka phei a, a ngai te ang bawkin Dinmawii pawh lehkha nawi neuh neuh leh register te nen dawhkanah a lo chap darh leh nuaih tawh, a bulah phone leh calculator a awm bawk a; eng eng emaw chhut pahin mi a be pah zeuh zeuh bawk a, thingtlang lama kawr zuar ve te lakna ber a nih bakah a hnen atangin an chah thin bawk a, thawn chhuah tur lah a ngah bawk a. A hna hi chu a buaipui ve khawp mai





A buai zual tak tak phei chuan biak buai hlauhawm khawpin tarmit lian tawk a vuah ngei zel bawk a, register a a thil chhinchhiah tak thai zeuh zeuh pahin calculator ah a chhut pah bawk a, phone an hmang leh zel te nen hian a inhmeh hi kan ti thin khawp a, a lian vak bik lo nen nula senior tum tawi hlauhawm zet te pawh hi a ang lek lek zel





Thingpui ka lum zawhah pe turin ka phei a, dawhkana ka dah rualin Luca chuan a bula thu turin min mitmei zui nghal zat; a ta ang maia min cheibawl leh min zahpui lote chu ka lawm rualin ka nu leh pa te lakah chuan ka inthlahrung ve det. Tiang hian ka awm ngai si lova, ka pa chuan min chik lo bawk a a hrethiam vak lovang mahse ka nu erawh chuan min chik khawp mai





Luca lo luh tirh atang a mit chu kan pahnih chungah a fu reng a, min rawn melh phei chuan zawhna a ngah thawkhat viau tih pawh ka hria; a hre duh a nih leh Luca haw hunah ka la hrilh ve ang mahse inngaizawng kan ni em ka hre chiah lova thian ang pawhin ka sawi tawh mai a niang chu!





Luca haw hnuah ka rin ang ngeiin ka nu chuan min zawt ta chat, engkim ka hrilh hnuah thu tha eng eng emaw chu min hrilh luam a; fimkhur turin leh nupui pasal kan inneih hma chu mipat hmeichhiatna hmang lo turin min fuih nasa hle bawk. Chung a mi fuihna ber kher chu tih hlawhtlin ka tum tlat bawk, Luca kher lo pawh midang lo tawng pawh ni ila nupui pasal inneih hma chu ka thianghlimna vawn nun ve tlat ka tum hrim hrim reng bawk a ni





Han tih nek nek chhungin thla pawh a vei leh duai tawh mai, ka nu leh pa te pawh tum loh deuhin thlakhat lai kan bulah an cham ve ta reng; thudik zep hlen theih a nih loh ang bawkin ka pa chemo khai tir a hun meuh chuan a natna chu a hre ve lo thei lova mahse keini lo ang takin a ni chuan a pawm thiam kher mai





"Pathianin kan thatna turin engkim a ruat thin a, kan tawrh zawh loh khawp a na min tawrh tir a phal ngai lovang; tuna ka natna pawh hi kan tana tha vek tura a ruat te pawh a ni ngei ang, ka tuar zo lova ka dam chhuahpui lo a ni pawhin Pathian chu dem lo ula, a lakah in tu lut zual sauh ula amah pawl tam nan hman in tum zawk dawn nia. Ka lo dam chhuahpui ta a nih erawh chuan a ropuina lan chhuahtir na hun a ni mai" tiin min hrilh a, chutianga rilru dam taka a pawm thei mai chu ka chhuang tak zet bawk





Chawl reng thei ka nih loh avangin office pawh ka kal leh tawh a, mak tak maiin eng emaw palha ka tlai a nih pawhin Luca chuan min hau tawh ngai lova chu mai pawh ni lovin hnathawh lai pawhin min hre lo der tawh ngai lo chu thawhpui te mak tih a hlawh a; eng eng emaw min zawt ve reng a, chhan ngaihna tak pawh ka hre thin lo. An ni tan chuan an pu hlauhawm leh nelawm loh zet chutianga a awm ta thut pawh chu a ngaih that thlak loh ve dawn em bawk a ni





"Vawiin chu ka thlah ang che" ban hmain file pe tur a a room ka luh rual chuan a lo ti nghal a, ka hnial bik lo ka lo bu nghat a; file ka dah hnuah ka chhuak leh nghal. "I lo lut kawi angem?" Motor a kan chuan luh hnuah ka zawt a "Lut kawi lo mai amg, zanah ka hman taka leh lo kal ka tum dawn nia" a tih chuan ka rem ti ve mai, hman loh pawh nise ka dem chuang hauh lovang





Khang thla kal ta chhung khan kan chhungkaw tan a inpek mai bakah a theih ang tawkin ka nu leh pa te a puih bakah a lo kal apiangin ka pa tan eitur tha tak tak a rawn ken ziah bawk a, ka pa ti hlim tur ringawt a a lo kal pawh keini tan chuan a lawmawm tawk tawh viau reng a ni




In ka luh hnuah ka nu chuan "Kar leh lam chu haw kan tum deuh a, vawk kan vulh bawk nen thenawm te lo tih tir reng chu a inthlahrun thlak bawk si a" a lo ti niah niah a, ka rem ti viau lo na chu ka nu in awm tleina turin vawk pali lai kan vulh bawk nen an haw lo thei bawk si lo





"I vulh kher kher a, thil tih tur awm hunah pawhi buai phah bik ziah a a buaithlak i hralh loh leh talh mai rawh" kan ti leh rih thin, haw ta se ka pa ka ngaihtuah bawk si a; a na chu chhuak leh thut se engtia awmpui reng reng nge maw a tum chu ni "Talh an la hun lo deuh a, hralh ai chuan talh ila te ka lo ti deuh a" a ti leh a, ka lo thaw hak thung. Kum upa tawh lam phei chu hnial an sawt lo si, an thu ang zela awm an tum thin hi a buaithlak tel tawh thin





"Ka pa te hi i ngaihtuah ve lo a mi? A na chhuak thut ta se engtia awmpui reng reng nge maw i tum le, i ran ringawt kha ngaihtuah suh tunah chuan ka pa a pawimawh ber" ka ti hlak hlak a, dik tak chuan ka pa la ngaihtuah a, ka nu khawsak dan nen chuan inrem ka ti hlawllo a ni "Aaa... Eng em kan ti bik lovang" a tih te chuan ka haw hlur tawh






Mahse a duhna sawh sawn thei lo na na na chu haw an tum ta tho chu a nia, ka ngaihtuah angreng khawp mai; "In ngaihtuah awm loh tak tak ang maw?" Ka tih leh pawh chuan an ngaihtuah awm loh tur thu min hrilh a, ka pa an hem dawn hunah leh chemo khai dawn huna an rawn kal leh tur thu min hrilh a. Nitin tih tur a ni lo bawk a, an ngaih a tha te pawh a niang e





An haw hun a lo thlen meuh chuan keimah zawk chuan ka huphurh khawp mai, rei tak kan inhmuh tawh loh hnuah thlakhat zet ka bulah an rawn awm a; an mahni ngai tawk lekin min siam hnuah min haw san leh tur si chu ka ngai dawn khawp mai, haw theih hmasak berah haw ka tum ruh nghal em em hle hi a ni ringawt






"Hlu ngaihtha deuh khan awm phawt teh, ka nu leh pa te ber ngaihtha deuha an awm phawt te chuan a tha vek turan ngai phawt mai ang" an tlan liam hnuah Dinmawii chuan ka rilru hah hlauh vangin min hnem ve chu a tum viau a, mahse ka ngaihtuah lo thei lo a ni ber. "Fanu mal ni ve la, i nu leh pa innghahna ber ni bawk ta la chutah lah i nu leh pate kum upa lam lo ni leh zel bawk ta se, an kiangah awm thei lo leh zel ta la i rilru hi a hah loh bik ka ring lo" ka ti a





"Ka hria lawm mahse ngaihtuah teh, engmah ti thei bawk si lova rilru lo tihhah ve vak vak kha engnge sawtna awm? A sawngsawhlawtna a awm miah lo, tul lovah i intihhah mai bakah i in ti na mai mai" a tih leh chuan dik ka ti tho bawk si, ngaihtuah thiam ngaihna pawh ka hrelo. "Chutiang sawi tawh lo teh ang, bazarah kan kal mai mai dawn mi in tih thawven nan" a tih chuan "Dawrah i kal dawn lo a mi?" Ka lo ti vat





Buk nghat pahin "Aw ka nau te an awm a, an zei ve viau tawh khawp kha ngaihtuah awm an ni lo bawk a, ngaihtuah duh suh" a ti a, a awmdan atang chuan a ni chu a thawveng leh der tawh in ka hria. Kan in ang lo thin khawp mai, kei chu ho te te ah ka phi chung zel a; ka buai nghal em em zel. Ka ngaihtuah nasat phei chuan ka hah lutuk hi ka engmah tih pawh a nuam lo






Bazarah te kalin eitur te kan ei a, keipawh tlemin ka awm chu a nuam leh ta deuh e; kan kal mek laiin ka phone a lo rik tak chhen avangin ka la ta hram "Zanah ka lo kal ang" a aw atang chuan tunge a ni tih ka hai lo nasa "I hman te chuan lo kal mah la a pawi hleinem" ka tih chuan a nui suk a, engmah a sawi zawm lo mahse phone chu kan vuan dun ran a "Ka ngai che" a thaw zui nghal hawk a, kei ka lo nui suk






Inhmu ngai lo pawh kan ni lova, office ah lah kan inhmu reng a zanah lah nise a hman phawt chuan a rawn kal reng a chuti chung chuan min ngaih thu a sawi a; "Keipawn ka ngai che" ka tih chuan "Ka rawn kal nghal mai dawn" a ti leh ang lawi a, ka nui ta hak hak. "Tunah chuan inah ka awm lova, Dinmawii nen ka nu leh pa te thlah pahin hei bazarah kan kal kawi a" ka tih chuan a ngawi leh vung vung ang reuh a





"Kal kher angai a mi, haw tawh rawh u a tlai tawh" a tih te chuan ka nuih a za tulh tulh, amah lo ang taka chutiang thu a sawi te chuan ka duhna a tizual ni berin ka hria "Chutiang thawt thawt te chu a.." Ka ti nang nang a, leh lam atangin a rawn nui hak "Tak tak a, nuam deuh khan hmang ru. I rilru tihah lutuk lo la engkim a tha leh vek dawn a nia" ti a min hnem leh takah chuan ka hahdam leh huai maiin ka hria





In kan thlen hnuah in te chu a ruak ta huaiin ka hria, a ngai te ang bawkin Dinmawii nen tlaia kan thil ei ang thin tho chu kan ei leh a; pahnih ta na na na hi chu han ei teuh tur awm hek lo chutah lah eitur lamah kan khirh lo dun bawk nen hian siam awlsam sam hi kan duh zawk a, buai nen chuan a inhmeh ka ti tak zet. Zanriah kan eikham hnu rei lo teah Luca pawh a rawn thleng a, Dinmawii inla zei fahran chuan room lamah min awm san daih leh nghal!





Ka bula a thut rualin ka kut a hum leh chat tawh, sawi tur em em hre lo mah ila a bula ka awm hi chuan nuam ka ti em em vel vek mai a ni; "Hna hi ban mai te ka duh" thawk halh paha ka tih chuan "Engvangin?" Vin lek lekin a lo ti vat "Ka nu leh pa te ka ngaihtuah a, unau ka nei bawk si lo nen ti ngawt hi chuan an pahnih chauhin ka dah thei lo a ni" zuai raih a ka tih chuan min chhang lo mahse eng emaw ril zet ngaihtuah ang maiin ka kut a kaih lohna lam chuan a hmuihmul khawih pahin a ngaihtuah a






"Haw ta la engtin nge ka awm ve ang?" Ka rin loh lutuk a rawn sawi chhuah daih avang chuan ka nui hak "I awm ve mai ang chu" ka tih chuan mit zim sanin min en vang vang a, kei ka lo lai leh pek tawh hle thung. "A hma pawhin ka awm lova khati leh chen i awm thei alawm, i awm leh thei em em ang" ka tih chuan a hmui a pet sawi duh lek chauh leh nghal!





"A hma leh tun a in ang tawh hleinem" a tih chuan sawi leh tur pawh ka hre tawh lo "Mahse...." Nur nang a ka tih chuan ka hnar piai zeuh pahin a kiai suk a "Ka hrethiam che lawm, i ban duh pawhin ka hnial lovang che mahse min haw san daih chuan ka ngai ngawt ang che" a then nghal sak a, ka nuih a ti za leh pek tawh hle





"Tiang te hian i awm vel a, i inhmeh lo e" nuih hak hak paha ka tih chuan min en vang vang a "Ka danglam tawh i ti em?" Tiin min zawt daih a, danglam te chu ka ti tawh tak zet. A chhan chu kan naupan lai kha chuan mi nelawm tak leh tawng duh ve tak, kawm nuam em em a ni bawk a; tlem chu la awm tho mah se a danglam tak zet tawh






"Aw i danglam tawh lutuk" ka tih chuan a nui suk a "Engtin?" Ti leh ang lawi a, zanin chu hepa hian engnge maw a hriat chu le! Thil min zawt a, ka chhang a; a chhan min zawt leh daih a "Aw chungte chu nangman i hria ang chu" ka tih chuan a chal a ti chuar tap a "Hria ila ka zawt dawn che mi" a ti leh hram a, ka en ha ringawt






"I mak...!" Ka sawi tur hre tawh lo chuan ka ti ta ringawt, a nui hak a "Tunah chuan ka duhthusam pakhat tih hlawhtlinin a awm a, ka hlim" tih zawng a sawi leh a, zanin a thusawi inrem lo zet zet hi kei chuan ka hrethiam leh tawh der lo mai. "Zanin chu engnge i hriat a, thil inzawm lo hlir i sawi bawk sia ka hrethiam lo a nia" a ngaihna hriat loh hmel zet a ka tih chuan "I la hrethiam vat mai ang" a ti leh ang lawi a, ka lo thaw hak ringawt






"Vawikhat chiah i zai thei angem?" Kan ngawih leh tak vang vang hnua ka tih chuan rang zetin min rawn en vut a, keiin ka nuih seih "Eng hla?" Bung zet a a tih chuan "Kan naupan laia min sak sak thin kha" ka ti leh a, a hmui a pet sawi nang ringawt "Mawhh... Sa teh" ka ti leh a "A chi loh emai" laih hmel zeta a tih chuan ka nuih a ti za ang reng, a lai hmel ka la hmu ngai lova, chutia a laih ve hmel lutuk chuan ka nuih a tiza tlat






"A chi loh" a ti leh tlat a, ka lo tum bar tawh "Ka sava note hian pangchan a zir ve tan tihna em ni?" Nuih suk suk paha a tih chuan ka melhrum nghal hrawk "Ka pangchang lo" ka lo ti hlar a, a nuih a zat hmel hle thung. Zanin kan awmdan chu a eng emaw tih nawm riau hian ka hre pek a, kan thusawi inzawm lo leh in tuha lo tak te; kan awmdan vel te chu tleirawl inngaizawng tir ve det det te pawh min in chantir hialin ka hria






Kan ngawih leh reng hnuah "Veranda ah awm ila" a ti ta nge nge, ka pawmpui chiang khawp mai. Sawi tur kan hriat lova kan ngawih reng hian boruak te hi a uap churhin ka hria, thawk te pawh a chham mai dawnin ka hre thin. Thlang lam veranda lamah chuan inzui chhuakin kan piah lawka veng light in a a tih phet tuarhna lam chu kan hawi a, ka hnung lamah dingin ka kawnga kuahin ka darah a khabe chu a khat a, tianga a awm tawh hi chuan engtin emaw riau hian ka awm thinin ka hria






"A mawi zia saw" ka ti hluai a "Immm.... A mawi mahse sawng ho sawn tluk ve ngai loh tur an nei" ril ruih a a tih chuan "Tunge?" Ka lo ti vat, min kuahna ti nghet salhin "Tuna ka bula awm mek hi" tih leh min kuahna chu a phelh leh nghal zat a, amah en thei tura min kuai herin "Ka hmaa hmeichhe duhawm zet hi an tluk thei ngai lovang" a tih chuan zah lutuk vangin ka hmai te hi a sen nghal tawl tawlin ka hria






"Hmmm..." Hmui tih pawrh tarh paha ka tih chuan ka hmui chu ka hmuiin a rawn bawhthuah nghal zat a, ka meng phawk chiang hle. Min pawm kangin vawn chhan cement a siamah chuan min thut tira, ka chal chu a chal a rawn sik tirin a nui nghawr dat a chutah min fawh zawm leh nghal zat bawk





A nghawng a lo kuah let ve nghalin ka thiam dan ang ang chuan ka chhang let ve nghal a, chu chuan a ti phur zual emaw tih mai turin min fawhna chu a hma aiin a duhthawh hle bawk; a kut pakhata min kuahin pakhat zawk chuan ka kawr chhung chu a zen nghal rak rak a, ka lo man beh sak vat chu nuih hak pahin a zen chhunzawm tho





Kan infawp uar telh telh a, kan thisen pawh a lum tan tih hriat takin a mit meng te chu a si sap tawh; kan in fawh loh kar lakah ka hmai zawnah a thaw lum leh hak thin bawk a, in enin kan nui leh ringawt thin. Kan duh tawk chen kan infawh hnuah leiah min hlang thla leh a, min thlakhlelh hmel zet chuan min kuah hlun mai. Ka te bawk si a, a ni a palian bawk nen min kuah bo hneh ve hle ta ve ang





Aw thian kharh kharh ri kan hriat takah chuan kan inthlah rang hle "Ehhh... Ka tibuai em lovang em lovang che u maw, mawng lamin ro a rel tawh hi chuan insum a har thin a" nuih huah huah paha Dinmawii'n a tih chuan ka zak lutuk chu en pawh ka en tha ngam meuh lo "Kan tih loh lai takin i rawn kal zawk a" ngeiawm zetin Luca chuan a lo ti ve vat





"Ka awih lo lutuk, engmah ti lo ula khatiang em em khan in inthlah rang lovang" a ti leh zel a, Laldinmawii chu ka ngei tak zet; a hmu ve a nih pawhin hriat loh der mai thin awm hi a nia. Sawi nuam ti ber berah hian a tang ziah zel leh nghal "I ek a chhuak a ni lawm ni, heta rawn pawt rawn pawt lo khan e vat mai teh" ka zah lutuk vang chuan kal vat se ka ti zawk "Ka kal dawn, in duh chuan in tih zawm leh thei" mit ko san ak paha a tih chuan chum chawrh mai ka duh hial tawh a ni






"Ka zak e..." Ka ti nghek a, nuih hak hak pahin ka bula mi chuan "Engnge zah tur awm" a lo la ti than zui, hemi te pahnih mize in ang lo tak mahse eng emaw kawng riau a inthurual thei em em leh zah hre ve miah lo te laka ka awm reng chuan keimah zawk hi zah lutuk vangin ka la chhe rawih thei hial in a nia ka hriat ni






"Kan lut dawn mi?" A tih takah chuan ka lo bu nghat, inchhungah kan luh leh hnuah eng thil dang mah kan ti tawh lova, Dinmawii inthiar zo lo chhuak pawhin min rawn zawm ve tawh bawk nen han tih ngamna chi pawh a ni tawh lo hrim hrim. Luca chuan a dawr lam chanchin te a zawt vei luam a, Dinmawii phur lutuk chuan a zawh loh thleng thlenga a hrilh tak chiam kha!






Eng eng emaw sawi a kan awm leh reng hnuah Luca pawhin min haw san a, keini thian dun pawh kan mu zui nghal mai; a tih thin dan ang chiahin ka bulah a mu leh tawh a, a mu daih tawh emaw ka tih hnuah "In awmdan hi a nawm hmel" a rawn tichhuak hlawl chu phawk zetin ka lo en thung "Luca nen maw" ka mitthla ah a hmel a rawn lan avangin ka nui nghal vur vur






"Chhe ver vur lutuk mai" min nghawk zeuh pah chuan a ti hlak a "Engnge?" Ka tih chuan "Nangni chu inla inhmu thei a, tihian hlim takin in awm dun thei a ka awt ngawt mai che u" a aw ah chuan khawharna leh lungngaihna tam tak ka hre theiin ka hria "Nangpawhin i la tawng ve vat mai ang" ka tih chuan lu a thing nar nar a, "Keimah zawk hian ngaihzawng ka neih leh theih tawh pawh ka ring lo" a tih chuan ka hau in ka en a, min rawn en zawkin a nui suk bawk






"Kan inhriat hma daih khan keipawhin hmangaih deuh ka nei thin, la naupang viau mah ila ka hmangaih tih ka hria" a tih chuan "Khawnge a awm chupa chu" ka lo ti ve vat "A ni chu hetah a awm tawh lo, khawvel leh a chhunga awm zawng zawng te hian an tih nat phak tawh lohna hmunah hlim takin a awm tawh" nidanga ka la hriat ngai reng reng lo a aw ah chuan ka hre thei





A ngai ve hle in ka hria, khawharna nasa tak leh lungngaihna te a hmelah chuan ka hmuh chhawkin ka hria "Tinge?" Ka ti leh a "A ni chuan ka ngai ang tih pawh ngaihtuah lovin mahni hmasial takin min kalsan tawh" a ti leh a, ka hrethiam lo leh pek khawp mai "Sawi chiang la" ka ti leh chuan a thaw hak a "Kan inah a rawn leng a, a haw hnuah an in stepa a chhuk laiin eng emaw rap sualin a chesual a damdawiin an pan hnuah a na tuar lovin a kal ta a nih kha" a tih chuan ka khawngaih tak zet





Ngaihzawng ngaihsak ngai lo leh mipa pawh melh peih ngai lova ka hriat kha chutiang lam vang ni hauh lovin a hmangaih ber a chan tawh vang zawk a ngaihtuah tawh lo a nihna chuan min lainat tir zual sauh a, ka thiannu hi ka hrechiang ve viau emaw ka tih laiin ka lo hrechiang hauh lo. Thawveng tak leh vei em em nei ngai lo ang a ka hriat kha zanin hian a khawhar zia leh a lunglen zia ka hre ve chiah bawk






[Zanin ka lo tlai avangin in mi hriatthiamna ka rawn dil a, nilenga ka buai avang leh zan lamah current kan neih loh reng avangin duh angin ka rawn dah hma thei lo bawk a, kan inhrethiam zel mai a niang chu tiraw. Chuan ads click te, like leh comment te kha theihnghilh lo hram ilađź«‚]



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)