STAY CHAPTER 5

Episode kal lai dah luhna

Moderator: writers

Krystal Vanchhawng
Posts: 127
Joined: October 5th, 2021, 4:42 pm

STAY CHAPTER 5

Unread post by Krystal Vanchhawng » October 14th, 2021, 11:44 pm

STAY
CHAPTER ~ 5

◇♡◇♡◇

(Zanin chu ka tum angin ka awm theilo,pawi ka ti hle mai. Ka net signal a chhe lutuk a,min hrethiam mai teh u.)

Naupiang chibai bûkna pawh a ropui thei ang berin kan nei a,Mizote hi kan neihin a tlin bak bak a thil ti hnam kan lo ni tih hi hunpui leh hunpui tenau alo thlen hian a hriat leh thin. Kan neih lungkhâwng tak meuh meuhin inchhungkhur mamawh pawh ni hleilo,incheina leh kan tleina tur thil kan chhêkkhawm a,kan lungawina leh hlimna tluka hlu chu a awmlo alawm,mahse a nuam zawng zawng hi a tha vek kher lo,hengte vang hian alawm eirukna alo awm thin. Neih chin a lungawilo leh duh belhna,a hniam ber atang hian engkim hi a ințan thin.
Tuna eiru thin mi challang tak tak te pawh hi a tir chuan tlemte te a tanin an neih ah an lungawilo zel a,rual awhna chuan an mit a tidel thin.


Pang a dam chuan hun pawh a liam ve zung zung a,Lalrinkima pawh a rawn lêng khât viau a chu erawh chu sawisel leh nat nan hman ka tum tawh lem lo,biak erawh chu kan inbe deuh reng a,zana a haw khât lutuk erawh ka la khak fo,ka țhian ala ni miau a.
Ka kawng ka thlang tawh a,thilmak alo thleng te anih ngawt loh chuan ka rilru sawhsawn ka tum tawh lo.

Hmingthansanga nen pawh kan inbe âwl lova,khatiang thil kan tawn hnu phei kha chuan a hmaa min hnaih tum lutuk lo kha beisei nei deuh a mi biak hi a chîng a,ka rilru mumal loh lai a ni nen,ka ûksâk vak em em lo. Ka be chhe chuang lova,mahse ngaihzâwng tur anga en erawh a har lam deuh a ni.

"Khami zana ka hruai luih deuh kher nachhan che pawh kha i rilru i siamfel nan leh nakina i nat loh nan ka ti a,khatia a tak ngei a i va hmuh kha chuan i rilru a danglam deuh ka beisei a" tiin ka laka beidawn mai a tumloh thu leh chumi avanga ka duhlo chung min tihluih a tumloh thu a sawi anih kha.

Duh ve ngat ila chuan a fel dawn tih ka hre reng,Lalrinkima ai thlawt chuan a laktlak zawk bawk ang,mahse tun tut tut ah chuan ka rilru ka la pe theilo mai a ni.

Midang runluih duh vang leh thinrim vanga inphen nana midang hman te,kawppui neih te hi khawvela ka thil duhloh ber anni a,mahse ka duhloh ber pawh chu ka duhber thin vang bawkin ka bawhchhiat mai angai leh dawn a ang ta hle. Hetiang ringawt a ka awm chuan beiseina eng eng emaw ka nei leh anga,beiseina beidawnthlâk takah a chang leh anga,ka na nawn leh ang tih ka hlauh vang a ni. Chuvangin eng emaw tak chu hmasawnna atan leh ka invenna atan pawh tih chu ka mamawh ve ngei dawn a ni.

Nitei pawhin "A thusawi danah a rilru chu a chiang reng a,țhian ang bakin a enlo che tih hriat reng reng,anih loh vêk pawhin țhian piahlam deuh a alo en ve che a,a sawi ngamlo anih ngat chuan a dawihzep hle ah ka ngai ang,khati khawp khan i zui nasa a,tlang takin sawilo mah la hrethiam a mipa anih angin hma te pawh ala ve tur a ni. Chuvangin,hmalam pan tum rawh,chanloh tur nghah reng ai chuan min nghak tute pan mai hi a finthlak chang a tam ania" tiin mi hrilh dap dap anih kha. Nula senior ni si hian thil hi a hre fû a,ngaihzawng a neih ka hre ngai si lova,nge ni alo tawng fê tawh zawk.

December ni 31 ah chuan zana eitur lei pahin vah harh mai mai a tha tiin Sangtea'n chhuah puia min sawmna chu ka lo pawm a. Ka belchiang telh telh a rintlak na pawh ka hmuh belh telh telh ni mai hian ka hria,a bula ka awm chuan ka nui tam a,thil nilo pui pui ngaihtuah na hun ka nei tlem a a tha phian.


Bazarah chuan kan inkhalh chhuak ve a,mi an tam reuh phian a,eitur leh mamawh eng-ilo kan lei a,a tam zawk chu a man a pe zel a,pek ka tum lahin 'zanah ka lo ei ve i phalloh phah ang' fiamthu titak deuh hian a ti mai a,hnial ngaihna a vâng thin si a.
Bazar tâwt deuh laia kan innêk deuh têlh têlh lai chuan ka kutah nghet zet mai hian a rawn hûm thut a,a chêtdan teh thut chu mak ka tih em vangin a chêp a chêpin ka han en chho deuh hâ a,ani lah chuan engmah hrelo ang maiin hmalam ringawt en a,ka kut dahsawn ka tum chu a aia nget lehzual chuan a hûm leh a,chutah ngaihdan nih vakloh hmel hian nui deuh tho siin ka mitah tak mi rawn en a,ka kut chu laklêt ka tum tawh biklo.


Țanpui ka ngaih lai leh ka mamawh hun apiangin sawisel lovin ka bulah a awm reng a,a laka ka rilru puthmang hrereng chungin ka kiangah min hnêm tur tal pawhin a awm reng a,ka inpin danna te hi țhiatin amah hnaih tum ve tawh ila tiin ka ngaihtuah ta zawk a. A kut ka han hûm ngheh tak sauh sauh ah chuan a lawm hmel vur vur lutuk a,a khi deuh reng mai. Lalrinkima'n Ginmuanlala atih lai ka mitthla ah a lo lang a tuna a awmdan,a hlim vanga a khi deuh reng en hi chuan anih duh hmel reuh lutuk a,ka nuichhuak hak a,zawhna mitmeng deuh hian min en a "Ginmuanlal" ka tih chuan ka biangah a rawn piai vak a,kan nui dun hak hak a.


Kan chauh deuh hnu phei chuan infiam deuh titih in kan kal a,kawng zau laiah pawh kawng chêp deuh a kan kal ang mai khan kan han kal sîksawi kual vel a,min hmutu te chuan mawl min han tih hmel mai mai khawp a. Keini lah nuam kan ti nasa mai si,kan nui vak vak a,ani pawh a nuih aza ve hle ni tur a ni.
Lalrinkima nilo mipa bula ka nuih hnem ber leh thinlung taka a der ni hauh lova ka nuih hmasak ber a ni ang. Engah nge maw ani nen chuan ka khaikhin reng mai le aw,buaithlak.

Bazar piah deuhah chuan thil eina dawr hi a awm a,bazar bula awm e tilo chuan a chhung chu a reh in a fai hen reuh a.
"Keima'n hei chu ei man ka pe ve tawh ang aw,kan ei țeuh dawn nia" ka tih chuan
"Chutia i pek dawn te chuan patling ei zât zet kan ei anga nimai lawm" nuih vur vur pah chuan a ti a. A hlim a ni tih hi zawh rual lohvin a hriat a ni.

Kutdawh kan kalpelh apiang mai chu tlemte te in pawisa a pe phei zel a,kan thil leiho lah chu dawnhniam chu sawiloh a man ai tovin kan lei ang tih hlauhawm khawpin, a zuartute nen an inbe țha a,ka lo nui ringawt thin.
Dawr nghaktute lah chuan "i bialnu kha a thâ alo na palh ang,a aia to chuan leilo mai rawh" fiamthu titak deuh hian anlo chhaih a,ani lâi deuh bawk si nen chuan "ka bialnu chu a fel alawm" nuih pût pût pahin alo ti mai a,chu chu midang lâwm alo ni lehzel bawk nen,vawiin zet chu pumna vek khawpin kan nui anih hi.

Heti khawp hian keimah vang mai mai hian a hlim dawn ani tih lo hre ngat ila chu a lakah ka lo fel hma deuh tur ania.

Kan ril a țam tawh bawk a,eitur chu tamdeuh kan chah a,ala lum vet vet bawk nen,a rimtui bawk si,ei țeuh kan tum hi a ni ringawt mai.

Thil kan eilai pawh chuan kan fiamthu chu ala kaltluang a,eitur te chuan kan infiam leh ang bawrh bawrh a,ka inhawng deuh tih a hriat hnu phei chuan mi a han ngaihsak leh mai mai khawp a,ka soup te chu mi han chhemdaih sak ngei a,mi dawrah eitur kan inbarh lo chauh.

"I kamsirah eng emaw a kai" tih leh rawn hrûk a rual nghal a,ka thil ei alo berh deuh chu niin a rûk chuan ka zak hle a,mahse zak angin ka lang duh bik teuhlo.
"Nangpawh" tih pahin Souce chu a kutah ka va tat a,
"Nula nghaltak chu inih ve hi" tih pahin a kut ka souce tahna chuan mi rawn tah a tum ve lehchhâwng a,chutia intah kan lo tum buailai chuan

"Ooopps,Rin enteh hei tute nge ka hmuh hi,in inngaizawng chiang in awmdan atang khan phat tum miah suh u. Ka sawi kha maw Rin,i awihlo vel a" Lisa chuan a rawn ti ham ham a.
Hemi te pahnih hi khawi atanga lo lang ve teh hlawl nge maw annih thin ni,kan boruak nuam tur an tichhe zo vek dawn alawm.

Souce intah tuma kan lo pharbuai lai a ni bawk si nen,țhu chiah silo ding ni silo hian ka kan țhutnaah chuan ka awm a,
Lisa rawn kalpui Lalrinkima ka ve en chu thinrim hmel deuh hian mi lo melh kur a,a ve leh ngawt ngawt chuan a,kawm pawh kawm hman lohvin a vâk a,tunah mipa dang ka bazar pui a hmu a,a thinrim hmel leh em em a.


Nidang ang chu nise Sangtea a thik vangah ka ngai ngei ang,mahse a nilo tih ka chiang tawh mai si. Hei ngei hi anih hi Sangtea'n "Hun hian ala rawn țhîng zel ang che nga,'khami zanah khan ka va kal lova' ila ti mai ang" alo tih ni. Khami zan khan a rilru chiang takin ka va hriaa,ka paltlang ngam kha ka va lâwm leh hnuhnawh tak em. Sangtea chu fakin awm rawh se.

"Nuam inti hle mai maw" ner deuh sak pahin Lalrinkima chuan a rawn ti a.
"Nih ve hi,nuam tilo ila kan lo țhu tûm bûr ang chu" ngeiawm lek lek a ka tih chuan,nichina thinrim hmel te kha chu a tider emaw tih mai turin a vawi lehkhatah abo lehnghal vek nia.

Ka lu a min rawn nam bu lâwp pah chuan
"Nghal viau suh,nula,mipa bazar pui ngam a chhuak ve âwt âwt tawh si,khawimaw kan lo țhu ve" tih pah chuan ka bulah chuan a rawn inhnawh ang sawt sawt a.

A awmdan mak thei lutuk chu lei dan hian hrilhfiah theih pawh va ni suh.

Sangtea ka va en chu nuamlo tih hmel lek lek hian min lo en a,ka nuih sak takah chuan a thaw deuh huai aniang e,a khâwr deuh țûț tawhlo. A âwm ve tho,Rinkima laka ka awmdan hrechiang em em tu kha ani ve miau a.

Lisa chu a ri deuh phawr phawr a,engtin tin emaw hian mi a rawn perh leh zeuh zeuh thin,an pahnih chuan thil an ei a,kan kalpui pawh ni hawtlo hian an țawng vel chu veng pahin kan nghak a ni ringawt,a sir ve ve ah an țhu si,an tho duh bawk si lo. An han ei muang mai mai bawk si.

"Sangte,bialnu i nei ta bawk sia,kan bulah pawh i awm peih vak tawh lovang a,bakah tunlai chu bula mipa te charbeh thiam deuh an awm thin sia" mei nei lek lek chuan a rawn ti a,a thusawi duh dan chu mak ka ti hle mai. Ama nihna a rawn sawi angah ka ngai hmiah.

A sawidan atang lah chuan keimah lo chu mi a tih chhan dawn dêr si lova,kan bula mite pahnih mipa ve ve anni bawk si.
Tu mipa mah hi ka la chârbet ngailo,chutiang tur pawhin mipa ka hnaih ngai heklo. Lalrinkima hi ani mai a,tunah Sangte ani leh a,ani lah vawiin hi țhian ni chiahlo anga ka en țanna a ni chauh sia.
Nge ni,kan Rinkhawlova hian eng emaw a sawi zawk,chutiang chu ani ngai si lova.

"Nangmahni awmdan a zir ani mai lawm,min la kawm duh te chuan ka awm reng anga,min kawm ve peih tâk loh leh tu emaw bulah chuan ka inchârbet anga ni mai lawm" thawven hmel fahran chuan Sangtea chuan a ti a. A chhân dan lah chu ka duhtawk lutuk a,ka han piai nawk nawk dawn emaw ni.

"Nia,ka uang mai mai anih kha. Ti kha chuan țhianpa te riak turin a sawm tawhlo ang a,i awm tawh bawk a" a tih chuan mak ka ti lutuk chu ka thîrkut kenlai chu ka thlauh bawl thei.
Ala tla ring em em zui.

A mak ka ti lutuk chu thinrim nachang pawh ka hre mai lo,Lalrinkima chu ka va melh hrâwk a,engah mah ngailoh hmel fahran hian a thil eilai chu alo la ei mual mual a,chutianga Lisa-i'n thilmak leh țûllo pui pui a rawn sawi pawh chuan khap pawh a tum chuanglo emaw ni. A hmeichhe hruai chu khap ve tur ania.

Hetiang te chu ka zahawmna an tibawrhbâng ah ka ngai hmiah.

"Lalrinkima hi vawikhat pawh riak turin ka la sawm chhin ngailo hrim hrim a,ka sawm ngai bawklo ang. I hriatchianloh chuan engmah sawi tawh suh" tih hmak pahin ka fian ken chu dawhkanah ka dah chawrh a.

Lalrinkima pawh hi ka haw lutuk,engtin nge ngaihdan diklo nei thei tura a bialnu bulah kan riahdun chungchang a sawichhuah theih. Engmah sawifiah tumlo tih hriat lutuk a awm ngaia a awm ngul te chuan ka thin a tirim lehzual.

Sangtea pawh chuan mak ati tih ka hre reng,kan inpawh dan chu a hre vek a mah se kan len hnu leh a laka rilru dang ka put hnu hian kan riahdun a ring biklo ani ngei ang. A ngawi reng a,Lisa zawhna pawh chu chhân a tum hmelloh.

Lisa chu a zak leh deuh emaw ni " I sawm ka ti ringawt a,in riahdun thu pawh ka sawiloh tawp kha" ati ta vel a.

Keilah Lalrinkima ngei tawh sa nen,ka thinrim kaltluang lutuk chuan
"Nge ni a,in nuawmchen laiin sawiloh loh inlo sawichhuak zâwk" ka ti chiah chu
"LALNUNNEM" Lalrinkima chuan a rawn ti țhawt a,a aia ring chuan
"Eng nge,Lalrinkhawlo" ka ti veleh țhat a.
Dawr a chawl ve ho pawh chuan kan thawm chu mak an ti deuh nge an rawn hawi deuh țhap a,kan țhutna hi a kil deuh hlek mai pawh a.

Thinrim hmel fê chuan mi melh khui khui a,keilah ka dikna ah chuan ka tlawm bik dawnlo ka ti tlat bawk si nen a aia rum chuan kan melh ve tehreng a nih kha.

"Hmeichhe kam tam hlawm lutuk" hriat theih chang chang hian phun hluk pahin a ti a.

"In ho emai,lo riakdun bawrh bawrh ang hmiang,țhian inpawh lutuk mai annia. Anni te chu tuma thîk rualloh alawm annih" Sangtea chuan kan boruak rawn thlak tum deuh chuan a ti a.

A hnuah pawh chuan kan ngâwi țhap a,kan inmelh hrek hrek ringawt.
Lisa pawh chu a zak ve deuh emaw tih tur hian hnuailam a bih ngar a,mahse a teuhlo mai ala duhtawklo nasa aniang
"Nunnem,inî hi inî tak tak ani em?" A rawn tichhuak phawng a,
"Lisa,ngâwi tawh rawh. Sawiloh loh hi sawi suh" Lalrinkima chuan a rawn ti hmuk a.

"A engah nge maw anih lovang le,i ngaihtuah mak mai mai e a,țawng tur i hriatloh viau chuan sawlai kutdawh saw pawisa va dawhpui rawh" ka tih chuan a thinrim hmel ngang mai.
Chutiang inzawh âwm pawh ni hawtlo chuan.
Râk tam peih lutuk mai.

Hmanzan kan va kal a,a tûka Lalrinkima rawn thinrim titih chhan pawh kha a fuihpawrh tih hriat reng reng.
He mihring pawh hi bialnu te fuihpawrh hian a awm thei a,alo mak theih ngei mai. A nupui neih hunah phei chuan Lal țhutthleng ala siamsak lovang tih pawh a sawi theihloh hi.

"Aa,ka sawi vel mai mai maw le,in inanglo em a" ala ti țalh a,chhân en ah pawh ka en tawh lo.

Lalrinkima chuan "i puar a i hahdam tawh lutuk anih kha" tih pahin pawisa an pe a,a kaichhuak dawr dawr a.

"Lokal rawh,haw ve tawh ila,kan tlai lutuk palh ang. Zanah menrei kan tum si" Sangtea'n a tih chuan ka lo aw ve mai a.

Ka haw kawngah te chuan ka fuh hleithei tawhlo. Kal lama kan hlim vei nen,min rawn tibuai vek,khami te pahnih khan.
An thusawi lah kha a mak hlawm si.
Vawikhat pawh Lalrinkima hi rawn riah a tum leh pawn ka phal tawh lovang,khatianga a hmeichhe awmpuite bula min lo sawi reng reng ni.


Zanah chuan sikri ai pahin Nitei puakzo kan chu ka ei mai mai a,Nitei chu țhenawmah a kal zawk anih hmel.
Sangtea pawh chu dar 9 vel chuan a rawn thleng chhawm ve mai a.
Nitei rawn haw hnu chuan an titi dun ve bawrh bawrh a. Nitei hian sawilang lo mah se Sangtea hi min duhpui ani tih ka hrereng.

Eitur eng eng emaw kan siam a,khawvawt nen,kan thil in nen,kan zung deuh chhen mai.
Film te kan en a,Sangtea chuan Nitei awm vang emaw ni min rawn hnaih țha ngam vak lova. Heihi a mize lawmawm deuh pakhat a ni. Pakhata ve kha chu a duh aiin boruak a ngam mah mah emaw tih turin a awm thin a.

Sangtea hi chu hetia kan inkawm hnu hian an țhianho bulah hian a tâl tam vak tawh lova.
Ka bula a awmlai rau rau hi chuan eng rim dang mah a pu ngailo,a sim nghal hmak thei lovang tih ka hria mah se keimah vanga a tumna hrim hrim pawh hi ka chelh ve tlatna tur chhan țha tak a tling a ni.

Hlim deuh chuan kan awm,tutu emaw te pawhin an thilsual tihna hmuna kalpui turah min rawn sâwm tawh lova a zia viau,mahse tunah hian kha hmun bawkah khan em ni an awm ang,engtiang chiahin nge nuam an chen leh tawh ang,tih chuan rilru a luah ve reng mai.


Kum a thar țep tihah chuan pawnlamah an thil halmawi te en turin kan chhuak ve a,a vawt sia insin hlûn chungin keipawh chu ka chhuak a.

Chutia kumthar thlamuang deuh a kan lo nghah lai chuan,buaina bawk chuan min rawn nangchîng leh a.

Sangtea phone chu a rawn ri ral ral a,a lachhuak chu wallpaper ah ka thlalak a hmang tih ka zu hmu hman,alo hria ani ngei ang,min melhin a nui vur vur a. Min kuahna bân chu lathla in phone chu a pickup a,a țhiante a bia anih hmel a țawng dan ațang chuan
"In buai viau ami,a chhungte dang te pawh" te ati nuaih in ka hria.

Ka lama alo phei chuan rilru hah hmel deuh hian min en a
"Tunge a,i rilru va hah hmel ve?" Ka tih chuan
"Rinkima'n an inchhungah buaina a siam deuh anih hmel,țhianten min rawn hrilh a" a tih chuan ka lo hlauthawng leh hman hle,mahse a liamtham vak nang tiin hlauthawng vaklo ni âwm tak chuan
"A bialnu nen an awmdun lo mi,a țhiante pawh an awm chuan țhelh se ni mai lawm" ka tih chuan
"Aa,Lisa chu a awm thova mahse Lisa hi a unaunu hrawn ani tih ila hrelo ani maithei,keimah ang bawkin" a rawn tih chuan ka hawi phâwk hle.


"Eng a,ava mak awm ve,unau hrawn a nei tih chu ka hriaa mahse Lisa hi ani tih ka hre hleinem" mak ti deuh a ka tih chuan
"Chu ai pawh a buaina lian chu ala awm a" hlauhthawn hmel deuh a tih leh chuan,hei aia thumak a awm tawh dawn mi,ka rilru chuan ka lo ti hmanhmawh
"Anih enge a dang chu sawi vat teh,min ti hlauthawng ania" ka awm mai mai thei tawhlo,ka za cheng tawh
"Rinkima pa,ka sawi awmzia chu anu pasal,Lisa pa,Rinkima nen an intibuai a,Rinkina'n kut a thlâk a,a hnek ani âwm e" muang ban raih a a tih chuan ka khûpte hi a thlep hnawk ni mai hian ka hria.
☆☆☆☆☆



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)