LUNA ILENA CHAPTER - 34

Episode kal lai dah luhna

Moderator: writers

Lalnunmawii manuntei
Posts: 109
Joined: November 26th, 2020, 10:46 pm

LUNA ILENA CHAPTER - 34

Unread post by Lalnunmawii manuntei » October 15th, 2021, 6:05 pm

LUNA ILENA


BY


Lalnunmawii Manuntei



A ṭawngkam chhuak te chuan min ti na veng veng mai, chutih rualin a hla play mawlh chuan min ti na leh zual.



" Ngaihlai vulmawite min dawn ve che maw? Lenna tlang a dang tawnlohni a rei ta; mahse, kei chuan e, ka bang lo nang ngaih, a zual zel ṭhin e ka suihlung len hi" Ruati liankhum hla a ngaithla tih ka hre thei, ka hriat tura a play emaw ni zawk le? Ka hming te chu a lang ta deuh deuh leh nghal.




Min hmangaih zia chu sawi kher ngai loin ka hria, ka va hmangaih ve hluah hluah lo nain ka duh hle tih zawng ka chiang.




"Mawite, khawnge i awm? Lo let leh rawh, ka nu leh pa pawh ka tuithlar ṭhak mai ang, i tello chuan zankhat lek pawh hi a rei lutuk" mipa a zawnga in la pa ve tawk tak maiin ṭap chunga a tih meuh chuan kei hmeichhe rilru no tak hi ka nem leh duai hman tawh.



" Ka nutei te bulah Shillong ah ka awm, min lo hruai rawh, i tello chuan ka awm thei bik lo, ka hlimna ber i nia lawm" tih mai ka duh laiin a nu mitmeng thip tak a min melhna kha ka mitthlaah a lo lang nghal zat.



" Chutiangin ti suh, i nu leh pa te khan an hmangaih lutuk che lawm, kei aia let tam takin an hmangaih che tih ka hria, i tana ṭha lo tur chu an duh bik tawp nang, thu awih tak khan awm zawk rawh" a ruk a na ti tak chung chuan ka ti a, eng teh ualah a ngai lo.




" Ka hmangaih zia che an hre vek a , ti chung hian an pawm thei lo che nia, kei chuan maw, nang ka nei lo che a nih chuan ka dam chhungin tu dang mah ka nei thei tawhin ka ring lo, nangmah ah hian ka nun zawng zawng hi a bet vek tawh" ka hmui hupin a hriat hlau tak chuan ka ṭap a.



Eng ang pawn keini inhmangaih mahila nu leh pa ten an rem tih loh chung chunga kan innei lui a nih ngat chuan kan tluang ngai lo ang, kan nu leh pa te hi kan lei Pathian hmuhtheihte an ni a, an kutah malsawmna leh anchhia dah an ni a, chu anchhia chu ka chungah a tlak hi ka rem ti lo.




Ka mittui tla chu duh loin ka hru tawk a , aw thian kharh kharhin , " ka phu ve lo che, kei aia phu tu che tam tak an awm, i nu lungdum ngei chu nei mawlh rawh, chutin fanau duhawm tak tak ka hrin sak ve tak loh che pawh a hrinsak ngei ang che, min lo be tawh suh ang che" tih leh off ka rual nghal.




Kan inbiak sek chuan kan inkarah hmangaih na lo piang tawh, a par vul hmain a kungah an lo chhawk tak a kha a lo chawr no leh lo ang tih lah hriat ni hek lo.



Duh huam huam a ka lan chuan anu ten min ngainep ngei dawn a, na tak chung pawn ka induh khum ve a ngai a ni.




Thla eng riai thlirin thawk ka la vang vang a , " ka thei em em ang, kan intawn hma pawh khan a telloin hlim takin ka nun ka lo hmang tawh ṭhin a, ani lo lan tak vangin engvang ngawtin nge ka theih loh ang, ka pa fanu ka nih hi ka thei tur a ni" ka hriat tawk leh chuan ka phun chhuak hlawl mai.




Exam chawlh rei lo te chu infuihthar nan hun ka hmang ve a, kha mi zan bak kha chu a phone call ka chhang ngai lo, ka luhlul ber emaw ka in tia kei aiin a lo luhlul daih mai, ka chhan duh loh pawn beidawng loin a lo call tlut tlut zel, chutih rualin min lo hmangaih hle a ni tih ka hriat phah.




Phone khawih tam ve ṭhin tak khan khawih chakna em em ka nei vak tawh lem lo, ka ṭhiante leh ka chhungte tih loh chu ka chhang ngai lo.




Ni a rei loin a kal liam puat puat a , ka lunglen khawhar rukna te chu a reh fai vek e ka tihna ni loin a zia awm deuh mai chauh a ni, ka ṭhiante lahin ka lunglen ti zual thei tur angin ṭawng an nei ngai lo, mi hlim thei tak Mawitei kha a lo kir leh tawh.




Ni khat chu tihtur em em ka nei lo bawk nen ka message ho chu ka check deuh mai mai a, mesaage tharhlam tak mai number save loh aṭanga ka dawn chu ka open vat a , ka rin loh deuh mai ka hmu hlawl mai.




" Mi luhlulnu engtin nge i ngam zawk a? Samuela nen in inbia tih ka hre vek tawh a nia, nangmah hruai tur che in engtin nge i tih ngam zawk? An duh loh zia che nen lamin i hre vek tawh a ni lawm ni, i â nge mi i ang zan lo zawk? Tenawm lutuk mai, uak thui " ka chhiar zo chu ka sa nghal phat mai.




Tunge a nih hrilh kher ngai loin ka hre nghal, U Hlute-i mifel leh rilru ṭha tak nia ka lo hriat ṭhin ṭawngkam mai mai chu ka ngawihsan mai mai theiin ka ring lo. Chutih rualin "ka chhang let a nih chuan anmahni ang mai chauh ka ni dawn sia" ngawih ka chuh leh ta zawk.




Min zawng tur a a lo kal hlauh chuan ka chhe vek a ni mai, ka induh khumna te khan awm zia reng a lo nei lo , vawikhat a call ka pick khan a lunglenna ka kaitho a, min hruai tur thlengin ka tur ta zawk a ni.



" Mate, Samuela min zawng turin a lo kal em ni? Ka awmna hi a hria em?" Thinphu det det chuan ka ti a , lehlama mi lah chuan , " lo kal e, i awmna pawh a hre vek, a ṭhianpa in ti khan a lo hrilh ni awm tak a ni" a lo ti ve bawk, a va hahthlak ṭhin tak e aw.




Chungte chu min lo hrilh vat tur a lawm, min hruai haw dawn lo mahse, Aizawl lamah ka awm angai ang, chuti lo zawng kan buai zo vek ang" ka ti ta ringawt .



"A va buaithlak e aw, i tih dan dan a ni mai, i thlen hunah min lo be leh ang che" tiin kan inbiakna kan ti tawp.



Ka pi leh pu te ka hrilh chuan Nu Thangi te in lam pan turin min hrilh a, ka nu phei chuan min duh zia leh hmangaih zia hrechiang bertu a nia, kan inhmuh leh hi a duhin ka ring lo.




Ka che reng reng chu ka hmanhmawh tawh hle, kan innangching ang tih mawlh chu ka hlau, ani ang mipa luhlul ve tak chuan min awmchilh leh duh ngeiin nia ka rin ni.



Puanin ka lu ka tuam a , mask ka vuah bawk nen min hre kherin ka ring lo, mahse, kan motor hi chhuah a tumlo nge ka thlen tirh aṭang a la ding char char mai.



" Ka pu, kan chhuak dawn tawh em?" Ka rilru a hmanhmawh em vang chuan ka zawt ta tawp, " pakhatin kan la kim lo a, damdawi in aṭang a chhuak tur te an ni sia rei lo te i nghak leh hram ang u" hmanhmawh eng ang mahila hei bak chhuanna tur dang hlawl a awm tawh si lo, ka hre tlai lutuk chu pawi ka ti hle.



Dar karkhat dawn kan din hnu chuan kan chhuak ve thei hram.



Thui pawh kan tlan hma chuan Samuela car nen kan insulpel chiah, min hmu ve lo nain hrehawm ka ti viau thi, ka taksa chu he motorah hian awm mahse ka thinlung chu ka tlanliam tak na lamah daih khan a awm thung.




Motor tih din mai ka duh rum rum tawh a; mahse, ka ti ding a nih chuan a hnu lawk a inchhir leh tur zawk ka nih vangin ka ṭhulh leh nghal der.




Zinkawng hahthlak tak ata hi pen bo daih ka duh, chutih rualin pakhat lah hi a inpeih ve der si lo, amahah rilru ka pe tawh lo ti engang mahila pe lo thei loin min siam lawi si, ka nun hi ka ning hluah hluah tawh.




Ka lo muhil a ni ngei ang, ka harh leh pawh chuan motorah bawk ka la awm, ka taksa te chu a na ṭhum a, ka ke a mu chuah chuah bawk, zunram thiarin kan ding tih loh chu kan tlan char char.




Khaw kar kawng hi hla tham ve tak a ni a, hrisel ṭha vak lo tan chuan a peihawm tehchiam lo. Kei pawh ka rilru mai niloin ka taksa thleng hian a chak tawh lo, buaina pakhat a kiang a pakhat dang in min tlakbuak nghal zel chu nia, mite aia ka sual bikna lah ka hre der lo, eng hremna nge min la pek leh dawn , chu hun lo thlen hun chu ka nghak tawp mai.




Chawl lo a tlan kan tlan char char takah chuan Aizawl khawchhung pawh kan lut fel der mai, zan a ni bawk nen Nu Thangi fapa in min lo hruai dawn a , ka ding khur hlak hlak tawh.



Rin ai takin a rei phian mai, ka nu chu awm se chuan, " ka nghah nan ah che kum khat a vei hman a lawm" a ti leh ngeiin ka ring, christmast a hnai tawh bawk nen ka chhungte ka ngai zual hle, a bik takin Duattea .



Khawi hmunah pawh kal ila min ngai em em zel a , nikhatah vawi thum tal min be ngei ngei zel, ka nu aiin ka awm tam zawk bawk a , min ngaina ber bawk.



U Lfa a lo thlen chuan muangchang loin kan in zui haw nghal a , Aizawl khawpui eng phe tuar chu kal ngai lo tan chuan hmuhnawm thlir tak a tlir theih a ni, kal ve fo ṭhin mahila mit la lo lek a thlir ka ṭhulh thei lo.



"Samuela chu a lo kal tih chiang takin i hria em?" Ka bula miin a tih chuan ṭawngka a chhang ta mai lo chuan ka bu zeuh a.



"Engtin nge a ngam zawk le? Anu leh pa ten kha ti khawp a mualpho khan an siam che nia, i rilru lamlet tum miah suh ang che" a tih leh chuan, ka tum loh vang a lawm chawp chilh deuha ka lo kal" thimrim rilru deuh chuan ka ti a, eng rilru chiah hi nge maw an put hlawm hrep ni.



" Hre rawh, hmelah ni se mi aia chhe zawk zawk i ni lo, khawpui nula te aia thlangtu che lah an in zam pat bawk, khawsak harsa tia sawi tur in ni lo bawk, an tih dan che hi chu a inhmuhsit thlak lutuk, i nuṭa ka nih angin ka hrilh che nih chu, nakumah kan bulah awm rawh aw, mipa ani aia ṭha i hmu em em ang, nuthlawi tiin an lo sel che nih pawn hnualsuat nan hmang lo la, chapo si loin induh tawk em em rawh" dam diaiin a lo ti a, ngaihzawng neih leh lam tak hi chu ngaihtuah pawh ka duh lo.




A thu sawi te chu ṭha viau mahse ka um e liam vel mai mai.




"Hman a i lo zin lai a star deuh tu che khan a la duh reng che nia, hmelchhe viau mahse nuamsa takin i awm thei ang , hmelṭha hian eitur min pe lo a, hmelchhia pawh hian eitur min pe thei tho a nia" a ṭhianpa chu a fak mawi thei hle mai, hmelchhe vuak hlum tur ti ta se vuak hlum hmasak ber tura ni.





"Awiii , khatiang hmel bumboh lutuk kha lo sawi pui ve ziah lo teh, ka duh chi a ni lo, an hausakna te kha ka tan engmah lo mai chauh a ni, mihring chuan duh zawngte, ngainat zawngte kan nei vek, i duh chuan Mamuani tan sawipui law law la" ka ti let ve sak.



" Duh se chuan an inneih daih tawh ang, nangmah kher a duh si che a, mawl mawl lo khan nei tawp rawh, anni chuan an lo lawm hle ang che" Samuela te a hmer tel kher chuan min ti thinrim hle.




U Lfa nen hi chuan kan inmil thei ṭhak lo, sual leh sual pawh hi a lo inkawm ngeih theih tak tak loh anih hi.



In kan thlen chuan kam khat mahin a ṭawng leh tawh lo, a nau neih tir tur a ka tih chiah chu a awki pawh a dang hlawk mai a lawm, nuthlawi ka nih vang mai a, ka duh zawng pawh ni hlei lo min neih tir ve ngawt a tum a, a ti sual chiang hle mai, kei ang mize mak deuh nei bulah a lo sawi kher kher chu a inchhir ve ngawt ang.



Nu Thangi te chhungkua chuan min lo lawm khawp a,chawlh hmanga zin han ni ngat ilang chuan a nuam leh zual tur.




"U Mawite, mikhua rooma riah ai chuan ka roomah lo riak ve daih rawh aw"Mamuani'n a lo ti sar sar a, ka tum dan reng pawh a ni.

( Dt 13 zan khan ka lo dah a, mistake ka neih vangin ka delete vek a , dah leh mai ka tum chu ka net a chhe leh ta thut sia, nizanah dah leh ka tum lahin ka net a thi leh bawk sia, in lo zawng nasa tih ka hria, ka inthiam loh lutuk, min ngai dam vek ru aw, a thleng nawn tawh lo ang)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)