STORM AND SILENCE : CHAPTER - 42

Episode kal lai dah luhna

Moderator: writers

MoonPie
Posts: 60
Joined: August 17th, 2021, 10:12 am

STORM AND SILENCE : CHAPTER - 42

Unread post by MoonPie » October 15th, 2021, 9:56 pm

CHAPTER-42




"Eng nge kan neih hi…" Chiang manglo hian a ti a. "Ka…."




Mr. Ambrose chuan a khupin a kapah a do chawrh a, ip chawihin a silai kenlai a thlauh nghal.




Mr. Ambrose chuan nawr sawnin  street light eng manglo hnuaiah min dintir a, zu dawr leh tawlailir inkarah chiah chiah vel kan awm ka ring. Tinge tawlailirah chuan min hruaithlen a tum tlat le. Heta awma vawkte te tana beilet tur kan nia sin. 




Mr. Ambrose leh hla vakloa mipa vial ngawng ngawng chu ka en tawn sek a. 




"Khapa kha a englo…a  engloah ah i pet…" A petna kha eng nge a hming pawh ka hrelo, mahse tih tur diktak a ti a ni. 




"Aw, pet e." Ngaipawimawhlo  zetin a ti a. 




"Mahse…mipa zahawm tak i ni sia…"




"Aw, a dik, Mr. Linton."




"Um…nih chu."




"Tlan tura ka tih hunah che." Mr. Ambrose chuan a ti a. "I tlan tur a ni." Hawi kual leh zawkin, "Khat…hnih….thum…tlan rawh!"




Tawlailir lam panin kan phit chhuak ta a, ka bul velah chuan mipa rualin insualin an inthat mek. 




Tawlailir chu kan hnaih tawh hle…mahse  kan thleng tep tihah kan hmaah mipa pakhat a rawn ding hlawl. Tun tum chu Mr. Ambrose ka chet khalh dawn tih rilru puin ka tlan khalh a, ka ke khaiin chupa kapah chuan pet ka tum a, vanduaithlak takin a lo indang hman. 




Karim-a tawng ri hluk ka hre nghal. "Ki naraka! Eng nge maw i tih le, ifrit?"




"Oh, nang elaw? Ka tih…"




Ka sawi zawh hmain min nam sawn a, a ngunhnam a phawi rual deuh thawin a vai fua a, ka hmaiah engemaw a rawn per chhawk. 




Ava mak ve. Ruah a sur em ni? 




Silai a rik leh rual chuan a eng pup a, thil sur chu a awm ngei a, mahse ruah a nilo, tui sen vek a sur a ni. Vawkte eng ho chu an tial mawi dawn hle mai! Tha lutuk! 




"Hmanhmawhin Sahib!" Karim chu a au titih a, a silai la chhuak ve tawhin a sei tha phian lehnghal. "Kal rawh u! An rawn kal belh zel ania!"




"Anih chuan hmachhawn ila a ni mai alawm!" Boruaka ka kut lek kang chungin ka hum a. "Ka rilru a thianghlim avangin an ni ai let sawmin ka chak zawk a ni!"







Tuemawin min manbetin min hnuk sawn a. 




"Min thlah rawh!" Chhuah tumin ka tal ve tang tang. 




"I â ta em ni?" Mr. Ambrose'n ka beng bulah ti hlarin, "Ngawi la damin kan chhuak thei mahna!"




Kan hnung lamah chuan Karim chu tawng hriatlohin a rak nawk nawk a, ani  tal vawkteho venghim tura a awm chu ka ngaih ka ti tha deuh. 




Tawlailir kan thleng tep tih chuan sakawr hnung lam atang an boss ber kha a rawn zuang chhuak nawlh mai. A silai chuan Mr. Ambrose-a awm zawn a tin ran a. 




"Tunge maw i nih hrep le?" Ti chhur chhurin, "Hengho hi khawi atanga lokal nge an nih?" A mitmengah chuan hlauhna a awm. A mite hi an tlem bik hauhlo, mahse Warren-a hoten inbeih an hnehsawh bik em a ni. Ka va han chhuang hlawm tak em! 







"I pu chuan tunge ka nih chiah a hrilh lo che a nih dawn hi." Mr. Ambrose-a aw chang fak avanga chupa a khawng veklo chu mak ka ti zawk. 




Chupa chuan a silai chu a load a, "I hote hi tawp turin ti rawh! Chuti lo chu i awmah hian silaimu ka thun a ni mai! Tunah!"







Mr. Ambrose chuan a dar a chhin ak a. "A tha e, signal ka'n pe ang e."




A ban pharin a vai zauh a, gang leader chu a lo nui suk. 




Chutah a hnunga sakawr chuan a ke hmalamin a rawn tlawh chawrh a. Lungtea khat kawngah chuan a leng lawp mai.A lu atang thil sen a luang nghal ngiai ngiai bawk. 




"I duh ang signal niloin." Mr. Ambrose chuan leia chechang thei tawhloa let reng bulah chuan a ti a. 




Tawlailirah chuan min hlang vut a, sakawr chu a nghawngah beng thek thekin, "I ti tha lutuk!" A ti sup. A nui tlata hriatna ka nei, mahse thil theihloh tluk a ni. 




"Nang kha! Hetah!" Tiin tuemaw a au a. 




Misual sawisa zo chiah mipa pakhat chu rawn tlan pheiin tawlailir khalhnaah chuan a thu a. 




Kan tlan chhuah rualin Mr. Ambrose a rawn zuang lut ve nghal , chak taka kan tlan takah chuan hnunglam thawm pawh a reh riai riai. 




Bengchheng a awm taklohah chuan hriatchhuah ka nei. 




"Silaia inkahnaah ka awm zo chiah." Thatchhe zetin ka ti sup. Ka meng hleithei tawhlo. 




"I sawi dik." Ka bula mi chuan a ti thum bul a. Ngawi datin a tawng chhunzawm leh a. "Kan hnathawh hlauhawm zia ka sawi kha i hrethiam tawh em ang chu. I hna atanga i bang duh a nih pawhin ka hrethiam lutuk. I banna tur lehkha vel chu naktuk zingah kalo buaipui fel vek ang, mahse sign tura ilo kal…."




"Silaia inkahnaah ka awm zo chiah." Ka ti leh a, a thilsawi engmah ka thluakah a lut lo.




"Aw, i sawi tawh alawm. Banna  lehkha chu…"




"Silaia inkahna!…. Ava nuam tak!" Ka nui ker ker a. 




Ka bula mi bawk chuan, "Eng tin maw?" A ti hmuk. 




"A nuam! Nuam tak a ni! Hlimna vawrtawp tih pawhin a sawi theih ang chu..!" Ka nui leh a. "Silai nei ve ila a nuam lehzual tur ania, han kal pawp pawp ila. Vawkteho chuan min chhuang ngawt ang!"




Ka bula mi chu a nakah ka va nghawk zeuh a. Eng  nge a hming kha? Tunge a nih pawh ka hrechhuak zo tawhlo. 




Thimthamah chuan a rum nghut a, chu aw chu hre tur ka nilo em ni? A hming tal hrechhuak thei ila….a hming…. 




Ni tak! Mr. Ambrose! Silai inkahna min hmachhawn tir tu! Mr. Ambrose, vawkte engho venghim tura beitu! Romantic lutuk…. 







Ka nui ri leh ker ker a. 




"Ka hero." Tiin a lamah ka awn hnai a. "Min chhanhimtu. Mahse ka ngaihtuah chian hian, chhanhim ka duhlo. Khata awma inbeihnaa tel kha ka duh."







"Chhanhim i ngaihna chhan tak." A ti ro halh a. Tawlailir min panpui laia ka dara a vawnna chu ala awm reng tih ka hre chhuak a. Tinge? Chuan tinge min vawn ngheh tak em em?




"Siamthat theih i nilo a nih hi, Mr. Linton." Ti lehin, "Tinge ti tura ka tih ang che hi i tih mai thin loh? Tinge i nuna a vawikhatnan thil finthlak ti a i tlan mai loh?"




Ka meng rum a. "Mipaho kha an tlanloh kha. An inbei a nih kha."




"Kha kha an hna a nia lawm. Bei tura hlawh pek an ni! nang chu nungdam leh him taka awm hi i hna a ni!."




"Mi dawihzep ka ni hleinem! Mipa dang ang bawkin ka hman tlak, bakah vawkteho khan min mamawh alawm!"







"Eng a? Eng vawkte maw?"




Thil ho te hi a hrethiamlo tlat zel. Engtin nge vawkte eng lamthiamho a hriatloh theih? Mipa mak lutuk! 




Mahse he mipa ngeiawm deuh ngheng riala awm hi a nuam tlat si. Engtin emaw inherin a awm zawnah ka lu ka nghat a. A  nghetin a lum veng veng mai, mahse a ni thei dawn em ni? Mr. Ambrose a ni si a. Mipa mize nelawm loh tak hian tinge min tih thlamuan em em? 







"Vawkteho kha an that i ring em?…" Maimitchhing riai riaiin ka ti a. Ka mut a chhuak lutuk….a nuam bawk si… 




"An tha ang." Tiin ka dara mi kuahna chu a hmer nghet sauh a. "An tha em em ang."







Ka muthilh hmaa ka hriat hnuhnung ber chu ka hmai..kut lum ther therin a khawih chu a ni…
………. 
"Mr. Linton?"




"Hmm?"




"Mr. Linton? Tho rawh, kan luh a ngai."




"Timaw?" Ka la meng duh chuanglo.




"A chhan chu..ka sawi vang mawle!"




Ka nui a, chu aw chu ka hria. 




"Ila sawi chianglo."




"Ka hnuaia thawk i nih hi, Mr. Linton. Ka thu anga awm tur i ni!"




"Hna ban hun a ni tawh, Sir." Ka ham bai bai a, tawng ringawt pawh hi a hahthlak. Muhil leh daih ila a tha zawk ang, ka mutna hi a nuam si…. 




Ka mutna nuam deuh chu rawn chein min vuan bet a. "I tho lo a nih chuan Mr. Linton, ka pawm chhuak ang che. Tawlailir atanga chhuk kan ngai."




Oh. Mr. Ambrose. Mr. Ambrose maw ka lo delh a? Engtin nge  a thlen theih? Ka delh turin a inpe chu a ni awm silo a. 




"Ka sawi chu i hria em Mr. Linton?  I duh emaw duhlo emaw ,engti kawngzawng pawn kan chhuah a ngai."




Min pawmchhuak mahse pawi tihna ka nei miahlo. Kea kal turin ka zawi lutuk. A nuam phian maithei asin. Mahse chutiang thleng se hmeichhe chaklo mipa pawm ngai mai ka ni dawn. Mipa chu mutnan leh hlawh minpe tu atan duh mahila, min pawm ka phal hun chu zawng ka ni tih ka pawm ni a ni ang. 




A thleng theilo! 




Engtikahmah. 




Meng mang loin Mr. Ambrose chu ka vuan a, ka in nam thu a. 




"Ka coat kha dim rawh Mr. Linton! kum sawm chauha upa a nih hi,ala….."




"…chuan ala tha hle bawk." Ka bu nghut a. "Aw ka hria. I sawi tawh kha. Mimawl  ka ni hleinem."




"I nilo ania nge. Mahse i rui alawm."




"Rui a? Kei maw? Ka ruilo chiang emai!" Thinrim takin tawlailir atang ka chhuk a. Engtin nge maw chutiang tea min puh ngam le? Ka harh fim vek. Finfiahna mita hmutu pawh ka nei. Tawlailir keah chuan invuanin driver bula vawkte chu ka kawk a. "Min rin loh chuan ani saw zawt rawh."




"Kei maw?" Driver chuan amah inkawkin mak a tih hmel hle a. "Aaa sir chutiang sawi…."




"Nang nilo! Vawkte kha!"




"Vawk maw? Eng vawk?"




Driver chu a zam hmel lehzual. Eng nge maw a hriat le? Vawkte eng te chu thil hmuhhmaih mai mai theih a ni hleinem, ni lawm ni? 




"Theihnghilh rawh, Godwin." Mr. Ambrose chu ka sirah rawn dingin an kalthei tih hriattirnan a thle zeuh a, "Tawlailir hi la sawn la, sakawr kha i endik nghal bawk dawn nia."




"Aw, sir… Mahse…midangho kha engtin nge? Va letin ka.."







"A hruaina tur nen Warren a thleng tawh ang. Ka sawi ang chuan ti la, kei leh Mr. Linton chu kanlo han lut ang."




"Aw le, Sir. I thu ang zelin le."




Vawkte leh driver chu an inkhalhchhuak a. Hepa thuneih dan hi chu a bawn a ni. Vawkte pawn hnial hauhloin a thu a zawm zel mai a, a hnuaia thawk chu a ni awm bawk silo. 




"Kal ang" Tiin Mr. Ambrose  chuan hma a hruai a, ka hawichhuak chu Empire House kawtah kanlo awm chu niin. Kan inah niloin tinge hetah min hruai? Eng nge kan tih dawn? 




Mr. Ambrose ka en leh chu mak tak maiin min kalsan miahlo, kawngkhar bulah minlo nghak a, dawhtheilo zetin  a ke a per at at bawk. 




Thil ngaihtuah neuh neuh chung leh thatchhe zetin a  lam chu ka pan a. Ka thlen rualin, "Tinge hetah?" Ka ti nghal. "Ka chenna a nihloh hi. A chiang viau lo ami?" Ka inngaihtuah tha leh a. "A ni zawk nge?"




Engmah hi ka chiang ngam tawhlo. 




"Aih, ni lo. Mahse hetah intihfai phawt i duh ka ring. Thisen kai nuaih kawr nena haw i duh a nihloh chuan."




"Eng  a?"




Ka thuamhnaw ka en chu , a senin alo rang nuaih. Thisen an nihloh chuan tomato ngaina deuh thiltih a ni ngei ang. 




"Awi karei!" Ka nui ker ker . "Ava nalh chiang!"




"Nalh  maw?" Mr. Ambrose chu rawn pen hnaiin, "I thawmhnawa thisen kai nuaih chu nalh iti a maw? I nalh tih zawng a dangdai hle mai, Mr. Linton."




"Aw, ka lawm e, Sir." Tiin ka kun a, ka tlu tlep. Kut pahnih chak tah zetin min vuanbetin min din thattir leh a. 




"Mahse..i nutein i nalh tih ang hi a tihve ka ring lo."




Ka hmui hnuai ka pet a. A sawi dik ka ring. Ka nutein hian tunlai fashion hi a hre thlawt lo. 




"Mahse a hmel awmdan tur ka hmu chak…" Tiin ka nui a. " A hmuhn.."




"Aw, a hmuhnawm ang. Mahse tihloh a that zawk ka ring."







"Aw! A tha e! Boruak tichhe thiam lutuk mai."




"Minlo zui rawh, Mr. Linton." Tiin a iptea chahbi bawr phawrhin kawngkhar chu a hawng a, a kawngkhar hawng ri chu thlarau au thawm te pawh a ang alawm le,zan a ni tawh bawk si. Thlarau  chu an lo awm miallo maw tiin ka hawikual a, kawtthler lehlama Alexander the Great,a sakawr chunga chuanga mit minlo siai chauh hmuh ka nei. 




"Mangtha le Alexander! Persia kha minlo hnehsak dawn nia!" Tia auin ka ban ka vai lauh lauh a. Mr. Ambrose chuan kawngkhar lamah min nawr nghal. 




"Heyyy! Min nawr kher kha a ngailo aw. Awmdan mawi ka lantir mai a nih kha!" Min vawnna atang ka talchhuak a. 




"I  ngaihruatna lakah. Mi muhil lai i tiharh nual bawk anga. Bakah, kan piah lawkah East  India Company a awm tih i hrelo em ni?"




Ka chal ka tichuar nung a. Chu thil chuan pawimawhna a nei tih ka hria. Mahse a chhan ka hrechhuak zo hauhlo. 







"Aih hrelo." Ka nui leh a, nuih hi a nuam riau mai a nih chu. "Tak takah, ka hria alawm, ka pawisa lo mai chauh a ni. Alexander the Great khan India ram thenkhat a hneh a ni lawm ni? Sawtiang company mai mai a hlau teuhlo!"




"Mr. Linton?"




"Aw, Sir."




"I luh a ngai."




"Aw Sir. Timaw Sir?"




Min vuan lehin min nawr lut a, ka talchhuak hman talo. Hall chhung thim leh ruak huaiah kan lut a.







"Tinge kan kal daih?" Tiin din ka tum ve ngar ngar a, mahse chhuat nal lutukah ka pheikhawkte chu an tawlh zel tho. "Alexander the Great nen kan inbe laklawh asin."




Mr. Ambrose chuan ka thusawi hria ang pawhin a awmlo. Hetiangin Emperor lakah  mawilo takin a awm ngawt theilo. 




"Kan let angai. Pangngai tak pawn ka mangtha hman hleinem."




"Kan let dawnlo. Kan chhoh angai, thut i mamawh."




"Timaw?"




"I ruih vangin. Mr. Lin…"




"Ka ruilo! Vawkte engho zawt rawh!"




A ngawi dat a. 




"Anih Alexander the Great nen kan inngaih vaklo ti mai ang. Peh hel hram ka duh." 

"Oh!" Chu zet zawng ka beng a verh zar mai. "Tinge?"




A ngawi leh vang vang a.




"Ka ui ngainat ber vawikhat a pet tawh a."




"Tak tak maw, Sir?"




Hall tawp kan thleng tawh a, engemaw kil nei a inrem thluah mai. Eng nge a hming kha? 







"Aw tak tak e, Mr. Linton. A pet dimlo hle bawk."




Kailawn! Ni dawn tak! Mr. Ambrose hian ka rui a ti vel a maw? Kailawn pawh ka hre chhuak thei alawm le! Ka ruihloh zia kan hmuhtir ang e! 




Ka pen tur chiah chu minlo vuan ding a. 




"Khatah nilo Mr. Linton, kha chu inhnuai panna a nih kha. Ka office  ah kan kal dawn a, chho zawnga kan kal a ngai."




A sawi dik viauin ka hria. 




"I fing hle mai Sir! Ka ngaihtuah pha reng reng hleinem!"




"Ni chiah e."




Mak tak maiin ka hmaah chuan kailawn dang alo awm reng chu niin,kan chho a. Mahse ka ngaihtuahnaah thildang a awm leh tawh. 




"Ui i vulh a maw?"




Min chhan a hreh tih ka hria. Mahse min chhang ta tho a. "Pahnih" A ti hmuk. 




"Mahse ui chu an to a ni lawm ni, Sir?" Tiin a nakah ka nghawk zeuh a, "Ka hriat dan phei chuan to tak an ni. Tangkaina neilo thilah chuan tinge pawisa i sen a?"




"An tangkai alawm. Ka pawi sawite an seh thin."




"Oh"




Ka banah min manbet leh a. "Ding rawh! Kal chhoh tum tawh suh. Kailawn a awm tawhlo!"




"Oh ni maw? Ka hre miahlo."




"Aw, tunah chuan hallway ah kan kal ang, hei, helai hallway ah hian, i hmu em? I hahdam vat theih nan."




"Hahdam maw? Aw, aw….a pawi reng renglo Sir…"




"Hetah mu rawh ka tihna a nilo! Tho rawh! Hallway tawpah sawn ka office a awm a, tah chuan i hahdam thei dawn ka ti alawm!"







Chhuata ka lu ka nghat tur chiah chu min pawt tho a. Chhuatah khan mu hman na ila chu ka thawh leh peih ka ring tawhlo. Ka ruih vang nimiahloin ka mut a chhuak lutuk. 




Min pawh tho chuan min dim ang reng. A office kawngkhar thleng min dawm a, ka dar tawn tawnah vuanin kan inhmachhawn a. 




"Kawngkhar hi ka hawn a ngai a, chumi tur chuan ka thlah che a ngai, Mr. Linton. Nangmaha i din theih i inring em?"




Ka khap fuk fuk a. Tinge maw ka din theih leh theihloh pawh chu a ngaihpawimawh le. Engmahlo mai angin min en thin si a. 




"Diktak chuan." Tiin kawnkhar biangah ka in nemkhalh a, "Ka ke hi a zawi deuh hlek." Puitu tur zawngin ka hui vut a, ka nui nghal sen sen. "Hey Napoleon! Kawngkhar a hawn chhung hi minlo pui lawk teh!"




Chhan engemaw vangin bang nghenga a kuttin kher fai mek kan emperor min puihna chu Mr. Ambrose chuan a duh vaklo ania nge, kawngkhar  chu a hawng thuai thuai a. Ani nen pawh hian inhmuhthiamlohna an nei a ni ngei ang. 




"Kha." Kawngkhar chu nam hawngin Mr. Ambrose chuan min vuan lehnghal a. "Lut la thu teh."




To be cont. 
.. … . . . . . . . 



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)