STAY CHAPTER 6

Episode kal lai dah luhna

Moderator: writers

Krystal Vanchhawng
Posts: 127
Joined: October 5th, 2021, 4:42 pm

STAY CHAPTER 6

Unread post by Krystal Vanchhawng » October 15th, 2021, 11:13 pm

STAY
CHAPTER 6

◇♡◇♡◇♡



Nitei rawn phei pawh chuan ka awmdan chu rawn hmu in Sangtea chu thu awmzia a rawn zâwt nghal vat a. Ani chuan thil awmzia a sawi zung zung a,
"Phone hmanga rawn sawi annia,an hamhaih bawk nen,chuti vak a ni bik nang" tiin Nitei chuan min țawng thlamuan a.
A taka insual hmuh ngailoh chu thuhran, ani berkher alo ni bawk nen,va kal tehreng pawh ni ila,eng teh ual ka va nih pawh ka ring lo.


Hmanhmawh angreng tak chuan Vengthlang lam pan chuan Sangtea bike chuan kan inkhalh thla a,Rinkima te inkawtah pawh chuan mi anlo awm laih laih a.

Kan luh hma chuan thaw ka han la te te a,Sangtea chuan ka kut a rawn chelh pahin
"A tha vek ang" tih pahin a hmer deuh salh a.

An gate kan lut dawn chiah tih chuan U Esi hmanhmawh deuhin alo tlân chhuak a,min rawn hmu chu thaw huai hmel a pu
"Nenem,inlo thleng thei maw,awi,ka rilru hah lutuk a" thaw deuh dêp dêp chung chuan a ti a.
"Tinge an inhauh a,a nasa viau ami?" Ka tih chuan
"I U Rini leh keimah vang vek hi ania,Aizawl a awm lova heta an bula awm chungchang vel ka nu in a sawi a,i U Rini chu i hriat kha,a duhloh pawn a ngâwi mai mai si lova,khami an inkhak vel kha,pa Rama(a nu pasal) chuan ka nu kha alo țan ve sia,Rini kha alo khak ve a,kan buai chho chu a ni deuh mai" a ti a.

U Rini chu U Esi phirpui hi a ni a,U Esi ai hian a piang tlâi hret a. Ani chu hmeichhe lu zo veh vawh kan tih ang hi ani a,a duhloh naah chuan a ngawi mai mai dawnlo nasa mai si,an buai dan hriatpui veklo mah ila,an kalhmang tur âwm ang chu ka man thiam mai.


Inchhungah chuan kan inzui lût a,U Rini bul hnaihah chuan ka va ding vat a,chutah min hmu chiah chu rilru nat hmel em em hian
"Teh,Nenem,ka nu hi ka nu ala ni em pawh ka hre tawh love,an bula chêng turin min sawm a ka duh si lova,an la na leh bawk si. Pasal dang a nei tawh a,keini chu ngaihtuah kan ngailo,ngaihtuah ngai ber Bawiha a awm a,helai hmun a a fahrawn te nen a inchenchilh ka duh reng reng hleinem. Mi an hmusit ve khanglang leh nghal a" insût deuh hlap hlap chung chuan alo ti ve duah a.
U Rini ka hriattirh ata tawh a țawng tam ngai lova,a țah phei chu ka la hmulo lehzual,hetia ka bula a in bunruak mai pawh hi a rilru ana ve hle ni tur a ni.


A hnunga ben thek thek pah chuan ka țhutpui a,han hnem vak ngaihna ka hre bawk si lo,hetiang inchhungkhur boruak buai hi ka vanduai vang nge ka vanneih vang pawh ka hrelo ka la tawng ve em lova,a chhan pawh inhau tur nu leh pa an awmloh miau vang a ni.

Chutah Lalrinkima te chu Lisa nen inchung atangin an rawn chhuk a,an hmel ka hmuh chuan ka thu hriat kha ka hre leh zawk mai. Unau hrawn an ni tih an inhre reng a mahse an la inzui tho sia eng nge maw an awmzia ni.

"A tawk tawh U Mami,inchhung buaina pawnlam mi hriatah sawi vak vak a tha ber lo" a rawn ti anih chu.
Ka sa phat mai,keihi pawnlam mi maw ka lo nih a,chhân tum a ka phar deuh uaih chu U Rini bawk chuan alo hmu aniang
"I zak lawm ni,tunge pawnlam mi i rawn tih a,hetah tumah chutiang an awmlo,zak hle r'u nangni pawh kha,unau hrawn ni siin ka inkawp ê te in ti a. I hmeichhe kawp khawloh lutuk vang anih kha i țhian țhaber pawh pawnlam mi i tih. In khatah te chuan in la khawsa zui ania" alo ti lêt êrh a.

"Mami" beidawn hmel zet chuan U Esi chuan U Rini chu alo khap vat a.

Keipawh chuan a mi rawn tih dan chu ka ngei hle mai.

"Lalnunnemi ka rawn ti ka tih kherloh kha,pawn lamah te pawh mi an awm tam a,hetah ngei pawh Sangtea a awm ve reng hi. Anni hi pawnlam mi chuan anni thei mai alawm" rawn tih leh pah chuan Hmingthansanga chu a melh deuh kur a.

"Chuti hetah hian pawnlam mi kan leng ve si lo,hawh Sangtea haw daih ang,amah vangin kan kumthar boruak pawh a chhe zo dawn" tih pah a Sangtea inthlahrung deuh tak a lo ding chu ka va pawt deuh chawt a.

"Lalnunnem,eng nge thusawi apiang hi i lâk kawih zel a" Lalrinkima'n a rawn tih deuh vak chuan

"Lâk kawihloh chi pawh ania mi,mî,an bialpa te meuh chhungkaw dang buaina chingfel turin a rawn hruai a,khatia lo tih te chu a tha ber hleinem. Nenem,engahmah ngai s'u amah hi a chiang chiahlo zawk anih khi" U Esi zawk chuan alo ti vat a. U Rini thung chuan Lalrinkima te pahnih ding chu thîp fê mai hian alo melh ve thung a.

"Bialpa" zâwi deuh chang deuh si hian Lalrinkima chuan alo ti deuh hluk a.

Keipawh chu ka țawng tawh lo,khawnge maw nu țhapuii te pawh chu an nupa chuan an lo awm reng reng ni,anni an in tibuai an tih vangin hei chen kan kal a.

Chutia kan ngawih țhep țhawp lai chuan kum chu a thar ta ani ngei ang,ring mangkhêng hian halpuah vel chu a rawn puak dur mai a,kei hlauthawng reng reng a awm tih takah ka han phu nasa mai mai khawp a. Ka bula ding Sangtea hnungah chuan ka pakai lo chauh. In hau e ti lo chuan ka awmdan chuan an nuih a tiza tih hriat reng reng nuihza hmel pu deuh chung hian hnuailam an bih ta daih hlawm a.


Kan boruak a țha dawn tawh emaw tih veleh chuan Lisa ker kawr pawh chuan
"Hawh Rin,a ho emai hetia awm ngawt te chu,kan party naah khan lêt leh daih ang" inla no fahran a Lalrinkima melh pah chuan a ti a.

Chu chu kan û i te pahnih chuan an lo tei thei țhaklo chu niin
"Nangnu pawh kha,i zak lâwm ni,kan buaina pawh hi nangmah vang a chhuak hmasa anih hi i hria em,ipa bulah zualko zawt zawt lo la chu heti hian kan awm lovang. Chuta kara Party te lo la tih Party chu ka'n hmuhtir dawn che mi" thinrim fê a U Rini'n tih pah chuan Lisa lam chu ava pan hnai ta rawk rawk mai.

"A țha dawnlo tawp mai" tih pahin Sangtea chu a che vat a mahse U Rini chuan Lisa samah chuan alo kêk hman chu niin,Lisa sam chu a pheng deuh nuaih nen,a inhnawih sen mai bawk si,a țap deuh pûr nen chuan ka nuih a za tlat pek a,ka lo nui chu ani thinrim chuan min lo hmu fuh chêk ani ang chu.

"Nangkha lo nui suh,hmelchhenu. Nangmah vang anih hi i hria em?" tih pah chuan mi rawn pan a tum ta mai,a engah chuan nge maw keimah vang anih ngawt ang le,ka hlau chai si lova,lo thleng phei mawlh teh se,dâwt a Rinkima bula min lo hêk vang leh a țawngtheih lutuk na pawh saw ka ngei tawh sa hrim hrim.

Sangtea'n U Rini ala chelhbet bawk si,Lalrinkima lah chuan a bialnu chu dan pawh a tum chuanglo ka lam pan pah a a rawn ri phei tuar tuar chu a en mawl tawp. A bialpa ber paw'n a chhan chuang lova,a pa awm bawk lova,zilh deuh hlak ila ni mai lawm tih pah chuan mi rawn ban a tum chu a hmaiah tak chuan ka lo hnek siah mai a. Hah,Lalnunnemi hian tunah khan mi ka hnek nia,ava nuihzatthlak em. Nitei chuan hria se engtin tak min ti ang maw.Mahse a nawmloh hranloh kha. Ka kut na ve det chu ka han chhêm deuh hlak a.


Lisa hnar lah chu a thî emaw ni țah deuh pûr pah chuan a hnâr chu a hupbet a,Rinkima bulah inla no fahranin ava țah vei hnâp kha. Nêp lutuk,kei a a awm mai mai eng nge mi rawn khawih a tum teh ei. Hmeichhia chu a hunah nû tur mahse pâ hunah erawh mipa nen insual ngai pawh nise mipa anga awm ve mai tur tih hi ka thupui a ni.

Ka chêt dan chuan awm ve dang te chu a țhâwng tih ka hre mai,Sangtea pawh tiamin. Lalrinkima chauh chuan mak ati lo,ati thei nang. Heng te chu kan naupan deuh laia ama min zirtir vek alawm. Mahni invenna atan ati a,mi thil rûk dan thlengin min hrilh,mahse kha em kha chu hman ala ngai lo ve.


Tumloh deuhin kumhlui kan thlahliam a,tumloh deuh bawkin mi ka hnek ringawt bawk a,kum lo tharah hian mi hnek hmasa ber ka ni hial ang. Tun kum chu a nawm vak hmelloh anih hi,kan kum bul țanna a fuhlo emai.



LALRINKIMA POV


Kan Lalnunkiri rawn chet dan chuan min țhawng reuh hle mai. Lisa natuar alo nuih pawh kha ka hmu reng mahse eng nge thleng en ka chak vangin engtin mah ka ti duhlo anih kha. Lisa thinchhiai pawn alo hmuh hmaihlo nasa sia,mahse a tum angin a awm dawnlo tih ka hriat vangin ka dang lo ani. Lalnunnemi hi a duh te chuan a nun a nêmlo tih ka hre chiang ve em,kan naupan lai pawh a mipa hnar hnek thî ngam ngat kha ania.


Ni e,henu hian min tibuai a ni,ka țhian țhaber ani a,ka lakah hian rilru dang a put ka ring phal ngai lova mahse hman zana an ina ka va lên țum a a Nitei thusawi khan a tichiang a,bakah a hnu khan ka thil theihnghilh lam tuin ka va lêt leh a,a Nitei'n tu emaw bansan tawh tur a a tih pawh kha ka va hre hman. Keimah ka nih ka ring lova,mahse mipa a hnaih awmchhun chu Sangtea leh kei chauh kan ni a,Hmingthansanga lah chu a kawp a phal hmel em em si a,keimah ka ni tih ka hre ta mai.

Keichuan kumkhua in ka țhian ni reng se ka ti a,ințhian țhatna chu inngaihzâwnna ai chuan a tlo in a daih rei zawk nge nge a,a tawp a awm anih pawhin kumkhaw hmelma ah an inchhuah ve lo tal a,ka thlan tur ah chuan Țhian nihna hi ka thlan reng ka ring. A Nitei pawh khan kei min ngaihtuah tawhlo turin a ti anih kha,bakah ka kianga ka ngaihzawng anga a awm chuan natna bak ka pe dawn lova. Keichuan țhian ang bakin ka en thei dawn chuanglo,amah âtchilh a dawlh lo chauh tu Hmingthansanga a awm a,ani kha ka ring ngam a ni.


Mahse,mipa dang hnena hlim tak a awm ka hmuh hi chuan engtin emaw tak hian ka awm thin,ka hriatthiam si loh hian. Keichuan Lisa hi nasa thei ang ber a hnaih a,a tawp a na thei ang ber,nilo na thei ang ber pawh nilo kehsawm vek khawp a kalsan ka tum ber a ni. Ka hun lo paltlang ve tawh ang te pawh kha ma le.
A pa hian kan nufa inkarah hêm a thlâk nasa hle a,buaina a chhuah ka duhloh vangin ka farnu te bulah engmah ka sawi duhlo kha a ni a,mahse kumhlui thlah zan khan engtianga lo buai țan nge annih ka hre lo,Lisa pa hian U Mami kha kuttlak alo tum a,ka va chelhbeh na lamah keimah zawk khan ka hnek phah ta a ni.


Khatia tih kha ka tum a ni hauhlo,mahse an khawloh vangin kan heichen kan tuar tawh chung pawh a,ka farnu pawisawilo ben alo tum kha chu ka insûm thei ta biklo a ni.

A fanu hi engtiangin nge ka tih dawn lo en rawh se,a fanu rangkachak a hauh phalloh,a fanu hlimna anih chuan kei a fahrawn,a mi huat em em pawh min tlawn der thiam anih hi.

Khami ni khan ka nu leh he mihring hi kan inah,ka nu leh pa te khumah ngei nuam anlo chên lai kha ka va hmu anih kha,a tir chuan ka hrethiamlo hle a.

A hnuah ka nu leh pa te an inthen ta rêng bawk a,an sawi dan chuan ka pa ngaihzawng neih vang leh an ințhen lawk loh chhan pawh keini min ngaihtuah bakah hmingchhiat an hlau a,ka pa an sawn hun law law an nghah vang a ni an ti a. Mahse,keihian ka hrechiang em em lawi si.

Ka nu leh he mihring khuma anlo awmdun ka hmuh hnu daih ah ka pa kha chuan ngaihzawng a nei chauh tih kei tluka hrechiang an awmlo,ka la naupan em vangin ka thusawi an awih ka ring lova engmah kha ka sawi lo a.

Ka pa kha chu a rinawmlo ve kher tur a nilo tih ka hria mahse amah ka la țan em em chhan pawh ama thiamloh ber emaw tiin kan lakah pawh a inthlahrung em em a. Kei khan sawi ka duh thin asin,a thiamloh hmasak anih loh zia te,ka farnu te bulah pawh sawi kha ka duh thin.
Mahse,ka nu hi a tuartu ber ang mai a a khawsa kual vel khan tuma'n min ring dawnlo tih min hriattir a.

Heti hian ka pa bulah leh ka farnu te bulah pawh awm duhlo lui ngatin an nupa bulah kher ka awm anih hi,amah tibuai tur leh ka tawrh leh paltlang ang zah tal kha tuar ve turin ka siam dawn a ni.
Ka farnu te pawh hi hrilh ni ngat ila chuan ka nu hi an thlahtlam hmak duh ang,mahse eng nge dang chuang. Ka nu,min hringtu a nihna ala bo chuang lova,a fanu te'n an ensan chuan a tuar zo lo ngei ang a,chu thil ka hmuh chuan ka hlim dawn bik der si lova.


Kei ngei pawh hi min ngaihtuah tih ka hre reng thin. Mahse,eng nge ka sawi kha
"Nu,khawngaihin apa bulah hian ngaihdam dil la,nangma thiamloh hmasak zawk ani tih hrilh la,ințhenlo mai ula. Kan kalbo pawh angailo mai dawn alawm" tiin mittui tla țeuhin naupang tê ni si khan kan inchhung boruak siamthat tumin ka bei ve alawm.

Mahse ani chuan "ngawi mai mai rawh,i û te leh ipa i hrilh chuan ipa nupui tur sual deuh bulah ka hnutchhiah che anga,ka bulah pawh ka hruai lovang che" tih pahin ka mittui min hrúksak chu sawiloh,min hnungchhawn zawngin a kal hmak anih kha.

Naupang mai tan chuan ka thil hmuh leh hmachhawn te khan min delh rit em a,an sawi angin ka nu te bulah chuan ka awm ngei a mah se min ngaihsakloh leh ka mal em vangin țhian thar ka siam a,pâwn ka ngaina a,a tawpah phei chuan mipa naupang feltak kha tlangval sualtak nih ka lo hlawh ta anih hi.

Eng nge awmzia awm,a tirah min ngaihsak lovin a pasal thar nen nuam an chên a,pasal neih hmasak berna ni ang hrimin honeymoon an ti thûl,chumi hmang chuan India ram pawnah an zinchhuak vel a.
Chumi lai chuan kan awmpui leh driver pakhat nen chauh min kalsam daih anih kha.

Ka nun chhiat vek tawh hnu a min hmangaih ber ang mai a a pasal laka ka'n thlavang alo hauh te hian ka thin a tirim a.

He a pasal lah hian ka nu in kan lam a țan pauh leh keini min huat na a nasa leh bawk si.

Lisa hi a tirah ka unaunu hrawn ani tih ka hre hauhlo,ani chuan hrereng chungin min lo zui reng chu niin. Hetia min thlah theih tak miah siloh ah chuan ngaihdan thar ka nei ta a,he an fanu duat sual em em hi na taka ka kalsan hunah chuan nu leh pa thlazar hnuaia awm la mamawh em em naupangte tawrhna te kha an hrethiam ve ngei anga,ramhuai te annih ngawt loh chuan a zawng a zâ in hre veklo mah se tlemte tal chuan an la in hmuchhuak ve ngei ang. A chhan chu ka nu fanu thuhrûk hi a ni reng lo ang tih pawh a sawi theihloh hi,heti khawpa a hmangaih te leh a țan te,a fahrin ngei te aia a duhsak te pawh hian min ti ringhlel zo vek.
Khatiang taka pasal nei reng chung pawha a che duh anih chuan fa thuhrúk alo nei reng lovang tih tu pafâ hriat mah va ni suh.

☆☆☆☆☆☆



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)