FAREWELL by RAMDINI JAHAU (Completed)

Episode nei ho a hlawm a dahkhawmna
Ramdini Jahau
Posts: 57
Joined: April 9th, 2021, 8:00 am

Re: FAREWELL THEN 1-7

Unread post by Ramdini Jahau » December 19th, 2021, 6:16 am

FAREWELL THEN SARIHNA
By Ramdini Jahau
(A tawi turu urhsun lutuk, tukin chu ka harh tlai deuh a, zawmna ka rawn dah mai ang aw)

Zan thum ngawt a liam leh ta.Lucas nen kan la inbe leh miah lo a, min biak a tum lova, biak lah ka tum bik lo. Inthen tawp chu ka ngaihtua a, mahse chu chu ka duh em tih ka hre bawk si lo. Ka unau te ve lah hi thil han hrilh ve ila 'i thuthlukna ang ang kan pawm vek' tiin an sawi ve bawk a, mahse an hmelah chuan nei lo mai tura min duhna a lang chiang viau lawi si a.


Tih tur ka nei lova, nileng lengin computer hmaah ka thu a thawnthu ka chhiar ta vel thin. Hmanlai Pasaltha leh kan mizo history ka chhiar nasa a. Thil tamtak ka hriat belh phah a, UHmingmawi leh Rivunga tih loh inleng ka neih ngai tak loh chhan pawh ka chiang viau mai.


Hmanlai chuan lal fanu te chu nula man to anni a, khawkhat pasaltha pawn an rim ngam mang lo a, khaw tlangval satliah phei chuan an melh ngam tawk thin. Ka ngaihtuah a U Hmingmawia kha alo huaisen hi ka ti ta ngawih ngawih mai.


Mak deuh mai hian mumang ka nei thei reng reng lo va, a nun hmasaah khan ka cheng thei lo tihna a nih chu.


Ka zan mu tur te hian mumang lama chen leh tum zetin a hma ka thil tawn tawh te chu ka ngaihtuah a, hetia ka tih chhan chu mi thiam zawk ten kan mut dawna kan thil ngaihtuah ang hi mumang lamah kan hmu duh e an tih vang a ni. Mahse keimahah erawh awmzia awm lo tak a ni.


"Tunlai hi thawnthu i va buaipui nasa ve" tiin Sangsangi chuan ka story chhiar lai chu min rawn bih pui a, "Nia" ka ti tawi tak.


"Kei chu thawnthu hrim hrim hi ka bih peih lo, ka subject-ah hian duh aia tam ka hria a. Tunlaia an ziah hi ka bih peih meuh lo" a rawn ti a, a coffee chu a dawt ri khawlh.


"E taka! Mizo i la tiraw kha ?" ka ti hliai a. Kalsan pahin, "Aw, a nuam ka ti. Mizo hi lo har deuh mai ania aw" a ti a. Mawimawii room atanga rawn chhuak in,"Keipawh a har ka ti, mizo ni mah ila Mizo-ah hian ka fail teuh ber zel" a rawn ti ve a.


Mawimawii bawk chuan, "Nikhata hun awm zat pawh hi ka hre tawh lo, nau riltam hi ka hre em em a nimai" a rawn ti a. Sangsangi chu nui sak hian, "A har reng asin, keinin eng tawng pawh kan thiam zung zung theih laiin hnamdangin kan tawng an thiam ve hi chu pai chung hian an han tawng bahlah ngei zel a. Mizo te hi kan thluak te hi a lo chak ka ti" a rawn ti a.


"A chak thlawt lo, chak nise kan hnam hi kan changkangin ramdanga lehkha zir leh hnathawk hi an vang viau ang" Mawimawii chuan a rawn ti tan tan reuh a, a ni hi zawng kan pang ber tih takah thu sawi hnial deuh hi chuan a tawng tan tan nghal zel.


Tawng tuma ka ang zuau tawh chu Sangsangi rawn tawng avang chuan ka thulh leh a, Sangsangi chuan "Chak e le, mahni ram leh hnam hmangaih nachang kan hriat tawk lph vang mai mai lawm. Ti hian sawi i la English hi mizoram khaw tin deuh tinah hian kan thiam tlangpui a, English thiam hluar hi changkanna emaw an ti a, mahni tawng hman dik loh aiin Saptawng hman dik loh an inhrilh dik a, mizo te hi keimah ni leh keimah ni hi kan in nek chep a...." a tih lai chuan "Chuchu enge thluak chak leh changkanna in a inzawm a ?" Mawimawii'n a lo ti a. Sangsangi bawk chuan rawn sawi zawm leh in, "English thiam loh chu zahthlakah kan ngai a, kan duh a kan thiam fur mai lawm. Duhnaah chuan thluak chak tak kan ni, hnam dang in kan tawng an rawn thiam ve theihloh laia keinin lo thiam chu! Kan tawng te hi keimahni hian kan ti dazat zo a, English thiam leh thiamloh te hi maw care vak a ngai lo. English hi chu Khawvel awm chhung hi chuan a awm dawn a. Kan tawng erawh tun generation ah pawh hetiang anih chuan generation lo awm leh turah phei chuan Chhurbura'n a an thenawmnu a meiling pek ang bak kha a ni tawh lo ang. Ramdanga hnathawk leh zirna tih lam chu maw, mizo bawk hi kan thiam lo a, mahni ramah tha taka zir ve theih laia phai lama awm kher ti te, 'Mizoramah chuan a awm ve lo a' tih vang ngawt te in hmundang an pan vang vang thin ania. Mahni rama thil awm te ngaihhlut nachang hrelo hlawm hian. Hna chungchangah hi chuan ka ngaihdan a dang deuh, Mizo chu tlawmngaihna kan sawi vung lurh laiin tlawmngaihna nei tak tak kan awm tawh lo a. Kan mizo thufingah chuan thenawmte do aiin khaw sarih do a thlanawm zawk an ti a, mahse tun ang laiah chuan tupawh in er reng reng in an awm a, bakah mizo te hi kan taima vak lo nge in zir chhuak an duh ang tak hna hmu leh si lo te an awm a, lehkhathiam mawl kan tih ang hi kan tam phah. An zir chhuah ang kher hna thawh tum, mahni kut ke a din tum nachang hre reng reng hlawm lo an ni. Sawikhawm a sawi chuan Mizo te hian mahni ram leh hnam hmangaih nachang hria ila, mahni rama thil awm leh kan tawng ngaihhlut nachang hria ila. Hnam pui zawk te kan entawn anih rau rau pawhin a tha zawngin, neih nei mang si lo a intih changkang vur te hi zir lo i la. Khawvel mi ropui tak tak din chhuah dan hria in, hei hi ngaihtuah tel bawk ila hmanlai kan mizo pi leh pu te kha tu ram mah bel lo in an awm a, khatih lai phei kha chuan hmelma leh inrun ala awm a, tunah chuan chutiang zawnga hlauh tur a awm lo lehnghal. Kan ram hi kan hmangaih a, a hlutna kan hriatthiam pauh leh mizo te chu intihchangkan chawp nhai loin mi changkang kan ni mai ang" a rawn ti chhuak dap a. Mawimawi chuan, "U i sawi hnem e, engmah ka hre ber tawh lo" a rawn tih zawm a. Sangsangi nen chuan kan nui dun hak.


"Nupui pasal atan mahni mizo pui ngei neih tur" tiin a hnar a piai sak a. Mawimawi chuan duh lo zet in a hnar a tum dat, "Au Sylvia pawn a neih dawn reng hi" a ti a. Sangsangi chuan min rawn melh deuh ralh.


Fiamthu tak hian, "Ani hi chu kan ram tan a tangkai vak lo a, nei daih rawh se" a ti a. Mawimawi pawh nui hawr hawr in, "Ni e, kei chu kan haw veleh bialpa ka nei ve nga pasal neih daih ka duh. Min duat tu tur tepawh ka mamawh ve tawh a" a rawn ti a. Sangsangi chuan "I va han zaktheilo hawr hawr tak, kum 19 chiah i la nih kha.
Kum 30 vel i nih hunah keimah ngei hian ka neih tir ang che" a ti a, door bell a rawn ri tleng tleng.


"Awi ka ning e, mi thuttui veleh. A Û min va en teh, pizza ka chah a" tiin min rawn en a, "Engtik khan nge i lo chah hman a ?" tiin kawngkhar lam chu ka pan ve mai bawk a.


Kawngkhar ka hawn chuan ka pawisa ken chu ka lek va a, "Kha a kir chu..." tih chiah ka sawi hman. Pizza box keng chunga ka hmaa ding zan chu ka melh a, "Enge i lo tih dawn ?" tih zawng ka sawi.


"Babe ka nupui hual te in a ka kal chu amak em ni? Kawng min lo kian la" a tih zawm a. Tha tak chuan ka kian ve mai bawk a. Kawngkhar chu kharin common room lamah chuan ka phei a, Lucas ka hmuh ve nghal mai loh avang chuan ka nau te chu ka zawt a, ka rooma a chho thuin min chhang a, ka room lam chu ka pan ve nghal.


Khumah chuan a lo mu zangthal duai a, nidang chu nise ka mu thla ve nghal ngei ang. Mahse eng emaw ni hi amah hnaih ka duh lohna a awm tlat a, chu chu enge a nih ka hre bik lo.


"Lucas" tiin ka ko a.


"Babe" a rawn ti ve thung.


"Tho rawh Lucas, eng emaw sawi kan ngai ania" ka tih chuan a rawn thu chhuak a. "Babe i la thinrim em ni? Inneih sawn leh chu i duh lo viau a nih chuan naktukah kan innei nghal ang" a rawn ti a. Kut kuangkuahin ka din ngaiin ka ding reng.


Rawn tho in min rawn pan a, min rawn kuah a tum chu ka lo tawlh hret a, min en vang vang. Min rawn kuah lui ta tho chung chuan, "Ka tihpalh babe, i rilru tur ka lo ngaihtuah ve miah lo a, naktukah inneih chu kan ti dawn nia. A harsa lo ang" a rawn ti a. "Ka duh ber chu...." a tih lai chuan ka thusawi avangin a tawp chawt a, ka dar tawn tawn a hmerin min en a "Engmaw i sawi?" a rawn ti.


"Inneih ka duh lo, neih che ka duh lo" ka ti a, a mitmeng a inthlak hlawk. Ni e, Lucas nei tura ka inngaihtuah apiang hian ka thin hi a thip vawng vawng thin a. Chuan amah hi ka hmangaih tak thin ang khan ka en thei tawh lo. Keimahah hian hriat ngailoh mikhual ang mai in ni acham ni.


"Sylvia, i duh duh sawi suh" a rawn ti ringawt a, a hamhaih hmel viau. Mipa zaidam tak a ni a, engtiang pawn ti mah ila kut min thlak zawnga a chet ka ring lo.


"Kan innei dawn, naktukah!" a ti chang far mai a. Ka dar a hmerna kut chu vawn thlah sak pahin, "Lucas, awm dun tur kan ni lo a ni. Nang leh kei chu thilsiam dang hlak ve ve kan ni" ka ti a. Min en vang vang in, "Ka sawi tawh kha, engmah pawi ka ti lo. Eng ang mi pawh ni la pawi ka ti lo,ka...." a sawi lai chuan "Keiman ka ti lawm, ka nei thei lo che. Ka hman pui ngei lo chu ka nei thei lo" ka ti a. Meng awk awk in, "Mahse ....." A ti fan raih a, hmeichhia ang in a mittui a rawn hnâm a, vun no chi ani bawk nen a mit bul leh a hnar chu a sen nghal tek a. "Min tihder suh" a rawn ti hnawk tuak a. A awmdan chuan amah min khawngaih tir a, min lo hmangaih ve zia ka hriat phah bawk.


Engmah sawi lo chuan ka kuah a, ani pawn nghet zetin min kuah let.


Ka bula mut a duh tlat avangin a rawn riak a, khumah chuan a kut lehlam min kham tirin a ban lehlamin min kuah a, a bawp pakhatin min khan bawk. Ka biangah a rawn fawp leh zeuh thin a, abak erawh engmah ti duh hmel a pu lo.
.
.
.
UHmingmawia nen inkuah rialin kan thu a, UHmingmawia'n ka kut a khal a kei a awmah ka bei hle hle.


Ka thil tawn mek chu ka ngaihtuah buai tawh lo, ka hun tawn mek chu ka hria a, chiang takin ka mumang ramah ka cheng tih ka inhria.


He mang ram hi lo duh lo viau tawh mah ila, he hmun tluka nuam tih hi ka neih ka inring tawh lo.


"Mampui, Rivunga nen chuan in inkarah engmah a awm lo tak tak a maw ?" a rawn ti a. Amah chu en chho ha in, "Rivunga pawh chu enge i sawi chhen, nangmah hian i duh deuh a ni lo maw" tiin ka thu tum hmuk a.


"Titau lo la, ka thlem thiam miah lo che nia" a rawn ti a. "I chhia" ti ngawtin a awmah bawk chuan ka bei leh a, a nui nghawr dat chu ka hre thei.


"Sa leh ral hmaa zam ngai lo kha eng aiah nge Rivunga thu sawi vang mai mai a i awm nawm loh vel a" ka ti a. A kut hrawl leh thap tha zeta ka dara min rawn kuah pah chuan, "Sa leh ral nena tehkhin chi ini hleinem. Rivunga thusawi kha atak ni ngat se zawng, ka nei thei dawn lo che tih a chiang reng a, nang neih theih loh che hi ka hlauh ber ania sin. Ka damchhan ber ka neih loh che chuan khawvel hi ka tan awmzia a awm dawn lo em asin" a rawn ti a. Nui ver ver in ka en a, ani pawn min lo en ve reng.


Min kuah loh zawkna kut chuan ka khabe a rawn vuan a, min rawn hnaih sawt sawtin ka hmuiah a rawn fawp ta vawng vawng a.



Link:
BBcode:
HTML:
Hide post links
Show post links

Ramdini Jahau
Posts: 57
Joined: April 9th, 2021, 8:00 am

Unread post by Ramdini Jahau » December 21st, 2021, 5:53 am

FAREWELL THEN RIATNA LAST




UHmingmawia nen chuan hlim deuhin kan awm a, thil hi a kal felfai tluang purh nimai hian ka hria. Ka chanchin hmasa ka hriat tak avang chuan ka tan pawh awm a nuam deuh a, ka nu leh ka pa pawh chu ka zah thar viau bawk.



UHmingmawia te an rawn len chuan thian pakhat hi an rawn nei thin a, Veng mawng lama awm Pu Kapa fapa Romawia a ni awm e. UHmingmawia sawi danin "an chhungkaw harsat avang hian tu amah hian kawm enah hian an en lova, zawlbuk vela a nungchang vel ka en in han hruai harh ka duh deuh a" a ti a. Ti tha ka lo ti leh pek viau tawh.


Rin ai takin a tawng duh a, a fiamthu thawhah kan nui tlawrh tlawrh reng mai.


Len hawn ar a rawn khuang a, UHmingmawia chu a tho nghal thurh. Midang pawh chu an tho tual tual hlawm a, mangtha hlawmin luhka ler thleng chu ka va thlah a, UHmingmawia chu a ding deuh a, a thiante chuan an kalsan a. "Ar hi a khuang hma thei riauin ka hria. Khaw chhung mi ar zawng zawng hi ka thil mai dawn em maw ni." A ti nui nui a, a darah ka lo ben sak awk.


"I mawl thei si, kal tawh rawh" ka ti a. "A nih mangtha mutttui aw" a ti a, kaiten a rah thlak a ka zawn chiaha a din chiah chuan "Tui deuhin i mu dawn nia" tiin a biangah chuan ka fawp zeuh a. Helaiah hian nula dang ten an tlangvalte biangah an fawp ve em ka hre lo a, mahse kei chuan nuam ka ti.


Min rawn en in a nui sak a, min mangtha nawn leh in a kal ta a. Keipawh inah ka lut a, ka mu chu a ni zui nghal mai.


Ka mut hmun atang chuan ka pa leh a upa te ti ti chu ka ngaithla kar a, a tawngdan leh an thu vawrh dan velah chuan hlauhawm a hnai niin ka hria a, mahse ka mut a chhuah tawh em avangin engmah ka hre fumfe chuang lo.


A tukah chuan hma takah ka tho a, ka nau rawn haw hnuah kan unau chuan tui chawiin kan kal a. Tui kan thal mawlh mawlh lai chuan "Boruak nawm zia hi" ka ti chhuak hliai a. "Enga a, fur khaw chhia a intan dawn a boruak nuam lo tih" ka nau chuan a rawn ti hluk a. Kei lah chuan ngaihtuah lek lo hian, "Kan khawvel nena tehkhin chuan eng hun boruak pawh hi a thiang kak vek mai. Keipawh heta ka awm atang hian ka hmeltha sawt sawt in ka hria" ka ti a. "Thu ni lo pui pui hi i sawi a" a rawn ti leh hluk a. Ka thusawi a hrethiam dawnlo lutuk hi ka hriatchhuah leh si vang chuan ka nuih ta tawp.


Ka pa leh a upa te an thukhawm leh thap tawh a, kei erawh ka lung te hi a leng deuh reuh. Lal fanu ka nih vang nge ka awl thiam ve hrim hrim pawh ka hre lo, ka hman thei em em a. A ninawm thin zawk.


Thiannu Zampui hi a va reh ve mawle ti neuh neuh chungin an inlam chu ka pan a, an in ka thlen chuan a pa leh pa dang thenkhat chu an leikapui a thuin an lo ti ti a, be ta lem lo chuan inchhungah chuan ka lut a, Zampui chuan khumpui lama a nu damlo chu a lo buaipui niin. Min hmuh chuan min be nghal sawr sawr a, ka kal chhan te min zawh chuan "I reh em a, ka lungleng in ka rawn pan tawp che. Kha i nu a lo damlo a ni maw ?" Ka tih zawm a, "Nia, hei khawsik a nei a. Mahse a zia ve tawh lutuk e" a ti a. Thut hmun rem pah chuan "Chuvang anih dawn chu i reh ka tih em em. Ka nu Pui lo dam vat vat rawh aw" ka han ti ve ngial bawk a.


Zampui chuan ka bula rawn thutthlak pah chuan, "Awi hrilh tur che ka ngah tawh lutuk ringawt." a ti a. "Sawi la" ka tih chuan, "Awi ka zak deuh sia" a rawn tih leh chuan "Nang ni, UThangpuia nen i insawirem chiang mai" ka tih chuan, "Nia ka zak deuh reuh e a" a rawn ti a.


"Enge awmzia, vengthlang nuthlawi nen khan i sawi si a?" Ka tih chuan, "Awi kha kha e, ka lo hre sual a. UThangpuia maw ka tih kha UHmingmawia zawk a lo nia" a rawn tih chuan, "Enga!?" ka lo ti vak a. "Awi ka duh lo, ka tum loh puiin ka sawi chhuak" a ti a.


"Zami ka lakah hian enge zep i neih a ?" ka tih leh chuan, "Aa englo ania, Vengthlang nuthlawi fanu Biangtaii kha UHmingmawia hian a ngaihmelh tlat e an tia" a tih chuan ka thin hi a thip deuh zawk a. "I ti tak tak em ni ?" ka tih chuan, "Aw an sawi dan chu a nia lawm. An sawi zel dan phei chuan Biangtaii hian nau a keng lo ang tih pawh hriat a ni lo an tih kha" a rawn ti a.


"Awi thiani, ka inthiamlo emai. Hre vek turah leh in inkar tawp tawh turah ka ngai cheu a" a ti a. Tawng mai nachang ka hre lo, nau ken leh ken loh pawh hriat tawh loh chu engtianga thui nge an lo kal tawh ang. Ka hmangaih che kha min ti ngei si a, hetiang hian a ti thei dawn em ni?


"Inthiamlo duh suh, i thiamloh a ni hleinem. Hre tawh tur zawk ka nia. Ka pawn chhuah loh a leiah ka hre har ta zawk a. Anih ka haw phawt ang aw, ka tihtur neih ka hrechhuak thut mai" tiin ka ding hluai a, ka chhuak zui nghal.


Ka tah chu a chhuak tun mai a, UHmingmawia chu hmuha engkim zawh chian ka duh. Khawlaia naupang ka hmuh chu ko in ka tir a, UHmingmawia chu a awm leh awm loh pawh ka hre chuang lo, mahse naupang pahnih chu zawlbuk leh an in lamah ka tir a, "Pasaltha Hmingmawia hnenah 'lal fanu in lungdawh mualah rawn kal rawh a ti' inti dawn nia" ka ti a. Keipawn lungdawh mual lam chu ka pan ve nghal.


Lung inphah remah chuan ka thu ngawi kar a, Zampui thusawi te kha awi tur a ni nge awi loh tur tih ka ngaihtuah a, UHmingmawia'n midang a nei tur ka'n mitthla chuan ka tap titih mai a.


Ka lam pana hmanhmawh an reng taka rawn pen hlawk hlawk thawm thu ka hria a, ka hnunglam atang chuan, "Mahni in helaiah hian vawikhatmah kal tawh suh. A himlo ti i hria em." A rawn ti a, ka ngawi kar.


Min rawn pan hnai lehin ka hmaah a rawn ding a, ka mittui tla pura ka lo awm chu "Tinge a ?" a rawn ti a. Melh rawm rawm in "Tenawmpa" tih bak sawi ka nei lo.


"Inchungah thil tha lo a thleng em ni?" a tih chuan, "Ka chunga i tih ang baka tha lo hi chu a thleng lo ang. Engtin nge i theih zawk a" tiin ka melh ngawt ngawt a. Ka mittui a dir thla zung zung bawk. Hetiang ka mumang ram ami mai mai hi ka hmangaih chu sawiloh ka vei zui ka inring miah lo. Mahse ka hmangaihin ka vei zui em em bawk si a.


"Tap suh, ka thlem thiam lo che ania" tiin min rawn kuah a tum a, a awm a lo chum sak dawt dawt pahin, "Min kuah suh mi tenawmpa. Vengthlang nuthlawi fanu Biangtaii i khawihna hnu ngat phei kha chuan min khawih hlek suh" ka ti tawn tawn a.


"Eng thu nge maw i sawi le?" a rawn ti hap. La tap pur chung chuan, "Hre lo der suh. Tu pawh hian Biangtaii chuan i nau a ken an ring vek. Engvangin nge dawt min hrilh a, ka hmangaih che min ti a, dawt vek. Fahrah ka nih vang hian min iai ta a nih hi. Min hrilh tha la chuan tha takin ka thlah mai tur che nia" ka ti a.


"Thu awmze nei lo sawi sawi suh" tiin min rawn pawm bet a, min pawm ngheh em avang chuan ka tal thei lo. "Dawheh pa, tenawm pa" ka la ti hram a. Ani chu a nui kiai sak duh chauh.


"Inbengdai la tha deuhin kan sawi dawn nia" a ti a. Ka rilru na leh mittui tla a ngai pawimawh lo lutuk chuan min ti na zual. Ka tap chu ka insum a, "Engpawh sawi la, kan inkar hi chu a tawp tawh tho tho" ka tih chuan "Ka thusawi hi ngaithla ve phawt la mawle aw" a tih chuan ka ngawi kar a. A insawifiah ve viau ka rin nen "Biangtaii i tih chu ka hre hauh lo a, chuan nangmah chauh hi ka duh che a, ka hmangaih ber bawk che" a ti a. Chu mai mai chuan ka lung a ti dam zo teuh lo.


"Min hmangaih em tih chu in ngaihtuah tha leh rawh" ka ti a, ka kalsan nal nal. Min au lova, min umzui hek lo. Tah insum zetin kan in lam chu ka pan a, hmanhmawh taka kan lam pana Thangpuia rawn tlan chu ka en a, ka hnung mai chu en in, "Lawmpa, lal in hmanhmawh takin a ko che" a ti a, ka hnungah a kal tih reng ka hre lo. A thianla in lal kohna a dawng tih thu a sawi pawh chuan ka hnungah a la kal zel tho a, ka kal chak zual sauh.


In ka thlen chuan ka nu chu ka kuah tawp a, ka tap khur nghal char char a, ka nu chuan thil hre sa ang mai hian min lo hnem mawlh mawlh a. A hnu lawka UHmingmawia rawn lut ve chu ka pa chuan a upa te chu a chhuah tir vek a. Kan chhungkua leh UHmingmawia chiah chu kan awm.


Khumpui lamah ka nu chuan min kuah phei a, "Mate tlang thu thang vang mai mai in an tap ngai lo" a ti a. Tah ka insum nasat pauh leh ka tah a chhuak ting nimai hian ka hria.


Ka pa chuan, "Hei Hmingmawi thu thang hi i hre ve anga" a tih chuan "Lalpa eng thu thang nge i sawi hi ka hre hauh lo" UHmingmawia chuan a rawn ti a.


"Biangtaii'n i nau a ken thu an sawi i hre lo va maw ?" a ti a, ka rilruah 'Uhmingmawia fa chu a pai tih a chiang ta em ni ?' tiin ka inzawt nghal.


UHmingmawia chuan ka pa melh ran chung chuan, "A va mak awm ve Lalpa. Kei chuan Mampui chauh hi ka duh in ka hmangaih a, amah lo hmeichhe dang ka melh ngai reng reng loh laia ka fa lo pai daih chu a mak lo maw ?" a ti let a. Ka pa chu a thaw deuh hrawk.


"Keipawh he thu ka hriat hian min thawng a, ka fanu nen inzui reng anga ka ngaih vang cheu a ni....." a tih lai chuan "Lalpa min ngaidam rawh, tihsual kan nei a ni" tiin Biangtaii te nufa chu an rawn thingthi lut a.


"Lalpa, ka fanu hian tu nau mah a keng love. Min ngaidam mawlh teh" a ti a. Ka pa chuan thu tam sawi vak lo in, "Tu nau mah a ken siloh chuan engvanga Pasaltha hming hliau tir nge innih ?" a ti a.


"Lalpa, Pasaltha Hmingmawia hi ka makpa atan ka duh em em a. Ka ina a rawn chuan kai tak zeuh zeuhah chuan ka fanu hi a duh ve niin ka hria a. Ka fanu hi a fa pai anga hrilh a neih tir mai ka tum a ni" a tih chuan UHmingmawia chuan a puan hmawr pawh ka dek hawt si lo hian engtin nge ka fa apai intih chu ka rin theih in ring em em em ni ?" A ti a. An nufa chuan an ngawi dak. Kei erawh lawm em em. Thu dik vek emaw ka ti a, UHmingmawia chu ka chan taah ka ngai hmiah mai.


Ka pa chuan, "Kal phawt teh u, in chungchang hi chu nakinah kan la ngaihtuah tha leh ang" a ti a. An nufa chuan an inkai chhuak dawr dawr.


Ka pa chuan UHmingmawia melh chung chuan, "Pasaltha kan sawi lai kha kan sawi zo lo ania. Ka fanu chu i hmangaih takzet amaw ?" a han ti a. Ka lo ip zawk


"Lalpa ka sawi tawh ang khan, Mampui chauh hi ka hmangaih a, ani chauh hi ka thinlung luah tu a ni. Nupui a neih ngei pawh ka duh" a ti a. Ka nau chu rawn luh pahin, "Tih tah mai mai tura neih chu kan phal dawn hlek lo ania" a rawn ti a. UHmingmawia chuan thutak zetin, "Lalpa, in fanu hi ka hmangaih takzet a. A tah hi ka phal ngai lovang. Neih ngei ka duh a, lalpa a man tur ka la intuak ngah loh avangin min lo nghak hret ula. Khawngaihin khawi lal fapa hnenah mah min hlan sak lo turin ka dil cheu a ni" a rawn ti a. Ka pa chu a vei nuih suk.


"Chutia ka fanu hi i hmangaih takzet a nih chuan neih che ka phal e, man tam tak ka duh hran lova, ka fanu hi hlim taka i siam chuan a tawk mai" a ti a. A tahnui tih tih tawh.


Eng eng emaw sawiin a ka pa chuan a hming talin palai rawn tir rawh a ti a, UHmingmawia pawh a chhuak nui vur vur.


UHmingmawia'n palai chu a rawn tir a, kan inneih ni tur chu a hma thei ang bera ruatin ni thum chiahin an dan a, UHmingmawia nena kan innei tur chu ka hlim viau a, ka lo ti lang leh viau thin. Ka rawngbawl lai te hian ka nui ka nui a, ka nau ina a awm hian "Tui deuhin bawl rawh aw ka u, i rawngbawl kan ei khat tawh dawn si" tiin min fiam nan tak hian a hmang a. Ka ngei thei tak tak.


Ka pa hnenah fiamthu ti tak hian, "Ka pa, ka nau hian nupui neih a duh tawh. Hmanniah pawh 'ka chak ve e' tiin ka bulah a sawi ania" ka tih chuan ka pa chuan, "Vengchhak lama a nula nge Hmar lam venga a nula zawk kha a duh a" a rawn ti ve a. Kan chhungkua chuan kan nui dar dar.


UHmingmawia nen a kan inneihni chu a lo thleng ta, ka zam a, ka lawm bawk a. Hmanlaia an inneih hi thawnthuah bak ka la hriat loh avangin ka zam ru hle a, serh leh sang eng eng emaw awm tura ka ngaih vang a ni.


Mahse chutiang engmah awm lem lo chuan kan inneih a, inneih zan hi chu hre ve lo law law ru!


Tichuan hun te a lo kal zel a, nau ka pai ta. UHmingmawia chuan min duat em em a, pangchang na hun pawh ka nei lo zawk. Hmanlai hian hetiang tak hian hmeichhe te hi mipa te hian an lo duat thiam hi ka ring hauh lo. Hmanlai kha chuan hmeichhe dinhmun hniam tih kha ka hriat dan a ni miau a.


Ka nau pawn min rawn ngaihtuah hle a, ei chak zawng ka neih leh neih loh te min rawn zawt ve thin. Mahse UHmingmawia'n ka eichak apiang min hawn sak zel thin avang hian engmah hi ka tlachham lo.


Tukkhat ka zing tho tur chu ka pum chu a rawn na vak a, nau ka nei dawn tih ka inhre nghal. Ka nu chu hmanhmawh zetin a tlanchhuak a, nau chhar thiam nen an rawn let leh.


Chawhma chhung ngawt ka vei hnuah mipa ka hring chhuak a, ka chau takzet. UHmingmawia leh a nu leh pa chuan lawmthu min hrilh mawlh mawlh a, UHmingmawia naute pawm chu a inhmeh hlu hlu viau mai.


Naute chu ka hming leh UHmingmawia hming kawpin Hmingmuana tiin kan sa a. A pa, a pi leh midang tupawh mai chuan an duh a, thla em pawh tla tling lo in a hmel hi a fel fai reuh a. Mahse a chang chuan naute thawmhnaw han awm ve thin lo chu ka phun hluk hluk thin a. Tumah lah chuan awmzia an hre lem chuang ngai lo.


UHmingmawia tak phei chuan ka rin ai daihin a lawm a, awi dur dur pah hian "Anu duhloh pa fapa" a ti kher zel. Ramsa hming leh an hram nan hrang hrang chu sawiin an in awi mu thin a. Ka chhungte nau duh lutuk vang chuan ka hahdam phah phian.


Thlahnih a liam leh meuh chuan ka naute pawh chu a changkang tawh hle a, nuih a duhin a tap ngai mang lova. Mahni pawh hian a awm tlei em em zel.


Nitin hian engtikah nge he mumang duhawm zet atang hian ka harh ang tiin ka inngaihtuah thin a, pathian hnenah tawngtaia helai hmuna min dab hlen mai tura dil hi ka duh. Mahse chu chu thil theih a ni ngawt si lo. Ka kalsan hunah engtin nge an awm ang tiin ka pasal leh ka fapa hmel chu ka thlir leh ngawih ngawih thin.


Tukkhat chu pawn lamah hian thawm ri nuai nuai a, UHmingmawia chu a va dak chhuak a. A silai leh chem chu rawn ban in, "Lo awm ru, rawn chhuak hauh suh ang cheu" a ti a. A chhuak nghal vut.


Kawngkhar atang chuan pawn lam chu ka en a, lal in lam pana mi kal hi ka hmu a, mahse chung ho chu mak ti zetin ka en. A chhan chu sipai thuamin an inthuam tlat a tin ni. An mahni en chian chu duh viau mah ila pawn chhuak lo tura min tih avang chuan kan fapa chu nghet zeta pawmin pawn lam chu ka en reng a. Nakinah chuan inbei thawm hi ka hre ta a, silai ri thuai thuai leh mihring te thawt thawt thawm ka hre ta. Khaw mipui te chu an rak ruai ruai a.


Ring mangkhengin eng emaw hi a rawn ri thuai a, ka fapa chu a phu zuk a, a zawi nghal ngiai a. Ka en a, ka hnute pek lai pawh chu ahne tawh lo. Hlauthawng tak chuan, "Bawihte hne ta che" ka ti a. Ka sawi deuh hnu pawh chuan a rawn meng thei lo. A keah chuan ka ben sak a, a tap miah lo. Pawn lamah lah chuan na tuar te thawm te leh mihring inhrosa kuk kuk thawm te ka hria a, a hnar zawnah ka kut chu ka dah a, ka fapa chu a thaw reng reng lo.


Ka fapa chu pawmin mangang zetin ka tlan chhuak a. Sipai form ha ka hmuh te chu vai sipai anni a, mi ngo an awm zeuh ka hmu bawk. Lal mual lam chu ka pan a, Lal Leikapuia Sap mi ngo pakhatin ka pa a lo manbet reng pawh ka han hmu. Hmanhmawh taka ka tlan chho hlawk hlawk chu UHmingmawia chuan min lo hmu a, ka lam rawn lan tumin a hmaa mi ho chu a vai thlu pawp pawp a. Ka thlen tep tawh tih chuan silai a rawn ri leh dur a, ka kâ atangin thi sen ka phu chhuak a. Kan naute nunna nei tawh lo pawm chung chuan ka tlu ta hnawk a, UHmingmawia'n min au ruai ruai chunga ka lam pana a hmaa mi ho a sam thlu phei mawp mawp chu ka hmuh hnuhnun ber a ni ta.


"UHmingmawi" tiin ka thu chhuak hlawl a. Ka thlan in min bual huh vek. Ka bulah Lucas chu a mu tawh lo a, curtain zar kar atang chuan ni a rawn lut a.


"Ka thi amaw! Ka duh lo, a ni lo. Ka kalsan thei lo a sin" tiin ka hmui hupin ka tap khur ngawt ngawt a. Tah pawh ka tap chhuak hleithei lo, ka awm chu ka chum dawt dawt a, ava han na tak. Helai ka awm chhunga phu ve dawt dawt thin hi a chawl nita mai hian ka hria.


Ka nau te chu ka thawm an hria nge an rawn tlan lut a, zawhna min zawh pawh ka chhan let theihloh avang chuan min kuah dun ta tawp.


Nilengin ka tap a, ka rilru nilo in ka thinlung hi ana ni. Sawi fiah ngaihna a awm lo. Tah tawp hian anat zia a fiah ber ni hian ka hria.


Nithum ngawt mai engmah ti lo in ka awm a, ka nau ten Mizoram lama haw theihna tur an buaipui thung. Ka chhungte leh ka naute chuan Lucas vanga chutianga awm ka nih an ring vek a, mahse ka ni teuh si lo. Dinpui tap chungin ka bia a, ka haw hunah engkim ka hrilh tur thu ka sawi a. Engmah hre lo mahse min tahpui ve tho.


Mizoram ka haw a, ka pangngai thei meuh chuang lo. Intihthawven nan bakah keiman ka duh avangin kan mizo hmun hmingthang ho chu tlawh chhuah vek ka duh a. Dinpuii pawn phur takin min kalpui ve zel.


Dinpuii'n "Khuangchera pukah lut ve ang u" a tih avangin a thian thenkhatte nen Khuangchera puk awmna lam panin kan kal a. Khuangchera tih takah a cher awm hle mai hmeichhe mawng lian deuh chu a then laiah chuan kan inhnawhchhuak thei hram hram a ni.


Puk kan luh chhuah dawn chuan chhuahna tur chu a chhoh deuh avangin min kai chhuaktu atan mi an lo dah a, ka chhuah ve dawn chuan "Ka lo kai chhuak ang che" tiin tu emaw hian a kut a rawn phar a, ka vuav ve mai bawk a. Mahse kut neitu hmel ka hmuh chuan ka meng phar awn awn mai.


Tunge ka hmuh inhre duh em?


Hmingmawia! Ka Pasaltha Hmingmawia ngei a ni ka hmuh ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)