ZUNGBUN HNUHNUNG

Episode kal lai dah luhna

Moderator: writers

LtaRalte
Posts: 12
Joined: November 19th, 2021, 9:31 pm

ZUNGBUN HNUHNUNG

Unread post by LtaRalte » November 25th, 2021, 7:02 pm

ZUNGBUN HNUHNUNG
BUNG 7-NA

By : Lta Ralte




"Aw....hello.... Ruata, i rawn thleng tawh em ni?" tih zung zung pahin lehkha pawimawh te chu a thliar fel zung zung a. "In ah khan lo awm hahdam rawh. Ka rawn phei har lovang, ka hman ṭep e" tih pahin Pu Makima chuan sana a bih zauh a. Tlai dar 3 a lo pel deuh hret chauh a. An inbiak zawhin hmanhmawh takin a intifel nghal zung zung a.




In a thlen phei chuan Pi Tlansangi leh Driver Ruata pawh an lo inkawm ve nasa mai a. Ruata hi tleirawl hawklak rual a ni tawh lem lo bawk a. Pu Makima pawh hian a duh ber rêng a. Khawi emaw han kal chhuah pawhin dam dap in motor a khalh ṭhin a. Hna pawimawh avangin an awmdun reng thei lova, a kalsan lawp lawp chang a awm a. Hmelhriat awm lohna hmunah pawh amahin a lo in hai kaw ve thei zel mai a. A puitling ru khap mai hi Pu Makima hian a ngaina ru em em rêng a ni.




"E, hei....a rawn thleng ve mai alawm" tih pahin Pi Tlansangi chuan a lo nuih var a. "I rawn tluang maw? I hah em?" Pu Makima chuan Ruata chu a be nghal sawk sawk a. Pi Tlansangi bula ṭhut pahin, "Rawn phei ve mai la....?"a ti fiamthu zui nghal zat bawk a. Nui var var chungin Ruata'n, "Hah love...hah na tur a awm lo em mai" alo tih let sawk sawk laiin Pi Tlansangi chu a bula rawn ṭhu Pu Makima nuih suk pah chuan, "Ka rawn phei ve tak dawn amawn le.... Pi Zualtei hmuh pawh a chakawm alawm maw le"a lo ti lêt zauh a. Pu Makima chu a nui tawi tak a, "Ruata...ka insiam sawk sawk anga, kan chhuak phei leh nghal mai dawn nia" tih pahin a mut pindan lam chu a pan zui nghal a.




Ruata erawh a lo bu deuh nghat tih loh chu a ngawi reng a. 'Tunge Pi Zualtei chu? Khawi ami nge? Pu Makima hian nupui a lo nei reng nge, nuthlawi ngaihzawn lai a nei nge?' a ngaihtuah nasa hle mai a. 'Heti chen hi an lo inzui tawh a, hmanni deuh aṭanga a mizia a thlak thawk chhan kha engnge ni ang? Pi Tlansangi rawn sawi Pi Zualtei vang kha a ni mai angem?' a rilru a lo kâwm mûk deuh nge Pi Tlansangi biakna pawh a lo hre miahlo pek a. "Ruata...." a rawn tih leh hnu chuan a phu deuh zuk a. Rang takin, "Aw..." a ti nghal vat a. Pi Tlansangi chuan, "E khai...i va ngaihtuah mûk awm ve aw....nge, i chau deuh em ni?" a lo ti sawk sawk a. Pi Tlansangi bawk chuan, "In chesual phei vel ang tih te pawh a hlauhawm mange" a tih zui leh lai takin Pu Makima chu a rawn chhuak ve chiah a. "Eng thil nge maw in lo sawi mawlh mawlh le?" a rawn ti nghal vat bawk a.




Pi Tlansangi leh Ruata chu an in melh zuk ringawt a. Ruata'n, "Ehhh...englo.." a tih lai chuan Pi Tlansangi chuan, "Eng ni love... Ruata hi thil a ngaihtuah ding hmel lutuk a. 'A chau deuh nge mawn le' ka ti deuh maw le" a lo tih zawm vat a. Pu Makima chuan nuih suk pahin, "A ni zawng thil ngaihtuah neuh neuh hi a nuam tih zawng ania" alo ti thla ngawt bawk a. Nui deuh suk chung chuan, "A chauh deuh leh kan inchhawk phei zel ang chu" a lo tih zawm leh a. A rilru takah erawh Ruata ngaihtuah zâwn awm ang chu a hrethiam mai. A mizia thup a tum hram hram ṭhin a. Ruata phei chu a hruai tam ber anih avangin a mizia inthlak chu a hrethiam em em ang tih pawh a lo rinlawk a ni sa a. Pi Tlansangi khan Zualtei hming a lam rik zauh tak kha maw....kha ngei khan Ruata rilru a luah chat kha a ring sa rêng a ni.




Pi Tlansangi chuan thingpui leh a hmeh te a hlui a, an in zawh chuan, "Anih Ruata, kan phei mai dawn em ni?"tih pahin Pu Makima chuan a mut pindan lam a pan leh nghal vut a. Ruata leh Pi Tlansangi pawh an ṭhutna aṭang chuan a tho chhuak zui nghal a. Pu Makima rawn chhuak chuan Pu Thankima diary ngei chu a rawn keng chhuak a, Pi Tlansangi bula din pah chuan, "Ka lawm lutuk ania...ka hriat duh tam tak ka hriat phah a"a ti sup a, Diary chu pek lêt tumin a lek chhuak zui va a. Pi Tlansangi chuan, "E khai...nakinah mamawh riau hun ila nei thei a. Kawl hrih rawh khai. I mamawh tawh lo nia i hriat hunah ka la kawl ve leh ang chu..."a lo ti lêt vat a. Pu Makima chuan pêk lêt tum ngial mah se a ṭang ve tlat mai si a. "Anih...ka lawm hle mai. Uluk takin ka lo vawng ṭha anga, ka la rawn pe kir leh dawn che nia"tih pahin an in chibai a, an chhuak zui ta nghal a.




"Sangzuala te unau chu min lo biak mai dawn nia. A nupui man pawh ka rawn tum vek dawn tih lo hrilh la..."nui hak hak chungin Motor ah chuan a ṭhu lut nghal a. "An rawn haw tlai ṭhin lutuk hi ka hrilh ngun tawh maw le..an dawr ve ve ah hian ṭhahnem an ngai dun ve ṭhin lutuk a.." tih zawm pahin a fate haw tlai chhan chu a zep leh hram a. "E khai, an taima a, a lawmawm nasa anih chu...an entawn tlak hle mai" Pu Makima chuan a lo ti zui vat a. "Anih kan kal phawt ange.."a tih lai chuan Ruata pawhin motor a lo tinung ve nghal vat bawk a.




"Anih leh ule...tluang deuhin kal rawh u. In thlen hunah eng hun pawh nise min rawn hrilh ngei ngei dawn nia" Pi Tlansangi'n a tih hnu chuan an in vai liam zui ta nghal a.




Ruata rilru ah erawh engmah dang a leng lo. 'Tunge Pi Zualtei chu ni ang? Khawiah nge a awm ang? Aizawl a awm anih chu a ring nghal thlap bawk a. Tin, Pu Makima diary hlui lam tawh ken kha Pu Thankima ta anih a ring nghal a. Engnge a chhungah khan in ziak ang? Chuti tak maia Pu Makima tana pawimawh chu hriat a chak rilru hle a. Pu Makima te In ah hian a lawi lut fova, nupui a neih loh zia pawh a hria. Tin, Zari kâ aṭangin Mamuani nena an chanchin kha chu tlem a zawng a hre ve ngei mai a. Chumi hnu in tumah a ngaihtuah zui lo tih pawh a hrechiang ve thawkhat chuan a in hria. An kal lama Pu Makima muthlu ṭawngvai thu te kha a hrechhuak uarh uarh a. Tunge Rintea chu ni ang? Pu Makima fapa maw? Fa nei reng chung leh a fapa pawmtleitu, a nu ngei pawh Zualtei chu ni ngeiin a lang bawk si. Chu nu ngei chu a rilru ah a vei reng ni mai hian a lang bawk si. Chuti si engvangin nge a neih loh? Zawhna hlir...zawhna hlir in a khat a. A chhânna pe theitu awmchhun chu a bula ṭhu, pawnlam hawia a rilru kâwm ding tak tih hriat zet chauh chu a ni.




A ngaihtuahna hria niawm takin Pu Makima chuan, "Ruata...nakinah engkim ka la hrilh ve dawn che nia"a rawn ti sup a. Ruata chu a phu deuh zuk a, a in thing harh zui nghal a. Ruata chuan engtinmah chhang lo mah se Pu Makima chuan Ruata ngaihtuah awm ang chu a tinzâwn thiam tho si.





Motor lo ding tlar pût hnungah chuan an ding zui ve nghal a. Ruata chuan a hma chiaha ding motor khalhtu, rawn dakchhuak chu a zuk au zui nghal vat a. "Engnge thil awmzia? In lo va ding thui ve?" nui sâng chung chuan a ti nghal a. A hmela lungawi lohna thuplo zetin, "A hneawm tawh khawp mai. Scorpio leh Gypsy an intai a, Police lam an nghak a ni awm e. An inrem thei meuh lo aniang" a lo ti bal bal a. Chutihlai tak chuan Police motor pahnih hian an rawn tlanpel fuak a. "E, kha...an rawn thleng alawm. Kan kal leh vat thei mai ang" rawn tihzui pahin an in biakrem dan vel hriat chak hmel zetin thlang lamah chuan a chhuk zui ve nghal a. Ruata leh Pu Makima erawh an ṭhu ngawi reng a. Ruata chuan, "Cigarette-zuk pahin ka zuk melh ve thuak teh ang" tih pahin a chhuak zui nghal a. Pu Makima erawhin a lu a lo bu nghat ringawt a.




A cigarette-phawrh pahin a ṭan kai zui nghal a, si deuh vang vang chung chuan an hmalam chu a en ngar a. Ruata hla play lai zawi te a ri sêt sêt chu a bengkhawn nghal hle...a herh ring zui nghal vat bawk a.


"Vawiin chuan maw ka suihlunglen a thar ngei e,
Awmhar ni chhun ka tawnmang mawl an e,
Ka lo tawn chu hmana ka Di te kha...
Thinlai damte'n hlimte'n nau ang kan nui dun a....

Kumpuisul tam a vei ta e,
Sam ang kan inṭhen na....
I zûn ngaia suihlunglen pawh a nem ta e,
Enga'n nge maw tawnmang ka lo man chu...
Thinlaia'n i thar ngei Enchimloh Pari"



"Lianthangpuia hla" a tih sup lai chuan Ruata chu a rawn kal chho a, rang takin a herh zawi nghal vat a. Motor-a rawn ṭhutluh pahin, "Kan kal thei e" a rawn ti nghal vat a. Motor chu a tinung zui nghal a, a hmaa mite tlan zui nghal ṭelh ṭelh en reng pahin Ruata bawk chuan, "An la inhnial nasa mai...nupa an nih hmel e. An rui deuh niin ka hria, buai vak lova in ṭha ṭhen theih reng maw le..." a ti zui leh nghal mawlh mawlh a. Chutihlai chuan Police ho nena lo inhnial buai mek chu an zuk hmu thei ve ta...an tlan thla zel a. An zawn an thlen chuan Pu Makima pawh chuan a thlêk ve vut a, a nupui ni ṭep Mamuani leh a pasal ni awm tak, pa cher ve lam chu an lo ṭawng pâwr nasa mai a. Pu Makima chuan a en reilo kher mai. Mahse, Mamuani chu a hai lo nasa mai bawk a. A tlan thla leh det chu Scorpio chu a lo ding sâwi tân a, Motor hmaah chuan 'MAMUANI' tih a inziak kalh bawk a.




"Hetia en mai chuan Scorpio hi an thiam lo zawk hle anih hi maw..." Ruata chuan a lo ti deuh nghut a. Pu Makima erawhin engmah a sawi lo. Mahse, ama hriat tawk lek nia a ngaih a "Mamuani" alo ti sup chu Ruata chuan a hre hman tlat! "Pu....i hmelhriat em ni?" a lo ti nghal vat a.




Pu Makima chuan hmalam en reng chung chuan, "Mamuani te nupa an nih kha....hmana ka nupui ṭep kha..." a ti lêt sup a. Engmah dang a sawi zui lo, a ngawi zui hmak a. Ruata pawhin engmah a zawh zawm bik ta chuang lova.




"I hla chu han ti ring deuh la..." tih sup pahin a ṭhutdan chu a siam rem zui nghal sut sut a. Zan boruak thar hîp tum chuan a glass chu a hmet hniam raih raih a. "Ka duh tunlai viau ania" nuih hak hak pahin Ruata chuan a lo ti lêt nghal vat a. A herh rin sak zui nghal a.



"Bawihte....nang ngai reng reng hian...
Tlai khua ka vâr ṭhin asin.
I zûn lêng hi ka phur zo lo...
Nang ngai reng hian ka vai ruai e...

Aw...dawn a sei, lunglam ka vai..
Ṭhaleng dang tan ka phal lo che...."



Pu Makima chuan ngaihtuah zui loh tum viau mah se Mamuani te nupa chu a mitthla zui a. Mamuani chu pasal a nei fuh vaklo niin a ngai hmiah bawk. Mahse, a pasal lam chuan a ngaihtuahna a luah zui hran lova. A nulat lai, an inzui ve lai te chuan a mitthla ram an luah zawk leh tlat si...




"Ṭhianpa....ngawi teh. Zualtei nen pawh in an na lai riau an nei tlat a ka hriat" phur zetin Thankima chuan a ṭhianpa chu a nuih var var a.



"Hmelṭha deuh asin. I hmuh hunah i phi cheng ka ring sa rêng a ni"nuih hak pahin Makima chuan a lo chhang nghal vat a.



"Ka phi cheng kher lo aw lulian...." tih pahin Thankima chuan a bula ṭhu chu a nem bu dâwrh a. "Nangmah ber hi i phi cheng zawkin ka hria...."a ti fiamthu zui a. "A no chik chek khawp mai" Thankima'n a ti leh kher chu a ngaihdan a ni lo nasa..."Lo ngaih melh hlek suh...ka hnek bur mai ang che" Makima chuan nûr deuh nâng chuan a lo ti let vat a. An nui dun zui hawk hawk bawk a.




Sitting room-a phone rawn ri rawl rawl chu Makima chuan a pan thuai a, "Hello"a ti chiah chu, a nupui tur Mamuani aw ngei a ni. "Tunah rawn kal nghal rawh. Kan inchung zawlah rawn kal ang che. Thil pawimawh tak kan sawidun angai"a rawn ti deuh hmawk hmawk a. Phone a dah zui nghal hmiah bawk. Makima chuan a ngaihna hriat loh hmel zetin a phone kenlai chu a dahthla riai riai a. A din na ngaiah a la ding reng thung a. Harhchhuak zawk ni awm takin a din na aṭang chuan a tawlhsawn zui nghal a. "Ka ṭhian...ka chhuah lawk a ngai tlat" tih pahin a inbun ṭha sat sat a.




Thlêk hâ chungin Thankima chuan, "Thil pawipang thleng a awm em ni? Ka rawn tel ve thei tho ania" a lo ti vat a. "A ngai love...engnge thleng erawh ka hre bik hrih lo. Keimaha hmachhawn ngai thil a ni. I in pekna leh in huamna ah erawh lawmthu ka sawi ni teh se...." tih luam pahin Makima chu a chhuak zui nghal a.




Mamuani te In a va thleng chu an lo la meng ṭhap a. Engmah an lo sawi lova, an lo en ṭhap ringawt a. Zualtei te In chung zawl chu a pan zui nghal a. Hmun hla tak thlir vang vangin Mamuani chu a lo ding reng tawh a. A kut a hûm ruh salh a, a hnunga rawn kal mek chu tuna a huat em em Makima anih pawh a hre nghal thei.




A bula din pahin Makima chuan, "Engnge ni? A va pawimawh awm ve?" a ti nghal sap a. Chuveleh Mamuani chuan a hnaih chilh a, a chûm nawk nawk a. Makima chuan Mamuani kut man beh pahin, "Khawi maw...duhtawk teh. Ṭha tak leh puitling takin i sawidun teh ang" alo ti vat a.




"Inneih kha ṭhulh a ni" rum taka melh salh pahin Mamuani chuan a rawn tichhuak ta phawng mai a. Makima chuan mak tih hmel zetin a en reng a. Mamuani bawk chuan, "I lo va tenawm em em ve? Ka ten takzet che..." Makima mit taka en kal chungin a ti zui leh bawrh bawrh a. Makima erawhin ngawi rengin a en kal thung a. "Engnge thil awmzia hi?" a ti nghut ringawt a.




"Hrelo der khanglang suh. Ka hrechhuak vek tawh. Ka ring em em che a, pasal ṭha tak ka nei dawn ah ka lo ngai asin" a ti zui leh piap piap a. Makima ṭawng hma chuan, "Engmah hre lovin ka lo nei hman ang che tih ka hlau takzet....mi tenawm pa..." a ti zui leh tuarh a. Makima erawhin engtinmah a la chhâng chuang lo.




"Mipa rinawm loh, ngaihzawngte khawih chhia a, tlan san leh ching mihring maw ilo nih a? I fapa pawh a lian tawh viau ang chu...." a rawn tih leh nghat chu Makima chuan a tuar thei ta ngang lo.




"Tu chanchin nge i sawi? Engmah ka hrethiam hek lo. Tumah ka kalsan lova, fa lah ka la nei hek lo" a ti bûl ve deuh hmak a. Mamuani mitah chuan a en lêt ve kal bawk a.



Mamuani chuan nui lui sâng chungin a kut a bêng thak thak a..."A ropui hle mai....a ropui takzet....tunah chuan min bum thei tawh lovang" a ti nghat nghat a. Makima'n ṭawng a tum lai takin, "Ngawi rawh...lo ngawi hrih rawh..... Lalrinzuali a ni lawm ni i fa neihna kha...i fapa pawh Rintea niin ka hria..." a rawn ti zui leh sak sak a.




Makima chu a nui hul hak a. "A ni maw...chutiang lam daih chu maw lo ni a?" Makima chuan kalsawn pahin a ti hul hak a. Ngaihtuah ding takin a hmuh theih chin chin chu a thlir vang vang a.



"Engmah hre lovin ka lo nei hman teuh hle mai che. Min kalsan leh huna i thlem thluk tur thlengin ruahmanna ṭha tak i lo siam tawh zawk hial lo maw?" ngeiawm zeta nuih luih hak pahin a lo ti zui leh zat a.




Makima chu a ngawi reng a. Muangchanga rawn hawiin Mamuani, thinrim hmel hai theih hauh lo tura lo melh kal mai mit ah tak chuan a en lêt ve kal a. "Mamuan....tu hnen aṭanga heng thu hi hria nge i nih ka hre lova. Ka tan hriat a pawimawh hek lo" a tih lai chuan Mamuani chuan rang zet hian, "I tan chuan hriat a pawimawh kher lovang" alo ti deuh hmak a. "Lo ngawi hrih rawh...engkim ka hrilh ang che anga. Chumi hnu ah thutlukna chu nangmah ngeiin i siam dawn nia..." tih hmak pahin Makima chuan a melh rân a. Mamuani chuan a thusawi rin lohna mitmeng pawh thup hran chuang lo chuan a lo bûk khum nghat nghat a.




"Ni e...tuna i sawi Zualtei nen khan kan in ngaizawng ṭhin ngei mai. Hmangaih pawh kan in hmangaih takzet bawk. Mahse, an khua aṭanga ka pa an sawnchhuah hnu rei vak lovah a rai thu ka hre nghal a. Zualtei nen khan vawikhat pawh kan chesual lova, thianghlim takin kan in ngaizawng asin. Mipa dang anga ramri kham pêl duh ni ila zawng ka pêl thei ngei ang....a chhan chu min chân a, ka kalsan kha a hlau takzet" a ti ta duah a. Mamuani ṭawng leh hma in Makima bawk chuan, "Tuna i sawi Rintea pa kha ka ni lova, tunge a pa lah ka hre hek lo" a ti zui leh hlak bawk a.




"Engmah sawi kual kawi angai lo. Min hrilhtu hian dawt a sawi pawh ka ring hek lo. Ka chhungte pawh engkim ka hrilh tawh a. Tuna ka koh nachhan ber che chu..." a ngawi deuh dat a. Thâwk deuh hak pah chuan, "Kan Inneihna tur hi sût leh ila ka duh" a ti zui leh hmuk a.




Makima chu a ngawi vang vang a. Thawk lâk deuh halh pah chuan, "Ka sawi engahmah i ngai lova, ka thiamthu sawiin awmzia a neih dawn loh tho chuan i duh ang chuan ni rawh se" a lo ti lêt ve ta hmak a. Engmah dang sawi zui lo chuan In hnuai lama chhuk tur chuan a pên zui nghal a. Makima chu a ding leh deuh dat a. "Thudik engkim i hriat hunah min rawn hrilh ṭha ve leh dawn nia...." a ti nghat a. "Mangṭha le..."tih zui pahin a kal zui ta hmak a. Engkim a tawp ta!!!




A nu leh pa chuan sawi tur an hre lo, an ṭhu kun tlawk tlawk a. Thankima erawh a ṭhu hle hle thei lo. "Ka ṭhian, ti teh...i han kal ṭha leh teh ang. Keimah ngeiin ka hriatchin zawng zawng ka hrilh angai a ni"tih pahin a tho zui nghal a. Mahse, nghet taka chelhbettu tha pêk na zet chuan a pawt ṭhu leh hnawk a. "Ni love ṭhianpa...Innei mahila kan hlim tak tak chuang lovang. Kan inkar boruak siamṭha thei an awm ka ring hek lo, Zualtei chauh lo chuan....."a lo ti deuh ngat bawk a.




An thusawi engkim ngaithla kar tu, Makima pa chu a rawn ding chhuak a. "Ummm.... diklo taka ka fapa puh tu chuan ka dam chhungin helai In hi a rawn chuang kai tur a ni lo. Ka fapa...mipa i nih kha...i hmaa tih tur awm chu su hmiah hmiah zel ang che. Thudik ah chuan khâp khat lek pawh tawlh ngai suh ang che" tiin a fapa chu a fuih pah mawlh mawlh a.




Makima chuan, "A ṭha e...engkim felfai takin ka hrilh vek tawh a. A duhthlanna zah sak a phu e" tih ram hmak pah chuan a ṭhianpa chu a melh zuk a. Thankima lung ni lo lutuk chuan a lu a thing deuh na na a, a ṭhianpa thil tawn chu palzam mai mai a tum hmel loh hle.




Motor ding dat chuan Pu Makima chu a tiharh deuh zawk a. Ruata chuan, "Zun a chhuak riau mai"tih sup pahin a chhuahsan zui nghal a. Pu Makima pawh a chhuak ve nghal a.




Pu Makima chuan Cigarette-ṭan kai zuiin a si vang vang a. Ruata pawhin thil hrang hrang sawi niah niah pahin a rawn zi kual vel nasa mai a. "A mak tak tak a ni. Tun hnai lawk aṭang khan hetia long run-hian ka kâwng hi a na em em zel mai" a rawn ti bawrh bawrh a.




Pu Makima chuan lo melh zuk pahin, "Tar hri anih" a lo ti fiamthu lêt vat a. An nui dun hak hak a. Pu Makima chuan Cigarette-si vang vang chungin a phone a bih nghal thuak thuak a. Whatsapp ah lut kualin thil pawimawh a awm leh awm loh a check kual zuai zuai a. Pu Makima chu a mengphâwk hra mai... Ruata lama a phone lek zauh pahin, "An accident anih hi...a pawi hle mai" a ti sup a. Ruata pawhin a phone ah chuan 'Lunglei thlen hma deuhin Mamuani te nupa kha kawngthlangah an tlanliam a, a hmunah an boral ve ve' tih chu a lo chhiar ve mek tho a. Mahse, a lo sawichhuak lo mai chauh a ni. Ruata chuan, "A pawi khawp mai...an ruih hmel ka ti rêng a ni" a lo ti nghut a. Pu Makima chuan, "Kal ang hmiang" a lo ti let vat a. Motor ah chuan lut in an kal zui leh nghal a.



Pu Makima chu a ṭhu ngawi ngal a. Mamuani chu a mitthla ah a châm vawng vawng mai. Inneih an ṭhulh hnu a thil kal dan te chuan a suangtuahna khawvel an rawn ṭawmpui nghal chat a. Ruata pawhin hrethiam zetin engmah sawi lovin a tlanpui par par a.



"Awiiii....Lalmakim...min lo nghak teh" thawven hmel zeta rawn titu chu Makima chuan lehhawiin a en vat a. Hmanhmawh zeta rawn um det det tu chu tudang ni lovin Thanzuali, Mamuani nen pawha inkawm ve fo ṭhin a lo ni a. Mahse, tun hnai lawk aṭang khan an inkawm ta vak lova. Thanzuali hi mi ti zawk zawk lo leh mi nun zawi tak a ni a, an mizia a in anglo deuh bawk nen an inzui tam ta vak lova. "Khawiah nge i kal?" Makima chuan a lo ti var a.




"Ka kal kual duah mai...ka ṭhiannu ka bazar pui lawk bakah ka nutei damlo ka tlawh kual vel bawk a....ka kal kual nasa mai" Thanzuali chuan a rawn ti nghal bawrh bawrh a.




Thui vaklo an kaldun hman tihah chuan Thanzuali te In bul an thleng phei ta reng mai. Gate bulah chuan an ding zui nghal a. Makima thlêk deuh ha chungin Thanzuali chuan, "In chanchin te ka lo hre ve a. A pawi khawp mai" a ti sap a. "Nia...a zahthlak lamah a kal mah zawk"nui sukin Makima chuan a lo chhang let vat a.



"I zei lo aniang....a zei zawk a hriat hle bawk a" Thanzuali chuan a ti leh nghal vat a, a nui har har bawk a. Makima chuan a ngaihna a hrelo tih hriat takin a hawi á deuh hâ a. "Ka va hrethiam lo..." a tih lêt sup lai chuan Thanzuali bawk chuan, "Niminah pawh ka hmu alawm. An inzui nasat kha... Pu Rochharliana, SDO niin ka hria..."a lo ti zui leh vat a. "Nang aiin Pathlawi, fa pahnih nei a luck zawk tlat" tih zui pahin a nam deuh taih a. Makima chuan, "Anih chu a.." nui lui sakin a ti leh nghal a. "Anih..." Thanzuali'n a tih rual chuan, "Anih le..." Makima pawhin a lo ti ve vat bawk a.




Makima chuan thil kaldan leh thil awmzia chu man thiam viauin a in hre ve ta. 'Engkim a sawifiah chung pawhin engahmah a ngaih sak lova, fa nei tawh leh hmeichhia tichhia a, kalsan ah a puh a. Tunah lêm fa pahnih nei tawh, pathlawi a thlang a. Ni e, Sawrkar hnathawk te anih chuan nuamsa takin a dah thei ang chu... A tawk e Mamuan...hlim taka i awm ka duhsak ber che ania' a ti ta mawlh mawlh a.




Pu Makima chuan, 'Mamuani a thi' tih chu a rilru ngaihtuahna aṭanga dahbo duh viau mah se a thei silo. A khawngaihin a lainat takzet bawk a. 'Vawiin maia a hmuh zuai kha he khawvela Mamuani a hmuh hnuhnun ber ṭum a lo ni dawn ta' tih te a ngaihtuah neuh neuh bawk a.





Aizawl pawh an lut ve leh ta reng mai. Pu Makima chuan a phone a phawrh a, zing dar 12:30 chiah a lo ni a. Pi Tlansangi biak tum chuan a hmet mawlh mawlh a. A ngaithla zui vang vang a.


"Aw...Pu Makim. In thleng tawh em ni?"

"Thleng ti ila Aizawl kan lut chiah e"

"E....anih chu. A ṭhat hlauh chu...ka lo la meng reng alawm. Min rawn phone ta mai si lova, ka lo nghak deuh reng che u a...."


"Anih chu... Nia, signal te a lo awm mumal lo ṭhin nen..thlen hunah law law ka ti ta deuh anih kha...kan tluang e"


"Kha Motor Accident te an awm a, in intawk hial ang chu. An nupa in an la thi zui ani awm e. A hmuna kal te sawi dan an tih khan Zu pawh an phur ṭeuh anti...an rawn post ka hmu tlat"



Mamuani te mitthla zawk chung chuan, "Awww...anih chu maw aw...a va pawi ve maw le...."tih bak a sawi thui lem lo. An in mangṭha hnu chuan Pu Makima chu a thaw deuh halh a.




Pu Makima chu a Khum ah ngei mai chuan a ṭhu hnawk a. A cigarette-phawrh zui in a ṭan kai zui nghal a. "Zualte...ka rawn thleng tawh e, ka rawn kan thuai ang che" tih sap pahin a Cigarette-zuk chu a si zui vang vang a. In tihfai tumin a room a chhuahsan zui ta nghal a.



(chhunzawm zel tur....)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)