LITTLE ANGEL

Episode kal lai dah luhna

Moderator: writers

Areas aineh
Posts: 33
Joined: August 17th, 2021, 8:59 am

LITTLE ANGEL

Unread post by Areas aineh » November 25th, 2021, 7:54 pm

"i tha em " ti a ka dar a min rawn beng thekthek tu chu chiai zet leh rilru mangang zet in ka en tlawktlawk a.Kan hma hun ah thil enge maw tak kan la tawk dawn ani tih rinna chu nei ve fo mah ila tiang emem chu ka lo beisei ngai lo.Kan college information group ah chuan tu emaw number hriat loh hian Sir Samu-a nen a kan in kiss lai video chu a lo post a,a post hnu ah a mah chu a left zui leh nghal daih bawk.


"Tiang thil thing lutuk hi tu in nge ti duh ang aw,phiangsen chuan a mah a la left zui daih lehnghal" Henry-a chu kei ai mah in a thinrim zawk.


"Henry,engtin nge ka tih ang students chu sawi loh professor ho zawngzawng in an hmu thei vek dawn bawk si,engtin nge ka tih ang ka rilru a hah e" Ka rilru mangang lutuk chu ka tha te hi a khur thei hial in ka hria,kan hmel lah hai theih rual loh in video ah and la lang chiang emem zui bawk si


"Lungngai lo phawt rawh Sir Samu-a chu call ve phawt la,a man a chingfel leh vek mai ang,rilru ti hah lutuk suh"


"Aw aw awle" ti pahin ka phone chu ka phawrh a,Sir chu ka call zui nghal zat bawk.


A vawikhat na ah chuan a ring ral thak a,a buai dawn thu ka bulah min hrilh sa a vangin a vawikhat na a a chhang lo chu ngaihthat lohna leh mak tihna emem pawh ka nei lo,ka lo rin lawk dan chiah ani bawk.Tun a thilthleng pawh hi a la hre bik lo anih hmel.A vawihnih na ah pawh chuan a la chhang thei chuang lo,rilru mangan lai leh rilru chiai lai a,biak theih a a awm lo ringawt pawh chu ka thin a rim tun tawh.



A tawp nan ti in a vawithum nan ka call tha leh a,a tawp a tawp ah chuan a phone chu hmeichhe pakhat hian a lo chhang a,ka thaw chhuak hawk nghal hawk.



"Hello" a aw chu ka la hre ngai hauh lo bawk.


"Sir Samu-a a awm hnai em le"


"A inbual a,enge ni ta?" A rawn ti nghut a


"Ah a la buai viau em ni Tiknge a biak theih ang"


"Imm buai ang reng"


"Ih in ah a awm lo em ni? Ka bulah khan chhungkua thil pawimawh tak tih tur a awm a vangin nileng a a chhuah hman dawn loh thu kha a sawi sia,in ah a awm tur ah ka lo ngai a"


"Nia,vawiin hi ka u boral cham a nia,an in lam ah kan chhungkaw ho nen hun kan hmang a" a thusawi a vang chuan ka hnim ruih a,tlawm ka in ti hle bawk.


"A nih chu, U Zorini nau i ni ang maw" tih zawngin ka chhang a,sawi tur mai pawh ka hre tawh lo.


"Aw ni e.Engthil nge nita,a pawimawh viau chuan ka lo hrilh sak thei tho che a" a rawn ti leh sup a.


"A ngai lo mai" ti pahin phone ka cut zui nghal daih bawk.Chunglam chu hawiin van boruak thiang tak mai chu ka thlir vawngvawng a,ka mittui chu a luangthla ngiaingiai bawk.Eng ber hian nge min ti na tih pawh ka hre tawh teh nuai lo.Vawiin hi an nu boral cham maw! Anih chuan tinge ka bulah tha tak a sawi mai loh le,chhungkaw thil pawimawh tak tih tur nei angin a in sawi bawk a.Ni e Zorini chu boral tawh mahse a chhungkua a nupui anihna a bo dawn chuang si lo. A tan chuan engtik ah mah a thi ve thei taktak tawh dawn lo ani tih te chu ka hrechhuak thar a.Min hmangaih thu min hrilh chamchi mahse a thinlung chhungril ber nei tu leh a hmangaih awm chhun chu a nupui duh emem bak ani thei dawn chuang lo tih ka hriatna te chuan min ti na in,tlawm ka in ti ngawih2 bawk.



"Zorin i tha meuh maw,tinge in pa pawh chu tun ang boruak ah te chuan biak theih a a khawsak loh a,eng ang pawn buai mahse a rawn be tur che a ni ringawt,lo kal teh" ti pah chuan duat takin mi a kuah hluhlu a.



"Henry tinge harsatna hlir hian min chimbuai bik reng le,enge tihsual ka neih bik le,ka sual bik viau em ni"


"No,tiang zawng chuan ngaihtuah tawh lo teh,engkim a tha leh vek mai ang" ti pah chuan ka dar chu a tuai hliauhliau a.A thiam ang tawk a,min hnem in a tawngkam thiam angang te chuan mi a thlamuan ve a,a mitmeng leh chezia engkim ah min ngaihtuah zia chu a lang a.Ka tan hi chuan thiantha mai ni lo unaupa tha tak hi ani ringawt.



Bell rawn ri pawh chu ka hre lo der tlat a,diktak chuan class a luh leh pawh thih hreh in ka hreh tawh,zirlai dangte hmel han hmuh chu ka hreh takzet.College kal pawh ka tan thil hrehawm tak ani tawh dawn a nih hi.



"Haw i duh em,naaa mahse vawiin ber kher ah ka bike ka keng bawk si lo,van buaithlak tak"


"Engtin nge kan tih tak ang Henry bus a chuan pawh ka ngam dawn em ni?" ka rilru a hah takzet.



"Enge maw hma hma hian chiai ringawt thin lo teh,ka thiante bike hawh ka va dil........" A tawng chu a tawp dat tak ah chuan a hawi na lam chu ka va en phei ve nghal a.


"Zorin i haw ve duh chuan ka haw dawn a" kimkimi chu kan lam rawn pan phei hlawphlawp pah hian a rawn ri phei chul a.A hmel ah chuan min ngaihtuah na tlem ka hmu ve thei.



"A remchang ngawt tak ang.I u rual hian haw mai ta che" Henry-a pawh chuan a lo ti ve sup a.



Diktak chuan helai hmun a awm chu duh lo viau mah ila,Kimkimi rual a haw kher chu ka chak emem hran lo viau.Mahse kawng dang a vang bawk si.A tawp ah chuan a rual bawk chuan ka haw ta ngenge a,haw kawngtluan in kan in be lo.A mah ka huat vang ngawrngawr pawh ni lo in tawng chakna rengreng ka nei lo.A hma a ka unaunu min hmangaih a,min ngaihsak emem tu kimkimi zawk kha chu nise tun ah te hian pangchang takin a kiang ah ka tap leh pur emaw a nianga,ani in a thiam ang tawkin min lo hnem ve bawk anga.



Kan din deuh thut a vang chuan ka ngaihtuah na a ta chu ka harhchhuak zawk a,ka han hawi kual thuak a,kan in kawt ah kan lo ding leh der tawh.Engtik laiin nge kan thlen tih reng ka hre lo.In chhung kan luh chuan Nute-i chu sitting room ah a in lengnu nen thingpui an lo in a,biak pawh be lemlo chuan in chunglamah ka chho zui nghal vut bawk.



Ka khum ah chuan zawi deuh in ka tlu nghal hnûk a,ka phone ka han en a,ka beisei erawh ka la hmu chuang lo.Tunah chuan thilthleng te hi a hre ve tawh ngei awm si a,a thawhpui professor te leh a student te hriat a kha tiang thil an post ta mai kha ka lak ah a thinrim ani thei mai a ngem.Kei nen a hetiang in laichinna a lo siam ta mai kha a inchhir ta viau em ni ni dawn?

"Lalremsang misual lutuk pa,nunrawngpa,tinge ka rilru mangan ber laiin ka kiang ah i awm duh loh,kei aiin ani kha i tan a la pawimawh zawk tiraw,tunah hian ka mamawh lutuk che a sin" ti pah in a thlalak chu ka be mawlhmawlh a.Ka thin zawn thip lutuk chu ka kut in ka tham tawktawk a, engtin nge ka tih tak ang?.engthil rapthlak in nge min lo hmuak leh dawn?..





Ka room kawngkhar rawn in kik ri karh2 ri ah ah chuan ka muhil chu ka harh hlawl a,ka han hawi kual a,khua chu a lo thim vek tawh,sana ka han en chuan zan dar riat leh a chanve a lo ri va tawh mai.Ka pum Chu a rawn ri nghal rawkrawk bawk.Chhun a khum a ka bawk kha ka lo muhil tlang daih ani ngei ang,ka taksa te chu a na thenthum a.Kawngkhar chu a ai na hian an rawn chum dawtdawt a.



"Zorin i tha em,i muhil nge" ka pate-a chu min ngaihtuah hmel deuh hian a rawn tawng lung lung a.Room chu chhunglam ah ka kalh ve bawk nen,ti chen hi ka in khung a nia,ngaih that lohna rap tur chu ani ve tawh ani.



Kawngkhar ka va hawn chuan Pate-a chu a thaw chhuak hawk a, min ngaihtuah hmel deuh hian chik lutuk in min en run bawk.


"Tinge heti chenchen i in khung a,i damsam lo nge,i in kalhkhung tlat sia min ti mangang a lawm ching tawh ngai suh" a aw chu vin hlawkhlawk viau mahse min ngaihtuah a vang a sawi ani tih ka hriatna chuan a ruk tak chuan min ti hlim zawk.Heti tak hian chhungte ngaihsakna dawn hi ka thlahlel ang tih rin ngaihna ka hre lo.



"A va zia lo ve,ka ti mangang che u a,ihhh chhun ah khan ka khua a sik ve hlek a,ka mu kha ka lo mutlang daih a lawm mawle" ti pahin ka lu thak lo pui chu ka hiat sek a.Pate-a pawh chuan a awih ve leh mai bawk a.



"A nih tak chu,i ril te a tam ang tirawh chhukthla ila chaw te ei rawh" ti pahin in hnuai lamah chuan min kaithla a,tun a tak a hetia ka chung a a tha ta emem hi a chhan a awm in ka ring.



"Khawnge nutei leh kimkimi hi an va reh" a mit ah chuan ka en chho pah kalh a.



"I nute-i unaupa delhi ah awm kha an chhungkua in an rawn zin chho a,an va in hmu khawm ve anih kha,an riak nghal dawn anih hmel kha an rawn sawi dan hmang khan"

Ka rin lawk sa vek ani a sawi ni.Nutei te nufa awm se tun ang a min treat ang hian min treat ngam teuh lo.A tawngkam tha tak ngial pawh kan chang pha ve ngai lo kha nia.Nutei te awm loh lai chauhin min hmangaih na leh min duhsakna a ti lang ngam ve te chu ka khawngaih hial zawk.




"Naaa ka ei peih lo e,Pate nakin ah ka ei mai ang"


"Chawi ei loh ringawt zel loh tur,taksa chak loh lai phei chuan" ti pahin chaw chu min khawrh sak nghek a.


"Naaaaa I khawrh tam si ka tah a chhuak" ti pahin ka tah nuih deuh titih a.Pate-a chu a nuih a za ngang mai.Diktak chuan ka pum Chu ruak viau mahse chaw ei chakna pakhat mah ka nei lo.Ka luak te hial a chhuak zawkin ka hria.Chak lo tak chung chuan ka ei ve mai a,a tir a ka peih loh aiin ka ei tui leh ta phian a,Pate-a chaw min khawrh pawh chu ka ei zo teuh leh tawh hle.


Kan pafa chuan nidang ang lo takin kan titi suamsuam a,kan titi karah fiamthu kan telh zeuhzeuh bawk a,Pate-a hi pa tawng duh leh fiamthu thiam tak ani a,a bul a awm pawh mi rengreng hian nuam an ti thin.Amaherawhchu nutei te nufa a vang hian a hma ang khan kan in pawh tawh lo a,in chhungkhur ah pawha tul tawp ah lo chuan kan in be ngai lo.Nute-in ka chanchin a hnen a a sawi duh dan tur engkim a chiang vek a,a mah Pate-a pawh hian mi a lawm emem lo thin viau.Han in sawifiah a,han in sawi mawi vel erawh ka tum ngai lem lo bawk.



Chaw ka eikham ah pawh chuan in chung a chho ta mai lo chuan kan pafa in sitting room ah tv te kan en dun a

"I haw khat ang reng sia,in exam zawh ah khi lam ah kan chho ve dawn em ni le? I pi leh pu thlan te pawh han chei that a hun leh tawh viau ang" inkhel en pah chuan a rawn ti leh dupdup a.


"Nia ka haw chak ve tawh reng chak chu"


"Mahni in leh lo nanana chu a dan hi a dang ve lawm,i pa te pawn an ngai tawh viau ang che"


"Keipawn ka ngaih tawh zia" ka nui pah suk a.



Pate-a tawng leh dawn ah chiah chuan door bell chu a rawn ri tlengtleng a.


"Ka va hawn ang" tih leh thawh ka rual a.


Kareii leh!!!!!!!!



Ka mi hmuh te a vang chuan ka lungphu normal sa pawh a rang dutdut hle a,sawi mai tur leh han awm dan mai tur pawh ka hre lo,hlauhthawn na leh zamna in ka khat nghal bawk.Tun ang zan ah kan in ngei ah eng thil ti turin nge an lo kal ang le?



"Lo lo lo leng ru"



"I chhungte an awm em?" Sir Samu-a nu zawk chuan mi melh khui pah chuan a ti sap a,



"Aw a pate-a a awm lo lut ula" ti pah chuan kawngkhar chu ka hawng zau a.U sangtei zawk chuan za vak lo hian mi a nuih lui suk duh chauh.In chhung a an rawn in zui luh lai te chuan ka thaw a chham leklek in ka hria,



"Mate khawilam in leng nge an nih le,eee Sangtei te elaw teh hlawl che u chuan khawilam thli chhia in nge rawn chhem lut che u a" Pate-a chuan polite tak hian a lo be suamsuam a.U sangtei zawk chu a tawng bawrhbawrh a,Sir Samu-a nu erawh a la ngawi tlat thung.


"Mate thingpui te va lum ta che" a tih rual chuan Sir Samu-a nu zawk chuan

"Lum a ngai lo,rei awm pawh kan tum lem lo a" a rawn ti nghut a.


"Akhaih in leng ve reng ang chu"Pate-a chuan a ti zawm ve leh a.Kan boruak chu a rit ru takzet.



"Kan rawn kal chhan zawk tak chu Pu Rin eng lo a nia,han sawi mai pawh thil nuam ani lo viau na chu rawn sawi loh theih loh a ni in kan hre bawk si a"


"Engthu nge ni ta,a va pawimawh awm deuh ve" Pate-a pawh chuan mak a ti ani tih a hmel ah chuan a lang a.


"Nangni chuan in la hre lo maithei a,in hre tawh maithei bawk a,englo a nia in nau Zorini a vang hian kan chhungkua kan mualpho khawp mai a"
A thusawi chuan Pate-a chu a thawng hle ani tih a hmel ah chuan hai rual lohin a lang a.


"I sawi awmzia chu ka hre hauh lo mai" a ti ve sap a.


"Nia i la hre hauh lo ang,Ka fapa Samuela an professor ni bawk nen an lo in kawp reng mai a,Kan fapa pawh vawi tam kan hau a,a zirlai nen a hetiang inlaichinna siam lo turin kan sawipui zing khawp mai,mahse zorini hian a lo kherh nasa deuh nge a then hlei thei tlat lo mai a,anihna tak ah chuan Zorini kan duh loh vang emem pawh ni lo in,a zirlai mai a la ni a,tun ang a an mualpho na hi an la tawng ngeingei dawn tih kan hmuh lawk sa a vangin kan khak nasa hle bawk.A theih hram chuan tun hnu ah Kan fapa hi lo be tawh lo se kan ti khawp mai.Samuela tan zawk hian a pawi lutuk a,a hna thleng hian a tuar phah thei bawk si a" ka lo rinlawk sa ang vek sawi mahse a thusawi chu dawnsawn thiam a har takzet.Ka zak lutuk hi ka thlarau a chhuak mai dawn in ka hria.Hawi pawh hawi chhuak ngam lo chuan hnuai lam chu ka bih ngurngur a.Pate-a chu ka zah thar takzet bawk.



"Ngawi teh Pi Zual eng mualpho na nge i sawi chu hre ve chiah lo mah ila,kan fanu hi kan hre chiang ve tawk a,chutia mahni Sir te ngaihzawng hmasa duh tur chi ani lo tih pawh chiang takin ka hre bawk.In fapa zawkin a tih buai hneh em a vang a tun hi thleng ani pawhin a lang,Zorini pawh a thiam e chu ka ti hauh lo,mahse chutia in rawn burbun vek erawh ka lawm hauh lo mai" chutia Pate-a a tawng chhuak chu ka lo rin loh lutuk lam ani a,ka thlavang hauh zawng a a tawng a,Sir Samu-a nu hneh lutuk a a chhang ve siahsiah te chuan min thawng in a lak ah ka inthiam lo thar tak zet.


"Pa Rin,pitei hi a thin a la rim em a,a duh loh puipui leh a rilru a awm lo puipui a sawi chhuak maimai anih kha anih na tak ah chuan...."U sangtei chuan min Vengthawng lutuk hian a rawn ti ve sup a,Pi zuali chuan a lo pawtchat nghal zat bawk.


"A tawk e engmah sawi angai tawh lo,Zorin kan fapa hi lo ti buai tawh lo la,a rawn biak che leh rawn hmuh che a tum pawn lo hnar ve bawk la,in kawp thei in ni lo tih hi chiang takin hre la ani mai"


"In kawp thei in ni lo" a tih chuan thil dang zawng aiin min ti na a,ka zak bawk si.Chutia nutling puiin kei hmeichhe tleirawl hma a,hmaichhan ngei a chutiang tawngkam a min ti chu a dawnsawn dan pawh ka hre lo,ka tah a chhuak takzet bawk.



"Lungngai suh Pi Zuala,in fapa zawk kha lo control ula,kan fanu chungchang leh a awmdan tur a thurawn pe tur chuan hei chhungte min nei ve a,kan hrilh ve thei vek a nia" Pate-a chuan a ti let ve siah a.



"Aaah Pa Rin,Pitei hi a rilru a buai em a,lo hrethiam hram mai ru,ka haw phawt ange" U sangtei chuan a rawn ti sup a,Pi Zuali pawh chu ngawi reng chuan a tho chhuak ve nulh a,engmah sawi zawm lemlo chuan an in zui chhuak nghal zat a.Pate-a pawh chuan engmah sawi zui tawh lo chuan an kal chu a thlir liam ve ta ringawt bawk.




An chhuah fel hnu ah chuan, Pate-a hmel hmuh chu ka hreh takzet,zawhna tam tak a hmel ah chuan a lang zutzut a,mak tihna, lungawi loh na leh lainatna te chu a rawn lang zutzut a,min hau hrep mahse pawi ka ti lo,khati tak khan ka thlavang a hauh a,keimah a vangin a tawngkam hman ngai hauh loh nutling hma ah a hmang chhuak a.Engtin pawn min ti se pawi ka ti lo,a lak ah hian ka lawm emem zawk.A hma aiin ka zah sawt bawk.A mah lah chu tawng tum ang pawn a lang lo,chuchu hrehawm tak ani.



"Pate ih" in thlahrung lutuk chuan ka ti chhuak sup a,a hmel ah pawh ka en ngam lo.


"Nakin ah kan la sawi dawn nia,han mu phawt rawh" a tih tak ah chuan rang lutuk in ka room ah ka tlan chho nghal a, ka phone chu ka han en a,miss called emaw message tak ngial pawh Sir Samu-a hnen a tangin ka la dawng lo.Tunah chuan engkim a tawp taktak tawh dawn a ni ngei ang.Tinge ti maimai a min beidawn san tur si engvangin nge bul min tan pui le?.Anu in a min tih dan te kha a hre ve a ngem le? Nge ni a,a man a rawn tir zawk?."Harsat leh buaina lo thleng mahse ka kut hi vuan tlat la,thlah ngai suh" ti a ka hnen a min hrilh thin tu kha tinge harsatna a lo thlen hian vawn tur a awwm ngai loh le?

Lalpa heng natna zozai tuar tur hian i lak ah eng tih sual ka neih bik?. Hmangaih nei thei turin nangin thinlung min pe a,tu emaw hmangaih chu thil sual ani leh si em ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)